མཐའ་མི་མངོན་པའི་ཨ་སྔོན་དང་གཡུ་ལྗང་ལྟ་བུའི་མཛེས་སྡུག་གི་རྩྭ་ཐང་དུ། བརྗིད་ཆགས་དང་བག་ཕེབས་ཀྱིས་གནས་པའི་མཐིང་སྨུག་སྦྲ་ནག་ནི་སྤྲོ་སྣང་ལྡན་པའི་རང་ཁྱིམ་དྲོན་མོ་ཞིག་དང་། དྲོད་ཁོལ་གྱིས་ཕྱུག་པའི་ཁྱིམ་གཞི་དྲོན་མོ་ལགས། ངས་མི་ཡུལ་དུ་ངུ་སྐད་ཀྱི་དབྱངས་རྟ་ཐོག་མར་བསྒྲགས་པ་ནས་བཟུང་། ང་ནི་ཁྱེད་ཀྱི་རུམ་ཁོང་ནས་རིམ་བཞིན་འཚར་ལོངས་བྱུང་བ་ཡིན།
བདག་ཆུང་དུས་འབའ་འབའ་ལུ་གུ་དང་ལྷན་དུ་རྩེད་འཇོར་རོལ་ནས་ན་སོ་རྒྱས་པ་ཡིན། ང་ནི་དེ་ལྟར་ཁྱེད་ཀྱི་པང་ནས་འཚར་ལོངས་བྱུང་བས། ང་ནི་ཆུང་དུས་ནས་དྲིན་ཆེན་ཨ་མ་དང་ལྷན་དུ། འུར་ཆ་ཆུ་མིག་དགུ་སྒྲིལ་ཅན་དེ་ལག་ཏུ་བཟུང་ནས་ནོར་གནག་གི་རྨིག་རྗེས་འབྲངས་མྱོང་བའི་འབྲོག་ཕྲུག་ཅིག་ཡིན།
གྲང་ལྷགས་ཀྱི་དགུན་ཟླ་སླེབས་དུས། མེ་ལྕེ་འུར་འུར་འབར་བའི་བརྗིད་ལྡན་སྦྲ་ནག་གི་ཐབ་ཀའི་འགྲམ་དུ་དྲིན་ཆེན་ཕ་ལོས་ལག་ལ་ཕྲེང་བ་ཞིག་དང་འཁོར་ལོ་ཞིག་བཟུང་ནས་ཡོད་ལ།དགོང་མོར་ཨ་སྔོན་དབྱིངས་སུ་སྐར་ཚོགས་རྣམ་པར་བཀྲ་བའི་དུས་སུ་ཁྱོད་ཀྱི་རུམ་ཁོང་ནས་ཨ་མས་འབྲི་མོ་བཞོ་བའི་སྒྲ་དབྱངས་ཐོས་ཐུབ།
ད་ལྟ་ང་རང་ཕ་མ་དང་སྦྲ་ནག་སོགས་ལ་ཁ་གྱེས་ནས་གྲོང་ཁྱེར་དུ་སློབ་གྲྭ་འགྲིམས་ཡོད་ཀྱང་། ཕ་ཡུལ་དེ་དང་མུ་མཐའ་མེད་པའི་རྩྭ་ཐང་། དྲོད་ཁོལ་ལྡན་པའི་སྦྲ་ནག ང་ལ་དཔྲལ་བའི་མིག་ལྟར་གཅེས་པའི་བྱམས་ལྡན་ཕ་མ་ནི་དྲན་ཚེ། རང་དབང་མེད་པར་མིག་ཆུ་ལྷུང་ཡོང་།
གངས་ཕྲུག་གཞོན་ནུ་མང་པོའི་སྙིང་སྟོབས་ཀྱི་གསོན་མིང་ཁུར་བའི་སྦྲ་ནག་ལགས། ནོར་ནག་གི་རྩིད་པའི་ཉག་མ་རེ་རེ་ལས་རེ་ལྡེ་རུ་འཐག་སྟེ་གྲུབ་པའི་ཁྱེད་ནི་རང་བྱུང་གཞལ་ཡས་ཁང་དུ་སེམས་ཀྱིན་ཡོད་ལ། འཇིག་རྟེན་འདིའི་བུ་ཕྲུག་བགྲང་མེད་ཅིག་ཁྱེད་ཀྱི་རུམ་ཁ་ནས་ཆས་ཏེ་ས་ཆ་གང་སར་འགྲིམ་བཞིན་ཡོད་པས། ཁྱོད་ནི་མཐོ་སྒང་གི་དཔའ་རྒོད་ཁེར་སྐྱེས་དེ་ཡིན། ཁ་བ་བུ་ཡུག་ལ་འཇིགས་སྐྲང་མེད་པའི་སྦྲ་ནག་ལགས། གནའ་བོའི་ལོ་རྒྱུས་དེབ་ཐེར་དུ་ཁྱེད་ཀྱི་རུམ་ཁོང་ནས་མཆེད་པའི་རིག་གནས་ཀྱི་འོད་སྣང་རུམ་ཡོད། སྦྲ་ནག་ཁྱེད་ནམ་ཡང་ཉམས་པ་མེད་པར་སྨོན།
