ལོ་གཅིག་དུས་བཞིའི་ནང་ནས་དཔྱིད་ཀ་ནི་ཉི་མའི་དུས་ཚོད་རིང་བ་དང་མཚན་མོའི་དུས་ཚོད་ཐུང་བའི་ཁར་རྟ་བདུན་དབང་པོའི་འོད་ཟེར་དེ་ས་གཞི་རིལ་མོར་འཕྲོས་ཤུགས་ཆེ་བ་སོགས་ཀྱིས་གནམ་གཤིས་དྲོ་པོར་འགྱུར་བ་དང། སྦྲང་ཆར་སིམ་སིམ་བབས་ཏེ་ཡོད་ཚད་མཛེས་སྡུག་གི་ལང་ཚོ་སྨིན་མའི་གཞོན་ནུ་མ་ལྟར་ངོ་མཚར་ཆེ་བའི་དུས་ཤིག་ཡིན།
དཔྱིད་ཀ་སླེབས་སོང་།གང་སར་དཔྱིད་རླུང་བསིལ་བསིལ་དུ་ལྡང་བ་དང་རྩི་ཤིང་ཐམས་ཅད་རིམ་གྱིས་སྔོ་ལྗང་དུ་གྱུར། རྩྭ་ལྗང་ཆུང་ངུ་དག་ནི་འཇམ་བུའི་སྟབས་ཀྱིས་ས་ཤུན་བརྟོལ་ཏེ་ཐོན་པ་ནེམ་ནེམ་པོ་དང་ལྗང་ཐིང་ཐིང་དུ་སྣང་། རི་བོ་དང་སྤང་ཐང་ཞིང་ས་སོགས་ལ་བལྟས་ཚེ།རྩྭ་ཡིས་ལྗང་བུ་གསར་བ་དག་ས་ཁུག་དང་ས་ཁུག་གང་སར་སྐྱེས་པ་སྐབས་འགར་གྲོང་ངེར་སྡོད་ཅིང་རེ་འགར་ཉལ་ཏེ་འདུག་ལ་ལུས་ཀྱི་འགྲེ་ལྡོག་རེ་གཉིས་དང་མགོ་བོས་དཀྲུག་དཀྲུག་ལན་འགའ་བྱེད་པའི་རྣམ་པ་དེ་ཡི་གར་འོང་།ཤིང་འབྲས་ལིའི་ལྗོན་པ་དང། ཀུ་ཤུའི་ལྗོན་ཤིང་། ཁམ་བུའི་སྡོང་པོ་དག་གི་སྟེང་དུ་སྔ་གཞུག་བརྩད་དེ་མེ་ཏོག་སྣ་བརྒྱ་བཞད་པ་ནི་ཕན་ཚུན་ལ་ཕྲག་དོག་བྱེད་པ་དང་འདྲ། དཔྱིད་ཀའི་རླུང་བུ་དལ་བུར་ལྡང་བ་དང་བསྟུན་ནས་རྩྭ་རྩི་ཤིང་དང་མེ་ཏོག ལྗོན་ཤིང་སོགས་ཀྱི་ཡལ་ག་ཕར་གཡོ་ཚུར་ཡོང་བྱེད་པའི་རྣམ་པ་ནི་སྨིན་ལེགས་མ་དག་གིས་བྲོ་འཁྲབ་པ་དང་འདྲ།
སྔོ་ལྗང་རབ་ཏུ་རྒྱས་པའི་ལྗོན་ཤིང་གི་གསེབ་ནས་དཔྱིད་ཀྱི་རྒྱལ་མོས་ཀོ་ཀོ་ཞེས་པའི་གསུང་སྙན་སྒྲོག་པ་ནི་ཞིང་ནང་དུ་ངལ་བའི་མནར་བའི་སོ་ནམ་པ་དག་ལ་སེམས་གསོ་བྱེད་པ་དང་གཉིས་སུ་མ་མཆིས།
དཔྱིད་ཀ་ཤར་བ་དང་མཉམ་དུ་ཨ་ཁུ་སོ་ནམ་པ་རྣམས་ཀྱིས་རིན་བྲལ་གསེར་ལས་ཀྱང་གཙིགས་ཆེ་བའི་དུས་ཚོད་དམ་འཛིན་བྱས་ནས་རི་སྟེང་གི་ཤང་ཤང་ཐུར་དུ་འབབ་པའི་ཆུ་བོ་དག་ཡུར་བར་དྲངས་ཏེ་ཞིང་ཁར་གཏོང་བ་དང། ཁྱི་ལུད་དང་སོན་བཟང་སོགས་འཕྲུལ་འཁོར་ཆེ་ཆུང་སྣ་ཚོགས་ཀྱིས་ཞིང་ནང་དུ་བྲེལ་བྲེལ་འཚུབ་འཚུབ་ངང་ནས་བོར་ཏེ་དཀའ་བ་ཇི་ཙམ་བྱུང་རུང་ངོ་གདོང་ནས་དགའ་སྤྲོའི་འཛུམ་མདངས་མངོན་བཞིན་འདུག ས་གཞིར་རྩྭ་ལྗང་གསར་པ་མང་པོ་གཅིག་ཞིང་སྔོ་ལྗང་ཅན་དུ་གྱུར་ནས་ཕྱུགས་རིགས་དཀར་ནག་ཁྱུ་དང་ཁྱུ་ཡིས་ཅི་དགར་ལོངས་སུ་སྤྱོད་བཞིན་པའི་སྐབས།ཨ་ཁུ་འབྲོག་པ་རྣམས་ཀྱི་བློ་ལ་ད་ལོ་སླར་ཡང་ཕྱུགས་རིགས་འཕེལ་ཀ་བྱུང་ནས་དཀར་ཆུ་འོ་མའི་ཐོན་ཁུངས་གནང་སོང་སྙམ་ནས་མོས་པའི་མགོ་ལྕོག་གནང་བཞིན་འདུག།
ང་རང་དཔྱིད་ཀ་ལ་དགའ། དེ་ནི་མ་རྙིང་ལང་ཚོ་གསར་པ་འཚར་དུ་ལོང་བཞིན་པའི་བྱིས་པ་ལྟར་རེ་བ་དང་སྐྱེས་སྟོབས་ཀྱིས་ཕྱུག
