བསམ་བློ་ཡོད་པའི་ན་གཞོན་ཞིག་ཡིན་ཚེ་ཚང་མས་རང་ཉིད་ཀྱི་ཕུགས་བསམ་གླེང་རྒྱུར་དགའ་ལ་ཕུགས་བསམ་ཡོད་པ་ལས་ད་གཟོད་མི་ཚེ་ལ་ཁ་ཕྱོགས་ཡོད་པ་དང་ཤེས་ཡོན་ལ་འབད་བརྩོན་བྱེད་པའི་སྙིང་རུས་ཡོད་ངེས། ཕུགས་བསམ་ལ་མཆོག་དམན་གྱི་དབྱེ་བ་མེད་པས་སྐྱེ་བོ་སོ་སོར་རང་ཉིད་ཀྱི་དགའ་ཕྱོགས་དང་མཐུན་པའི་འདུན་པ་རེ་ཡོད་པ་ནི་གདོན་མི་ཟ། ཕུགས་བསམ་མེད་པའི་ན་གཞོན་ཚོ་ནི་གཤོག་རྩལ་མེད་པའི་བྱ་ལྟར་ནམ་ཡང་ཨ་སྔོན་དབྱིངས་སུ་འཕུར་པའི་སྐལ་བ་ལྡན་མི་སྲིད།
བུ་ཆུང་ང་ལའང་ཆུང་དུས་ནས་ཕུགས་བསམ་ཞིག་ཡོད་དེ། དེ་ནི་རྗེས་སུ་སྐྱེ་བོ་ཚང་མའི་ན་ཚའི་སྡུག་བསྔལ་སེལ་ཞིང་ཚེ་སྲོག་གཉིས་པ་སྦྱིན་པའི་སྨན་པ་མཆོག་ཏུ་གྱུར་བ་ཞིག་བྱ་རྒྱུ་དེ་ཡིན། བདག་ལ་ཕུགས་བསམ་དེ་འདྲ་ཞིག་ཡོད་པ་ལའང་རྒྱུ་རྐྱེན་མེད་པ་ག་ལ་ཡིན།
ཉིན་ཞིག་ངའི་ཨ་མ་ལགས་ལ་ནད་གཞི་ལྕི་མོ་ཞིག་ཕོག་ནས་མི་ཚང་མས་ད་ནི་གསོན་ཐུབ་རྒྱུ་མ་རེད་ཅེས་རེ་ཐག་ཆད། སྐབས་དེར་ངའི་སེམས་ཀྱི་རྨ་ཁ་རུ་གྲི་རྣོན་པོ་ཞིག་གིས་བསྣུན་པ་ལྟར་ཟུག་གཟེར་ཆེན་པོ་ཞིག་ལངས་ཏེ་ང་རང་དྲན་པ་འཐོར། ཨ་མ་འགུལ་ཙམ་ཡང་བྱེད་མི་ཐུབ་ལ་མིག་ཆུ་བཞུར་བ་ལས་སྐད་ཆ་ཚིག་གཅིག་ཀྱང་བཤད་པའི་ཤུགས་མེད། ཨ་ཕས་ཤི་གསོན་གང་ཡིན་རུང་ཐོག་མར་སྨན་ཁང་དུ་ཁྱེར་དགོས་པར་ཐགས་བཅད་དེ་སྨན་ཁང་དུ་སོང་བ་ཡིན། སྨན་ཁང་གི་སྒོ་འགྲམ་དུ་སོང་མ་ཐག་སྨན་པ་མང་པོ་ཞིག་གིས་ནད་ལྗི་མོ་འདུག་ཟེར་བཞིན་གཤེགས་བཅོས་ཁང་དུ་ཁྱེར་སོང་། ཡུན་རིང་སོང་རྗེས་སྨན་པ་ཞིག་གིས་ནད་པ་ལ་ཉེན་ཁ་མི་འདུག་པས་ཁྱིམ་བདག་ཚོས་སེམས་བདེ་མོ་བྱོས་ཞེས་གསུངས་བྱུང་པས་ང་ཚོ་ནང་མི་ཚང་མ་དགའ་སྤྲོའི་ངང་མིག་ཆུ་ལྷུང་། སྐབས་དེར་སྨན་པའི་ངོ་གདོང་ལས་རྔུལ་ཆུ་ཁྲོམ་ཁྲོམ་དུ་འཛེར་བ་དང་དཀའ་ཚེགས་ཀྱིས་མནར་བའི་བཞིན་རས་ལས་དགའ་སྤྲོའི་འཛུམ་མདངས་མངོན། དེ་ལས་སྨན་པ་ཚོས་ཀྱང་ན་ཚ་ཡིས་མནར་བའི་ནད་པ་རེ་རེ་རང་ཉིད་ཀྱི་གཉེན་ཉེ་ལྟར་ནད་བཅོས་བྱེད་བཞིན་ཡོད་པ་ཤེས་ཐུབ་ལ་ཡོད་ཚད་ནད་པ་སྐྱོབ་པའི་ཆེད་དུ་ཡིན་པའང་རྟོགས་ཐུབ།
དེ་ནས་བཟུང་བདག་གིས་སྨན་པའི་ལས་ཀ་ནི་ཆེས་རླབས་ཆེ་བ་ཞིག་ཡིན་པ་ཤེས་བྱུང་ལ་ཁོང་ཚོས་ཉིན་བརྒྱ་ཉིན་གཅིག་ལྟར་ནད་པར་ནད་གཡོག་བྱེད་པའི་ལྷག་བསམ་ལ་བརྟེན་ནས་ནད་པ་རེ་རེ་ནད་ཀྱིས་སྡུག་བསྔལ་ལས་གྲོལ་ཞིང་བདེ་ཐང་དང་བདེ་སྐྱིད་བསྐྲུན། སྨན་པའི་ཡོན་ཏན་དང་ནུས་པ། ལྷག་བསམ་སོགས་མཐོང་དུས་ཁོ་ཚོ་ནི་འཇིག་རྟེན་འདིའི་ལྷ་གསོན་པོ་ཞིག་རེད་སྙམ།
དེ་ནས་འགོ་བཙུགས་ཏེ་ཅི་ཡང་མེ་ཤེས་པའི་བུ་ཆུང་ངས་རྗེས་སུ་ང་རང་ཡང་སྨན་པ་བཟང་པོ་ཞིག་བྱེད་དགོས་སྙམ། འཚར་ལོངས་བྱུང་བའི་བརྒྱུད་རིམ་ཁྲོད་རང་ཉིད་ཀྱི་ཕ་ཡུལ་གྱི་སྨན་ཁང་གི་ཆ་རྐྱེན་ཧ་ཅང་ཞན་པ་དང་སྨན་པའི་ལག་རྩལ་སོགས་ཕྱོགས་གང་ཐད་ནས་ཆུ་ཚད་ཧ་ཅང་དམའ་པའི་གནས་ཚུལ་དེ་རྟོགས། དེ་ཕྱོགས་ལ་ང་ཚོ་ན་གཞོན་རྣམས་ཀྱི་ནུས་པ་དང་ཡོན་ཏན་སོགས་དགོས་པས་བདག་གི་རང་ཉིད་ཀྱི་ཕུགས་བསམ་གྱི་ཆེད་དུ་སློབ་སྦྱོང་འབད་བརྩོན་བྱས་ཏེ་ཕུགས་བསམ་དེ་འགྲུབ་དགོས། སློབ་སྦྱོང་ལ་འབད་པ་བརྒྱ་དང་བརྩོན་པ་སྟོང་བྱས་ཏེ་རང་མི་རིགས་ཀྱི་གསོ་བ་རིག་པའི་ཤེས་ཡོན་དག་བྱང་ཆུབ་པ་ཞིག་སྦྱངས་བའི་རྨང་གཞི་སྟེང་སྔོན་ཐོན་མི་རིགས་གཞན་གྱི་སྔོན་ཐོན་གྱི་ལག་རྩལ་དག་སྦྱངས་ཏེ་མ་འོངས་པ་ནི་མི་དམངས་ལ་ཕན་ཐོགས་པའི་སྨན་པ་ཕུལ་དུ་བྱུང་བ་ཞིག་བྱ་དགོས།
