གད་རྒྱངས།

༡

མི་ཚེའི་ལམ་ཕྱོགས་བསྙེག་ནས། །

ཤེས་བྱའི་རི་བོ་བརྒལ་དུས། །

མི་ཚོགས་རླུང་ཁ་རྒོད་པས། །

དུག་གི་ཁ་རླངས་འཕྱུར་སོང་། །

སེམས་ཀྱི་སྟེང་མཐའ་ཀུན་ལ། །

གནོད་པའི་གཟུགས་མེད་སྦྱིན་སོང་། །

འོན་ཀྱང་རང་སེམས་སྐྱོ་བས། །

ཉམས་ཆུང་ལྷོད་པའི་ངང་ཚུལ། །

མི་ཁ་རླངས་པའི་དུ་བ། །

རྒྱང་གི་མཐའ་ནས་ཉམས་སོང་། །

༢

རང་སེམས་མཛེས་ལ་དུང་བས། །

གཞོན་མའི་ལང་ཚོ་མཛེས་སོང་། །

མཛེས་སྡུག་དབྱར་གྱི་མེ་ཏོག །

གཡུ་སྤྲང་ཁོའི་སེམས་འགུག་སོང་། །

དགའ་གཏམ་རྒྱང་གླུ་ལེན་ཞོར། །

སེམས་ཤུགས་བརྟན་པོ་ཡོད་ཀྱང་། །

མཛེས་སྡུག་དབྱར་གྱི་མེ་ཏོག །

སྟོན་གྱི་དུས་ལ་རྒུད་སོང་། །

ཁོའི་སེམས་སྐྱོ་བའི་གཞི་ཡང་། །

སེམས་ཤུགས་གཞན་ལ་བལྟམས་མེད། །

༣

འཚོར་པའི་སྒྲུང་ལ་དགའ་བས། །

ཁེར་གཏམ་སྒྲུང་ལ་བལྟམས་དུས། །

འདས་པའི་ལོ་ཟླའི་སྒྲུང་གིས། །

བློ་བུར་ངེས་བྱུང་གནང་བྱུང་། །

མིག་མཐའ་ཆུ་ཡིས་གང་རུང་། །

ཕྱིར་ཡོང་དུས་སྐབས་མེད་པའི། །

སེམས་ལ་དགའ་དུང་ཆེ་བས། །

ཞེན་ཆགས་སེམས་ཀྱི་རི་མོ། །

ད་ལྟ་བསུབ་རྒྱུ་མེད་པས། །

རང་སེམས་སྐྱོ་བའི་གཞི་རེད། །

༤

མོས་པའི་ལམ་ཁ་བསྙེག་ནས། །

ལོ་ཟླའི་ཡུན་ལ་བརྒལ་དུས། །

མི་ལ་ཕྲག་དོག་ཆེ་བས། །

ཆ་སྨད་རླུང་ལ་སྐུར་དུས། །

ཡུལ་ཕྱོགས་གཅིག་པའི་སྤུན་ཟླས། །

སེམས་ཚོར་ག་འདྲ་གནང་ནས། །

སེམས་གཏམ་ཡིག་ཆུང་ནག་པོ། །

རི་ལུང་འགའ་ལ་བརྒལ་ནས། །

རྒྱང་རིང་འཁྱམས་པོ་ང་ལ། །

སྐུར་བའི་སེམས་ཤུགས་ཨེ་མཆིས། །

༥

སོ་སོར་ཁ་ཁ་བྲལ་ནས། །

ལོ་ཟླའི་རྒྱུ་སྐར་མང་ཡང་། །

འཚོ་བའི་བཀའ་དཀའ་ཚགས་ཁྲོད་དུ། །

སེམས་ལ་གནོད་ཤུགས་ཆེ་སྐབས། །

མཚན་མོ་ཁེར་རྐྱང་ཁྲོད་དུ།

ལུས་མཐུན་སེམས་ཀྱི་གྲོགས་པོ། །

དྲན་པའི་སེམས་རྩ་འཁྲུག་ནས། །

མིག་མཐའ་མཆི་མས་གང་དུས། །

འདས་པའི་འཚོ་བའི་སྒྲུང་རིང་། །

དྲན་ན་ན་བའི་གཞི་རེད། །

༦

ཡུལ་ཕྱོགས་གཞན་མཐའ་འགྲིམ་ནས། །

ཚིག་གི་སྟེང་འོག་འཚོལ་འདོད། །

རོལ་མོ་དབྱངས་རྟའི་གད་རྒྱངས། །

ཁོ་བོས་ཐེངས་གཅིག་ཚོར་བས། །

དཔེ་ལ་དཔེ་བཞག་ཚིག་འདི། །

སྙན་དང་མི་སྙན་ཨེ་མཆིས། །

ཨ་མ་དབྱངས་ཅན་ལྷ་མོས། །

རོལ་མོ་དབྱངས་རྟའི་གད་རྒྱང་། །

ད་རུང་ཐེངས་གཅིག་དཀྲོལ་རོགས། །

------༢༠༢༤/ ༡/༢༠