༄༅།།སློབ་འབྲིང་སློབ་མའི་རྩོམ་འབྲིའི་ནུས་པ་ཇེ་ཞན་དུ་འགྲོ་བའི་རྐྱེན་འགའ་བཤད་པ།
ཁ་བ་སྙན་གྲགས། དཀར་མཛེས།
དང་པོ། སྐད་ཡིག་ཅེས་པའི་ངེས་ཚིག་ཙམ་བཤད་པ།
སྤྱིར་སྐད་ཡིག་ཅེས་པ་ནི་སྐད་ཆ་དང་ཡི་གེའི་བསྡུས་མིང་ཡིན་ཞིང་།ནང་སེམས་ཀྱི་ཚོར་ཤེས་དང་རྣམ་རྟོག་ སོགས་སྒྲ་གཟུགས་སུ་ཐོན་པའི་ཤེས་བྱ་ཞིག་ཡིན་ལ།རྒྱལ་ཁབ་དང་ས་ཁུལ་དམིགས་བསལ་བའི་མི་མང་གིས་སྤྱོད་པའི་སྐད་ཆ་དང་ཡི་གེ་འབྲི་བའི་ཚིག་རྣམས་ལ་སྐད་ཡིག་ཅེས་བྱའོ།།དེ་བཞིན་སྐད་ཅེས་པ་ནི་མི་རིགས་རང་ཉིད་ལ་དབང་བའི་སྐད་ཆ་དེ་ལ་ཟེར་ཞིང་།ཡིག་ཅེས་པ་ནི་ཡི་གེ་ཞེས་པའི་བསྡུས་ཚིག་ཡིན།དེར་བརྟེན་ང་ཚོས་རྒྱུན་པ་དགེ་རྒན་རྣམས་རིགས་དགར་སྐབས་བོད་ཡིག་དགེ་རྒན་ཟེར་ན་མི་རིགས་སྟེ།སྐད་ཡིག་དགེ་རྒན་ཞེས་ཟེར་ན་དོན་དང་མཐུན་ཞིང་གནད་ལ་འཁེལ་བ་ཞིག་འདུག།སྐད་ཡིག་དགེ་རྒན་ཡིན་པ་ལས་བོད་ཡིག་རྐྱང་པའི་དགེ་རྒན་ཞིག་མིན།བོད་ཡིག་དགེ་རྒན་ཟེར་ན་བོད་ཡིག་ཁོ་ན་འཁྲིད་མཁན་ཙམ་ལས་སྐད་ཆ་དང་ཡི་གེ་གཉིས་ཀ་འཁྲིད་མཁན་ཞིག་ལ་ནམ་ཡང་ངོས་འཛིན་དུ་མེད་པས་ང་ཚོས་སྐད་ཡིག་དགེ་རྒན་ཟེར་དགོས་པ་ལས་བོད་ཡིག་དགེ་རྒན་ཞེས་བརྗོད་མི་རིགས་སྙམ།དེར་བརྟེན་སྐད་ཡིག་དགེ་རྒན་གྱིས་འགན་འཁུར་ཡང་དེ་ལྟར་ལྕི་བ་རེད།རྩོམ་འབྲི་ལས་ཀ་ཡང་སྐད་དང་ཡི་གེ་གཉིས་ཆ་ལ་བརྟེན་དགོས་པས་ངས་ནི་སྐད་ཡིག་གི་རྩོམ་འབྲི་བ་དང་སྐད་ཡིག་གི་དཔེ་ཀློག སྐད་ཡིག་གི་དགེ་རྒན་ཞེས་ཀྱང་འབྲི་འདོད་བྱུང་།
གཉིས་པ།སློབ་མ་རང་ངོས་ཀྱི་སྐད་ཡིག་གི་རྨང་གཞི་བཤད་པ།
སློབ་འབྲིང་སློབ་མའི་རྩོམ་ཡིག་ལས་བྱའི་ཁྲོད་དུ།སློབ་མ་ཕལ་ཆེར་བའི་རྩོམ་ཡིག་ཏུ་ཡིག་ནོར་མང་བ་དང་།ཕྲད་སྦྱོར་ཚུལ་ནོར་བ།ཚིག་སྦྱོར་གོང་འོག་འཁྲུག་པ།བོད་རང་གི་སྐད་ཆའི་ཉམས་དང་བཤད་སྟངས་མི་འགྲིག་པ།ལྷག་པར་བྱེད་འབྲེལ་གྱི་ཕྲད་དང་།ལ་དོན་གྱི་ཕྲད།ལྷག་བཅས་ཀྱི་ཕྲད།ཚིག་ཕྲད་ཅིང་སོགས་ཀྱི་སྦྱོར་ཚུལ་ནོར་བའི་གནད་དོན་སོགས་ནི་དམིགས་བསལ་གྱིས་མཐོང་བ་ཞིག་ཏུ་མངོན་ཡོད།
གསུམ་པ། དགེ་རྒན་དང་སློབ་མའི་དཔེ་ཀློག་སྐོར་བཤད་པ།
སྐད་ཡིག་གི་དཔེ་ཀློག་ཅེས་པ་ནི་སྐབས་སུ་བབས་པའི་བརྗོད་དོན་དང་འཕྲོས་ནས་སོམས་དགོས།སྤྱིར་དཔེ་ཀློག་ནི་དཔེ་ཆའི་ངོས་ཀྱི་ཡི་གེ་ངོས་འཛིན་དང་།དེ་ནས་དེའི་ནང་དོན་ཤེས་པ་བྱས་ཏེ་རྩོམ་ཡིག་འབྲི་བ་སོགས་ལ་ཕན་པའི་རྒྱུ་ཆ་གསོག་དགོས།དེ་བཞིན་སྐད་ཡིག་གི་ཆུ་ཚད་བཟང་ངན་ནི།གཙོ་བོ་དཔེ་ཀློག་པ་འམ་དཔེ་ཆ་བལྟ་མིན་ལ་རག་ལས་པས།རྩོམ་ཡིག་ཡག་པོ་འབྲི་ཐུབ་མིན་དེའང་དཔེ་ཀློག་བྱེད་མིན་ལ་ཐད་ཀར་འབྲེལ་བ་དམ་ཟབ་ཡོད།གྲངས་ཉུང་མི་རིགས་ས་ཁུལ་གྱི་མི་རིགས་སློབ་འབྲིང་ངམ་བོད་ཀྱི་སློབ་འབྲིང་སློབ་མ་ཕལ་ཆེར་བར་མཚོན་ན།སློབ་སྐབས་ཤིག་ལ་སློབ་དེབ་ཕུད་པའི་བསླབ་ཕྱིའི་དཔེ་ཆ་ཀློག་མཁན་ཧ་ལམ་མེད་པའི་ཚད་དུ་སླེབས་ཡོད།དེར་བརྟེན་སློབ་འབྲིང་སློབ་མ་ཕལ་ཆེར་དཔེ་ཀློག་གི་འདུ་ཤེས་དང་དཔེ་ཀློག་ལ་དགའ་ཞེན་སོགས་མེད་པས་རྩོམ་འབྲིའི་ནུས་པ་ཡང་ཞན་པར་འགྱུར་བའི་རྒྱུ་རྐྱེན་གཙོ་བོ་ཞིག་ཏུ་འགྱུར་བཞིན་འདུག །
བཞི་པ། སྐད་ཡིག་གི་རྩོམ་འབྲིའི་ལག་ལེན་བཤད་པ།
རྩོམ་རྒྱུགས་སོགས་ལ་གཞིགས་ནས་སློབ་འབྲིང་སློབ་མས་རྩོམ་ཡིག་རེ་འགའ་འབྲི་ན་ཡང་། སློབ་མས་རང་ངོས་ནས་བསམ་བློ་མི་གཏོང་བ་གཞན་རྩོམ་ཁོ་ན་ལ་གཞི་བཅོལ་བ་དང་།དགེ་རྒན་ཚོས་རྩོམ་ཡིག་ལས་བྱ་བཀོད་སྒྲིག་བྱས་ན་ཡང་།དགེ་རྒན་ཚོས་དུས་ལྟར་མི་བཅོས་ཤིང་།བཅོས་ན་ཡང་རྩོམ་རིག་དཔྱད་བརྗོད་སོགས་མི་བྱེད་པས་སློབ་མའི་རྩོམ་འབྲིའི་སྤྲོ་བ་སྐྱེང་སྲིང་བྱེད་མི་ཐུབ།དེ་བཞིན་དགེ་རྒན་རང་ངོས་ལ་ཡང་རྩོམ་འབྲིའི་ཆུ་ཚོད་ཞན་ཞིང་སྤྲོ་བ་མེད་མཁན་མང་བས་སློབ་མ་མང་པོ་ཞིག་ལ་ཤུགས་རྐྱེན་འདིས་ཀྱང་རྩོམ་འབྲིའི་ནུས་པ་ཇེ་ཞན་དུ་འགྱུར་བའི་རྒྱུ་རྐྱེན་དུའང་འགྲོ་བཞིན་ཡོད།
ལྔ་པ། དགེ་སློབ་གཉིས་ཆའི་རྩོམ་འབྲིའི་དགའ་ཞེན་སྐོར་བཤད་པ།
དགེ་རྒན་དང་སློབ་མ་གཉིས་ཆ་ལ་ཐོག་མའི་སྐུལ་སློང་ཞིག་དགོས་པ་དགའ་ཞེན་རེད།བྱ་བ་ཅི་དང་གང་ཞིག་སྒྲུབ་རུང་དགའ་ཞེན་མེད་ན་བྱ་བ་སོགས་རྒྱུན་བསྲིངས་མི་ཐུབ་ལ།དེ་བཞིན་འཐུས་སྒོ་ཚང་བ་ཞིག་ཀྱང་ཡོང་དཀའ།དེ་བཞིན་རྩོམ་འབྲིའི་ལས་ཀྱང་དེ་ལས་མ་འདས།དགེ་རྒན་རྩོམ་འབྲི་ལ་དགའ་ཞེན་མེད་མཁན་ཞིག་དང་ཡང་ན་རྩོམ་འབྲི་ལ་སུན་འབྱིན་བྱེད་མཁན་ཞིག་དང་འཕྲད་པ་ཡིན།རྩོམ་འབྲི་ལ་དགའ་མཁན་གྱི་སློབ་མ་ཁ་ཤས་ཡོད་ཀྱང་དེ་དག་ཀྱང་རྩ་བརླག་ཏུ་གཏོང་པའི་གནད་དོན་ཡང་ཡོད་སྲིད་པས་དགེ་སློབ་གཉིས་ཆར་ཐུན་མོང་གི་དགོས་པ་གཅིག་ནི་དགའ་ཞེན་རེད་འདུག་སྙམ།
མདོར་ན།དགེ་རྒན་རྩོམ་འབྲི་ལ་དགའ་ཞིང་རྩོམ་འབྲིའི་ལས་ལ་འབད་མཁན་ཞིག་ཡིན་ན་སློབ་མ་ཡང་དེ་བཞིན་ཡོང་བ་ནི་ཆོས་ཉིད་དོ།།
༈ཕྱི་ལོ༢༠༡༩ལོའི་ཟླ་༡༢པའི་ཚེས༣ཉིན་དཀར་མཛེས་རྫོང་མི་རིགས་སློབ་འབྲིང་ནས་སྦྱར།
