དཀྱིལ་སྙིང་ཆེད་སྦྱོང་སློབ་གྲྭའི་ལོ་རིམ་བཞི་པའི་སློབ་མ་འགའ་ཡི་ཉིན་ཐོ་གདམས་བཀོད།
ཉིན་ཐོ།
སློབ་མ། བདེ་སྐྱིད།
༢༠༢༠ལོའི་ཟླ་བ༡པོའི་ཚེས༢༥ཉིན། གཟའ་སྤེན་པ། གནམ་གཤིས་དྭངས།
ང་རང་ཞོགས་པ་སྔ་མོ་ཡར་ལངས་ཏེ་དཔེ་ཆ་ཁྱེར་ནས་ཨ་ཅེ་དང་མཉམ་དུ་འབྲི་བཞོ་རྒྱུ་དང་འབྲོག་ལས་ཚང་མ་བསྒྲུབས་ཚར་རྗེས།
འབྲོག་ནས་མར་ཡོང་བའི་ལམ་བར་དུ་ངའི་མིག་ལམ་དུ་དྲོ་ཞིང་འཇམ་པའི་ཉི་འོད་དང་དྭངས་ཤིང་གསལ་བའི་ཆུ་བོ་སོགས་ཀྱི་མཛེས་སྡུག་མཐོང་། དུས་དེར་ང་ཡི་སེམས་སུ་སྤྲོ་སྣང་ལྡན་པའི་ཚོར་བ་ཞིག་ལྡང་། རྒྱུ་མཚན་ནི་དེ་རིང་ལོ་སར་གྱི་ཉིན་མ་ཡིན་པ་མ་ཟད་ད་དུང་དེ་རིང་ངའི་བླ་གཟའང་ཡིན། མར་ཁྱིམ་དུ་སླེབས་རྗེས་སྡེར་མའི་ནང་དུ་མཛེས་ཤིང་ཡིད་དུ་འོང་བའི་མངར་ཟས་དང་བཏུང་ཆུ་ད་དུང་དྲི་ཞིམ་ལྡན་པའི་ཚལ་སྣ་འདྲ་མིན་བསྒྲིགས་འདུག སྐབས་དེར་ང་ཡི་སེམས་ལ་རང་ཉིད་ནི་འཛམ་གླིང་སྟེང་གི་མི་ཆེས་དགའ་བ་དེ་ཡིན་པ་ཤེས་བྱུང་།
ཉིན་ཐོ།
སློབ་མ། བསམ་གཏན་དཔལ་མོ།
༢༠༢༠ལོའི་ཟླ་བ༡ཚེས༢༥ཉིན། གཟའ་སྤེན་པ། གནམ་གཤིས་དྭངས།
ཁ་སང་དགོང་མོར་སློབ་གྲྭ་གྲོལ་རྗེས་ང་དང་ངའི་ནུ་བོ་གཉིས་ཨ་མྱེ་ཚང་ལ་སོང་སྟེ་ལོ་སར་གྱི་སྟ་གོན་བྱས། ཨ་མྱེས་ཕྱི་ཉིན་དུས་ཚོད་དྲུག་པའི་སྟེང་ལངས་ནས་སྐར་ཆུ་ལེན་དགོས་པར་བཤད། ང་རང་དེ་ལྟར་ཕྱི་ཉིན་དུས་ཚོད་དྲུག་པའི་སྟེང་ལངས་ནས་སྐར་ཆུ་ལེན་དུ་སོང་།
ཆུ་ལེན་དུ་འགྲོ་སྐབས་ཆུ་ཁར་མི་མང་པོ་ཡར་མར་ནས་ཆུ་ལེན་དུ་འགྲོ་བ་མཐོང་། དེ་དག་ལས་ཁ་ཤས་ཀྱིས་ཆུ་ཕུད་ལན་གསུམ་་མཆོད་དེ་སྨོན་ལམ་ཡག་པོ་འདེབས་བཞིན་པའང་མཐོང་། ངས་ཆུ་ཟམ་དོ་ཁྱེར་ནས་ཁྱིམ་དུ་ལོག ཨ་མྱེས་མངར་གསུམ་འདྲ་མིན་གྱི་སྡེར་ཁ་བསྒྲིགས། ཅུང་ཙམ་འགོར་རྗེས་འབྲོག་ནས་ཨ་ཕ་དང་མ་ཨ་གཉིས་ཀྱིས་གཅུང་པོ་དང་གཅུང་མོ་ཁྲིད་དེ་སླེབས་སོང་། སྔ་དྲོ་ང་ཨ་ཕ་དང་ཨ་མ་ཚོ་དང་མཉམ་དུ་ལོ་སར་ལ་རོལ། ཕྱི་དྲོ་ང་རང་ཨ་མྱེ་དཀར་རྡོ་ཚང་དུ་ལོ་སར་ལ་བོས་སོང་བས་ང་རང་དེར་སོང་ནས་བསྡད།
ཉིན་ཐོ།
སློབ་མ། སྐལ་བཟང་ལྷུན་གྲུབ།
༢༠༢༠ལོའི་ཟླ་བ༡པོའི་ཚེས༢༤ཉིན། གཟའ་པ་སངས། གནམ་གཤིས་དྭངས།
དེ་རིང་ང་དང་ཨ་ཞང་ངེད་གཉིས་ཞོགས་པ་སྔ་མོ་ཡར་ལངས་ནས་ལོ་སར་གྱི་ཟས་སྣ་ཉོ་རུ་སོང་། ལམ་བར་ནས་ང་རང་ཨ་ཁུ་དང་འཕྲད་སོང་བས་ཨ་ཁུས་ང་ལ་ལོ་སར་ཉོ་སྤྱད་དུ་སྒོར་ཉི་ཤུ་བྱིན་སོང་།
སྐབས་དེར་ངའི་སེམས་ཧ་ཅང་སྤྲོ་སྣང་གིས་ཁེངས་ཏེ་རང་ཉིད་དགའ་སའི་ཟ་རྒྱུ་ཉོས་པ་ཡིན། ཨ་ཞང་ངེད་གཉིས་ཀྱིས་ཚོང་ཁང་རེ་རེར་བརྒྱུད་དེ་མངར་ཆུ་དང་ཟས་རིགས་གང་མང་ཉོས་ནས་ཁྱིམ་དུ་ལོག
ཕྱི་ཉིན་ཞོགས་པ་སྔ་མོར་ལངས་ནས་སྡེར་ཁ་ནང་དུ་བསྒྲིགས་ཏེ་དགའ་དགའ་སྤྲོ་སྤྲོ་ངང་ནས་ལོ་སར་བཟང་ཞེས་ཁ་གཡང་བོས།
ཉིན་ཐོ།
སློབ་མ། བསམ་གཏན་ཆོས་ལྡན།
༢༠༢༠ལོའི་ཟླ་བ༡པོའི་ཚེས༢༥ཉིན། གཟའ་སྤེན་པ། གནམ་གཤིས་དྭངས།
དེ་རིང་ནི་ལོ་སར་གྱི་ཉིན་མོ་ཡིན་པས། ང་སྔ་མོ་ཡར་ལངས་ནས་མངར་གསུམ་འདྲ་མིན་གྱི་སྡེར་ཁ་བཤམས། ཨ་ཕ་དང་ཨ་མ་ཨ་ཅེ་སོགས་ལ་ལོ་སར་བཟང་ཞེས་ཁ་གཡང་བོས། ངེད་ཅག་གིས་སྔ་ཇ་འཐུང་ཚར་རྗེས། ང་རང་ཨ་ཁུ་ཚང་དུ་ཕུ་བོར་བོས་ནས་ངེད་གཉིས་མཉམ་དུ་རྩེ་མོ་རྩེ་སར་སོང་། ངས་ཁོ་ལ་ཅི་ཞིག་རྩེ་ཞེས་དྲིས་པས།
ཕུ་བོས་ཅི་ཡང་བཤད་རྒྱུ་མ་བྱུང་། འུ་གཉིས་ཀྱིས་ཡུད་ཙམ་ལ་བསམ་མནོ་བཏང་རྗེས་ཐེབས་པད་རྩེ་རྒྱུ་ཐག་བཅད། སྐབས་དེར་ངས་ཐེབས་པད་བཅུ་ཙམ་ལས་མ་ཕོག་ཀྱང་འུ་གཉིས་ཀྱིས་མུ་མཐུད་ནས་རྩེས་པས་དུས་ཚོད་ཕྱི་དྲོ་ལ་ཐུག ཅུང་ཙམ་རྗེས་ང་རང་ཁྱིམ་དུ་ལོག་སྟེ་དགོང་ཟས་ཟོས་ནས་མལ་དུ་ཉལ། ཕྱི་ཉིན་ཞོགས་པ་ཡར་ལངས་ནས་ལས་བྱ་བྲིས།
ཉིན་ཐོ།
སློབ་མ། བསྟན་འཛིན།
༢༠༢༠ལོའི་ཟླ་བ༡པོའི་ཚེས༢༥ཉིན། གཟའ་སྤེན་པ། གནམ་གཤིས་བཟང་།
ང་རང་ཞོགས་པར་མལ་ལས་ལངས། ཨ་ཁུས་དེ་རིང་འུ་ཚོ་ཁོང་ཚང་ལ་ལོ་སར་དུ་འགྲོ་དགོས་པར་བཤད། དེ་ལྟར་ང་ཚོ་ཚང་མ་ཁོང་ཚང་དུ་ལོ་སར་ལ་སོང་། ངས་ང་ཚོ་ཨ་མྱེ་ཚང་དུ་ལོ་སར་ལ་རོལ་བཞིན་ཡོད་པའི་སྐབས་དེར་གླུ་ཞིག་བླངས། ཨ་ཁུས་ཁྱོད་ཀྱི་གླུ་དེ་ཧ་ཅང་ཡག་པ་མ་ཚད་སྙན་མོ་བྱུང་ཞེས་བཤད། ང་རང་ཧ་ཅང་དགའ་སྣང་གིས་མར་བསྡད། ཕྱི་ཉིན་ང་ཚོ་ཨ་ཅེ་ཚང་དུ་ལོ་སར་ལ་བོས་སོང་བས་ང་ཚོ་དེར་སོང་། ཨ་ཅེ་བདེ་སྐྱིད་མཚོ་མོས་གླུ་ཞིག་བླངས། གླུ་དེ་ཧ་ཅང་སྙན་ཞིང་ཡིད་དུ་འོང་བའི་གླུ་ཞིག་རེད། ངས་ཨ་ཅེ་ལ་ཁྱོད་ཀྱི་གླུ་གཞས་དེ་ཧ་ཅང་སྙན་པོ་བྱུང་དེ་བས་ངས་ཁྱོད་ལ་བྱ་དགའ་སྒོར་ལྔ་བཅུ་འབུལ་ཞེས་བཤད།
ཉིན་ཐོ།
སློབ་མ། བསོད་ནམས་བདེ་སྒྲོན།
༢༠༢༠ལོའི་ཟླ་བ༡པོའི་ཚེས༢༥ཉིན། གཟའ་སྤེན་པ། གནམ་གཤིས་དྭངས།
ང་རང་ཞོགས་པ་མལ་ལས་ལངས་ནས་ལོ་སར་གྱི་སྡེར་ཁ་འདྲ་མིན་བསྒྲིགས། ཨ་མས་ང་ལ་ཕྱེ་མར་བཤམ་ཞེས་སྨྲས། ངས་ལག་པ་མ་བཀྲུས་པས་ཨ་མས་ང་ལ་སྡིགས་མོ་བྱས། དེ་འཕྲལ་ངས་མྱུར་དུ་ལག་པས་བཀྲུས་ནས་ཕྱེ་མར་བཤམས། ཞོགས་ཇ་འཐུང་ཚར་རྗེས།
བདག་དང་ཨ་མ་མཉམ་དུ་སྐོར་ར་ལ་སོང་། སྐོར་ར་ནས་ཁྱིམ་དུ་ཕྱིར་སླེབས་རྗེས་བདག་དང་བདག་གི་ཕུ་བོ་དང་མཉམ་དུ་རྩེ་མོ་རྩེས་ནས་འཁྱག་རོམ་གྱི་ཐོག་ཏུ་སོང་། ཉིན་གུང་ལ་ཐུག་དུས་ཁྱིམ་དུ་ལོག་ནས་གུང་ཟས་སུ་ཕོ་ལོག་ཟོས། ཅུང་ཙམ་དུས་སྐྲ་བཀྲུས་ནས་ལྷོད་ལྷོད་ངང་བསྡད།
