བདག་ནི་འབའ་འབའ་ལུ་གུ་དང་ཆབས་ཅིག་ཏུ་འཚར་ལོངས་བྱུང་བའི་བྱིས་པ་ཆུང་ཆུང་ཞིག་ཡིན། བདག་གི་འདས་ཟིན་པའི་ལོ་ཟླའི་འཁོར་སྐྱོད་ཀྱི་གོམ་འགྲོས་ཁྲོད་དུ་དོན་དག་མང་པོ་ཞིག་ཆུ་བོའི་རྒྱུན་བཞིན་བཞུར་ཟིན་མོད། འོན་ཀྱང་བདག་གི་དྲན་པའི་མེ་ལོང་ངོས་སུ་རྡོ་ལ་རི་མོ་བརྐོས་པ་བཞིན་ནམ་ཡང་བརྗེད་ཐབས་མེད་པ་ནི་ང་རང་ལོ་རིམ་གཉིས་པའི་སྐབས་ཀྱི་དོན་དག་ཅིག་ཡིན། ལོ་རིམ་གཉིས་པའི་མཇུག་རྒྱུགས་ལེན་ལ་ཉེ། དགེ་རྒན་གྱིས་སློབ་གྲོགས་ཚོ། མཇུག་རྒྱུགས་ལེན་ལ་ཉེ་བས། ཁྱོད་ཚོས་འབད་བརྩོན་ལྷོད་མེད་ཀྱིས་སློབ་སྦྱོང་བྱེད་དགོས་ཞེས་བཀའ་སློབ་གནང་། འོན་ཀྱང་ཚེ་རིང་དང་ངེད་གཉིས་ནི་དབེན་འཇགས་ཀྱི་འབྲོག་ཁུལ་ནས་ཡོང་བའི་འབྲོག་ཕྲུག་ཤ་སྟག་ཡིན་པས། རྒྱ་ཡིག་ལ་རང་སྦྱོང་ཅི་ཡང་མ་བྱས་པར་མ་ཟད། རྒྱུགས་ལེན་སྐབས་རྐུ་འབྲི་བྱ་རྒྱུའི་འཆར་གཞི་བཀོད།
མིག་རྡེབ་ཙམ་གྱི་ཡུན་ལ་རྒྱུགས་ལེན་པའི་སློབ་ཐུན་དེར་སླེབས་བྱུང་། སློབ་ཁྲིད་ཀྱི་ཅོང་བརྡ་སིང་སིང་དུ་གྲགས་པ་དང་བསྟུན་ནས་རྒྱུགས་རྟོག་དགེ་རྒན་གྱིས་ཕྱག་ཏུ་རྒྱུགས་ཤོག་བསྣམས་ནས། སྒོ་གླེགས་དལ་མོར་ཕར་གཏད་ནས་སློབ་ཁང་དུ་སླེབས་རྗེས་ང་ཚོར་རྒྱུགས་ཤོག་གནང་། སྐབས་དེར་བདག་གི་སྙིང་ཆུང་ལུ་གུ་ལྡིང་ལྡིང་བྱས་བྱུང་། ཚེ་རིང་གིས་རྐུ་ཤོག་ཆུང་ཆུང་དེ་ཡར་ལེན་པ་དགེ་རྒན་གྱིས་མཐོང་བས། གདོང་ལ་བྱམས་བརྩེའི་འཛུམ་མདངས་ཀྱིས་ཁེངས་ཏེ། རྒྱུགས་འབྲས་ནི་ཁྱོད་ཚོས་སྦྱངས་པའི་ཤེས་བྱར་ཚད་འཇལ་བྱེད་ཀྱི་རྒྱ་མ་ལྟ་བུ་ཡིན་པས། ཁྱོད་ཀྱིས་འདི་འདྲའི་བྱེད་ཐབས་སྤྱོད་པ་ནི་རང་ཉིད་ཕམ་པའི་མཚོན་རྟགས་ཡིན།
རྐུ་འབྲི་བྱས་ནས་ཐོབ་པའི་རྒྱུགས་འབྲས་ཀྱིས་ཁྱོད་ཀྱི་མ་འོངས་པའི་མདུན་ལམ་ལ་རོགས་རམ་སྤུ་ཙམ་ཡང་བྱེད་མི་ཐུབ་པར་མ་ཟད། ད་དུང་ཁྱོད་ཀྱི་སློབ་སྦྱོང་ལའང་གནོད་པ་ཆེན་པོ་ཡོད། དེ་བས་ཁྱོད་ཀྱིས་རང་ཉིད་ཀྱི་བརྩོན་པ་ཁོ་ནར་བརྟེན་ནས་རྒྱུགས་འབྲས་ལེགས་པོ་ཞིག་བླངས་ན། དེ་ནི་རང་ཉིད་ལ་མཚོན་ན་ཆེས་མཛེས་ཤིང་སྡུག་པའི་རྒྱན་ཆ་ངོ་མ་ཞིག་ཡིན། སྤྱོད་པ་བཟང་པོ་མི་ཚེའི་རིན་ཐང་ཡིན། ཡོན་ཏན་ཆེན་པོ་མི་ཚེའི་ནུས་མཐུ་ཡིན། སློབ་ལ་ལེགས་པར་བརྩོན་ཅིག་ཅེས་གསུངས།
བདག་གིས་རྒྱུགས་རྟོག་དགེ་རྒན་གྱི་བསླབ་བྱ་ལ་ཉན་རྗེས། གདོང་ཡོངས་ཚ་ལམ་ལམ་དང་ཁོག་ཧྲིལ་པོ་འཁྱག་སིབ་སིབ་ཏུ་གྱུར་ཏེ། ཚེ་རིང་དང་འདྲ་བའི་འཆར་གཞི་དེ་སྔ་མོ་ནས་གར་སོང་ཆ་མེད་དུ་གྱུར། མྱུར་དུ་བློ་གཅིག་སེམས་གཅིག་གི་སྒོ་ནས་ནན་ཏན་གྱིས་རྒྱུགས་ལན་བྲིས་པ་ཡིན།
དོན་དག་འདི་བརྒྱུད་ནས། བདག་གིས་ནངས་སྔ་ལངས་དང་དགོང་འཕྱི་ཉལ་བྱས་ནས་འབད་བརྩོན་ལྷོད་མེད་ཀྱིས་རང་ལ་དགོས་པའི་ཡོན་ཏན་དེ་ཉི་མ་རེ་ལ་ཚིག་རེ་བཟུང་བ་དང་། རྒྱུགས་གཞི་ལ་དོ་སྣང་ཆེན་པོ་བྱས་པ་མ་ཟད། རྒྱུགས་འབྲས་ལ་དེ་ལས་ལྷག་པའི་དོ་སྣང་བྱེད་ཀྱིན་ཡོད། ད་ལྟ་ང་རང་ལོ་རིམ་དྲུག་པར་སླེབས་ལ་ཉེ་ཡང་། དོན་དེ་བརྒྱུད་པ་ནས་བཟུང་བདག་གི་རྒྱུགས་འབྲས་ཇེ་བཟང་ནས་ཇེ་བཟང་དུ་གྱུར།
འདི་ཚང་མ་བདག་གི་འཚོ་བའི་ཁྲོད་དུ་དགེ་རྒན་རྣམས་ཀྱིས་བསམ་པ་རྣམ་དག་གིས་ང་ལ་སློབ་གསོ་བྱས་པའི་འབྲས་བུ་དང་། བདག་གི་མདུན་སྐྱོད་ཀྱི་སྙིང་སྟོབས་དང་ཞུམ་མེད་ཀྱི་དཔའ་ངར་ཁྱེད་ཚོའི་དྲོད་འཇམ་གྱི་བྱམས་བརྩེ་ལས་ཐོན་པ་མ་ཡིན་ནམ། དགེ་རྒན་ལགས། ཁྱེད་ལ་ནམ་མཁའ་ལས་ཡངས་ཤིང་རྒྱ་མཚོ་ལས་ཟབ་པའི་གཤིས་རྒྱུད་དང་སེམས་རྒྱུད་ལྡན་པས། ང་ཚོ་ཚང་མས་ནམ་ཡང་ཁྱེད་ཚོ་ལ་དགའ་གུས་དང་བསྔགས་བརྗོད་མི་བྱེད་ག་ལ་སྲིད། དུས་དེ་ནས་བཟུང་བདག་གིས་དུས་རབས་གསར་པའི་འབོད་སྐུལ་དང་ཨ་མའི་རེ་འདུན་གྱི་ཆེད་དུ། ཞུམ་མེད་ཀྱི་དཔའ་ངར་དང་བླ་མེད་ཀྱི་བརྩོན་སེམས་སྙིང་ལ་བཅངས་ནས། ཀྱག་ཀྱོག་གི་ལམ་ཕྲན་དུ་ཧུར་ཐག་གིས་སྒྲོན་མེ་སྤར་བཞིན་འོད་སྣང་ལྡན་པའི་མདུན་ལམ་ཞིག་འཚོལ་རྒྱུའི་དམ་བཅའ་བརྟན་པོ་བཞག་གོ།
