གུས་པའི་ཕ་ཡུལ་ནི་ཕྱོགས་བཞི་ཁ་བའི་རྡུལ་བརྩེགས་ཀྱི་བསྐོར་ཞིང་། མཁའ་རླུང་གཙང་ལ་ཤིང་སྣ་ཆུ་སྣ་འཛོམས་པ།ཐོན་ཁུངས་ཀྱི་རབ་ཏུ་ཕྱུག་པ། ལྷག་པར་དུ་དབྱར་དགུན་དུས་བཞི་ནམ་མཁའ་སྔོ་ཞིང་དྭངས་ལ་སྤྲིན་དཀར་གྱིས་མཛེས་པས་བརྒྱན་པའི་གནས་མཆོག་འབྲི་གུང་ལགས།
གལ་སྲིད། སྐུ་ཉིད་ངའི་ཕ་ཡུལ་དུ་སྤྲོ་འཆམ་བལྟ་བསྐོར་དུ་ཕེབས་ཚེ། མིག་མདུན་དུ་མངོན་པའི་གནའ་ཤུལ་གྲགས་ཅན་དང་ཚ་གྲང་སྙོམས་པའི་རང་བྱུང་གི་ཆུ་ཚན།མཐོ་ཞིང་བརྗིད་པའི་རི་བོ།སྣ་མང་ཕུན་སུམ་ཚོགས་པའི་རྩེ་ཤིང་བཅས་མཚར་སྡུག་ལྡན་པའི་ཡུལ་ལྗོངས་རེ་རེས་ཁྱེད་ཀྱི་ཡིད་སེམས་རང་དབང་དུ་འཕྲོག་པར་བྱེད་ཅིང་དུས་མཚམས་ཤིག་གི་རིང་ཁྱེད་ཀྱི་ཡིད་ངོགས་ནས་ཡལ་བར་དཀའ།
ཨྰ་ཧོ། བུ་ངའི་ཕ་ས་ཕ་ཡུལ། གནས་མཆོག་འབྲི་གུང་ལགས། ཁྱེད་ཀྱི་གནམ་སྔོན་པོ་གུར་དུ་ཕུབ་ཅིང་། སྤང་ལྗོངས་སྔོན་མོ་གདན་དུ་བཏིང་བས། ཁྱེད་ནི་བ་སོའི་གཞོང་པའི་ནང་གི་མ་སྙིགས་གངས་ལྷ་མེ་ཏོག་དང་གཉིས་སུ་མ་མཆིས་ཤིང་།དྭངས་གསལ་ཨ་སྔོན་དབྱིངས་ཀྱི་རྒྱུ་སྐར་བགྲང་ལས་འདས་པའི་ཁྲོད་ཀྱི་ཆེས་འོད་མདངས་བཀྲ་བའི་རྒྱུ་སྐར་རྒྱལ་པོ་དང་ཀུན་ནས་མཚུངས།
ཕ་ཡུལ་གྱི་རི་བོ་ནི་མཐོ་ཞིང་བརྗིད་ལ། ཕ་ཡུལ་གྱི་ཆུ་མོ་ནི་དྭངས་ཤིང་གཙང་བས་སྐྱེ་བོ་ཀུན་ལ་ཚད་མེད་ཀྱི་སྤྲོ་སྣང་སྦྱིན་པར་ངེས། ལྷག་པར་དུ་ཞོགས་པའི་ཕ་ཡུལ་གྱི་ཡུལ་ལྗོངས་ནི་ཅི་འདྲའི་མཛེས་སྡུག་ཡིད་དུ་འོང་བ་ཞིག་ཡོད་དེ་ཞོགས་པའི་དུས་སུ་ཉི་མས་རང་ལུས་ཀྱི་འོད་ཟེར་མ་ལུས་ཤར་ཕྱོགས་ཀྱི་རི་བོའི་སྤོ་ནས་རིམ་བཞིན་ས་སྟེང་དུ་འཕྲོས་པ་བྱེད་ལ།རང་ཉིད་ནི་ངོ་ཚ་ཁ་སྐྱེངས་ཀྱི་གནས་སུ་གྱར་བའི་བུ་མོ་ཆུང་ཆུང་ཞིག་དང་འདྲ་བར་ག་ལེར་ཤར་རིའི་རྩེ་ནས་རིམ་བཞིན་ཞལ་རས་མངོན་པར་བྱེད།ཞོགས་པའི་རི་བོ་ནི་སྨིན་ལེགས་མ་ཞིག་དང་འདྲ་བར། ན་བུན་གྱིས་རང་ཉིད་ཀྱི་ར་རི་མ་ལུས་བཀྲུས་ལ། ས་འཛིན་སྒེག་མོའི་མགུལ་རྒྱན་དང་མཚུངས་པར་རི་མགོར་ཡུན་རིང་སྤུད།ཞོགས་པའི་རྩྭ་ཐང་ནི་མཁའ་རླུང་གཙང་ལ། ནོར་ནག་གི་ངུར་སྒྲ། རྟ་ཕོའི་འཚེར་སྐད།ཨ་ཅེ་འབྲོག་མོའི་བཞོ་དབྱངས། བྱ་དང་བྱིའུའི་མགྲིན་གླུ་བཅས་སྒྲ་དབྱངས་ཡོད་དོ་ཅོག་ནི་དབྱངས་མའི་དགྱེས་གླུ་ངོ་མ་དེ་ལགས།
ཕ་ཡུལ་གྱི་རང་བྱུང་ཁོར་ཡུག་གི་མཛེས་པ་དང་གནའ་ཤུལ་གྲགས་ཅན་གྱི་བཀོད་པ་ནི་མཚར་སྡུག་ལྡན་པ་ཞིག་ཡོད་པས།ང་རང་ཕ་ཡུལ་ལ་དགའ་ཞིང་ཕ་ཡུལ་དུངས། བུ་ངས་ནམ་ཡང་ཁྱེད་ཀྱི་མཛེས་པར་བསྟོད་གླུ་ལེན་པ་བ་མ་ཟད་ཁྱེད་ཀྱི་བཀའ་དྲིན་ལ་བསྟོད་པའི་མེ་ཏོག་གཏོར་རྒྱུ་ཡིན། ཕ་ཡུལ་ལགས། གནས་མཆོག་འབྲི་གུང་།
