ངའི་ཕ་ཡུལ་ནི་སྟེང་སོ་ཡུལ་ཚོ་སྟེ་རོང་མ་འབྲོག་གི་ས་ཆ་ཞིག་ཡིན་པས། སྔོན་ཆད་དབྱར་ཟླ་དྲུག་པའི་ནང་སྡེ་བ་མང་པོ་དབྱར་སྟོན་ལ་བུད་ནས་རྟ་རྒྱུགས་འགྲན་ཚོགས་གཟབ་རྒྱས་ངང་འཚོགས་ཀྱི་ཡོད་ཟེར། ཡིན་ནའང་ངས་ཤེས་པ་ནས་བཟུང་རྟ་རྒྱུགས་འགྲན་ཚོགས་ཟེར་བ་ཞིག་འཚོགས་རྒྱུ་མེད་ལ། ཁྱིམ་ཚང་རེ་རེར་རྟ་ཟེར་བ་ཞིག་ཀྱང་མཐོང་རྒྱུ་མེད།
ཡིན་ནའང་། ད་ལོ་དབྱར་གནང་གི་སྐབས་སུ་གཅན་ཚ་ཐང་ཞང་གི་རྟ་རྒྱུགས་འགྲན་ཚོགས་བསྡུ་བཞིན་པ་གོ་ནས། བལྟ་འདོད་ཀྱི་རེ་བ་ཆེན་པོ་བཅངས་ཏེ་ཨ་ཕ་ལ་རེ་བ་ཞུས་པ་དོན་ཐོག་ཏུ་སྨིན་ནས་ཨ་ཕ་དང་མཉམ་དུ་རྟ་རྒྱུགས་འགྲན་ཚོགས་ལ་བལྟ་རུ་སོང་།
ཐེངས་འདིའི་རྟ་རྒྱུགས་འགྲན་ཚོགས་ཀྱི་ཚོགས་ཡུལ་ནི་ཡངས་ཤིང་ཁོད་སྙོམ་པའི་རྩྭ་ཐང་ཆེན་མོ་སྟེ་གཅན་ཚ་ཐང་ཡུལ་ཚོ་ཡིན། རྩྭ་ཐང་གི་ནམ་མཁའ་ནི་ས་ཆ་གཞན་གྱི་ནམ་མཁའ་ལས་མཛེས་པ་སྟེ། སྔོ་སང་སང་གི་ནམ་མཁའ་རུ་ཤིང་བལ་བསེད་མ་དང་འདྲ་བའི་སྤྲིན་དཀར་ཕང་ཕུང་ལྡིང་བ་དང་། རྩྭ་ཐང་གི་ཕྱོགས་བཞིར་མཐོ་དམའ་མི་སྙོམ་པའི་རི་བོས་བསྐོར་ཞིང་ག་ས་གང་དུ་མེ་ཏོག་སྣ་ཚོགས་ཁྲ་ལམ་མེར་བཞད་ཡོད། མཁའ་དབུགས་ཀྱང་དེ་འདྲའི་གཙང་ཞིང་གཙང་མ་ཞིག་ཡིན་པས་རྟ་རྒྱུགས་འགྲན་ཚོགས་ནི་ཆེད་དུ་མཛེས་ཤིང་ལྟ་ན་སྡུག་པའི་ས་ཆ་འདི་རུ་འཚོགས་པ་རེད། ཐེངས་འདིའི་འགྲན་ཚོགས་ལ་གོ་རིམ་ལྡན་ཞིང་ཞིབ་ཚགས་ཆེ་བ་ཡིན། འགྲན་སྡུར་གྱི་རྣམ་གྲངས་མང་ཞིང་ཡུལ་ཕྱོགས་སོ་སོ་ནས་ཐོན་པའི་རྟ་པ་ཡང་མང་རབས་བཤད། ཉིན་དེར་རྫོང་གི་མགོ་ཁྲིད་དང་སྐུ་མགྲོན་རྣམས་ཀྱིས་གནས་དེའི་དབྱར་ཁའི་མཛེས་ལྗོངས་མཐོང་ནས། ཨ་ལ་ལ། ས་ཆ་འདི་ཅི་འདྲའི་སྐྱིད་པ་ལའང་ཞེས་མཐོང་བ་ཀུན་སྨོན་གྱི་ཚིག་ངག་ལས་ཤོར་བཞིན་ཡོད། ཉིན་དེར་ད་དུང་ཚོང་བ་དང་ལྟད་མོ་བ་མང་པོ་སྟོན་སྤྲིན་གྱི་འདུ་འགོད་བཞིན་མ་བོས་ངང་གིས་ཕྱོགས་བཞི་མཚམས་བརྒྱད་ནས་འདུས་ཡོང་ཡོད།
རྟ་རྒྱུགས་འགྲན་སྡུར་གྱི་མགོ་མ་བརྩམས་སྔོན་ལ་མགོ་ཁྲིད་རྣམས་ཀྱིས་གཏམ་བཤད་དང་ཤིས་ཚིག་མང་པོ་ཕུལ་རྗེས། ཅང་མ་འགོར་བར་རྟ་རྒྱུགས་ཀྱི་མགོ་བརྩམས་བྱུང་། རྟ་རྒྱུགས་ར་བ་ནི་སྒོར་མོའི་དབྱིབས་ལྕགས་ར་འཐེན་ཡོད་པ་ཞིག་ཡིན་ལ་བསྐོར་བ་བྱས་ནས་རྒྱུག་གི་ཡོད། ང་ལ་མཚོན་ན་རྟ་པ་སུ་ཞིག་གིས་རྒྱལ་ཁ་བླངས་ཀྱང་ཕྱོགས་རིས་མེད། ཛ་དྲག་ཆེ་བའི་འགྲན་སྡུར་གྱིས་ངའི་ཡིད་སེམས་དབང་མེད་དུ་དྲངས་ནས་ཀི་འདེབས་པ་དང་ཐེབ་མོ་རྡེབ་སྟེ་རང་དབང་མེད་པར་དགའ་བསུ་བྱས།
བྱ་དགའ་ཡང་རབ་དང་རིམ་པ་མང་པོ་བཀོད་སྒྲིག་བྱས་ཡོད་དེ། ཐེངས་འདིའི་འགྲན་ཚོགས་ལ་ཨང་དང་པོ་གཅིག་དང་། ཨང་གཉིས་པ་གཉིས། ཨང་གསུམ་པ་གསུམ་བཅས་རིམ་པ་ལྟར་དགར་ཡོད། བྱ་དགའི་ལེགས་སྐྱེས་ཀྱང་ཨང་རིམ་ལྟར་གྱ་ནོམ་པ་བྱིན་ནས་རྟ་རྒྱུགས་འགྲན་ཚོགས་མཇུག་རྫོགས་སོང་། དེ་ནས་ཨ་ཕ་དང་ངེད་གཉིས་ཁ་འབྲལ་ཕོད་ལ་མི་ཕོད་པའི་ངང་ཕྱིར་རྫོང་ཐོག་ལ་ལོག་ཡོང་།
ལམ་བར་དུ་ངས་ཨ་ཕ་ལ་ཕ་ཡུལ་སྟེང་སོ་ན་རྟ་རྒྱུགས་འགྲན་ཚོགས་མེད་པ་དེ་ཅི་ཞིག་རེད་ཅེས་དྲིས་པ་ན། ཨ་ཕས་ང་ལ་ཕ་ཡུལ་གྱི་སྡེ་བ་འགའ་ད་ལྟ་གནས་སྤོར་ས་ཆར་བུད་སོང་བས་སྔོན་གྱི་ལུགས་སྲོལ་མང་པོ་མ་ཉམས་རང་ཉམས་སུ་བུད་སོང་ཟེར། ངའི་སེམས་སུ་འགྲན་ཚོགས་འདི་འདྲ་ཡོད་ན་ཉིན་འགའི་རིང་ལ་མང་ཚོགས་ཀྱིས་ཡོང་སྒོ་ཡང་མང་པོ་བཙལ་ཐུབ་པ་དང་། རྒན་པ་དང་བྱིས་པ་རྣམས་ཀྱིས་ཀྱང་སྔོན་ལྟར་སྲོལ་རྒྱུན་གྱི་རྟ་རྒྱུགས་འགྲན་ཚོགས་ལ་ལྟ་ཐུབ་པར་སྙམ་མོ། །
མཛུབ་སྟོན་དགེ་རྒན། ལྷ་རྩེ་རྒྱལ།
