དད་དྲན་མིག་ཆུའི་རྦ་རླབས །

འགྲོ་ཀུན་བྱམས་པའི་ཐུགས་ཀྱི་རྗེ་བོ་སྤྱན་རས་གཟུགས། །

ཤེས་དབལ་ཀུན་མཁྱེན་འཕགས་པའི་ལྷ་པོ་འཇམ་པའི་དབྱངས། །

བསྟན་དགྲ་འཇོམས་པའི་ཁྲོ་བོའི་རྣམ་རོལ་གསང་བའི་བདག །

རིག་གསུམ་མགོ་པོ་སྒོ་གསུམ་དད་པའི་ཞབས་ལ་འདུད། །

རྨད་བྱུང་ཐུབ་བསྟན་དགེ་སློང་བི་མའི་རྣམ་རོལ་པ། །

སྐུ་ཡི་མཚན་དཔེ་གཟི་བྱིན་མཁའ་དབྱིངས་བཞད་མཛེས་ནས། །

ཐུགས་རྗེའི་ཉི་འོད་བདག་ལ་ཅུང་དགོངས་མཛད་པར་ཞུ། །

དྲན་པའི་མིག་ཆུ་རྦ་རླབ་འདི་ལྟར་རྒྱང་འབོད་བྱ། །

སྐུ་མཚན་དཔེ་གཟི་བྱིན་ཇེ་དྲན། །

གསུང་ཟབ་མོའི་ཆོས་འདི་ཇེ་དྲན། །

ཐུགས་རྗེ་བོས་བྱམས་པ་ཇེ་དྲན་རེད། །

འདི་བསམ་བཞིན་བསམ་བཞིན་བླ་མ་དྲན། །

དགོན་མཛེས་པའི་ཆོས་ཀྱི་གྲོང་ཁྱེར་ན། །

སྐྱབས་བླ་མའི་གསེར་ཁྲི་སྟོང་བ་རེད། །

སྐུ་མཐོང་བ་དོན་ལྡན་མི་མཇའ་ཀི །

འདི་བསམ་བཞིན་བསམ་བཞིན་བླ་མ་དྲན། །

གསུང་ཟབ་ཆོས་ཚངས་པའི་རྔ་སྒྲའི་ཁྲོད། །

རྗེ་བླ་མའི་ཞལ་གསུང་མི་ཐོས་ཀི །

གསུང་གདམས་ངག་བདུད་རྩི་མ་ཐོས་ན། །

འདི་བསམ་བཞིན་བསམ་བཞིན་བླ་མ་དྲན། །

སྐུ་མི་བཞུགས་མི་མངོན་དབྱིངས་སུ་འཐིམ། །

གསུང་ཨུ་དུམ་ཝ་ར་བཞད་ཀྱང་དཀོན། །

ཐུགས་རྗེ་བོའི་རྣམ་རོལ་མ་བྱོན་ནམ། །

འདི་བསམ་བཞིན་བསམ་བཞིན་བླ་མ་དྲན། །

སྐུ་མི་འགྱུར་ཆོས་སྐུ་ཀུན་ཏུ་བཟང་། །

གསུངས་མ་འགགས་ཟམ་མོ་རྫོགས་པ་ཆེ། །

ཐུགས་བྱང་ཆུབ་སེམས་དཔའ་སྲས་བརྒྱད་པོ། །

དད་མཆོད་པའི་སེམས་ཀྱི་བླ་མར་འདུད། །

སྐུ་དུས་གསུམ་མུན་པ་སེལ་པའི་སྐུ། །

སྐུ་ཞི་བ་མཐོང་གྲོལ་བི་མའི་སྐུ །

སྐུ་དྲག་པོ་ཁྲོ་བོ་གསང་བདག་སྐུ། །

སྐུ་རྣམ་པར་རོལ་པ་ཁྲི་འབུམ་སྐུ། །

འདི་བསམ་བཞིན་བསམ་བཞིན་བླ་མ་དྲན། །