ལྷ་མོ་འཚོ། དམའ་གཉིས་འཛིན་དགུ།
བཟའ་མི་ཚོའི་བྱམས་བརྩེའི་ཉི་འོད་དང་དགའ་སྤྲོའི་དགོད་སྒྲའི་ཁྲོད་ནས་ཐེངས་འདིའི་དབྱར་གནང་ནི་དགའ་འགའ་སྤྲོ་སྤྲོའི་ངང་ནས་ཅི་ཡིན་འདི་ཡིན་མེད་པར་ཚར་སོང་། དྲན་པའི་གཞུ་མོ་ནང་ལ་བཀུག་ནས་ཕྱིར་འདང་ཞིག་བརྒྱབ་ན་འགའ་རེ་དྲན་ལ་འགའ་རེ་མི་དྲན་མོད། དེ་དག་ལས་ངའི་དྲན་འཛིན་གྱི་མེ་ལོང་ངོས་ན་གསལ་ལེར་སྣང་ཞིང་ཆེས་དོན་སྙིང་ལྡན་པ་ནི་ངས་ཨ་ཕའི་ཚབ་བྱས་ཏེ་སྡེ་གཞུང་གི་ལས་ཀར་ཞུགས་པ་དེ་ཡིན།
ནམ་རྒྱུན་ང་རང་སློབ་གྲྭ་ན་ཡོད་དུས་ཨ་ཕས་རང་ཁྱིམ་གྱི་ལས་ཀ་དང་སྡེ་གཞུང་གི་ལས་ཀ་ཚང་མ་ལས་དགོས་པས་ཁོས་དཀའ་ལས་ཆེན་པོ་མྱོང་བཞིན་ཡོད། སྤྱིར་ཐེངས་འདིའི་དབྱར་གནང་གི་སྐབས་སུ་ཕ་མའི་ཚབ་བྱས་ཏེ་སྡེ་གཞུང་གི་ལས་ཀར་ཞུགས་པའི་སློབ་མ་མང་མོད། ལ་ལ་མཚམས་རེར་ཡོང་ལ་མཚམས་རེར་མི་ཡོང་མོད། ངས་དཀའ་བ་སྤོབས་པས་བཏེགས་ཏེ་སྡེ་གཞུང་གི་ལས་ཀ་མཇུག་བསྡུ་བའི་བར་དུ་རྒྱུན་འཁྱོངས་བྱས་པས་ཕ་མས་ང་ཚོའི་ཆེད་དུ་དཀའ་ངལ་ཅི་ཙམ་མྱོང་བཞིན་པ་གཞི་ནས་རྟོགས་བྱུང་ལ། ཕ་མ་གཉིས་ཀྱིས་ང་ཚོའི་ཆེད་དུ་རང་གི་ཡོད་ཚད་དོར་ནས་དཀའ་ལས་མྱོང་བཞིན་པ་དེར་ཞིབ་ཏུ་བསམ་ན་ཅི་འདྲའི་སེམས་སྐྱོ་ཞིང་ཡིད་འགུལ་ཐེབས་པ་ཞིག་རེད་ཨང་།
ང་ཚོ་ནི་ཕ་མའི་གཟི་བརྗིད་དང་ཕ་ཡུལ་གྱི་འབྱུང་འགྱུར་བསུ་བའི་སྐྱ་རེངས། མི་རིགས་འདིའི་སང་ཉིན་གྱི་རེ་བའི་འོད་སྣང་ཡིན་པས། ངས་སྟོབས་ཤུགས་ཡོད་དགུ་རྩལ་དུ་སྤྲུགས་ནས་སློབ་སྦྱོང་ལ་བརྩོན་པ་ཆུ་བོའི་རྒྱུན་བཞིན་བྱས་ཏེ། མ་འོངས་པར་རང་གི་དྲིན་ཆེན་ཕ་མར་བདེ་སྐྱིད་ཀྱི་འཚོ་བ་རོལ་དུ་འཇུག་པའི་དམ་བཅའ་སྙིང་ལ་བཀོད་ཡོད་དོ། །
ཤ་མོས་བཟོས་པའི་ཟས་མཆོག
སྒྲོལ་མ་སྐྱིད། དམའ་གསུམ་འཛིན་གཉིས།
དབྱར་གནང་གི་ཉིན་ཞིག་ལ་ང་དང་རྩེད་གྲོགས་འགའ་ཤ་མོ་འཐུ་རུ་སོང་།
རྒྱབ་རིའི་ངོས་ན་ཤ་མོ་ཡོད་ཅེས་སྡེ་བའི་ཨ་ཁུ་དང་ཨ་ནེ་ཚོའི་ངག་ནས་གོ་མྱོང་བས་སླེའུ་རེ་འཁུར་ནས་རི་འདབས་སྙེག་ནས་སོང་བ་ཡིན། རི་འདབས་དང་རི་སྐེད་དུ་ཤ་མོ་ནི་འཇིག་རྟེན་བྱེད་པོ་གཉིད་ཅོར་རྒྱག་ཞོར་དུ་འཆར་གཞི་མེད་པར་གང་སར་གཏོར་བ་དང་འདྲ་སྟེ། ལ་ལ་ཞིག་གྲོགས་མེད་ཁེར་རྐྱང་དུ་རྩྭ་ལྗང་གི་གསེབ་ཏུ་ཡིབ་འདུག་པ་དང་། ལ་ལ་ནི་སྐོར་དང་སྐོར་བྱས་ཏེ་ལབ་གླེང་བྱེད་བཞིན་འདུག ཁ་ཤས་ནི་བསྟར་ཕྲེང་བསྒྲིགས་ཏེ་དམག་ངོམ་བྱེད་པ་དང་ཡང་འདྲ།
ཤ་མོ་ཡི་ཚུགས་ཀ་དང་དབྱིབས་ནི་གདུགས་ཤིག་དང་འདྲ་ལ་ནང་དུ་ཤ་སྐྱི་གཅིག་ཐོག་གཉིས་བརྩེགས་སུ་ཆགས་ཡོད། གདུགས་ཀྱི་ཡུ་བ་ནས་འཛིན་མཁན་ནི་ས་བདག་རྒད་པོ་ཡིན་པ་གོར་མ་ཆག སློབ་ཆུང་གི་བསླབ་དེབ་ཏུ། ཀ་གཅིག་གིས་གུར་ཞིག་ཕུབ་འདྲ་བོ། བར་དམ་པའི་ལྷ་ཆོས་བརྩེགས་འདྲ་བོ་ཞེས་པའི་གབ་ཚིག་ཅིག་འདུག་པ་ཡིད་ལ་དབང་མེད་དུ་ཤར་བྱུང་། ཤ་མོ་ལའང་ནང་དམར་པོ་ཅན་དང་དཀར་པོ་ཅན། ནག་པོ་ཅན་བཅས་རིགས་མང་པོ་ཡོད་དེ། ནང་དཀར་པོ་ཅན་གྱི་ཤ་མོ་ལ་ཡུལ་སྐད་དུ་སྟག་ཤ་ཟེར་བ་དང་། ཕྱི་ནང་གཉིས་ཀ་ནག་པོ་ཅན་ལ་ཡུལ་སྐད་དུ་གླ་ཤ་ཟེར་ཞིང་རིན་གོང་ཧ་ཅང་མཐོ་བར་བཤད།
ཕྱི་དྲོར་ཤ་མོ་སླེའུ་རེ་འཁུར་ནས་ཡུལ་ལ་ལོག་པ་དང་། ཨ་ཕྱི་ལ་ཤ་མོ་བཟའ་འདོད་ཀྱི་རེ་བ་བཏོན་པ་ཡིན། ཨ་ཕྱི་ན་རེ། ཤ་མོ་ལ་བཟའ་སྟངས་སྣ་ཚོགས་ཡོད་དེ། བསྐམས་ནས་བཟའ་བ་དང་། སྔོ་ཚོད་དང་བསྡེབས་ནས་བཟའ་བ། ཡང་ན་ཤ་མོ་གསར་བའི་ནང་དུ་རྩམ་མར་སོགས་སྡེབ་ཁ་བསྲེས་ཏེ་བསྲེགས་ནས་བཟའ་བ་སོགས་སྣ་ཚོགས་ཡོད་ཟེར། ང་ཚོས་ཨ་ཕྱི་ལ་བསྲེགས་ནས་ཟ་འདོད་པའི་རྣམ་འགྱུར་བསྟན་པ་ན། ཨ་ཕྱི་ཡིས་ཤ་མོ་ཡི་ནང་དུ་རྩམ་པ་དང་མར། ཕྱེ་མ་ཀ་ར་སོགས་བླུགས་ནས་སྔོན་ཆད་ཟས་མ་མྱོང་བའི་ཟས་ཤིག་བཟོས།
ང་ཚོས་ཤ་མོ་ཡིས་བཟོས་པའི་ཟས་མཆོག་ལ་རོལ་བཞིན་རང་བྱུང་ཁམས་ལ་སེམས་གཏིང་ནས་བཀའ་དྲིན་ཞུས་ན་འདོད་དོ། །
མ་ཡུམ་ལགས། སློབ་གྲྭ།
མཛོད་པ་མགོན་པོ་འཚོ། དམའ་གཉིས་འཛིན་བཞི།
དཔྱིད་གསུམ་སྦྲང་ཆར་གྱིས་ཁྱེད་ལ་ཚེ་སྲོག་བསྩལ་ལ།
དབྱར་གསུམ་ཉི་འོད་ཀྱིས་ཁྱེད་ལ་དྲོད་ཁོལ་བསྩལ།
སྟོན་གསུམ་ལོ་ལེགས་ཀྱིས་ཁྱེད་ལ་འབྲས་བུ་བསྩལ་ལ།
དགུན་གསུམ་གྲང་ངར་གྱིས་ཁྱེད་ལ་དཔའ་ངར་བསྩལ།
མ་ཡུམ་ལགས། སློབ་གྲྭ།
གལ་ཏེ་ཁྱེད་ནི་རྒྱ་ཆེ་བའི་མེ་ཏོག་ལྡུམ་ར་ཞིག་ཡིན་ཚེ།
ང་ནི་རྣམ་པར་བཞད་ཅིང་ཉི་མ་ལ་བལྟ་བའི་མེ་ཏོག་དེ་ག་ལ་མིན།
ཁྱེད་ཀྱིས་ང་ལ་འཚོ་བཅུད་བསྩལ་བ་དང་།
ང་ལ་ནར་སོན་པའི་ཁོར་ཡུག་ལེགས་པོ་ཞིག་བསྐྲུན།
མ་ཡུམ་ལགས། སློབ་གྲྭ།
རྒྱ་ཆེ་བའི་ཞིང་ས་ཆེན་མོ་ལ།
ཤེས་རིག་གི་ས་བོན་འདེབས་མཁན་ཁྱེད་ཡིན།
མུན་པས་ཁེངས་པའི་འཇིག་རྟེན་ཆེན་པོ་ལ།
ཤེས་རིག་གི་འོད་ཟེར་སྩོལ་མཁན་ཡང་ཁྱེད་ཡིན།
མ་ཡུམ་ལགས། སློབ་གྲྭ།
ཁྱེད་ཀྱི་བྱམས་བརྩེ་ལྡན་པའི་ལྟ་སྐྱོང་གི་འོག་ནས།
སློབ་བུ་ང་ནི་རིམ་བཞིན་ཤེས་རིག་གི་མུན་པ་དང་བྲལ་ཞིང་།
ཤེས་རབ་ཀྱི་འོད་ཟེར་ལོངས་སུ་སྤྱོད་བཞིན་མཆིས།
ཁྱེད་ཀྱི་དྲོད་ཁོལ་ལྡན་པའི་རུམ་ནང་ནས།
འཇིག་རྟེན་གྱི་ཡང་རྩེར་བགྲོད་ཐུབ་པ་དང་།
ཤེས་རབ་ཀྱི་རལ་གྲི་འཛིན་པའི་སྐྱེས་བུ་དམ་པ་གང་མང་འཁྲུངས།
མ་ཡུམ་ལགས། སློབ་གྲྭ།
ཁྱེད་ནི་སློབ་མ་ཞེས་པའི་མིང་ཐོགས་ས་ཡིན་ལ།
མི་རིགས་ཤིག་གི་རྒྱུད་འཛིན་སའང་ཡིན།
གལ་ཏེ་ནམ་ཞིག་བདག་གི་རྣམ་ཤེས་བདག་མེད་དེ་ལ་ལུང་དུ་འཁྱམས་པའི་ཚེ།
མ་ཡུམ་སློབ་གྲྭ་ཁྱེད་ནི་ཆེས་མཆོག་པའི་འགྲོ་གནས་ཡིན།
ཀྱེ་ཀྱེ། བདག་གི་དྲིན་ཆེན་གྱི་མ་ཡུམ་སློབ་གྲྭ།
བདག་གི་ཕུགས་བསམ།
དགོན་པ་རྟ་མགྲིན་འཚོ། དམའ་གཉིས་འཛིན་གཉིས།
འཇིག་རྟེན་སྟེང་དུ་སྐྱེ་བོ་ནི་ནམ་མཁའི་རྒྱུ་སྐར་བཞིན་དུ་མང་པོ་མཆིས་ཏེ། དེ་དག་ལས་ལ་ལ་ནི་འགྲོ་བ་མིའི་རིགས་ཀྱི་བདེ་ཐང་སྐྱོང་མཁན་གྱི་སྨན་པ་བྱེད་འདོད། ལ་ལ་ནི་ཤེས་རིག་གི་ཡོན་ཏན་སྦྱིན་པའི་རླབས་ཆེན་གྱི་དགེ་རྒན་བྱེད་འདོད། ལ་ལ་ནི་རང་རེའི་མེས་རྒྱལ་སྲུང་མཁན་གྱི་རྒྱལ་སྲུང་དཔའ་བོ་བྱེད་འདོད།
འོན་ཀྱང་ཕུགས་བསམ་མེད་པའི་མི་ནི་སྟོན་མཇུག་གི་རྩྭ་སྐྱ་སྐམ་པོ་བཞིན་ཡིད་དུ་འོང་བའི་ལོ་འདབ་དང་། ཁུར་གྱིས་བཏུད་པའི་སྙེ་མ། ལྗང་མདོག་གི་གསོན་ཤུགས་སོགས་ཅི་ཡང་མེད་པར་སྟོན་རླུང་རྒོད་པོའི་ཤུགས་གླུ་རིང་མོ་ཞིག་དང་མཉམ་དུ་རང་ཉིད་ཀྱི་མི་ཚེ་ཟད་འགྲོ། དེ་བས་ང་རང་ལ་ཕུགས་བསམ་ཞིག་ཡོད། དེ་ནི་འཇིག་རྟེན་སྟེང་གི་མ་རིག་མུན་པ་སེལ་མཁན་གྱི་དགེ་རྒན་ཞིག་བྱེད་འདོད་པ་དེ་ཡིན།
དེ་གང་ཡིན་ཟེར་ན། དགེ་རྒན་མེད་ན་འཇིག་རྟེན་འདི་ནི་ཤེས་རབ་མེད་པའི་མུན་ནག་གི་ཞིང་ཁམས་ཤིག་ཡིན་པས། དགེ་རྒན་མེད་ན་ང་ཚོར་ཤེས་བྱ་མང་པོ་ཞིག་ཐོབ་མི་སྲིད། དགེ་རྒན་ནི་སློབ་མ་ཚོའི་ཕ་མ་གཉིས་པ་ཡིན་ཞེས་པ་ལྟར། ཁོང་ཚོའི་སློབ་བུ་རྣམས་རང་གི་བུ་ཕྲུག་ལྟར་གཅེས་ཏེ། བྱམས་སེམས་དང་བརྩེ་དུང་གིས་བསྐྱངས་པའི་སྙིང་སྟོབས་དེ་ལས་ང་རང་དགེ་རྒན་བྱེད་པའི་འདུན་པ་དེ་སྐྱེས་བྱུང་།
མ་གཞི་དགེ་རྒན་ཡང་ང་ཚོ་དང་འདྲ་བར་རིག་གནས་ཡོན་ཏན་སྦྱངས་མཐར་ད་གཟོད་དགེ་རྒན་གྱི་མཚན་འདི་ཐོབ་བྱུང་བ་རེད། དེ་བས་ང་ཚོས་ཀྱང་དགེ་རྒན་ལ་སློབ་སྦྱོང་བྱས་ནས་དགེ་རྒན་དང་འདྲ་བར་མ་རིག་གི་མུན་པ་སེལ་མཁན་ཞིག་ཏུ་འགྱུར་བའི་ཕུགས་བསམ་ཡོད། དགེ་རྒན་གྱི་ལས་ཀ་ནི་དཀའ་ངལ་ཆེ་བ་ཞིག་ཡིན་ཡང་། ང་ཚོས་དེ་ལ་འཛེམ་དོགས་བྱེད་མི་རུང་། ང་ཚོ་དཀའ་ཚེགས་ཆུང་ངུ་ཞིག་ལ་མགོ་སྒུར་ཚེ་རང་ཉིད་ཀྱི་ཕུགས་བསམ་དེ་མངོན་འགྱུར་བྱེད་མི་སྲིད། ང་ཚོས་དཀའ་ངལ་ཁྱད་དུ་བསད་ནས་ཕུགས་བསམ་གྱི་ཆེད་དུ་མདུན་བསྐྱོད་བྱེད་དགོས། ང་ཚོས་རང་ཉིད་ཀྱི་ཕུགས་བསམ་འགྲུབ་པའི་ཆེད་དུ་སློབ་སྦྱོང་ལ་ཧུར་བརྩོན་བྱེད་དགོས་ཏེ། ས་སྐྱ་ལེགས་བཤད་ལས། མི་ལ་བརྩོན་འགྲུས་ལྡན་གྱུར་ན། །འཇིག་རྟེན་འདི་ན་དཀའ་བ་མེད། །ཅེས་པ་ལྟར་ལྷོད་མེད་ཀྱིས་དཀའ་སྤྱད་འབད་བརྩོན་བྱས་ནས། རང་ཉིད་ཀྱི་ཕུགས་བསམ་མངོན་གྱུར་ཡོང་བར་བརྩོན་ལེན་བྱ་དགོས།
ཕ་ཡུལ་དྲན་པའི་རྒྱུ་མཚན།
ཚེ་རིང་ལྷ་མོ་ཆུང་བ། དམའ་གཉིས་འཛིན་དྲུག
བདག་གི་ཕ་ཡུལ་ནི་མཛེས་སྡུག་ཡིད་དུ་འོང་བའི་གྲོང་ཚོ་ཆུང་ཆུང་ཞིག་ཡིན། ད་ལྟ་ང་ནི་སློབ་འབྲིང་སློབ་མ་ཞིག་ཡིན་ལ་ཕ་ཡུལ་དང་ཁ་བྲལ་ནས་རྫོང་ཐོག་ཏུ་སློབ་སྦྱོང་བྱེད་པར་སླེབས་ཡོད། ནམ་རྒྱུན་བདག་གི་དྲན་པའི་ཡིད་དུ་སྨིན་པ་ནི་ཕ་ཡུལ་གྱི་རི་ཆུ་དང་ཕ་ཡུལ་གྱི་སྦྲ་ནག ད་དུང་ཕ་ཡུལ་གྱི་བརྩེ་བའི་མི་རྣམས་ཡིན། དེ་བས། བདག་གིས་ཕ་ཡུལ་དྲན་པའི་རྒྱུ་མཚན་ནི། ཕ་ཡུལ་ནི་རང་ཉིད་འཚར་ལོངས་བྱུང་སའི་གནས་དང་ཕ་མ་སྤུན་མཆེད་ཀྱི་བརྩེ་བ་འཛོམས་སའི་གནས། རང་ཉིད་ཀྱི་ལྟེ་ཁྲག་ས་ལ་འཕོས་སའི་གནས་བཅས་ཡིན་པས་སོ། །
ངའི་ཕ་ཡུལ་གྱི་ཆུ་བོ་ནི་ཡན་ལག་བརྒྱད་ལྡན་གྱི་ཆུ་བོ་ཞིག་ཡིན་ཏེ། མངར་བ་དང་བསིལ་བ། འཇམ་པ། ཡང་པ། དྭངས་པ། གཙང་པ། མགྲིན་པ་ལ་མི་གནོད་པ། ལྟོ་བ་ཕན་པ་བཅས་ཀྱི་ཡོན་ཏན་ཡོངས་སུ་འཛོམས་ཡོད་པས། ང་རང་ཕ་ཡུལ་ནས་ཆུ་འཁྱག་འཐུང་རྒྱུར་ཤིན་ཏུ་དགའ་བོ་ཡོད།
ངའི་ཕ་ཡུལ་གྱི་རི་བོ་ནི་དགུང་ལ་ཟུག་ཡོད་པ་དང་། དགུན་ཁར་ཁ་བ་ལྷབ་ལྷུབ་ཏུ་བབས་ནས་རི་བོ་ཁ་བས་གཡོགས་པ་ནི་སེམས་དཀར་གཞུང་དྲང་དང་མིག་རྒྱང་རིང་བའི་བགྲེས་པོ་མགོ་དཀར་ཞིག་དཀྱིལ་ཀྲུང་དུ་བཞུགས་པ་དང་གཉིས་སུ་མ་མཆིས། ངའི་ཕ་ཡུལ་གྱི་རྩྭ་ཐང་ནི་ཧ་ཅང་མཛེས། རྒྱུ་མཚན་རྟ་ནོར་ལུག་གསུམ་རྣམས་ནམ་མཁའི་སྐར་ཚོགས་བཞིན་སོས་དལ་བག་ཕེབས་ངང་རྩྭ་ཟ་བཞིན་ཡོད་ལ། མེ་ཏོག་སྡུག་གུར་བཞད་ཅིང་ད་དུང་སྦྲང་མ་རྣམས་ཀྱིས་མེ་ཏོག་གི་ཟེའུ་འབྲུ་ལེན་བཞིན་སྤང་ལ་མེ་ཏོག་བཞད་ཅིང་དྲི་ཞིམ་ཕྱོགས་སུ་འཐུལ་བཞིན་ཡོད།
བདག་གིས་ཕ་ཡུལ་དྲན་པའི་སྐབས་སུ་མིག་ཁྲ་ཆུང་མཆི་མས་ཁེངས་ཤིང་སེམས་ཡ་ཆུང་བྱེའུ་ཞིག་གཟེབ་ལས་ཤོར་བ་དང་འདྲ་བར་ཕ་ཡུལ་གྱི་ཕྱོགས་སུ་ཤོར་འགྲོ། བདག་གིས་ཕ་ཡུལ་དྲན་བཞིན་ཡོད་ལ། ཕ་ཡུལ་ལ་ལོག་འདོད་ཀྱི་འདུན་པ་ནི་རྟ་ཕོ་གཤོག་ཐོགས་ཤིག་དང་ཤིན་ཏུ་འདྲའོ། །དེ་བས། ཕ་ཡུལ་ལགས། ངའི་ལུས་ཀྱི་བ་སྤུ་རེ་རེའི་རྩེ་མོ་ན་ཁྱེད་ལ་དུངས་པའི་ཆུ་ཐིགས་ཡོད་ལ་ངའི་སྙིང་ཆུང་གི་འཕར་ལྡིང་རེ་རེའི་ཁྲོད་དུ་ཁྱེད་ལ་བཅངས་པའི་བརྩེ་སེམས་ཀྱི་འབོད་པ་ཡོད།
ཕ་ཡུལ་ལགས། ཁྱེད་ནི་ངའི་སེམས་ཀྱི་དྲན་ཤིང་ཡིན།
ཕ་ཡུལ་གྱི་མཛེས་ལྗོངས་ལ་བསྔགས་པ།
ལྷ་མོ་སྐྱབས། དམའ་གསུམ་འཛིན་བཅུ།
གསེར་གྱི་དོག་པ་མང་པོ་འདིར་འཐོར་ཞིང་།།
ཉི་མའི་པྲོག་ཞུ་དང་པོ་འཕྲོ་ས་འདི།།
རྣམ་སད་བུ་མོ་ཡིན་ཡང་ཞེན་ཆགས་གནས།།
མཛེས་སྡུག་ཀླུ་ཆུ་མིན་ན་གང་ཞིག་ཡིན།།
སྡོམ་དཀར་རི་བོ་གསེར་གཞོང་ཐང་ན་མཛེས།།
ཕྱི་ནས་བལྟས་ན་ལྷ་ཡི་ཕོ་བྲང་ཡིན།།
ནང་ནས་བལྟས་ན་རིན་ཆེན་གསེར་དངུལ་གཏམས།།
འབྱོར་ཕྱུག་དེབ་ཐེར་རྩོམ་པའི་དབུ་ཁྱུད་ཡིན།།
རྐྱང་ཐང་མཚོ་མོ་ཤེལ་གྱི་མེ་ལོང་ཡིན།།
མཁའ་དབུགས་གཙང་ཞིང་ཆུ་མོ་དྭངས་གསལ་ཤེལ།།
ཆུ་གླང་ལ་སོགས་སྲོག་ཆགས་ཁྱད་མཚར་ཅན།།
དེ་གར་འཛོམས་ཤིང་བག་ཕེབས་ངང་ནས་རྒྱུ།།
རྫས་ཚའི་གྱེན་གཤགས་དགུང་སྔོན་དབྱིངས་ལ་ཟུག།
ཁྱད་མཚར་བྲག་རི་མིག་གི་དགའ་སྟོན་ཉིད།།
ལོ་རྒྱུས་ཆུ་རྒྱུན་རིང་མོའི་དན་རྟགས་མངོན།།
འགྲོ་ཀུན་ལྟད་མོ་བལྟ་ཕྱིར་གནས་འདིར་ལྷགས།།
ཚང་ཚིང་རྐང་འཐུང་རི་ཐང་ཀུན་ལ་བཀྲམ།།
དཔྱིད་རླུང་ལྡང་བས་མཚོ་རླབས་གཡོ་བ་འདྲ།།
བྱ་བྱེའུ་སྐད་སྙན་རི་ལུང་ཀུན་ལ་ཁྱབ།།
དགོད་པའི་ཧབ་ཆས་གཡུ་ལོ་ལྡེམ་ལྡེམ་གཡོ།།
རི་ཆུ་ནགས་གསུམ་འཛོམས་ཤིང་གཡང་ཞག་འཁྱིལ།།
དུས་བཞིའི་མཛེས་སྡུག་མ་ལུས་གནས་འདིར་བཞད།།
ཕྱི་ནང་མི་རིགས་མང་པོ་བུང་བའི་ཚོགས།།
ཡིད་འཕྲོག་བསྟོད་ཚིག་ཆུ་མོའི་རྒྱུན་དང་མཚུངས།།
མ་འོངས་ཕ་ཡུལ་མཛེས་སྡུག་སྔར་ལས་ཀྱང་།།
ཡག་ཅིང་སྙན་གྲགས་ཕྱོགས་བཅུར་ཁྱབ་པར་སྨོན།།
ལྗོངས་འདིའི་སྲིད་འབྱོར་རིག་གསུམ་རབ་དར་ནས། །
མ་འོངས་འབྱོར་ཕྱུག་མངོན་དུ་འགྱུར་བར་ཤོག །
ཕ་མ།
ཚེ་དཔག་སྐྱབས། དམའ་གཉིས་འཛིན་བརྒྱད།
ཆེས་ཐོག་མར་དྲིན་ཆེན་མ་ལོས་ང་རང་ཟླ་དགུ་ཞག་བཅུར་མངལ་ལ་སྦྲུམ་ཞིང་། དལ་བརྒྱད་འབྱོར་བཅུ་ལྡན་པའི་མི་ལུས་རིན་ཆེན་འདི་བསྩལ་བའི་བཀའ་དྲིན་ནི་རི་རབ་ལས་དཔངས་མཐོ་ཞིང་། རྒྱ་མཚོ་ལས་གཏིང་ཟབ་པས། དེའི་བཀའ་དྲིན་ནི་ནམ་ཡང་གཞལ་ཐབ་བྲལ་བ་ཞིག་ཡིན་ནོ། །
ཕ་མས་སྐུ་ངལ་ལ་མ་འཛེམ་པར་ཆུང་དུས་ནས་ང་ལ་འགྲོ་འདུག་སྤྱོད་གསུམ་བསླབ་པ་ལྟ་ཅི། ཐ་ན་ཁོམ་མི་ཁོམ་པའི་བར་ནས་སློབ་གྲྭ་ནས་ཕར་བསྐྱལ་ཚུར་ལེན་བྱས་པ་ལས་ཀྱང་དཀའ་ལས་གང་མང་མྱོང་སོང་། ད་ལྟ་ང་རང་སློབ་ཆུང་ལས་མཐར་ཕྱིན་ཏེ་སློབ་འབྲིང་དུ་ཞུགས་ནས་མ་འོངས་པའི་རེ་བ་དང་མདུན་ལམ་གྱི་ཆེད་དུ་ནངས་སྔ་ལངས་དང་དགོང་འཕྱི་ཉལ་གྱིས་སློབ་སྦྱོང་ལ་བརྩོན་པ་ཆུ་བོའི་རྒྱུན་བཞིན་བསྟེན་གྱི་ཡོད་མོད། འོན་ཀྱང་། ཕ་མས་དེ་ལས་ལྷག་པའི་དཀའ་ངལ་ལ་མ་འཛེམ་པར་དབྱར་གྱི་ཆར་ཆུ་དང་དགུན་གྱི་བུ་ཡུག་གི་ཁྲོད་ན་སེན་མགོ་ཁྲག་དང་སེན་རྟིང་རྣག་གིས་དཀའ་སྤྱད་སྡུག་རུས་ཀྱིས་བསགས་པའི་སྒོར་མོ་དག་གིས་ང་ལ་ཟས་ཀྱི་ཕུད་བྱིན་ཞིང་གོས་ཀྱི་རྩེ་གཡོགས་ཏེ། ང་ལ་དགོས་པ་ཞིག་ཡིན་ཚེ་ནམ་མཁའི་སྐར་མ་དགོས་ཀྱང་སྐས་བརྒྱ་བཙུགས་ནས་ལེན་པར་གདོན་མི་ཟའོ། །
དེ་ཡང་ང་ཚོའི་གནའ་མིའི་ཁ་དཔེ་ལ་ཕ་མ་དགའ་ན་དྲིན་ལེན་དང་ཐམས་བཅད་དགའ་ན་དགེ་བ་ཡིན་ཟེར་བ་ནང་བཞིན། ངས་རང་གི་དྲིན་ཆེན་གྱི་ཕ་མ་ཟུང་དགའ་བའི་ལས་གང་མང་ཞིག་སྒྲུབ་ཅི་ཐུབ་ལ་འབད་པ་བྱས་ཏེ། ཕ་མ་གཉིས་ལ་དྲིན་ལན་བཟང་པོ་ཞིག་འཇལ་ཅི་ནུས་ཀྱིས་སྔར་ལས་ལྷག་པའི་བདེ་སྐྱིད་ཀྱི་ཁྱིམ་གཞིས་གསར་བ་ཞིག་བསྐྲུན་པར་བྱའོ། །
མཛུབ་སྟོན་དགེ་རྒན། མགོ་ཚ་སྟག་ཐར་སྐྱབས།
