སྐྱ་ལ་རིད་པའི་ངོ་གདོང་དང་རུབ་ལ་ཉེ་བའི་མིག་གཉིས་ཡོད་ལ།གདོང་ལ་གཉེར་མའི་ཆུ་རིས་ཀྱི་ཁེངས་པའི་ཞིང་གྲོང་གི་བུད་མེད་དཀྱུས་མ་དེ་ནི་བདག་གི་མ་ཡུམ་ལགས།
འཇིག་རྟེན་འདིའི་སྟེང་དུ་འཚོ་ཞིང་གནས་པའི་སྐྱེ་འགྲོ་ཀུན་ལ་རང་ཉིད་ཀྱི་བྱམས་ལྡན་མ་ཡུམ་རེ་ཡོད་མོད།འོན་ཀྱང་སྐྱེ་བོ་ཁ་ཤས་འཇིག་རྟེན་འདིའི་སྟེང་དུ་སླེབས་པའི་ཉིན་ནས་རང་གི་མ་ཡུམ་གྱི་དྲོ་སྐྱིད་ལྡན་པའི་པང་དུ་བསྡད་མྱོང་ལྟ་ཅི།ཞིམ་མངར་ལྡན་པའི་ནུ་ཞོ་དེ་བས་ལོངས་སྤྱོད་བྱེད་མྱོང་མེད། མ་ཡུམ་གྱི་བྱམས་བརྩེའི་དྲོད་ཁོལ་འོག་འཚར་ལོངས་བྱུང་མེད་པའི་སྤྱི་ཚོགས་སྟེང་གི་ཡ་ང་བའི་བུ་ཕྲུག་ཁ་ཤས་མཐོང་སྐབས་སུ་རང་ཉིད་ལ་མ་ཡུམ་འདི་འདྲ་ཞིག་ལས་ཀྱི་བསྐོས་པ་ནི་ཚེ་སྔོན་བསོད་ནམས་ཞེས་པ་དེ་ཅི་ནས་ཀྱང་ཡིན་ལོད་ཆེ།
མ་ཡུམ་ནི་ནམ་རྒྱུན་ང་ཚོ་བུ་ཕྲུག་རྣམས་ལ་བྱམས་ཤིང་། ཡབ་ཆེན་དང་བརྩེ་ནི་ཟབ།ནང་ལས་ཙག་ཙིག་ལ་ནི་བརྩོན། ཡུལ་མི་སྤུན་གྲོགས་དང་ནི་མཐུན། དེར་བརྟེན།ཁོང་ནི་ང་ཚོ་བུ་ཕྲུག་ཚོའི་སེམས་ཀྱི་བློ་ཁ་གཏད་ས་དང་སེར་སྣ་དང་བྲལ་བའི་ཟས་གོས་ཀྱི་ཡོན་བདག་ལགས།ཁོང་ནི་གཞིས་ཁྱིམ་གྲུ་བཞི་འདིའི་མ་འགྱུར་ཀ་བ་ལགས།ཁོང་ནི་བུ་ངའི་མི་ཚེའི་ལམ་བུའི་ཉིན་བྱེད་འདྲེན་པའི་སྐྱ་རེངས་ལགས། མ་ཡུམ་ལགས། ཁྱེད་ཀྱི་མཛད་འཕྲིན་ནི་ཉམ་ཆུང་བུ་ངའི་ཡིད་ངོགས་སུ་ཐའེ་ཧྲན་རི་བོ་ལས་བརྟན་ཞིང་བརྗིད་ལ།ཁྱེད་ཀྱི་ཞུམ་མེད་ཀྱི་སྙིང་སྟོབས་ནི་དྲག་ཏུ་འབབ་པའི་ཡར་ཀླུང་གཙང་པོའི་ཆུ་རྒྱུན་ལྟར་རོ།
མ་ཡུམ་ལགས། ཁྱེད་ཡོད་པས་ང་ཚོ་གཅེན་གཅུང་ཚོ། དཔེ་ཁུག་རྒྱབ་ཏུ་འཁྱེར་ནས་ལུང་ཁུག་བརྒལ་ཏེ་ཤེས་བྱའི་ལམ་བུ་འགྲིམ་པའི་སྐལ་བ་ཐོབ། མ་ཡུམ་ལགས། ཁྱེད་ཡོད་པས་ལྷས་ར་གྲུ་བཞི་འདི་དང་ཁང་ཁྱིམ་དྲོད་འཁོལ་མ་དེར་དགའ་འཛུམ་གྱི་དགོད་སྒྲ་ཆད་མ་མྱོང་ལ་དཀར་གསུམ་གྱི་རོ་བཅུད་ཆུ་བོའི་རྒྱུན་བཞིན་ནོ།མ་ཡུམ་ལགས། ཁྱེད་ཡོད་པས། ངས་དགའ་བ་དང་ལྷག་བསམ་གྱི་བྱིས་དུས་ཀྱི་འཚོ་བར་རོལ་ཆོག་ཆོག་ཡིན་ལ། བརྩོན་འགྲུས་ཀྱི་གྲུ་གཟིངས་སྐྱ་བས་བསྐུལ་ཏེ་ཤེས་བྱའི་རྒྱ་མཚོ་ནས་དགོས་འདོད་ནོར་བུ་ལེན་པར་དཀའ་བ་དང་བར་ཆད་ཡོང་མི་སྲིད།
མ་ཡུམ་ལགས། རླབས་ཆེན་གྱི་སྐྱེས་མ།ཁྱེད་ཁོ་ན་ངའི་ཚེ་སྲོག་གི་སྲོག་ཤིང་དུ་འཇོག་ལ། སེམས་དབུས་ཀྱི་ཉི་ཟླ་ཟུང་དང་ཁྱད་པར་མ་མཆིས་པས། ང་རང་ང་ཡི་མ་ཡུམ་ལ་དགའ།
