ཀུན་སྤྱོད་བཟང་བ་ནི་མཛེས་པ་ཀུན་གྱི་མཆོག
ང་ཚོ་ཚང་མས་ཤེས་གསལ་ལྟར།བསམ་པ་བཟང་ན་ས་དང་ལམ་ཡང་བཟང་། བསམ་པ་ངན་ན་ས་དང་ལམ་ཡང་ངན། ཞེས་པ་ལྟར།བསམ་པ་བཟང་ན་གཞི་ནས་ཀུན་སྤྱོད་ལེགས་པོར་འགྱུར་ཐུབ་ལ།ཀུན་སྤྱོད་བཟང་ཚེ་མི་ཞིག་གི་བྱ་བ་ལམ་འགྲོ་ཡོང་བ་དང་གཞན་ལ་ཕན་ཐོགས།མི་རྣམས་ཀྱི་གོང་བཀུར་ཐོབ་པ་སོགས་བྱེད། དེར་བརྟེན།ཀུན་སྤྱོད་ནི་མི་ཞིག་གི་ལུས་སྟེང་གི་རྩ་ཆེ་བའི་རྒྱན་ཆ་ཇི་བཞིན་ང་ཚོ་ལ་ཁྱད་འཕགས་ཀྱི་མཛེས་པ་ཞིག་བསྐྲུན་ཡོད།
ང་ཚོར་མཚོན་ན་ལང་ཚོ་དར་ལ་བབ་པའི་གཞོན་སྐྱེས་ཤ་སྟག་ཡིན་ལ་སྣང་བ་མཐོ།ཁྱོད་ཀྱིས་ཚིག་གཅིག་བཤད་ན་ཁོས་ཚིག་གཉིས་ནས་གསུམ་བཤད་པས་མགོ་ན་གནམ་དང་རྐང་འོག་ན་ས་མ་གཏོགས་མེད་པའི་དུས་སྐབས་ཤིག་ཡིན་ཞིང་།ཚང་མས་གཙིགས་སུ་འཛིན་པ་ནི་ཕྱི་ལུས་ཀྱི་མཛེས་པ་ཡིན་ལ།ཚང་མས་རྒྱུན་དུ་སློབ་ཁང་ནང་དང་ཉལ་ཁང་།ཐ་ན་གཙང་སྤྱོད་ཁང་གི་ནང་དུའང་སུ་མཛེས་མིན་དང་སུའི་གྱོན་པ་བཟང་མིན་ལ་ལབ་གླེང་བྱེད་བཞིན་མཆིས།འོན་ཀྱང་མཛེས་པ་ངོ་མ་ནི་ཁོ་ཚོས་ཀྱང་ཅི་ཞིག་ལ་ཤེས་ཀྱི་མེད། ཁོ་ཚོས་ཕྱི་ལུས་ཁོ་ན་མ་གཏོགས་ཀུན་སྤྱོད་སྟེང་ལ་བསམ་བློ་ཡེ་ནས་བཏང་མེད།དཔེར་ན། ཁོ་ཚོས་ཉམ་ཆུང་ལ་བརྙས་བཅོས་དང་རྒན་པར་བརྩི་བཀུར་མི་བྱེད། དགེ་རྒན་གྱིས་གཤེ་གཤེ་ཅུང་ཙམ་བཏང་ན་མི་འཐད་པའི་རྣམ་འགྱུར་སྟོན་ལ་ད་དུང་དེ་ནི་རང་ཉིད་ཀྱི་གཟི་བརྗིད་ཅིག་ཏུ་འདོད་ཡོད།འོན་ཀྱང་དེ་ནི་སྐྱུག་བྲོ་བའི་བྱ་སྤྱོད་ཅིག་ཡིན་ཏེ།ང་ཚོ་སློབ་གྲྭར་འགྲིམ་པ་ནི་རང་ཉིད་ཀྱི་བྱ་སྤྱོད་འདུལ་བར་བྱེད་པ་སྟེ།ལེགས་ལམ་དུ་ཁྲིད་བྱེད་ཅིག་ཡིན་པ་ལས་ཕྱི་ལུས་ཀྱི་མཛེས་པ་འགྲན་དུ་ཡོང་མ་མིན། དེའི་རྐྱེན།ང་ཚོ་རྒྱུན་དུ་ཕྱི་ལུས་ཀྱི་མཛེས་པའི་ནང་དུ་མགོ་འཐོམས་ནས་མི་སྡོད་པར། མཛེས་པ་ངོ་མ་སྟེ།ནང་སེམས་ཀྱི་ཀུན་སྤྱོད་ལེགས་པར་བྱེད་དགོས།རྒྱུ་མཚན་ནི་ཁྱོད་ཀྱི་མཛེས་པ་ངོ་མ་དེ་ན་བདོག
གྲལ་སྒྲིག་ཐེངས་རེ་ལ་སློབ་གཙོ་གཙོ་བྱས་པའི་སློབ་གྲྭའི་འགོ་ཁྲིད་པ་རྣམས་ཀྱིས་རྒྱུན་དུ་གྲལ་འགོ་ནས་ང་ཚོ་འདིར་ཡོང་དོན་སྐོར་གྱི་གནས་ལུགས་མང་པོ་བཤད་པ་དང་ལྷག་པར་དུ་ཀུན་སྤྱོད་གཙོ་བྱས་ནས་སློབ་གསོ་གནང་བ་རེད།འདིའི་སྟེང་ནས་ཀྱང་ཀུན་སྤྱོད་བཟང་བ་ནི་མི་ཀུན་གྱི་ལམ་ལེགས་པོར་འགྲོ་བྱེད་དང་ཤེས་རིག་གི་ནོར་བུ་ལེན་པར་མེད་དུ་མི་རུང་བ་ཞིག་ཡིན་པ་ཤེས་ཐུབ།དཔེར་ན་ང་ཚོའི་འཛིན་གྲྭའི་ནང་དུའང་བུ་མོ་ཧ་ཅང་ཡ་རབས་ཤིག་ཡོད་དེ།མོས་ཐེངས་འདིའི་གནང་བྱིན་གྱི་སྒོར་མོ་ཚང་མ་འཛིན་གྲྭའི་ནང་ཕྱིར་བྱིན་ནས་ང་ཚོའི་འཛིན་གྲྭའི་ཆེད་དུ་ལས་ཀ་གཉེར་བཞིན་པའི་ལས་བྱེད་མི་སྣ་ཡོངས་ལ་བགོས་པ་དང་མོས་སྐར་མ་གཅིག་ཀྱང་མ་འཁྱེར།འདི་འདྲའི་ཀུན་སྤྱོད་བཟང་བས་ང་ཚོའི་འཛིན་གྲྭའི་སློབ་མ་ཡོངས་དང་མཐོ་གཉིས་ཚན་སྐོར་གྱི་དགེ་རྒན་ཡོངས་ལ་སེམས་འགུལ་ཐེབས་སུ་བཅུག་པ་དང་ཚང་མས་མོ་ལ་གཟེངས་བསྟོད་བྱེད་པ་ནི་ཆུ་རྒྱུན་རིང་མོ་ལྟར་མི་ཆད་ལ།མོ་ཡང་ང་ཚོ་སློབ་གྲོགས་དང་དགེ་རྒན་རྣམས་ཀྱི་སེམས་གཏིང་གི་མེ་ཏོག་རྐང་གཅིག་ཏུ་གྱུར།
གལ་ཏེ།འཇིག་རྟེན་འདིར་འཚོ་བའི་གང་ཟག་ཡོད་ཚད་ཀྱི་ཀུན་སྤྱོད་བཟང་ཚེ།འཇིག་རྟེན་འདི་སྔར་ལས་ལྷག་པར་བདེ་སྐྱིད་ལྡན་ལ་སུམ་རྩེན་ལྷ་ཡུལ་ལྟར་སེམས་ནང་གི་ཧམ་སེམས་དང་ཕྲག་དོག་ཚང་མ་མེད་པར་གྱུར་ནས་མི་ཚེ་འདི་ཚང་མས་འཛུམ་གྱིས་སྐྱེལ་ངེས།ང་ཚོ་སློབ་མ་ཞིག་ཡིན་པའི་ཆ་ནས་ཡང་ཀུན་སྤྱོད་རྨང་གཞི་བྱས་ནས་རིག་གནས་ཤེས་བྱ་སློབ་སྦྱོང་བྱེད་དགོས།དེ་ལྟར་བྱས་ན་ཁྱེད་སློབ་མ་ཡོངས་ལས་ཆེས་མཛེས་པའི་མི་སྣར་འགྱུར་སྲིད་ལ།མི་རྣམས་ཀྱིས་གོང་བཀུར་ཡང་ཐོབ་སྲིད། དེར་བརྟེན།སློབ་གྲོགས་རྣམས་ཀྱིས་ཀུན་སྤྱོད་གསོ་སྐྱོང་བྱ་རྒྱུ་གལ་ཆེ་སྟེ། ཀུན་སྤྱོད་མི་ལེགས་ཚེ་ཁྱོད་སློབ་སྦྱོང་ལ་ཅི་འདྲ་བཟང་རུང་དེའི་ནུས་པ་ཐོན་མི་སྲིད་པས།ང་ཚོས་དེ་རིང་ནས་བཟུང་རང་ཉིད་ནས་མགོ་བཙུགས་ཏེ། མཛེས་པ་ངོ་མ་སྟེ།ཀུན་སྤྱོད་ལེགས་པོ་ཞིག་གསོ་སྐྱོང་བྱས་ནས་གཞན་གྱི་མིག་དཔེ་ལྟ་ས་ཞིག་ཏུ་འགྱུར་ཐུབ་པ་བྱེད་དགོས།
བརྩོན་འགྲུས་དང་གྲུབ་འབྲས།
བརྩོན་འགྲུས་དང་གྲུབ་འབྲས་གཉིས་ནི་ཕན་ཚུན་ལྟོས་བཅས་ཀྱི་འབྲེལ་བ་ཤ་སྟག་ཏུ་ཆགས་ཡོད་དེ།དཔེ་ཞིག་བཞག་ན། སློབ་སྦྱོང་སོགས་བྱ་བ་གང་གི་ཐད་ལའང་བརྩོན་འགྲུས་ལྷོད་མེད་ཅིག་བྱས་ན།དེར་གྲུབ་འབྲས་གཡུར་དུ་ཟ་ཞིང་ཕུན་སུམ་ཚོགས་པ་ཞིག་ཡོད་པ་ནི་ཐེ་ཚོམ་དང་དོགས་པ་ཡེ་ནས་བྱེད་མི་དགོས་པ་ཚང་མས་ཤེས་གསལ་ལྟར་རེད།དེར་བརྟེན་འཇིག་རྟེན་གྱི་བྱ་བ་གང་ཞིག་བསྒྲུབ་ཀྱང་དེར་གྲུབ་འབྲས་ཡག་པོ་ཞིག་ལོན་པའམ་ལེགས་གྲུབ་བདེ་མོ་ཞིག་ཡོང་དགོས་ན།ངེས་པར་དུ་བརྩོན་འགྲུས་ཞེས་པའི་མིང་ཚིག་དེ་ལུས་དང་གྲིབ་མ་བཞིན་དུ་འགྲོགས་དགོས་པ་རེད།ང་ཚོའི་སྤྱི་ཚོགས་ཀྱི་ཁྲོད་དུའང་བརྩོན་འགྲུས་ཀྱི་དཀའ་བ་དང་དུ་ལེན་མཁན་ནམ་བརྩོན་འགྲུས་བྱེད་པར་ལོབས་པའི་མི་བུ་དག་ལ་ནི་དུས་རྒྱུན་དུ་གྲུབ་འབྲས་མི་དམན་པ་རེ་ཡོད་པ་ནི་མིག་མཐོང་ལག་ཟིན་རེད།དེ་ལས་ལྡོག་སྟེ་ནམ་ཡང་ལེ་ལོ་གྲོགས་སུ་གྱུར་བ་དང་། སྒྱིད་ལུག་སྤུན་དུ་གྱུར་པའི་མི་བུ་དག་ནི་ནམ་ནམ་ཞར་ཞར་དུ་ཕུང་བཞིན་ཡོད་ལ།མི་ག་གེ་མོ་ཞིག་གིས་བརྩོན་པ་ཅི་ཡང་ མ་བྱས་པར་གྲུབ་འབྲས་ཁུར་དུ་བརྗིད་པའམ་གྲུབ་འབྲས་གཡུར་དུ་ཟ་བ་ཞིག་ལོན་ཡོད་མཁན་ནི་བཙལ་དུ་མེད་ལ།ཡོད་ཀྱང་མི་སྲིད་དེ་རྒྱུ་འབྲས་དང་འགལ་བའི་ཕྱིར་རོ།།
བརྩོན་འགྲུས་སམ་བརྩོན་པ་ནི་བྱ་བ་གང་ཞིག་བསྒྲུབ་ཀྱང་མ་དང་གཞི་ལྟ་བུ་ཞིག་ཡིན།རེད་ཀྱང་རེད། གནའ་མིའི་གཏམ་དཔེ་རུའང་བརྩོན་པ་ཅན་གྱི་རི་བོ་རྡུལ་དུ་བརླགས། ཤེས་རབ་ཅན་གྱི་ལག་སྟོང་མཆན་དུ་བཅུག་ཅེས་བརྩོན་འགྲུས་ནི་ཤེས་རབ་ཀྱི་གོང་རོལ་དུའམ་གཙུག་ཏུ་བརྩི་བཞིན་པའམ་ཤེས་རབ་ལས་ཀྱང་གལ་འགངས་ཆེ་བར་འཇོག་གི་ཡོད་པ་རེད།ལྷག་པར་དུ་ང་ཚོ་སློབ་མ་དག་ལ་མཚོན་ན་བརྩོན་འགྲུས་བྱེད་པ་ནི་ཆེས་མེད་དུ་མི་རུང་ལ་མེད་ཀྱང་མི་ཆོག་པའི་བྱ་བ་ཅིག་རེད།དེང་སང་ང་ཚོ་སློབ་མ་དག་ཆེས་དབུལ་བའི་གནས་ཡང་དེ་ཡིན། རྒྱུ་མཚན་དེའི་དབང་གིས་བརྩོན་འགྲུས་བཤད་ན་ང་ཚོའི་སློབ་གྲྭའི་ཁོར་ཡུག་དང་ཉེ་བར་བཅར་ཏེ་བཤད་ན་ཤིན་ཏུ་གོ་བདེ་བར་སྙམ་ཏེ།དཔེ་མཚོན་ཙམ་རེ་བཞག་ན། ང་ཚོ་སློབ་གྲྭ་བ་དག་ལ་མཚོན་ན་རྒྱུན་དུ་རྒྱུགས་དང་ཁ་ཡེ་ནས་བྲལ་གྱིན་མེད་ལ།ཕལ་ཆེར་ལོ་རེར་ཆ་སྙོམས་ཀྱི་བཅུ་ཕྲག་འགའ་ཤས་ཆད་ཀྱིན་མེད། མཐོ་རྒྱུགས་དང་འབྲིང་རྒྱུགས་ཐེངས་རེར་སློབ་མ་སྐར་གྲངས་མཐོན་པོ་ཅན་དག་ལ་བྱ་དགའ་དང་གཟེངས་བསྟོད་བྱེད་བཞིན་ཡོད་པ་རེད།ཁྱོད་ཚོས་ལྟོས་དང་། རྒྱུན་དུ་བྱ་དགའ་དང་གཟེངས་བསྟོད་ཐོབ་བཞིན་པའི་སློབ་མ་སྐར་གྲངས་མཐོ་ཤོས་ལེན་མཁན་དག་ནི་རྒྱུན་དུ་སློབ་སྦྱོང་ལ་བརྩོན་འགྲུས་ཆེ་ཞིང་སྦྱངས་འདོད་ཀྱི་འདུན་པ་ཆེ་བའི་སློབ་མ་རྐྱང་རྐྱང་ཡིན་ཞིང་།སློབ་སྦྱོང་རང་དོན་ཡིན་པ་ངོས་འཛིན་དང་། དུས་ཚོད་རིན་ཆེན་ཡིན་པ་ངོ་ཤེས་པའི་སློབ་བུ་བསམ་ཤེས་དང་བརྩོན་འགྲུས་ཅན་གྱི་སློབ་མ་དག་ཡིན་པ་ལས། རྒྱུན་དུ་ལེ་ལོ་དང་རྣམ་གཡེང་ལ་འགྲོགས་ཤིང་གཉིད་དང་རྨུགས་པས་དབང་དུ་བཟུང་བའམ།གཉིད་དང་རྨུགས་པས་བདག་གིར་བཟུང་བའི་སློབ་མ་དག་ཡིན་པ་ལྟ་བུ་རེད། དཔེར་བརྗོད་དེ་ལྟ་བུ་ཆུང་ཆུང་ཞིག་ལས་ཀྱང་བརྩོན་འགྲུས་དང་གྲུབ་འབྲས་གཉིས་ནི་ལྟོས་བཅས་ཡིན་པ་ངམ་ངམ་ཤུགས་ཀྱིས་རྟོགས་མི་ཡོང་ངམ།ད་དུང་དཔེ་མཚོན་ཙམ་རེ་བཞག་ན་འདི་ལྟ་སྟེ། སློབ་མ་གཅིག་ནི་ལྷན་སྐྱེས་ཀྱི་རིག་པ་བཀྲ་ཞིང་ལེ་ལོ་དང་སྒྱིད་ལུག་རང་གཉིས་སུ་གྲུབ་ཡོད་མཁན་ཞིག་དང་།གཅིག་ནི་རིག་པ་དེ་འདྲ་རྣོ་རྒྱུ་མེད་པའམ་གསལ་རྒྱུ་མེད་ཀྱང་བརྩོན་འགྲུས་ཅན་ཞིག་ཡིན་ན་དེ་རིང་དགེ་རྒན་གྱི་སློབ་ཚན་གང་རུང་ཞིག་ཉིན་བཅུ་ཡི་ནང་དུ་བློ་རྒྱུགས་སྤྲད་དགོས་ཞེས་གསུངས་བ་ཡིན་ན།ལེ་ལོ་ཅན་གྱི་སློབ་མ་དེས་སང་ཉིན་ལ་བཞག་ནས་ཉིན་བཅུ་དེ་མིག་སྡེབ་ལོང་ཙམ་དུ་ཟད་ཅིང་བློ་རུ་ངེས་མེད་པ་དང་།བརྩོན་འགྲུས་ཅན་དེས་སྐར་མ་རེ་ནས་སྐར་མ་རེར། དུས་ཚོས་རེ་ནས་དུས་ཚོད་རེ་བྱས་ནས་བརྩོན་པ་ལྷོད་མེད་བྱས་ནས་མཐར་ཉིན་བདུན་པར་བློ་རྒྱུགས་ཤར་མར་སྤྲད་པ་དང་།སྤྲད་རྗེས་བརྗེད་ངེས་རྐུན་པོས་ཀྱང་བརྐུ་མི་ཐུབ་པ་ཞིག་བློར་ངེས་པ་བྱས་ཡོད་པ་བར་ལྟ་བུ་རེད།འདི་ལྟ་བུའི་དཔེ་མཚོན་མང་དུ་མཆིས་པས་འདིར་དེ་འདྲ་རྒྱས་པར་མི་སྤྲོའོ།།
ད་སྐབས་ང་ཚོ་སློབ་མ་མང་དག་ལ་ཆེས་མེད་པ་ནི་བརྩོན་འགྲུས་ཀྱི་སྙིང་སྟོབས་ཡིན་ལ་ཆེས་མཁོ་བའང་བརྩོན་འགྲུས་ཀྱི་སྙིང་སྟོབས་རེད།སློབ་མ་མང་ཤོས་ཤིག་གིས་འདི་ངས་ཐུབ་རྒྱུ་མ་རེད། འདི་ངས་ཤེས་རྒྱུ་མ་རེད། དེ་ངས་བློར་ཟིན་རྒྱུ་མ་རེད།ཅེས་ཟེར་ནས་དགག་སྒྲ་མང་པོ་ཞིག་བསྟར་ལ་བརྒྱུས་ནས་སྐེ་རྒྱན་བྱེད་ཀྱི་ཡོད། མི་དགོས་ཞིག་དང་མི་མཁོས་ཞིག་ལ་ཁེངས་སྐྱུང་རི་འདྲ་རེ་བྱེད་བཞིན་ཡོད་པ་རེད།རྒྱུན་དུ་སློབ་གྲོགས་ནང་ཕན་ཚུན་དུ་བརྡུང་རེས་བྱེད་དུས་སུ་དྲིན་ཕ་མའི་གསོས་ཚད་ནི་འདྲ་འདྲ་ཡིན། ལུས་ལྷུ་དྲུག་ཚང་ཚོད་ཀྱང་འདྲ་འདྲ་ཡིན་ཟེར་ནས་ཕུ་རུང་སྐེད་པར་དཀྲི་ཞིང་ཕན་ཚུན་གྱི་སྟེང་ལ་ཤོར་ཁུལ་བྱེད་པ་རེད་ལ་དེ་དུས་ངས་མི་ཐུབ་དང་མི་ཤེས་ཟེར་རྒྱུ་མེད་པ་རེད།འོན་ཀྱང་ང་རང་གིས་བལྟས་ན་དེའི་གཏམ་དཔེ་རུ་བརྡུང་རེས་ཀྱི་ཕྱོགས་ལ་བཀོལ་བ་ལས་སློབ་སྦྱོང་གི་སྟེང་ལ་བཀོལ་ན་ཤིན་ཏུ་ནས་ཀྱང་ལེགས་པར་སྙམ།དངོས་གནས་དྲིན་ཕ་མས་གསོས་ཚད་འདྲ་འདྲ་དང་ལུས་ལྷུ་དྲུག་ཚང་འདྲ་འདྲ་ཡིན་པས། བརྩོན་འགྲུས་ཀྱི་སྙིང་སྟོབས་བསྐྱེད་དེ་སློབ་སྦྱོང་ཞིག་བྱེད་རྒྱུ་ནི་ཤིན་ཏུ་ལས་ཀྱང་གལ་ཆེའོ།།
མི་གཤིས་ཀུན་སྤྱོད།
ཀུན་སྤྱོད་གཙང་བས་གཞན་གྱི་ཡིད་དུ་འཐད་ཅེས་པའི་ཚིག་གིས་མདུན་བསུས་ཏེ་གླེང་བར་འདོད་པ་ནི།སྨྲ་ཤེས་ཤིང་དོན་གོ་བའི་མིའི་ཤ་གཟུགས་སུ་གྲུབ་པ་ཞིག་ཡིན་ཕྱིན།དེར་མི་གཤིས་ཀྱི་ཕོར་བ་གཙང་མ་ཞིག་མཁོ་བ་ཀུན་གྱིས་གླེང་གིན་འདུག་སྟེ།མི་ནི་འཚོ་བའི་རྩུབ་བརྡར་དང་བརྡབ་གསིག་ཁྲོད་འཚར་ལོངས་བྱུང་དགོས་ལ།བརྡབ་གསིག་དེའི་ཁྲོད་ནས་མི་གཤིས་ཀྱི་གད་སྙིགས་ཁ་ཤས་ལྷང་ལ་འབུད་ངེས།གད་སྙིགས་ནི་ཀུན་གྱིས་ཕངས་སེམས་དང་གནོང་འགྱོད་ཅི་ཡང་མེད་པར་གཡུག་འགྲོ་བ་བཞིན།སྤྱི་ཚོགས་ཀྱིས་ཀྱང་ཁྱོད་རང་དོར་འགྲོ་བ་མ་ཡིན་ནམ།མི་གཤིས་ངན་པ་ནི་ཕྱི་ཡི་གཤིས་རྒྱུད་གྱོང་བོ་ལ་གོ་ན། ཀུན་སྤྱོད་བཟང་པོ་ནི་ནང་གི་སེམས་རྒྱུད་གཙང་མ་ལ་གོ་དགོས་ཏེ།མི་གང་ཡང་རུང་བ་ཞིག་གི་ཕྱི་ཡི་སྤྱོད་ལམ་བཙོག་ཅིང་ནང་གི་བསམ་བློར་འབག་གིས་གོས་འདུག་ན་དེ་ནི་ཕྱི་ནང་འདམ་གྱིས་སྦགས་ཤིང་གཡའ་ཡིས་གོས་པའི་བུམ་པ་ཞིག་རེད།དེ་ནི་པོ་ཏོ་བ་རིན་ཆེན་གསལ་གྱིས་གསུང་བའི་སྣོད་དྲི་མ་ཅན་དེ་མ་ཡིན་ནམ།དྲི་ལྡན་སྣོད་ལ་དཀར་གསུམ་ཟས་མི་ཆགས། དྲི་ལྡན་སྣོད་ལ་མངར་གསུམ་གཡང་མི་འཁོར།།དྲི་ལྡན་སྣོད་ནི་རྡོག་པའི་ལྷམ་ཆད་འདྲ།། དྲི་ལྡན་སྣོད་ནི་མགོ་ནག་མི་ཡིས་འདོར།།
དེས་ནི་ང་ཚོ་སྤྱི་ཚོགས་ལ་དགོས་མཁོ་ཡོད་པ།འཇོན་ནུས་ཆེ་བ། ཤེས་ཡོན་ལྡན་པ། ཀུན་སྤྱོད་གཙང་བ། མི་གཤིས་ལེགས་ལ་གུས་ཞབས་ལྡན་པའི་མི་ཞིག་ཡོང་བར་འབད་དགོས་པའི་འབོད་སྐུལ་གཏོང་གི་འདུགདེ་དག་ནི་ཐོག་མར་ཕ་མའི་སློབ་གསོ་དང་། སློབ་ཆུང་སློབ་གསོ། སྤྱི་ཚོགས་སློབ་གསོ་ལ་ཐད་ཀར་འབྲེལ་འདུག་སྟེ།བྱིས་པའི་དུས་སུ་ཚང་མར་དྭངས་གཙང་ཆུ་ཤེལ་ལྟ་བུའི་སེམས་པ།ནག་ནོག་དྲི་མས་མ་བསླད་པའི་གཤིས་ཀ གཡོ་སྒྱུའི་གདོན་གྱིས་མ་བཟུང་བའི་སྤྱོད་ལམ་སོགས་ཡོད་ཀྱང་།རིམ་བཞིན་སྤྱི་ཚོགས་ཀྱི་འབྲེལ་འདྲིས་དང་རྒྱུ་ནོར་གྱི་ཧམ་སེམས་དང་འགྲོགས་ནས།མི་ཡི་རྩ་བའི་རང་བཞིན་ནས་འགྱུར་ཏེ། ཁྲེལ་གཞུང་མེད་པ། རྩིས་ཐང་མེད་པ། ངོ་ཚ་མེད་པའི་ངོ་བོ་ཞིག་གསར་ཏུ་ཆགས་ཡོང་།
བྱིས་དུས་ཀྱི་ཕ་མའི་སློབ་གསོ་ལེགས་ཤིང་སློབ་ཆུང་གི་དགེ་རྒན་གྱི་སློབ་གསོ་ཡང་ལེགས་པོར་བཏང་ཡོད་ན་སློབ་མ་རེ་རེ་སེམས་སུ་མ་གཞི་ནས་འཇིག་རྟེན་གྱི་གནས་ལུགས་ཤེས་པའི་སློབ་མ་ཚད་ལྡན་འབའ་ཞིག་བསྐྱེད་བསྲིང་བྱེད་ཐུབ་ཀྱང་།ང་ཚོ་དེ་ལས་ལྡོག་སྟེ་ཕ་མས་བྱིས་པ་ལང་ཤོར་དང་སྤྱོད་ངན་ལ་གོམས་པར་བྱས་ཏེ་ཡིད་ལ་གང་དྲན་ལས་སུ་འཇུག་པ་དང་།ལག་ལ་ཅི་ཤོར་བཀོལ་དུ་འཇུག་པ། ཁ་ལ་གང་ཡོང་བཤད་དུ་འཇུག་པའི་གོམས་སྲོལ་ཆགས་པར་བྱས་ཚེ།ད་ནི་ནད་ཡམས་བཞིན་དུ་བཅོས་དཀའ་བའི་གནས་ཤིག་མ་ཡིན་ནམ། མདོར་ན་དེ་ནི་གྱོང་གུད་ཅིག་དང་གནོང་འགྱོད་ཅིག་ཀྱང་ཡིན་ཏེ།ང་ཚོའི་ངག་རྒྱུན་དུའང་མི་ལ་ངོ་ཚ་མེད་ན་ཁྱི་ཡིན།ཁྱི་ལ་རྔ་མ་མེད་ན་འདྲེ་ཡིན་ཞེས་པའི་དཔེ་མང་དུ་བཀོད་འདུག་པ་མ་ཡིན་ནམ།ང་ཚོ་མི་རེ་རེ་ནས་སློབ་གྲྭར་བརྒྱུད་དེ་སློབ་གསོ་མྱང་དགོས་པའི་རྒྱུ་མཚན་ཅི་རེད།ཞིབ་ཏུ་འགྲེལ་ན་འཇིག་རྟེན་གྱི་གནས་ལུགས་ཤེས་ཤིང་ལེགས་ཉེས་ཀྱི་བླང་དོར་འབྱེད་ཐུབ་ལ།གཞན་གྱི་སེམས་ཁམས་གསོ་ཐུབ་པའི་སྐྱེས་བུ་ཚད་ལྡན་ཞིག་བྱ་རྒྱུ་དེ་མ་ཡིན་ནམ།མི་ལ་ཡོད་དགོས་པ་ངོ་ཚ་དང་།ཤིང་ལ་ཡོད་དགོས་པ་ཕྱི་ཤུན་ཡིན་ན་ང་ཚོས་མ་མཐར་སྲུང་དགོས་པའང་མི་གཤིས་དང་ཀུན་སྤྱོད་མ་ཡིན་ནམ།མི་གཤིས་དང་ཀུན་སྤྱོད་གཙང་མིན་ནི་སྤྱི་ཚོགས་ཤིག་གི་ངོ་གདོང་ཡིན་ལ།མི་རིགས་ཤིག་གི་རིན་ཐང་དང་། དུས་རབས་ཤིག་གི་སྤུས་ཚད་ཀྱང་ཡིན་འདུག་སྟེ། ད་ལྟའི་དུས་རབས་སམ་སྤྱི་ཚོགས་སུ་མི་ཡིས་རང་ཉིད་ཀྱི་ངོ་སོ་དང་ཁེ་ཕན་ལ་དམིགས་ཏེ།རིན་བྲལ་གྱི་ནོར་བུ་སྟེ་ནང་གི་སེམས་རྒྱུད་དང་ཕྱི་ཡི་སྤྱོད་ལམ་ལེགས་པོ་དོར་ཏེ་ཁྱི་གཟུགས་དང་ཝ་མོ་ཡི་ཟློས་གར་མང་དུ་འཁྲབ་ཀྱིན་འདུག་ལ།དེ་ནི་འཕེལ་རྒྱས་ཀྱི་བཀག་རྡོ་དང་མདུན་ལམ་གྱི་བར་ཆད་ཡིན་པས་འཇིག་རྟེན་གྱི་མི་བུ་སུ་ཞིག་ཡིན་ཡང་རང་ཉིད་ཀྱི་འགྲོ་འདུག་སྤྱོད་གསུམ་ལ་དོགས་ཟོན་རེ་བྱ་རྒྱུ་ནི་ཤིན་ཏུ་གནད་ཆེའོ།།
བརྩེ་སེམས།
འཇིག་རྟེན་ལ་བརྩེ་སེམས་ཡོད་དགོས།མི་ཡུལ་ལ་བཀུར་བསྟི་ཆེ་དགོས། ཕ་མའི་བརྩེ་སེམས་བུ་ལ་འཕྲོས་པས་བུ་ཡི་བསམ་བློར་གཉོམ་ལག་རྒྱས་སྲིད།བུ་ཡི་བཀུར་བསྟི་རྒན་ལ་ཆེ་བས་རྒན་གྱི་ཤེས་རིག་ཆར་དུ་འཇོ་ངེས། འཇིག་རྟེན་བརྩེ་བས་ཁྱབ་ན་དགོད་སྒྲ་མོད།འཇིག་རྟེན་བཀུར་བསྟིས་ཕྱུག་ན་འཆམ་མཐུན་ཡོང་།
དེ་རིང་ངས་འཇིག་རྟེན་གྱི་མ་ཡུམ་ཡོད་ཚད་ཀྱི་བརྩེ་སེམས་ལ་གླུ་ཞིག་འབུལ་འདོད།མོ་ཡི་རིགས་འདི་འཇིག་རྟེན་མ་རུ་གཏོགས་ལ་མ་ཡི་རིགས་འདི་བྱམས་བརྩེ་སྙིང་རྗེས་ཕྱུག་འདུགལུས་ཚེགས་དང་སེམས་སྤོབས་པས་བསྲན་ནས། ཉིན་མཚན་གྱི་འབད་འཐབ་རྔུལ་ཆུར་བསྒྲེས་ཏེ། དྲོད་ཁོལ་གྱི་ཉི་ཟེར་ཞིག་ཁྱིམ་ལ་བསུ་བར་འབད་ཅིང་།བདེ་སྐྱིད་ཀྱི་རིལ་བུ་ཞིག་བུ་ལ་ལྡུད་པར་བྲེལ་འདུག
ཕ་མ་ནི་འཇིག་རྟེན་གྱི་སློབ་དཔོན་དང་པོ་ཡིན་ལ་སློབ་དཔོན་ནི་འཇིག་རྟེན་གྱི་ཕ་མ་གཉིས་པ་ཡིན་པའི་གནས་ལུགས་ཀྱིས་སྣེ་དྲངས་ཏེ་གླེང་ན།འཇིག་རྟེན་ལས་ཆེས་བཀུར་བསྟི་ཆེ་དགོས་པ་ནི་ཕ་མ་དང་དགེ་རྒན་ཡིན་པ་འདྲ་ཡང་། ཉེ་ལམ་སྤྱི་ཚོགས་ཀྱི་ཁ་ཕྱོགས་འགྱུར་གྱིན་འདུག་ལ་དུས་རབས་ཀྱི་གོམས་སྲོལ་ཡང་འགྱུར་གྱིན་འདུག་པས་བུ་ཡིས་ཕ་མ་སྒོར་ཕུད་བཞིན་པ་དང་བུ་ཡིས་ཕ་མར་གཅར་རྡུང་བྱེད་པའི་སྣང་ཚུལ་སྤྱི་ཚོགས་ཀྱི་ཟ་ཟུར་གང་རུང་ན་ཆར་ཤུལ་གྱི་ཤྭ་མོ་ཇི་བཞིན་རྡོལ་གྱིན་འདུག་ལ་འཚོ་བ་ཡི་ཟབ་ས་རེ་ན་ཚེར་མ་བཞིན་སྐྱེས་ཀྱིན་འདུག་སྟེ།ལྟ་བ་གསར་བ་དང་འདོད་ཚུལ་ཐོལ་བརྒལ་གྱིས་ཁ་ཕྱོགས་འཚོལ་གྱིན་པའི་གསར་བུ་སྣང་མཐོ་དག་གི་རྗེས་སུ་འབྲང་སྟེ་དགེ་རྒན་དགྲ་རུ་འཛིན་པ་དང་དགེ་རྒན་གྱི་ནག་ཉེས་དང་སྤྱོད་ཚུལ་སུན་འབྱིན་བྱེད་པའི་ཚ་རླབས་གསར་ཞིག་ཀྱང་དུས་རབས་ཀྱི་སྒལ་གཞུང་ན་རྭ་ཅོ་བཞིན་སྐྱེས་བཞིན་འདུག་པ་ནི་སྐབས་སྐབས་སུ་མི་རབས་ཤིག་གི་འཕེལ་རྒྱས་ལ་རྩིས་ཆོག་ཀྱང་སྐབས་སྐབས་སུ་མི་རབས་ཤིག་གི་གྱོང་གུད་དུའང་རྩི་ཆོག་པ་འདྲ།རང་ཉིད་ཀྱི་སྤོབས་པ་དང་སྙིང་སྟོབས་ཀྱི་དར་ཚོན་འཕྱར་ཐུབ་པ་དང་། རང་ཉིད་ཀྱི་དགའ་ཕྱོགས་དང་འདོད་མོས་ལ་རྩོད་ལེན་བྱ་ཐུབ་པ་ནི་འབྲས་བུ་རུ་རྩིས་ཆོག་ལ་མི་རིགས་ཀྱི་གོམས་སྲོལ་དང་ཆ་ལུགས་དོར་ཟིན་པ་ནི་གྱོང་གུད་ཅིག་ཀྱང་ག་ལ་མིན།ང་ཚོས་སྲོག་ཆགས་ཆུང་ངུ་ཙམ་ལའང་མ་རུ་འཛིན་པའི་བརྩེ་སེམས་དེས་ང་ཚོའི་སྲོག་རྒྱུན་བསྲིངས་པ་མ་ཡིན་ནམ།རང་གི་གཉེན་ཉེ་ཤ་ཁྲག་མེད་པར་བཀུར་བསྟི་ཆེ་བ་དེས་ང་ཚོའི་རིགས་རུས་བསྐྱེད་པ་མ་ཡིན་ནམ།ས་སྒང་རིལ་མོ་གོང་བུ་གཅིག་ཏུ་འགྱུར་བཞིན་པའི་སྦྲེལ་ཐགས་དེ་བརྩེ་སེམས་མ་ཡིན་ནམ། ཁ་ཕྱོགས་གཅིག་ལ་སྒྲིལ་བཞིན་པའི་སྲོག་རྒྱུན་དེ་བཀུར་བསྟི་མ་ཡིན་ནམ།བསིལ་ལྡན་ཁ་བ་ཅན་གྱི་ཞིང་ཁམས་འདི་ན། ཡིག་དྲུག་གི་དབྱངས་རྟས་རི་ལུང་སྐྱོམས་པ་ནི་ང་ཚོའི་ལང་ཚོ་རེད་ལ་མཆོད་འབུལ་གྱིས་ཆོ་ཀས་ས་ཆེན་བཀང་བ་ནི་ང་ཚོའི་གཟི་བྱིན་མ་ཡིན་ནམ།ཕ་མ་དང་བུ་ཡི་བརྩེ་བ། དགེ་རྒན་དང་སློབ་མའི་བརྩེ་བ། མི་དང་མི་ཡི་བརྩེ་བ། མི་དང་སྲོག་ལྡན་གཞན་གྱི་བརྩེ་བ།མདོར་ན་འཇིག་རྟེན་བརྩེ་བས་ཁྱབ་པར་ཤོག སྣང་བ་འོད་ཀྱིས་འཁྱུད་པར་ཤོག བཅུ་རིག་ན་བརྒྱ་བསོད་རྐྱང་བྱེད་པའི་བསམ་བློ་ནི་ང་ཚོའི་མ་རེད།སུ་རིག་ན་དེར་བརྙས་པར་བྱེད་པའི་ཀུན་སྤྱོད་ཀྱང་ང་ཚོའི་མ་རེད། གང་མཐོང་ན་དེ་དགྲ་རུ་འཛིན་པའི་ལྟ་བ་དེའང་ང་ཚོའི་མ་རེད།སྤྱི་ལ་སྙོམས་པའི་བརྩེ་བ་ཞིག་མཚོ་རུ་འཁྱིལ་དགོས་འདུག ཀུན་ལ་ཁྱབ་པའི་བརྩེ་བ་ཞིག་མེ་རུ་འབར་དགོས་འདུགམཐོ་དམའ་སྙོམས་པའི་བརྩེ་བ་ཞིག་རླུང་རྟར་འཕྱོ་དགོས་འདུག ལྷག་པར་དུ་དུས་རབས་ཀྱི་འཁོར་འགྲོས་མྱུར་ཞིང་འཁོར་ལོ་ཡི་ཁ་ཕྱོགས་ནོར་བའི་དེ་རིང་ང་ཚོར་ངེས་པར་དུ་དགོས་པ་ནི་བརྩེ་བ་རེད།མི་རབས་ཀྱི་བསམ་ཚུལ་འགྱུར་ཞིང་འགྱུར་ཚུལ་གྱི་རྦ་རླབས་མཐོ་བའི་དེ་རིང་ང་ཚོར་དགོས་པ་ནི་བཀུར་བསྟི་རེད།སུས་ཀྱང་དོར་མི་ཆོག་པ་ནི་བརྩེ་སེམས་རེད། བཀུར་བསྟི་རེད། ཆོག་ཤེས་རེད། བྱམས་པ་རེད། འཆམ་མཐུན་རེད།འདྲ་མཉམ་རེད། ངས་འདི་ལྟར་གླེང་ཡོང་དུས། ཀུན་གྱིས་ཆོག་ཤེས་བསྟེན་མི་རུང་ཆོག་ཤེས་བསྟེན་ན་རྗེས་སུ་ལུས་ཞེས་མི་བཤད་པའི་ངེས་པ་མེད་ལ།ངས་འདིར་གླེང་གིན་པའི་ཆོག་ཤེས་ནི་ཕྱིའི་རྒྱུ་ནོར་གྱི་ཆོག་ཤེས་སུ་གོ་བ་ལས་རིག་གནས་སྦྱངས་པའི་ཆོག་ཤེས་ལ་གཏན་ནས་གོ་ཡི་མེད་པ་ཤེས་པར་གྱིས།
སྲུང་སྐྱོབ། འཆམ་མཐུན།
ཉེ་བའི་ལོ་འདི་འགར་འཛམ་གླིང་ས་སྒང་ཧྲིལ་བོའི་ཁྱོན་ལ་རི་འགུལ་ས་གཡོ་དང་།མེ་རི་ཆུ་བྲུག་རླུང་གཡུག་དྲག་ཆར་གྱི་སྣང་ཚུལ་རྒྱུན་དུ་འབྱུང་གིན་འདུག
དེ་ལ་བསམ་གཞིག་རེ་བྱས་ཚེ་ཡོད་ཚད་ང་ཚོས་བྱས་པའི་ནག་ཉེས་སུ་འབྲས་བུ་བྱུང་བ་རེད།འཇིག་རྟེན་ཁམས་ཀྱི་མི་བུ་ཚང་མའི་སེམས་ཁམས་འདོད་རྔམ་དང་ཧམ་སེམས་ལ་ཕྱོགས་ཀྱིན་པའི་སྣང་ཚུལ་ཉིན་རེ་ནས་ཇེ་ཆེར་འགྲོ་བཞིན་ཡོད་ལ་ཧམ་སེམས་དེས་བསྐྱེད་པའི་མཇུག་འབྲས་ནི་སླར་ཡང་ང་ཚོས་མི་འཁུར་ཐབས་མེད་རེད།སའི་གོ་ལ་ནི་ང་ཚོའི་མ་ཡུམ་ཡིན་ལ་མ་ཡུམ་གྱི་བྱམས་བརྩེ་ཐུགས་ཁུར་དང་སྤྱི་སྙོམས་ཀྱི་ལྷག་བསམ་ལ་ང་ཚོ་སྲོག་ལྡན་ཀུན་གྱིས་སྲུང་སྐྱོབ་བྱ་དགོས་ལ་སེམས་ཀྱིས་ཀྱང་སྐྱོང་དགོས་པ་མ་ཡིན་ནམ།ནམ་ཞིག་ས་ཆེན་གྱི་ཞེ་བློ་གཏིང་ནས་ཁྲོས་ཏེ་ཚེ་སྲོག་གི་ཀ་བ་རྨང་ནས་འགྱེལ་ན།ང་ཚོ་ནི་ནུས་མེད་མཐུ་མེད་ཀྱི་རྩེད་ཆས་སྙིང་ཉེ་བ་དེ་ཚོ་མ་ཡིན་ནམ། འཇིག་རྟེན་མ་རུ་མ་གྱུར་གཅིག་ཀྱང་མེད་ཅེས་པའི་དཔེ་བཞིན་དུ་འཇིག་རྟེན་གྱི་ཁྱོན་ནམ།ས་སྒང་རིལ་མོ་འདིའི་ཟུར་ངོས་གང་དག་ན་འཚོ་ཞིང་བཞེས་པའི་སྲོག་ལྡན་ཡོད་ཚད་མ་ཡུམ་གཅིག་གི་ཐུགས་རྒྱུད་ལས་འཁྲུངས་པ་ཡིན་ལ།མ་ཡུམ་དེ་ནི་ས་ཆེན་ཨ་མ་རེད། མཐོ་བའི་རི་ལ་གནས་པའི་རི་དྭགས་དང་གཅན་གཟན།དམའ་མོ་སྤང་ལ་ཡན་པའི་རྟ་ནོར་ལུག་གསུམ། རྒྱ་རྫོང་ནགས་སུ་འཁོར་བའི་འདབ་ཆགས་ཁྱུ་ཚོགས།དམར་པོ་བྲག་ལ་ལྡང་བའི་བྱ་རྒྱལ་རྒོད་པོ། སྨྲ་ཤེས་དོན་གོའི་འགྲོ་བ་མི་རིགས། གཅིག་ལ་གཅིག་རྟེན་གྱིས་འཚོ་བ་མ་ཡིན་ནམ།གཅིག་གྲོགས་གཅིག་རྒྱབ་ཏུ་བསྙེས་པ་མ་ཡིན་ནམ། དེས་ན་ང་ཚོས་ཕན་ཚུན་ལ་རོགས་རམ་བྱ་དགོས།ཕན་ཚུན་ལ་སྲུང་སྐྱོབ་བྱ་དགོས། ཕན་ཚུན་ལ་འཆམ་མཐུན་ཡོང་དགོས།ད་ལོ་ང་ཚོས་ས་ཆེན་གྱི་བྲང་གཞུང་སྔོག་ཐུབ་ཀྱང་།ད་ལོ་ང་ཚོས་ནགས་ཚལ་གྱི་ཚེ་སྲོག་འབྲེག་ཐུབ་ཀྱང་།ད་ལོ་ང་ཚོས་སྲོག་ལྡན་གྱི་རྒྱུ་བ་གཅོད་ཐུབ་ཀྱང་།སང་ལོ་ང་ཚོའི་ས་ཆེན་འགུལ་ན་སུས་བསྐྱོར། སང་ལོ་ང་ཚོའི་མེ་རི་འབར་ལ་སུས་སྐྱོབ། སང་ལོ་ང་ཚོར་ཐན་པས་གཙེས་ན་སུས་གཉོར།སྐབས་ཐོག་གི་བདེ་བ་རག་པ་སུས་ཀྱང་ཐུབ་ལ།ཡུན་རིང་གི་འཆམ་མཐུན་དང་འབྱུང་འགྱུར་གྱི་འབོད་སྐུལ་ལ་སུ་ཡིས་གསན་མྱོང་ཨང་།
ནམ་ཞིག་ས་ཆེན་ཨ་མའི་དོན་སྣོད་ལ་གས་ཁ་ཤོར་ཏེ་ཉམ་ཐག་གི་གནས་སུ་ལྷུང་ན་ང་ཚོའི་འཚོ་རྟེན་གྱི་ཁྱིམ་གཞིས་གང་དུ་འཛིན།ནམ་ཞིག་ང་ཚོའི་ཚེ་སྲོག་གི་འཕར་ལྡང་འཇགས་ཏེ་འབྱིན་རྔུབ་ཀྱི་རྒྱུ་བ་ཆད་ན་ང་ཚོའི་དབུགས་རྒྱུན་གྱི་རྟ་རྔ་གང་དུ་མཐུད།ནམ་ཞིག་ང་ཚོའི་འཚོ་གནས་ལ་འཐབ་འཛིང་བྱུང་སྟེ་རྙོག་འཛིང་གི་འཁོར་ལོ་བསྐོར་ན་ང་ཚོས་ཞི་བདེ་ཡི་ལྷ་བྱ་གང་ནས་འབོད།ལོ་འདི་གར། ཀུན་གྱིས་མགྲིན་པ་གཟེངས་སུ་བཏེགས་ནས་འཆམ་མཐུན་གླེང་གིན་འདུགཀུན་གྱིས་གནས་ལུགས་དར་ལ་བརྒྱུས་ནས་སྲུང་སྐྱོབ་བཤད་ཀྱིན་འདུག་ཀུན་གྱིས་ལུས་ངག་རྩལ་དུ་སྤྲུགས་ནས་ཞི་བདེ་འབོད་ཀྱིན་འདུགམདོར་བསྡུས་ན་དེ་ནི་ཁ་གཡང་ཞིག་གམ་སྣང་ཚུལ་ཞིག་རེད།དེ་ནི་རྣམ་པ་ཙམ་དང་ཟེར་སྒྲོས་ཤིག་རེད། དེ་ནི་སྲིད་ཇུས་ཙམ་དང་ངག་རྒྱུན་ཞིག་རེད།དོན་དངོས་སུ་ཁོར་ཡུག་སྤོབས་པས་སྲུང་སྟེ་དམངས་ལ་ཞབས་ཞུ་སྒྲུབ་མཁན་ཅི་ཙམ་ཡོད།འཆམ་མཐུན་མིག་བཞིན་གཉེར་ཏེ་སྤྱི་སྙོམས་ལས་ལ་འབད་མཁན་དུ་ཙམ་ཡོད།ཞི་བདེ་རྒྱང་ནས་བསུས་ཏེ་སྤྲོ་དགའི་འཚོ་བ་རོལ་མཁན་ག་ཚོད་ཡོད།རང་རང་གི་ཁེ་ཕན་གྱི་ཆེད་དུ། རང་རང་གི་སྐབས་བབ་ཀྱི་ཆེད་དུ།རང་རང་གི་སྙན་གྲགས་ཀྱི་ཆེད་དུ། རང་རང་གི་ངོ་སོ་ཡི་ཆེད་དུ།གཞན་གྱི་ཚེ་སྲོག་ལ་བརྙས་བཅོས་གཏོང་བར་ཕངས་སེམས་མེད་ལ།གཞན་གྱི་བདེ་སྐྱིད་ལ་རྡོག་རྫིས་གཏོང་བར་གནོང་འགྱོད་ཅིག་གང་ནས་ཡོད་དམ།
འཇིག་རྟེན་བདེ་བ་ཇི་སྙེད་པ། དེ་ཀུན་གཞན་བདེ་འདོད་ལས་བྱུང་།འཇིག་རྟེན་སྡུག་བསྔལ། ཅི་སྙེད་པ།དེ་ཀུན་བདག་བདེ་འདོད་ལས་བྱུང་བས་ས་སྒང་རིལ་མོ་འདིའི་སྟེང་ན་འཚོ་སྡོད་ལ་རེམ་པའི་སྲོག་ལྡན་ཀུན་གྱིས་འཆམ་མཐུན་ཞེས་པའི་ཐ་སྙད་འདིའི་སྲོག་དབང་ལ་ཟབ་ཞུགས་བྱས་ཏེ།སྲུང་སྐྱོབ་ཅེས་པའི་གནས་ལུགས་དེའི་འཚོ་སྟངས་ལ་འང་བསམ་གཞིག་རེ་བྱ་རྒྱུ་ནི་ཐུགས་འཇགས་མཛོད་ཅེས་བཤད་འདོད་པ་ཡིན།ང་ཚོ་ད་དུང་འཚོ་དགོས། ང་ཚོས་ད་དུང་འཚོལ་དགོས། ང་ཚོས་ད་དུང་སྐྱོང་དགོས།ང་ཚོར་ད་དུང་ཕྱི་རབས་པ་ཡོད་ངེས། ང་ཚོར་ད་དུང་བདེ་འཇགས་དང་ཚེ་སྲོག་དགོས་ངེས།
