ང་ཡི་ཕ་ཡུལ་ནི་སྐད་གྲགས་ཕྱོགས་བཞིར་ཁྱབ་པའི་དབྱར་རྩྭ་དགུན་འབུའི་ཕ་ཡུལ་ཁྱུང་པོ་སྟེང་ཆེན་ཡིན།སྟོད་གངས་རི་དང་རྫ་རི། བར་བྲག་རི་དང་སྤང་རི། སྨད་ནགས་རི་དང་སྨན་རྩྭས་ཁེངས་ཤིང་རྫ་ཆུ་བསིལ་མ་ལྷུང་ལྷུང་དུ་འབབ་པ་དང། མཚོ་དང་མཚེའུ་ཡིས་བརྒྱན་ཞིང་སྨན་རྩས་དྲི་བསུང་གང་སར་ཁྱབ་པའི་གདོད་མའི་རང་བཞིན་ལྷུན་གྱིས་གྲུབ་པའི་གནས་ཡུལ་ལྟ་ན་སྡུག་པ་ཞིག་ཡིན། དཔྱིད་ཀྱི་དཔལ་མོ་ཤར་དུས་གཙང་པོ་དག་གིས་ཆབ་རོམ་གྱི་མལ་གོས་ཕུད་ནས་ཤག་ཤག་ཏུ་རང་རང་འགྲོ་འདོད་གྱི་གནས་འདིར་བཞུད། རྩྭ་དང་རྩི་ཤིང་དག་གིས་ས་ཤུན་བརྟོལ་ནས་ཐོན་པ་ལྗང་ནེམ་ནེམ་དུ་མཆིས། སྲོག་ཆགས་འབུ་སྲིན་དག་ཀྱང་རིམ་བཞིན་ཇེ་མང་དུ་སོང་ཡོད། ཡོད་ཚད་འགུལ་སྐྱོད་ཀྱི་མགོ་བརྩམས་ཡོད་པ་སྟེ།སོ་ནམ་པ་རྣམས་ཀྱང་སྒྱིད་ལུག་གི་གཉིད་ལས་སངས་ཏེ་ཞིང་ནང་དུ་ལུད་འཇོག་པ་དང་ཆུ་གཏོང་བ་ས་བོན་འདེབས་པ་སོགས་ཀྱི་ལས་ལ་འབད་ཅིང་ངོ་གདོང་ལས་སྟོན་དུས་འབྲས་བཟང་སྨིན་པར་རེ་བ་སྟོང་གིས་ཁེངས་པའི་སྙན་པའི་གླུ་ཆུང་གང་སར་ཁྱབ།
དབྱར་དུས་སུ་བདག་གི་ཕ་ཡུལ་གྱི་རྣམ་པ་ནི་ལྷ་ཡུལ་ས་རུ་འཕོས་པ་ལྟར་མཛེས་ཤིང་ལྟ་ན་སྡུག་པ་ཞིག་ཡོད། ནམ་མཁར་སྤྲིན་པས་མཆོད་རྟེན་གྱིས་བང་རིམ་བརྩེགས། མཚོ་འགྲམ་གྱི་ཕྱུགས་རིགས་དཀར་ནག་ཁྱུ་དང་ཁྱུ་ཡིས་རྩྭ་གསར་གྱི་མྱུ་ངུ་ལོངས་སུ་སྤྱོད་བཞིན་མཆིས།དེ་དག་ནི་ས་གདན་ལྗང་ཁུ་ཞིག་གི་སྟེང་དུ་མུ་ཏིག་ནག་པོ་བཀྲམ་པ་ལྟར་སྣང་། ལྗང་ཐིང་ངེར་གྱུར་པའི་སྤང་ལྗོངས་ཀྱི་སྟེང་དུ་མེ་ཏོག་ཁྲ་ལེམ་མེར་བཞད་པའི་དྲི་བསུང་གང་སར་འཐུལ།
སྟོན་དུས་སུ་རྩྭ་རྩི་ཤིང་ཐམས་ཅད་སེར་པོ་གྱུར་བ་དང་སྡོང་ལོ་ས་ལ་ཐོར་ཏེ་གང་སར་ཁྱབ། ས་གཞི་ཆེན་མོར་གསེར་མདོག་གི་ན་བཟའ་བཀླུབས་པ་ལྟར་མིག་དབང་འཕྲོག་པ་ཞིག་ཡིན།དགུན་ཁ་སླེབས་སྐབས་གཙང་ཆུ་སྔོན་མས་ཆབ་རོམ་གྱིས་མལ་གོས་གྱོན་ཏེ་ཉ་དང་ཉའུ་དག་དྲོ་སྐྱིད་ཀྱིས་རྩེ་དགར་རོལ།
ཨེ་མ། ང་ཡི་ཕ་ཡུལ་ནི་འདི་འདྲའི་མཛེས་ཤིང་ལྟ་ན་སྡུག་ལ་ངོ་མཚར་ཆེ་བ་ལ་ཨང། གལ་ཏེ་ང་རང་གྲེ་འགྱུར་སྙན་པའི་གླུ་མ་ཞིག་ཡིན་ཚེ་སྙན་འཇེབས་ཚིག་གིས་ཕ་ཡུལ་གྱི་མཛེས་ལྗོངས་ལ་བསྟོད་སྲིད། གལ་ཏེ་ང་རང་རི་མོ་མཁན་ཞིག་ཡིན་ཚེ་ཚོན་མདོག་སྣ་ལྔ་སྤྱད་ནས་ཕ་ཡུལ་གྱི་ཡུལ་ལྗོངས་འབྲི་སྲིད། གུས་མོར་ཕ་ཡུལ་འདི་འདྲ་ཞིག་ཡོད་པ་ནི་སེམས་གཏིང་གི་སྤོབས་པ་དང་དགའ་སྤྲོ་ཡིན།
