༄༅།།སློབ་འབྲིང་རིམ་པའི་བསྡུས་གྲྭའི་སློབ་ཁྲིད་ཀྱི་བྱེད་ཐབས་འགའ་ཞིག་གླེང་བ།

    དེ་ཡང་བསྡུས་གྲྭ་ནི་རང་རེའི་བོད་མི་རིགས་ལ་མ་གཏོགས་མི་རིགས་གཞན་ལ་མེད་པའི་ཐུན་མོང་མ་ཡིན་པའི་རིག་གནས་ཤིག་ཡིན་ལ།དུས་རབས་བཅུ་གཅིག་པའི་ནང་དུ་གངས་ཅན་ཁ་བའི་ལྗོངས་ཀྱི་རིག་པའི་དབང་ཕྱུག་ཆེན་པོ་ཆ་བ་ཆོས་ཀྱི་སེང་གེ་མཆོག་གིས་གསང་ཕུ་དགོན་པའི་མཁན་པོ་མཛད་རིང་ཚད་མའི་དགོངས་འགྲེལ་གྱི་བསྟན་བཅོས་ཆེན་པོ་ཚད་མ་སྡེ་བདུན་ལ་སོགས་པར་གཞི་བཙུགས་ནས་བསྡུས་གྲྭ་ཞེས་པའི་རིགས་ལམ་འདིའི་སྲོལ་ཐོག་མར་ཕྱེ་ཞིང་།དེ་ནས་བཟུང་སྟེ་བསྡུས་གྲྭའི་རིགས་ལམ་འདི་ལ་བརྟེན་ནས་རང་རེའི་བོད་གངས་ཅན་གྱི་ལྗོངས་སུ་ནམ་མཁའི་སྐར་ཚོགས་ཀྱི་གྲངས་ལ་འཕྱ་བའི་མཁས་པ་བགྲང་ལས་པ་བྱོན་ཞིང་།གནམ་གྱིས་ས་བཀབ་པ་ལྟ་བུའི་རྗེས་འཇུག་གི་མཁས་པ་མང་པོས་བསྡུས་གྲྭའི་བསྟན་བཅོས་རི་བོའི་གཏོས་དང་མཉམ་པ་མང་བོ་མཛད་དེ་བསྡུས་གྲྭའི་རིགས་ལམ་འདི་བོད་ཁུལ་གྱི་དགོན་སྡེ་ཆེ་ཁག་སོ་སོ་ནས་རྩ་བ་ཚུགས་ཤིང་ལོ་འདབ་རྒྱས་སུ་བཅུག་ནས་ལོ་ངོ་སྟོང་ཕྲག་ལ་ཉེ་བ་ཕྱིན།བསྡུས་གྲྭ་སློབ་གྲྭ་ཆེ་འབྲིང་ཁག་ཏུ་ལོ་རབས་བརྒྱད་ཅུ་བའི་མཇུག་ནས་བཟུང་དར་ཡོད་ནའང་།དེ་ནི་རང་ལུགས་ཀྱི་མཚན་མཚོན་གཞི་གསུམ་ངོ་སྤྲོད་ཙམ་དང་རང་ལུགས་བློར་བཟུང་བ་ལ་གཞིར་བཅས་དེ་ལ་འགྲེལ་བཤད་ཀྱི་ཐབས་ཀྱིས་ཁྲིད་པ་མ་གཏོགས།དངོས་སུ་བོད་ཁུལ་གྱི་དགོན་སྡེ་དག་ཏུ་སློབ་ཁྲིད་བྱས་དང་བྱེད་མུས་སུ་མཆིས་པ་ལྟར་དགག་གཞག་སྤོང་གསུམ་ཚང་བའི་སྒོ་ནས་མ་དར་བར་མངོན་ཞིང་།ཉེ་བའི་ལོ་འདི་གའི་རིང་ལ་མཚོ་སྔོན་གྱི་མཚོ་ལྷོ་ས་ཁུལ་ནས་འགོ་བརྩམས་ཤིང་ས་གནས་ཀྱི་བསླབ་གཞི་ལེགས་སྒྲིག་སྒོས་སློབ་འབྲིང་གི་བསླབ་གཞིའི་ནང་དུའང་རང་རྐྱ་འཕེར་བའི་བསྡུས་གྲྭའི་བསླབ་གཞི་ཞིག་བསྡུ་སྒྲིག་བྱས་ཏེ།སློབ་ཁྲིད་བྱེད་པའི་ཚ་རླབས་ཤིག་གང་ས་གང་དུ་འཕྱུར་བཞིན་ཡོད་ཅིང་།འདི་ལས་བསྡུས་གྲྭའི་རིགས་ལམ་འདི་ཉིད་དགོན་སྡེའི་རིག་གནས་ཤིག་ཡིན་པར་འདོད་པའི་ལོག་རྟོག་གི་དྲ་བ་བཅད་དེ།རང་རེའི་མི་རིགས་ཀྱི་རིག་གནས་ཀྱི་ཉིང་བཅུད་ཡིན་པར་རྟོགས་པ་དང་།གསུང་རབ་ཀུན་ལ་བལྟ་བའི་མིག་ཏུ་མཐོང་ནས་སློབ་གྲྭ་ཆུང་འབྲིང་ཁག་ཏུའང་ཁྱབ་བརྡལ་དུ་འགྲོ་བཞིན་པ་འདི་ནི་ང་ཚོ་བོད་ཀྱི་རིག་གནས་རྒྱུན་འཛིན་དང་དར་སྤེལ་ཐད་ནས་བཤད་ན་ཧ་ཅང་དགའ་འོས་པའི་དོན་ཆེན་ཞིག་ཡིན་པ་རེད།
   དེ་ལྟ་ནའང་།བསྡུས་གྲྭའི་རིགས་ལམ་སློབ་གྲྭ་ཆུང་འབྲིང་ཁག་ཏུ་དར་ནས་དུས་ཡུན་རིང་བོ་འགོར་མེད་སྟབས།སློབ་ཁྲིད་ཀྱི་ཐབས་ལམ་ཐད་ནས་བསླབ་ཚན་གཞན་ལྟར་སློབ་ཁྲིད་བྱེད་ཐབས་ཚད་ལྡན་ཞིག་རྐང་ཚུགས་མེད་པ་དང་།སློབ་མའི་ཆུ་ཚད་མཐོ་དམན་ལ་མ་བལྟས་པར་དགོན་སྡེའི་སློབ་ཁྲིད་བྱེད་སྟངས་ཨུ་ཚུགས་ཀྱིས་སྤྱོད་པ།བསྡུས་གྲྭའི་བསླབ་ཚན་གྱི་ཁྱད་ཆོས་དངོས་དང་བསྟུན་མ་ཐུབ་པ་སོགས་ཀྱི་དབང་གིས་བསྡུས་གྲྭའི་སློབ་ཁྲིད་ཐད་དཀའ་ངལ་མི་ཉུང་བ་ཞིག་ཡོད།ཡིན་ཡང་འདི་ནི་ཐབས་ལམ་འཚོལ་སྙེག་གི་གོ་རིམ་ཞིག་ཏུ་ངེས་པས།སློབ་ཁྲིད་ཐབས་ལམ་ལ་བསམ་བློ་བརྗེ་རེས་བྱས་ན་སྙམ་པའི་འདུ་ཤེས་ཀྱིས་བསྐུལ་ཏེ།གཤམ་ནས་བདག་གིས་བསྡུས་གྲྭའི་སློབ་ཁྲིད་ཀྱི་ཐད་ནས་རང་བློས་ལྕོགས་ཚོད་ཀྱིས་ཅུང་ཟད་སྤྲོ་བར་འདོད་དོ།།
གཅིག རང་ལུགས་རྣམས་ངེས་པར་དུ་བློར་བྱང་ཆུབ་པར་བྱ་དགོས།
   སྤྱིར་རང་རེའི་བསེ་བསྡུས་སོགས་བསྡུས་གཞུང་དུ་དགག་བཞག་སྤོང་གསུམ་ལས་ཐོག་མར་གཞན་ལུགས་དགག་པ་དང་།བར་དུ་རང་ལུགས་བཞག་པ།མཐའ་མར་རྩོད་པ་སྤོང་བ་བཀོད་ཡོད་ནའང་སློབ་གྲྭར་བསྡུས་གྲྭའི་སློབ་ཁྲིད་བྱེད་དུས་རང་ལུགས་སྔོན་དུ་འགྲོ་རྒྱུ་ནི་ཤིན་ཏུ་གལ་ཆེ་བར་སེམས་ཏེ།ཕ་རོལ་བའི་རྒྱུད་ཀྱི་མ་རྟོགས་ལོག་རྟོག་ཐེ་ཚོམ་གྱི་ཆ་དེ་སེལ་བར་འདོད་པ་ལ་ལུང་དང་རིགས་པའི་རྒྱབ་རྟེན་ཡོད་པའི་རང་ལུགས་ཡང་དག་པ་ཞིག་འཇོག་ཐུབ་དགོས་ཤིང་།རང་ལུགས་ཡང་དག་པ་ཞིག་འཇོག་མ་ཐུབ་ན་གཞན་གྱི་ལུགས་དེ་ཡང་དག་མིན་མི་ཤེས་པར་མ་ཟད།གཞན་གྱི་རྩོད་པ་ཟློག་པར་བྱེད་མི་ནུས་པ་དེ་ནི་གཡུལ་ལ་ཆས་ཀྱང་རང་གཞན་ཕྱོགས་གཉིས་ལས་རང་ངོ་མི་ཤེས་པ་ལྟར་འགྱུར་ངེས་པས།སློབ་མ་རྣམས་ལ་རང་ལུགས་སློབ་ཚན་རྣམས་དུས་ལྟར་བློར་འཛིན་པའི་རེ་བ་འདོན་པ་དང་།རང་ལུགས་ཀྱི་མཚན་མཚོན་གཞི་གསུམ་དང་དབྱེ་བ་སོགས་བློ་ལ་བྱང་དུ་འཇུག་རྒྱུ་ནི་བསྡུས་གྲྭར་འཇུག་པའི་ལས་དང་པོ་ཞིག་ལ་ཚང་དགོས་པའི་མ་མཐའི་ཆ་རྐྱེན་ནོ།།
གཉིས། སློབ་ཁྲིད་བྱེད་དུས་ཕལ་སྐད་ཀྱི་ལམ་ནས་འཁྲིད་རྒྱུ།
བསྡུས་གྲྭའི་ཐལ་འགྱུར་ལས་རྟགས་གསལ་རྩོད་གཞི་ཡི་མིང་བརྡ་རྣམས་ལས་དང་པོ་བ་ཞིག་གི་ངོས་ཐད་ནས་ཁོ་ཚོའི་ཆུ་ཚད་དངོས་དང་བསྟུན་ན་ཅུང་གོ་དཀའ་བས།ཐོག་མར་ཕལ་སྐད་ཀྱི་ལམ་ནས་འཁྲིད་རྒྱུ་ནི་ཤིན་ཏུ་གལ་ཆེ་སྟེ།ཆོས་ཅན་ཞེས་པ་རྩོད་གཞི་དང་།།ཐལ་ཞེས་བྱ་བ་གསལ་བ་ཡིན།།ཡིན་པའི་ཕྱིར་ནི་རྟགས་ཡིན་ལ།།རྟགས་གསལ་རྩོད་གཞི་ངོས་ཟིན་བྱ།།ཞེས་པ་ལྟར།དཔེར་ན།བུམ་པ་ཆོས་ཅན།དངོས་པོ་ཡིན་པར་ཐལ།དོན་བྱེད་ནུས་པ་ཡིན་པའི་ཕྱིར་ལྟ་བུ་ལ་མཚོན་ན།བུམ་པ་ཆོས་ཅན་ཞེས་པ་ནི་བུམ་པ་རྩོད་གཞིར་བཟུང་བ་དང་།དངོས་པོ་ཡིན་པར་ཐལ་ཞེས་པས་དངོས་པོ་ཡིན་པར་འགྱུར་དང་དངོས་པོ་ཡིན་དགོས་པར་འགྱུར།དོན་བྱེད་ནུས་པ་ཡིན་པའི་ཕྱིར་ཞེས་པས་དོན་བྱེད་ནུས་པ་ཡིན་པའི་སྟབས་ཀྱིས་སམ་དོན་བྱེད་ནུས་པ་ཡིན་པའི་རྒྱུ་མཚན་གྱིས་ཞེས་ཕལ་སྐད་ཀྱི་ལམ་ནས་འཁྲིད་དགོས་ཤིང་།གཞན་ད་དུང་འདོད་ལན་དང་རྟགས་མ་གྲུབ།འགལ་ཁྱབ།ཁྱབ་པ་མ་བྱུང་།ཅིའི་ཕྱིར་བཅས་ལན་དོན་མཐུན་བཞི་དང་།ཁྱབ་པ་ཁས་དང་རྟགས་ཁས།འཁོར་གསུམ་དང་ཁྱབ་པ་འབུད་སོགས་ཀྱང་ཕལ་སྐད་ཀྱི་ལམ་ནས་འཁྲིད་དེ་སློབ་མ་ཚོས་བློ་ངོ་ནས་བྱང་ཆ་ལྡན་པར་བྱ་དགོས་ཤིང་།དེ་ལྟར་བྱས་ཏེ་བསྡུས་གྲྭའི་བརྡ་ཆད་རྣམས་སློབ་མ་ཚོར་བག་ཆགས་བརྟན་པོ་ཞིག་བཞག་པའི་རྗེས་སུ་ད་གཟོད་བསྡུས་གྲྭའི་གཞུང་གི་བརྡ་ཆད་དངོས་ལག་ལེན་སྒོས་ཕལ་སྐད་དང་གྲོང་སྐད་མི་བསྲེས་པའི་གོ་རིམ་ངེས་ཅན་ཞིག་བརྒྱུད་དགོས་པ་རེད།
གསུམ། བསླབས་ཟིན་པའི་ཤེས་བྱ་དང་འབྲེལ་ནས་སློབ་ཁྲིད་བྱ་རྒྱུ།
བསྡུས་གྲྭའི་རིགས་ལམ་འདི་ཐོག་མར་བོད་ཀྱི་དགོན་སྡེ་ཆེ་ཁག་སོ་སོ་ནས་རྩ་བ་ཚུགས་ཤིང་རྩེ་མོ་རྒྱས་པའི་སྟབས་ཀྱིས་ལྟོས་བཅས་ཀྱིས་དགོན་སྡེའི་ཁོར་ཡུག་དང་འབྲེལ་བའི་གནད་དོན་གང་མང་ཞིག་རྩོད་བྱར་བཟུང་བ་ཅུང་མང་བ་དང་།དགོན་པ་དང་འབྲེལ་སྟབས་བསྡུས་གྲྭའི་ཐལ་འགྱུར་གྱི་འགྲོས་རིམ་ལ་ཆོས་ལུགས་ཀྱི་ཐ་སྙད་མང་བོ་ཞུགས་པས།སློབ་གྲྭ་ཆུང་འབྲིང་གི་དགེ་སློབ་མང་བོ་ཞིག་ལ་མཚོན་ན་འདྲིས་ཆ་ཆེན་པོ་མེད་པ་དང་།སློབ་པའི་དུས་ཚོད་ཐུང་བ་སོགས་ཀྱི་དབང་གིས་དེའི་ཐད་དཀའ་ངལ་མི་ཉུང་བ་ཞིག་ཡོད།དེར་བརྟེན།བསྡུས་གྲྭའི་ཐལ་འགྱུར་གྱི་འགྲོས་རིམ་དང་རིགས་ལམ་ལ་བྱང་བའི་ཆེད་དུ།ང་ཚོས་བསྡུས་གྲྭའི་བསླབ་ཚན་དུ་བཀོད་པའི་གཞན་ལུགས་དགག་པ་དང་།རང་ལུགས་བཞག་པ།རྩོད་པ་སྤོང་བ་བཅས་ཀྱི་སློབ་ཚན་དག་ཡང་བསྐོར་བསྐྱར་བསྐོར་བྱས་ནས་མི་འདུག་པར་སློབ་མ་ཚོས་དེ་སྔར་བསླབས་ཟིན་པའི་སུམ་ཅུ་བའི་སྐོར་དང་ལོ་རྒྱུས་ཀྱི་སྐོར།གཞན་སྐྱེ་དངོས་དང་ས་ཁམས་ཀྱི་སྐོར་སོགས་ལས་འཕྲོས་ཏེ་ཐལ་འགྱུར་མང་པོ་བསྒྲིག་ཏུ་འཇུག་དགོས་ཤིང་།སློབ་མ་ཚོར་ཡང་དེ་མཐུན་གྱི་རེ་བ་ནན་མོ་བཟུང་སྟེ་ལས་བྱ་བཀོད་སྒྲིག་བྱེད་པ་དང་།བསླབས་ཟིན་པའི་སུམ་ཅུ་བ་དང་ལོ་རྒྱུས་སོགས་ཐད་ཀྱི་གནད་དོན་མང་བོ་རྩོད་བྱར་བཟུང་ནས་སློབ་ཁྲིད་བྱས་ན་གཅིག་ནས་འཆད་པ་པོ་དགེ་རྒན་གྱིས་བརྡ་སྤྲོད་སླ་ཞིང་།གཉིས་སུ་ན་ཉན་པ་པོ་སློབ་མའི་བློ་ངོར་འཆར་སླ་ལ་འདྲིས་ཆ་ཆེན་པོ་ཡོད་ཅིང་།སློབ་འདོད་ཀྱི་སྤྲོ་བ་བསྐྱེད་པ་སོགས་ཀྱི་དགེ་མཚན་མི་ཉུང་བ་ཞིག་ལྡན་པ་དང་།དེ་ལྟར་བྱས་ན་ཞར་ལ་སློབ་ཁྲིད་སྤུས་ཚད་མཐོར་འདེགས་ཡོང་བར་ཡང་ནུས་པ་མི་དམན་པ་ཞིག་ཐོབ་སྲིད་སྙམ།
བཞི། དགེ་རྒན་གྱི་སློབ་ཁྲིད་དང་སློབ་མའི་རྩོད་པ་གཉིས་ཟུང་དུ་འབྲེལ་དགོས་པ།
   སྤྱིར་བསླབ་ཚན་རེ་རེ་ལ་ཐུན་མོང་མ་ཡིན་པའི་སློབ་ཁྲིད་བྱེད་ཐབས་དང་སློབ་སྦྱོང་བྱེད་ཐབས་རེ་ཡོད་སྲིད་པ་བཞིན།བསྡུས་གྲྭའི་བསླབ་ཚན་འདི་ལའང་བསླབ་ཚན་གཞན་དང་མི་མཐུན་པའི་སློབ་ཁྲིད་བྱེད་ཐབས་ཤིག་ཡོད།བསྡུས་གྲྭའི་བསླབ་ཚན་འདི་འཁྲིད་དུས་སློབ་མ་ཚོར་བསྡུས་གྲྭའི་བརྡ་ཆད་དང་ཐལ་འགྱུར་གྱི་འགྲོས་རིམ།ཐལ་འགྱུར་ལ་ལན་གདབ་ཚུལ་སོགས་ལ་གོ་བ་རགས་ཙམ་ཆགས་པའི་རྗེས་སུ་དུས་ཚོད་ཀྱི་ཆ་ནས་དགེ་རྒན་གྱི་སློབ་ཁྲིད་ཉུང་ཙམ་དང་སློབ་མའི་རྩོད་པ་མང་ཙམ་བཀོད་སྒྲིག་བྱས་ཤིང་།དགེ་རྒན་གྱིས་སློབ་ཁྲིད་བྱེད་སྐབས་རྟགས་གསལ་འཕངས་ཏེ་སློབ་མ་རྣམས་ལ་ལན་གདབ་ཏུ་འཇུག་པ་དང་།དགེ་སློབ་གཉིས་ཀྱི་རྩོད་པ་འཕེན་པ།སློབ་མ་ཕན་ཚུན་བར་རྩོད་པ་བྱེད་དུ་བཅུག་ནས་སློབ་མའི་བློ་སྒོ་འབྱེད་པ་དང་དོགས་གནད་མང་བོ་བསླངས་དགོས་པ་མ་གཏོགས་ཁས་ལེན་འཛིན་ཚུལ་མཐའ་གཅིག་ཏུ་མི་གསུངས་པར་སློབ་མ་རང་ཉིད་ཀྱིས་རྩོད་པ་བྱེད་པའི་གོ་རིམ་ཁྲོད་ལན་ཇི་ལྟར་གདབ་ཚུལ་དང་ཁས་ལེན་ཇི་ལྟར་འཛིན་ཚུལ་སོགས་ལ་བློ་གོམས་པར་བྱེད་དགོས།དེ་ལྟར་བྱས་ཚེ་སློབ་མ་ཚོས་ཉིན་རྒྱུན་རྩོད་པ་བྱེད་པའི་གོ་རིམ་ཁྲོད་བསྡུས་གྲྭའི་རིགས་ལམ་ལ་རང་ཤུགས་ཀྱིས་བྱང་ཆ་ལྡན་པ་དང་གཅིགསྔར་ཁྲིད་པའི་དོགས་གནད་ཅན་གྱི་ཤེས་བྱར་ཡིན་མིན་གྱི་བརྡར་ཤ་ཆོད་ཅིང་།ཡོད་མེད་ཀྱི་ངེས་ཤེས་འདྲོངས་ནུས་ལ་བག་ཆགས་ཟབ་མོ་འཇོག་ཐུབ་པ་དང་གཉིས།སློབ་མ་ཚོས་སྐད་ཆ་བཤད་པའི་གཏན་ཚིགས་ཀྱི་ནུས་པ་སོགས་སྐྱེད་སྲིང་བྱེད་ཐུབ་བོ།།
ལྔ། སློབ་ཁྲིད་བཀོད་སྒྲིག་བྱེད་སྟངས།
   སྤྱིར་སློབ་གསོ་བཅོས་བསྒྱུར་གྱི་རྩ་བ་ནི་དགེ་སློབ་རྣམས་ཀྱི་སློབ་གསོ་ལ་བཟུང་བའི་འདུ་ཤེས་བཅོས་བསྒྱུར་ལ་རག་ལས་ཤིང་།སློབ་གསོ་བཅོས་བསྒྱུར་གྱི་འདུ་ཤེས་དེ་སློབ་ཁྲིད་དངོས་ཀྱི་ལག་ལེན་དང་མྱོང་བ་ལ་བརྟེན་ནས་ཐོན་དགོས་སྟབས།བསྡུས་གྲྭའི་སློབ་ཁྲིད་བཀོད་སྒྲིག་གི་ཐད་ནས་དགེ་རྒན་གྱིས་རང་ལུགས་སློབ་ཚན་རྣམས་སྔོན་ལ་འཁྲིད་དགོས་ཤིང་།གཞན་ལུགས་དགག་པ་དང་རྩོད་པ་སྤོང་ཚུལ་གྱི་སློབ་ཚན་རྣམས་རྗེས་ནས་འཁྲིད་ན་སློབ་མའི་ཆུ་ཚད་དང་འཚམ་པ་གོང་དུ་ཞུས་ཟིན་པ་ལྟར་ལགས་ཤིང་།གཞན་ལུགས་དགག་པ་དང་རྩོད་པ་སྤོང་ཚུལ་གྱི་སློབ་ཚན་རྣམས་གཟའ་འཁོར་གཅིག་ལ་སློབ་ཁང་དུ་འཁྲིད་རྗེས།གཟའ་འཁོར་དེའི་རིང་གི་ཤེས་བྱ་རྣམས་སློབ་མའི་ཡིད་ལ་འཛིན་བདེ་བ་དང་།ཤེས་བྱ་སྲ་བརྟན་ཡོང་བ།བསྡུས་གྲྭའི་རིགས་ལམ་བཅས་ལ་བྱང་ཆ་ཡོང་སླད།གཟའ་མཇུག་ལ་ཆེད་དུ་སློབ་ཐུན་གཉིས་ཙམ་གྱི་དུས་ཚོད་བཀོད་སྒྲིག་བྱས་ཏེ་སློབ་ཁང་ཕྱི་རོལ་ནས་ཐུན་མོང་གི་རྩོད་པ་དང་།ཟླ་བོ་ཁ་སྤྲོད་ཀྱི་རྩོད་པ་སོགས་རྣམ་པ་མི་འདྲ་བའི་རིགས་ལམ་འགྲན་རྩོད་བྱེད་དུ་བཅུག་ན་བཟང་བར་སྙམ་ཞིང་།དེ་ལྟར་བྱས་པ་བརྒྱུད་ནས་སློབ་མའི་གཟའ་འཁོར་གཅིག་རིང་གི་ཤེས་བྱ་ཕྱོགས་བསྡོམས་དང་།བསླབ་གཞིའི་སྟེང་གི་གཞུང་ལུགས་རང་བཞིན་གྱི་ཤེས་བྱ་ཁོ་ན་སྦྱོང་བ་ལས་བརྒལ་ཏེ།ལག་ལེན་གྱི་ཁྲོད་དུ་ཤེས་བྱ་སྦྱོང་བའམ་གཞུང་ལུགས་རང་བཞིན་གྱི་ཤེས་བྱ་དག་དངོས་སུ་ལག་ལེན་གྱི་ཁྲོད་ནས་བཀོལ་སྤྱོད་བྱ་ཐུབ་པས།བསྡུས་གྲྭའི་རིགས་ལམ་སྦྱོང་བརྡར་དང་རྟགས་གསལ་འཕེན་དུས་ཀྱི་ཉམས་འགྱུར་སོགས་ལའང་རང་ཤུགས་ཀྱིས་ཕན་ནུས་མི་ཉུང་བ་ཞིག་མཆིས་སོ།།
དྲུག སློབ་མར་ལས་བྱ་བཀོད་སྒྲིག་བྱེད་ཐབས།
   སློབ་གསོ་བཅོས་བསྒྱུར་གྱི་རླབས་རྒྱུན་གང་སར་འཕྱུར་ཀྱང་བཅོས་བསྒྱུར་ཀྱི་རླབས་ཀྱིས་མ་བསྐྱོམས་པ་ནི་སློབ་གྲྭ་ཆུང་འབྲིང་གི་ལས་བྱ་བཀོད་སྒྲིག་བྱེད་སྟངས་འདི་ཡིན་ལ།ལས་བྱ་བཀོད་སྒྲིག་བྱེད་དུས་སློབ་ཚན་རྗེས་ཀྱི་སྦྱང་གཞི་རྣམས་ལས་བྱ་འབྲི་དེབ་སྟེང་དུ་བཤུ་བ་ནི་གནའ་དེང་གི་གཞི་རིམ་སློབ་གསོའི་ཡིད་སྐྱོ་བའི་ལས་ཀ་ལྷག་མ་ཞིག་ཏུ་འཁུམས།དེ་བས།བསླབ་ཚན་གང་དང་གང་ཡིན་རུང་བསླབ་ཚན་གང་དེའི་ཁྱད་ཆོས་དངོས་དང་བསྟུན་ནས་ལས་བྱ་བཀོད་སྒྲིག་བྱེད་པ་ནི་སློབ་ཁྲིད་སློབ་གསོའི་ཆོས་ཉིད་དང་མཐུན་པ་ཞིག་ཡིན་ལ།བསྡུས་གྲྭའི་བསླབ་ཚན་གྱི་ལས་བྱ་བཀོད་སྒྲིག་བྱེད་དུས་སློབ་ཚན་རྗེས་ཀྱི་སྦྱང་གཞི་ནི་སློབ་ཁྲིད་ཀྱི་ཐོག་མཐའ་བར་གསུམ་དུ་དྲི་བ་དྲིས་ལན་གྱི་རྣམ་པས་བསྒྲུབ་འོས་ཤིང་།དེ་ལས་གཞན་སློབ་ཁྲིད་རྗེས་ཀྱི་ལས་བྱ་ནི་གཙོ་བོ་རྟགས་གསལ་བསྒྲིག་སྟངས་ལ་གཞོལ་དགོས་ཏེ།བསྡུས་གྲྭའི་ཆེད་དུ་བསྡུས་གྲྭ་སྦྱོང་བ་མ་ཡིན་པར་རིགས་ལམ་ལ་བྱང་བའི་སླད་དུ་བསྡུས་གྲྭ་སྦྱོང་བ་ཡིན་སྟབས།སློབ་མ་ལ་ལར་ལོ་རྒྱུས་དང་།སློབ་མ་ལ་ལར་བརྡ་སྤྲོད་སོགས་ཀྱི་ཤེས་བྱ་དོགས་གནད་ཅན་དག་ལ་རྟགས་གསལ་བསྒྲིག་པའི་ལས་བྱ་བཀོད་སྒྲིག་བྱེད་པ་དང་།སློབ་མ་ལ་ལར་ཁ་དོག་ཡིན་ན་དམར་པོ་ཡིན་པས་ཁྱབ་ཟེར་ན་ཞེས་པའི་བསླབ་གཞིའི་སྟེང་གི་རྟགས་གསལ་ལ་ལད་མོ་སྒོས་ཁ་དོག་ཡིན་ན་སྔོན་པོ་ཡིན་པས་ཁྱབ་ཟེར་ན་ལྟ་བུའི་དེ་དང་ཆ་འདྲ་བའི་རྟགས་གསལ་བསྒྲིག་སྟངས་ཀྱི་ལས་བྱ་བཀོད་སྒྲིག་བྱས་ཏེ།སློབ་མའི་ཆུ་ཚད་དངོས་དང་བསྟུན་ནས་རིམ་པ་མི་འདྲ་བའི་རྟགས་གསལ་བསྒྲིག་སྟངས་ཀྱི་ལས་བྱ་བཀོད་སྒྲིག་བྱས་ཚེ་སློབ་མ་རང་ཉིད་ཀྱིས་ཀྱང་དེ་མཐུན་གྱི་སྣ་ཚོགས་བསྒྲིགས་ངེས་ལ།དེ་ལས་སློབ་མ་སོ་སོར་ཡང་རང་གི་ཆུ་ཚད་དང་བསྟུན་ནས་བློ་བསྐྱེད་མི་དམན་པ་རེ་ཐོབ་པར་འདོད།
མདོར་ན།དུས་སྐབས་འདི་ནི་བསྡུས་གྲྭའི་རིགས་ལམ་དེ་དགོན་སྡེ་ནས་སློབ་གྲྭར་དར་བའི་གོ་རིམ་གལ་ཆེན་ཞིག་ཡིན་ལ།བསྡུས་གྲྭའི་སློབ་ཁྲིད་དེ་སློབ་གྲྭ་རུ་རྐང་འཛུགས་པའི་ཐོག་མའི་གོམ་པའང་ཡིན་པས།རང་རེའི་གསར་སློབ་པ་རྣམས་ལ་ཆུ་ཚད་ལྡན་མིན་ཅི་རིགས་ཤིག་མཆིས་པ་དང་།སློབ་ཁྲིད་ཀྱི་བཀོད་སྒྲིག་སོགས་དུས་ཚོད་ཀྱི་ཚད་བཀག་གི་རྐྱེན་གྱིས་དགོན་སྡེའི་བསྡུས་གྲྭའི་སློབ་ཁྲིད་བྱེད་སྟངས་ཀྱི་སྒྲོམ་གཞི་དེ་སློབ་གྲྭར་ཇི་མ་ཇི་བཞིན་དུ་བཀོལ་སྤྱོད་བྱས་ན་འཚམ་མིན་དེ་ད་དུང་དགེ་གྲོགས་རྣམས་ཀྱིས་སློབ་ཁྲིད་ཀྱི་གོ་རིམ་ཁྲོད་དཔྱད་བསྡུར་གྱི་གནས་ཤིག་ཡིན་ཞིང་།ཇི་ལྟར་བྱས་ན་ད་གཟོད་བསྡུས་གྲྭའི་རིགས་ལམ་འདི་སློབ་གྲྭ་རུ་རྐང་ཚུགས་པ་དང་སྦྲགས།བསླབ་ཚན་གཞན་པའི་ཁྲོད་དུ་ཇི་ལྟར་བཀོལ་སྤྱོད་བྱེད་པར་བསམ་བློ་གཏོང་རྒྱུ་དེ་ཡང་ཁ་ཚ་དགོས་གཏུགས་ཀྱི་གནད་དོན་གལ་ཆེན་ཞིག་གོ།
མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་གི་གླིང་ཚ་སྙིང་རྒྱལ་འབུམ་ཡིན།