ངའི་ཨ་ཕའི་མིང་ལ་ཚེ་དབང་རྒྱལ་ཟེར་ཞིང་། ཕོ་ལོ47སོན་ཡོད་ལ། ཁོའི་གཟུགས་པོ་ཅུང་རིང་རྒྱུ་མེད་ལ་ལུས་ཀྱི་བོངས་ཚད་ཀྱང་དེ་འདྲའི་ཆེ་རྒྱུ་མེད། དཀར་ཞིང་ཟླུམ་པའི་གདོང་གི་གཉེར་མ་དང་། ཁ་རུ་བྱ་རྒྱལ་རྒོད་པོའི་གཤོག་པ་བརྐྱངས་པ་ལྟ་བུའི་ཁ་སྤུ། མགོར་སྐྲ་རྐང་དཀར་པོ་འགའ་སྐྱེས་ཡོད། ད་དུང་གནག་ཅིང་སྣུམ་པའི་སྨིན་མའི་འོག་གི་ཉམ་ཆུང་གི་མིག་ཟུང་དང་གདོང་གི་འཛུམ་མདངས་དག་ལས། ཁོའི་ཞི་འཇམ་དང་རང་གཤིས་མཚོན་ཐུབ།
ཁོས་མི་ལོ་འདི་དག་གི་རིང་ལ་མ་རྩ་མང་པོ་མེད་པའི་ཟ་ཁང་ཆུང་ཆུང་ཞིག་དཀའ་སྤྱད་སྡུག་རུས་ཀྱིས་གཉེར་བཞིན་ཡོད་ཀྱང་། ཡོང་སྒོ་དེ་འདྲ་མི་བཟང་བས་ཁོར་རླངས་འཁོར་མེད་ལ་ཁང་བ་བཟང་པོ་ཞིག་ཀྱང་མེད། ཨ་མས་ཀྱང་ཁོ་ལ་བུ་མོ་གསུམ་མ་གཏོགས་བུ་ཞིག་སྐྱེས་མ་ཐུབ་རུང་། ཁོས་ཨ་མར་འཁང་ར་དང་ལེ་བདའ་ཅི་ཡང་མི་བྱེད་པར་མ་ཟད། ཆོག་ཤེས་དང་ཡིད་ཆེས་ཆེན་པོས་རང་གི་བུ་མོ་ཚོ་ལ་རིག་གནས་དང་ཡོན་ཏན་སྦྱང་དགོས་པའི་བསླབ་བྱ་མང་པོ་གནང་། ད་དུང་ཁོས་ང་རང་ནངས་སྔ་ལངས་དང་དགུང་འཕྱི་ཉལ་བྱས་ནས་སློབ་གྲྭར་ཡར་སྐྱེལ་མར་ལེན་བྱེད་བཞིན་ཡོད་པ་དང་། ལས་བྱ་འབྲི་རོགས་བྱེད་ཀྱིན་ཡོད། ཁོས་ཁྱིམ་གྱི་ལས་ཀ་ལས་སློབ་མའི་ལས་བྱ་གཙོ་བོར་འཛིན་པ་དང་། ཁྱིམ་ཚང་གི་དོན་དག་ཙག་ཙིག་ལས་བྱིས་པའི་སློབ་གསོ་གཙོ་བོར་འཛིན་པའི་ཨ་ཕ་བཟང་པོ་ཞིག་ཀྱང་ཡིན་པར་མ་ཟད། དཀའ་སྤྱད་སྡུག་རུས་བྱས་ནས་གསོག་ཡོང་བའི་དངུལ་ཀྱང་སློབ་ཆེན་ལ་འགྲོ་བཞིན་པའི་ཨ་ཅེ་ཆེ་བ་དང་། མཐོ་འབྲིང་འདོན་བཞིན་པའི་ཨ་ཅེ་གཉིས་པ་དང་ངེད་ཚོ་གསུམ་པོའི་སློབ་གསོའི་ཕྱོགས་ལ་བཀོལ་སྤྱོད་བྱེད་བཞིན་ཡོད་པས། དེར་བརྟེན་ཨ་ཕ་ནི་ང་ཚོའི་མ་འོངས་རེ་བཞག་གི་མཚོ་མོ་འཁྱིལ་སའི་གཡང་ཁང་གྲུ་བཞི་འདིའི་བླ་སྲོག་ཡིན་པ་སུས་ཀྱང་སྨྲས་མ་དགོས་པ་རེད།
ཨ་ཕ་ལགས། བཀའ་དྲིན་ཆེ། ཁྱོད་ནི་ངེད་སྤུན་གསུམ་གྱིས་ནམ་ཡང་བརྗོད་མི་ཚར་བའི་གཏམ་རྒྱུད་དེ་ཡིན་ལ། ང་ལ་ཡིད་ཆེས་དང་སྤོབས་པ་གནང་བའི་བྱམས་ལྡན་གྱི་ཕ་ལོ་ཁྱེད་ཀྱི་བདེ་སྐྱིད་ཀྱི་ཉི་མ་ནམ་ཡང་མི་ནུབ་པར་ཤོག་ཅེས་ཡང་ཡང་གསོལ་བ་འདེབས་བཞིན་ཡོད་དོ།།
མཛུབ་ཁྲིད་དགེ་རྒན། ཕག་མོ་སྒྲོལ་མ།
