ཀ་ཕྲེང་མུ་ཏིག་དོ་ཤལ།

ཀ་ཁའི་གདངས་དབྱངས་གྱེར་བའི་སློབ་གླིང་གི་དབུས་ན། །

ཁ་མཚར་སྣ་ཚོགས་འཛོམས་པའི་བློ་གསལ་གྱི་གཞོན་ནུ། །

ག་ལེར་རིག་པའི་གནས་ལ་འབད་པ་རེ་བྱོས་དང་། །

ང་ཚོའི་ཕུགས་འདུན་འགྲུབ་པའི་རེ་བ་དེ་ཡིན་ནོ། །

ཅ་ཅོ་འདུ་འཛི་ཆེ་བའི་རྣམ་གཡེང་གི་ཁྲོད་ནས། །

ཆ་ལུགས་ཀུན་སྤྱོད་བཙོག་པའི་མི་ངན་དང་མ་འགྲོགས། །

ཇ་དཀར་འོ་མཚོ་འཁྱིལ་འདྲའི་ཤེས་རིག་གི་གླིང་ཀར། །

ཉ་མོ་ཆུ་ལ་འཇུག་འདྲའི་བརྩོན་པ་དེ་དོར་ན། །

ཏ་ཀུ་ལག་ལ་ཐོགས་དུས་འགྱོད་པ་རང་སྐྱེས་ཡོང་། །

ཐ་མག་ལ་སོགས་མི་དགེའི་སྤྱོད་ངན་དག་དོར་ནས། །

ད་ལྟ་ཉིད་ནས་རང་གི་ཕུགས་བསམ་དེའི་ཆེད་དུ། །

ན་ཚོད་གཞོན་པའི་དུས་ནས་སློབ་སྦྱོང་ལ་བརྩོན་དགོས། །

པ་ཏྲའི་རི་མོ་ལྟ་བུའི་སློབ་གྲྭ་ཡི་ཚལ་དུ། །

ཕ་མ་ལྟ་བུའི་རྒན་ལ་བརྩི་བཀུར་རང་བྱེད་བཞིན། །

བ་ལང་འདྲ་བའི་སྤྱོད་པ་རྒྱང་རིང་དུ་དོར་ནས། །

མ་དང་རྒན་གྱི་གསུང་ནི་རོལ་དབྱངས་ལྟར་ཉན་དགོས། །

ཙ་མ་ར་ལྟར་གང་སར་འཁྱམས་ལྡོམ་རང་མ་བྱེད། །

ཚ་གྲང་སྡུག་བསྔལ་བསལ་ནས་ལྔ་རིག་ལ་ཞུགས་དང་། །

ཛ་དྲག་ཉ་ཉོག་ཆེ་བའི་དུས་རབས་ཀྱི་ཀློང་ནས། །

ཝ་ལེར་ནད་ཀྱིས་འཁུམ་པའི་གངས་ལྗོངས་འདི་སོས་ཡོང་། །

ཞ་བོ་ལྟ་བུའི་འགུལ་མེད་བྱ་བ་དེ་མི་བཅའ། །

ཟ་ཟིའི་ཁ་ལ་ཉན་ནས་ཕུགས་འདུན་དེ་བོར་ན། །

འ་ཅག་དུས་རབས་འདི་རུ་གསོན་ཐབས་རང་མི་འདུག །

ཡ་རབས་སྤྱོད་པ་ཚང་མ་རང་རྒྱུད་ལ་ལོངས་ཤིག །

ར་ལུག་ལྟར་དུ་འཚོ་བ་འཁྱོལ་ཐབས་རང་མི་བྱེད། །

ལ་ལུང་བརྒལ་བ་ལྟ་བུའི་སློབ་སྦྱོང་ལ་འབད་དགོས། །

ཤ་ཚའི་གཏམ་ལ་ཉན་ནས་བརྩོན་པ་ཞིག་བྱས་ནས། །

ས་ཕྱོགས་འདི་ཡི་རིག་གནས་གོང་འཕེལ་དུ་གཏོང་དགོས། །

ཧ་ཅང་སྙན་རྒྱུ་མེད་པའི་བུ་ཆུང་གི་རྩོམ་འདི། །

ཨ་མཚར་མ་ཡིན་ང་ཡི་སེམས་ཁོང་གི་སྙིང་གཏམ། །

ཨ་རོག་རྩོམ་འདི་ཀློག་པའི་མི་བུ་རེ་བྱུང་ན། །

ཧ་ཧ་དགོད་སྒྲའི་འཕྱ་སྨོད་མ་བྱེད་རང་མཁྱེན་མཁྱེན། །