ནང་དོན་གནད་བསྡུས། རྩོམ་འདིར་ཐོག་མར་བོད་སྐད་ཡིག་གི་རིན་ཐང་ཅུང་ཙམ་གླེང་བ་དང་དེ་ནས་སློབ་གྲྭར་ཆེན་མོ་བས་བོད་སྐད་ཡིག་སྤྱོད་སྟངས་སྐོར་གྱི་གནས་བབས་དང་མཐའ་མར་བོད་སྐད་ཡིག་ཇི་ལྟར་འཛིན་སྐྱོང་སྤེལ་གསུམ་བྱ་རྒྱུའི་སྐོར་བོད་ཐུན་མོང་གིས་གོ་བརྡ་འཕྲོད་ཐུབ་པའི་སྤྱི་སྐད་ཅིག་ཆགས་པའི་ལྟ་ཚུལ་རབ་ཙམ་བརྗོད་ཡོད།
བརྡ་ཆད་གཙོ་བོ། བོད་སྐད་བཀོལ་སྤྱོད། ཕ་སྐད་གླེང་སློང་བ།
མིའི་རིགས་ཀྱི་སྐད་ཆ་ནི་དུས་ཡུན་རིང་པོའི་སྔོན་ཏེ་བསྐལ་པ་ཡ་ཐོག་གི་དུས་རབས་ནས་བྱུང་ཞིང། སྐད་ཆ་ནི་སྤྱི་ཚོགས་འབྲེལ་འདྲིས་ཀྱི་ཡོ་བྱད་དུ་བཀོལ་ནས་མི་རབས་ནས་མི་རབས་བརྒྱུད་དེ་མི་རྣམས་ཀྱིས་བསམ་བློའི་འཁྱེར་སོ་དང་བྱ་སྤྱོད་ཀྱི་མཐུན་ཐབས་སོགས་ལ་རམ་འདེགས་བྱེད་ནས་དུས་ཡུན་རིང་པོ་གནས་མོད་ འོན་ཀྱང་ཁོང་ཚོས་མི་ཚེ་གོང་བོའི་ཉམས་མྱོང་ངམ་རྣམ་ཐར་སོགས་ཕྱི་རབས་པ་རྣམས་ལ་ལེགས་པོ་ཤིག་བསྒྲགས་མི་ཐུབ་པའི་ཕྱིར་ སྐད་དང་མཐུན་པའི་ཡི་གེ་ཤིག་གསར་གཏད་མཛད་ནས་སྔོན་གྱི་ལོ་རྒྱུས་དག་ཕྱི་རབས་པ་ལ་རྒྱུད་ཐུབ་པའང་ཉམས་མྱོང་བརྗེ་རེས་སོགས་ལ་དཔེ་མི་སྲིད་པའི་ཕན་ཐོགས་བྱུང་དང་འབྱུང་བཞིན་ཡོད། མི་རིགས་ཤིག་སྤྱི་ཚོགས་སྟེང་དུ་ཚུགས་ཤིང་རང་གི་བློ་གྲོས་དང་བསམ་གཞིགས་བསྐྱེད་དེ་ཆབ་སྲིད་རིག་གསུམ་དོན་དུ་གཉེར་ཐུབ་པ་ནི་སྐད་ཡིག་གི་འཇོན་ཐང་ཞིག་མ་ཡིན་ནམ། སྐད་ཡིག་མེད་ན་རིག་ལམ་གྱི་སྒོ་མོ་ཕྱེ་ག་ལ་ཐུབ་ སྐད་ཡིག་མེད་ན་མཚར་སྡུག་འོད་སྟོང་འབར་བའི་ལོ་རྒྱུས་ཀྱི་དེབ་ཐོར་ཞིག་ག་ལ་ཡོད །སྐད་དང་ཡི་གེ་ནི་མི་རིགས་ཤིག་གི་མཚོན་རྟགས་ཡིན་ལ་འཚོ་གནས་ཀྱི་བདག་པོ་ཡིན་ཀྱང་སྲིད་དོ།
༡ སློབ་གྲྭར་ཆེན་མོ་བས་བོད་ཀྱི་སྐད་ཡིག་བེད་སྤྱོད་པའི་སྣང་ཚུལ་སྐོར་གླེང་བ།
ཤེས་ཡོན་ཅན་ནི་སྐད་ཡིག་ལ་བེད་སྐྱོད་པའི་ལས་རིགས་ཤིག་དང་མི་རིགས་ཤིག་བྱང་ཚད་མཐོ་མིན་གྱི་རྟགས་ཤིག་ཡིན་ནོ། སློབ་ཆེན་སློབ་མ་ཟེར་དུས་ཤེས་ཡོན་གྱི་ཟེའུ་འབྲུ་ལེན་པའི་རྐང་དྲུག་དང་། ཤེས་རབ་ཀྱི་ནུས་མཐུ་ཆེ་ཞིང་གསར་གཏོད་ཀྱི་སྙིང་སྟོབས་ལྡན་པ་སོགས་ནི་སློབ་ཆེན་པ་ཞིག་ལ་མཚོན་ན་སྤྱི་ཚོགས་ཀྱིས་དམིགས་བསལ་གྱི་ཐུགས་ཁུར་བྱེད་ས་དང་མིག་དཔེར་ལྟ་ས་ཡིན་པ་བཤད་དགོས་མོད། འོན་ཀྱང་མཐོ་རྒྱུགས་ཀྱི་གཡུལ་ས་རྒྱལ་ནས་མི་བུ་སོ་སོའི་རང་གི་དགའ་བའི་ཆེད་ལས་ཤིག་བདམས་ཏེ་རྒྱལ་ནང་གི་ས་ཆ་ཕྱོགས་བཞི་མཚམས་བརྒྱད་དུ་འགྲིམས་པ་ནི་སློབ་གཉེར་བ་ཞིག་གི་འགྲོ་སྟངས་ཤིག་སྙམ་མོད་ རང་འགུལ་གྱི་ནུས་བ་སྟོང་ཞིང་དོན་མེད་ཀྱི་རོལ་རྩེད་ལ་སྲེད་པའི་བོད་ཀྱི་སློབ་ཆེན་པ་དག་ནི་ཅི་འདྲའི་ཞེ་སྣང་ཆེ་བ་ཞིག་མ་རེད་དམ། པཎ་ཆེན་ཆོས་ཀྱི་རྒྱལ་མཚན་ཞལ་ལས་ སློབ་གྲྭར་ཡར་འགྲོ་དུས་བོད་ཡིན་ནའང་མར་ཡོང་དུས་རུས་པ་བོད་ཡིན་ཀྱང་བོད་ཀྱི་བྲོ་བ་མེད་པ་ཞིག་མ་བྱེད། རེ་བ་ཡིན། ད་ལྟར་ མི་རིགས་ཀྱི་སློབ་གྲྭར་དུ་བོད་ཡིག་སྦྱོང་མཁན་གྱི་སློབ་མ་མི་ཉུང་བ་ཞིག་ལས་གཞན་སློབ་ཆེན་དུ་བོད་ཡིག་བཀོལ་སྤྱོད་བྱེད་པའི་བོད་ཀྱི་སློབ་ཆེན་པ་ཆེས་ཉུང་ཉུང་རེད་ རྒྱུ་མཚན་ཅི་ཡིན་ཞེ་ན། སློབ་ཆེན་པ་མང་ཆེ་བའི་ཆེད་ལས་བོད་ཡིག་མིན་པའི་དབང་གིས་རིག་ཚན་གཞན་པ་སྦྱོང་དགོས་པ་དང་བོད་ཡིག་ལ་འབྲི་ཀློག་རྩོམ་གསུམ་ལ་གོམས་པའི་སློབ་མ་ཞིག་བཙལ་ན་ངལ་བའི་རྒྱུ་རེད་བསམ།
ནང་རྐྱེན་དང་ཕྱི་རྐྱེན་གྱི་ལེགས་ཉེས་གཅིག་ཏུ་བསྡུས་མི་ཐུབ་པའི་སྟབས་ཀྱིས། འབྲེལ་འདྲིས་ཀྱི་ཡོ་བྱད་རྒྱ་ཡིག་ཏུ་མི་བཀོལ་ཁག་མེད་དམ་ཕྱིའི་ཁོར་ཡུག་གི་ཤུགས་རྐྱེན་དང་མི་བུ་རང་ཉིད་ཀྱིས་དོ་སྣང་ཆེན་པོ་མི་བྱེད་པའི་རྐྱེན་གྱིས་བོད་ཡུལ་གྱི་ཡུལ་སྲོལ་གོམས་གཤིས་དང་བོད་ཀྱི་བརྡ་རྙིང་སོགས་རིམ་གྱིས་བརྗེད་ནས་ར་མ་ལུག་གི་སྐྱོ་གར་འཁྲབ་སྒང་པའི་སྐབས་རེད་ ཁོང་ཅག་བོད་སྐད་བཤད་པའི་སྐབས་སུ་མིང་ཚིག་མང་བོ་ཞིག་རྒྱ་ཡིག་གི་ཚབ་བྱེད་ནས་བརྗོད་ཀྱི་འདུག་ལ་ ཐ་ན་འཕྲིན་ཡིག་འབྲི་དུས་རྒྱ་ཡིག་ལས་བོད་ཡིག་སྤྱོད་མཁན་ནི་ཉིན་མོའི་སྐར་ལྟར་སླེབས་བས་ཡིད་རོ་སྐྱོ། འདི་ནི་བོད་ཡིག་ཉམས་རྒུད་འགྲོ་བའི་རྒྱུ་རྐྱེན་གཙོ་བོ་ཞིག་རེད། མི་རིགས་ཤིག་གི་བླ་ཚེ་སྲོག་གསུམ་ལ་ཉམས་རྒུད་དུ་འགྲོ་བའི་དུས་ཞིག་ལ་སློབ་ཆེན་པའམ་ཤེས་ཡོན་པ་དག་གིས་འགན་མ་ཁུར་ན། འགན་དེ་ཐེག་མཁན་ཡང་རི་བོང་གི་རྭ་ལྟར་འགྱུར་བར་འཕྱང་མི་ཉུང་སློབ་ཆེན་པས་བོད་ཡིག་ཆེད་ལས་ལ་སློབ་སྦྱོང་བྱེད་པ་ནི་ཕ་སྐད་ལ་སྲུང་སྐྱོབ་བྱེད་མཁན་གྱི་དཔུང་སྡེ་ཞིག་རེད་བསམ་སྙམ་མོ། འོན་ཀྱང་ཐ་སྙད་ཐམས་ཅད་ཚད་མ་མ་གྲུབ་པས་རང་ཉིད་བསམ་ཡས་ལས་འདས་སོང་། ཅི་ཡིན་ཞེ་ན་སྤྱི་སློབ་ཆེན་པ་དག་ལ་གྱ་ནོམ་ཞིང་གསོན་ཤུགས་ལྡན་པའི་ཕུགས་བསམ་དང་དཔེ་ཀློག་གི་འཚོ་བ་ཞིག་ཡོད་ན་ཕན་སུམ་ཚོགས་པ་ཞིག་རེད། འོན་ཀྱང་སློབ་ཆེན་པ་མང་ཆེ་བ་དཔེ་ཀློག་གི་འཚོ་བ་ལ་མི་དགའ་བའི་སྟབས་ཀྱིས་ཕན་ཚུན་འབྲེལ་འདྲིས་སམ་ཁ་བརྡ་བྱེད་སྐབས་སུ་ཡིག་སྐད་ཐོག་ནས་བཤད་མི་ཐུབ་པས་འབྲེལ་ལམ་བཀག་པའི་གནད་དོན་ཞིག་རེད་བསམ་བཞིན་ཡོད་འདི་ནི་མིང་ཚིག་གསོག་འཇོག་མི་བྱེད་པའམ་ཐ་སྙད་བཀོལ་སྤྱོད་མི་ཤེས་པའི་བགེགས་རྐྱེན་ཞིག་རེད། མི་རིགས་ཤིག་དཔེ་ཀློག་གི་སྙིང་སྟོབས་མེད་པ་ནི་མི་རིགས་དེ་འཛམ་གླིང་ཤེས་ཡོན་ནས་བརྡ་རྟགས་མེད་པ་དང་ཀུན་ནས་མཚུངས། ད་ལྟ་ཚན་རྩལ་རྒོད་པའི་དུས་རབས་ཤིག་ཡིན་པའི་སྐབས་སུ་མི་རྣམས་ཀྱིས་དྲ་བའི་སྐུད་པ་བརྒྱུས་ནས་དོན་མེད་ཀྱི་རོལ་རྩེད་ལ་གཡེངས་ནས་ཉི་མ་འཁྱོལ་ཐབས་བྱེད་ནས་མི་རིགས་ཤིག་གི་བདེ་སྡུག་ལ་བསམ་གཞིགས་བྱེད་མཁན་ཧ་ཅང་ཉུང་ཉུང་རེད་ དེ་ལས་གནད་དོན་ཚབ་ཆེ་བ་ནི་བོད་མདོ་དབུས་ཁམས་གསུམ་ཀྱི་སློབ་མ་ཕན་ཚུན་དབར་འབྲེལ་འདྲིས་བྱེད་དུས་སུ་རྒྱ་སྐད་དང་ར་མ་ལུག་གི་སྐད་མགྲིན་ཚབ་བྱེད་ནས་གོ་བརྡ་བྱེད་པ་ནི་ཆེས་སྐྱོ་བའི་རྣམ་པ་ཞིག་རེད། ཁོང་ཅག་གི་སེམས་ཁམས་ལ་དབྱེ་ཞིབ་བྱེད་པ་དཔྱད་ན་ ཕ་སྐད་སྨྲས་ན་མི་ཚོགས་ཐོག་ནས་མགོ་བོ་ཡར་མི་ཐེག་པར་མཐོང་ནས་མུ་མཐུད་དུ་རྒྱུན་འཛིན་དང་དར་སྤེལ་གཏོང་བའི་སྤོབས་པའམ་མོས་པ་མེད་པར་གྱུར་པ་དང་གཞན་གྱིས་རྗེས་ལུས་སོགས་ཀྱི་མིང་བཏགས་པ་ལ་བརྟེན་ནས་ཕ་སྐད་སྨྲ་བ་ལ་ངོ་ཚ་བར་འགྱུར་པ་དང་། དེ་མ་ཟད་རང་གི་རིག་གནས་ཀྱི་རིན་ཐང་མི་ཤེས་པ་སོགས་ཀྱི་དབང་གིས་དེར་མི་རིགས་ཀྱི་སྐད་ཡིག་ཡར་རྒྱས་སུ་འགྲོ་བའི་འགོག་རྡོ་ལྟ་བུ་འགྱུར་རོ། །
མཐུན་སྒྲིལ་ནི་མི་རིགས་ཤིག་མདུན་དུ་སྐྱོད་པའི་མཐུན་རྐྱེན་ཞིག་ཡིན་འོན་ཀྱང་ད་ལྟ་སློབ་ཆེན་དུ་ དབུས་གཙང་ཕྱོགས་གཅིག་དང་ ཁམས་ཕྱོགས་ཁག་གཅིག་ ཨ་མདོ་བ་ཚོགས་གཅིག་ རང་ཕྱོགས་མཆོག་འཛིན་གྱི་འདུ་ཤེས་ཆེ་བའི་དབང་གིས་སོ་སོ་དབྱེ་བ་འབྱེད་ནས་མི་འདྲིས་བྱེད་པ་ནི་མི་རིགས་ཤིག་ཡར་རྒྱས་ཀྱི་གཤོག་པ་རྒྱས་མི་སྲིད་ལ་མདུན་སྐྱོད་ཀྱི་ལམ་བུ་དེ་བས་ཀྱང་ངོ་། དེས་ན་ང་ཚོས་ཡིག་སྐད་ཐོག་ནས་ཕ་སྐད་སྨྲ་དགོས་པར་ལས་མདོ་དབུས་ཁམས་གྱི་སེམས་སྒྲ་གཅིག་ཏུ་བསྡུས་དགོས་པ་ནི་གཟི་བརྗིད་ཀྱི་འོས་འགན་ཞིག་ཡིན་ རྣམ་གཡེང་གི་རྟ་ཕོ་སྲབ་ཀྱི་གཅུན་ནས་དུས་ཚོད་ཀྱི་ཁོམ་གསེབ་ནས་འབྲི་ཀློག་རྩོམ་གསུམ་བྱེད་རྒྱུ་ནི་མ་སྐུལ་དང་བླངས་ཀྱི་འོས་འགན་ཞིག་ཏུ་བསམ་དགོས།
༢ བོད་སྐད་ཡིག་ཇི་ལྟར་འཛིན་སྐྱོང་སྤེལ་གསུམ་བྱ་རྒྱུའི་སྐོར།
བོད་ཡིག་ནི་གདོང་དམར་བོད་མི་རྣམས་ཀྱི་བསམ་བློ་ཕན་ཚུན་བརྗེ་རེས་དང་། དེའི་སྒྲ་གདངས་མཚོན་བྱེད་ཀྱི་བརྡ་རྟགས་ཤིག་ཡིན་པ་མ་ཟད། ཡི་གེ་ཡོད་པའི་མི་རིགས་རྣམས་རང་ཉིད་ཀྱི་དཔལ་འབྱོར་དང་། ཆབ་སྲིད། རིག་གཞུང་། བཅས་ཀྱི་འཕེལ་རྒྱས་འགྲོ་བར་ལ་རམ་འདེགས་བྱེད་ཐུབ་པ་དང་རིག་གནས་ཀྱི་ཁོར་ཡུག་ལ་གསོན་ཤུགས་བརྟས་ཐུབ་པའི་མཐུ་ནུས་ལྡན་ཡོད་ ཡི་གེ་མེད་པའི་མི་རིགས་རྣམས་དེ་ལས་ལྡོག་སྟེ་རྗེས་ལུས་དང་ སེམས་ཀྱི་གཏན་ཡུལ་མེད་པར་ཀུན་གྱིས་ཤེས་གསལ་རེད། སྐད་དང་ཡི་གེ་ནི་མི་རིགས་ཤིག་གི་གྲུབ་ཆ་ཞིག་དང་སྲོག་ཤིང་ཏུ་འགྱུར་བའི་དབང་གིས་ང་ཚོས་ཀྱང་རིག་པ་བསྒྲིམས་སྟེ་ཕ་སྐད་ཀྱི་གནས་བབས་ལ་བསམ་ནས་བརྩོན་དགོས་པ་ནི་བོད་མི་དམངས་ཡོངས་ཀྱི་འོས་འགན་ཞིག་ཡིན་པར་སྙམ་དགོས་སོ། དེང་སྐབས་བོད་ཀྱི་ན་གཞོན་མང་ཆེ་བའི་གསར་ཞེན་ལ་དགའ་བའི་སྟབས་ཀྱིས་སྲོལ་རྒྱུན་གྱི་རིག་གཞུང་དང་བསམ་བློ་སོགས་ལ་འདི་འདྲའི་དང་དུ་མི་ལེན་པའི་དབང་གིས་བོད་ཀྱི་རིག་གནས་ཉམས་རྒུད་དུ་འགྲོ་བའི་རྒྱུ་རྐྱེན་གཙོ་བོ་ཞིག་རེད། འོན་ཀྱང་གསར་དར་དང་སྲོལ་རྒྱུན་གཉིས་ཟུང་འབྲེལ་བྱེད་ནས་བོད་ཀྱི་རིག་གནས་སྔར་ལས་ལྷག་པར་གོང་འཕེལ་དུ་གཏོང་དགོས་པ་དང་། ད་ཆ་ཀྲུང་གོ་གུང་ཁྲན་ཏང་གིས་མི་རིགས་ཀྱི་རིག་གནས་ལ་འདི་འདྲའི་ཐུགས་ཁུར་དང་རྒྱབ་སྐྱོར་གནང་བའི་དུས་བཟང་དང་བསྟུན་ནས་མི་རིགས་ཀྱི་ཤུལ་བཞག་རིག་གནས་སྲུང་སྐྱོབ་དང་བོར་ཟིན་པའི་ཐ་སྙད་དག་སླར་གསོ་བྱེད་པ་ནི་མི་རིགས་ལ་བཅངས་བའི་བློ་དཀར་ཞིག་རེད། ད་དུང་སྐད་ཡིག་སྣ་མང་ལ་བྱང་ཆུབ་པའི་ལོ་ཙྭ་བ་རྣམས་ཀྱིས་ཁེ་གྲགས་ལ་མི་དམིགས་ནས་སྙིང་སྟོབས་ཆེ་བསྐྱེད་ཀྱིས་ཁུར་དུ་བཞེས་འོས་པའི་ལས་འགན་གཟི་བརྗིད་ཅན་འདི་ཕྲག་པར་བཞེས་སྟེ་སྙན་གྲགས་ཀྱི་བ་དན་ཁ་རུ་བསྒྲེངས་པའི་བོད་ཀྱི་རིག་གནས་ཕུལ་བྱུང་གི་སྲོལ་རྒྱུན་བཟང་པོ་ནམ་ཡང་མིག་མཐོང་ལག་ཟིན་དུ་འགྱུར་རྒྱུ་ནི་ཁ་ཚ་དགོས་གཏུགས་ཀྱི་བྱ་བ་གལ་ཆེན་ཞིག་བསམ་དགོས་ལ་ དེས་ན་མི་རིགས་གཞན་གྱི་ལེགས་ཆ་སོགས་རང་སར་རུ་བསྒྱུར་ཐུབ་ན་གནད་ཀྱི་དམ་པ་ཞིག་རེད། ང་ཚོས་རྩོམ་ཡིག་སོགས་འབྲི་དུས་ཡུལ་སྐད་དང་བརྡ་གསར་སྦྱར་གང་ཉུང་བྱས་ཏེ་ཡིག་སྐད་དང་བརྡ་སྤྲོད་དང་མཐུན་ཐབས་བྱས་ན་སྤྱོད་ན་བོད་ཡིག་ཡང་མི་ཉམས་གོང་འཕེལ་དུ་འགྲོ་བའི་ཆ་རྐྱེན་གཙོ་བ་ཞིག་རེད་ མཁས་དབང་དམུ་དགེ་བསམ་གྱི་ཞལ་ལས་ ཡིག་རིགས་གཞན་ཤེས་པ་ནི་རབ་དང་ཕུལ་བྱུང་རེད། དེང་དུས་ཀྱི་རིག་གནས། ཚན་རིག། ལག་རྩལ། ཐ་ན་འཕྲུལ་འཁོར་སྣ་ཚོགས་བཟོ་བཅོས་བྱེད་པའི་དཔེ་ཆ་ཚུན་ཆད་ཀྱི་དཔེ་དེབ་མང་བོ་བོད་ཡིག་ཏུ་བསྒྱུར་ནས་རང་རིགས་ཀྱི་རིག་གནས་དང་དཔལ་འབྱོར་རྒྱས་པ་ནུས་པ་བཏོན་ན། ད་གཟོད་སྔོན་གྱི་མཁས་པ་རྣམས་ལ་འགྲན་པ་དང་འཕྱས་གདགས་པའི་མ་རྩ་ཡོད་སོང་བ་རེད། ང་ཚོས་སློབ་ཆེན་པ་དག་གིས་རང་བྱུང་གི་ཚན་རིག་ལ་གཞོལ་སྟེ་རང་ནུས་ཅི་ལྕོགས་ཀྱིས་རིག་ཚན་དེ་དག་བོད་ཡིག་ཏུ་བསྒྱུར་གང་ཐུབ་བྱས་ནས་བོད་ཀྱི་འཛུགས་བསྐྲུན་ཐད་ལ་སྲིད་ཞུ་བསྒྲུབ་པ་ནི་ཕ་ཡུལ་ལ་བཅངས་པའི་བརྩེ་བ་ཞིག་རེད། ད་ལྟ་སྤྱི་ཚོགས་ཀྱི་ཅ་དངོས་མང་པོ་ཞིག་ཁྲོམ་ར་ནང་དུ་ཐོན་བཞིན་པའི་སྐབས་དེར་ ཅ་དངོས་དེ་དག་གི་མིང་ཡང་བོད་ཡིག་ཏུ་བསྒྱུར་ནས་སྤྱོད་པ་ན་བོད་ཡིག་ཡང་རང་ཚུགས་ཐུབ་པ་གནས་པ་དང་རིག་གནས་གཞན་གྱིས་ཤུགས་རྐྱེན་ཐེབས་དཀའ་འོ་སྙམ་མོ། ང་ཚོས་གསར་སྐྱེས་དག་གིས་ཕ་སྐད་གཙང་མ་ཤོད་པ་དང་འབྲི་ཀློག་རྩོམ་གསུམ་གྱི་ཁ་ཕྱོགས་སུ་གོམ་པ་སྤོས་སྟེ་ཕ་སྐད་ལ་བདག་པོ་རྒྱག་པ་ནི་མེས་པོའི་བཀའ་དྲིན་རྗེས་སུ་ཡི་རངས་བྱེད་པའི་བྱ་ལུགས་ཤིག་ཡིན་ལ་ཕྱི་རབས་པ་རྣམས་ལ་ཕ་ཤུལ་བུ་འཛིན་གྱི་བསམ་བློ་ཐེབས་ཐུབ་པའི་ཕན་ཡོན་ཞིག་ཡོད་པས་རིག་པ་སྒྲིམ་དགོས་སོ།
༣ སྤྱི་སྐད་ཇི་ལྟར་གཏན་འབེབས་བྱེད་དགོས་པའི་སྐོར་རབ་ཙམ་བརྗོད་པ།
བོད་ཁ་བ་ཅན་གྱི་ཞིང་ཁམས་འདིར་རུ་འཚོ་ཞིང་གནས་པའི་བོད་མི་ཡོངས་ལ་ཆ་མཚོན་ནས་བཤད་ན། སྤྱི་སྐད་ཅིག་ཆགས་རྒྱུ་ནི་ཆེས་གལ་ཆེན་ནང་གི་གལ་ཆེན་ཡིན་པའི་བསམ་བཞིན་འདུག ། དཔེར་ན་ཚོང་ལས་བྱེད་པའི་མི་ཞིག་ལ་ཆ་མཚོན་ན་ མི་ཕན་ཚུན་བར་གོ་བརྡ་འཕྲོད་ནས་ཚོང་ལས་བྱེད་དགོས་པ་ལས་སྐད་དང་ཡི་གེ་མི་གོ་ནས་ཚོང་ལས་གཉེར་ན་དཔལ་འབྱོར་གྱི་འཕེལ་རྒྱས་ཡང་གོང་འཕེལ་དུ་འགྲོ་མི་ཐུབ་པར་སྔ་ལྟས་རེད།
ངེད་ཅག་ཡང་ལྷ་སའི་སྐད་འདི་ཡིན། ཁམས་སྐད་འདི་ཡིན། ཨམ་སྐད་འདི་ཡིན་ཟེར་ནས་སྤྱི་སྐད་གཏོར་བའི་ལས་ལ་མི་འཇུག་པར་བྱ་རྒྱུ་ནི་ཤེས་ཡོན་སྡེ་ཁག་གི་ཕྲག་ཏུ་བཞེས་པའི་འོས་འགན་ཞིག་རེད་བསམ་བཞིན་ཡོད། ང་ཚོས་འབྲེལ་འདྲིས་བྱེད་པའི་བརྒྱུད་རིམ་ཁྲོད་པའི་གོ་རིམ་ཁྲོད་དུ་ཡིག་སྐད་ཐོག་ནས་ཕན་ཚུན་བགྲོ་གླེང་བྱས་ན་སུས་ཀྱང་གོ་བར་ཡིད་ཆེས་ཡོད། མཁས་དབང་དམུ་དགེ་བསམ་གཏན་གྱི་ཞལ་ལས་ མང་ཚོགས་ཀྱི་སྐད་དང་མཐུན་པར་བྱེད་དགོས་ཞེས་འུར་རྒྱག་མོད། དོན་ལ་ནི་མང་ཚོགས་ཀྱི་སྐད་དང་མཐུན་པར་བྱེད་ཨེ་ཐུབ་མི་ལྟ་བར། བོད་ཀྱི་སྤྱི་འགྲོའི་མིང་ཚིག་དོར་ཏེ། ཡུལ་སྐད་ཀྱི་མིང་ཚིག་རེ་ཁྱེར་ཡོང་ནས་སྤྱི་སྐད་ཀྱི་ཚབ་བྱེད་པ་ནི། སྐད་ཡིག་གཅིག་གྱུར་དུ་འགྲོ་བ་ལ་གེགས་བྱེད་པའི་ཉེན་ཁ་ཞིག་ཡིན་པར་སེམས། བསླབ་བྱ་དེ་དག་ལ་དམིགས་ནས་ང་ཚོའི་ཡི་གེ་ནི་མི་དམངས་ཁྲོད་ཀྱི་སྐད་ལ་བརྟེན་ནས་བཟོ་པར་ལས་གང་བྱུང་གནམ་ལ་ལྷུང་བའི་རྡོག་རྡོག་གཅིག་མ་རེད། དེར་བརྟེན་རང་ལྟ་མཆོག་འཛིན་གྱིས་ལྷ་སའི་སྐད་སྤྱི་སྐད་དུ་འཇོག་པའམ་ཨམ་སྐད་སྤྱི་སྐད་དུ་འཇོག་རྒྱུའི་བསམ་ཚུལ་ནི་ཧ་ཅང་མི་འོས་པའི་གནད་དོན་ཞིག་རེད་བསམ་བཞིན་ཡོད་ དེའི་ཕྱིར་ངེད་ཅག་ཐུན་མོང་མ་ཡིན་པའི་སུམ་རྟགས་དག་གསུམ་ལ་བརྟེན་ནས་ཕན་ཚུན་བགྲོ་གླེང་དང་འབྲེལ་འདྲིས་བྱས་ན་སྤྱི་སྐད་ཡང་རིམ་བཞིན་ཆགས་པའི་རྨང་གཞི་འདིང་པ་རེད། ཡིག་སྐད་བཤད་ན་ཕན་ཚུན་སྟབས་བདེ་འགྲོ་ཐུབ་པའམ་མཛའ་གཅུགས་ཀྱི་གསེར་ཟམ་བདེ་ལེགས་ངང་ནས་གྲུབ་པའི་སྔོན་འགྲོའི་གཏམ་ཞིག་རེད་བསམ་བཞིན་ཡོད་ལ་གལ་སྲིད་ངེད་ཅག་གིས་ཕ་སྐད་མ་བཤད་ན་མ་འོངས་བོད་ཀྱི་གནས་བབས་སུ་ཡིས་དཔྱད་དཔོག་གམ ། སྤྱི་སྐད་ཅིག་མེད་ན་མི་རིགས་གཅིག་འགྱུར་གྱི་འདུ་ཤེས་དང་། མི་རིགས་གཞན་དང་ཐ་དད་དུ་ལངས་པའི་འདུ་ཤེས་མེད་པར་འགྱུར་ངེས། དེས་མི་ཚད་ཐུན་མོང་གི་རིག་གནས་སམ་དད་པ་སོགས་ཀྱང་མི་རིགས་རང་གི་ཐུན་མོང་གི་སྐད་དང་ཡི་གེ་ལ་བརྟེན་ནས་འཚོ་དགོས་སོ། །
མཇུག་བསྡུ་བ། སྐད་དང་ཡི་གེ་ནི་མི་རིགས་ཤིག་གི་བླ་སྲོག་ཡིན་པས་ཀུན་གྱི་ཤེས་གསལ་རེད་ ལ་ཚང་མས་ཀི་སྒྲ་སྒྲོག་པའི་སྐབས་རེད། འོན་ཀྱང་ཕ་སྐད་ལ་དུངས་ཞེན་ཆེ་བའི་མི་སྣ་ག་ཚོད་ཡོད་མིན་ཀུན་གྱིས་མིག་མཐོང་ལག་ཟིན་རེད། ལ་རྒྱ་ནང་གི་ལ་རྒྱ་ནི་ཕ་སྐད་ལ་འཛིན་སྐྱོང་སྤེལ་གསུམ་བྱེད་མཁན་ཚོ་ཡིན་ནོ། བོད་སྐད་ཡིག་གི་གནས་བབས་དང་ཕ་སྐད་གོང་འཕེལ་འགྲོ་བྱེད་ཀྱི་ཐབས་ལམ་སྐོར་དང་བོད་ལ་སྤྱི་སྐད་ཅིག་ཆགས་དགོས་པའི་བསམ་ཚུལ་བརྗོད་པ་ནི་རྟ་རྒྱུག་ཞོར་མེ་ཏོག་ལ་ལྟ་བ་དང་འདྲ་བའི་སྣང་ཚུལ་ཐེར་འདོན་བགྱིས་པ་ཙམ་གྱིས་ལུགས་དང་མཐུན་པའི་དཔྱད་རྩོམ་གྱི་གྲས་སུ་འཇུག་ག་ལ་ཐུབ་འོན་ཀྱང་སེམས་ཁོང་གི་སྙིང་གཏམ་སྲབ་ཀྱི་མི་ཐུབ་པས་ཤོར་སོང་བས་ཚང་མས་སུན་སྣང་བཟོ་མེད་པར་སྨོན་ནོ། ཕ་སྐད་ལ་ཤ་ཞེན་ཡོད་ན་ཁྱིམ་ཚང་དེའང་མཐུན་པ་སྤུན་བཞིའི་མཛའ་བརྩེ་ཡོད་པར་སྨོས་ཅི།
དཔྱད་གཞི་ཡིག་ཆ།
དཔྱད་རྩོམ་མཁས་དབང་དུང་དཀར་ཀྱིས་བརྩམས་མཁས་པའི་ཞལ་གདམས་བོད་ལྗོངས་མི་དམངས་དཔེ་སྐྲུན་ཁང་གིས་དཔར་དུ་བསྐྲུན།
