བདག་གི་ཨ་ཕ་ནི་ཞིང་པ་དཀྱུས་མ་ཞིག་སྟེ། ཁོང་ད་ལོར་དགུང་ལོ་རེ་དྲུག་ལ་སོན་ཡོད། རྒྱུན་པར་གློ་ནད་དང་སྙིང་ནད་ཀྱིས་མནར་ནས་སྐུ་ཤ་རིད་ལ་ལུས་སྟོབས་ཞན། ནག་སྨུག་དོད་པའི་ཞལ་ངོར་བསྣོལ་མའི་རང་བཞིན་གྱི་གཉེར་མས་ཁེབས། ཚེམས་ཀྱི་བང་རིམ་ཡང་དུས་ཀྱིས་བཤིག་སྟེ་རེ་གཉིས་ཙམ་ལས་ལུས་མེད། སྐུ་གཟུགས་གཞུ་ལྟར་སྒུར་ཡོད་ལ་པུས་མོའི་ཚིགས་ཁ་གཟེར་ནས་འགྲོ་དུས་ཞ་ཙམ་འཐེང་ཙམ་བྱེད་པའི་སྟངས་སྟབས་ལས་ཨ་ཕ་ཁྱེད་ཀྱིས་ང་རང་འཚར་ལོངས་ཡོང་བའི་ཆེད་དུ་འབུལ་བའི་སྐུ་དྲིན་རྣམས་རང་ཤུགས་ཀྱིས་བརྗོད་ནུས་པ་རེད།
ནམ་ཡང་ཡིད་ལ་འཇགས་པའི་ཨ་ཕ་ལགས། ཁྱེད་ཀྱིས་བདག་གི་ལུས་ཕུང་བསྐྲུན་ཞིང་བུ་གཅིག་མ་བཞིན་བྱམས་སྐྱོང་བྱས་པ་ནི་བདག་གིས་བསྐལ་མཐའི་བར་དུ་བརྗེད་ག་ལ་སྲིད། ཡིན་ན་ཡང་། ཨ་ཕ་ལགས།ང་ནི་དྲིན་ཆེན་དྲིན་དུ་མི་གོ་བའི་ཕྲུ་གུ་ཞིག་མིན་མོད། ཁྱེད་རང་དགོངས་པ་མ་འཚོམས། བུས་ཡིད་མོས་དང་། མཚར་སྣང་སྐྱེས་ཆེ་བ་ནི་ཁྱེད་ཀྱི་ཀྱག་ཀྱོག་གི་མི་ཚེའི་བཤུལ་ལམ་རེད་ལགས།
བདག་གི་ཨ་ཕ་ནི་དུས་རབས་༢༠པའི་ལོ་རབས་༣༠པའི་སྐབས་སུ་ཁྱིམ་ཚང་དབུལ་ཕོངས་ཤིག་ཏུ་སྐྱེས།སྟབས་མ་ལེགས་པ་ཞིག་ལ་ཨ་ཕྱི་ཉིད་སྔར་ནས་ཚེ་ལས་འདས། ཨ་མྱེ་ཉི་མ་རིག་གནས་ལ་མཁས་ཤིང་སྤྱོད་པ་གཙང་བ་ནི་ལོས་ཡིན།
རང་གི་ཁྱོ་མོ་ཚེ་ལས་འདས་རྗེས་སོ་ནམ་གྱི་ལས་དང་ལྷ་བཟོའི་བྱ་བ་འབའ་ཞིག་ལ་བརྩོན་པ་བྱས་ནས་བུ་མོ་གཉིས་པོ་བསྐྱངས་ཏེ་ནར་སོན་མཐར། བུ་མོ་ཆུང་བར་བཙུན་མ་བྱེད་དུ་བཅུག བུ་མོ་ཆེ་བར་ཁྱིམ་གཞིས་བཙུགས་བཅུག་ནས་སྔོན་རྗེས་སུ་མིང་སྲིང་གསུམ་སྐྱེས་པའི་ནང་གི་ཆུང་བ་ནི་ངའི་ཨ་ཕ་རེད།
ཨ་ཕས་ང་ལ་བཤད་པར་གཞིགས་ན། ངའི་ཨ་ཕ་ལོ་ན་བརྒྱད་ལ་སོན་དུས་ངའི་ཨ་མྱེ་ལ་སྙུང་གཞི་དྲག་པོ་ཞིག་ཕོག་ནས་ཚེ་ལས་འདས། ཁོའི་ཨ་མས་ཅི་ལྕོགས་ཀྱིས་ངལ་རྩོལ་བྱས་པར་བརྟེན་ནས་མིང་སྲིང་གསུམ་པོ་རིམ་བཞིན་འཚར་ལོངས་བྱུང་བ་ཞིག་རེད།
ཀྲུང་གོ་གསར་པའི་སྐྱ་མདའ་བོད་ཀྱི་ཡུལ་དུ་ཤར་སྐབས། ངའི་ཨ་ཕ་བཅིངས་འགྲོལ་དམག་ནང་ཞུགས།དམག་དཔུང་གི་འཚོ་བའི་ཁྲོད་དུ་ཨ་ཕ་ནི་འགྱུར་མེད་ཀྱི་གུང་ཁྲན་ཏང་ཡོན་ཞིག་དང་། གུང་ཁྲན་རིང་ལུགས་ཀྱི་སྔོན་ཐོན་བསམ་བློ་ཅན་ཞིག་ཏུ་གྱུར། ལོ་དྲུག་འགྱངས་རྗེས་དམག་དཔུང་ནས་ཕྱིར་ལོག
དམག་དཔུང་ལས་ཕྱིར་ལོག་རྗེས་ཨ་ཕས་གྲོང་སྡེའི་འགོ་ཁྲིད་ཁོ་ན་བྱས་ནས་དུས་འདའ། ད་ལོ་ཕལ་ཆེར་དགོངས་ཞུའི་ཆོག་མཆན་འཐོབ་ཤས་ཆེ། དེའི་བར་དུ་ཁོས་གླ་མེད་ཀྱི་ངང་གྲོང་ཚོའི་གཞོན་ནུར་ལོ་དགུ་ཙམ་བོད་ཡིག་ཀློག་ཁྲིད་བྱས་མྱོང་ཡོད།
ཨ་ཕར་དམག་མིའི་གོམས་གཤིས་བཟང་པོ་དེ་ཆགས་ནས་ལས་ཀ་ཅི་ཞིག་ཡིན་ཡང་དངོས་ཐོག་བདེན་འཚོལ། དྲང་པོ་དྲང་བཞག་སྒོས་ཐག་བཅད་བྱས་མོད། འོན་ཏེ་གྲོང་ཚོ་ཉིད་ཀྱི་ལྟ་བ་མཁྲེགས་འཛིན་བྱེད་མཁན་གྱི་མི་ཁ་ཤས་དང་ཁ་འཛིང་། འཐབ་མོ་བྱེད་པའི་སྐབས་ཀྱང་ཡོད་དོ །།
ལྟོས་དང་། སྐྱེས་རྒ། ན་འཆི། འདུ་འབྲལ། སྐྱིད་སྡུག་ཕྱོགས་སུ་འདུས་པའི་ཨ་ཕའི་ཁྱད་མཚར་གྱི་མི་ཚེ། བདག་གི་ཁྱེད་ཀྱི་མི་ཚེའི་བཤུལ་ལམ་དེ་ཕྱིར་དྲན་བྱེད་ཐེངས་རེར། ཞུམ་པ་མེད་པའི་འཚོ་བའི་སྙིང་སྟོབས་ཤིག་རང་ཤུགས་སུ་རང་ལ་འཐོབ།ལྷག་པར་དུ་འཚོ་བར་ངོ་རྒོལ་དང་དང་བླངས་ཀྱི་ཆོད་སེམས་ཤིག་ངམ་ངམ་ཤུགས་ཀྱི་སྐྱེས་སོ།
