ངའི་ཕ་ཡུལ་ནི་བོད་ལྗོངས་ཉིང་ཁྲི་ས་ཁུལ་ཡིད་འོང་ཇ་རཱ་ཡིན། ངའི་ཕ་ཡུལ་ནི་བོད་ལྗོངས་ཀྱི་ཡུལ་ཁྱད་པར་ཅན་ཞིག་ཡིན་ཏེ་ལོ་གཅིག་དུས་བཞི་ཚང་མ་སྔོ་ཐིང་ངེར་གནས་པ་གང་ཞིག་ལ་ཚ་གྲང་སྙོམས་པ་གང་སར་ཤིང་འབྲས་འདྲ་མིན་གྱི་འབྲས་བུས་བཏགས་པ་སྲོག་ཆགས་དང་འདབས་ཆགས་ཀྱི་རིགས་མང་པོ་ཞིག་ཚང་ཚིང་ནགས་ཚལ་སྟུག་པོའི་ཁྲོད་རང་གར་ཕར་རྒྱུག་ཚུར་རྒྱུག་བྱེད་སའི་ཡུལ་གྲུ་ཤིན་ཏུ་མཛེས་པ་ཞིག་རེད། ལྷག་པར་དུ་ང་ཚོའི་ཕ་ཡུལ་གྱི་རི་བོ་རྣམས་རྩེ་མོ་གངས་དཀར་པོའི་ན་བཟས་དུས་བཞིར་བཀླུབས་པ་དང་། རི་སྐེད་རྣམས་སྔོ་ལྗང་ནགས་ཚལ་གྱི་ན་བཟས་དུས་བཞིར་བཀླུབས་པ་རི་གཤམ་རྣམས་སུ་དྭངས་གསལ་ཆུ་ཤེལ་དང་འདྲ་བའི་ཆུ་ཕྲན་དུས་བཞིར་ཤང་ཤང་དུ་རྒྱུགས་པ་ནི་ཡུལ་སྐོར་བ་དུ་མའི་པར་ཆས་དང་སྤྱན་ལམ་གྱི་བདུད་རྩི་རང་དུ་གྱུར་ཡོད། དེ་ཡང་ངའི་ཕ་ཡུལ་གྱི་དཔྱིད་ཀ་ནི་གང་སར་ལྗང་སྨྱུག་སྨྱུག་གསར་གྱི་ཞལ་ཁ་འབུས་པ་དང་ཁམ་བུའི་མེ་ཏོག་དང་རྒྱ་སེའི་མེ་ཏོག།
སྟར་ཁའི་མེ་ཏོག་སོགས་ཁྲ་ཐིང་ངེར་བཞད་པ་དེ་ནི་ལྷ་ཡུལ་གྱི་མེ་ཏོག་ལྡུམ་ར་མི་ཡུལ་དུ་བབས་པ་དང་མཚུངས། སྐབས་དེ་དུས་ཡངས་ཤིང་རྒྱ་ཆེ་བའི་ཞིང་ཐང་རྣམས་སུ་སོ་ནམ་པ་རྣམས་ཞིང་ལས་བྲེལ་བ་དང་མཐའ་བཞིའི་ནགས་ཚལ་དབུས་ནས་བྱ་རྒྱལ་ཁུ་བྱུག་གི་གསུང་སྙན་ཡང་བར་མེད་དུ་རྣ་བའི་བུ་གར་ཐོས་ཐུབ།
ངའི་ཕ་ཡུལ་གྱི་དབྱར་ཁ་ནི་གཡུ་ཡི་གཞོང་པ་ཆེན་པོ་ཞིག་དང་འདྲ་བར་ལྗང་ཐིང་ངེར་གནས་པ་གང་ཞིག་ལ་སྦྲང་ཆར་སིམ་སིམ་དུ་བབས་པ་མུ་མེད་ཀྱི་ཞིང་ཐང་རྣམས་ནི་མཐའ་ཡས་རྒྱ་མཚོ་ཆེན་པོ་དང་འདྲ་བར་སྔོ་ཐིང་ངེར་གནས་པ་དང་སྐབས་འགར་བསིལ་རླུང་རེ་ལྡང་དུས་རྒྱ་མཚོའི་རྦ་རླབས་གཡོ་བ་དང་གཉིས་སུ་མ་མཆིས། དེ་ནས་རིམ་བཞིན་སྟོན་རླུང་དལ་བུར་ལྡང་བ་ན་རྒྱ་ལྕང་དང་སྦྱར་སྡོང་གི་ལོ་མ་རྣམས་སེར་ཐིང་ཐིང་དུ་གྱུར་ཏེ་གང་སར་ཕྱེ་མ་ལེབ་བཞིན་འཕྱོ་འགྲོ་བ་དང་ཤིང་འབྲས་འདྲ་་མིན་སྣ་ཚོགས་ཡོངས་སུ་སྨིན་ཏེ་སྡོང་པོ་རྣམས་མགོ་བོ་དུད་པ་ལྟར་གནས་པ་ལྷག་པར་དུ་ཕ་ཡུལ་གྱི་ཇ་ཞིང་རྣམས་སུ་བུད་མེད་རྣམས་ཀྱི་གཟབ་མཆོར་ལེགས་པར་སྤྲས་ཏེ་སྙན་པའི་གླུ་དབྱངས་ཀྱི་འགྲོས་དང་ལྷན་དུ་ཇ་ཡི་ལོ་མ་འཐོགས་པ་ནི་དངོས་གནས་ཤིན་ཏུ་མཛེས་པ་ཞིག་རང་ཡིན། རིམ་བཞིན་གནམ་གཤིས་ཅུང་གྲང་བའི་དགུན་དུས་སུ་རི་བོའི་རྩེ་མོ་རྣམས་ལ་གངས་དཀར་གྱི་ཡོངས་སུ་བཀླུབས་ན་ཡང་མུ་མེད་ཀྱི་ཞིང་ཐང་རྣམས་ནི་སྔར་བཞིན་སྔོ་ཐིང་ངེར་གནས་ཡོད་དེ་དུས་སྐྱེ་བོ་རྣམས་དལ་བྲེལ་ལས་རྫོབ་ཚང་མ་ཕར་ལ་གཡུགས་ཏེ་ལོ་གསར་གྱི་བསུ་བ་དང་སྟ་གོན་ཁོ་ན་ལ་བྲེལ། མདོར་ན་ངའི་ཕ་ཡུལ་མཛེས་སྡུག་ཡིད་དུ་འོང་བ་ཞིག་ཡིན་པས་སྐུ་ཉིད་ངའི་ཕ་ཡུལ་ལ་ཡུལ་སྐོར་ལ་ཕེབས་ཚེ་དེ་བས་ལྷག་པའི་ཡུལ་ལྗོངས་དང་དམངས་སྲོལ་མང་པོ་ཞིག་མཁྱེན་ངེས་རེད།
