ངའི་ཕ་ཡུལ་གྱི་མི་རྣམས་ཀྱིས་ཁྱིམ་ཚང་གི་འཁོས་འབྱོར་ལ་དམིགས་ནས་རྟ་ནོར་ལུག་གི་རྨིག་རྗེས་ལས་མི་ཚེའི་རིན་ཐང་དེ་ལོ་རེ་རེའི་ནོར་ལུག་གི་གྲངས་ཀ་ལ་བརྗེས་ཀྱི་ཡོད། དེ་ཕྱིར་གནས་དེ་ན་འཆད་རྩོད་རྩོམ་གསུམ་ལ་མཁས་པའི་དགེ་རྒན་མེད་ལ་བུ་ཕྲུག་སློབ་གྲྭ་གཏོང་བའི་འདུ་ཤེས་ནི་ཉིན་མོའི་སྐར་མ་བཞིན་དཀོན་པས་ཀ་ཁའི་གདངས་དབྱངས་སྙན་མོ་ཞིག་དེ་བས་ཀྱང་ག་ལ་ཐོས། བྱིས་པ་ཚོའི་ཡིད་སྨོན་ཤོར་བའི་སློབ་གྲྭ་ཞིག་ཀྱང་ག་ལ་ཡོད་སྲིད།
ལོ་འགའི་རྗེས་སུ། རྒྱལ་ཁབ་ཀྱིས་རོགས་རམ་འོག་ངའི་ཕ་ཡུལ་ལ་སློབ་ཆུང་ཞིག་འཛུགས་བསྐྲུན་བྱས་ཏེ་དགེ་རྒན་བཅུ་ལྷག་བཀོད་སྒྲིག་བྱས་ཡོད། ཉིན་འགའི་རྗེས་སུ་ཤང་སྲིད་གཞུང་གིས་སློབ་མ་འཚོལ་སྡུད་བྱེད་རྒྱུའི་བརྡ་སྤྲོད་ཡི་གེ་འགའ་གང་སར་སྦྱར་འདུག
གནས་ཚུལ་དེ་ཐོས་རྗེས་ཁྱིམ་བདག་ལ་ལ་དགའ་ཚོར་ཆེན་པོ་སྐྱེས་ཏེ་རང་ཉིད་ཀྱི་ཕྲུ་གུ་སློབ་གྲྭར་བཏང་། ཁྱིམ་བདག་མང་ཆེ་བས་མོས་མཐུན་བྱས་མ་བྱུང་ལ་ང་ཡང་དེ་ནང་གི་གཅིག་ཡིན། སྐབས་དེར་ཁྱིམ་བདག་སོ་སོས་ཀླད་པ་ད་ར་དང་ཁ་ལྕེ་ཝུ་བ་བྱས་ཏེ་བྱིས་པ་ཚོར་སློབ་གྲྭ་འགྲོ་མི་རུང་བའི་ཁ་ཏྭ་སློབ་གསོ་བྱེད་ཚུལ་ལ་བལྟས་ན་ང་ཚོ་མུན་ནག་གི་བཙོན་ཏུ་འཇུག་པ་དང་གཉིས་སུ་མ་མཆིས།
སྐབས་དེར། ང་རང་ཡང་སློབ་གྲྭ་ལ་འགྲོ་འདོད་ཀྱི་འདུན་པ་དྲག་པོ་ཡོད། དུས་དེར་ཤང་སྲིད་གཞུང་སྒྲིག་ཁྲིམས་འོག་ངའི་གྲོང་ཚོ་ནང་གི་ཕྲུ་གུ་མང་ཆེ་ཤོས་སློབ་གྲྭ་ལ་བཏང་སོང་། ཡིན་ནའང་ ། ངའི་ཨ་མས་ཅི་མི་བསམས་པར་ཨུ་ཚུགས་མཐར་བསྐྱེད་བྱས་ཏེ་ང་རང་སློབ་གྲྭ་མངགས་མ་བྱུང་། བདག་གིས་ཀྱང་ཁ་ཁོག་པས་མ་གསང་། བློ་རྒྱུ་མས་མ་བསྐུམས་པར་སློབ་གྲྭ་འགྲོ་འདོད་ཀྱི་བསམ་ཚུལ་ཡང་ཡང་བཤད་པ་ཀྱང་ངའི་སྐད་ཆ་ནི་རྣ་རྒྱབ་ཀྱི་རླུང་ལ་བསྐུར་དེ་ཕན་ཅི་ཡང་མ་ཐོགས།
རང་དང་ལོ་མཉམ་གྱི་བྱིས་པ་ཚོས་དཔེ་ཁུག་རྒྱབ་ལ་ཁུར་ཏེ་སློབ་གྲྭ་འགྲོ་དུས་ངའི་འུར་རྡོ་ལག་ལ་བཟུང་ནས་རྫི་བོར་འགྲོ་བའི་སྣང་ཚུལ་ལ་སེམས་ཤོར་ཞིང་། སློབ་གྲྭ་ནས་ཀ་ཁའི་གདངས་དབྱངས་སྙན་མོ་ལུང་ཁུག་ཡོངས་ལ་ཁྱབ་དུས་ངས་ལག་པས་ཕྲེང་བ་བགྲངས་བཞིན་སྒྲོལ་མ་སྐྱོར་བའི་ངང་ཚུལ་ལ་མིག་ཆུ་ཤོར་སོང་། སྐབས་དེར་ང་རང་བྱིས་པ་བསམ་མེད་ཀྱི་བྱིས་པ་སྣབས་ལུགས་ཤིག་ཡིན་ཡང་སློབ་གྲྭ་འགྲོ་འདོད་ཀྱི་འདུན་པ་དྲག་པོ་ཞིག་གིས་ཁྱེར་དེ་ཕྱུགས་ཟོག་བསྐྱུར་ཏེ་ཁྱིམ་དུ་ཨ་མ་ལ་ཞུ་བ་བྱེད་པར་སོང་བ་ཡིན།
ངས་ཨ་མ་ལགས་ལ་ཞུ་དོན“ཨ་མ་ལགས། ཕ་ཡུལ་གྱི་ལུང་ཁུག་འདི་ནས་ཡི་གེ་མ་ཤེས་པར་ནམ་ཡང་ཕྱུགས་ཟོག་གི་རྨིག་རྗེས་འཚོལ་བར་འགྲོ་བ་དང་རིག་གནས་མེད་པར་བཟའ་ཆས་རྒྱབ་ལ་ཁུར་ནས་སྟ་རེ་གནམ་ལ་འཕྱར་ཏེ་གསར་སྐྱེས་ཀྱི་ལྗོན་པའི་མགོ་བོ་བཅད་ནས་འཚོ་བ་སྐྱེལ་རྒྱུ་ནི་རྗེས་ལུས་ཀྱི་རྟགས་ཡིན་པས། ང་རང་རིག་པའི་སྐྱེད་ཚལ་ལ་གཏོང་རོགས། གནས་དེ་ན་ཡོན་ཏན་གྱི་ཕྱུག་པའི་བྱམས་ལྡན་གྱི་སློབ་དཔོན་མང་ལ། གནས་དེ་ན་མི་ཚེའི་མདུན་ལམ་བཙལ་བའི་ཐེམ་སྐེས་ཡིན་པས། ཨ་མ་ལགས། ཁྱེད་ཀྱི་མིག་མདུན་གྱི་བྱ་བ་ཆུང་ངུ་ཙམ་ལ་བལྟས་ནས་ངའི་བྱིས་དུས་ཀྱི་ལང་ཚོ་ཁྱིམ་ཚང་གི་ནང་ལས་དང་ཕྱུགས་ཟོག་གྲངས་ཀ་རྩིས་བའི་ཁྲོད་ནས་ཟད་དུ་མ་འཇུག་རོགས།ཁྱེད་ཀྱིས་ང་རང་སློབ་གྲྭར་མངགས་ན། དེ་ནི་ཁྱེད་ཀྱིས་བུ་མོ་ང་ལ་གནང་བའི་ཆེས་མཛེས་སྡུག་གི་ལེགས་སྐྱེས་དང་ཆེས་བླ་མེད་ཀྱི་ལྷག་བསམ་ཡིན”ཞེས་བཤད།
ཨ་མས་ངའི་སྐད་ཆར་ཉན་རྗེས་མོའི་མིག་མདངས་ལ་སྔར་མེད་ཀྱི་སྐྱོ་བའི་མདངས་ཤིག་ཤར་བྱུང་ལ་མིག་མཐའ་མཆི་མས་བརླན། ཅུང་མ་འགོར་བར། མོས་རང་དབང་མེད་པར་ང་རང་སློབ་གྲྭ་གཏོང་རྒྱུ་མཁས་བླངས་བྱུང་། ང་རང་ལ་དགའ་སྤྲོ་ཚད་མེད་སྐྱེས་ད་ལྟ་བསམས་ནའང་དམན་ཆུང་བདག་ལ་ད་བར་དུ་དེ་ལས་ལྷག་པའི་དགའ་སྤྲོ་ཞིག་ཡོད་མ་མྱོང་།
དེ་ནས་བཟུང་ང་རང་ལའང་སློབ་གྲྭ་འགྲོ་བའི་སྐལ་བ་ལྡན་པ་དེ་གཅེས་སུ་བཟུང་ནས་སློབ་དཔོན་ལ་སྒོ་གསུམ་གུས་པས་བསྟན་ཞིང་རང་ཉིད་ཀྱི་བརྩོན་འགྲུས་ལ་བསྟེན་ནས་བསླབ་ཚན་དག་གི་སྦྱངས་འབྲས་ལེགས་ཤིང་གསུམ་བཟང་སློབ་མ་ལ་འདེམས་ཐོན་བྱུང་བ་དང་དང་ནམ་ཡང་འགྲན་སྡུར་ཆེ་ཆུང་གང་ལ་ཞུགས་ཐུབ་པའི་གོ་སྐལ་བཟང་པོ་ལྡན་ཡོད།
སློབ་གྲྭ་འགྲོ་བའི་བསྐལ་བ་བཟང་པོ་ལྡན་པའི་བདག་གིས་རང་ཉིད་ཀྱི་ཆེད་དུ་དང་ཕ་མའི་རེ་བ་གཏོང་ཟད་དུ་མི་གཏོང་བར་སློབ་སྦྱོང་ལ་བརྩོན་འགྲུས་བྱས་ཏེ་ཡོན་ཏན་གྱི་ཕྱུག་ཤིང་ཀུན་སྤྱོད་བཟང་བ་དང་མི་གཞི་ལེགས་པའི་ཡ་རབས་ཀྱི་གནས་ལ་འབད་པ་བྱས་ནས་མ་འོངས་པ་ན་རང་ཉིད་ཀྱི་མི་རིགས་ཀྱི་རིག་གནས་རྒྱུད་འཛིན་བྱེད་པར་ནུས་པ་ཡོད་ཚད་འབུལ་རྒྱུ་ཡིན།
