༄༅།། དྲིན་ཆེན་ཕ་མའི་རང་གཟུགས་དངོས་མ།

འཇིག་རྟེན་འདི་རུ་མ་ཡོང་གོང་ལ་ཨ་མའི་ཟླ་དགུ་ཞག་བཅུ་ཁུར་ཞིང་ཨ་ཕའི་དེ་ལ་སེམས་ཁུར་བྱས། ། དྲན་པ་བརྒྱལ་བའི་ན་ཟུག་ཁྲོད་ནས་བཙས་མ་ཐག་ཏུ་དཔང་ལ་བཟུང་ཞིང་ངོ་གདོང་འཛུམ་གྱིས་ཁྱོད་ལ་བལྟས། །བསམ་མེད་བྱིས་པ་ཞག་གསུམ་ལོན་དུས་ཁྱོད་ཀྱི་ལྟོ་གོས་དེ་ཡི་ཆེད་དུ་ཕ་མའི་གཡོ་སྒྱུ་ཁྲོམ་གསུམ་ལས། །དེ་ནས་བཟུང་སྟེ་བུ་ཕྲུག་ཆེད་དུ་ཤི་ལ་ཁད་ཀྱིས་ཉིན་མཚན་གཅིག་འདྲེས་ག་ས་ག་ལ་རྒྱུག་བཞིན་རྒྱུག །ལོ་ཟླ་དེ་དག་སྙིང་ནས་དྲན་ན་བྱམས་བརྩེ་ཕ་མ་བཀའ་དྲིན་ཆེ་ཞིང་དེ་ལ་སུ་ཞིག་སེམས་མི་དད། །
བུ་དང་བུ་མོར་གྲོང་ཁྱེར་ལ་སོགས་ལྟ་ན་སྡུག་པའི་ལྗོངས་ལ་བལྟ་བཞིན་ངལ་གསོའི་གནས་ལ་བཞུགས་དུས་སུ། །ལང་ཚོའི་མེ་ཏོག་ཕྲུ་གུའི་བཅོམ་པའི་སྐྲ་ལོ་དཀར་པོའི་རླབས་ཆེན་ཕ་མ་ལྕི་འདམ་ཁྲོད་ན་ཤ་རེ་ཚ། །མི་ཚོགས་ཁྲོད་ན་བུ་དང་བུ་མོའི་རྒྱན་གོས་ལ་སོགས་མཛེས་ཀྱིས་སྤྲས་ནས་སྣང་བ་སྐྱིད་པོ་རོལ་དུས་སུ། །ཤ་སྐམ་ཁ་ངོ་ཉི་མའི་འཚིགས་ནས་དྲི་ནག་ཅན་གྱི་གོས་ཧྲུལ་གྱོན་པའི་བརྩེ་ལྡན་ཕ་མ་ཡི་རེ་མུག །རྣམ་པ་འདི་དག་སྙིང་ནས་དྲན་ན་དྲིན་ཅན་ཕ་མའི་བཀའ་དྲིན་བསམ་ནས་འདི་འདྲའི་སྡུག་ལ་སྦྱར་ཐབས་ཅི། །
གོས་གསར་ཟས་ཞིམ་གང་ཞིག་རྙེད་ཀྱང་རང་གིས་མི་ཟ་བུ་ཕྲུག་བྱིན་ནས་ཕ་མའི་ཆག་ལྟོག་མྱང་ལ་ལྟོས། །ནོར་ལུག་དང་ནི་ཞིང་ཁའི་ལས་ཀ་ལས་ཀ་ཡོད་ཚད་ཕ་མའི་ལས་ཏེ་ཕ་མ་བྲན་གཡོག་བཞག་འདིར་ལྟོས། །དྲིན་ཅན་ཕ་མར་ཚིག་ལོག་བརྒྱབ་བཞིན་ངོ་ཚ་མེད་པར་བྱམས་ལྡན་ཕ་མ་ཁྱིམ་ཚང་འདི་ནས་དཀྲོག་ལ་ལྟོས། །ཟས་ཀྱི་ལྷག་འཕྲོ་གོས་ཀྱི་ཐད་ཧྲུས་མཐའ་ན་ཉལ་སྔས་དགའ་ཙམ་མེད་པའི་རླབས་ཆེད་ཕ་མའི་ཕྱོགས་ལ་ལྟོས། །རྣམ་པ་འདི་དག་སྙིང་ནས་དྲན་ན་ད་ནས་བཟུང་སྟེ་དྲིན་ཅན་ཕ་མར་སྲིད་ཞུ་བཟང་པོ་སྒྲུབ་ན་ལེགས། །