༄༅།།ཆ་འཕྲིན་ལག་རྩལ་གྱིས་བོད་སྐད་ཡིག་སློབ་ཁྲིད་ལ་ནུས་པ་ཆེན་པོ་འདོན་ཐུབ་པའི་སྐོར་གླེང་བ།
ཆ་འཕྲིན་ལག་རྩལ་ནི་སྤྱི་ཚོགས་གོང་འཕེལ་འགྲོ་བའི་གཞི་རྩའི་ཆ་རྐྱེན་ལ་གྱུར་ནས་དེང་དུས་སྤྱི་ཚོགས་ཀྱི་ལས་རིགས་སོ་སོས་ཆ་འཕྲིན་ལག་རྩལ་མཁོ་སྤྱོད་བྱེད་བཞིན་ཡོད། ད་ལྟ་ཚན་རིག་དར་ཁྱབ་ཆེ་བའི་མི་རིགས་དང་ས་གནས་དག་གིས་ཚན་རྩལ་འཕེལ་རྒྱས་ཞན་པའི་མི་རིགས་དང་ས་གནས་ལ་དཔལ་འབྱོར་དང་རིག་གནས་སོགས་ཀྱི་ཐོག་ནས་བཙན་ས་འཛིན་པ་དང་མི་རིགས་དེ་དག་གི་རིག་གནས་ལའང་གནོད་པ་ཚབ་ཆེན་བཟོས་ཡོད་རེད། དེ་གཙོ་བོ་ནི་ཚན་རིག་འཕེལ་རྒྱས་མ་སོང་བའི་དབང་གིས་མིའི་སེམས་ཁམས་ཚན་རིག་དར་ཁྱབ་ཆེ་བའི་མི་རིགས་དང་ས་གནས་ལ་ཁ་ཕྱོགས་ནས་ཁ་ལོ་འགྱུར་བ་ཡིན། དེ་བས་དེང་གི་བོད་ཡིག་མཁས་པ་རྣམས་ཀྱིས་འབད་པ་ཆེན་པོ་མཛད་ནས་བོད་ཁུལ་གྱི་ཆ་འཕྲིན་རིག་གནས་ཀྱི་ཐད་ལ་གོང་འཕེལ་ཚད་མེད་བྱུང་བར་ནུས་པ་ཆེན་པོ་ཕུལ་ཡོད། འོན་ཀྱང་རིག་གནས་རྙིང་པར་མི་དགའ་ཞིང་རིག་གནས་གསར་བར་མི་སྤྱོད་པའི་མི་འགས་ད་དུང་ཕ་མས་བཞག་པའི་ཉལ་ས་དྲོད་མོའི་སྟེང་ནས་གཞོག་གཡས་འཁོར་གཡོན་འཁོར་བྱེད་བཞིན་བདེ་བར་མཛེས་པའི་ཉམས་སྣང་འདྲ་ཤར་བཞིན་ཉལ་འདུག མི་དེ་དག་ཉལ་ནའང་ཉལ། དེང་གི་བོད་ཡིག་དགེ་རྒན་འགའ་རེས་ཀྱང་ flash དང་གློག་རྡུལ་དཀར་པང་། qqt ཁྲིད་ཆས་ཟེར་བ་འདི་དག་ཅི་ཡིན་འདི་ཡིན་མི་ཤེས། ང་ཚོ་བོད་འདི་སྔ་ས་ནས་སྲོལ་རྒྱུན་སློབ་ཁྲིད་བཀོལ་ནས་ཡོང་བས་འཛམ་གླིང་ནས་མིང་གྲགས་ཅན་གྱི་མཁས་པ་བགྲང་ལས་འདས་པ་བྱུང་ཡོད། དེའི་དུས་ qqt ཁྲིད་ཆས་ཟེར་བ་ཞིག་ཡོད་མ་རེད། ནག་པང་ཟེར་བ་སློབ་ཁྲིད་སྐབས་སུ་ཡི་གེ་འབྲི་ས་ཞིག་ཡོད་རེད་མ་གཏོག་དཀར་པང་ཟེར་བའང་མིག་གིས་མ་མཐོང་ལ་རྣ་བས་ཀྱང་མ་ཐོས། ངས་སྲོལ་རྒྱུན་གྱི་སློབ་ཁྲིད་ཁྲིད་ཐབས་འདི་མེད་པར་བྱེད་རྒྱུ་མིན། ཞེས་བཤད་ནས་འབྲོང་རྭ་རྭ་ཅོའི་སྦུག་ལ་འཛུལ་ནས་བཙན་ས་འཛིན་ཁུལ་བྱེད་བཞིན་འདུག བཙན་ས་བཟུང་ན་ཡང་དེ་ནི་ལོང་བས་ལོང་སྙོབ་དང་ཁྲོན་པའི་ནང་གི་སྦལ་བ་ལས་ཁ་རྩོད་བྱེད་གཞི་ཞིག་མ་རེད། སློབ་ཁྲིད་སྐབས་སུ་གློག་རྡུལ་དཀར་པང་དང་སློབ་ཕྲན་ qqt ཁྲིད་ཆས་བཀོལ་སྤྱོད་བྱེད་པ་ནི་སྲོལ་རྒྱུན་གྱི་སློབ་ཁྲིད་མེད་པར་བྱེད་པ་མ་ཡིན་ལ་སྲོལ་རྒྱུན་གྱི་སློབ་ཁྲིད་ཇེ་ལེགས་དང་ཇེ་ཡག་འགྲོ་བར་སློབ་ཁྲིད་རོགས་འདེགས་བྱེད་པའི་ཡོ་བྱད་བཟང་ཤོས་བཀོལ་སྤྱོད་བྱེད་པ་ཡིན། མི་རིགས་མང་པོས་རང་སྐད་ཡིག་སློབ་ཁྲིད་སྐབས་སུ་གློག་རྡུལ་དཀར་པང་དང་ qqt ཁྲིད་ཆས་བཀོལ་བཞིན་འདུག་པས་དེ་དག་གིས་གློག་རྡུལ་དཀར་པང་དང་སློབ་ཕྲན་ qqt ཁྲིད་ཆས་ཀྱིས་རང་མི་རིགས་རིག་གནས་སློབ་ཁྲིད་ལ་ཕན་པ་འདུག་བསམ་ནས་བཀོལ་བ་དང་གློག་རྡུལ་དཀར་པང་དང་སློབ་ཕྲན་ qqt ཁྲིད་ཆས་ནི་ཚན་རིག་པ་མང་པོས་བཀོལ་སྤྱོད་དང་ཞིབ་འཇུག་གྲངས་མང་མཛད་ནས་ལེགས་པོ་འདུག ཁྲིད་ཆས་འདི་བཀོལ་ན་སློབ་གསོ་སློབ་ཁྲིད་ལ་ཕན་པ་འདུག་པ་ཚན་རིག་གིས་ཞིབ་འཇུག་དང་ཐག་གཅོད་གནང་ནས་བཀོལ་བཞིན་ཡོད་པ་རེད་མ་གཏོགས་གློག་རྡུལ་དཀར་པང་དང་སློབ་ཕྲན་ qqtཁྲིད་ཆས་འདི་མི་ག་གེ་མོ་ཞིག་གིས་བཀོལ་སྤྱོད་བྱེད་དགོས་བཤད་པ་ནི་མ་རེད། སྐད་ཡིག་ནི་འཛམ་གླིང་ལ་ཁ་ཕྱོགས་པ་དང་མ་འོངས་ལ་ཁ་ཕྱོགས་དགོས་པས་ཆ་འཕྲིན་ལག་རྩལ་ནི་སློབ་ཁྲིད་ཀྱི་ཡོ་བྱད་བཟང་ཤོས་ལ་བརྩི་དགོས་ཀྱི་རེད། ཆ་འཕྲིན་ལག་རྩལ་གྱིས་བོད་ཡིག་སློབ་ཁྲིད་གོ་རིམ་ཇེ་བཟང་དང་སྤུས་ཚད་ཇེ་ལེགས་ལ་གཏོང་ཐུབ། བོད་ཡིག་ནི་བོད་ཁུལ་ནས་ཆ་འཕྲིན་ལག་རྩལ་བཀོལ་སྤྱོད་ཆེས་ཆེ་བ་དེ་ཡིན་པས། ཆ་འཕྲིན་ལག་རྩལ་གྱིས་བརྗོད་མི་ཤེས་པའི་བཀོལ་སྤྱོད་བྱེད་ས་ཡོད་རེད། ལྷག་པར་དུ་ཆ་འཕྲིན་ལག་རྩལ་གྱིས་བོད་ཡིག་སློབ་ཁྲིད་ལ་ནུས་པ་ཚད་མེད་ཐོན་ཡོད་ལ་ཁྲིད་ཆས་ཀྱིས་སློབ་མར་བོད་ཡིག་སློབ་འདོད་ལྡན་པར་སྐུལ་མ་བྱེད་ཐུབ་པ་དང་། སློབ་མའི་བསམ་གཞིགས་ནུས་པ་ཇེ་མཐོར་གཏོང་ཐུབ། སྔོན་དུས་སུ་དགེ་རྒན་ལ་འབྲི་བྱེད་ཀྱི་ས་སྨྱུག་གཅིག་དང་སློབ་ཁྲིད་ནང་དོན་བཤད་བྱེད་ཀྱི་ཁ། དེ་ལས་ལྷག་ན་ནག་པང་ཆུང་བ་ཞིག་དང་པར་རིས་འགའ་ལས་ཡོད་མ་རེད། དེང་དུས་སློབ་ཁྲིད་ཁྲིད་ཆས་བཟོས་ན། སྐད་དང་སྒྲ། ཡི་གེ་དང་པར་རིས། བརྙན་ཟློས་དང་འགུལ་རིས་སོགས་སློབ་ཁྲིད་ཐབས་ཤེས་སྣ་མང་བཀོལ་རྒྱུ་ཡོད། སློབ་ཕྲན་དང་ qqtཁྲིད་ཆས་ལས་སློབ་མར་སློབ་ཁྲིད་སྐབས་སུ་རྩོམ་པ་པོ་དང་ས་ཆ་ག་གེ་མོ་འདི་རེད་ཅེས་པར་རིས་མིག་ལམ་དུ་དངོས་སུ་ཤར་བ་དང་པར་རིས་ག་ཚད་དགོས་ན་དེ་ཚད་བཀོད་སྒྲིག་བྱེད་ཆོག ད་དུང་གློག་བརྙན་གཏོང་ནས་རྩོམ་པ་པོ་དང་ས་ཆ་སོགས་མིག་གི་མཐོང་བ་དང་ཁ་ཡིས་ངོ་སྤྲོད་བྱས་ན་སློབ་མར་རྩོམ་པ་པོ་ཐུག་པ་དང་ས་ཆ་དེར་དངོས་སུ་ཐོན་པ་ལྟ་བུའི་ཚོར་སྣང་འབྱུང་སྲིད། བྱིས་པ་བློ་རིག་རྣོ་བ་དག་གིས་དེ་ལྟ་བུའི་ qqt ཁྲིད་ཆས་ཐེངས་གཅིག་ཁྲིད་ན་རྗེས་སུ་རྩོམ་པ་པོའི་སྐུ་པར་མཐོང་ན་མི་ངོ་ཤེས་འཕྲད་པ་ལྟར་ངོས་ཟིན་གྱིས་ཡོད། ད་དུང་སློབ་ཚན་ལས་ཕོ་བྲང་པོ་ཏ་ལའམ་དཔལ་ས་སྐྱ་གཙུག་ལག་ཁང་ལྟ་བུའི་ས་ཆ་ག་གེ་མོ་ངོ་སྤྲོད་གློག་བརྙན་ཐེངས་གཅིག་གཏོང་ནས་སློབ་ཁྲིད་ངོ་སྤྲོད་མཛད་ན་སློབ་ཚན་འདི་ཡང་དག་པར་ཤེས་པའི་རྨང་གཞི་ལེགས་པོ་ཞིག་བསྐྲུན་ཡོད།
དེང་དུས་མེ་ཏོག་པདྨ་འབྲི་འགྲེལ་བྱས་ན། ཤིང་པདྨ་དང་ཆུ་སྐྱེས་པདྨ། གངས་རྒྱན་པདྨའི་པར་རིས་དྲྭ་ཚིགས་ལས་ཕབ་ལེན་བྱས་ནས་སློབ་མར་སློབ་ཁྲིད་བྱེད་པའི་སྐབས་སུ་པར་རིས་རེ་རེ་བཞིན་ཤར་སུ་བཅུགས་ནས་ངོ་སྤྲོད་བྱས་ན་སློབ་མས་དངོས་སུ་ལག་ལེན་བྱེད་པ་ལྟར་མིག་མཐོང་ལག་ཟིན་གྱི་ནུས་པ་ཐོན་ཡོད། དེ་མིན་ཆུ་སྐྱེས་པདྨ་ཆུ་ཁར་སྐྱེས་ཡོད། མེ་ཏོག་མཛེས་པོ་ཞིག་རེད། གངས་རྒྱན་པདྨ་གངས་རིའི་ངོས་སུ་སྐྱེས་ཡོད། སྐྱེས་སྟོབས་ཆེས་ཆེ་བའི་མེ་ཏོག་ཞིག་རེད་ཅེས་བཤད་ན་རྣ་བས་གོ་བ་ཙམ་ལས་མེ་ཏོག་གང་འདྲ་ཞིག་ཡོད་པ་གསལ་བོ་ཤེས་ཀྱི་མ་རེད། ད་དུང་འགུལ་རིས་སོགས་བཀོལ་ནས་མེ་ཏོག་དེ་དག་ཁ་འབྱེད་པའམ་རླུང་གི་སྐྱོད་པའི་རྣམ་པ་བཟོས་ན་དེ་ལས་བཟང་བར་སེམས། དེ་བས་སློབ་ཁྲིད་ལེགས་འགྲུབ་བྱུང་བར་བོད་ཡིག་དགེ་རྒན་གྱིས་ qqt ཁྲིད་ཆས་མ་ཤེས་རང་ཤེས་ཡིན་པའི་ལག་རྩལ་ཞིག་དང་། flash དང་སློབ་ཕྲན་ qqt ཁྲིད་ཆས་ལེགས་པོ་ཞིག་བཟོ་ཤེས་པ་དང་གློག་རྡུལ་དཀར་པང་བཀོལ་ཤེས་པར་བྱེད་རྒྱུ་ནི་དུས་རབས་ཀྱིས་བོད་ཡིག་དགེ་རྒན་ལ་སྟེར་བའི་འོས་འགན་རེད།
རྩིས་འཁོར་ནི་ཤེས་བྱ་འདུས་པའི་མཛོད་དང་དྲྭ་རྒྱ་ནི་མ་ཤེས་ལམ་སྟོན་གྱི་དགེ་རྒན་ལེགས་ཤོས་དེ་རེད། དེས་བོད་ཡིག་དགེ་རྒན་ཞིག་ཡིན་ན་qqtཁྲིད་ཆས་བཟོ་ཤེས་པ་དང་གློག་རྡུལ་དཀར་པང་དང་སློབ་ཕྲན་བཀོལ་སྤྱོད་བྱེད་ཤེས་པར་བྱ་རྒྱུ་ནི་དགོས་ངེས་ཀྱི་རང་བཞིན་དང་བོད་ཡིག་དྲྭ་རྒྱ་སྤེལ་བ་དང་བོད་ཡིག་དྲྭ་རྒྱ་སོ་སོར་འགྲིམས་ཤེས་པ་མ་ཟད་རང་ཉིད་ཀྱིས་ཀྱང་དྲྭ་རྒྱ་རུ་བོད་ཡིག་ཟིན་བྲིས་སོགས་ཐབས་བརྒྱ་ཇུས་སྟོང་གིས་ལེགས་པོར་བཟོ་ཤེས་པར་བྱ་རྒྱུ་དང་། མ་སློབ་ཐབས་མེད་ཡིན་པའི་དགེ་རྒན་གྱི་ལས་རིགས་ལག་རྩལ་ཞིག་ཡིན།
qqt ཁྲིད་ཆས་དང་གློག་རྡུལ་དཀར་པང་། སློབ་ཕྲན་ནི་སློབ་ཁྲིད་ལ་ཞབས་འདེགས་ཞུ་བའི་ཡོ་བྱད་ཞིག་དང་།ང་ཚོས་ཁྲིད་ཆས་བཟོས་རྗེས་ཁྲིད་ཆས་ཀྱིས་སློབ་ཁྲིད་ལ་ཕུལ་བའི་སྒྱུ་རྩལ་ནུས་པ་ཤེས་དགོས་ལ་ཕུལ་དུ་བྱུང་བའི་ཁྲིད་ཆས་ལེགས་པོ་ཞིག་ཡོད་ན་སློབ་ཐུན་འདི་བཟང་གྲུབ་ཡོངས་བའི་ཆ་རྐྱེན་རེད། དེ་བས་བོད་ཡིག་སློབ་ཁྲིད་འདི་ཆ་འཕྲིན་ལག་རྩལ་བཀོལ་སྤྱོད་བྱེད་རྒྱུ་དང་ཁ་བྲལ་ཐབས་མེད་པ་ཞིག་རེད།།
ཁྲིད་ཆས་ཀྱིས་སློབ་མར་ཡི་གེ་སློབ་སེམས་ལྡན་བཅུགས་ལ་བསམ་གཞིགས་ནུས་པ་ཇེ་ཟབ་བཏང་ཞིང་སློབ་མའི་སློབ་སྦྱོང་གི་ནུས་པ་སྐྱེད་སྲིང་བྱེད་ཐུབ། དེ་བས་ཁྲིད་ཆས་ལེགས་པོ་ཞིག་ཤེས་པར་བྱས་ནས་དགེ་རྒན་གྱི་མི་འདང་ས་ཁ་ཚང་བར་བྱེད་ནས་སློབ་ཁྲིད་ཕུན་སུམ་ཇེ་ཚོགས་སུ་གཏོང་དགོས། ཅི་ཕྱིར་ཞེ་ན། དགེ་རྒན་གྱི་ནུས་པ་ངོ་མ་ནི་དགེ་རྒན་གྱི་ཡོན་ཚད་དང་ཁ་བཤད་མཁས་མིན་མ་ཡིན་པར་སློབ་མ་སློབ་སྦྱོང་ལ་ཁ་ཕྱོགས་ནས་སློབ་འདོད་ཡོད་པར་བསྒྱུར་བ་དང་རིག་གནས་ཤེས་སླ་བར་སྐུལ་ཐུབ་པ་དང་སློབ་མས་རིག་གནས་ཤེས་འདོད་ཀྱི་རེ་བ་ཡང་དག་པར་སྐོང་ནས་སློབ་མ་སྤྲོ་སེམས་ལྡན་པའི་ངང་ནས་སློབ་ཁྲིད་ལ་ཞུགས་ཐུབ་པ་བྱ་རྒྱུ་དེ་ཡིན།
ཤོ་ལོ་ཀ་དང་སྙན་ཚིག་ཁག་གཅིག་ནག་པང་ངོས་སུ་འབྲི་དགོས་ན་དུས་ཚོད་ཧ་ཅང་མང་པོ་ཡོད་དགོས་རེད། དགེ་རྒན་གྱིས་ཉིན་བཞིན་སློབ་ཐུན་དུས་ཚོད་མང་ས་ནག་པང་ཐོག་ལ་འབྲི་བ་ལས་འཆད་ཁྲིད་ཀྱི་དུས་ཚོད་ཐུང་ཐུང་རེད། ད་དུང་སློབ་ཚན་ནང་གི་རྒྱབ་ལྗོངས་དང་སློབ་ཚན་དང་འབྲེལ་བའི་རིས་མོ་སོགས་བཤད་པ་ཙམ་གྱི་གོ་བ་ལོན་དཀའ་བས་སློབ་མ་མང་ཆེ་བས་གསལ་བོ་ཞིག་ཤེས་ཡོད་མ་རེད། གལ་སྲིད་གློག་རྡུལ་དཀར་པང་དང་སློབ་ཕྲན། qqt ཁྲིད་ཆས་བཀོལ་སྤྱོད་བྱས་ན་གོང་གི་གནད་དོན་དེ་དག་ཡོད་མ་རེད། དེ་བས་དགེ་རྒན་གྱིས་གཞན་གྱི་ཁྲིད་ཆས་ཡག་ཤོས་ལ་སློབ་སྦྱོང་དང་རང་གི་ཤེས་ཚད་ཟུང་དུ་སྦྲེལ་ནས་སློབ་ཁྲིད་སྔོན་ལ་ཁྲིད་ཆས་གྲ་སྒྲིག་བྱེད་དགོས། རྒྱུན་པར་སློབ་ཁྲིད་སྐབས་སུ་ཐབས་ཤེས་བཟང་པོ་འགའ་བཀོལ་ན་ཡག་པར་སེམས།
༡ སློབ་ཁྲིད་ཇེ་ལེགས་སུ་གཏོང་བ། ༢ དུས་ཚོད་དམ་འཛིན་ལེགས་པོ་བྱེད་ཐུབ་པ །༣ སློབ་མས་ཤེས་སླ་བའི་ཐབས་ཤེས་བཀོལ་བ། ༤ ཧ་ཅང་མགྱོགས་པོས་དོན་གོ་བའི་ཐབས་ལམ་འཚོལ་བ། ༥ སློབ་འབྲས་ཇེ་མཐོར་གཏོང་བ་སོགས་ཆ་འཕྲིན་ལག་རྩལ་དང་སྦྲེལ་ནས་ལེགས་ལམ་སྤེལ་དགོས། རྩིས་འཁོར་གྱི་ཡོན་ཏན་ནི་བརྗོད་ལས་འདས་ཞིང་རང་གི་སེམས་ནས་བསམ་ཐུབ་ན་དེ་བཞིན་བཀོལ་བའི་ནུས་པ་གང་མང་ཡོད་རེད།
ཡུལ་ཤུལ་གྲོང་མི་རིགས་སློབ་འབྲིང་གཉིས་པ། ཚེ་རིང་དར་རྒྱས་ནས།
