ཕལ་བའི་ཁྱིམ་ཚང་དང་འབྲོག་ཁྱི་སེ་བོ།

གླེང་བརྗོད།

སྒོ་ཁྱི་ནི་གནའ་ནས་བཟུང་བདག་པོ་ལ་བློ་སེམས་དཀར་བའི་སྲུང་དམག་ཅིག་གམ་གཡོ་སྒྱུས་མ་བསླད་པའི་བློས་ཐུབ་ཀྱི་གྲོགས་མཆོག་ཅིག སྒོ་ཁྱི་ནི་ཉི་མ་སུམ་བརྒྱ་དྲུག་ཅུའམ་དུས་ཚིགས་བཞི། དུས་གཟེར་ཉེར་བཞིར་གཟིམས་པ་མེད་པར་མེལ་ཚེ་བྱེད་པའི་ཡ་མེད་ཀྱི་ནོར་སྲུང་གི་དཔའ་བོ་ཞིག སྒོ་ཁྱིས་ད་གཟོད་དགུན་གསུམ་ཁ་བ་བུ་ཡུག་གི་གྲང་རེག་གདོང་གིས་བསུས་ཤིང་དབྱར་གསུམ་ཆར་ཆུ་མོད་པོ་ཡི་བརླན་གཤེར་གོས་སུ་གྱོན་ནས། འབྲོག་སྦྲ་ཁྱིམ་སྨུག་པོའི་གཡང་ར་སྒོ་བཞི་ལ་ལུས་འབུལ་སྲོག་འབུལ་གྱིས་སྲུང་སྐྱོབ་བྱས་ཤིང་། མཚན་གསུམ་རྨི་ལམ་གྱི་སྐྱིད་སྣང་སེམས་སུ་བསྒོམས་ནས་སྐར་ཚོགས་བཀྲ་བའི་མཚན་མོ་རེ་རེར་རང་ཉིད་གཅིག་པུ་རི་སྤྱང་དང་རྐུན་ཇག་གི་གདོང་ལེན་དུ་འགྲེང་།

ཆེས་ཐོག་མར་སྒོ་ཁྱི་གླེང་དུས། ངའི་དྲན་འཛིན་གྱི་ཡོལ་རས་ངོས་སུ་མུ་མཐའ་བྲལ་བའི་རྩྭ་ཐང་གི་ངོགས་སུ་སྤྲིན་དཀར་ལྟ་བུའི་ལུག་ཁྱུ་འཚོ་བཞིན་པའི་འབྲོག་ཕྲུག་ཅིག་འཆར་འོངས། དེ་ལས་ཀྱང་ཆེས་གསལ་པོར་མངོན་པ་ནི་བྱིས་པ་དེའི་རྗེས་སུ་དམ་པོར་འབྲངས་ཤིང་མགོ་བོ་མཐོན་པོར་བཀྱགས་ཏེ་ལུག་ཁྱུའི་གཡས་གཡོན་དུ་ཉེན་ཟོན་དང་མྱུལ་ཞིབ་བྱེད་པར་བྲེལ་བའི་འབྲོག་ཁྱི་རྒྱ་བོ་དེ་རེད། མི་མང་པོ་ཞིག་གིས་འབྲོག་ཁྱི་དེར་དེ་འདྲའི་དོ་སྣང་མི་བྱེད་མོད། འོན་ཀྱང་ང་ལ་མཚོན་ན། འབྲོག་ཁྱི་དེའི་རྒྱབ་ལྗོངས་དང་བྱུང་བ་ནི་ཁྱོད་ཅག་གི་ཡིད་ཀྱི་དང་བ་ཡོངས་སུ་འདྲེན་བྱེད་ཀྱི་ལྕགས་ཀྱུ་ཞིག་ཏུ་ཅི་ནས་ཀྱང་ངེས་སོ། །

གཏམ་རྒྱུད་དེ་ནི་ཧ་ལམ་ལོ་ངོ་དྲུག་ཅུ་ལྷག་གི་གོང་རོལ་ཏུ། ཨ་མྱེས་གླང་རིའི་འདབས་ཀྱི་མཚོ་དམར་སྡེ་བ་རུ་བྱུང་བ་ཡིན་ལ། ད་ལྟ་ཕས་བུ་དང་བུས་ཚ་བོ་རུ་བརྒྱུད་ནས་མི་རབས་དུ་མའི་ངག་རྒྱུན་དུ་གྱུར་པའི་ཡིད་འཕྲོག་གི་ལྷ་སྒྲུང་རིང་མོ་ཞིག་ཏུ་གྲུབ་འདུག

དབྱར་དུས་ཀྱི་མཚོ་དམར་སྡེ་བ་ནི་གཡུ་ཡི་གཞོང་བ་ཆེན་པོ་ཞིག་དང་འདྲ་བར་རྩྭ་རྩི་ཏོག་གི་མགོ་བོ་འབྲས་བུས་དུད་ཅིང་། རབ་བརྗིད་ས་འཛིན་གྱི་སྤོ་རུ་དཀར་དམར་ཁྲ་གསུམ་གྱི་མེ་ཏོག་སྣ་བརྒྱའི་རྒྱན་ཆས་སྤུད་ལ། ལྷག་པར་དུ་བག་ཡངས་ལྷོད་ཀྱིས་འགྱིང་བའི་སྦྲ་གུར་ཚོམ་བུའི་ཐབ་ཚང་གི་དུ་སྨུག་ནི་མི་ཡུལ་ནས་ལྷ་ཡུལ་དུ་འཐེན་པའི་རྨུ་ཐག་བཞིན་ཨ་སྔོན་དབྱིངས་ཀྱི་སྤྲིན་དཀར་དང་ཡོངས་སུ་བསྡེབས་ནས་ཀུན་གསལ་བུ་མོའི་བླ་གོས་སུ་སིམ་འདུག

དེ་རིང་ཞོགས་པའི་ཉི་ཟེར་དྲོན་མོའི་འཛུམ་ཞལ་དང་ལྷན་དུ་མཚོ་དམར་སྡེ་བའི་ཨ་ཁུ་གཡང་བྷ་ཚང་ལ་སྔ་ན་མེད་པའི་བྲེལ་འཚུབ་ཀྱི་རྣམ་པ་ཞིག་གིས་ཡོངས་སུ་ཁེངས་འདུག་ཅིང་། གཡས་གཡོན་གྱི་རུ་བ་ཁྱིམ་མཚེས་འགའ་ལྷོ་རླུང་གིས་དེད་པའི་སྤྲིན་པ་བཞིན་ཁོ་ཚང་གི་ཕྱོགས་སུ་འདུ་འགོད་བྱེད།

མ་གཞི་ཨ་ཁུ་གཡང་བྷ་ཚང་གིས་དེ་རིང་ཤ་གཟན་ཞིག་བཤའ་བཞིན་འདུག་ལ། ཁྱིམ་མཚེས་དག་ནི་རོགས་བྱེད་དུ་ཡོང་བ་རེད། ད་ལོ་གནམ་རྒན་མའི་དྲིན་ལ་སྔར་ལོ་ལས་ཆར་ཆུ་དང་རྩྭ་ཆུ་གཉིས་ཀ་འཛོམས་པས། མཚོ་དམར་སྡེ་བའི་སྒོ་ཕྱུགས་དཀར་ནག་ཁྲ་གསུམ་ཀུན་ལ་ཤ་ཤེད་རྒྱས་པ་ནི་ད་སོ་མར་དབུགས་བརྒྱབ་པའི་འགྱིག་ལྒང་ཞིག་དང་ཀུན་ནས་མཚུངས་ཤིང་། ཉིན་འགའི་སྔོན་དུ་སྡེ་མི་ཚོའི་རུ་བ་དབྱར་སར་སྤོས་པ་ནས་བཟུང་ཚང་མས་དབྱར་ཤ་བཤའ་བར་བརྩམས་ལ། ཏག་ཏག་དེ་རིང་ཨ་ཁུ་གཡང་བྷ་ཚང་གི་དབྱར་ཤ་བཤའ་བར་ཁེལ་བ་རེད། དུས་རྒྱུན་ལྟར་ན་ཁོ་ཚང་གི་ཕྱུགས་རྫི་ནི་ཨ་ཁུ་གཡང་བྷ་ཡིན་མོད་དེ་རིང་གོང་གི་དོན་དག་དེའི་དབང་གིས་ཁོང་བཟའ་ཟླ་གཉིས་ཀྱི་དཔྲལ་བའི་མིག་དང་ཁོག་གི་སྙིང་དུ་གྱུར་པའི་གཅེས་ཕྲུག་འབུམ་ཁོ་ལུག་རྫིར་མི་མངག་ཐབས་མེད་བྱུང་།

ཨ་ཁུ་གཡང་བྷ་ལ་མཚོན་ན། ད་ལྟ་གོས་བཟང་པོ་དབྱར་གསུམ་ཆར་གྱིས་སྦངས། མྱི་བཟང་པོ་དྲུག་ཅུ་ལོ་ཡིས་ཐུབ་སོང་བ་མ་གཏོགས། ལོ་ན་གཞོན་དུས་ལུག་བཤའ་བ་དང་ཕྱུགས་འཚོ་རྒྱུ་ནི་གླེང་རིན་མེད་པའི་དོན་ཆུང་འབའ་ཞིག་རེད། ལྷག་པར་དུ་ཨ་ཁུ་གཡང་བྷ་ནི་གནའ་ནས་བཟུང་མཚོ་དམར་སྡེ་བ་རུ་བོས་ན་མིང་དང་བགོས་ན་སྐལ་ཡོད་པའི་མི་སྣ་གྲགས་ཅན་ཞིག་ཡིན་ཏེ། ཁོའི་འདས་ཟིན་པའི་ཕ་དྲིན་ཆེན་པོ་ལ་མཚོན་ནའང་མཚོ་དམར་སྡེ་བའི་དཔོན་པོ་ཐོད་ཤོ་ཞེས་མིང་གྲགས་ཤིན་ཏུ་ཆེ།

རིག་གསར་གྱི་རླུང་འཚུབ་དྲག་པོ་བར་མེད་དུ་ལྡང་དུས། ཁོང་ཕ་བུ་གཉིས་ལ་འབྱོར་ལྡན་གྲལ་རིམ་གྱི་ཤོག་ཞྭ་བསྐོན་ཏེ་གང་སར་ཁྲིད་ནས་སྡིགས་དམོད་དང་གཅར་རྡུང་མིག་གིས་མི་བཟོད་པ་བྱས་ལ། ཐ་ན་ཞྭ་མོའི་ཐོད་ཁར་དམར་མདོག་གི་སྐར་མ་རྩེ་ལྔ་ཞིབ་མོར་བཙེམས་ཤིང་། སྐྲ་ལོ་གཏུབས་ནས་རྣ་བའི་མཚམས་སུ་སླེབས་པའི་བུད་མེད་འགས་ཀྱང་ཕ་གསོད་ཀྱི་ལག་དམར་མཐོང་བ་ཇི་བཞིན་ཁོང་ཕ་བུ་གཉིས་ལ་ཚོད་བགམ་དང་འཛེམ་དོགས་སྤུ་ཙམ་ཡང་མེད་པར་ཁུ་ཚུར་དང་རྡོག་ཐོས་མགོ་རྐང་ལ་དབྱེ་བ་མེད་པར་ཡིད་ཚིམས་པ་རེ་གཞུས། ཉིན་དེའི་མཚན་མོར། ཁོའི་ཕ་རྒན་གྱིས་ཉེས་རྡུང་དང་ངོ་ཚ་ཉོས་པ་ལ་མ་བཟོད་པར་རང་སྲོག་བཅད། དེ་ནས་བཟུང་ཁོའི་ཡིད་དུ་འོངས་པའི་ཟས་གོས་རང་འགྲུབ་ཀྱི་འཚོ་བ་དེ་དབྱར་གསུམ་གྱི་འཇའ་ཚོན་དང་ཞོགས་པའི་སྨུག་སྤྲིན་ཇི་བཞིན་རིང་དུ་གྱེས་ཤིང་ནམ་རྒྱུན་ལྕགས་ཁེམ་དང་འཇོར་བཟུང་ནས་རྫོགས་རྒྱུ་མེད་པའི་ས་ལས་རྡོ་ལས་ཀྱི་ལས་ཀར་ཞུགས།

དེ་ལྟར་ལོ་ཟླ་ནི་ཐུར་དུ་འགྲིལ་བའི་རྦབ་རྡོ་ཇི་བཞིན་མདུན་ཕྱོགས་སུ་མྱུར་བར་འགྲིལ་ཞིང་། རིག་གསར་གྱི་དྲག་རླུང་དེའང་སྲིད་ཇུས་གསར་པའི་ཉི་འོད་ཀྱིས་ཡོངས་སུ་བསལ་ལ། ས་གནས་ཀུན་ཏུ་གོང་རིམ་ནས་མངགས་པའི་ལས་བྱེད་པ་ཚོས་དཀར་འདོན་གྱི་བྱ་བ་ལེགས་པོར་བསྒྲུབས་ཤིང་མང་ལས་མང་ཐོབ་དང་ཉུང་ལས་ཉུང་ཐོབ། མ་ལས་མི་ཐོབ་ཀྱི་ཐུན་མོང་གི་སྒྲིག་གཞི་རྙིང་པ་དེའང་ཁ་ཐོར་དུ་གྱུར་ནས། རྒྱུ་ནོར་མཐའ་དག་མི་གྲངས་ལྟར་སྒེར་ལ་བགོ་བཤའ་རྒྱག་པའི་སྲིད་ཇུས་གསར་པ་ཞིག་ཀྱང་མྱུར་དུ་ལག་བསྟར་བྱས། དེ་ལྟར་ཨ་ཁུ་གཡང་བྷ་ལའང་རང་ཉིད་ཀྱིས་འཚོ་སྐྱོང་བྱས་ཆོག་པའི་སྒོ་ཕྱུགས་འགའ་ཐོབ་པས། སེམས་ཁོང་དུ་སྨྲ་མི་ཤེས་པའི་དགའ་སྤྲོ་ཞིག་གིས་ཡོངས་སུ་བརྟས་ཤིང་མིག་མདུན་གྱི་སྐྱ་ཟད་སྔོ་སྡུག་གི་འཚོ་བའི་གནས་སྟངས་དེར་གནམ་ས་བླ་འོག་བརྗེས་འདྲའི་འགྱུར་ལྡོག་བྱུང་།

མ་འགྱངས་པར་ཨ་ཁུ་གཡང་བྷས་རང་དང་ན་མཉམ་གྱི་བུ་མོ་བཀྲ་ཤིས་མཚོ་ཆུང་མར་བླངས་ཤིང་ཆེས་ཐོག་མར་མི་ཡུལ་གྱི་ཁྱིམ་ཚང་ཞེས་པའི་མིང་ཚིག་འདིའི་གཡོག་ཏུ་ཚུད། བཀྲ་ཤིས་མཚོ་ནི་མཚོ་དམར་སྡེ་བའི་ཁྱིམ་ཚང་ཕལ་བ་ཞིག་གི་བུ་མོ་ཡིན་ཞིང་ཡག་མོ་སྒོ་དེ་འདྲ་མེད་ནའང་རང་དོན་དང་ལག་ལས་ཀའི་ཐད་ནས་མོ་བརྒྱའི་སྙིང་རླུང་འཚང་ས་དང་ཕོ་བརྒྱའི་སེམས་པ་ཤོར་ས་ཁོ་ན་རུ་གྱུར་ཡོད། ཁོ་གཉིས་ཀྱིས་དེ་ལྟར་རང་དབང་རང་འཐད་ཀྱིས་གཉེན་སྒྲིག་བྱས་ཤིང་མ་འགྱངས་པར་བུ་ཆུང་འབུམ་ཁོ་བཙས།

ཨ་ཁུ་གཡང་བྷས་མ་གཞི་ནས་ཆུང་མར་བྱིས་པ་ཞིག་སྐྱེ་བར་སྐོམ་པའི་ཆུ་དང་ལྟོགས་པའི་ཟས་ལྟར་རེ་ཞིང་བསྒུགས་ལ། ཐ་ན་རྨི་ལམ་དུའང་མཚམས་ལན་རེར་བུ་ཆུང་ཡིད་འོངས་པ་ཞིག་གིས་རང་ཉིད་ལ་ཨ་ཕ་ཞེས་འབོད་པ་རྨི་བཞིན་ཡོད། དེར་བརྟེན་བཅའ་བ་རིམ་གྲོ་སྒྲུབ་པའམ་བསང་གསོལ་རྒྱུན་དུ་བྱས་པའི་བཀའ་དྲིན་གང་ཡིན་པ་མི་ཤེས་མོད། ཏག་ཏག་ལོ་དེའི་ཕྱི་ལོར་ཁོའི་ཆུང་མ་བཀྲ་ཤིས་མཚོར་མངལ་སྦྲུམ་ནས་མ་འགྱངས་པར་བུ་ཞིག་བཙས་ལ། དེས་ཁོའི་སེམས་ཁོང་དུ་སྔ་ན་མེད་པའི་སྐྱིད་སྣང་གིས་ཡོངས་སུ་བཀང་ཞིང་ད་སོ་མར་མི་ཡུལ་དུ་མགྲོན་ལ་ཕེབས་པའི་བུ་ཆུང་དམར་འབྱར་དེ་ལག་ཏུ་བཟུང་ནས། སེམས་སུ་ད་ནས་བཟུང་བྱིས་པ་འདིར་དཀར་ཡོལ་སྐྱོར་སྐྱོར་དང་སྐུད་པ་རྨེལ་རྨེལ་གྱིས་གཅེས་སྐྱོང་བྱེད་རྒྱུའི་དམ་བཅའ་བརྟན་པོ་ཞིག་ཀྱང་ངང་གིས་འཁྲུངས།

ལྷག་པར་དུ་བུ་ཆུང་དེ་མ་བཙས་པའི་སྔོན་ལ། ཨ་ཁུ་གཡང་བྷས་ཨ་ལགས་རིག་སྨོན་ཚང་ལ་ཕྱག་མོ་གཟིགས་ཤིང་། ཨ་ལགས་རིག་སྨོན་ཚང་གིས་བུ་ཆུང་དེ་ཁོའི་ཕ་འདས་པོ་དཔོན་པོ་ཐོད་ཤོའི་རྣམ་ཤེས་ཡིན་པའི་སྐོར་ཡང་གསུངས་མྱོང་བས། ཁོས་བུ་ཆུང་དེའི་ཆེད་དུ་ཁྱིམ་གྱི་ཡོད་ཚད་དང་ཐ་ན་རང་གི་སྲོག་ལ་འབབ་དགོས་ཀྱང་ཕངས་སེམས་སྤུ་ཙམ་ཡང་མེད་པར་གཏོང་ཐུབ་པའི་སྙིང་ཕུར་ཞིག་སྔར་ནས་སེམས་ཀྱི་ཟབ་ས་རུ་བརྡབས་ཡོད། དེ་ནས་བཟུང་ཁོང་བཟའ་ཟླ་གཉིས་ཀྱིས་ཟས་ཞིམ་པོ་དང་གོས་འཇམ་པོ་ཡོད་ཚད་ཁབ་གསོག་འབིགས་གསོག་བྱས་ཏེ་རང་གི་བུ་འབུམ་ཁོར་སྟེར་ཞིང་འབུམ་ཁོ་ལོ་བཅུ་གཅིག་ལྷག་ལ་སླེབས་ཀྱང་ཕྱུགས་རྫིར་ཐེངས་ཁ་ཤས་ལས་སོང་མྱོང་མེད།

རྟ་བདུན་དབང་པོས་བརྩེ་སེམས་ཀྱི་དྲོད་ཁོལ་ས་གཞི་རུ་བསྩལ་ཅིང་སྤང་ཐང་དུ་ཕྲ་ཚོམ་ལྟར་བཀོད་པའི་མཚོ་དམར་སྡེ་བའི་འབྲོག་མི་དག་གིས་ཉིན་གཅིག་གི་བྲེལ་འཚབ་ཀྱི་ལས་ཀར་དབུ་འཁྱུད་འབྲི་མགོ་བརྩམས། ཉི་འོད་ཁོལ་དུ་བབས་དུས། འབྲོག་ཁྱི་སེ་བོའི་སྦོམ་ཞིང་ལྡིར་བའི་ཟུག་སྐད་ཀྱི་ཀློང་དུ་གཡས་གཡོན་ན་ཡོད་པའི་རུ་བ་ཁྱིམ་མཚེས་དག་མ་གྲོས་གཅིག་མཐུན་གྱིས་ཨ་ཁུ་གཡང་བྷ་ཚང་ལ་རོགས་བྱེད་དུ་འཛོམས། ཨ་ཁུ་གཡང་བྷ་བཟའ་ཟླ་གཉིས་ཀྱིས་བྲེལ་བྲེལ་འཚུབ་འཚུབ་ཀྱིས་ཁྱིམ་མཚེས་དག་ལ་སྣེ་ལེན་བྱས་ཤིང་། ཅུང་ཙམ་ནས་ཚང་མའི་རོགས་རམ་འོག་ལུག་ཁྱུ་ནས་ཤ་གཟན་གཡག་འདྲ་བ་ཞིག་བཟུང་སྟེ་དབྱར་ཤ་བཤའ་བར་བརྩམས།

དེ་རིང་ཁོ་ཚང་ལ་གཅིག་ནས་མགྲོན་པོ་མང་བ་དང་གཉིས་ནས་བྱ་བའང་ཅུང་མང་བས། གཅེས་ཕྲུག་འབུམ་ཁོ་ཕྱུགས་རྫིར་མི་མངག་ཐབས་མེད་བྱུང་། ཨ་ཁུ་གཡང་བྷས་རྩྭ་གང་དུ་བཟང་ཞིང་ཆུ་གང་དུ་འཛོམས་པའི་གནས་རྣམས་ལྷག་ལུས་མེད་པར་འབུམ་ཁོར་བཤད་ཅིང་ལོ་མང་པོར་རང་ཉིད་ལ་ལུས་དང་གྲིབ་མ་བཞིན་འགྲོགས་པའི་རྩིད་ནག་གིས་བརྒྱུས་པའི་འུར་ཆ་དེ་བུར་སྤྲད། ཨ་མ་བཀྲ་ཤིས་མཚོས་རང་གི་བུ་ཆུང་ལ་སྔར་ནས་གྲ་སྒྲིག་བྱས་པའི་ཆར་ལྭ་དང་བྲོ་ཁ་བྱིན་རྗེས། ཆར་ཆེན་དང་ཆུ་ལོག་སོགས་ལ་མཉམ་འཇོག་དགོས་པའི་ཞལ་ཏ་གང་མང་གནང་།

བུ་ཆུང་འབུམ་ཁོ་ནི་ལོ་ན་བཅུ་གཅིག་ལ་སོན་པའི་བྱིས་པ་ཡ་རབས་ཤིག་ཡིན་ཞིང་། གནའ་མི་བོད་ཀྱི་ཁ་དཔེར་བརྒྱད་པ་ཁ་ར་ནོར་རྫིའི་བ་ཐོར་ཟེར་བ་བཞིན་སྔ་མོ་ནས་རང་རྐྱ་རང་གིས་འཕེར་ལ་དེ་རིང་ཡང་ཧ་རེ་ཧུ་རེ་དོན་དག་ཅི་ལ་ཡང་མི་གཡེང་བར། ཆེས་དྭངས་ཤིང་ལྷད་མ་འདྲེས་པའི་མིག་ཟུང་གིས་ཡབ་ཡུམ་གཉིས་ལ་ལྟ་བཞིན་སྒོ་གསུམ་རྩེ་གཅིག་གིས་ཞལ་ཏ་ཚིག་གཅིག་ཀྱང་མི་འདོར་བར་གསན་བཞིན་འདུག

བུ་ཆུང་འབུམ་ཁོས་ལུག་ཁྱུ་དེད་ནས་ལྷས་འདབས་སུ་བུད་དུས། འབྲོག་ཁྱི་སེ་བོས་ཅི་ཞིག་ཚོར་བ་བཞིན་དལ་མོར་ལངས་ཏེ་བདག་པོ་ཆུང་བའི་རྗེས་སུ་སྙེག སྤྱིར་བཏང་གི་ཕལ་བའི་སྒོ་ཁྱི་དག་གིས་རང་ཁྱིམ་དུ་ཕྱུགས་སོགས་བཤའ་བ་མཐོང་དུས་དེར་བལྟས་ཏེ་ས་གང་དུའང་འགྲོ་མི་སྲིད་ལ། ཕར་བདའ་ནའང་ཕྱིར་ལོག་ཡོང་ངེས། ཡིན་ནའང་འབྲོག་ཁྱི་སེ་བོས་དེ་ལ་སྣང་དོགས་ཙམ་ཡང་མི་བྱེད་པར་སྔར་བཞིན་བདག་པོའི་རྗེས་སུ་སྙེག

བུ་ཆུང་འབུམ་ཁོས་ལུག་ཁྱུ་དེད་ནས་སྟོད་ཕྱོགས་ཀྱི་ཨ་མྱེས་གླང་རིའི་འདབས་སུ་ཆས། ཨ་མྱེས་གླང་རི་ནི་ཕྱིང་ཞྭ་མནབས་པའི་བགྲེས་སོང་ཞིག་དང་འདྲ་བར་དུས་ཚིགས་བཞི་བོར་དབུ་རྩེ་གངས་དང་སྐེད་པ་སྨུག་སྤྲིན་གྱིས་བཏུམས་ལ། ངག་རྒྱུན་དུ་ཨ་མྱེས་གླང་རིའི་དབུ་རྩེ་ནས་ཤམ་བྷ་ལའི་ཞིང་ཁམས་མཐོང་ཐུབ་ཟེར། དེ་བས་མཚོ་དམར་སྡེ་བའི་རྒན་དར་གཞོན་གསུམ་དང་བུ་རབས་ཚ་རྒྱུད་ཚང་མ་ཨ་མྱེས་གླང་རི་ལ་ཤིན་ཏུ་དད་ཅིང་ལོ་རེ་རེ་བཞིན་རྒྱུན་ཆད་མེད་པར་ལབ་ཙེ་བསྟོད་པ་དང་བསང་མཆོད་བྱེད་པ་སོགས་ཆོས་ལུགས་ཀྱི་ཆོ་ག་སྣ་ཚོགས་སྤེལ་བཞིན་ཡོད་ལ། ལྷག་པར་དུ་རི་དེའི་སྟེང་གི་ཤིང་རིགས་དང་རི་དྭགས་སྣ་ཚོགས་ནི་གཞི་བདག་ཨ་མྱེས་གླང་རིའི་སྒོ་ཟོག་ཏུ་བརྩིས་ནས་གནོད་པ་དང་འཚེ་བ་ནི་བ་སྤུ་ཙམ་ཡང་མི་བྱེད།

གཡུ་ཡི་ཞུན་མ་གཞོང་བར་འཁྱིལ་འདྲའི་མཚོ་དམར་སྡེ་བའི་དབྱར་ས་རུ་སྔ་ན་མེད་པའི་དྲོད་ཁོལ་དང་གསོན་ཤུགས་ཀྱིས་ཡོངས་སུ་གཏམས་ཤིང་། མཚམས་ལན་རེར་སྐྱི་བསེར་རླུང་གི་རྒྱུ་བ་དང་བསྟུན་ནས་གཞོན་ནུ་ཕོ་མོ་རེ་འགའི་རི་གླུའང་ལ་ལུང་ཀུན་ཏུ་ཁྱབ། རྒྱང་རིང་གི་གསལ་ལ་མི་གསལ་བའི་དེའུ་འབུར་དེའི་རྒྱབ་ནས་ལུག་ཁྱུ་ཞིག་གི་འབའ་སྒྲ་མཆེད་ཅིང་མ་འགྱངས་པར་མ་མོ་རེ་འགས་ལུ་གུ་རེ་ཁྲིད་དེ་གཅིག་རྗེས་གཉིས་མཐུད་ཀྱིས་དེའུ་འབུར་གྱི་སྟེང་ནས་བུད་ཡོང་། ལྟོས་དང་། དེ་ནི་ཨ་ཁུ་གཡང་བྷ་ཚང་གི་ལུག་ཁྱུ་མིན་ནམ།

སྔར་ཨ་ཁུ་གཡང་བྷ་ནི་མཚོ་དམར་སྡེ་བའི་དཔོན་རྒྱུད་ཡིན་པ་ཁོ་ནར་མ་ཟད་རྫི་བོ་དཔེ་མེད་ཅིག་ཀྱང་ཡིན་པས། ངལ་རྩོལ་བསྒྱུར་བཀོད་ཀྱི་སྐབས་སུའང་སྡེ་བའི་ནང་གི་ངལ་རྩོལ་པ་ཕུལ་བྱུང་གི་བྱ་དགའ་ཐེངས་འགར་ཐོབ་མྱོང་། ཨ་ཁུ་གཡང་བྷས་འཚོས་པའི་ལུག་ཁྱུ་ནི་ཤ་ཤེད་དང་གཟུགས་སྟོབས་གང་གི་ཆ་ནས་ཀྱང་གཞན་གྱི་ཕྱུགས་ཟོག་ལས་ཁྱད་པར་དུ་འཕགས་ཤིང་མཚོ་དམར་སྡེ་བའི་ཕྱུགས་ཀྱི་ཡང་རྩེ་ཡིན།

བུ་ཆུང་འབུམ་ཁོས་ལུག་ཁྱུ་འཚོ་སྐྱོང་བྱེད་བཞིན་ཡར་མར་གྱི་ཁོར་ཡུག་གི་མཛེས་ལྗོངས་ལ་ཡང་ཡང་ལྟ་ཞིང་འབྲོག་ཁྱི་སེ་བོ་ནི་སུག་བཞི་དལ་བ་མེད་པར་ལུག་ཁྱུའི་གཡས་གཡོན་དུ་རྒྱུག་ཅིང་མིག་གིས་རྒྱང་ཐག་ཉེ་རིང་གང་རུང་ལ་མྱུལ་ཞིབ་དང་ཉེན་ཟོན་བྱེད།

འབུམ་ཁོ་ནི་མདུན་གྱི་དེའུ་འབུར་དེའི་སྟེང་བུད་ནས་བལྟས་པ་ན། གོས་ལྗང་གི་ས་གདན་ཐང་ལ་བཏིངས་འདྲའི་སྤང་ཐང་དུ་སྦྲ་ནག་ཐར་ཐོར་ཕུབ་ཡོད་པ་ནི་འབྲོང་གཡག་དར་མས་དགྲ་དཔུང་འཇོམས་ཕྱིར་རྭ་རྩེ་བགྲད་དེ་རྔམ་བརྗིད་ཀྱིས་འགྱིང་བ་དང་གཉིས་སུ་མེད་ལ། སྦྲ་འདབས་སུ་བུད་མེད་འགའ་རེས་ཕྱུར་བ་སྐེམ་པ་དང་ཐགས་འཐག་པ། འོ་མ་དཀྲོགས་པ་སོགས་དེ་རིང་གི་ཉི་མའི་དྲོད་ཁོལ་གྱི་དུས་ཡུན་ཐུང་ངུ་འདི་དམ་འཛིན་བྱས་ཏེ་རང་རང་གི་ལས་ཀ་གང་ཡིན་པ་དེ་ལ་བྲེལ།

བུ་ཆུང་འབུམ་ཁོའི་འདྲེན་བྱེད་ཟུང་ནི་དབྱར་གྱི་བུ་མོའི་མཛེས་སྡུག་གི་བསླུ་བྲིད་ཀྱིས་ཡོངས་སུ་བཀུག་ཅིང་། ཨ་མྱེས་གླང་རིའི་རི་འདབས་སུ་ཇི་ལྟར་སླེབས་པའང་མ་ཚོར། ཁོས་ཨ་ཕའི་མངགས་ཆ་བཞིན་རང་གི་ལུག་ཁྱུ་རྩྭ་ཆུ་བཟང་ཞིང་རྩི་བཅུད་འཛོམས་ས་ཞིག་ཏུ་དེད་རྗེས། ཕ་བོང་ཆེན་པོ་ཞིག་གི་སྟེང་དུ་བུད་དེ་ཅི་ཞིག་འཚོལ་བ་བཞིན་བོད་ལྭའི་རུམ་ནང་དུ་ལག་ཉོབ་ཐེངས་འགའ་བྱས། དེ་ནས་རྒྱུ་སྤུས་བཟང་བའི་ཤིང་གི་གླིང་བུ་ཞིག་ཕྱིར་བླངས། གླིང་བུ་དེ་ནི་ཨ་ཁུ་གཡང་བྷས་སྔར་ལོའི་ལོ་ཚོང་སྐབས་སུ་རྫོང་ཐོག་ནས་རང་གི་བུ་ལ་ཉོས་ཡོང་བ་ཡིན་ཞིང་འབུམ་ཁོ་དེར་ཧ་ཅང་དགའ། ཁོས་སྔར་ཨ་ཕས་རང་ལ་གླིང་བུ་འབུད་སྟངས་ཇི་ལྟར་བསྟན་པ་བཞིན་བུས།

བསིལ་རླུང་འཇམ་པོ་ཞིག་གི་རྒྱུ་བ་དང་བསྟུན་ནས་གླིང་བུའི་དབྱངས་སྙན་དེ་མཚོ་དམར་སྡེ་བའི་རི་ལུང་ཐང་གསུམ་ཀུན་ཏུ་ཁྱབ་ཅིང་། མེ་ཏོག་གི་ཟེའུ་རྡུལ་ལ་རྔམ་པའི་གཡུ་སྦྲང་དང་ཕྱེ་ལེབ་ཀྱི་ཚོགས་ནི་འཕུར་ལྡིང་གི་རྩེད་འཇོར་ཅི་དགར་རོལ་ལ་བྱེའུ་རེ་འགས་ཀྱང་སྐབས་འགར་མཁའ་དབྱིངས་སུ་གཤོག་འགྱུར་ངོམ། ད་ནི་གསེར་མདོག་གི་ཉི་འོད་དེ་ཚམ་ཚོམ་མེད་པར་ཀུན་གསལ་ཡངས་པོའི་ཕང་བ་རུ་འཕགས་ཤིང་སྔར་ལས་ལྡབ་འགྱུར་གྱི་ཚ་ཟེར་འགྱེད།

མེ་ཏོག་གི་དྲི་བསུང་དང་ཁུ་བྱུག་གི་གསུང་སྙན་གྱིས་བུ་ཆུང་འབུམ་ཁོའི་ལུས་སེམས་ལ་སྨྲ་མི་ཤེས་པའི་བདེ་སྣང་ཞིག་བསྐྲུན་ཅིང་རང་དབང་མེད་པར་མགྲིན་པ་འཕྲུལ་གྱི་འཁོར་ལོའི་རྩ་མདུད་གྲོལ་ཏེ། གྲེ་བ་བསལ་ཙམ་བྱས་ནས་དམངས་གླུ་ཞིག་འདི་ལྟར་བླངས་སོང་།

འོ་ཡེ—

སེར་པོ་གསེར་ལ་རིན་པ་མེད་གོ། །