མི་ཚང་མ་རང་གི་ལྟེ་ཁྲག་ཕོད་སའི་ཕ་ཡུལ་ལ་བརྩེ་མདངས་དང་དུང་སེམས་འོ་ཆུ་འདྲེས་པ་ལྟ་བུ་ཞིག་ཡོད་ལ།ཅོལ་ཆུང་བདག་ལ་མཚོན་ནའང་ཕ་ཡུལ་གྱི་ཡུལ་སྲོམས་གོམས་གཤིས་དང་རིག་གནས་ལ་དགའ་ཞེན་ཆེ།
ཕ་ཡུལ་ན་ཕ་མའི་དྲོད་ཁོལ་ཡོད་ལ་ཆུང་འགྲོགས་ཀྱི་ལྷད་མེད་ཀྱི་དགོད་སྒྲ་དང་ད་དུང་གཉེན་ཉེ་སྤུན་མཆེད་ཀྱི་བརྩེ་བ་དང་འཚར་ལོངས་ཁྲོད་ཀྱི་མངར་སྐྱུར་ཁ་གསུམ་དང་ལྡན་པའི་གཏམ་རྒྱུད་ཡོད།དེ་བས་ང་རང་ཕ་ཡུལ་ལ་དགའ་ཞིང་ཕ་ཡུལ་ལ་དུངས། བདག་གི་ཕ་ཡུལ་ནི་མི་རྣམས་ཀྱིས་བསྔགས་བརྗོད་ཀྱི་མེ་ཏོག་གཏོར་བའི“ཆབ་མདོ་ནོར་བུ་ས་ཆ”ཟེར་བ་དེ་ཡིན།
བདག་གི་ཕ་ཡུལ་ཆབ་མདོ་ནི་འཛམ་གླིང་གི་ཡང་རྩེར་གནས་ཤིང་སྙན་གྲགས་ཀྱི་བ་དན་ཕྱོགས་བཞིར་ཁྱབ་པ་དང་བདག་གི་ཕ་ཡུལ་ལ་ཚག་ཤ་དང་མར། ཐུད། བདུད་བརྩི་ཆང་སོགས་ཐོན་རྫས་བགྲང་གིས་མི་ལངས་པ་ཡོད་ཅིང་ནམ་མཁའི་སྐར་ཚོགས་ནང་བཞིན་བརྗོད་ཀྱིས་མི་ལངས་བ་ཡོད།
ང་ཡི་ཕ་ཡུལ“ཆབ་མདོ་ནོར་བུ་ས་ཆ”སའི་ཁ་དབྱིབས་ནི་བྱ་ཁྱུང་ཐང་ལ་ལྷུང་བ་དང་འདྲ་ཞིང་གཞོགས་གཉིས་སུ་ཟླ་ཆུ་དང་ངོམ་ཆུ་ལོ་གཅིག་དུས་བཞིར་བར་མེད་རྟག་དུ་འབབ་པ་ནི་དགུང་ཨ་སྔོན་དབྱིངས་ཀྱི་གཡུ་འབྲུག་སྔོན་མོ་ཐང་ལ་ལྷུང་བ་དང་གཉིས་སུ་མ་མཆིས། བདག་གི་ཕ་ཡུལ་གྱི་ཕྱོགས་མཚམས་གང་ལ་བལྟས་ནའང་གངས་རིས་བསྐོར་བའི་ཞིང་ཁམས་ཤིག་དང་མཚུངས། དེ་བས་བདག་གི་ཕ་ཡུལ་ནི་ཕྱོགས་མཚམས་གང་ལ་བལྟས་ནའང་གངས་རི་བསྐོར་བའི་ཞིང་ཁམས་ཞིག་དང་འདྲ་ལ་ཅོལ་ཆུང་ངས་སྙན་ཚིག་གིས་བསྔགས་བརྗོད་བྱེད་འདོད།
མཁའ་དབུགས་གཙང་བ་གདོད་མའི་སྦས་ལུང་འདྲ།།
ཁ་རུབ་གནའ་རྫས་ཇ་རྟའི་གནའ་ལམ་སོགས།།
ས་འདིའི་ནོར་བུ་ཡིན་ལ་ལོ་རྒྱུས་རིང་།།
ཕ་ཡུལ་ཆབ་མདོ་འཛམ་གླིང་སྤྱི་བོའི་རྒྱན།
ཕ་ཡུལ་གྱི་རི་བོ་ནི་མཐོ་ཞིང་བརྗིད་ཉམས་ལྡན་ལ་ཕ་ཡུལ་གྱི་ཆུ་བོ་ནི་དྭངས་ཤིང་གཙང་ཚང་ཚིང་གི་ནགས་ཀླུང་ཁྲོད་ན་རི་སྐྱེས་སྲོག་ཆགས་དག་བག་ཕེབས་སུ་གནས་ཡོད།ནགས་འདབས་ཀྱི་ཞིང་ས་དག་ནི་ཁོད་སྙོམས་ཤིང་གཞུན་པོ་ཡོད།
དཔྱིད་དུས་སུ་སྲབ་ལ་འཇམ་པའི་གོས་སྔོན་བཀླུབས་པ་ལྟ་བུའི་སྔོ་ཐིང་ངེར་གནས་བའི་རྩ་ཐང་སྟེང་དུ་གཡང་དཀར་ལུག་ཁྱུ་རྣམས་ཀྱིས་རང་དགར་ངང་རྩ་ཆུ་ལ་རོལ་བ་སྤྲིན་དཀར་ས་ལ་ལྷུང་བ་དང་འདྲ།
དབྱར་དུས་སུ་སླེབས་སྐབས་མཛེས་ཤིང་ཡིད་དུ་འོང་བའི་མེ་དཏོག་ཁྲ་ཆེལ་ལེར་བཞད་ཅིང་འཇིག་རྟེན་འདིར་མེ་ཏོག་གིས་མགུལ་རྒྱན་སྤྲས་པ་དང་འདྲ་ལ་རླུང་བུ་བསེལ་བསིལ་ལྡང་བཞིན་མེ་ཏོག་སྣ་ཚོགས་ཀྱིས་མགོ་ལྕོག་ལྡེམ་ལྡེམ་བྱེད་བཞིན་སྐུ་ཉིད་ངའི་ཕ་ཡུལ་ལ་ཕེབས་པར་དགའ་བསུ་ཞུ་བཞིན་ཡོད་པ་དང་འདྲ།
སྟོན་གྱི་དཔལ་མོ་ཉེ་བར་སླེབས་སྐབས་ནོར་འཛིན་སྒེག་མོས་ལུས་ལ་གསེར་གྱི་ཁུ་བ་ཞུགས་པ་ལྟར་ཡིད་འོང་འཕྲོག ལས་ལ་བརྩོན་པའི་སོ་ནམ་པའི་ངོ་གདོང་འཛུམ་གྱིས་ཁེངས་ནས་གླུ་ལེན་གར་རྩེད་ལ་རོལ་བཞིན་འདུག
ཁ་བ་བུ་ཡུག་འབབ་དུས་མཛེས་སྡུག་ལྡན་པའི་ཆབ་མདོ་ལ་རབ་དཀར་དྲི་མ་མེད་པའི་ཁ་བས་གཡོགས་པ་ནི་དངུལ་དཀར་གྱི་ན་བཟའ་བཀླུབས་པ་དང་འདྲ།
ཕ་ཡུལ་གྱི་མི་རྣམས་ལས་ལ་བརྩོན་ཞིང་ལག་གཉིས་རྩལ་ལ་བྱང་བ་དང་མི་ཆོས་ཀྱི་ཤེས་རྒྱ་ཡངས་ཤིང་རིག་གནས་ཀྱི་རྣམ་དཔྱོད་ཞིབ་པ་སྤྱོད་པ་ཁྲིམས་དང་མཐུན་ཞིང་ཡ་རབས་ཀྱི་གུས་སྲོལ་ཤེས་པས་གནས་འདི་ན་འཆམ་མཐུན་གྱི་བདེ་སྐྱིད་ཡོད།གནས་འདི་ན་ཁ་རུབ་གནའ་ཤུལ་དང་སྨར་ཁམས་ཀྱི་ཚྭ་ཞིང་སོགས་མིང་གྲགས་ཆེ་བའི་རིག་གནས་ཀྱི་རྗེས་ཤུལ་ཡོད་ལ་འདུ་འཛི་ཆེ་བའི་དམངས་ཁྲོད་དུས་ཆེན་ཡང་ཡོད།
བདག་གི་ཡང་ལོ་རྒྱུས་རིན་ཐང་ལྡན་པའི་ཕ་ཡུལ་དེ་འཛུགས་བསྐྲུན་བྱེད་ཆེད་དཀའ་བ་བརྒྱ་དང་འབད་པ་སྟོང་བྱས་ནས་མཛེས་སྡུག་ལྷ་ཡུལ་ལ་ཅོ་འདྲི་ཞིང་འབྱོར་ཕྱུག་ཀླུ་ཡུལ་ལ་འགྲན་པའི་ཕ་ཡུལ་དེ་འཛུགས་བསྐྲུན་བྱ་རྒྱུ་དེ་སེམས་ཁོངས་རུས་པའི་གཏིང་ལ་བཀོད་ཡོད།
