བདག་གི་འཇིག་རྟེན་འདིར་ལྟེ་ཁྲག་འཕོས་པ་ནས་བཟུང་མི་མང་པོ་ཞིག་གིས་བདག་ལ་བྱམས་བརྩེ་འཛུམ་གྱིས་སྐྱོང་མྱོང་ཏེ། དཔེར་ན་ཕ་མས་ང་ལ་གོས་གང་ཡག་དང་གང་འཇམ་གོན་ཏེ་བདག་ལ་ཟ་ལུགས་འགྲོ་ལུགས་བསྡད་ལུགས་བསླབས་མྱོང་ལ། དགེ་རྒན་དམ་པས་དཀའ་བ་མང་པོ་ཁྱད་དུ་གསད་དེ་ང་རང་ཤེས་བྱའི་ཐང་ཆེན་དུ་ཁྲིད་དེ་མདུན་ལམ་བཟང་པོ་ཞིག་རྙེད་པར་སློབ་གསོ་ཡང་ཡང་གནང་མྱོང་། དེ་ཕྱིར་ང་རང་ནི་མེ་ཏོག་ཆུང་ཆུང་ཞིག་ལྟར་མང་པོ་ཞིག་གི་བྱམས་བརྩེ་ཉི་འོད་འོག་རིམ་གྱིས་འཚར་ལོངས་བྱུང་པས་ང་བགྲོད་ཟིན་པའི་རྐང་རྗེས་རེ་རེ་ཁྲོད་ན་བཀའ་དྲིན་གྱི་བཀྲག་མདངས་འཚེར། དེ་བས་ཕ་མ་དང་དགེ་རྒན་ལྟ་བུ་ནི་ནམ་ཡང་ངའི་སེམས་ཁོང་གི་ཉི་མ་དང་ནམ་ཡང་རྩོམ་འབྲིའི་བརྗོད་བྱར་གྱུར་ཡོད། དྲིན་ཆེན་གྱི་མི་སྣ་དེ་དག་ལ་རྗོད་བྱེད་ཚིག་གི་ལམ་ནས་བསྟོད་བསྗགས་རེ་བྱེད་རྒྱུ་ནི་དམན་ཆུང་ངའི་སྤྲོ་བ་ཡིན།
དགེ་རྒནXXXནི་ང་སློབ་ཆུང་སྐབས་ཀྱི་བོད་ཡིག་དགེ་རྒན་ཡིན་ལ་ཁོང་ནི་དགེ་རྒན་དཀྱུས་མ་ཞིག་ཡིན། ཁོང་དགུང་ལོ་ལྔ་བཅུར་སོན་ཡོད་ལ་གཟུགས་རིང་ཞིང་ངོ་མདངས་ཉི་མས་ཚིག་པའི་རྐྱེན་གྱིས་དེ་ཙམ་དཀར་པོ་མེད། དགེ་རྒན་ཁོང་ནི་མི་རིགས་སློབ་གསོའི་ལས་དོན་ལ་བློ་སེམས་དཀར་ཞིང་རང་འཁྲིའི་ལས་འགན་ལ་འབད་པ་བྱེད་མཁན་གྱི་མི་དྲང་བདེན་ཅན་ཞིག་ཡིན། ཁོང་ལ་ན་ཚ་བྱུང་ནའང་འདྲ་ཁྱིམ་ནང་དུ་དོན་ཆེན་གང་འདྲ་ཞིག་ལ་འཕྲད་ནའང་འདྲ་ང་ཚོའི་སློབ་ཁྲིད་ལ་ཐེངས་གཅིག་ལའང་ཆད་མ་མྱོང་།ཁོང་གིས་དུས་རྒྱུན་ཏུ་སློབ་མ་རྣམས་ལ་བཤད་རྒྱུར། ཁྱོད་ཚོ་ནི་མི་རིགས་འདིའི་མ་འོངས་པའི་རེ་བ་ཡིན་པས། ཁྱོད་ཚོས་ངེས་པར་དུ་དཀའ་སྤྱད་འབད་བརྩོན་གྱི་རིག་གནས་ཤེས་བྱ་སྦྱངས་དགོས་ལ་ལྷག་པར་དུ་བོད་སྐད་ཡིག་རྩ་བ་བཟུང་དགོས་པའི་སློབ་གསོ་ཡང་ཡང་བརྒྱབ་མྱོང་།བག་ཆགས་དེ་ལ་བརྟེན་ནས་ང་རང་ཡང་ཆུང་དུས་ནས་བོད་ཡིག་སྦྱངས་རྒྱུར་དགའ་ལ་བོད་སྐད་གཙང་མ་ཞིག་བཤད་པར་རང་ནུས་ཅི་ལྕོག་གིས་འབད་པ་བྱས་པ་ཡིན།
ཐེངས་ཤིག་ལ་བོད་ཡིག་སློབ་ཚན་ཚོགས་པའི་སྐབས་སུ་ང་ལ་ནད་རྙིང་འཕར་ནས་ལྟོ་བ་ན་ཟུག་གིས་བཟོད་དཀའ། དགེ་རྒན་གྱིས་ཚོར་རྗེས་ང་རང་ཁུར་ནས་སྨན་ཁང་དུ་རྒྱུགས་སྨན་ཁང་གི་རྡོ་སྐེས་རེ་རེར་ལས་ཤུགས་ཀྱིས་རྒྱུགས་ཏེ་བྱིས་ལྟ་སྨན་པའི་མདུན་དུ་བསླེབས་ཏེ་དགེ་རྒན་གྱི་དཔྲལ་བ་ནས་རྔུལ་ཆུའི་རྡོག་པ་ཕྲེང་ཐག་ཆད་པ་ལྟར་ལྷུང་བཞིན་འདུག དབུགས་འཚབ་ཏེ་སྐད་ཆའང་བཤད་དཀའ་བའི་གནས་སུ་གྱུར་འདུག དུས་དེར་ངས་རྒན་ལགས་ལ་ཞིབ་ཏུ་ལྟ་དུས་ཁོའི་ངོ་གདོང་གཉེར་མས་ཁེངས་འདུག་ལ་རྫོབ་མཐུག་པའི་སྐྲ་གསེང་ནས་སྐྲ་དཀར་པོས་གཡོག་འདུག དགུང་ལོ་ལྔ་བཅུ་ལ་སོན་པའི་རྒན་ལགས་ལ་མཚོན་ན་ལོ་བཅོ་ལྔར་སོན་པའི་ང་རང་རྡོ་སྐེས་རེ་རེར་ལས་དབུགས་ཐེངས་གཅིག་གིས་འཁུར་ཡོང་རྒྱུ་ནི་ཅི་འདྲའི་ཐང་ཆད་པའི་ལས་ཀ་ཞིག་ཡིན་པ་ཚང་མས་ཤེས་གསལ་རེད།དུས་དེར་བྱམས་བརྩེ་ཡིས་ཁེངས་པའི་རྒན་ལགས་ཀྱི་ཞལ་རས་ནི་དམན་ཆུང་བདག་གི་སེམས་ཁོང་ནས་འཇིག་རྟེན་ན་ཆེས་མཛེས་སྡུག་ལྡན་པ་ཞིག་རེད་ལ་དོན་དེ་བརྒྱུད་ནས་དུས་རྒྱུན་གྱི་འཚོ་བའི་ཁྲོད་ངས་རང་ནུས་ཡོད་ཚད་ཀྱིས་དགེ་རྒན་དང་ཕ་མ་ལ་ཞབས་ཞུ་རེ་བསྒྲུབས་འདོད་པའི་བློ་སྒོ་ཕྱེས།
ཁོང་ནི་ངའི་མི་ཚེ་འདིའི་མིག་དཔེ་ལྟ་ས་ཞིག་ཏུའང་གྱུར་ཡོད།།།།
