ཀ་རྩོམ །

ཀྭ་ཡེ་ཉོན་དང་སྙིང་གི་སློབ་གྲོགས་ཚོ།
ཁ་བརྡ་བྱས་ནས་ཉི་མ་མི་གཏོང་བར།།
  ག་ལེར་བརྩོན་པ་བསྐྱེད་དེ་སློབ་སྦྱོང་བྱོས།།
     ང་རྒྱལ་མགོ་འཕང་མ་མཐོ་བསླབ་ལ་བརྩོན།།

ཅ་ཅོ་དོན་མེད་མ་སྒྲོགས་སློབ་གྲོགས་ཚོ།།
    ཆ་ལུགས་མ་བསྒྱུར་བུ་ངའི་རེ་བ་ཡིན།།
    ཇ་དང་འོ་མ་འདྲ་བའི་མཐུན་སྒྲིལ་བྱོས།།
    ཉ་མོ་ཆུ་ལ་འཁྱུག་འདྲའི་ལས་ལ་བརྩོན།།

ཏ་ལན་འདྲ་བའི་རྒྱབ་ཀྱི་དཔེ་ཁུག་ནང་།།
    ཐ་མག་མ་འཇོག་ཀ་ཁའི་དཔེ་ཆ་ཞོག །
    ད་ལྟའི་ན་ཆུང་དུས་སུ་འབད་པ་བྱོས།།
    ན་ནིང་ལྟ་བུའི་རྒྱུགས་འབྲས་ཕྱོགས་ལ་བརྩོན།།

པ་སངས་སྐར་མ་སློབ་གྲོགས་ཁྱེད་ཚོ་འདྲ།།
    ཕ་མའི་ཁ་ལེན་ཚིག་བརྩི་ཡ་རབས་ཡིན།།
    བ་གླང་དུད་འགྲོ་གོ་བ་མེད་པ་སྟེ།།
    མ་རབས་ཕྱོགས་ཀྱི་བྱ་སྤྱོད་ངན་པ་སྤོངས།།

  ཙ་གེ་ཙིག་གེར་མ་ཁོམ་དཔེ་ཆ་ཀློག །
    ཚ་བེ་འཚུབ་བེ་མ་བྱེད་བློ་རྩེ་སྒྲིམས།།
    ཛ་ལང་སྤྱོད་སྟངས་ངན་པ་མེད་ན་བཟང་།།
    ཝ་མོའི་གཡོ་སྒྱུ་དོར་ནས་ཡ་རབས་སློབས།།

ཞ་མོ་ཕུད་ནས་རྒན་ལ་བརྩི་བཀུར་བྱེད།།
    ཟ་མ་བཟའ་དུས་སྔོན་ལ་ལག་པ་བཀྲུས།།
    འ་ཅག་ཚང་མས་འཚོ་བའི་གོམས་སྲོལ་སྐྱོང་།།
    ཡ་རབས་སྒྲིག་སྲོལ་སྣ་ཚོགས་སེམས་ལ་ཟུངས།།

ར་རོར་གྱུར་པའི་སྨྱོན་པ་སློབ་མ་མིན།།
    ལ་རྒྱ་ཆེ་བའི་སྙིང་མཐུན་སློབ་གྲོགས་མིན།།
    ཤ་ཚ་ཆེ་བ་བྱམས་ལྡན་ཕ་མ་ཡིན།།
    ས་སྟེང་འདི་རུ་སློབ་གྲྭ་ལྷ་ཡུལ་འདྲ།

ཧ་ལམ་ཁྱོད་ཚོས་ཚིགས་བཤད་འདི་ཙམ་ལ།།
    ཧ་ཧ་ཧབ་ཆ་མ་བྱེད་སློབ་གྲོགས་ཚོ།།
    ཨ་རོགས་གྲོགས་པོ་རྣམས་ཀྱིས་འཕྱ་ན་ཡང་།།
    ཨ་ནུ་བུ་ངས་ཀ་རྩོམ་བྲིས་ཚར་རོ།།