བྱིས་དུས་ཀྱི་བྱ་བ་ཐམས་ཅད་ནི་རབ་རིབ་དང་མག་མོག་གི་ཟིན་བྲིས་ཤིག་དང་འདྲ་བར་དྲན་དཀའ་མོད། ཡིན་ནའང་སློབ་དཔོན་སྐལ་བཟང་ལྷ་རྒྱལ་གྱི་བཀའ་དྲིན་ནི་བདག་ཡིད་ཀྱི་མེ་ལོང་ངོས་ནས་ནམ་ཡང་ཡལ་མ་མྱོང་ལ་ཡལ་ཡང་མི་སྲིད་པའི་དགེ་རྒན་དཔེ་མེད་ཅིག་ཡིན།ལོ་ངོ་གཉིས་ལྷག་ཙམ་འགོར་རུང་།ཁོང་གི་གཟུགས་རིས་དང་བྱ་བྱེད་ཐམས་ཅད་གློག་བརྙན་ཁྲོད་ཀྱི་གཟུགས་རིས་ཇི་བཞིན་སེམས་ལ་ཝ་ལེར་འཆར་ཐུབ།ལྷག་པར་དུ་སློབ་ཁྲིད་བྱེད་སྐབས་ཀྱི་སྒམ་ནན་གྱི་རྣམ་པ་དེ་ནམ་ཡང་བརྗེད་མི་སྲིད།
ད་ལྟ་ཕྱིར་དྲན་ཞིག་བྱས་ན།སྐབས་དེར་ཁོང་དགུང་ལོ་བཞི་བཅུ་ཡས་མས་སུ་བསླེབས་འདུག ངོ་གདོང་ཉི་མས་ཚིག་པའི་རྐྱེན་གྱིས་དཀར་པོ་དེ་ཙམ་མེད།གཟུགས་འབྲིང་ཙམ་དང་ཤ་རྒྱགས་པོ་ཡོད།ཁོང་ནི་ངང་རྒྱུད་རིང་ཞིང་སློབ་མ་ཚོར་ཕྱོགས་གང་ཐད་ནས་མིག་དཔེ་ཐོན་པའི་དགེ་རྒན་ཞིག་ཡིན། ཁོང་གི་ཤེས་ཡོན་རྒྱ་མཚོ་ལས་གཏིང་ཟབ་ཅིང་ཐབས་བཟང་པོ་ལ་བརྟེན་ནས་ང་ཚོར་སློབ་ཁྲིད་སྤུས་ལེགས་གནང་བཞིན་ཡོད།ཁོང་ལ་རྗེ་བཙུན་སྒྲོལ་མ་ལྟ་བུའི་ཐུགས་རྒྱུད་ཡོད་པས་སློབ་མ་ཚོར་ཉེ་རིང་མེད་པར་བྱམས་སྐྱོང་དང་བཀའ་སློབ་གནང་གི་ཡོད།
དགེ་རྒན་སྐལ་བཟང་ལྷ་རྒྱལ་ལགས་ད་རུང་རི་མོ་འབྲི་རྒྱུར་དགའ་བ་མ་ཟད། ཡིག་གཟུགས་ལ་དེ་བས་ཀྱང་མཁས། ཁོང་གི་དུས་ཚོད་བགོས་ནས་ང་ཚོར་གྱང་ལྡེབས་ཚགས་པར་དང་རི་མོ་འབྲི་རུ་བཅུག་ནས་སློབ་གྲོགས་ཚོའི་ཡིག་གཟུགས་ལ་སྦྱོང་བརྡར་བྱེད་པའི་སྤྲོ་སེམས་བསྐྱེད་བཞིན་ཡོད། འཛིན་གྲྭ་གཞན་གྱི་དགེ་རྒན་དང་སློབ་མ་རྣམས་ཀྱང་ནམ་རྒྱུན་དུ་ང་ཚོའི་གྱང་ལྡེབས་ཚགས་པར་དང་རི་མོ་ལ་ལྟ་རུ་ཡོང་གི་ཡོད། འདི་ལྟར་རང་གི་ངལ་བ་ལ་མི་འཛེམ་པར་ཐབས་སྣ་ཚོགས་ལ་བརྟེན་ནས་ང་ཚོར་སློབ་སྦྱོང་གི་ཁོར་ཡུག་ཡག་པོ་ཞིག་བསྐྲུན་པ་ཡོད་པ་དང་། སྔོན་ཆད་ང་ཚོའི་འཛིན་གྲྭའི་སློབ་མའི་སློབ་སྦྱོང་གི་རྨང་གཞི་འཛིན་གྲྭ་གཞན་ལས་ཧ་ཅང་ཞན་པས། དགེ་རྒན་གྱིས་ནམ་ཡང་ནངས་སྔ་ལངས་དང་དགོང་འཕྱི་ཉལ་བྱས་ཏེ་སློབ་མ་ཚོ་ལ་ཟུར་ཁྲིད་དང་རྨང་གཞིའི་སྐོར་ལ་ཤུགས་སྣོན་རྒྱབ་པའི་རྐྱེན་གྱིས་ཟ་མ་དུས་ལྟར་བཟའ་ཐུབ་ཀྱི་མེད་པ་དང་སྐབས་རེར་ཡེ་ནས་བཟའ་ཐུབ་གི་མེད། ཡུན་རིང་པོར་ངལ་གསོ་བཟང་པོ་ཞིག་ཀྱང་ཕོག་གི་མེད་པ་དང་རང་གི་ཕྲུ་གུ་ལ་ལྟ་ལྟོགས་བྱེད་པའི་དུས་ཚོད་ཅིག་ག་ལ་ཡོད།དེ་རྐྱེན་གྱིས་དུས་ཚོད་ཀྱི་འགྲོས་དང་བསྟུན་ནས་དགེ་རྒན་ནི་ངོ་གདོང་སྐྱ་ལ་ཤ་རིད་པ་ཞིག་ཏུ་གྱུར་ཡོད། དེ་བས་དགེ་རྒན་གྱིས་ང་ཚོ་ལ་སློབ་སྦྱོང་བྱེད་པའི་སྟོབས་ཤུགས་དང་སྙིང་རུས་ཤིག་རང་བཞིན་གྱིས་སྦྱིན་ཡོད་པས་འཛིན་གྲྭའི་ནང་དུ་བོད་སྐད་ཡིག་ལ་འབད་བརྩོན་མི་བྱེད་པའི་སློབ་ཕྲུག་ཕལ་ཆེར་མེད། རིམ་གྱིས་ང་ཚོ་འཛིན་གྲྭའི་སློབ་མའི་སྦྱངས་འབྲས་དང་རྩོམ་ཡིག་འབྲི་བའི་ནུས་པ་འཛིན་གྲྭ་གཞན་ལས་ལྡབ་འགྱུར་གྱི་ཡར་རྒྱས་ལ་ཡོང་ཡོད།
སློབ་ཆུང་གི་མཐར་ཕྱིན་རྒྱུགས་མ་སྤྲད་པའི་སྔོན་དུ་ཁོང་ལ་སྙུང་གཞི་དྲག་པོ་ཞིག་ན་པས་ཁྱིམ་མི་དང་སྨན་པས་སྨན་ཁང་དུ་འདུག་དགོས་པའི་རེ་བ་བཏོན་ཡང་ཁོ་རང་གིས་ཨུ་ཚུགས་བྱས་ཏེ་སྨན་ཁབ་རྒྱབ་བཞིན་དུ་སློབ་ཚན་ཚོགས་པར་ཡོང་། དགེ་རྒན་གྱི་ངོ་གདོང་སྐྱ་བོར་གྱུར་ཡོད་པ་དང རྐང་པས་གཟུགས་པོའང་མི་ལྕོག་པའི་ངང་རྒྱུགས་ཤོག་འབྲི་ཚུལ་གྱི་ཐབས་ཤེས་དང་དོ་སྣང་བྱེད་དགོས་པའི་སྐོར་ཕྲ་ཞིང་ཞིབ་པ་ཞིག་སློབ་ཁྲིད་གནང་བྱུང་། སྐབས་དེར་ང་ཚོ་བསམ་མེད་ཀྱི་བྱིས་པ་སྣབས་ལུགས་ཤིག་ཡིན་ཡང་སེམས་གཏིང་ནས་དགེ་རྒན་ལ་སེམས་ཁུར་ཆེན་པོ་ཞིག་བྱས་མྱོང་ལ་དོན་དག་དེ་ད་ལྟ་ཕྱིར་དྲན་བྱས་ནའང་སེམས་འགུལ་ཐེབས་པ་ཞིག་རེད།
ཨེ་མ། བཤེས་གཉེན་གྱི་གཟི་བྱིན་ནི།། ཉི་འོད་བཞིན་ཏུ་རབ་ཏུ་འཕྲོ།།
བྱམས་བརྩེའི་ཞལ་ནི་ཟླ་འོད་བཞིན།། ཐུགས་རྒྱ་ཀུན་གསལ་ནམ་མཁའ་འདྲ།།
བཀའ་དྲིན་ཅན་གྱི་དགེ་རྒན་ལགས། ཁྱོད་ནི་ང་ཚོ་ལ་ལེགས་ཉེས་སྤང་བླང་གི་ཕྱོགས་ལ་གནས་ལུགས་ཟབ་མོ་གནང་མཁན་དང་མ་རིག་རྨོངས་པ་སེལ་མཁན་གྱི་རིག་པའི་དཔའ་པོ་ཡིན། ཁྱེད་ནི་ང་ཚོ་ལོ་ཆུང་བྱིས་པ་རྣམས་ཀྱི་རིག་པའི་སྒོ་མོ་འབྱེད་པའི་ལྡེ་མིག་ཡིན། མིག་རྒྱང་ཆུ་བོ་ལས་རིང་ལ་ཐོས་རྒྱ་ནམ་མཁའ་ལྟར་ཡངས་པའི་བཤེས་གཉེན་ལགས། ཁྱོད་ཀྱིས་རང་དཔེ་གཞན་སྟོན་མཛད་དེ་ང་ཚོའི་སེམས་ཀྱི་བླ་མ་ཡིན།
