མིའི་འགྲོ་བ་བྱུང་བ་ནས་དུས་ཀྱི་འགྱུར་ལྡོག་དང་སྤྱི་ཚོགས་འཕེལ་འགྲིབ་ཀྱི་ཚུལ་དང་བསྟུན་ཏེ་གཙུག་ལག་རིག་པའི་གནས་ཀྱང་འདྲ་མིན་སྣ་ཚོགས་ཤིག་དར་རྒྱས་བྱུང་བ་དེས། ཐོན་སྐྱེད་ནུས་ཤུགས་དང་ཐོན་སྐྱེད་འབྲེལ་བ་བླ་ལྷག་གིས་གོང་འཕེལ་དུ་འགྲོ་བར་ཚད་མི་འདྲ་བའི་ཡར་སྐུལ་དང་རམ་འདེགས་བྱས་དང་བྱེད་བཞིན་པའི་དུས་མཚུངས་སུ། བོད་རང་ཉིད་ཀྱི་སྤྱི་སྐད་ལས་བཤད་པའི་རྒྱང་བསྒྲགས་ལས་དོན་དེ་གསར་བཞད་མེ་ཏོག་ཇི་བཞིན་ལོ་རབས་ལྔ་བཅུ་བ་ནས་མེས་རྒྱལ་གྱི་གངས་ལྗོངས་སྐྱེས་མོས་ཚལ་དུ་ལྷུག་པར་བཞད་པ་མ་ཟད། དུས་རབས་གསར་བའི་འཕེལ་ཕྱོགས་དང་བསྟུན་ནས་ཇེ་རྒྱས་ཇེ་དར་དུ་འགྲོ་བཞིན་པའི་སྒང་འདིར། ཀན་ལྷོའི་རྒྱང་བསྒྲགས་ལས་ཁུངས་ཀྱང་ལོ་ངོ་བཞི་བཅུ་ལྷག་གི་ཀྱག་ཀྱོག་བགྲོད་ལམ་བརྒྱུད་དེ་འོད་སྟོང་འབར་བའི་མདུན་ལྗོངས་གསར་བ་ཞིག་བསུས་བྱུང་། སྐབས་འདིར། བདག་གིས་རྒྱང་བསྒྲགས་པའི་གོ་གནས་དང་ནུས་པ་ཅི་འདྲ་ཡིན་པའི་ཐད་ལ་ལྟ་ཚུལ་དང་མྱོང་ཚོར་རགས་ཙམ་བརྗོད་པ་གཤམ་གསལ།
རྒྱང་བསྒྲགས་ལས་ཁུངས་ནི་ཏང་དང་སྲིད་གཞུང་གི་དྲིལ་བསྒྲགས་ལག་ཆའམ་མགྲིན་ཚབ་པ་ཡིན། འདི་ནི་ང་ཚོའི་སྤྱི་ཚོགས་རིང་ལུགས་རྒྱལ་ཁབ་ཀྱི་རང་བཞིན་དང་ལས་འགན་གྱིས་ཐག་བཅད་པ་ལས་བྱུང་། དེར་བརྟེན། རྒྱང་བསྒྲགས་ཀྱིས་ཏང་དང་སྲིད་གཞུང་ལ་ཞབས་འདེགས་ཞུ་དགོས་ལ། རྒྱ་ཆེའི་མི་དམངས་མང་ཚོགས་ལ་ཞབས་འདེགས་ཞུ་དགོས་པ་དེ་རེད། དེ་བཞིན་རང་ཁུལ་གྱི་རྒྱང་བསྒྲགས་ལ་མཚོན་ན། བོད་སྐད་གཙོར་བཟུང་བ་དང་། གསར་འགྱུར་ལ་ཤུགས་སྣོན་པ། རིག་རྩལ་སྣ་མང་ཕུན་ཚོགས་སུ་གཏོང་བ་དང་། ཆེད་སྒྲིག་ལེ་ཚན་ལེགས་པར་སྒྲུབ་པ། ཞབས་ཞུའི་རྒྱ་ཇེ་ཆེར་གཏོང་བ་བཅས་ཀྱི་བསམ་བློའི་ཁྲིད་སྟོན་འོག རང་ཁུལ་གྱི་རོང་འབྲོག་ས་ཁུལ་གྱི་འཐབ་ཕྱོགས་སོ་སོའི་སྟེང་ཐོབ་པའི་འབྲས་བུ་གཡུར་དུ་ཟ་བ་དུས་ཐོག་ཏུ་བསྒྲགས་ཏེ། ཁོ་ཚོའི་བརྩོན་སེམས་ཀྱི་ཅང་ཤེས་ལ་མྱུར་མགྱོགས་ལྕག་གིས་བསྐུལ་ཏེ་བཅོས་སྐྱོང་དག་ཐེར་དང་། བཅོས་སྒྱུར་ཟབ་སྤེལ་བྱེད་པར་བང་རྩལ་འགྲན་ཞིང་མདུན་སྐྱོད་བྱེད་པར་ནུས་པ་གལ་ཆེན་འདོན་བཞིན་ཡོད།
གཅིག རྒྱང་བསྒྲགས་པ་ནི་ཏང་དང་མང་ཚོགས་བར་གྱི་ཟམ་པ་ལྟ་བུ་ཡིན།
སྤྱིར་བཤད་ན་རྒྱང་བསྒྲགས་ལས་ཁུངས་ནས་གཏོང་བཞིན་པའི་ལེ་ཚན་ཚང་མ་ནི་ལས་ཁུངས་འདིའི་མི་སྣ་ཡོད་ཚད་ཀྱིས་དཀའ་སྤྱད་ངལ་རྩོལ་ལས་ཐོན་པའི་འབྲས་བུ་ཡིན་པ་སྨོས་མི་དགོས་མོད། འོན་ཀྱང་ཆེས་མཇུག་མཐར་རྒྱ་ཆེའི་ཉན་མཁན་དང་ཐད་ཀར་འབྲེལ་འདྲིས་བྱེད་མཁན་ནི ་རྒྱང་བསྒྲགས་པ་རེད། རྒྱང་བསྒྲགས་པའི་རིག་གནས་ཀྱི་བྱང་ཚད་དང་སྐད ་ངག་གི་ཆ་རྐྱེན་བཟང་མིན་ནི་ཚད་ངེས་ཅན་ཞིག་གི་སྟེང་ནས་བརྗོད་ན། རྒྱང་བསྒྲགས་ཧྲིལ་བོའི་མཚན་སྙན་ལ་གནོད་པ་སྐྱེལ་ཐུབ་མིན་ནམ་ཡང་ན་དྲིལ་བསྒྲགས་ལ་ཕན་ནུས་ཐོན་ཐུབ་མིན་དང་ཐད་ཀར་རག་ལས་ཡོད། ང་ཚོས་རྒྱུན་པར་རྒྱང་བསྒྲགས་ལ་ཉན་སྐབས་སུ་གནས་ཚུལ་འདི་འདྲ་ཞིག་ལ་འཕྲད་ཀྱིན་ཡོད། དཔེར་ན་གསར་འཕྲིན་འགོད་མཁན་གྱིས་མཛེས་ཤིང་སྙན་པའི་གདངས་ཀྱིས་བརྒྱན་པས་ན་དེ་བཞིན་ཉན་མཁན་ལ་ཡིད་དབང་འཕྲོག་པའི་སྣང་བ་སྟེར་ཐུབ་ཅིང་བརྩེ་དུང་གི་རྦ་རླབས་དེ་མི་རེ་རེའི་སྙིང་ཁོངས་རུས་པའི་གཏིང་ནས་འཕྱུར་ངེས་ཡིན་པས་ཕན་ནུས་ཀྱང་ཅུང་བཟང་བོ་ཐོན་ཐུབ། དེ་ལས་ལྡོག་སྟེ་ནང་དོན་ཧ་ཅང་ལེགས་པའི་རྩོམ་ཡིག་ཅིག་ཡིན་རུང་རྒྱང་སྒྲོག་བྱེད་མཁན་གྱིས་ཚལ་རིགས་བརྔོ་བའི་ཁྲོད་དུ་ཚྭ་མི་འདེབས་པ་བཞིན་བྲོ་བ་ཅི་ཡང་མེད་པ་ཞིག་སྒྲོག་ན་ཉན་མཁན་ལ་སུན་སྣང་སྐྱེས་ཏེ། སྔོན་དཔག་གི་ཕན་ནུས་ཐོན་རྒྱུ་ཕར་བཞག རྒྱང་བསྒྲགས་ལ་ཉན་མཁན་ཀྱང་རིམ་བཞིན་ཇེ་ཉུང་དུ་འགྲོ་སྲིད། དེར་བརྟེན། ཉན་མཁན་གྱིས་ལེ་ཚན་སྒྲོག་སྟངས་བཟང་མིན་ལ་དཔྱད་གཏམ་བརྗོད་ན། ཐོག་མར་རྒྱང་བསྒྲགས་མཁན་ཀ་ཡིས་བཤད་པ་བཟང་ལ། ཁ་ཡིས་བཤད་པ་མི་བཟང་ཞེས་བརྗོད་པ་ལས་རྒྱང་བསྒྲགས་ལས་ཁུངས་མི་བཟང་ཞེས་བརྗོད་མཁན་མེད་པ་ལྟ་བུ་རེད། རྒྱ་ཆེ་བའི་ཉན་མཁན་དང་། ང་ཚོའི་ཏང་དང་རྒྱལ་ཁབ་ཀྱི་འགོ་ཁྲིད་ལས་བྱེད་པ་བཅས་འདུས་པའི་ཉན་མཁན་ཚང་མས་རྒྱང་བསྒྲགས་དང་བརྙན་འཕྲིན་ལ་བརྟེན་ནས་རྒྱལ་ནང་དང་རྒྱལ་སྤྱིའི་གནས་ཚུལ་ཤེས་རྟོགས་བྱ་ཅི་ཐུབ་བྱེད་པ་དང་། འཕྲིན་གསར་སྣ་ཚོགས་རྟོགས་རྒྱུ་ནི་ཁོ་ཚོའི་འཚོ་བར་མེད་དུ་མི་རུང་བའི་ཆ་ཤས་ཤིག་ཏུ་གྱུར་དང་འགྱུར་བཞིན་ཡོད། རྒྱང་བསྒྲགས་མཁན་གྱིས་ཏང་གི་བྱེད་ཕྱོགས་དང་། སྲིད་ཇུས། རྒྱལ་ཁབ་ཕྱི་ནང་གི་དོན་ཆེན་དང་། འཕྲིན་གསར་སྣ་ཚོགས་ཐད་ཀར་ཉན་མཁན་གྱི་སྙིང་གི་བུམ་པར་ལྡུག་ཅིང་། ཁོ་ཚོའི་མཐོང་རྒྱ་ཇེ་རིང་དང་། སེམས་རྒྱ་ཇེ་ཆེ། ངོས་ཟིན་ཇེ་མཐོ་དང་། ཡོན་ཚད་ཇེ་ལེགས་སུ་བཏང་བར་བརྟེན། ཁོ་ཚོས་ཀྱང་རྒྱང་བསྒྲགས་མཁན་ནི་རང་ཉིད་ཀྱི་སྙིང་ཉེ་བའི་གྲོགས་པོ་ཡིན་སྙམ་ཏེ། རྒྱུན་པར་འཕྲིན་ཡིག་བསྐུར་པའམ་རྒྱང་བསྒྲགས་མཁན་ལ་གླེང་མོལ་བྱེད་པར་བརྒྱུད་དེ་རང་ཉིད་ཀྱི་ལྟ་ཚུལ་དང་རེ་མོས་ཅི་ཡོད་སྦ་གསང་མེད་པར་རྒྱང་བསྒྲགས་ཁང་ལ་བཤད་པས། རྒྱང་སྒྲོག་བྱེད་མཁན་དེ་ཉན་མཁན་ངོ་མ་དང་འབྲེལ་བ་བྱེད་པའི་ཟམ་པ་ལྟ་བུར་གྱུར་ཡོད།
དེའི་ཕྱིར་རང་རེའི་ལས་ཁུངས་ཀྱིས་ལོ་ངོ་བཞི་བཅུ་ལྷག་གི་རིང་ལ། རང་ཁུལ་གྱི་འགྲིམ་འགྲུལ་སྟབས་མི་བདེ་བ་དང་། མི་གྲངས་ཁྱབ་ཆེ་བ། རིག་གནས་རྗེས་སུ་ལུས་པ། རོང་འབྲོག་པའི་ས་ཆ་ཁ་ཤས་སུ་ཐ་ན་ཚགས་པར་ཀྱང་ཀློག་མི་ཐུབ་པའམ། ཡང་ན་བལྟ་བར་དཀའ་ཁག་ཡོད་པར་གཞིགས་ཤིང་། སྐུད་མེད་རྒྱང་བསྒྲགས་ཀྱི་དགེ་མཚན་ལ་བརྟེན་ནས། རྒྱང་བསྒྲགས་པའི་སྐད་དེ་རང་ཁུལ་གྱི་ཁྱིམ་ཚང་ཁྲི་མ་འབུམ་ལ་མ་ཟད། ད་དུང་ཁྱིམ་མཚེས་ཞིང་ཆེན་དང་། རྫོང་། ཐ་ན་ཕྱི་རྒྱལ་ལ་སོགས་པར་ཁྱབ་ནས་དྲིལ་བསྒྲགས་ཀྱི་ཕན་ནུས་ངེས་ཅན་ཞིག་ཐོན་གྱིན་ཡོད། གོང་གསལ་གྱི་དོན་དངོས་འདི་དག་ལས་རྒྱང་སྒྲོག་བྱེད་མཁན་གྱི་ནུས་པ་མཐོང་ཐུབ་པས། ཉན་མཁན་རྣམས་ཁོ་ཚོ་ལ་ཡིད་ཆེས་ཤིང་རྒྱང་སྒྲོག་མཁན་ནི་ཉན་མཁན་དང་རྒྱང་བསྒྲགས་ཁང་གཉིས་བར་གྱི་སྒྲོག་ཐག་ལྟ་བུ་རེད་ཅེས་བསྔགས་བརྗོད་ཀྱིས་མེ་ཏོག་གཏོར་བཞིན་མཆིས།
གཉིས། རྒྱང་བསྒྲགས་པ་ནི་སྤྱི་སྐད་ཁྱབ་བརྡལ་དུ་གཏོང་བའི་དགེ་རྒན་ཡིན།
རང་ཁུལ་ལ་མཚོན་ན་རྫོང་བདུན་དང་གྲོང་ཁྱེར་གཅིག་ཡོད་པ་ཚང་མར་མཚོན་ན་ས་ཆ་རེ་ལ་སྐད་ལུགས་རེ། ལུང་བ་རེ་ལ་ཆ་ལུགས་རེ་ཞེས་པའི་དཔེ་ལྟར་ཡུལ་སྐད་འདྲ་མིན་སྣ་ཚོགས་ཤིག་ཟུར་ཆགས་ཡོད་པའི་ཁར། ལོ་བཅུའི་རིག་གསར་སྐབས་སུ་རང་ཁུལ་གྱི་ས་ཆ་ཁ་ཤས་སུ་མི་རིགས་རང་ཉིད་ཀྱི་སྐད་ཆ་བཤད་ན་གོང་ལ་ཚིག་མཚོན་འདེབས་ཀྱིན་ཡོད་པའམ། ལྷ་འདྲེ་གདོན་བགེགས་ཀྱི་སྐད་ཆར་བརྩིས་ནས་བཤད་དུ་འཇུག་པ་ཕར་བཞག ད་དུང་ཚང་མར་རྒྱ་སྐད་བཤད་དུ་བཅུག་པས་བོད་སྐད་རྒྱུན་ལྡན་དུ་འགྱུར་བར་བར་ཆད་ཐེབས་ཡོད་པར་བརྟེན། རྒྱ་བོད་སྐད་གཉིས་མཉམ་དུ་འདྲེས་པས་བོད་སྤྱི་སྐད་དང་བར་ཐག་དེ་བས་ཇེ་རིང་དུ་སོང་། རང་ཁུལ་གྱི་རྒྱང་བསྒྲགས་ཁང་གིས་ཕན་ཚུན་སྐུལ་འདེད་དང་། ཕན་ཚུན་བརྗེ་རེས། ཕན་ཚུན་གཅིག་མཐུན་བཅས་བྱེད་ཆེད། རྒྱང་བསྒྲགས་སྐབས་སུ་རྒྱང་བསྒྲགས་མཁན་གྱིས་སྤྱི་སྐད་གང་དག་ཅིག་བཤད་དེ་སྤྱི་སྐད་བཤད་པར་མིག་དཔེའི་ནུས་པ་འདོན་བཞིན་པ་དང་གཅིག བོད་ཀྱི་སྐད་ཡིག་ཁྲིད་པའི་ལེ་ཚན་ནང་དུ་རང་ཁུལ་གྱི་དགེ་རྒན་སྐད་གྲགས་ཅན་འགའ་རེ་ལ་དག་ཡིག་ཁྲིད་དུ་བཅུག་པ་དང་གཉིས། ཀྲུང་དབྱང་ནས་བསྒྲགས་པའི་བོད་སྐད་ཀྱི་ལེ་ཚན་བརྒྱུད་གཏོང་བྱེད་པའི་ཁར། བོད་ལྗོངས་དང་མཚོ་སྔོན་ནམ་ཟི་ཁྲོན་སོགས་རྒྱང་བསྒྲགས་ཁང་ལ་ཡིག་སྒྱུར་དང་བྲིས་རྩོམ་བརྗེ་རེས་སྒོས་སྒྲོག་པ་དང་གསུམ་བཅས་ཡིན། འདི་ལྟར་རྒྱུན་འཁྱོངས་བྱས་པས་ན། རང་ཁུལ་མ་ཟད་བོད་ཁུལ་སོ་སོའི་སྐད་ཆའི་ཐ་སྙད་གཅིག་གྱུར་ཡོང་བར་ཕན་ངེས་རེད། དེང་སྐབས་རང་ཁུལ་གྱི་ས་ཆ་སོ་སོར་མཚོན་ན། རྒྱང་སྒྲོག་ནང་དུ་བཤད་པའི་སྤྱི་སྐད་གོ་ཐུབ་པ་མ་ཟད། རྒྱང་བསྒྲགས་པ་སུ་ལ་ཁྱད་ཆོས་ཅི་ཡོད་པའང་རེ་རེ་བཞིན་གསལ་བོར་བརྗོད་ཐུབ། དེ་གསལ་བོར་བཤད་ན་ཉན་མཁན་ཚོས་སྔ་མོ་ནས་རྒྱང་བསྒྲགས་ཁང་གིས་བཤད་པའི་སྤྱི་སྐད་དེ་རང་ཉིད་ཀྱིས་སྤྱི་སྐད་སློབ་པའི་དགེ་རྒན་དུ་བརྩིས་ཡོད། རྒྱང་བསྒྲགས་བྱེད་མཁན་རྣམས་ཀྱིས་ཀྱང་རང་ཉིད་ལ་རེ་བ་ནན་མོ་ཞིག་བཏོན་ཏེ། སྤྱི་སྐད་རྒྱུན་ལྡན་ཞིག་བཤད་དགོས་པ་མ་ཟད། ད་དུང་སྤྱི་སྐད་ཁྱབ་བརྡལ་དུ་གཏོང་བའི་ལས་འགན་ཕྲག་ཏུ་བླངས་ནས་སྤྱི་སྐད་ཕུན་སུམ་ཚོགས་པར་གཏོང་བ་དང་། རང་ཁུལ་གྱི་ས་ཆ་སོ་སོའི་སྐད་ཆ་རྒྱུན་ལྡན་དང་གཅིག་མཐུན་ཡོང་བར་བྱས་རྗེས་འཇོག་དགོས།
གོང་གསལ་འདི་དག་ལས་ང་ཚོས་གསལ་བོ་མཐོང་བར། རྒྱང་བསྒྲགས་པས་རྒྱང་བསྒྲགས་ལས་དོན་ཧྲིལ་བོའི་ཁྲོད་དུ་ནུས་པ་གལ་ཆེན་འདོན་བཞིན་པ་དང་། དྲིལ་བསྒྲགས་བྱ་བའི་ནང་དུའང་གོ་གནས་གལ་ཆེན་བཟུང་ཡོད་ཕྱིར། རྒྱང་བསྒྲགས་པ་རང་ཉིད་ཀྱིས་ཀྱང་ཉན་མཁན་གྱི་ཁྲོད་དུ་ཡིད་ཆེས་དང་སྙན་གྲགས་བཟང་བོ་ཞིག་འཛུགས་གང་ཐུབ་བྱེད་པའི་རྨང་གཞིའི་ཐོག ཁྱད་ཆོས་མངོན་པར་གསལ་བའི་རྒྱང་བསྒྲགས་པའི་ཉམས་ཐོན་པར་དོ་སྣང་བྱ་རྒྱུ་ནི་དགོས་ངེས་ཤིག་ཡིན།
ང་ཚོས་དོ་སྣང་བྱེད་དགོས་པ་ནི་རྒྱང་བསྒྲགས་བཅོས་སྒྱུར་བྱེད་པའི་ཁྲོད་དུ་རང་གཤིས་ལྡན་པ་དང་ཁྱད་ཆོས་ལྡན་པའི་བོད་སྐད་རྒྱང་བསྒྲགས་མཁན་ལ་མཐོང་ཆེན་བྱས་ཏེ། ཁ་བརྡའི་རྣམ་པ་དང་འཚོ་བའི་རྣམ་པའི་ཕྱོགས་སུ་བརྩོན་རྒྱུ་ལས་གཞན། ད་དུང་རིགས་དང་རྣམ་པ་མི་འདྲ་བའི་ལེ་ཚན་གསར་བ་བསྒྲུབ་གང་ཐུབ་བྱ་དགོས། རྒྱང་བསྒྲགས་རྒྱུད་གཏོང་བྱེད་པ་དང་། ལེ་ཚན་ལེགས་པོར་སྒྲུབ་པ། རིགས་སྣ་ཇེ་མང་དུ་གཏོང་བའི་སྒོ་ནས་རྒྱ་ཆེ་ཉན་མཁན་གྱིས་ཉན་སྤྲོ་ལ་ཡིད་ཆེས་པའི་གྲོགས་པོ་བཟང་བོ་ཞིག་བྱ་དགོས་པས། ངེས་པར་དུ་རྒྱང་བསྒྲགས་པའི་དཔུང་སྡེ་འདིར་ཤུགས་སྣོན་དགོས་ཤིང་། རྒྱང་བསྒྲགས་མཁན་གྱིས་ཀྱང་སྲོལ་རྒྱུན་གྱི་སྒྲོག་ཚུལ་ཁོ་ན་བྱང་བར་ཡིད་མི་ཚིམ་པར་གནས་ཚུལ་གསར་བའི་འཕེལ་ཕྱོགས་དང་བསྟུན་ནས་ཤེས་བྱ་གསར་བ་དང་སྒྲོག་ཚུལ་གསར་བའི་ཕྱོགས་སུ་བརྩོན་ནས་ལམ་བུ་གསར་བ་ཞིག་གཏོད་དེ་མདུན་དུ་བསྐྱོད་རྒྱུ་ནི་གལ་འགངས་ཧ་ཅང་ཆེ་སྙམ་མོ། །
༄༅།།བོད་སྐད་རྒྱང་བསྒྲགས་པའི་གོ་གནས་དང་ནུས་པ་རགས་ཙམ་གླེང་བ།
ཡོང་ཁུངས། : བོད་ཀྱི་སློབ་འབྲིང་དྲ་བ། སྤེལ་དུས། : 2015-04-21
རྩོམ་སྒྲིག་པ། : admin
མཉམ་སྤྱོད །
