ང་རང་ཨ་མའི་མངལ་སྒོ་ལས་ངུ་ངག་གི་དབྱངས་རྟ་དང་པོ་དང་ལྷན་དུ་འཇིག་རྟེན་འདིར་མགྲོན་དུ་བསླེབས་པའི་ཉིན་མོ་ནས་བཟུང། ཁྱེད་ཀྱིས་ང་རང་རང་ཉིད་ཀྱི་སྙིང་གི་བུ་ཕྲུག་བཞིན་ལྷིང་འཇགས་དང་རྫས་འགྱུར་གྱི་ཤན་མ་ཞུགས་པའི་མཁའ་དབུགས་དྭངས་མོ་ཞིག་ཏུ་དུངས་པས་བསྐྱངས།
འཇིག་རྟེན་འདིའི་ཐོག་ཡུལ་ལུང་ཁག་མི་འདྲ་བ་ཚད་ལས་འདས་པ་ཞིག་ཡོད་ལ་ཡུལ་ལྗོངས་ཁག་མི་འདྲ་བ་ཡང་ཤིན་ཏུ་མང་། འདིའི་ནང་ནས་ངའི་ཕ་ཡུལ་ནི་མཛེས་ཞིང་ལྟ་ན་སྡུག་ལ།གསར་དུ་བསྐྲུན་པའི་གྲོང་ཚོ་དང་གྲོང་གསེབ་ཀྱི་རླངས་འཁོར་དང་འཕྲུལ་རྟ། ཞིང་ལས་འཕྲུལ་ཆས། ཆུ་ལོག་གི་ནུས་པ་སོགས་འཕེལ་རྒྱས་འགྲོ་མགྱོགས་པའི་ཡུལ་ཞིག་ཡིན། ང་ཚོའི་ཕ་ཡུལ་ནི་དབུ་ཁྲིད་ཀྱི་མགོ་ཁྲིད་དང་ངལ་རྩོལ་མི་དམངས་ཀྱིས་བརྩོན་པ་ལ་བརྟེན་ནས་ཉིན་རེ་ལས་ཉིན་རེར་ཡར་ངོའི་ཟླ་ལྟར་འཕེལ་རྒྱས་ཆེན་པོ་འགྲོ་དང་འགྲོ་བཞིན་ཡོད།
ངའི་ཕ་ཡུལ་གྱི་ཡུལ་ལྗོངས་བལྟས་ན་མིག་ལ་མཛེས་པ་དང་བསྡད་ན་སེམས་ཁམས་སྐྱིད་པ་སོགས་ཀྱི་ལེགས་ཆ་མང་པོ་ཡོད་པས་ཡུལ་སྐོར་བ་རྣམས་སྤྲོ་འཆམ་དུ་འགྲོ་བའི་དག་པའི་ཞིང་ཁམས་ལྟ་བུའི་གནས་མཆོག་ཅིག་ཡིན། ང་ཚོའི་ཕ་ཡུལ་ལ་སྙན་གྲགས་ཀྱི་བ་དན་ཕྱོགས་བཞིར་གཡོ་བའི་རྩེ་དྲུག་དགོན་དང་སྤུ་ཐོག་དགོན་སོགས་ཡོད་ལ་དད་ལྡན་མང་ཚོགས་ཆོས་ལ་དགའ་ཞིང་བྱང་སེམས་ཆེ།གཞུང་རྒྱུད་དྲང་ཞིང་རྒྱུ་འབྲས་སྲུང་བ་ཤ་སྟག་ཡིན།
སྒྱུ་རྩལ་གྱི་རྣམ་པར་ཕྱུག་པའི་རལ་པ་སོགས་ནི་ང་ཚོའི་ཕ་ཡུལ་ལ་ཡོད་པའི་མཛེས་སྡུག་ཡིད་དུ་འོང་བའི་རྒྱན་ཆ་ལྟ་བུ་ཞིག་རེད།ཕ་ཡུལ་གྱི་རྩྭ་ཐང་ དུ་རྟ་ནོར་ལུག་གསུམ་ནམ་མཁའི་སྐར་ཚོགས་ས་ལ་འཕོས་པ་ལྟར་བཀྲམས་ཡོད། རྩྭ་ཐང་དུ་ཡོད་པའི་དབྱར་རྩྭ་དགུན་འབུ་ནི་ང་ཚོའི་ཕ་ཡུལ་ལ་ཡོད་པའི་ནོར་བུ་རྩ་ཆེ་ཤོས་དེ་ཡིན།ང་ཚོའི་ཕ་ཡུལ་གྱི་དབྱར་རྩྭ་དགུན་འབུ་ལ་ཐུན་མོང་མ་ཡིན་པའི་ཁྱད་ཆོས་མང་པོ་ཞིག་ཡོད་པས་རིན་གོང་ཧ་ཅང་མཐོ།
ཕ་ཡུལ་ཡ་ཕ་ཡུལ། ཁྱེད་ཀྱིས་ང་ལ་རྫོགས་མཐའ་མེད་པའི་བདེ་སྐྱིད་དང་བརྗེད་པར་དཀའ་བའི་བག་ཆགས་ཟབ་མོ་ཞིག་དང་ང་ལ་མཛེས་སྡུག་ལྡན་པའི་འཚར་ལོངས་ཁྲོད་ཀྱི་ཁོར་ཡུག་ཞིག་སྦྱིན་བྱུང་བས།ང་རང་ནར་སོན་རྗེས་ཁྱེད་ལ་བདེ་སྐྱིད་ལྷ་དང་མཉམ་པ་དང་འབྱོར་ཕྱུག་ཀླུ་ལ་ཅོ་འདྲི་བའི་ཡུལ་ཞིག་ཏུ་འཛུགས་སྐྲུན་བྱ་རྒྱུའི་དམ་བཅའ་རྡོ་བརྐོས་རི་མོ་ནང་བཞིན་ཡིད་ཀྱི་མེ་ལོང་ངོས་ལ་བརྟན་པོར་བཅངས་ཡོད།
གལ་ཏེ་ང་རང་སྙན་ངག་མཁན་ཞིག་ཡིན་ན་ངའི་ཁྱེད་ལ་བསྟོད་པའི་སྙན་ཚིག་ཁྲི་མ་འབུམ་འབྲི་སྲིད། གལ་ཏེ་ང་རང་རི་མོ་མཁན་ཞིག་ཡིན་ན་ཕ་ཡུལ་གྱི་ཐུན་མོང་མ་ཡིན་པའི་ཁྱད་ཆོས་དག་ཚོན་མདོག་སྣ་ལྔའི་རི་མོའི་ལམ་ནས་སྐྱེ་འགྲོ་དག་གི་མིག་ལམ་དུ་ངོམས་སྲིད།
