ང་ཚོས་འཇིག་རྟེན་འདིར་ལྟེ་ཁྲགས་འཕོས་བ་ནས་བཟུང་སོ་སོར་སྐྱིད་ན་སྐྱིད་གླུ་ལེན་ས་དང་སྡུག་ན་མིག་ཆུ་འཕོ་སའི་ཁྱིམ་གཞི་དྲོན་མོ་ཞིག་ཡོད།རང་ཡུལ་བྲག་ཁུང་ཡིན་ཡང་སྐྱིད་ཟེར་བའི་དཔེ་ལྟར་སོ་སོའི་ཁྱིམ་གྱི་ཆ་རྐྱེན་ལ་ཡག་སྡུག་ཡོད་རུང་རང་ཉིད་ལ་མཚོན་ན་སོ་སོའི་ཁྱིམ་གཞི་ནི་རང་ཉིད་ལ་ཆེས་བརྩེ་དུངས་ཡོད་ས་དང་ཆེས་དྲོད་ཁོད་ལྡན་ས་དེ་ཡིན།
ངའི་སེམས་ཀྱི་ཉི་མ་དང་ཡིད་ཀྱི་བདེ་བ་ནི་རང་ཉིད་ལ་དྲོ་སྐྱིད་ལྡན་པའི་ཁྱིམ་གཞི་སྤྲོ་པོ་ཞིག་ཡོད་པ་དེ་ཡིན། ཁྱིམ་གཞི་དེ་ན་ངའི་ལོ་ངོ་བཅོ་ལྔ་རིང་གི་འཚར་ལོངས་ཁྲོད་ཀྱི་དགའ་སྐྱོ་ཆགས་སྡང་དང་ཕ་མའི་བྱམས་བརྩེ་ཡིས་ཁེངས་ཡོད།ཁྱིམ་གཞི་དེ་ནི་དྲག་ཆར་ཁྲོད་ཀྱི་ཆར་གདུགས་དང་གྲང་རླུང་ཁྲོད་ཀྱི་མེ་དཔུང་། ཚ་བའི་ཁྲོད་ཀྱི་གྲིབ་བསིལ་བཞིན་ནམ་ཡང་ང་ལ་བདེ་བ་བརྗོད་ཀྱིས་མི་ལངས་པ་ཞིག་སྟེར་དང་སྟེར་བཞིན་ཡོད།
ངའི་ཁྱིམ་ཚང་ལ་བཟའ་མི་མང་པོ་ཡོད། ངའི་སྤོ་བོ་ནི་ཆོས་དད་ཆེ་ཞིང་གནས་ལུགས་རྩིས་བའི་རྒད་པོ་གཞུང་དྲང་ཞིག་ཡིན་ལ་ངའི་ཨ་ཕ་ནི་བློ་རྒྱ་ཆེ་ཞིང་གཞུང་རྒྱུད་དྲང་ལ་སྤྱི་སེམས་དང་ལྡན་པ་ཞིག་ཡིན། ངའི་ཨ་མ་ནི་ངང་རྒྱུད་འཇམ་ལ་བྱམས་བརྩེ་ཆེ་ཞིང་ཐབས་ལ་མཁས་པ་དང་ལས་ལ་བརྩོན་པའི་བུད་མེད་མཛངས་མ་ཞིག་ཡིན། ཁྱིམ་གྱི་ཕ་མེས་དག་གི་བག་ཆགས་འོག་ང་ཚོ་གཅེན་གཅུང་ཚང་མའང་ཆུང་དུས་ནས་ཡ་རབས་གུས་ལུགས་ལྡན་ཞིང་གཞན་ཕན་ལྷག་བསམ་ལྡན་པའི་མི་རྐྱང་རྐྱང་ཡིན། དེ་ཕྱིར་ཁྱིམ་མཚེས་གཡས་གཡོན་དག་གི་ཕ་མ་རྣམས་ཀྱིས་ནམ་ཡང་ང་ཚོ་ལ་བསྟོད་ར་མི་ཉུང་བ་བྱེད་ལ། ང་ཚོ་གཅེན་གཅུང་དག་ཀྱང་གཡས་གཡོན་གྱི་བྱིས་པ་དག་གི་མིག་དཔེ་ལྟ་ས་ཡིན།
ཕ་མ་གཉིས་ཀྱི་གཤིས་ཀ་བཟང་པོ་ཡོད་པའི་རྐྱེན་གྱིས་ཁྱིམ་ཚང་འདི་ལ་དོན་དག་ཆེ་ཆུང་གང་ཞིག་བྱུང་ནའང་སེམས་ལྷོད་ལ་བབས་ཏེ་གྲོས་ཀྱིས་བསྒྲུབས་པ་ལས་ཕན་ཚུན་ཁ་རྩོད་རྒྱགས་པ་དང་སྡུག་མོ་བྱེད་པ་སོགས་ཀྱི་གནས་ཚུལ་བྱུང་མྱོང་མེད། དེ་ནི་ང་ཚོ་བྱིས་པ་ཚོ་ལ་མཚོན་ན་ཆེས་བདེ་སྐྱིད་ཆེ་བ་ཞིག་ཡིན་ལ་གཞན་གྱིས་ཡིད་སྨོན་ཤོར་སའང་ཡིན། ཕ་མ་གཉིས་ཀྱིས་སློབ་གསོ་འོག་ང་རང་ཡང་ཆུང་དུས་ནས་གནས་ལུགས་རྟོགས་ཤིང་ངོ་ཚ་ཤེས་བ་དང་བརྩོན་འགྲུས་ལྡན་པའི་བྱིས་པ་ཡ་རབས་ཤིག་ཡིན།
ངའི་དྲན་ཤེས་ལ་ང་རང་ཉིད་ཀྱི་སློབ་ཆུང་ལོ་རིམ་དྲུག་པའི་རྒྱུགས་འབྲས་ཕུལ་དུ་བྱུང་བ་ཞིག་བླངས་ཏེ་ནང་སའི་སློབ་གྲྭ་ཞིག་ལ་རྒྱུགས་འཕྲོད་པས་སྤོ་བོ་དང་ཕ་མ་དག་དགའ་ཚོར་ཆེན་པོ་སྐྱེས་ཏེ་གཉེན་ཉེ་དག་ལ་མགྲོན་འབོད་བྱས་ཏེ་དགའ་སྟོན་བྱས་པ་དང་ངས་ལོ་ངོ་མང་པོར་རེ་སྨོན་བྱས་པའི་སྒྲ་སྙན་དེ་ཡང་ང་ལ་བྱ་དགའ་རུ་ཉོས། སྐབས་དེར་ཕ་མ་དང་སྤ་བོ་དག་གི་ཞལ་རས་ཀྱི་འཛུམ་མདངས་ནི་མེ་ཏོག་གྲོལ་བ་ལྟར་ཡིན། ཕྱིར་མདངས་ཞིག་རྒྱབ་ན་ངའི་ཁྱིམ་གྱི་ཆ་རྐྱེན་བཟང་པོ་མེད་པས་དུས་དེར་ཕ་མ་ལ་དཀའ་ཁག་མི་ཉུང་བ་ཞིག་བཟོས་ཡོད་པ་གདོན་མི་ཟ།
ཡིན་ནའང་མིའི་ལས་དབང་དེ་བདེ་མོ་ཐང་ནས་རྒྱུགས་པ་ལྟ་བུ་ཞིག་མིན་པས་སློབ་འབྲིང་ལོ་རིམ་བརྒྱད་པའི་སྐབས་སུ་ང་ལ་ནད་གཞི་ལྕི་མོ་ཞིག་ཕོག་ནས་སྨན་ཁང་དུ་གཉིད་དགོས་བྱུང་། དུས་དེར་སེམས་ཕམ་དང་ཡིད་སྐྱོ་བའི་ཁེངས། ཡིན་ནའང་སྤོ་བོ་དང་ཕ་མ་དག་གིས་སེམས་གསོ་དང་གཅེན་གཅུང་དག་གིས་གཏམ་གང་སྙན་ཁྲོད་ངའི་སེམས་ཀྱི་སྡུག་བསྔལ་དེ་འཇའ་ཚོན་ལྟར་ཡལ། དུས་དེར་ཨ་མས་ཀྱང་ང་ལ་ལྟ་རྟོགས་བྱེད་པའི་ཆེད་དུ་ལས་གྲྭར་འགྲོ་མཚམས་བཞག་ལ་གཅེན་གཅུང་དག་གིས་ཀྱང་རང་ནུས་ཡོད་ཚད་ཀྱིས་ང་ལ་ཕྱོགས་གང་ཐད་ནས་རོགས་རམ་བྱས། ཁྱིམ་མིས་མཛའ་བརྩེ་དང་བྱམས་བརྩེ་ཁྲོད་ཡུན་རིང་མ་སོང་བར་ང་རང་ནད་ལས་གྲོལ་ཞིང་དུས་དེར་ངས་འཇིག་རྟེན་སྟེང་གང་ཞིག་རིན་ཐང་ཆེ་བའི་གནས་ལུགས་དེའང་རྟོགས་བྱུང་།ངའི་ཁྱིམ་གཞིའི་དྲོད་འཁོལ་ནི་ང་ཚོ་ལ་མཚོན་ན་མུན་ནག་ནང་གི་ཉི་འོད་དང་གྲང་རླུང་ཁྲོད་ཀྱི་མེ་དཔུང་ལྟ་བུ་ཞིག་ཡིན་པ་ཚོར།
ལོ་གསར་སོགས་དུས་ཆེན་གང་གི་སྐབས་སུའང་སོ་སོ་དོན་ལ་བྲལ་བ་ཅི་ལྟར་ཆེ་ནའང་ཐབས་ཅི་དྲག་གིས་ཁྱིམ་མི་ཚོ་མཉམ་དུ་འཛོམས་པ་དང་སོ་སོའི་དགའ་ཕྱོགས་དང་བསྟུན་ནས་གླུ་གར་གཞས་གསུམ་བྱེད་པ་སོགས་ཀྱི་སྣང་བ་དེ་ང་ལ་མཚོན་ན་ཆེས་སྤྲོ་སྐྱིད་ལྡན་པ་ཞིག་ཡིན།
ཆེ་ལ་བརྩི་བཀུར་དང་ཆུང་ལ་བྱམས་སྐྱོང་བྱེད་པ་དགའ་དུས་སྤྲོ་སྐྱིད་མཉམ་རོལ་དང་སྡུག་དུས་སེམས་ཤུགས་གཅིག་སྒྲིལ་གྱི་ཡ་རབས་སྲོལ་བཟང་ལྡན་པའི་ཁྱིམ་འདི་ནི་སྤྲོ་སྐྱིད་ལྡན་པའི་རང་ཁྱིམ་ཡིན།
