འཇིག་རྟེན་མི་ཡུལ་འདིའི་སྟེང་གི་ང་དང་ང་འདྲ་བའི་སྐྱེ་བོ་སུ་ཞིག་ཡིན་རུང་ཚང་མ་ལ་རང་རང་སྐྱེས་སའི་ཡུལ་ལུང་མི་འདྲ་བ་རེ་ཡོད་ལ། ཡུལ་ལུང་དེ་ལ་བརྩེ་ཞིང་དུངས་པ་ནི་སྨྲ་མི་དགོས་པ་ཞིག་རེད། ཕུ་ན་དངུལ་དཀར་གྱི་གོས་བཟང་བཀླུབས་འདྲའི་གངས་རི་ཡོད་ལ། བར་ན་ཡངས་པའི་རྩྭ་ཐང་དུ་རྟ་ནོར་ལུག་གསུམ་གྱིས་བརྒྱན་པ། མཐའ་ན་ཚང་ཚིང་གཡུ་ལོ་ཐགས་སུ་བཀྲ་བའི་ནགས་ཚལ་གྱི་འདབས་རོལ་ན་ཉིན་མཚན་ཁོར་མོ་ཡུག་ཏུ་ལྷིང་འཇགས་ངང་རང་རང་གི་ལས་ལ་འབད་བརྩོན་གྱི་འཚོ་བ་རོལ་བཞིན་པའི་ཡིད་འོང་གི་ཕ་ཡུལ་དེ་ནི་བུ་མོ་ངའི་ལྟེ་ཁྲག་འཕོ་སའི་གཞིས་ཁྱིམ་དྲོན་མོ་ཡིན།
དཔྱིད་ཀ་སླེབས་དུས། བགྲང་ལས་འདས་པའི་རི་སྐྱེས་མེ་ཏོག་ག་ས་གང་དུ་ཚོམ་བུ་དང་ཚོམ་བུ་བྱས་ནས་ཁྲ་ལམ་མེར་བཞད་པ་ནི་སྐར་ཚོགས་ས་ལ་བབས་པ་དང་གཉིས་སུ་མ་མཆིས། ད་དུང་ཁམ་བུའི་སྡོང་བོ་དང་ལི་སྡོང་ལ་སོགས་པའི་མེ་ཏོག་གིས་རབ་ཏུ་བརྒྱན་ཞིང་མཚར་སྡུག་གི་མེ་ཏོག་རྣམ་པར་བཞད། དམར་སེར་ལི་ཁྲིའི་མདོག་གིས་རྫོགས་པར་བཞད་པ་ནི་འབྱུང་འགྱུར་གྱི་མཚར་སྡུག་ལ་རྔམ་བཞིན་གདའ།བསིལ་ཞིང་འཇམ་པའི་དཔྱིད་རླུང་ལྡང་བ་དང་། སྦྲང་ཆར་བསིལ་མ་ཟིམ་ཟིམ་དུ་འབབ་པར་མ་ཟད། ཁུག་རྟ་དང་བྱེའུ་ཆུང་འཇོལ་མོ་ལ་སོགས་ཀྱིས་སྙན་པའི་གླུ་དབྱངས་ལེན་པ་རྟག་ཏུ་སྒྲ་འཛིན་རྣ་བས་ཐོས་ཐུབ། གཞན་ད་དུང་དཔྱིད་ཀྱི་རྨོ་འདེབས་དང་སྟོན་གྱི་འབྲས་བཟང་ཟེར་བ་བཞིན་བདག་གི་ཕ་ཡུལ་གྱི་ཞིང་བ་རྒན་གཞོན་ཕོ་མོ་བྱིངས་ཀྱིས་གཉིད་ཆགས་ཟས་བརྗེད་ཀྱིས་ཞིང་ལས་ལ་བརྩོན་ཞིང་བྲེལ། ཁོ་ཚོའི་བཞིན་རས་ལས་རེ་བ་དང་མ་འོངས་འབྲས་བཟང་འཐོབ་འདོད་ཀྱི་འདུན་པ་ཤུགས་དྲག་པོ་ཞིག་མངོན།
དབྱར་དུས་སུ་སླེབས་པ་ན། གཡུ་མདོག་གི་ནམ་མཁའ་ནས་རབ་དཀར་ཞོ་གསར་སྤུངས་པ་ལྟ་བུའི་སྤྲིན་དཀར་ལྡང་བ་དང་། རི་ཀླུང་ཀུན་ལ་མེ་ཏོག་འདྲ་མིན་སྣ་ཚོགས་ཐང་མར་བརྡལ་བ་ནི་གོས་ཆེན་དབྱིག་འཛིན་སྒེག་མོའི་ངོས་ལ་བཀྲམ་པ་དང་གཉིས་སུ་མེད། སྒོ་ཕྱུགས་རྟ་ནོར་ལུག་གསུམ་གྱིས་མཐའ་ཡས་པའི་རྩྭ་ཐང་ཆེན་པའི་ངོས་སུ་སོས་དལ་བག་ཕེབས་ངང་གང་འདོད་དུ་རྩྭ་ཆུ་ལོངས་སུ་སྤྱོད་པའི་ངང་ཚུལ་ནི་ནམ་མཁའི་སྐར་ཚོགས་ས་ལ་འཕོས་པ་དང་ཀུན་ནས་མཚུངས།
སྟོན་དུས་སུ་སླེབས་པའི་ཚེ་ན། ངའི་ཕ་ཡུལ་གྱི་མཚེར་སའི་མཐའ་བསྐོར་གྱི་ཚར་དུ་དངར་བའི་ས་འཛིན་དང་རི་ཁུག་སོ་སོ་ན་གསེར་མདོག་གི་མདངས་མ་ཡལ་བའི་རྩྭདང་རྩི་ཤིང་མཐའ་དག་ཞོགས་པའི་ཉི་གཞོན་གྱི་ཁྲོད་ན་ལྷག་ཏུ་མཛེས་སྡུག་ལྡན་ལ་གཟི་མདངས་རྣམ་པར་བཀྲ། འབྲས་ལྡན་གྱི་ལྗོན་ཤིང་ལ་མངར་སྐྱུར་འདྲེས་མའི་གཡུར་དུ་ཟ་བའི་འབྲས་བཟང་སྨིན་ནས་སེར་ལམ་ལམ་དུ་མངོན་པ་ནི་འཆི་མེད་ལམ་ནས་རིན་ཆེན་སྣ་ཚོགས་ཀྱི་རྡོག་པོ་མི་ཡུལ་དུ་གཏོར་བ་དང་ཨ་ན་མ་ནའི་ཚོར་བ་ཞིག་ངང་ངམ་ཤུགས་སུ་སྟེར་ཐུབ། དུས་དེར་སྐྱེ་འགྲོ་ཡོངས་རྫོགས་ཀྱི་ཞལ་རས་ངོས་ལ་སྤྲོ་སྐྱིད་དང་བདེ་སྐྱིད་ཀྱི་མེ་ཏོག་ལྷུག་པར་བཞད་ཡོད། ཞིང་བ་སྟེ་སོ་ནམ་པ་རྣམས་ལོ་ཏོག་བརྔོ་བའི་ལས་ལ་བྲེལ་བཞིན་གདའ།
དགུན་དུས་སུ་སླེབས་པ་ན། སྐྱེ་བོ་ཀུན་གྱི་མིག་གི་དགའ་སྟོན་དུ་གནང་ཡོང་བ་ནི་དབྱིག་གི་སྒེག་མོས་གོས་བཟང་དཀར་བོའི་ན་བཟའ་བཀླུབས་ཤིང་། ཁ་བའི་མེ་ཏོག་གི་འདབ་མ་ནམ་མཁའ་ལས་དལ་གྱིས་ས་གཞི་ལ་འབབ་པའི་ངང་ཚུལ་ནི་ཇི་འདྲའི་མཛེས་ཤིང་ལྟ་ན་སྡུག་ལ་ཡིད་དུ་འོང་བའི་མཛེས་ལྗོངས་ཤིག་རེད་ཨང་། ལྷག་པར་དུ་དགུན་དུས་སུ་མི་རྣམས་ལ་ཁོམ་པ་ཡོད་སྟབས། དགའ་སྟོན་གྱི་ཡོ་ལང་མཚམས་མི་ཆད་པ་ནི་ཏང་གི་སྲིད་ཇུས་ཉི་མ་ལྟ་བུའི་དྲོད་ཁོལ་ལས་མང་ཚོགས་ཀྱི་འཚོ་བ་བླ་ལྷག་གི་འགྱུར་ལྡོག་དང་འཕེལ་རྒྱས་ལེགས་པོ་བྱུང་ཡོད་པ་སྔོན་ནས་ཤེས་ཐུབ།
ངའི་ཕ་ཡུལ་གྱི་དུས་བཞི་ནི་སྨན་ཆུང་བུ་མོ་ངའི་སེམས་དཀྱིལ་ན་ནམ་ཡང་ཡལ་མི་སྲིད་པའི་འོད་ཀྱི་དྲོད་ཁོལ་དེ་ཡིན། དྲོད་ཁོལ་དེ་ལས་ང་ཚོ་སྐྱེ་འགྲོ་ཀུན་ལ་སྙིང་སྟོབས་དང་བདེ་སྐྱིད་ཀྱི་འཚོ་བ་བསྐྲུན་བྱུང་།
སློབ་རའི་རྩོམ་པ་པོ་རྟ་མགྲིན་མཚོ་ནི་ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སློབ་མ་ཡིན།
