༄༅།།བོད་སྐད་བོད་ཡིག་དང་འབྲེལ་བའི་བསམ་ཚུལ་བྱིས་པའི་འཆལ་གཏམ།
གནད་བསྡུས། ལོ་ངོ་དུ་མའི་རིང་སློབ་གྲྭ་ག་གེ་མོ་བརྒྱུད་ཁྲིད་ཐབས་རིགས་དང་པོའི་ལམ་ལུགས་ཀྱིས་འཛིན་གྲྭ་ལ་ཞུགས་ནས་སློབ་སྦྱོང་བྱས་པ་ལ་བརྟེན་ནས་དེ་གའི་མཐོང་ཐོས་དག་ཕྱོགས་བསྡོམས་ཙམ་བྱས་པའི་མྱོང་ཚོར་ཙམ་གླེང་བ།
བརྡ་ཁྱད་གཙོ་བོ། རང་ཡུལ་གྱི་སློབ་གསོ། སློབ་ཁྲིད་བྱེད་ཐབས། དགེ་རྒན་གྱི་བྱང་ཚད། མི་རིགས་ཀྱི་འདུ་ཤེས།
དང་པོ། སྐད་ཡིག་དགོས་མཁོ།
སྤྱིར་མི་རིགས་གང་དང་གང་ཞིག་ཡིན་རུང་མི་རིགས་རང་ཉིད་ཀྱི་མཚོན་རྟགས་སམ་ངོ་བོ་ངོས་འཛིན་གནང་སའི་གཞི་རྩ་གཙོ་བོ་ནི་སྐད་ཡིག་གཉིས་པོ་འདི་ཉིད་ཡིན་པར་འདས་པའི་ལོ་རྒྱུས་ཀྱི་བྱུང་རབས་ལས་གསལ་ཞིང་དངོས་ཡོད་གནས་ཚུལ་ལའང་དེ་ལྟར་ཡིན་པར་རིགས་ཤེས་ཀྱིས་དཔོག་ཐུབ། དེ་ལྟར་ནའང་དེང་སང་མི་རིགས་རང་གི་སྐད་དང་ཡི་གེ་ལ་སྣང་མེད་དང་བརྩི་འཇོག་མེད་བྱེད་མཁན་གྱི་ཅོལ་ཆུང་གང་མང་ཞིག་སྤྱི་ཚོགས་ཀྱི་སྡེ་ཚན་ཡོངས་ནས་ཆར་རྗེས་ཀྱི་ཤ་མོ་བརྡོལ་བ་ལྟར་ཉིན་རེ་ནས་ཉིན་རེར་འཕེལ་བཞིན་པའི་གནས་སྟངས་འདི་ལ་དབྱེ་ཞིབ་ཅིག་བྱས་ན།
གཉིས་པ། སྐད་ཡིག་ཉམས་རྐྱེན།
དེང་སང་རྒན་གཞོན་ཕོ་མོ་ཡོངས་ཀྱིས་རྒྱུན་ལྡན་གྱི་ཁ་བརྡའི་ཁྲོད་དུའང་མི་རིགས་གཞན་གྱི་སྐད་བསྲེས་ནས་ར་མ་ལུག་གི་སྐད་ཅིག་ཏུ་གྱུར་བ་མ་ཟད། ད་དུང་རང་ཉིད་བོད་མི་ཡིན་བསམ་པ་གཞན་ལ་བརྗོད་ཀྱང་དོན་དངོས་སུ་བོད་སྐད་བཤད་མི་ཤེས་པའི་བོད་པ་ཇེ་མང་དུ་སོང་ནས་བོད་ཤོག་བུ་ཆར་ནང་དུ་ལྷུང་བ་བཞིན་བོད་མིའི་བསམ་བློའི་འདུ་ཤེས་ཇེ་ཞན་དུ་འགྲོ་བཞིན་པ་ནི་མིག་མཐོང་མངོན་སུམ་རེད། དེ་བཞིན་ཉེར་མཁོའི་དངོས་པོ་ལ་སོགས་པའི་རྒྱུན་སྤྱོད་ཀྱི་ཅ་དངོས་མང་པོའི་ཐ་སྙད་བོད་ཡིག་ཏུ་ཡོད་ཀྱང་བེད་སྤྱོད་གནང་མཁན་གྱི་མི་འབོར་ཧ་ཅང་ཉུང་ཉུང་ཡིན་པ་མ་ཟད། མི་རིགས་ཀྱི་སྐད་ཡིག་དེ་མི་རིགས་གཞན་གྱི་སྐད་དང་འདྲེས་ཚབས་ཆེ་བའི་སྐབས་འདིར། ད་དུང་ཀླད་མེད་ཅོལ་ཆུང་སྐོར་ཞིག་གིས་རང་གི་བླ་སྲོག་ལྟ་བུའི་ཕ་སྐད་དེ་རྒྱབ་ཏུ་བསྐྱུར་ནས་ཕུགས་ཀྱི་བསམ་བློ་ཅི་ཡང་མེད་པར་རང་དགར་མི་རིགས་གཞན་གྱི་སྐད་ཡིག་སྤྱོད་ཅིང་གཞན་ལ་མཐོང་ཆུང་གི་རང་རློམ་བྱེད་པ་དང་།རང་དང་མི་རིགས་གཅིག་པའི་མི་དང་ཁ་བརྡ་བྱེད་པའི་སྐབས་སུའང་རང་སྐད་ལ་གཞན་སྐད་བསྲེས་ནས་ར་མགོ་ལུག་སྦྱར་བྱེད་མཁན་དག་ནི་ཆེ་ས་དང་མཐོ་ས་ལ་བཀུར་གྱིན་ཡོད། དེ་ལས་ཀྱང་མི་རིགས་རང་གི་མགོ་ཁྲིད་དང་ལས་བྱེད་མི་སྣ་དགེ་རྒན་ཡང་འདུས་འགའ་ཤས་ཀྱིས་བོད་སྐད་ཤེས་ཀྱང་མི་བཤད་པ་མ་ཟད་རང་གི་བུ་རྒྱུད་ཆུང་དུས་ནས་མི་རིགས་གཞན་གྱི་སློབ་གྲྭའི་ནང་དུ་མངགས་ནས་རང་སྐད་རང་ཡིག་སྦྱོང་དུ་མི་འཇུག་པར་མ་ཟད། རང་གི་བུ་རབས་ཚ་རྒྱུད་ལ་ཡང་ཤུགས་རྐྱེན་ངན་པ་འཇོག་བཞིན་འདུག། དེ་ཡང་མཁས་དབང་བསེ་ཚང་བློ་བཟང་དཔལ་ལྡན་མཆོག་གིས། བོད་ཀྱི་སྐད་ཡིག་ཉམས་པར་འགྱུར་རྐྱེན་ནི་བོད་རང་ལ་རག་ལས་ཡོད་པར་གསུང་། ཕ་ཡིས་བོད་ཡིག་མ་བསླབས། བུ་ཡིས་བོད་སྐད་ཀྱང་རྩིས་མེད་དུ་གཏོང་། ཚ་བོས་རང་སྐད་གང་ཡིན་མ་ཤེས་པའི་མཐའ་མར་བོད་རིགས་ལས་ཟུར་དུ་བུད་པ་དེས་མི་རིགས་ཧྲིལ་བོ་ཡང་དེའི་ལམ་ནས་འགྱུར་བ་ཡིན་ཞེས་གསུང་། དེ་མིན་ད་ཆ་བོད་ཀྱི་ས་གནས་སོ་སོའི་སློབ་གྲྭ་ཁག་གི་དགེ་སློབ་གང་མང་ཞིག་གི་ཁྲོད་དུ་ཡང་གཞན་སྐད་དམ་སྦྲགས་སྐད་ཀྱིས་ཁ་བརྡ་བྱེད་མཁན་ནི་ཇེ་མང་ནས་ཇེ་མང་དུ་འགྲོ་བཞིན་པ་མ་ཟད། རང་ལས་ལྷག་ཅིག་མེད་སྙམ་པའི་དེང་སང་གི་ན་གཞོན་དགེ་རྒན་ཁ་ཤས་ཀྱིས་ཕ་སྐད་གཙང་མ་སྣང་མེད་དང་ཁྱད་གསོད་བྱེད་པའི་ཚོར་སྣང་ཞིག་ངང་གིས་ཡོང་བཞིན་འདུག གང་ལྟར་གཞན་སྐད་ཅུང་ཙམ་ཤེས་པའི་མི་བུ་དེ་ཚོའི་མཚར་སྣང་དང་རྩེད་ཆས་ཀྱི་ཁྲོད་ནས་ཕ་སྐད་གཙང་མ་ཉམས་རྒུད་དུ་འགྲོ་བཞིན་ཡོད་པ་མ་ཟད་ང་ཚོའི་མི་རིགས་འདིའི་ཁྱད་ཆོས་ལྡན་པའི་སྐད་དང་ཡི་གེ་འདི་ཉིད་ལ་རྡོག་རྫིས་གཏོང་མཁན་ཇེ་མང་དུ་འགྲོ་བཞིན་པ་རེད།
གསུམ་པ། སྐད་ཡིག་དང་ཁོར་ཡུག་གི་གནད་དོན།
སྤྱི་ལོ་ཉིས་སྟོང་བཅུ་བཞི་ལོའི་ལོ་སྨད་ཅིག་ལ་རྔ་བ་ས་ཁུལ་གྱི་སློབ་འབྲིང་ཞིག་ཏུ་བོད་ཡིག་གི་ཁྲིད་བྱ་མེད་པ་བྱེད་དགོས་ཟེར་བ་ལྟ་བུ་དང་། ད་དུང་དཀར་མཛེས་རྫོང་གི་སློབ་འབྲིང་ག་གེ་མོ་སོགས་ལ་གཞིགས་ནས་བརྗོད་ནའང་ང་ཚོས་ཤེས་ཐུབ་པ་དང་ཁམས་ཕྱོགས་ཀྱི་ས་ཁུལ་སོ་སོར་སློབ་གྲྭ་མང་མོད་ཀྱང་། མི་རིགས་རང་གི་ཁྱད་ཆོས་ལྡན་པའི་སློབ་གྲྭ་ནི་དེ་བས་དཀོན། དེ་བཞིན་དཀར་མཛེས་ཁུལ་ལ་མཚོན་ནའང་ཡུལ་ཚོ་རེ་ལ་སློབ་ཆུང་རེ་དང་། རྫོང་རེ་ལ་བྱིས་བཅོལ་ཁང་དང་།སློབ་ཆུང་གསུམ་བཞི་རེ་དང་སློབ་འབྲིང་བཙུགས་མེད་པའི་རྫོང་ཞིག་ཕལ་ཆེར་མེད་མོད། ཡིན་ནའང་། རྫོང་ཁ་ཤས་ལས་གཞན་ཚང་མར་བྱིས་བཅོལ་ཁང་དང་སློབ་ཆུང་ནས་བོད་ཡིག་གི་ཁྲིད་བྱ་མེད་པའམ་གཙོ་ཁྲིད་མིན་པའི་གནས་ཚུལ་འདུག བྱིས་བཅོལ་ཁང་དང་སློབ་ཆུང་དག་ནི་སློབ་མ་ཞིག་ལ་མཚོན་ན་ཆེས་ཐོག་མའི་ས་བོན་འདེབས་སའི་ས་ཞིང་ཞིག་དང་བསམ་བློའི་འདུ་ཤེས་སོགས་ལ་ཐོག་མའི་བག་ཆགས་འཇོག་ས་དེ་ཡིན་པས་ཐོག་མ་ཉིད་ནས་ཁོར་ཡུག་མ་འཚམ་པ་ཞིག་ནས་གསོ་སྐྱོང་གནང་ན་ང་ཚོའི་མི་རབས་འདི་བརླག་པའི་རྒྱུ་ལྟ་བུར་ཡང་འགྱུར་ཉེན་ཆེའོ།།
བཞི་བ། སྐད་ཡིག་གི་ཁྲིད་ཐབས་དང་ལག་ལེན།
དེ་བཞིན་རྫོང་སོ་སོའི་སློབ་འབྲིང་ལ་མཚོན་ནའང་། དམའ་འབྲིང་གི་སློབ་གྲྭ་ཁ་ཤས་ལ་ཁྲིད་ཐབས་རིགས་དང་པོའི་ལམ་ལུགས་ཟེར་བ་ཞིག་ཡོད་ཀྱང་ར་མགོ་ལུག་སྦྱར་ལ་དགའ་བའི་དེང་གི་ལོ་ཆུང་དགེ་རྒན་འགའ་ཤས་ཀྱིས་ལོ་རྒྱུས་རིག་པ་དང་སྐྱེ་དངོས་རིག་པ་དངོས་ལུགས་རྫས་འགྱུར་ས་ཁམས་ལ་སོགས་པའི་སློབ་ཁྲིད་བྱེད་ལུགས་དེས་ཁྲིད་ཐབས་རིགས་དང་པོ་ཟེར་བ་ནི་རྒྱ་མིན་བོད་མིན་གྱིས་སློབ་ཁྲིད་བྱེད་སྟངས་ཤིག་ལ་གྱུར་འདུག ཁྲིད་ཐབས་རིགས་གཉིས་པའི་ལམ་ལུགས་ཀྱི་དམའ་འབྲིང་གི་སློབ་ཁྲིད་ནི་གཞན་སྐད་གཞན་ཡིག་ལ་བརྟེན་ནས་ཁྲིད་པ་ལས་རང་སྐད་རང་ཡིག་གི་སློབ་ཁྲིད་གནང་མཁན་ཧ་ཅང་ཉུང་བ་མ་ཟད། སློབ་གྲྭའི་བཀོད་སྒྲིག་ཀྱང་རྒྱ་ཡིག་མང་བ་དང་བོད་ཡིག་ཉུང་བ། བོད་ཡིག་གི་སློབ་ཁྲིད་ནི་རྒྱ་ཡིག་གི་སྦྱོང་བྱ་ཁག་ལ་རམ་འདེགས་ལྟ་བུའི་གནས་བབ་དང་དགེ་རྒན་རང་ཉིད་ནས་ཀྱང་མི་རིགས་ཧྲིལ་བོ་ལ་ཐུགས་བསམ་བཞེས་གནང་མཁན་ནི་ཧ་ཅང་ཉུང་། ཐ་ན་བོད་ཀྱི་སྐད་ཡིག་གི་སློབ་ཁྲིད་གནང་སྐབས་ལ་གཞན་སྐད་ལ་བརྟེན་ནས་ཁྲིད་མཁན་མང་བ་དང་སློབ་མ་ལ་སློབ་གསོ་དང་བསླབ་བྱ་གནང་སྐབས་ཀྱང་གཞན་སྐད་ཁོ་ནས་བཤད་པས་གཞོན་སྐྱེས་ཀྱི་སློབ་མ་གང་མང་ཞིག་ལ་བག་ཆགས་ངན་པ་འཇོག་བཞིན་ཡོད།དེའི་ཕྱིར་གཞོན་སྐྱེས་སློབ་མ་གང་མང་ཞིག་སློབ་མཐར་ཕྱིན་རྗེས་བོད་སྐད་ཡག་པོ་ཞིག་བཤད་མི་ཤེས་པ་མ་ཟད་ར་མ་ལུག་གི་སྐད་ཅིག་ལ་འགྱུར་བཞིན་འདུག དེ་ནི་དངོས་གནས་ཡིད་སྐྱོ་དགོས་པ་དང་ཤེས་ལྡན་རྣམས་ཀྱིས་ཐུགས་གཞིགས་ནན་མོ་གནང་དགོས་པ་ཞིག་རེད་སྙམ།
ལྔ་བ། སྐད་ཡིག་དང་བཀོལ་སྤྱོད་ཀྱི་གནད་དོན།
སློབ་གྲྭའི་ཁོར་ཡུག་དེ་འདྲ་ཞིག་ནས་རང་མི་རིགས་ཀྱི་སྐད་དང་ཡི་གེ་ལ་མཐོང་ཆེན་དང་རྒྱུན་འཛིན་དར་སྤེལ་སོགས་ཀྱི་འདུ་ཤེས་སོགས་མེད་པའི་སློབ་མ་གང་མང་ཞིག་འབྱུང་བཞིན་པ་ནི་ང་ཚོས་མཐོང་ཐོས་སུ་ཡོད་པ་རེད། ད་ལྟའི་སློབ་མ་གང་མང་ཞིག་ལ་རང་སྐད་རང་ཡིག་ངག་ཐོག་ནས་བརྗོད་མི་ཐུབ་མཁན་ཧ་ཅང་མང་། དེ་ལས་ཀྱང་ཡ་མཚན་པ་ཞིག་ལ་ཁོང་ཚོས་བོད་སྐད་བཤད་དུས་ངོ་ཚ་བའི་སྣང་ཚུལ་དེ་ནི་ཤིན་ཏུ་ངོ་ཚ་བའི་གནས་ལའང་ངོ་ཚ་རུ་མཐོང་གི་མེད་པ་དེའོ།།
རང་ཉིད་ཀྱི་བསམ་ཚུལ་ཡིན་ན། དགེ་རྒན་གྱིས་སློབ་གསོ་གཏོང་ལུགས་དང་སྤུས་ཚད་ཀྱིས་མི་རིགས་ཧྲིལ་བོར་འགན་ཁུར་གྱི་འདུ་ཤེས་ཡོད་མེད་གསལ་བོ་མཚོན་འདུག་པ་མ་ཟད་སློབ་གྲྭ་ཞིག་གི་ངོ་གདོང་ཡང་གསལ་བོ་མངོན་འདུག
དྲུག་པ། སྐད་ཡིག་ནི་བླ་སྲོག་ཡིན་ཟེར་དོན།
མི་རིགས་ཤིག་འགྲུབ་བྱེད་ནི་སྐད་དང་ཡི་གེ་འདི་ཉིད་ཡིན་ཕྱིར། མི་རིགས་ཧྲིལ་པོའི་བླ་སྲོག་ནི་རང་ཉིད་ཀྱི་བླ་སྲོག་ཀྱང་ཡིན་འོས། གལ་ཏེ། བླ་སྲོག་དང་བྲལ་ན་རྣམ་ཤེས་བོར་བའི་བེམ་རོ་ཞིག་ཏུ་གྱུར་ཚར་བས་ནམ་ཡང་སྙིང་བོ་བྲལ། དེར་བརྟེན་མི་བུ་སུ་དང་གང་ཞིག་ཡིན་རུང་རང་ཉིད་ཀྱི་མི་རིགས་ལ་རང་ཉིད་དང་འཚམ་པའི་འོས་འགན་རེ་ཡོད་པ་ནི་གོར་མ་ཆག ང་ཚོས་ཁ་སྤོབས་ཙམ་གྱིས་ང་བཟང་དང་ཁྱེད་སྡུག་སོགས་གཅིག་གིས་གཅིག་ལ་ལེ་ལན་བདའ་བཞིན་བཞུགས་ན་ཕན་ཐོགས་དང་གྲུབ་འབྲས་གང་ཡང་མ་མཐོང་བས་དེ་ལས་དོན་དམ་པའི་ལག་ལེན་དངོས་ཀྱི་ཐོག་ནས་མི་རིགས་རང་གི་སྐད་ཡིག་གཉིས་པོ་འདི་ལ་གཅེས་སྤྲས་དང་སྦྱོང་བ་ཧུར་ཐག་བགྱིད་པ་དང་གཞན་ལའང་ཅི་ནུས་དར་སྤེལ་རྒྱུན་འཛིན་སོགས་བྱེད་པ་དང་། བསམ་བློའི་འདུ་ཤེས་ཡག་པོ་རེ་བཟུང་ནས་མི་རིགས་རང་ལ་ངོ་གནོང་མི་དགོས་པའི་བྱ་བ་ལ་འབད་ན་ད་གཟོད་དུས་རབས་ཉེར་གཅིག་པའི་ན་གཞོན་ཞིག་གི་འོས་འགན་ཕྲག་ཏུ་བླངས་པ་རེད་ལ། མི་རིགས་ཧྲིལ་པོར་ཕན་ཐོགས་པའི་ལས་ཀ་རླབས་ཆེ་བ་དེའང་ཡིན་ནོ།།
