ང་ནི་ཐེ་བོ་རྫོང་སྟེང་ཀ་སློབ་གྲྭའི་ལོ་རིམ་གསུམ་པའི་འཛིན་གྲྭ་དང་པོའི་སློབ་མ་ཆུང་ཆུང་ཞིག་ཡིན། ང་སློབ་སྦྱོང་བྱེད་པར་ཧ་ཅང་དགའ་བ་དང་བོད་ཡིག་སྦྱང་བར་ལྷག་པར་དགའ། ཐེངས་རེ་རེར་སློབ་སྐར་དགུ་བཅུ་ཙམ་ལེན་ཐུབ་པས་ཨ་ཕ་དང་དགེ་རྒན་སོགས་ང་ལ་ཧ་ཅང་དགའ་བ་ཡིན།
ང་བོད་ཡིག་ལ་དེ་འདྲ་དགའ་བའི་རྒྱུ་མཚན་ནི།གཅིག་ནས་ང་ནི་བོད་མི་ཞིག་ཡིན་པ་དང་།གཉིས་ནས་ཆུང་དུས་སུ་ཁྱིམ་དུ་ཨ་ཕ་དང་ཨ་མ་སོགས་ཀྱིས་ཕན་ཚུན་བོད་སྐད་བཤད་པ་དེ་ངས་ཐོས་རྗེས་སེམས་སུ་བོད་སྐད་ནི་ཇི་འདྲའི་སྙན་ཞིང་ཡ་མཚན་པའི་སྐད་ཆ་ཞིག་རེད་སྙམ་པ་དེ་ཡིན། རྗེས་སུ་རྒྱུན་དུ་རྨོ་བོ་དང་མཉམ་དུ་དགོན་པར་མཇལ་སྐོར་དུ་སོང་། རྨོ་བོས་ལག་ཏུ་ཕྲེང་བ་བཟུང་ནས་ཁ་ནས་མ་ཎི་འདོན་གིན་ཡོད། མོས་ང་ལ་བྱིས་ཆུང་། ཁྱོད་ནར་སོན་རྗེས་བོད་ཀྱི་ཆོས་མཁན་ཞིག་བྱེད་དགོས། རྒྱུན་དུ་དགེ་སྦྱོར་བྱེད་ན་མི་ཡི་བསམ་པ་ཇེ་དཀར་དུ་འགྱུར་ཐུབ་ཟེར། ངས་དེ་ཐོས་རྗེས། བོད་ཀྱི་རིག་གནས་འདི་ཇི་འདྲའི་ངོ་མཚར་ཅན་ཞིག་རེད་སྙམ་ནས་ཁྱིམ་དུ་བོད་ཡིག་རང་སྦྱོང་བྱེད་མགོ་བརྩམས།
ལོ་བདུན་ལ་སླེབས་དུས། ངས་དཔེ་ཁུག་ཁུར་ནས་ཐེངས་དང་པོར་སློབ་གྲྭའི་ནང་དུ་སློབ་སྦྱོང་བྱེད་དུ་སོང་། བོད་ཡིག་དགེ་རྒན་གྱིས་ང་ཚོ་ལ་ཀ་མད་སུམ་ཅུ་དང་དབྱངས་བཞི་སོགས་ཁྲིད་པས་ངའི་སེམས་པ་ཧ་ཅང་དགའ་བོ་བྱུང་། ད་ལྟ་ངས་ཉེ་ཚིག་དང་། ལྡོག་ཟླའི་གཏམ་དཔེ། དག་ཡིག་སོགས་ཤེས་པར་མ་ཟད། ཉིན་ཐོ་དང་རྩོམ་ཡིག་ཀྱང་འབྲི་ཤེས། འོན་ཀྱང་ང་ལ་སེམས་སྐྱོ་བའི་བྱ་བ་ཞིག་ཡོད་པ་ནི་སློབ་གྲྭའི་ནང་དུ་བོད་ཀྱི་སློབ་མ་ལ་ལས་ཕན་ཚུན་ལ་རྒྱ་སྐད་བཤད་པ་ལས་བོད་སྐད་བཤད་མི་ཤེས། ང་ཚོ་ཚང་མ་ནི་བོད་མི་ཡིན་པ། ང་ཚོའི་ཕ་སྐད་ནི་བོད་སྐད་ཡིན། གལ་ཏེ་ང་ཚོ་རང་གི་ཕ་སྐད་བརྗེད་སོང་ན་རང་རེའི་མི་རིགས་འདི་བརྗེད་སོང་བ་དང་གཅིག་མ་ཡིན་ནམ། ང་ནི་བོད་ཀྱི་བྱིས་ཆུང་ཞིག་ཡིན།
ང་བོད་ཡིག་སྦྱངས་པར་ཤིན་ཏུ་དགའ། དེས་མ་ཚད་རྩིས་རིག་དང་རྒྱ་ཡིག་དབྱིན་ཡིག་སོགས་ལ་འབད་པ་བྱེད་དགོས། ང་ནར་སོན་རྗེས་རྒྱལ་ཁབ་དང་རང་མི་རིགས་ལ་ཕན་པ་ཡོད་པའི་བོད་ཀྱི་མཁས་པ་ཞིག་བྱ་རྒྱུ་ཡིན།
