༄༅།།ན་གཞོན་བྱིས་པའི་སློབ་གསོའི་སྐོར་གྱི་བསམ་གཞིགས་ཕྲ་མོ།

སྤྱིར་དེང་རབས་ནི་རྡུལ་ཕྲན་གྱི་དུས་རབས་སམ་མཁའ་དབྱིངས་ཀྱི་དུས་རབས་སུ་འབོད་ཅིང་ཆ་འཕྲིན་གི་དུས་རབས་ཀྱང་བརྗོད། གང་ལྟར་ཚན་རིག་རིག་གནས་མཐའ་དག་ཡར་ངོས་ཟླ་བ་ལྟར་གོང་ནས་གོང་དུ་འཕེལ་ཞིང་། མིའི་རིགས་ཀྱི་བདེ་སྐྱིད་འཚོ་བ་ཡང་ཕུན་སུམ་ཇེ་ཚོགས་དང་རྣམ་པ་ཇེ་ལེགས་སུ་འགྲོ་བའི་དུས་བཟང་ཞིག་དང་འཛམ་གླིང་ཧྲིལ་པོ་ཡང་ཐག་ཇེ་ཉེ་འགྲོ་བའི་མངོན་སོམ་ཞིག་ཀུན་གྱི་མིག་གི་རིག་ཞིང་སེམས་ནས་མྱོང་ཐོབ་པའི་རྒྱུ་ལས་མ་འདས།
དེར་བརྟེན་རང་མི་རིགས་ཡང་རྟ་ཐོག་ནས་བབས་ཞིང་འཕྲུལ་གྱི་འཁོར་ལོ་བསྐོར་སྦྲ་ནག་ནས་ཐོན་ཞིང་བ་གམ་གྱི་ཁང་བཟང་སོགས་རུ་སྤོ། དེ་བཞིན་ལ་ལུང་གྱིས་གཏུམ་པའི་དབེན་གནས་ལ་མི་སྤྲོ་བ་གྲོང་ནང་མི་ཚོགས་རྟ་འདུས་ཀྱི་ས་ལ་འགྲོ་བའི་དུས་འདིར། ཐམས་བཅད་ཡར་རྒྱས་ཅུང་བཟད་འགྲོ་བཞིན་ཡོད་ཀྱང་འདི་ལྟ་བུའི་ཡར་རྒྱས་ནི་བརྒྱུན་མི་རིང་ཞིང་ཕུག་ཀྱི་གནས་ཞིག་གང་ཡོད། རྒྱུ་མཚན་ནི་གཞན་ཞིག་གིས་སྐྱོར་ནས་འགྲོ་བའམ་ལོང་ཁྲིད་བྱེད་པའི་མི་རིགས་སུ་གང་ཡང་འཕེལ་རྒྱས་བྱུང་ཉོང་མེད་པའི་འཛམ་གླིང་རིགས་ཀྱི་དཔའ་བོའི་ངག་སྒོ་ནས་བརྗོད།
ད་འཆི་ལ་ཉེ་བའི་ངའི་ཕ་སྐད་ལ་གསོན་ཤུགས་ཕྲན་བུ་འམ་དབུགས་མི་ཆེད་པ་དགོས་ན་བོད་མི་བུ་རེ་རེ་ཕྲག་སྟེང་དུ་བབས་པའི་འགན་ཁྲི་ལྗི་མོ་ཞིག་རེད། གངས་ཅན་མཁས་པའི་གསུང་ལྟར་སྐད་ཡིག་ནི་མི་རིགས་ཀྱི་སྲོག་ལྟར་རོ། དེས་ན་ང་ཚོའི་ཇི་ལྟ་བུའི་དགོས་ནས་སྲོག་ལ་འགན་ཁུར་བཞིན་སྲོག་ལ་སྲུང་སྐྱོབ་བྱ་དགོས། མ་བཟད་སྐད་ཡིག་འདི་སྲོག་མ་ཆད་པ་དང་དུས་ཚོད་ངེས་མེད་ཞིག་མི་ཡུལ་འདིར་འཚོ་དགོས་ན་ང་ཚོའི་ཆུང་བྱིས་པ་ནས་འགོ་ཙམ་ཞིང་ཆུང་བྱིས་པའི་སློབ་གསོ་ལས་ཤུགས་ཞིག་མི་འབྱུང་ངམ་བསམ་གྱི། ཐད་བརྗོད་ན་བྱིས་པའི་སློབ་གསོ་དེ་རང་མི་རིགས་ཀྱི་ཕ་སྐད་གསོན་མིན་ལ་ཐད་དཀར་འབྲེལ་ཡོད། མ་འོངས་པ་བོད་གངས་ཅན་ཡུལ་ལ་ཇི་ལྟ་བུ་ཞིག་འབྱུང་མིན་ལ་བྱིས་པ་ཚོའི་ལག་ན་ཡོད། དེར་བརྟེན་རྒྱ་བཤིག་འོ་མའི་མར་ལོ་སྟོང་བཤད་ཚིག་གིས་འདོད་པ་དེ་བོད་གངས་ཅན་གྱི་བྱིས་པ་ལ་ཡང་དག་གི་སློབ་གསོ་གནང་ཞིང་མིག་རྒྱང་རིང་པོའི་བློ་སེམས་འགོར་དགོས་པའི་ཕྱོགས་ཀྱི་བསམ་ཞིག་ཕྲན་བུ་ཞིག་བརྗོད་པར་སྤྲོ། ད་དེང་སྐབས་ཆེས་མི་ལེགས་པའི་བྱིས་པའི་སློབ་གསོ་དང་འབྲེལ་པའི་གནད་དོན་གསུམ་ནས་གླེང་།
གཅིག ཕ་མ་ཚོས་རང་ཉིད་ཀྱི་བུ་ཕྲུག་སློབ་གསོ་གཏོང་ཁུལ་འམ་ཤེས་ཡོན་སློབ་ཉམས་ཀྱིས་རྒྱ་སྐད་རྒྱ་ཡིག་ལ་སྦྱངས་པ་དགོས་ཞིང་མདུན་ལམ་ཀྱང་ཧ་ཅང་བཟང་གི མ་ཟད་ཕྲུ་གུ་ཚོ་བརྙན་འཕྲིན་སོགས་གཏོང་ནས་ཕྲུ་གུ་ཉིན་ལྟར་དེའི་ནང་འཛུལ་བ་ལྟར་འགྱིག་ཕྲུག་གི་རྩེད་མོ་གཡེང་བཞུགས་ནས་ཕར་ཚོར་གྱི་སྐད་ཆ་ཀྱང་བཤད་ས་མི་འདུག་ལ་དེ་བཞིན་གཞན་གྱི་ལས་དཀའ་ཙག་ཙིག་ཀྱང་གཏོང་ས་མི་འདུག མཐའ་ན་མི་ཆེན་ཚོ་གསར་འགྱུར་ཐར་ཐོར་ཞིག་ཀྱང་ལྟ་བའི་དབང་ཆ་མི་འདུག ཆེས་ལྟ་འདོད་ན་ཕྲུ་གུ་ཚོ་དགོངས་པ་ཞུ་དགོས་པའི་གནས་ཚུལ་ཞིག་ད་ལྟ་སྤྱིར་ཁྱིམ་ཚང་རེ་རེའི་གནད་དོན་ཞིག་གྱུར་འདུག མཐའ་ན་བྱིས་པའི་མིག་ཡང་འཕྲོ་བརླགས་ཀྱི་གནས་ལས་གཞན་ཅི་ཞིག་ལ་རེ་བའི་མིག་རྒྱང་སྤྲད་ས་འདུག དེ་བཞིན་ད་དུང་ཕ་མ་མང་པོ་ཞིག་གིས་བོད་ཡིག་སྦྱངས་ན་མདུན་ལམ་མེད་པས་རྒྱ་སྐད་རྒྱ་ཡིག་སླབ་དགོས་ཚུལ་བཤད་ཀྱིན་ཡོད། མདུན་ལམ་ཡོད་མེད་དེ་གཙོ་བོ་རང་རང་ལ་རག་ལས་ཡོད། ང་ཚོ་ཚང་མས་བོད་ཡིག་སྦྱངས་ཤིང་དེའི་བཀོལ་རྒྱ་ཇེ་ཆེར་བཏང་ན། བོད་རང་གི་ས་གནས་ཚོང་ཁང་དང་སྨན་ཁང་གློག་ཀླད་དང་ཁ་པར། ཟ་ཁང་དང་ལས་ཁུངས་སོགས་ཚང་མར་དེ་ཁོ་ན་བེད་སྤྱོད་བྱས་པ་ཡིན་ན་རང་ཤུགས་ཀྱི་བོད་ཡིག་ཤེས་མཁན་གྱི་མདུན་ལམ་ཇེ་ཆེ་དང་ཇེ་ཡངས་སུ་འགྱུར་འགྲོ་བ་མ་ཡིན་ནམ། མི་ཁ་ཤས་ཀྱི་རྒྱ་ཡིག་ཤེས་མི་ཞིག་ཡིན་ན་འཇོན་མི་འམ་ཤེས་ཡོན་ཅན་ལ་བརློམས། བྱིས་པ་ཚོའི་རྒྱ་སྐད་ཀྱི་སྒོ་ནས་ནང་ཁྱིམ་རུ་འོར་འོར་བྱེད་པ་ཧ་ཅི་ཞིག་ལས། དེ་ནི་ཞིང་འབྲོག་རྨོངས་པའི་གནས་ཞིག་ལོས་ཡིན་ཅེས་ཀྱང་བརྗོད་ཆོག དེ་ལས་ཀྱང་ཁྱེད་ཁྱིམ་བདག་ཚོའི་སེམས་དགོས་པ་ཞིག་ཁྱེད་ཀྱི་ཕྲུ་གུ་རང་གཤིས་ཇི་གྱོང་དང་སྤྱོད་པ་རྩུབ་པོ་འདི་ལྟ་བུ་ཞིག་ཇི་ལྟར་བྱུང་ནམ་དེའི་ཕྱོགས་ལ་བསམ་བཞིགས་ཞིག་བྱེད་ཉུང་ངམ།དེ་ལྟ་བུ་ཞིག་གྱུར་དོན་ཁྱེད་ཀྱི་རང་མི་རིགས་ཀྱི་རང་གཤིས་བཟང་པོའམ་ཡ་རབས་སྤྱོད་བཟང་གྱི་ཕྱོགས་ལ་སློབ་གསོ་རྒྱགས་མ་ཐོབ་པ་དང་དབྱངས་གསལ་བྱེད་ལ་བརྟེན་ནས་བོད་སྐད་ཡིག་གི་ཕུན་སུམ་ཚོགས་པའི་རིག་གནས་ལ་མྱོང་མ་ཐོབ་པ་དང་ལྷག་པར་གངས་ཅན་ལྗོངས་ལ་ངོམ་དུ་ཆོག་པའི་ནང་རིག་ངོ་མཚར་པ་འདི་བརྒྱུད་མ་ཐོབ་པའི་ལས་ངན་ཞིག་ལོས་ཡིན།
གཉིས། དགེ་རྒན་ཞེས་པ་ནི་མ་ཤེས་པ་ལ་ཤེས་རབ་ཀྱི་སྣང་བ་གསལ་མཁན་དང་རྨོངས་གཉིད་ལས་གྲོལ་བའི་ཐོ་རེངས་ཀྱི་ཅོང་བརྡ་སློབ་གསོའི་ཐབས་ཤེས་ཀྱི་ལམ་སྣེ་ཁྲིད་མི་ཞིག་དང་། མི་རིགས་ཀྱི་འགན་ཁྲི་དང་སྤྱི་ཚོགས་ལ་ཞབས་ཞུ་བསྒྲུབ་མཁན་གྱི་མི་བུ་དམིགས་གསལ་དང་ཆེད་ལས་ཀྱི་མི་སྣ་ཞིག་རེད། ང་ཚོའི་སོ་སོའི་སྤྱི་ཚོགས་ཀྱི་དངོས་ཡོད་འཚོ་བའི་ཐོག་ནས་བསམ་བློ་བཏང་ན་སྐད་ཡིག་ཉམས་རྒུད་དང་མི་རིགས་འཕེལ་འགྱུར་གྱི་བྱ་བ་ཐམས་ཅད་དེང་རབས་ཀྱི་ན་གཞོན་བྱིས་པ་ཚོ་ལ་རགས་ཡོད། བྱིས་པའི་འཚོ་བའི་འཕྲོད་དགེ་རྒན་ནི་ཆེས་ཐག་ཉེ་བའི་མི་བུ་ཞིག་ཡིན་དུས་དགེ་རྒན་གྱི་སློབ་གསོ་ནི་བྱིས་པའི་བསམ་བློ་ལ་ཆེས་ཤས་ཤུགས་ཆེ་བའི་དོན་ཞིག་ཡིན། ད་དེ་རིང་ཁ་སང་སློབ་གསོའི་བྱེད་ཕྱོགས་བྱེད་ལུགས་འདི་ནི་ཕྱི་ཚུལ་དང་འདྲ་ཆགས་འདུག་པ་ཞིག་ལས་དོན་དངོས་ཀྱི་སློབ་གསོ་ཞིག་འགྲུབ་མི་ཐུབ་པ་རེད། རྒྱུ་མཚན་ནི་དགེ་རྒན་རྣམས་པའི་སྐར་གྲངས་དང་སྐར་གྲངས་མཐོན་པོ་དགོས་ཞེས་ཉི་མ་རྟགས་པར་མ་ནི་བཞིན་རྡོལ་བའི་སློབ་མའི་ཚོགས་ལ་འཇིག་སྣང་དང་བཙན་ཐབས་ཀྱི་ཧ་ལམ་འཛམ་གླིང་ཧྲིལ་པོ་གྲགས་དགོས་པ་ལྟར་གྱི་སྣང་བ་ཞིག་འབྱིན། དེ་བཞིན་དགེ་རྒན་ཚོའི་སློབ་དེབ་ཀྱི་འགྲོ་སྟངས་གཅིག་པུ་དང་རང་གིས་ལས་འགན་སད་ཐབས་ཀྱི་འབད་པ་བྱེད་བཞིན་པ་ལས་དོན་དངོས་ཀྱི་སྤྱི་ཚོགས་དང་འབྲེལ་ནས་སླབ་གཞི་འདོན་མི་ཐོབ་ལ་མ་འོངས་པ་ཕན་པའི་ཡང་དག་གི་སློབ་གསོ་ཞིག་རྒྱག་མི་ཐོབ་པ་རེད། དེར་བརྟེན་སློབ་མ་ཚོ་ཚར་ལོང་འཕྲོད་མི་འགྲིག་པའི་གནས་མང་པོ་ཞིག་འགག་རྡོ་ལྟ་བུའི་རྨོངས་གྱུར་ནས་བྱ་བ་མང་པོ་ཕྱུག་བཞིན་ཡོད་རེད། མཐའ་ན་སྤྱི་ཚོགས་གི་ཁྲིམ་ལུགས་དང་འགལ་བའི་བྱ་བ་མང་པོ་ཞིག་སློབ་ཕྲུག་ཚོའི་བྱེད་ཀྱི་ཡོད་པ་རེད། རྒྱུ་མཚན་དེར་བརྟེན་མི་བུ་ཞིག་གི་འདུན་ལམ་འགན་ཁུར་གྱི་དགེ་རྒན་ཚོའི་འདི་ལྟར་ལས་འགན་བསྒྲུབ་ཐབ་རང་བསམ་ན་ཡ་ཆུང་སྙིང་ཁུང་ལ་གྲི་བཤགས་ལྟ་བུའི་ཚ་བརླབས་ཞིག་མི་ཕྱོར་རམ།
གསུམ། ཡངས་དག་པའི་སྲིད་གཞུང་གི་རྒྱབ་སྐྱོར་འོག་མི་རིགས་རིག་གནས་ལ་གོང་འཕེལ་གཏོང་རྒྱུ་དེ་ཡང་བྱིས་པ་ཚོའི་མ་འོངས་པའི་བོད་སྐད་ཡིག་གི་མདུན་ལམ་མངར་བཞིན་ཡངས་པའི་སྒྲོན་མེ་ཞིག་ལོས་ཡིན། ད་ལྟ་སྤྱིར་སྤྱི་ཚོགས་འཕེལ་རྒྱས་དང་བསྟུན་བོད་སྐད་ཡིག་ཡང་འཕེལ་རྒྱས་ཅུང་ཆེ་ལྷག་པར་དུ་ཆ་འཕྲིན་ལ་བརྟེན་ནས་མི་མང་པའི་བོད་སྐད་ཡིག་སྦྱོང་པའི་ཐབས་ལམ་ཞིག་བྱུང་། དེ་བཞིན་བྱིས་པ་ཚོའི་སྦྱངས་བྱའི་ཐད་བོད་སྐད་ཡིག་གི་སློབ་དེབ་ཡོད་རུང་ད་དུང་ཡིད་སྐྱོ་བ་ཞིག་ཁྲིད་བྱ་མང་ཆེ་བ་རྒྱ་ཡིག་ལས་མེད་པ་རེད། རྒྱུ་མཚན་དེར་བརྟེན་གཞན་གྱི་སྐད་རིགས་སྒོ་ནས་སློབ་འཁྲིད་ནས་ནང་དོན་ལ་གོ་བ་གཏིང་གསལ་མི་དཔོགས་ཞིང་མཐའ་ན་སློབ་ཚན་སྐབས་གཉིད་ཁུག་རྒྱུ་ལས་ཉན་མ་ཉན་གྱི་ཕན་ཡོན་མེད་པ་སློབ་ཕྲུག་མང་པོ་ནས་མངོན། དེ་བཞིན་རྒྱ་དགེ་རྒན་ཡིན་ན་རྒྱ་སྐད་སྒོ་ནས་འགྲེལ་བ་ལས་ཐབས་མེད་མཐའ་ན་སླབ་གཉེར་བ་བོད་རིགས་དགེ་རྒན་ཞིག་ཡིན་རུང་ཁོང་གིས་བོད་སྐད་ཐོག་འགྲེལ་བཤད་བྱེད་མི་ཤེས་པའི་གནད་དོན་དེ་ཐོག་མཐའ་བར་གསུམ་གྱི་གནས་ལ་ཡོད་ཚོད་རེད། རང་མི་རིགས་ཀྱི་སྐད་ཡིག་སྒོ་ནས་དེ་ལྟ་བུའི་སློབ་འཁྲིད་བྱེད་ཐུབ་ན་མི་རིགས་རིག་གནས་ལ་འཕེལ་རྒྱས་རྒྱ་ཆེན་པོ་དང་རང་མི་རིགས་ཀྱི་སྐད་ཡིག་བེད་སྤྱོད་ཆེ་ཞིང་སྐད་ཡིག་གི་སྲོག་རྩ་ཀྱང་བརྟན་པའི་མདུན་ལམ་ཞིག་རེད། དེ་བཞིན་སློབ་དེབ་ཀྱི་སྒྲིག་གཞི་ལས་གསར་རྩོམ་གྱི་སྣེ་མང་རུང་དེ་ལས་ཀྱང་བཟང་པའི་རང་མི་རིགས་ཀྱི་མེས་པོའི་སྙིང་སྟོབས་མཚོན་པའི་ལོ་རྒྱུས་འམ་སྐད་ཡིག་གི་ཁྱད་ཆོས་མངོན་པའི་སྙན་རྩོམ་སོགས་སྦྱངས་བ་བྱུང་ན་ཤིན་ཏུ་ནས་མི་ལེགས་བསམ།