ངའི་ཨ་ཅེ་མིང་ལ་ཕག་མོ་གཡང་འཛོམས་ཟེར་ཞིང་། མོ་ད་ལོར་ལོ་བཅོ་བརྒྱད་ཡིན། དཀར་ཞིང་དམར་མདངས་རྒྱས་པའི་ངོ་གདོང་དང་། བྱ་རྒོད་པོའི་གཤོག་པ་བརྐྱངས་པ་ལྟ་བུའི་སྨིན་མའི་འོག་ཏུ་ཆེ་ལ་ནག་པའི་ཁྲ་ཆུང་མིག་གཉིས་ཁྲ་རིག་རིག་བྱེད་ཅིང་། དུང་ལྟར་དཀར་བའི་སོ་ཕྲེང་མངོན་པའི་འཛུམ་མདངས་དང་། མདའ་ལྟར་དྲང་བའི་གཟུགས་གཞི་བཅས་ལྡན་པའི་ཧ་ཅང་མཛེས་མ་ཞིག་ཀྱང་ཡིན།
ད་ལྟ་མོ་ནི་ནུབ་བྱང་མི་རིགས་སློབ་ཆེན་ན་སློབ་སྦྱོང་བྱེད་བཞིན་ཡོད་ལ། སློབ་སྦྱོང་བྱེད་པར་ཧ་ཅང་དགའ་བས་མོ་ལ་ད་བར་དུ་བྱ་དགའ་ཡང་མང་པོ་འཐོབ་མྱོང་བ་དང་། ཕ་མ་དང་གཉེན་ཉེ་དག་གིས་ཀྱང་ནམ་ཡང་མོ་ལ་བསྟོད་པ་བྱེད་པས། ངས་ཀྱང་རྒྱུན་དུ་མོའི་སྙིང་སྟོབས་དང་སྡུག་རུས་ལ་མིག་དཔེར་བལྟས་ནས་སློབ་སྦྱོང་བྱས་པ་ཡིན།
དབྱར་གནང་དང་དགུན་གནང་གི་སྐབས་སུ་མོས་ང་ལ་བྱམས་བརྩེ་ལྡན་པའི་སྒོ་ནས་ཟུར་ཁྲིད་གང་ལེགས་བྱེད་པ་དང་། ད་དུང་ཉིན་རེ་བཞིན་འཆར་གཞི་ཡོད་པའི་སྒོ་ནས་དབྱར་གནང་དང་དགུན་གནང་སྐབས་ཀྱི་ལས་བྱ་རྣམས་ཡོངས་འགྲུབ་བྱེད་དུ་འཇུག་པ་ཡིན་ལ། ཁོམ་སྐབས་ཡོད་དུས་ང་ལ་གཏམ་རྒྱུད་དང་གནའ་གཏམ་ཉན་འདོད་པ་དག་ཀྱང་ཐེངས་མང་པོར་བཤད་མྱོང་བ་ཡིན།
དེ་བས་ད་ལྟ་སློབ་གྲྭ་འཚོགས་པའི་དུས་འདིར། མོ་རྒྱང་རིང་གི་ལན་ཀྲིག་གྲོང་ཁྱེར་དུ་ཕྱིན་ཡང་ངའི་ནམ་ཡང་ངེད་གཉིས་མཉམ་དུ་ཡོད་དུས་ཀྱི་མོའི་རྣམ་འགྱུར་དང་བྱ་སྤྱོད་སོགས་མིག་ལམ་དུ་ཡང་ཡང་ཤར་ཡོང་བ་རེད། ཨ་ཅེ་ལགས། ནུ་མོ་ངའི་ནམ་ཡང་ཁྱེད་རང་དྲན་གྱིན་ཡོད་ཡ།
མཛུབ་ཁྲིད་དགེ་རྒན། པདྨ་རྡོ་རྗེ།
