མདང་དགོང་། ཁེ་དགོང་མོ……བསྟུད་མར་དགོང་ཞག་གསུམ་ལ་ཕུག་རོན་ཁོ་ན་རྨི་ལམ་དུ་རྨིས་པས།མགོན་པོ་སྐྱབས་ད་ནངས་བྱ་མགོ་མ་གྲགས་པའི་དུས་ནས་ཉལ་ས་མི་བདེ་བའི་ཚོར་བ་ཞིག་གིས་གཉིད་ལས་བསླངས་བྱུང་།སྒྲོན་མེ་མ་སྦར་གོང་གི་ཁང་བའི་ནང་གི་མུན་པ་རབ་རིབ་ཏུ་སྣང་ན་ཡང་ཁོའི་མིག་ལམ་དུ་ད་དུང་ཕུག་རོན་གསོན་པོ་ཞིག་སྔོ་ཁྲ་ལེར་ཕར་འཕུར་ཚུར་འཕུར་བྱེད་པའི་འཕྲུལ་སྣང་སྟེར་ཅིང་།རྨི་ལམ་ནང་གི་ཕུག་རོན་རྣམས་འདབ་ཆགས་གཅིག་ཏུ་མ་ངེས་ཀྱང་ཚང་མ་གཡས་རྐང་འཐེང་བོ་ཅན་དག་ཡིན་པ་ནི་དངོས་གནས་ཡ་མཚན་པ་ཞིག་རེད།འོན་ཀྱང་། ཕུག་རོན་དེ་དག་རྨི་ལམ་དུ་འཁོར་ཚུལ་གཏན་ནས་མི་འདྲ་སྟེ། མཚན་མོ་དང་པོར་ལུས་ལ་རྨས་ལྕི་མོ་ཞིག་ཕོག་འདུག་ཅིང་སྒྲོ་སྤུའི་གསེབ་ནས་ཁྲག་དམར་ཙ་ར་ར་བཞུར་གྱིན་གདའ་ལ།ཞག་མ་གཉིས་པར་གཤོག་པ་གཉིས་ཕྲལ་འདུག་པས་གཏན་ནས་འཕུར་སྟབས་མ་བདེ་བར་ས་ན་ཙི་གུ་རྒྱུག་རྒྱུག་བྱེད་ཅིང་།མདང་དགོང་ཡང་རྔ་སྒྲོ་རྩ་བ་ནས་བོར་འདུག་པས་ཨ་བྲ་ཞིག་གི་ཚུགས་ཀ་དང་ཨ་ན་མ་ན་རེད། མགོན་པོ་སྐྱབས་ལ་མཚོན་ན་ཡན་ལག་སྐྱོན་ཅན་གྱི་འདབ་ཆགས་ཤིག་རྨི་ལམ་དུ་ཡང་ཡང་འཁོར་བ་ནི“རྟགས་དང་རྟེན་འབྲེལ་ངན་པ”ཞིག་ཏུ་འདོད་ཀྱིན་ཡོད་པས་རྣམ་རྟོག་དང་ཚིག་པ་མི་ཟ་བ་ག་ལ་སྲིད།དེར་བརྟེན། ཁོའི་གནས་སྐབས་ཀྱི་སེམས་པ་བློང་བློང་བོར་གྱུར་བྱུང་བ་དང་། ད་ནངས་ལྷག་པར་ཞེ་ཤོར་ནས་ནམ་རྒྱུན་གྱི《གདུགས་དཀར》གྱི་ཁ་ཏོན་གཏིང་བརྗེད་དུ་གྱུར་འདུག་པར་མ་ཟད།ནངས་བསང་གཏོང་རྒྱུ་ཡང་རྩ་བ་ནས་བརྗེད་དེ་རེ་ཞིག་ལ་ཉལ་སའི་ནང་དུ་ཙོག་པུར་ལུས་པ་དང་། མཚམས་རེར་ཁ་ནས་རང་དབང་མེད་པར་དངན་པ་རིང་བོ་གཅིག་རྗེས་གཉིས་མཐུད་དུ་ཤོར་ཡོང་།ཅང་མ་འགོར་བར། སྐྱ་རེངས་ཁད་ཀྱིས་ཤར་འོངས་པ་དང་ཁང་བའི་ནང་རིམ་གྱིས་ཇེ་གསལ་དུ་གྱུར། སྐབས་དེར།མགོན་པོ་སྐྱབས་ཀྱིས་སྒེའུ་ཁུང་ནས་ཕུག་རོན་ཁྱུ་ཞིག་བར་སྣང་དུ་དྲང་ཐད་ཀྱིས་རྒྱང་རིང་དུ་འཕུར་འགྲོ་བ་མཐོང་ལ།རེ་ཞིག་ནས་སླར་ཡང་ཁོའི་མཐོང་ལམ་དུ་གསེག་འཕུར་གྱིས་རུབ་ནས་ཐོན་ཡོང་བ་ནི་དེ་ལས་ལྷག་པས་གསལ་བོར་མཐོང་ཐུབ་པ་རེད།
མགོ་ནག་བོད་པ་སུ་ཡིན་ཡང་རྣམ་རྟོག་ཅུང་ཟད་རེ་མེད་པ་མི་སྲིད་མོད།མགོན་པོ་སྐྱབས་ལ་དངོས་གནས་རྣམ་རྟོག་དེ་འདྲ་ཆེ་བ་ནི་ཁོ་ལ་ཨ་ཕའི་ཤུགས་རྐྱེན་ཐེབས་པ་ལོས་ཡིན་ཏེ།ཁོའི་ཨ་ཕ་ནི་ཡུལ་ལུང་འདིའི་རྩིས་པ་འབའ་ཞིག་ཡིན་ཞིང་། ནངས་དགོང་མཚན་གསུམ་མེད་པར《གདུགས་དཀར》ཁ་ཏོན་བྱེད་པར་ཤིན་ཏུ་མོས་ཤིང་།དེ་བཞིན་དུ་འཇིག་རྟེན་གྱི་བྱ་དངོས་མཐའ་དག་རྟེན་ཅིང་འབྲེལ་བའི་ཆོས་ཉིད་ཅན་དུ་བསྒོམས་ནས་རྟགས་དང་རྟེན་འབྲེལ་ལ་བརྟག་པར་ཤིན་ཏུ་དགའ།དཔེར་ན། མི་སྣོད་སྟོང་ཐོགས་པ་དང་དཀར་ཡོལ་སེར་ག་ཅན། མི་དང་དུད་འགྲོ་དབང་བོ་སྐྱོན་ཅན་དག་དང་འཕྲད་ཐེངས་རེར་ཡིད་སེམས་མ་དགའ་ལོག་གེར་འགྲོ་ལ།ཁྱད་པར་དུ་བྱ་བ་གང་དང་ཅི་ཞིག་བསྒྲུབ་ཀྱང་སྔོན་ལ་རྟགས་དང་རྟེན་འབྲེལ་ངན་པ་མཐོང་ཚེ། མྱུར་དུ་རྩིས་བཏབ་སྟེ་སྡེ་བའི་གཉའ་ན་ཡོད་པའི་མཆོད་རྟེན་ལ་སྐོར་བ་རྒྱག་པའམ་ཡང་ན་ཁྱིམ་གྱི་མཆོད་ཁང་དུ་འཛུལ་ནས་བཤགས་པ་དང་སྨོན་ལམ་འདེབས་ཅི་ནུས་བྱེད་ཅིང་།སྐབས་འགར་ཚབས་ཆེ་ན་བཅའ་བ་དང་རིམ་གྲོ་ཞུས་ཏེ་དེ་ཉིད་ཟློག་ཐབས་སུ་བརྩོན་པ་ཡིན།
“རྨི་ལམ་སྟོང་བ་ངན་པ་བཟློག”དགོས་དོན་ཅི་ཞིག་ཡིན་ནམ།བསྟུད་མར་རྨི་ལམ་དུ་འཁོར་བའི་ཕུག་རོན་དེས་མགོན་པོ་སྐྱབས་ལ་རྟགས་དང་རྟེན་འབྲེལ་ངན་པ་ཅི་ཞིག་གཏོང་གིན་ཡོད་པ་རེད་ཨང་།གློ་བུར་དུ། ཁོའི་ཡིད་ལ་ཕུག་རོན་ནི་ལྷ་བྱ་ཡིན་པའི་ངག་རྒྱུན་དེ་འཁོར་བྱུང་། ངོ་མ། མགོ་ནག་བོད་པ་ཚོས་ཕུག་རོན་ནི་ཐན་བྱ་ཁཱ་ཏ་དང་མི་འདྲ་བར་ལྷ་བྱ་འདང་ཅན་ཞིག་ཏུ་ངོས་འཛིན་བྱེད་པ་མ་ཡིན་ནམ།འོ་ན། ཕུག་རོན་འཐེང་བོ་རྨི་ལམ་དུ་འཁོར་བ་དེ་ནི་རྟགས་དང་རྟེན་འབྲེལ་ངན་པ་ཞིག་ཏུ་བརྩི་བ་ཡིན་ནམ།ཡང་ན་བཀྲ་ཤིས་ཤིང་དོན་འགྲུབ་པའི་མཚན་མ་ཞིག་ཏུ་ལྟ་བ་ཡིན། མགོན་པོ་སྐྱབས་ཀྱིས་འདང་བརྒྱབ་ཀྱིན་བརྒྱབ་ཀྱིན་ཡ་ཆུང་ཁོག་པ་ཧྲིལ་བོར་འགལ་འདུའི་སྤྲིན་ཕུང་ལང་ལོང་དུ་འཕྱུར་ཡོང་བ་སྟེ།ཕྱོགས་གཅིག་ནས“རྨི་ལམ་ཐམས་ཅད་སྟོང་བའི་རང་བཞིན་ཅན་ཡིན་པའི”བཤད་ཚུལ་ལ་བདེན་སྣང་སྐྱེས་པ་དང་།ཕྱོགས་གཞན་ཞིག་ནས་འབྱུང་འགྱུར་གྱི་བྱ་བའི་ལེགས་ཉེས་དང་དགེ་སྡིག བཟང་ངན་ཅི་རིགས་རྨི་ལམ་ལ་བརྟག་ན་ད་གཟོད་སྔོན་དཔག་བྱེད་ཐུབ་པར་འདོད།གལ་ཏེ། མགོན་པོ་སྐྱབས་ཀྱི་ཕ་རྒན་འཚོ་ཞིང་གཞེས་པའི་དབང་དུ་བཏང་ན། རྨི་ལམ་དེ་ད་ལྟ་ཉིད་དུ“རྩིས”ཀྱི་རྒྱ་མའི་སྟེང་དུ་བཞག་ཚེ་དེ་མ་ཉིད་དུ་ལྕི་ཡང་གསལ་བོར་འཇལ་ཐུབ་ངེས་ཡིན་མོད།འོན་ཀྱང་། འཇིག་རྟེན་གྱི“གསང་བ”ཞིག་བརྟོལ་པར་དེ་འདྲའི་མཐུན་རྐྱེན་འགྲིག་མོ་ཞིག་གང་ན་ཡོད།
མགོན་པོ་སྐྱབས་ད་ལྟ་ཕོ་ལོ་ཉེར་ལྔ་ཡོལ་འདུག་ལ། འཆར་གཞི་ལྟར་ན་ཁོས་ལོ་འགའི་སྔོན་དུ་ཆུང་མ་ཞིག་བསུ་རྩིས་བྱས་མོད།འོན་ཀྱང་། དུས་དེ་གའི་ནང་དུ་ཕ་མ་གཉིས་ལོ་གཅིག་གི་མགོ་རྔར་ཚེ་ལས་འདས་པ་དང། དེའི་ཁར་ཕུ་བོ་ཡང་སྐྲན་ནད་ཀྱིས་ལྔ་ལམ་དུ་བརྫངས་པའི་སྟབས་ཀྱིས་ཁོ་རང“སྐྱིད་ཆེས་པའི་ཉིན་ལ་དགོད་རྒྱུ་མི་ཡོང་།སྡུག་ཆེས་པའི་ཉིན་ལ་ངུ་རྒྱུ་མི་ཡོང”ཟེར་བའི་ཚད་དུ་བསྐྱལ་ནས་འཇིག་རྟེན་སྐྱོང་རྒྱུ་ཕར་ཞོགཐ་ན་ཤུལ་དུ་ལུས་པའི་ནུ་བོ་གཅིག་པུ་ཡང་གཉོར་སྐྱོང་བྱེད་སྟབས་མི་བདེ་བར་གྱུར། དེར་བརྟེན།ཁོས་མི་ལོ་ལྔ་དྲུག་ཙམ་ལ་ཨ་ཕའི་སྲོལ་རྒྱུན་དང་གོམས་སྲོལ་མཇུག་སྐྱོང་བའི་ལས་ལ་གཞོལ་ཏེ།ནངས་མོ་རེར《གདུགས་དཀར》ཚར་འགའ་རེ་ཁ་ཏོན་བྱེད་པ་དང་དེ་ནས་ཡུལ་ལྷ་གཞི་བདག་ལ་བསང་མཆོད་ལན་རེ་ཕུལ་རྗེས་ད་གཟོད་ཁྱིམ་གྱི་ལས་ཀར་འབད་ཐབས་ཁོ་ན་བྱེད་པ་རེད།ཡིན་ན་ཡང་། ཁོས་འཇིག་རྟེན་པ་ཞིག་ལ་མཚོན་ན་ཁྱིམ་ཐབ་སྐྱོང་རྒྱུ་ནི་མི་ཚེའི་རིན་ཐང་མངོན་འགྱུར་བྱེད་པའི་ཐབས་ཤེས་ཆེས་གཙོ་བོ་ཞིག་ཡིན་པ་དང་།རིན་ཐང་དེ་མངོན་འགྱུར་བྱེད་དགོས་ན་ཐོག་མར་རང་ཉིད་ཀྱི་ཞེ་དང་སྣང་བ་མཐུན་པའི་བཟའ་ཟླ་ཞིག་ལ་བརྟེན་དགོས་པའི་གནས་ལུགས་སྔར་ནས་གསལ་བོར་རྟོགས་འདུག་པ་རེད།
ཞེ་ཧ་ཅང་སྨྲེང་བའི་མཚན་མོ་ཞིག་ལ། མགོན་པོ་སྐྱབས་ཀྱིས་སླར་ཡང་ཡིད་ལ་དོན་དག་མང་པོ་དྲན་པ་དང་མིག་ལམ་དུ་མི་གདོང་མང་པོ་ཤར་འོངས་ལ།མི་གདོང་མང་པོའི་ཁྲོད་ནས་རང་དང་ན་ཚོད་མཉམ་པའི་བུ་མོ་ཞིག་གི་གདོང་རིས་གསལ་བོ་ཞིག་ཅི་ནས་ཡལ་ཐབས་མ་བྱུང་།བུ་མོ་དེའི་མིང་ལ་འབྲུག་མོ་ཟེར་ཞིང་། སྐྱེ་གཟུགས་དང་མོ་སྒོ། ལག་ལས་ཀ་དང་མི་གཤིས་སོགས་གང་ཐད་ནས་ཁ་ཡ་ན་ཟླའི་ཁྲོད་དུ་ཡང་རྩེར་སོན་པ་ཞིག་ཡིན།འབྲུག་མོའི་སྡེ་བའི་མིང་ལ་ཁྱུང་མགོ་ཐང་ཟེར་ཞིང་། ཁྱུང་མགོ་ཐང་སྡེ་བ་དང་མགོན་པོ་སྐྱབས་ཀྱི་སྡེ་བ་གཉིས་ནི་སྔོན་ཆད་ནས་རུ་ཁག་ཆེན་པོ་གཅིག་གི་ཁོངས་གཏོགས་ཡིན་པས་ད་ལྟ་ཡང་སྡེ་དཔོན་གཅིག་གི་ལག་འོག་ཏུ་བསྡུས་ནས་འདུགསྤྱིར་སྡེ་བ་དེ་གཉིས་ཀྱི་བར་ན་གྲམ་ཆུ་ཆུང་ཆུང་ཞིག་མ་གཏོགས་མེད་པས་མཚེས་སྡེ་རུ་ཆགས་ཡོད་པ་དང་།མཚེས་སྡེའི་བར་དུ་ཀུང་ཧྲེ་ནས་ནམ་རྒྱུན“མཐུན་སྒྲིལ་དང་ཡར་ཐོན”གྱི་ཁ་གཡང་སྒྲོག་གིན་ཡོད་ན་ཡང་།ཐོན་སྐྱེད་འགན་འཁྲི་ལམ་ལུགས་ལག་བསྟར་བྱས་མ་ཐག་པ་ནས་བཟུང་སྡེ་མི་ཧམ་པ་ཅན་ཁ་ཅིག་དཔལ་འབྱོར་ལ་ཞེན་དྲགས་པས་རྒྱུན་པར་ས་རྩོད་ཆུ་རྩོད་ལ་བརྟེན་ནས་སྡེ་བ་གཉིས་ཀྱི་བར་དུ་གྱོད་དང་ཁ་མཆུ་བསླངས་པས་སྤྱིར་བཏང་གི་སྡེ་མི་ཚོ་ཕར་ཞོགཐ་ན་ཤ་ཉེ་དག་གི་བར་གྱི་འབྲེལ་བ་ཡང་ཤིན་ཏུ་མི་བཟང་བའི་གནས་སུ་བསྐྱལ། རྒྱུ་མཚན་དེའི་དབང་གིས་ད་ལྟ་ཡང་སྡེ་མི་ཚོའི་བར་དུ་འགྲོ་འོང་དེ་འདྲ་མེད་ལ།ཁྱད་པར་དུ་གཉེན་གྱི་འབྲེལ་བ་འཛིན་མཁན་ཤིན་ཏུ་མངོན་གསལ་གྱིས་ཇེ་ཉུང་དུ་འགྲོ་བཞིན་འདུགགལ་ཏེ་སྡེ་བ་གཉིས་ཀྱི་ཕོ་མོ་རེ་མཉམ་དུ་འགྲོ་བའམ་ལྐོག་ཏུ་མཉམ་གཅིག་ཏུ་སྡོད་པ་མཐོང་ཚེ་ཚང་མས་དེ་ནི་ཆེས་ཐན་ལྟས་ཀྱི“གསར་འགྱུར་ཞིག་ཏུ་ལྟ་བ་ཡིན།དགའ་འོས་པ་ཞིག་ལ། དེ་སྔོན་སྡེ་བ་གཉིས་ཀྱི་འབྲེལ་བ་ཤིན་ཏུ་བཟང་བའི་ཐོན་སྐྱེད་རུ་ཁག་གི་སྐབས་སུ།ཕྱོགས་གཉིས་ཀའི་བྱིས་པ་ཚོ་ནམ་ཡང་ཕྱུགས་རྫིར་སོང་ནས་ཕུ་ནུ་མིང་སྲིང་ལྟར་མཉམ་གཅིག་ཏུ་རྩེད་མོར་གཡེང་ནས་འཚོ་བ་རོལ་མྱོང་ལ།དེ་དུས་མགོན་པོ་སྐྱབས་དང་འབྲུག་མོ་གཉིས་ཀྱིས་ཀྱང་མཉམ་ཏུ་རི་མགོ་གཅིག་ཏུ་ཕྱུགས་འཚོས་པར་མ་ཟད།མགོན་པོ་སྐྱབས་ཨ་ཕ་དང་འབྲུག་མོ་ཨ་མ་བྱས་ཏེ“ཁྱིམ་ཚང་བསྐྱངས”མྱོང་ཞིང་། “རྟ་ཞིག་ཡོད་པ་ཐོ་རུ་ཡིན”ཞེས་པའི་གླུ་ཆུང་དང“ཆུ་དང་ཆུ་མགོ་ཆ་མེད་རེད”ཅེས་པའི་ལ་གཞས་ཀྱང་ལེན་རེས་བྱས་མྱོང་།
མགོན་པོ་སྐྱབས་ནི་ལྷམ་བཟོ་པ་མིང་གྲགས་ཅན་ཞིག་ཡིན།ཁོའི་ལག་རྩལ་མཐའ་དག་ནི་དང་ཐོག་རང་གི་ཕུ་བོ་ལ་བརྟེན་ནས་བྱུང་བ་ཡིན་ཀྱང་། ཕྱིས་སུ་ཕུ་བོ་ལས་ཆེས་ཆེར་འགོངས་འདུག་པས།སྡེ་བ་གཞན་དག་གི་ལྷམ་བཟོ་པ་རྣམས་ཀྱིས་ཀྱང་ཁས་ལེན་གནང་གི་ཡོད་ལ། སྡེ་བའི་ནང་གི་སྐྱེས་ཕོ་མོ་རྒན་དར་གཞོན་གསུམ་མི་ཉུང་བས་ཀྱང་ཁོས་བཟོས་པའི་ཀོ་ལྷམ་དང་རས་ལྷམ་སྣ་ཚོགས་གྱོན་ནས་ལོ་གསར་དང་དུས་སྟོན་ལ་རོལ་བར་བྱེད་པ་ནི་ཆེས་རྒྱུན་མཐོང་གི་སྣང་ཚུལ་ཞིག་རེད།ཐོན་སྐྱེད་འགན་འཁྲི་ལམ་ལུགས་ལག་བསྟར་མ་བྱས་གོང་གི་སྔ་ལོར། རྫོང་ཐོག་ཏུ་ལག་ཤེས་བཟོ་ལས་པ་སྐོར་ཞིག་ལ་བྱ་དགའ་ཐེངས་ཤིག་བྱིན་མྱོང་ཞིང་།ཁོའི་བྱ་དགའི་རྟགས་མ་དེ་ད་དུང་ཁོ་ཚང་གི་ཁང་ཁྱམས་ཀྱི་བན་ཤིང་ངོས་སུ་མདོག་ལོག་རག་བར་དུ་སྦྱར་འདུགབྱ་དགའི་རྟགས་མ་དེ་དང་ཐོག་གནང་སྐབས་ཚོགས་རའི་ནང་དུ་མི་ཚོགས་ནག་རུབ་བེར་ཚོགས་འདུག་ཅིང་།ཀུན་གྱི་ཐལ་མོ་རྡེབ་སྒྲས་གནམ་ས་གཉིས་ནས་འབྲུག་སྟོང་དུས་གཅིག་ཏུ་གླལ་བ་དང་མཚུངས་ལ། འབྲུག་མོ་ཡང་ཚོགས་ཐོག་དེར་ཞུགས་ནས་ཡུད་ཙམ་ལ་ཐལ་མོ་རྡེབ་མཚམས་མ་བཞག་པ་རེད།
ཐོན་སྐྱེད་འགན་འཁྲི་ལམ་ལུགས་ལག་བསྟར་བྱས་པའི་ལོ་འགའི་རྗེས་ཤིག་ལ།མགོན་པོ་སྐྱབས་དང་འབྲུག་མོ་གཉིས་གྲམ་ཆུ་ཁར་ཐེངས་ཤིག་ཕྲད། དོན་དམ་དུ་ཁོ་གཉིས་ཀྱིས་དེའི་ཡར་སྔོན་ནས་ཀྱང་སྡེ་བའི་སྡོང་ར་དང་ཞིང་ཁ།རི་བོའི་ཕག་རྒྱབ་སོགས་སུའང་གཅིག་སེམས་གཅིག་ལ་འདྲེས་ཏེ་དམིགས་ཡུལ་ཅན་གྱི་འཇིག་རྟེན་སྣང་བ་ཐེངས་མང་པོར་གླེང་མྱོང་ལ།སྐབས་དེ་དག་གི་རིང་ལ་ད་ལྟའི་འདི་ལྟར་གླིང་གི་མི་ཁ་དང་སྡེ་བའི་གྱོད་གཞི་ལ་འཛེམ་དོགས་བྱེད་མི་དགོས་པས་འཇིག་རྟེན་སྣང་བ་ངོ་མ་དེར་རོལ་ཆོག་པ་རེད།
“ཁྱོད་དེ་རིང་ཡོང་སྔ་བ་ལ།” མགོན་པོ་སྐྱབས་ཀྱིས་སེམས་ཁུར་གྱི་ཚུལ་གྱིས“མི་གཞན་པས་མ་མཐོང་ངམ”ཟེར།
“ཁྱོད་སེམས་བདེ་མོ་བྱོས། སུས་ཀྱང་མ་མཐོང་། ཁྱོད་ཀྱི་ཕ་མ་གཉིས་ཀྱི་ན་བ་ཇི་འདྲ་རེད།”འབྲུག་མོའི་སྐད་མགོ་གཉོམ་ཞིང་སྙན་ཆ་ལྡན།
“ད་ལྟ་གཉིས་ཀ་ཡང་ཅུང་ཟད་ཇེ་དགར་སོང་འདུག”
“འོ་ན་བཟང་གི ད་ལོ་ཡང་རྫོང་ཐོག་ཏུ་ལག་ཤེས་བཟོ་ལས་པ་ཚོས་ལག་རྩལ་འགྲན་བསྡུར་བྱེད་རྒྱུ་རེད་ཟེར་བ་ཨེ་བདེན།”འབྲུག་མོ་དགའ་དུངས་དུངས་བྱེད།
“དེ་བདེན་ཚོད་འདུག ད་སྐབས་གོང་རིམ་གྱིས་ལག་རྩལ་པར་མཐོང་ཆེན་བྱེད་ཀིན་འདུག”
“སླར་ཡང་བྱ་དགའ་ཐེངས་ཤིག་ལོན་པའི་སྨོན་ལམ་འདེབས།”འབྲུག་མོས་ལག་ཟུང་གི་ཐལ་མོ་སྙིང་གར་སྦྱོར་ཙམ་བྱས།
“ལགས་སོ།། ……ཨེ། ཁྱོད་ཀྱིས་སྡེ་དཔོན་གྱི་ལག་རྟགས་དེ་ཕྱིར་ཨེ་བསློགས།”མགོན་པོ་སྐྱབས་ཀྱིས་ཅུང་ཟད་སེམས་ཁྲལ་དང་བཅས་བཤད།
“བསློགས་ཟིན། ……ཡིན་ན་ཡང་། ངའི་ཕ་མ་གཉིས་ཀྱིས་དོན་འདི་ཤེས་མེད།”
“ ……གལ་ཏེ་ད་ལོ་བྱ་དགའ་རེ་ལོན་ཐུབ་པ་བྱུང་ན་ངས་ཁྱོད་སང་ལོའི་བར་དུ་མི་བསྐྱུར་ཁོ་ཐག་ཡིན།”མགོན་པོ་སྐྱབས་ཀྱིས་འབྲུག་མོར་བཅར་ཅི་ཐུབ་ཀྱིས་སྐད་མགོ་གློ་བུར་དུ་ཇེ་མཐོར་སོང་།
“འོ་ལོས། ངས་ཀྱང་དེ་འདྲ་ཞིག་ལ་རེ་བ་བྱེད་ཀི་ཡོད།”འབྲུག་མོས་ཀྱང་མགོན་པོ་སྐྱབས་དང་བཅར་ཅི་ཐུབ་བྱས།
“ཁྱོད་ཀྱི་རྐང་བ་ཡ་གཅིག་མདུན་དུ་རྐྱོངས་དང་།” མགོན་པོ་སྐྱབས་ཀྱིས་ཕོ་ཚོད་ཀྱིས“ངའི་ཁྱོད་ལ་ལག་རྟགས་སུ་ཀོ་ལྷམ་ཆ་གཅིག་བཟོ་བར་འདོད”ཟེར།
འབྲུག་མོས་སྐྱེངས་ཉམས་ཤིག་བཏོད་ནས“ངའི་གཉན་རྐང་འདི་ལ་ཁྱོད་ཀྱི་ཀོ་ལྷམ་ཞིག་ཨེ་འབབ”ཟེར་ནས་གཡས་རྐང་དལ་མོས་མགོན་པོ་སྐྱབས་ཀྱི་མདུན་དུ་བསྲིངས།
མགོན་པོ་སྐྱབས་ཀྱིས་འབྲུག་མོའི་ལྷམ་འཕུད་རོགས་བྱས་ཏེ།ཚན་རིག་པ་ཞིག་གིས་གནའ་རྫས་ཤིག་ལ་རྟོག་དཔྱོད་བྱེད་པ་ལྟར། ཐོག་མར་རྐང་བའི་མཐའ་གཅིག་དཀྱིལ་མཐོ་རུ་བཅལ་བ་དང་དེ་ནས་མགོ་བོ་འཕྲེད་དུ་ལྕོག་ལྕོག་གིས་གཡས་ལྟ་གཡོན་ལྟ་ཙམ་གྱིས་ཡིད་ཚིམ་པའི་ངང་ནས་རྩིས་ཤིག་བླངས་རྗེས།“ངས་མྱུར་དུ་ཁྱོད་ལ་ལག་རྟགས་ཤིག་བསྐུར་ངེས་ཡིན”ཟེར།
“འོ་ན་འུ་གཉིས་ཀྱི་བར་པ་སུ་འཚོལ་རྒྱུ།” འབྲུག་མོའི་སྐད་མགོ་ཡང་ཅུང་ཟད་ཇེ་དམར་གྱུར་སོང་།
“འུ་གཉིས་རང་དབང་རང་འཐད་ཡིན་པས་བར་པ་མེད་ན་མི་ཆོག་གམ།”
“གངས་ཅན་བོད་ལ་དཔེ་དང་། ས་ནག་ཐང་ན་ལམ་ཟེར་བ་མ་གོའམ།བར་པ་མེད་པའི་གཉེན་དང་གོང་བ་མེད་པའི་གོས་ཤིག་གང་ན་ཡོད།” འབྲུག་མོས་དགོད་བཞིན་དུ་བཤད་བྱུང་།
དངོས་གནས། གཞན་ལ་བཟའ་ཟླ་བཙལ་ཏེ་གཉེན་སྒྲིག་ལ་མཐུན་རྐྱེན་སྦྱོར་བའི་མི་ལ“བར་པ”ཟེར་བ་དང་།ངེས་པར་དུ“བར་པ”བརྒྱུད་དེ་གཉེན་བསྒྲིག་ཏུ་འཇུག་པའི་ལས་ཀ་དེ་ནི“གངས་ཅན་བོད་ཀྱི་དཔེ་དང་ས་ནག་ཐང་གི་ལམ”ཡིན།དེ་ནས་བཟུང་། མགོན་པོ་སྐྱབས་ཀྱིས་བར་པ་ལ་བརྟེན་ནས་འབྲུག་མོ་གཉེན་དུ་སློང་བའི་འཆར་གཞི་འཐེན་པ་དང་།ལག་རྟགས་དེ་ཉི་བཟང་སྐར་བཟང་ཞིག་ལ་རེ་ཞིང་སྒུག་ནས་གྲ་སྒྲིག་མཛད་དགོས་རྒྱུ་རེད་སྙམ།
ཡིན་ན་ཡང་། འདས་དོན་ནི་འདས་དོན་ཉིད་ལ་གཏོགས་ཏེ།ཕྱིས་ཀྱི་ཁྱིམ་ཚང་གི་གློ་བུར་བའི་དོན་རྐྱེན་དེ་དག་གིས་མགོན་པོ་སྐྱབས་དང་འབྲུག་མོའི་བརྩེ་དུངས་ཀྱི་མར་ལོ་རེ་ཞིག“དཀག”ཏུ་བཅུག་སྟེ་ལག་རྟགས་བཟོ་བའི་ཁས་ལེན་དང་དམ་བཅའ་ཡང་ཡིད་བཞིན་དུ་ལག་བསྟར་བྱེད་ཐབས་མ་བྱུང་།……
ནངས་ཇ་སྔ་འཐུང་བྱས་རྗེས། མགོན་པོ་སྐྱབས་ཀྱིས་ད་གཟོད《གདུགས་དཀར》ཟློ་བཞིན་རང་གི་ཨ་ཕ་དང་འདྲ་བར་སྡེ་བའི་གཉའ་ན་ཀྲོང་ངེར་འགྱིང་བའི་མཆོད་རྟེན་ལ་སྐོར་བ་རྒྱག་ཏུ་སོང་།མཆོད་རྟེན་དེ་ནི་སྔོན་དུས་བླ་ཆེན་ཞིག་གིས་སྡེ་བ་འདིའི་མི་ལ་ན་ཚ་དང་ཕྱུགས་ལ་གོད་ཁ་བཟློག་པའི་ཆེད་དུ་བཞེངས་པར་བཤད་ལ།དེ་ལས་ཀྱང་སྐོར་བ་ཚད་མེད་བརྒྱབ་སྟེ་དད་པས་སྨོན་ལམ་བཏབ་ན་བགེགས་ཀྱི་མཚན་མ་སྣ་ཚོགས་མྱུར་དུ་ཞི་བའི་བྱིན་རླབས་ཆེན་པོ་ལྡན་པར་གྲགས།དེ་བས། མཆོད་རྟེན་གྱི་མཐའ་འཁོར་ན་སྡེ་བ་འདི་གའི་མི་ཁོ་ན་མ་ཡིན་པར་སྡེ་བ་གཞན་པའི་དད་ལྡན་མང་པོ་ཡང་བུང་བའི་ཚོགས་ལྟར་ཟང་ཟིང་ལང་ལོང་བྱེད་ཀྱིན་རང་རང་གི་མོས་པ་ལྟར་སྨོན་ལམ་སྣ་ཚོགས་ཀྱི་ལས་ལ་བྲེལ་བཞིན་འདུག
དགོད་བྲོ་བ་ལ། མཆོད་རྟེན་གྱི་སྐོར་ལམ་དུ་མི་མ་གཏོགས་པའི་འདབ་ཆགས་རིགས་ཤིག་ཀྱང་འཚུབ་ལང་ལོང་བྱེད།འདབ་ཆགས་རིགས་དེ་ནི་ཕུག་རོན་ཁྱུ་གཅིག་རེད། མཇལ་པ་ཚོ་ཕུག་རོན་ལ་ཧ་ཅང་དགའ། ཕུག་རོན་ལ་ཁ་ཟས་དཀོན་ཞིང་འབའ་འབུ་མི་ཟ་བས་ཁོ་ཚོས་ཁྱིམ་ནས་ནམ་རྒྱུན་གྲོ་འབྲུ་དང་ཞིབ་བུར་བྲུལ་བའི་གོར་རྡུལ་ཁྱོར་བའམ་ཁུག་མར་བསྣམས་འོངས་ཏེ།མཆོད་རྟེན་གྱི་མདུན་རོལ་དུ་སེར་སྣ་མེད་པར་གཏོར་བ་ན། ཕུག་རོན་རྣམས་ཀྱིས་མི་ལ་མི་འཛེམ་པར་སྤྱིར་བཏང་ཁྱུ་དང་ཁྱུ་བྱས་ཏེ་འཕུར་ཡོང་ལ།ཁྱུ་རེར་ཕུག་རོན་བརྒྱ་ཕྲག་རེ་ལོངས་ཤིང་ཁོ་ཚོས་སུག་པ་གཉིས་རྐྱོང་བཞིན་གཤོག་པ་བསྐུམས་ཏེ་ས་ངོས་སུ་འབབ་སྐབས་རླུང་བུ་ཙམ་བསྐྱིལ་ཏེ་ས་ནས་རྡུལ་ཕྲན་ཙམ་སློང་བར་བྱེད་པ་དང་།དེ་མུར་མཆུ་ཏོས་ས་ལ་རྡུང་ཅི་ཐུབ་ཀྱིས་རྒུམ་བུ་ཤུགས་ཀྱིས་འཐུ་བར་བྱེད། འདི་གའི་ཕུག་རོན་དང་མཇལ་པ་རྣམས་ནི་ཕན་ཚུན་གཅིག་གིས་གཅིག་ལ་མི་འཚེ་བའི་གྲོགས་པོ་ཡིན་ལ།ཕུག་རོན་གྱི་ཕོ་མོའི་དབྱེ་བ་རྣམ་པར་འབྱེད་དཀའ་ན་ཡང་ཕན་ཚུན་གྱི་གཤིབ་ལུགས་དང་འགྲོགས་ལུགས་ལ་བརྟགས་ན“བཟའ་ཟླའི”འབྲེལ་བ་ཡང་ཤིན་ཏུ་གསལ་བོར་འབྱེད་ཐུབ་པ་རེད།
དེ་རིང་མཆོད་རྟེན་གྱི་མཇལ་པ་ཐོག་མ་ནི་མགོན་པོ་སྐྱབས་རེད།ཁོ་རང་ཉི་རྩེ་བརྒྱབ་མ་ཐག་པའི་མཆོད་རྟེན་གྱི་ཤར་སྒོའི་མདུན་དུ་འགྲེང་སྟེ་བར་སྣང་ལ་བལྟས་ཙམ་བྱས་ཤིང་ཕུག་རོན་ཁྱུ་ཞིག་མཐོང་བར་རེ་བ་བཅངས།ཡིན་ན་ཡང་ཞོགས་པའི་ཉི་ཟེར་ཐད་ཀར་མིག་ཁོང་དུ་ཟུག་པས་ཁོས་ཅི་ཡང་མ་མཐོང་ལ། མིག་ཞགས་ཕྱིར་སྡུད་ཞོར་དུ་ལག་པ་ཁུག་མར་བསྲིངས་ནས་གྲོ་རྡོག་སྤར་འགའ་བསྟུད་མར་མདུན་གྱི་རྡོ་གཅལ་ཐོག་ལ་གཏོར།གློ་བུར་དུ་ཕུག་རོན་ཁྱུ་གཅིག་རྒྱ་མཚོའི་རྦ་རླབས་ལྟར་ཤག་སྒྲ་དང་བཅས་འཚང་ཁ་ཤིག་ཤིག་གིས་ས་ལ་བབས་བྱུང་ལ།ཕུག་རོན་རེ་རེས་དེ་མ་ཉིད་དུ་འཛིན་མའི་ངོས་སུ་མཆུ་ཏོས་བར་མེད་དུ་རྡུང་བཞིན་རྒུམ་བུ་འཐུ་བར་བརྩམས་བྱུང་།མགོན་པོ་སྐྱབས་ཀྱིས་འཕུར་ཙམ་དང་རྒྱུག་ཙམ་བྱེད་པའི་ཕུག་རོན་བརྒྱ་ཕྲག་གི་ཁྲོད་ནས་གཡས་རྐང་འཐེང་བའི་ཕུག་རོན་ཞིག་ལ་མིག་མྱུལ་བྱས་ཏེ་བཙལ།ཡུད་ཙམ་གྱི་རིང་དུ་ཁོས་ཕལ་ཆེར་ཕུག་རོན་རེ་རེ“བཀླགས”ཚར་ན་ཡང་། དབང་བོ་སྐྱོན་ཅན་གྱི་ཕུག་རོན་ཞིག་མི་ལམ་དུ་ཐོགས་མ་བྱུང་།
མགོན་པོ་སྐྱབས་ཀྱིས་དབང་མེད་དུ་དངན་པ་རིང་བོ་ཞིག་འཐེན་བྱུང་།དངན་པ་དེ་འཐེན་སྐབས་ཁོས《གདུགས་དཀར》ཚར་གཅིག་སྔར་ནས་བཏོན་ཟིན་པ་དང་། དེར་བསྟུན་ནས་གདོང་ལ་འཛུམ་མདངས་མི་ཤོང་བ་ཙམ་ཞིག་འཁྱིལ་ནས་ཡོང་། འཛུམ་མདངས་དེ་ནི་སེམས་ཀྱི་ངལ་བ་སངས་པའི་དགའ་བ་ཁོ་ན་མཚོན་པ་ཙམ་མ་ཡིན་པར་རྟགས་དང་རྟེན་འབྲེལ་ལ་ཡིད་འཚེངས་པའི་རྣམ་འགྱུར་ཞིག་ཀྱང་རེད།མཚམས་དེར་ཕུག་རོན་ཚོས་རང་རང་ས་ནས་མགྲིན་སྒྲ་སྣ་ཚོགས་སྒྲོག་མགོ་བརྩམས་བྱུང་ལ། དེ་ནི་ཕོ་བ་འགྲང་ལ་ཉེ་བའི་སྔོན་བརྡ་ཞིག་ཡིན་ཀྱང་སྲིད།སྔོན་བརྡ་དེས་མགོན་པོ་སྐྱབས་ལ་སླར་ཡང་རྣམ་རིག་གསར་བ་ཞིག་རྒྱས་སུ་བཅུག་པ་དང་། སེམས་ལ་ད་ཐེངས་རྟགས་དང་རྟེན་འབྲེལ་ངན་པར་ཕྲད་མ་བྱུང་བས།མཆོད་རྟེན་ལ་སྐོར་བ་འགའ་བརྒྱབ་རྗེས་ཕྱིར་ཡུལ་དུ་ལོག་སྟེ་མ་འོངས་པའི་བཟའ་ཟླར་ལག་རྟགས་བཟོ་པའི་ལས་མགོ་བརྩམ་ཆོག་སྙམ།
མགོན་པོ་སྐྱབས་ཀྱིས་གོམ་པ་རིང་ལེན་བྱས་ཏེ་མཆོད་རྟེན་ལ་སྐོར་བ་དང་པོ་རྒྱག་སྐབས།སེམས་པ་དགའ་ཀྲོག་ཀྲོག་གིས་ཁེངས་ནའང་ནམ་རྒྱུན་གྱི་མཇལ་པ་དེ་དག་གཅིག་ཀྱང་ཐོན་མེད་པས།སྐོར་ལམ་ཧྲིལ་བོ་ད་དུང་སྟོང་ལྷང་ངེར་མངོན། ཁོའི་སེམས་སུ་ནུབ་ཀྱི་སྐོར་ལམ་དེ་ཕྱོགས་གཞན་དང་མི་འདྲ་བར་དོག་ཅིང་གཟར་བོ་ཞིག་ཡིན་པའི་ཚོར་བ་ཐེངས་དང་པོར་བྱུང་ལ།སྐོར་ལམ་འདི་རྒྱ་བསྐྱེད་པའི་གོ་སྐབས་དང་ནུས་པ་ཞིག་ཡོད་ན་དེའི་ཕན་ཡོན་གྱིས་རང་གི་ཕྱིས་ཀྱི་ལས་མཐའ་དག་དེ་བས་ཀྱང་དྲང་ལམ་དུ་འགྲོ་ངེས་རེད་བསམས།ཡིན་ན་ཡང་། ལས་བསམ་སར་མི་འགྲོ་གསེག་སར་འགྲོ་ཟེར་བ་ཅིས་མ་བདེན། ཁོས་སྐོར་བ་ཐེངས་གཉིས་པའི་མགོ་བརྩམས་ཏེ་ནུབ་ཀྱི་སྐོར་ལམ་དོག་པོ་དེ་བརྒྱུད་སྐབས་གློ་བུར་དུ་མདུན་རོལ་ན་ཕུག་རོན་ཞིག——གཏན་ནས་མཐོང་མི་འདོད་པའི་ཕུག་རོན་འཐེང་བོ་ཞིག་གིས་གཤོག་རྡེབ་རྩུབ་པོ་ཞིག་གཏོང་བ་དང་།ཁ་གདངས་ཏེ་དབུགས་ཧལ་ཧལ་བྱེད་བཞིན་ཁོ་དང་གོམ་པ་ལྔ་དྲུག་གི་མཚམས་སུ་འཕུར་སྟོབས་མེད་པར་གྱོལ་མ་ལྡིང་གིས་ཅི་ཞིག་ལ་འཇིགས་ཏེ་འབྲོ་ཅི་ཐུབ་བྱེད་པ་མཐོང་།
མགོན་པོ་སྐྱབས་དངོས་གནས་ཧ་ལས་སོང་། རྨི་ལམ་དུ་རྨིས་པའི་ཕུག་རོན་དང་དབྱེ་བ་མེད་པའི་ཕུག་རོན་ངོ་མ་འདིས་ཁོ་ལ་མིག་མདུན་གྱི་སྣང་ཚུལ་འདི་ནི་རྨི་ལམ་རྣལ་མ་ཞིག་ཡིན་པའི་འཕྲུལ་སྣང་མངོན་སུམ་དུ་བསྐྱེད་པ་དང་།ཡུད་ཙམ་ལ་འདམ་གྱིས་བཟོས་པའི་འབག་སྐུ་ཞིག་དང་འདྲ་བར་སྐོར་ལམ་དོག་པོ་དེའི་ནང་དུ་ཅི་བྱ་གཏོལ་མེད་དུ་ལུས་དགོས་བྱུང་ལ།རེ་ཞིག་ནས་ཁོས་སེམས་ལྷོད་ལ་བབས་ནས་ལྟ་སྐབས། ཕུག་རོན་གྱི་ཁྲག་རྗེས་ཤིག་ད་དུང་སྐོར་ལམ་དུ་འཐེན་འདུག་པ་དང་།ཞིབ་ཏུ་ཉན་ན་ད་དུང་ཕུག་རོན་དེས་མྱ་ངན་གྱི་སྡུག་སྐད་འབྱིན་པའི་སྒྲ་ཡང་ཐོས་ཐུབ།
“ཕུག་རོན་དེ་འདི་ན་འདུག” རྒྱ་སྐད་ཆ་མེད་ཅིག་གིས་མགོན་པོ་སྐྱབས་དང་ཕུག་རོན་གཉིས་མཉམ་དུ་ཡེ་རེར་བཏང་སོང་།
“གན་རེད། ད་ཐེངས་འཆོར་དུ་མ་འཇུག གསོན་པོར་ཟུངས་ཤིག”
མགོན་པོ་སྐྱབས་ཀྱིས་སྐད་སྒྲ་མཆེད་པའི་ཕྱོགས་སུ་བལྟས་པ་ན།རྒྱབ་ཏུ་མེ་མདའ་འཁུར་བའི་རྒྱ་མི་གཉིས་སྔ་རྗེས་ལྟར་སྒང་ངོས་ཤིག་ནས་མར་ཤུད་བཞིན་ཕུག་རོན་གྱི་ཕྱོགས་སུ་སྨྱོ་བ་ལྟར་མཆོང་ཡོང་གིན་འདུགསྐབས་དེར། མགོན་པོ་སྐྱབས་ཀྱིས་ཅི་ཞིག་རྟོགས་བྱུང་། མ་གཞིར། ཉེ་བའི་དུས་སུ་རྫོང་ཐོག་གི་རྒྱ་མི་མ་རབས་འགས་རྒྱུན་དུ་མེ་མདའ་ཆུང་གྲས་བསྣམས་ཏེ་སྡེ་བའི་ཞིང་ཁ་དང་རི་མགོལུང་མཐིལ་སོགས་སུ་མྱུལ་ཏེ་དེ་ཕོ་དང་ཕུག་རོན་རྔོན་གྱིན་ཡོད་ལ། སྟབས་འགྲིག་ན་རི་དྭགས་འགའ་རེ་ཡང་གསོད་ཨེ་ཐུབ་ལ་ལྟ་བཞིན་ཡོད་པ་རེད།དེ་བས། མགོན་པོ་སྐྱབས་ཀྱིས་ལྡེམ་མྱུར་དང་ལྡན་པའི་ངང་ནས་མི་དེ་གཉིས་དང་སྔ་གཞུག་བརྩད་དེ་ཕར་བརྒྱུགས་པ་དང་སྤར་སྙོབ་ཅིག་གིས་ཕུག་རོན་དེའི་གཤོག་པ་ཡ་གཅིག་ལག་ཏུ་ཟིན།
“ཕུག་རོན་འདི་ངེད་གཉིས་ཀྱི་ཡིན། ངེད་གཉིས་ལ་སྤྲོད་རོགས།”རྒྱ་མི་ཅུང་རྒན་པ་དེས་ཀྱང་དབུགས་ཧལ་ཧལ་བྱེད་བཞིན་བོད་སྐད་ད་མ་དིག་གིས་བཤད།
“འདི་ངའི་ལག་ན་ཡོད་པ་མི་མཐོང་ངམ། བཙན་འཕྲོག་བྱེད་འདོད་དམ།”མགོན་པོ་སྐྱབས་ཀྱིས་ངོ་གདོང་དམར་ནག་ཏུ་གྱུར་ལ་རྣ་རྩེ་ཡང་དམར་རྐྱང་དུ་གྱུར་བྱུང་།
“འདི་ངས་རྨས་པ་ཡིན།” མི་དེས་ཁོའི་ལག་གི་མེ་མདའ་ཆུང་ཆུང་དེ་བསྟན་ནས“འདི་ལ་མདེའུ་གཅིག་གི་འགྲོ་སྒོ་བཏང་ཡོད”ཟེར།
“མདེའུ་རིན་ངས་ཁྱོད་གཉིས་ལ་སྟེར། སང་ཕྱིན་ང་ཚོའི་ས་ཐོག་གི་བྱ་བྱིའུ་འབའ་འབུ་གང་ལ་ཡང་ཁབ་རྩེ་ཙམ་གྱིས་གནོད་མི་ཆོག”མགོན་པོ་སྐྱབས་ཀྱིས་ཁུག་མ་ནས་སྒོར་ཟུར་འགའ་བཏོན་ཏེ་མི་དེ་གཉིས་ལ་གཏོད་པའི་སྐབས་དེར།ཕུག་རོན་རྨས་མ་དེས་ཀྱང་ཅི་ཞིག་ཧ་གོ་བ་ལྟར་མགྲིན་པ་ནས་སྔར་བཞིན“ཀོ་ཀོ”ཞེས་མྱ་ངན་གྱི་གཉོམ་སྐད་འགའ་འབྱིན་བཞིན་ཁོའི་ལག་ནས་ཤོར་ཏེ་ཕ་གིར་འཕུར་སོང་།
མི་དེ་གཉིས་ཀྱིས་ཕྱོགས་གཅིག་ནས་ཕྱི་མིག་ལྟ་ཙམ་བྱེད་པ་དང་།ཕྱོགས་གཅིག་ནས་རྒྱ་སྐད་ཀྱི་སྡིགས་དམོད་འདྲ་གཏོང་བཞིན་སྔར་ནས་བུད་སོང་། མཇལ་པ་ཡང་རིམ་གྱིས་ཇེ་མང་དུ་གྱུར་པའི་དུས་དེར་མགོན་པོ་སྐྱབས་ད་གཟོད་གཉིད་ལས་སད་པ་ལྟར་སྐོར་ལམ་དོག་མོ་དེའི་ཟུར་སྣེར་ཐོན་བྱུང་ལ།དེ་ག་ནས་ད་གཟོད་ཕུག་རོན་རྣམས་ཀྱིས་སྔར་གྱི་ཁ་མལ་དུ་རྒུམ་བུའི་ལས་ལ་འབད་ཀྱིན་པའི་སྣང་ཚུལ་གསལ་བོར་མཐོང་ཐུབ།ཁོས་སླར་ཡང་མིག་རིག་རིག་གིས་རྐང་བ་འཐེང་བའི་ཕུག་རོན་དེ་འཚོལ་མགོ་བརྩམས། ཕུག་རོན་རྣམས་འཕུར་ཙམ་དང་རྒྱུགས་ཙམ་བྱེད་ན་ཡང་།མཆོད་རྟེན་མདུན་རོལ་གྱི་ཁོར་ཡུག་ཆུང་ཆུང་དེ་ལས་འདའ་ཐུབ་མེད་པས་ཕུག་རོན་བརྒྱ་ཕྲག་ཅིག་གི་ཁྲོད་ནས་གྱོལ་ལྡིང་གིས་འགྲོ་བའི་ཕུག་རོན་འཐེང་པོ་ཞིག་འཚོལ་རྒྱུ་ནི་ཧ་ཅང་སྟབས་བདེ་བོ་ཞིག་ཏུ་སྣང་།མགོན་པོ་སྐྱབས་ཀྱིས་མཆོད་རྟེན་གྱི་རྩིག་ཟུར་ཞིག་ལ་ཁེན་ནས་མིག་གིས་ཕུར་ཚུགས་སུ་ཕུག་རོན་འཐེང་བོ་དེའི་འགུལ་སྐྱོད་ལ་ཅེར་ནས་བསྡད།
ཕུག་རོན་འཐེང་བོ་དེས་མུ་མཐུད་དུ་རྒུམ་བུ་འཐུ་མ་ནུས་པར་སྐད་ཅིག་མའི་བར་ནས་ལྗིད་རྫོབ་ཆེ་བའི་ལུས་པོ་དེ་གཡོན་རྐང་ལ་བསྙེས་ཏེ་འགྲེང་ཙམ་འགྲེང་ཙམ་བྱེད་ལ།དེ་དང་བསྟུན་ནས་གཡས་རྐང་ཡང་ས་ལ་རེག་ཙམ་རེག་ཙམ་བྱེད་མོད། འོན་ཀྱང་། ངལ་དུབ་སྔར་བཞིན་སངས་མེད་པས་དབུགས་ཧལ་ཧལ་གྱིས་འཁུན་སྒྲ་རེ་འབྱིན་པ་དང་།མཚམས་རེར་མ་མཆུ་ཅུང་ཟད་བསྣར་ཞིང་ལྕེ་ཡང་ཕྱི་རོལ་ཏུ་བུད་དེ་མིག་མདངས་ཉོབ་པོར་འདུག་པར་བརྟགས་ན།རྨས་ཕོག་པའི་རྐང་བའི་ན་ས་ནས་ཟུག་གཟེར་མཚམས་མེད་དུ་ལང་གིན་ཡོད་པ་གསལ་བོར་ཤེས་ཐུབ། སྐབས་དེར།ཕུག་རོན་གཞན་ཞིག་གིས་རྒུམ་བུའམ་ཅི་ཞིག་མཆུ་བར་དུ་བཙིར་ནས་ཕུག་རོན་འཐེང་བོའི་མདུན་དུ་འཕངས་བྱུང་མོད།འོན་ཀྱང་ཕུག་རོན་འཐེང་བོ་དེ་བདེ་ལྕག་འཁྱུག་པོ་ཞིག་མ་ཡིན་པས་ཕུག་རོན་གཞན་ཞིག་གི་ཁ་ནང་དུ་ཤོར་བ་དང་།སྐབས་དེར་སྔོན་གྱི་ཕུག་རོན་དེས་སླར་ཡང་རྒུམ་བུ་མཆུ་བར་དུ་བཙིར་ནས་ཕུག་རོན་འཐེང་བོའི་མདུན་ཏག་ཏག་ཏུ་འཕངས་བྱུང་བས།ཕུག་རོན་འཐེང་བོ་དེས་དེ་མ་ཉིད་དུ་མཆུ་ཡིས་བརྡབས་ནས་མིད་ཅི་ཐུབ་བྱས་པས་ཁ་ཟས་དེ་ཅི་ཞིག་ཡིན་པ་ཡེ་ནས་མཐོང་ཐབས་མ་བྱུང་།
སྐབས་དེར། མགོན་པོ་སྐྱབས་ཀྱིས་རྨི་ལམ་ཁྲོད་ཀྱི་ཕུག་རོན་དེ་དག་ཡིད་ལ་འཁོར་བྱུང་།དེ་ནི་མིག་མདུན་གྱི་ཕུག་རོན་དང་ཡེ་ནས་མི་འདྲ་སྟེ། གཤོག་པ་ཕྲལ་བའི་ཕུག་རོན་དེས་རྐང་བ་ཡ་གཅིག་གིས་ཁོའི་གདོང་ལ་སྦར་ཁྱིམ་བཏབ་མྱོང་ལ།རྔ་སྒྲོ་བོར་བའི་ཕུག་རོན་དེས་མཆུ་ཏོ་རྣོན་པོ་བསྲིངས་ཏེ་ཁོའི་མིག་ཟུང་བྲུས་ཏེ་ཁྲག་དམར་ཙ་ར་ར་བཞུར་མྱོང་བར་མ་ཟད།ལུས་ན་ཁྲག་དམར་བཞུར་བའི་ཕུག་རོན་དེ་ད་དུང་གློ་བུར་དུ་འཇིགས་སུ་རུང་བའི་བདུད་པོ་ཞིག་ཏུ་སྤྲུལ་ཏེ་ལག་ཏུ་མཚོན་ཆ་དང་བཤན་གྲི་ཐོགས་ནས་ཁོའི་དོན་ལྔ་སྣོད་དྲུག་ཐམས་ཅད་ཕྱིར་བསློགས་པ་དང་།འཇིགས་སྣང་དང་ན་ཟུག་དེས་ད་གཟོད་ཁོ་རང་ཉིད་གཉིད་ལས་བསླངས་པ་མ་ཡིན་ནམ། ……
མགོན་པོ་སྐྱབས་ཕྱིར་དྲན་ལས་སད་པའི་དུས་དེར། ཕུག་རོན་འཐེང་བོ་དེ་མ་བསམ་ས་ནས་སློང་མོ་པ་ཞིག་དང་འདྲ་བར་ཁོའི་ཉེ་འགྲམ་དུ་ཐོན་འདུག་ཅིང་།ད་དུང་རྐང་བ་གཉིས་རུམ་ལ་བསྡུས་ཤིང་གསུས་པ་ས་ལ་གླན་ཏེ་མིག་གིས་སྔོ་ལིང་ལིང་དུ་ཁོ་ལ་ཅེར་ནས་སྡོད་པ་དང་།ལྕེ་ཡི་ལྗིད་ཤུགས་མ་ཐེག་པའི་མ་མཆུ་ཐུང་ངུ་དེ་སྔར་བཞིན་ཅུང་ཟད་ཐུར་དུ་འཕྱང་ནས་གདའ།
མགོན་པོ་སྐྱབས་ཀྱིས་ལག་ཟུང་ག་ལེར་ཕར་བསྲིངས་ཏེ་འཕགས་འགུལ་ཙམ་ཡང་མི་བྱེད་པའི་ཕུག་རོན་ཚུར་བླངས་ཏེ“སྙིང་སྡུག་གི་ལྷ་བྱ།ང་ནི་ཁྱོད་ཀྱི་སྲོག་སྐྱོབ་ཀྱི་དྲིན་ཆེན་ཡིན། སང་ཕྱིན་ཁྱོད་ངའི་རྨི་ལམ་དུ་མ་འཁོར། ངས་ད་དུང་ཚེ་གང་གི་སྐྱ་ཡ་བཙལ་མེད།ངས་ད་དུང་རྟགས་དང་རྟེན་འབྲེལ་མང་པོར་བརྟག་དགོས”ཟེར་བཞིན་སྤར་ཁ་གློད་པ་ན། ཕུག་རོན་གྱིས་ཅི་ཞིག་གི་ཧ་གོ་སོང་བ་ལྟར“ཕུ་ཐག་ཐག”ཅེས་གཉོམ་ཞིང་དལ་བའི་གཤོག་སྒྲ་འབྱིན་བཞིན་སླར་ཡང་ཕ་གིའི་ཕུག་རོན་གྱི་ཁྱུ་ཚོགས་སུ་འཛུལ་སོང་།
མགོན་པོ་སྐྱབས་ཕྱིར་ཁྱིམ་དུ་འབྱོར་དུས། བཏགས་ཁྱིས་ཁ་གནམ་ལ་འཁོར་ཏེ་ཟུག་མཚམས་མི་འཇོག་ལ།ནམ་རྒྱུན་ལྷས་རའི་ནང་གི་སྡོང་རྩེ་ན་ཀྱུར་སྒྲ་སྒྲོག་པའི་བྱ་བྱིའུ་རྣམས་སྔ་མོ་ནས་དཀྲོགས་ཏེ་གར་སོང་མི་ཤེས་ཤིང་།གོ་ཁའི་ཡར་སྒྱེད་ན་མགྲོན་པོ་ཆ་རྒྱུས་ཅན་ཞིག་སྐྱིལ་ཀྲུང་དུ་ཙོག་འདུག མགོན་པོ་སྐྱབས་ཀྱི་ནུ་བོས་མགྲོན་པོ་དེར་སྔར་ནས་འོ་ཇ་དཀར་ཡོལ་གང་དྲངས་ཏེ་སྣེ་ལེན་གཏོང་བཞིན་གདའ་ལ།ཁོ་གཉིས་ལབ་གླེང་གི་ནང་དུ་མགོ་འཁོར་འདུག་པས་མགོན་པོ་སྐྱབས་གློ་བུར་དུ་ཐོན་པ་སུས་ཀྱང་དོ་སྣང་མ་བྱུང་།
མགྲོན་པོ་ཆ་རྒྱུས་ཅན་དེ་ནི་མགོན་པོ་སྐྱབས་ཀྱི་གཉེན་སྒྲིག་གི་བར་པ་རེད།ཁོ་ནི་ཕར་བལྟས་ཚོད་ཀྱིས་ཕོ་ལོ་ཉི་ཤུའི་ནང་དུ་འདུག་ཅིང་། ཆུང་དུས་ནས་མགོན་པོ་སྐྱབས་ཀྱི་སྤུན་གྲོགས་ཡིན་པར་མ་ཟད།འབྲུག་མོའི་ཨ་ཕའི་ནུ་བོ་ཡང་ཡིན། མགོན་པོ་སྐྱབས་དང་འབྲུག་མོ་གཉིས་ཀྱི་གཉེན་སྒྲིག་གི་བར་པར་བསྡད་པ་ནས་བཟུང་མགོན་པོ་སྐྱབས་ཀྱིས་ཁོ་ལ“བར་པ”ཟེར་བ་ལས་དངོས་མིང་གིས་བོས་མ་མྱོང་ལ།ཁོས་ཀྱང་བར་པ་ཞིག་གི་ཆ་ནས་མགོན་པོ་སྐྱབས་ཀྱི་གཉེན་དོན་ལ་ཤི་འཐབ་རོ་འཐབ་མ་བྱས་པའི་བསམ་པ་མེད།མགོན་པོ་སྐྱབས་ཀྱིས་བར་པར་འཚམས་འདྲི་བྱེད་བསམ་པའི་སྐབས་དེར། བར་པས་སྔོན་ལ་ཁ་གྲགས་ཏེ“ད་ཐེངས་ངས་ལྷ་བྱའི་གསུང་སྙན་ཁྱེར་ཡོང་བ་ལས།ཐན་བྱའི་སྐད་ངན་བསྐྱལ་ཡོང་བ་མིན”ཟེར་བཞིན་སྒྲོབ་ཉམས་ཤིག་བསྟན་ནས་ཇ་ལ་ཧུབ་གང་བྱས་སོང་།
མགོན་པོ་སྐྱབས་དགོད་བཞིན“འབྲུག་མོའི་ཕ་མ་གཉིས་འཐད་བྱུང་ངམ”ཞེས་དྲིས་བྱུང་།
བར་པ་ཡང་དགོད་ཙམ་བྱེད་བཞིན“ང་བར་པ་རི་སྤྱང་འདུར་འདུར་ཅིག་བྱས་ན་མོའི་ཕ་མ་གཉིས་རྒྱ་སྟག་ངར་མ་ཡིན་ཀྱང་བསྲན་ཚུགས་སམ”ཟེར།
མགོན་པོ་སྐྱབས་ཀྱིས“ཁྱོད་ལྟ་བུའི་བར་པ་མེད་ན་སྡེ་དཔོན་གྱིས་ངེད་གཉིས་ཀྱི་བར་དུ་འདྲེ་ལག་སྲིང་མཚམས་འཇོག་མི་སྲིད”ཅེས་བཤད་མ་ཐག་ཁོ་གསུམ་པོ་མཉམ་དུ་གད་མོ་ཤོར།
“སྡེ་དཔོན་གྱིས་ད་ལྟ་ང་བར་པ་ཡིན་པ་ཤེས་འདུག་པ་འདྲ།ངའི་བསམ་ཚུལ་ནོར་བ་མིན་ན་ཁོ་ང་ལ་ལྟ་ཚུལ་འདུག”
“འབྲུག་མོའི་བློ་ལ་འགྱུར་བ་མ་བྱུང་ན། སྡེ་དཔོན་གྱིས་ཁྱོད་ལ་གནག་ཐུབ་བམ།”བར་པས་མགོ་བོ་འཕྲེད་དུ་གཡུག་གཡུག་ཅིག་བྱས།
“ང་ལ་གནག་མི་ཐུབ་པ་བདེན་ཡང་འབྲུག་མོར་ངན་སེམས་འཆང་གིན་འདུགད་ཐེངས་དངོས་གནས་འབྲུག་མོར་དཀའ་ལས་ཆེན་པོ་ཞིག་གཏད་སོང།”
“དཀའ་ལས་ཅི་ཞིག་གཏད་སོང་།” མགོན་པོ་སྐྱབས་ལ་འཚུབ་ཆ་ཞིག་ལངས་བྱུང་།
“སྡེ་དཔོན་གྱིས་འབྲུག་མོ་ཞིན་ཅང་ལ་སྲིང་བལ་འཐོག་པར་མངགས་སོང་།”བར་པས་ངག་འཁྲོལ་ལ་མི་འཁྲོལ་གྱིས་བཤད།
“ཨ——ཁྱོད་ཀྱིས་ཅི་ཟེར།” མགོན་པོ་སྐྱབས་ཀྱིས་རང་གི་རྣ་བ་ལ་ཡང་ཡིད་མི་ཆེས་པ་ལྟར་རེ་ཞིག་ཧ་ལས་ཏེ་ངོ་གདོང་ཡང་སྐྱ་ཐལ་ལེར་གྱུར།
སྡེ་བ་འདི་གར་མཚོན་ན། ལོ་རེར་སྡེ་དཔོན་གྱིས་མི་སྐོར་ཞིག་ཞིན་ཅང་ས་ཁུལ་དུ་སྲིང་བལ་འཐོག་ཏུ་མངག་པ་ནི་ཆེས་རྒྱུན་ལྡན་གྱི་སྣང་ཚུལ་ཞིག་ཡིན་ལ།སྲིང་བལ་བཙོངས་པའི་ཡོང་སྒོ་དེ་ལོ་མཇུག་ཏུ་སྡེ་མི་རྣམས་ལ་བགོ་བཤའ་རྒྱག་གིན་ཡོད་པས་སྡེ་བའི་ཡོང་སྒོ་ཡང་ཅུང་ཆོག་མོད།འོན་ཀྱང་། སྡེ་དཔོན་ལ་ཕྱོགས་རིས་ཤིན་ཏུ་ཆེ་བས་གོ་སྐབས་དང་བྱེད་ཐབས་འདི་བེད་སྤྱད་དེ་རང་དང་འཁོན་དུ་འཛིན་པ་དང་ཡང་ན་རང་གི་ཚིག་མི་འཁུར་བའི་མི་རྣམས་ཅི་ནུས་གང་ཐུབ་ཀྱིས་ཞོར་ལས་སུ་གཏོང་བ་ནི་ཁོའི་དམིགས་བསལ་གྱི་དབང་ཆ་ཞིག་རེད།
མགོན་པོ་སྐྱབས་ཀྱིས་བར་པའི་ངག་ནས་འབྲུག་མོའི་གནས་ཚུལ་དང་འབྲེལ་བའི་གསར་འགྱུར་མང་པོ་ཞིག་ཐོས་བྱུང་།
“མོ་འགྲོ་ཁར་ཁྱོད་ཀྱི་ལག་རྟགས་ཤིག་ལ་རེ་བ་བཅངས་ནས་འདུག”བར་པས་གདོང་ལ་གཟབ་ནན་གྱི་ཉམས་ཤིག་ཕྱུང་སྟེ“ལོ་འདི་གར་ཁྱོད་ཀྱིས་མོར་ཁ་ཡ་དེ་ཙམ་མ་བྱས་པས་བསྐང་ར་ཡང་ཆེན་པོ་འདུག”ཟེར།
“འོ། མོ་ལ་ཅི་ཁག ངའི་ཕ་རྒན་འདས་པ་ནས་བཟུང་མོས་ད་རག་བར་དུ་སྡེ་དཔོན་གྱི་བརྙས་བཅོས་མྱངས་པ་རེད།”མགོན་པོ་སྐྱབས་ཁ་སྤོ་ཁ་ནས་ལངས་ཤིང་ཞེ་སྤོ་གཏིང་ནས་ལངས་འདུག
“མོ་ཕྱིར་ལོག་སྐབས་ཁྱོད་སྔོན་ལ་བསུ་བ་བྱེད་དུ་འགྲོ་དགོས་རྒྱུ་རེད།”བར་པས་ཀུ་རེ་འདྲ་བ་ཞིག་རྩེ།
“མིན།” མགོན་པོ་སྐྱབས་ཀྱིས་བློ་ཐག་ཆོད་པོའི་ངང“ངས་མོ་ལ་ལག་རྟགས་ཤིག་མ་འགྲུབ་པར་འགྲོ་སྲོལ་ག་ལ་ཡོད”ཟེར།
བར་པས་མགོ་བོ་ནང་དུ་ལྡེམ་ལྡེམ་འགའ་བྱས།
ཉིན་དེར། མགོན་པོ་སྐྱབས་རྫོང་མཁར་དུ་ཐེངས་ཤིག་སོང་།ཁོ་ལ་མཚོན་ན། ཕ་མ་དང་ཕུ་བོ་བཅས་སྔ་ཕྱིར་འདས་པ་ནས་བཟུང་རྫོང་མཁར་དུ་བསྐྱོད་པ་ཐེངས་དང་པོ་ཡིན།ཁོས་མིག་རིག་རིག་གིས་རྫོང་མཁར་གྱི་འཛུགས་སྐྲུན་དང་མི་རྣམས་ཀྱི་གོན་པ་དང་ཞྭ་ལྷམ་སོགས་ལ་མཚར་སྣང་གིས་ལྟ་བཞིན་བསྡད་ལ།གསར་བུ་དང་གསར་མོ་འགའ་རེ་ལག་རྡང་སྦྲེལ་ནས་འགྲོ་བ་དག་མཐོང་སྟེ་ལྷག་ཏུ་ཡ་མཚན་སྐྱེས་ཏེ་རེ་ཞིག་ལ་རང་ཉིད་ཀྱི་ཡོང་དོན་ཡང་རྩ་བ་ནས་བརྗེད་པར་གྱུར།ཡུད་ཙམ་ནས་ཁོ་ལ་རྣམ་ཤེས་གསར་བ་ཞིག་ཐོན་པ་ལྟར་རང་ཉིད་ཀྱི་ཡོང་དོན་ཡིད་ལ་དྲན་ནས་ཚོང་ཁང་ཆེ་ཆུང་དག་བསྙེགས་ཏེ་འབྲུག་མོའི་ལག་རྟགས་ཀྱི་མཁོ་རྫས་མཐའ་དག་ཉོ་བར་བརྩམས།ཁོའི་བསམ་པར་ཚེ་གང་གི་བཟའ་ཚང་ནི་རྟགས་དང་རྟེན་འབྲེལ་གྱི་བདག་ཉིད་ཅན་ཡིན་པ་དང་། རྟགས་དང་རྟེན་འབྲེལ་ལ་བརྟག་དགོས་ན་ངེས་པར་དུ་ལག་རྟགས་ཀྱི་མཁོ་རྫས་ཐམས་ཅད་ཀྱང་གསར་བ་རྐྱང་རྐྱང་ཡིན་དགོས་སྙམ།ཁོས་ཚོང་ཁང་ཆུང་འགའ་ནས་གཙགས་འབིག་དང་རྒྱ་ཁབ། གསོ་སྐུད། ཐོ་ཆུང་། མཐེབ་ཀོར། འདྲ་གྲི།ཁེ་གྲི་བཅས་དང་གཞན་ཡང་ལྷམ་རྒྱན་སོགས་དང་རས་དཀར་ནག་དུམ་བུ་དང་ལེབ་མ་འགའ་ཉོས་འོངསཤིང་སེམས་ལ་རང་དབང་མེད་པར་དགའ་སྣང་གིས་ཁེངས་སོང་།ཁྱིམ་དུ་འབྱོར་རྗེས་ཁོས་མཁོ་རྫས་དེ་ལ་སྔར་བས་དོ་དམ་ཡག་པོ་ཞིག་མཛད་པ་དང་། དེ་ནས་བཟུང་ཁོའི་རྣམ་འགྱུར་གློ་བུར་དུ་གཟབ་ནན་ཅན་ཞིག་ཏུ་གྱུར་ལ།རྣམ་འགྱུར་གློ་བུར་བ་དེས་ནུ་བོར་དགོད་ཁ་སློང་བར་བྱེད་ན་ཡང་ཁོས་ཕུ་བོའི“རྟེན་འབྲེལ”ལ་གནོད་པར་དོགས་ཏེ་ཁོང་འཛུམ་ཙམ་འཆོར་བ་ལས་ཅི་ཡང་བྱེད་མ་ནུས།
མགོན་པོ་སྐྱབས་ཀྱིས་ལག་རྟགས་ཅི་ཞིག་བཟོ་རྩིས་ཡིན་ནམ།ཁོས་སྔོན་ཆད་འབྲུག་མོར་ཁས་བླངས་མྱོང་བ་ལྟར་ཀོ་ལྷམ་ཆ་གཅིག་དབུལ་བར་འདོད་པ་མ་ཡིན་ནམ།སྡེ་བའི་ནང་གི་མི་སུ་དང་སུ་ཡིན་ཡང་ཀོ་ལྷམ་ནི་དངོས་པོ་ཆེས་རྩ་ཆེན་ཞིག་ཏུ་བརྩིས་པ་ཡིན་ལ།ཁྱིམ་ཚང་གི་འབྱོར་བ་ཞན་པའི་མི་ཞིག་ལ་མཚོན་ན་ཀོ་ལྷམ་གྱོན་རྒྱུ་ནི་དེ་བས་ཀྱང་རྨི་ལམ་ནང་གི་བྱ་བ་ཞིག་རེད།ཡིན་ན་ཡང་། མགོན་པོ་སྐྱབས་ཀྱིས་འབྲུག་མོར་ཀོ་ལྷམ་དབུལ་རྒྱུ་ཁས་བླངས་པ་ནི་ཁོ་རང་འབྱོར་བ་ལྡན་པའི་མཚོན་བྱེད་ཅིག་མིན་པར་ཁོའི་ཀོ་ལྷམ་གྱི་བཟོ་རྩལ་མོ་ལ་ཉམས་སུ་མྱོང་དུ་འཇུག་རྒྱུའི་ཆེད་ཡིན།ངོ་མ། མགོན་པོ་སྐྱབས་ཀྱིས་ཀོ་ལྷམ་བཟོ་རྩལ་གྱི་ཆ་ནས་རྫོང་གི་བྱ་དགའ་བསྟུད་མར་ཐེངས་གཉིས་སུ་བླངས་མྱོང་ལ།ཀོ་ལྷམ་བཟོ་བའི་ལག་རྩལ་ནི་ཀུན་གྱི་རྩེར་སོན་པ་རང་ཉིད་ལ་ཡིད་ཆེས་དང་གདེང་ཚོད་ཡོད།
ལྷ་བཟོ་པ་རེ་རེའི་ལྷམ་གྱི་བཟོ་སྟངས་འདྲ་མི་སྲིད་ན་འང་།མགོན་པོ་སྐྱབས་ལ་མཚོན་ན། ཀོ་ལྷམ་བཟང་བོ་ཞིག་ནི་ལས་ཀའི་གོ་རིམ་ལྔའམ་དྲུག་གི་སྒོ་ནས་རྫོགས་པར་བྱེད་བཞིན་ཡོད།གོ་རིམ་དང་པོ་ནི་རྐང་པའི་དབྱིབས་དང་ཆེ་ཆུང་འཇལ་རྒྱུ་དེ་ཡིན་ཞིང་། ལས་ཀ་དེ་ནི་ཁོས་ལོ་ལྔའམ་དྲུག་གི་སྔོན་ནས་ཡོངས་སུ་བསྒྲུབས་ཚར་ཟིན་ལ།ལྷམ་བཟོའི་ལས་ཀའི་གོ་རིམ་ཁྲོད་ཀྱི་འགག་རྩ་ནི་གོ་རིམ་གསུམ་པ་སྟེ“ལྷམ་མགོ”བཟོ་རྒྱུ་དེ་ཡིན།“ལྷམ་མགོ”ནི་རྐང་བའི་དབྱིབས་དང་ཆེ་ཆུང་གི་ཚད་གཞི་གཞིར་བཟུང་ནས་མཛུབ་རྩེ་ནས་བོལ་བར་གྱི་ལྷམ་གྱི་མ་དབྱིབས་གཏན་ཁེལ་བྱེད་པ་ཡིན་པས་ཅུང་ཟད་ཚེགས་ཆེ་མོད།མགོན་པོ་སྐྱབས་ཀྱིས་ལས་ཀའི་གོ་རིམ་དང་པོའི་སྐབས་སུ་ལག་རྩལ་དང་ཉམས་མྱོང་གིས“ལྷམ་མགོ”ཡང་སྔར་ནས་གཏན་ཁེལ་བྱས་ཡོད་པ་རེད།
ཉིན་གུང་ཞིག་ལ། མགོན་པོ་སྐྱབས་ཀྱིས་སྔར་ནས་ཁྱིམ་དུ་ཉར་ཡོད་པའི་གླང་ཀོ་གྲུ་བཞི་མ་དེ་ཁྱེར་ཡོང་སྟེ་ཁྱམས་སུ་ཐར་གཅལ་དུ་བཀྲམས་པ་དང་།ཡིད་ལ་བཟུང་བའི་འབྲུག་མོའི་ལྷམ་མཐིལ་གྱི་རིང་ཚད་ལྟར་ཐིག་གཟུ་མོ་འགའ་བཏབ་པ་དང་། དེ་ནས་འདྲ་གྲི་དང་ཁེ་གྲི་སོགས་འཆང་སྟེ་བྱང་ཆ་ལྡན་པའི་སྒོ་ནས་འདྲ་གཏུབ་སྣ་ཚོགས་བྱས་པར་ཀོ་བ་ལེབ་མོ་དེ་དེ་མ་ཉིད་དུ་ཁ་ཤོ་སྣ་ལོ་ཅན་དུ་བཏང་བ་དང་།དེ་ནས་ཀོ་ལྷམ་གྱི་རྒྱུ་ཆ་ཡོངས་རྫོགས་བསྒྲུགས་ཏེ་འཚེམ་བཟོ་དངོས་ཀྱི་གོ་རིམ་དུ་ཞུགས།
དགུན་ཁའི་ཉི་འོད་ལ་དྲོད་ཁོལ་འཛོམས་པའི་སྐབས་སུ།མགོན་པོ་སྐྱབས་ཀྱིས་ཁྱིམ་ནས་རང་གི་འཚེམ་བཟོའི་ཡོ་བྱད་དང་ཀོ་ལྷམ་གྱི་རྒྱུ་ཆ། རྐུབ་སྟེགས་སོགས་རྒྱབ་ལ་ཁུར་ཏེ་སྡེ་བའི་གཡུལ་ཁར་བསྐྱལ་བ་དང་།དེ་གར་འདུག་གནས་ངེས་གཏན་བྱས་རྗེས་རྒྱབ་ཀྱི་ཁྲེས་པོ་དག་ས་ལ་ཕོག ཁོའི་དམིགས་ཡུལ་ནི་ཉིན་དེའི་མཆོད་རྟེན་གྱི་སྐོར་ཚད་ལོངས་རྗེས་ཕྱིར་འདི་གར་ལོག་ནས་ལུས་པོ་ཉི་མར་ལྡེ་ཞོར་དང་ངལ་གསོ་བྱེད་ཞོར་དུ་ཀོ་ལྷམ་འཚེམ་བཟོའི་ལས་ཀ་རྒྱུན་བསྐྱང་རྒྱུ་དེ་ཡིན།དེ་ལ་སྣང་དོགས་བྱེད་རྒྱུ་རྒྱུ་ཆེར་མེད་དེ། ཡུལ་མི་ཚོའི་ནང་ནའང་མཆོད་རྟེན་ལ་སྐོར་བ་མང་པོ་བརྒྱབ་སྟེ་ཐང་ཆད་རྗེས།འགའ་ཞིག་འདི་གར་ཡོང་ནས་ལོགས་ཤིག་ཏུ་གཞིས་བཏིངས་ཏེ་ཁོག་སྟོད་ཀྱི་གོན་པ་ཡར་བརྫེས་ཏེ་ཉི་མར་ལྡེ་བ་དང་།ཡང་ན་གོས་ལ་ལྷན་པ་རྒྱག་བཞིན་ཁ་བརྡའི་ནང་དུ་མགོ་འཁོར་ཏེ་ཁ་ཏོན་འདོན་རྒྱུ་ཡང་རྩ་བ་ནས་བརྗེད་འདུག་པ་རེད།
“མགོན་པོ་སྐྱབས། ཁྱོད་ནི་ངོ་མ་འཇོན་ཐང་ཅན་ཞིག་རེད།སྔ་དྲོ་མཆོད་རྟེན་ལ་སྐོར་བ་རྒྱག་པ་དང་། ཕྱི་དྲོ་འདི་གར་ཡོང་ནས་ཉི་མར་ལྡེ་བཞིན་ཀོ་ལྷམ་བཟོ་བ་རེད།”བགྲེས་པོ་ཞིག་གིས་ཁོ་ལ་མཐེ་བོང་བསྟན་བྱུང་།
“ཨ་ཙི། མགོན་པོ་སྐྱབས་འདི་ལོ་ཆུང་ཞིག་དང་མི་འདྲ་བར་རྒས་ཉམས་ཐོན་འདུག”མོ་གསར་ཞིག་གིས་ཧབ་ཆ་དི་རེར་བརྒྱབ།
“བསྐལ་བ་དུས་སྙིགས་ཀྱི་མཐའ་མ་རེད་ཡ། ནང་གི་སག་ལྷམ་སྒོ་རུ་འཚེམ་པ་འདི།རྟགས་དང་རྟེན་འབྲེལ་ངན་པ་འདི་དག་བཟློག་རན་འདུག” དར་མ་ཞིག་གིས་ཁ་ནས་མ་ཎི་བགྲང་བཞིན་སྡུག་ཡུས་འདོན།
མགོན་པོ་སྐྱབས་ཀྱིས་དར་མ་དེར་སྡང་མིག་ཅིག་བགྲད་དེ“གང་ན་རྟགས་དང་རྟེན་འབྲེལ་ངན་པ་ཞིག་འདུག་ཨང་།ངའི་རྒྱུ་ཆ་དང་ཡོ་བྱད་ཚང་མ་གཙང་མ་དང་གསར་བ་ཤ་སྟག་ཡིན། ཁྱོད་ཀྱིས་ཅང་ཤེས་ཀྱི་མི་འདུག”ཟེར་ནས་སྣ་ཤུ་ཞིག་འཐེན།
མཇལ་པ་ཚོ་མགོན་པོ་སྐྱབས་ཀྱི་མཐར་རུབ་བྱུང་། བུད་མེད་ཅིག་གིས“ཁྱོད་ཀྱིས་ལྷམ་འདི་སུ་ལ་བཟོ་བ་ཡིན”ཞེས་དགོད་བཞིན་དུ་དྲིས།
མགོན་པོ་སྐྱབས་ཀྱིས་མགོ་བོ་སྒུར་སྒུར་གྱིས“ངས་མི་ཤེས”ཟེར།
མཐའ་འཁོར་གྱི་མི་ཇེ་མང་དུ་སོང་། ལ་ལས་ད་དུང་ལྷམ་བཟོ་ན་ཁྱིམ་དུ་ལྐོག་གིས་བཟོས་ན་འགྲིག་ཟེར་ལ།རེ་འགས་དེ་ལ་སྐྱོན་ཡོད་མི་སྲིད་ཟེར་ཞིང་། འགའ་ཞིག་གིས་ལྷམ་གྱི་མཐིལ་སྲབ་ཅིང་ཉག་ཕྲ་བར་བལྟས་ན་སྐྱེ་དམན་ཞིག་ལ་བཟོ་བ་ཁོ་ཐག་རེད་ཟེར་བ་དང་།ཡང་རེ་འགས་རང་གི་མ་འོངས་པའི་ཆུང་མར་བཟོ་བ་རེད་ཅེས་འུར་སྒྲོག་ལ། ཁ་ཅིག་གིས་ཁོའི“ཆུང་མའི”མིང་གིས་བསྙད་ནས་མོ་ལ་བཟོ་བ་ཡིན་མིན་སོགས་ཀྱང་དྲིས།
མགོན་པོ་སྐྱབས་ཀྱིས་སྔར་བཞིན་དུ“ངས་མི་ཤེས”ཞེས་ལན་ལྡོན།
སྐབས་དེར། སྡེ་དཔོན་ག་ཤེད་ཅིག་ནས་ཐོན་བྱུང་། ཁོའི་ཟུར་ཟའི་ཚིག་གིས“ད་ནི་ལོ་སུམ་ཅུར་ཉེ་བས་ཀོ་ལྷམ་ཆ་གཅིག་གིས་ཆུང་མ་ཉོ་རྒྱུ་ཟེར་ན་འཕྱིས་དྲགས་སོང”ཟེར་བ་ན་འགའ་ཞིག་ཧབ་ཆ་དིར་རེར་སོང་།
སྡེ་དཔོན་གྱི་ཚིག་དེས་མགོན་པོ་སྐྱབས་ཀྱི་སྙིང་ལ་མྱ་ངན་གྱི་ཟུག་རྔུ་དྲག་པོ་ཞིག་བསྐྱེད་བྱུང་།ཁོའི་ངོ་གདོང་དང་རྣ་རྩ་ཐམས་ཅད་དམར་པོར་ལོག་པར་མ་ཟད། ཡ་མཆུ་ལྷབ་ལྷུབ་ཏུ་འདར་བྱུང་བ་དང་།དཔྲལ་བའི་རྔུལ་ཆུ་ལས་རླངས་པ་ཐོལ་ཐོལ་དུ་ལངས་པ་ནི་སྐབས་འདིའི་ནམ་ཟླ་དང་ཤིན་ཏུ་མི་འཕྲོད་པར་སྣང་ཞིང་།མིག་ཟུང་ལས་ཁོང་ཁྲོ་དང་ངོ་ཚ་མཉམ་དུ་ཉོས་པའི་ན་ཟུག་ཅིག་གིས་ཡོད་ཚད་སྲེག་ཅིང་སྦར་བར་བྱེད་པའི་མེ་སྟག་ཅིག་སྤྲོ་བཞིན་མཆི།ཁོས་རེ་ཞིག་ཅི་ཡང་མི་སྨྲ་ལ་ལྷམ་ཡང་བཟོ་མཚམས་བཞག་སྟེ་མིག་ཟུང་དལ་གྱིས་བཙུམས་པ་ན། བྲང་ཁོག་གི་སྙིང་ཆུང་ལྷོག་ལྷོག་ཏུ་ལྡིང་བའི་སྒྲ་ལས་ཅི་ཡང་ཐོས་མ་བྱུང་།
ཉིན་འགའི་རྗེས་ནས་བཟུང་། མགོན་པོ་སྐྱབས་ཀྱི་སྒོའི་ཕྱི་རོལ་ཏུ་འཚེམ་བཟོ་གཉེར་བའི་ལས་ཀའི་རྒྱུན་ཆད་པར་གྱུར།ནམ་རྒྱུན་ནངས་མོ་མཆོད་རྟེན་ལ་སྐོར་བ་འགའ་བརྒྱབ་རྗེས་ཕྱིར་ཁྱིམ་དུ་ལོག་ནས་མུ་མཐུད་དུ་ལས་འཕྲོ་དེའི་མཇུག་སྐྱོང་གིན་ཡོད་པ་རེད།
མཚན་མོ་ཞིག་ལ། མགོན་པོ་སྐྱབས་ཐང་ཆད་དེ་མགོ་བོ་སྔས་ལ་འབྱར་མ་ཐག་རྨི་ལམ་གྱི་ཞིང་ཁམས་འགྲིམས་སོང་།ཐེངས་འདིའི་རྨི་ལམ་ནི་ལྷ་བྱའམ་ཐན་བྱ་གང་ཡང་མ་ཡིན་པར། ཁོས་ནམ་ཡང་གཉིད་ཆག་ཟས་བརྗེད་ཀྱིས་དྲན་བཞིན་པའི“བཟའ་ཟླ”འབྲུག་མོ་རེད།རྨི་ལམ་ཁྲོད་ཀྱི་ཡུལ་ལྗོངས་ཀྱང་གཞན་མ་ཡིན་པར་དབྱར་མཇུག་གི་གྲམ་ཆུ་ཁ་སྟེ། གྲམ་ཆུ་སྔོན་མོ་ལྷུང་ལྷུང་དུ་ཤར་ཕྱོགས་སུ་རྒྱུག་གིན་འདུག་ལ།ཆུ་ཞབས་ཀྱི་ཉ་དང་ཉེའུ་འགའ་རེས་གཤོག་རྩལ་ངོམ་བཞིན་ཡར་འཁྱུག་མར་འཁྱུག་བྱེད་པ་དང་། མཚམས་རེར་འཕྱོ་ཞིང་ཐོར་བའི་རླབས་ཟེགས་ཀྱིས་ཁོ་གཉིས་ཀྱི་གདོང་ལ་ཐིགས་པའི་བསིལ་བ་སྦྱིན་པར་བྱེད་ཅིང་།ཉེ་འཁོར་ན་ནོར་གནག་འགའ་ཞིག་ཚ་བར་གཡོལ་ཏེ་མཆུ་དང་རྐང་བཞི་ཆུ་བོའི་མཇིང་ལ་བཙུགས་ནས་མཇུག་མ་དག་ཕར་གཡུག་ཚུར་གཡུག་བྱེད་ཀྱིན་གདའ།
ཡུད་ཙམ་ནས། མགོན་པོ་སྐྱབས་ཀྱིས་རུམ་ནས་ཀོ་ལྷམ་ཆ་གཅིག་བཏོན་ཡོང་བ་དང་།བྲེལ་མྱུར་གྱི་སྒོ་ནས་འབྲུག་མོའི་རྐང་བར་བསྐྱོན་ཏེ། “ལྟོས་དང་། འཕྲུལ་འཁོར་གྱིས་བཟོས་པའི་ཀོ་ལྷམ་དང་ཨ་ན་མ་ན་རེད”ཅེས་ཟེར།
འབྲུག་མོས་ཀྱང་རང་གི་རྐང་མགོར་ལྟ་བཞིན་རེ་ཞིག་ཁ་སྐྱེངས་ཏེ་ངོ་གདོང་དང་སྐེ་རྩ་ཧྲིལ་བོ་དམར་པོར་གྱུར།
མགོན་པོ་སྐྱབས་ཀྱིས་ཁ་ཡང་བསུམས་མ་ཐུབ་པར“རྐང་བར་བདེ་འམ”ཞེས་དྲིས།
འབྲུག་མོས་དགོད་ཙམ་བྱེད་བཞིན “བདེ་བོ་འདུག་ཀྱང་རྐང་བ་ཅུང་ཟད་བཙིར་བ་འདྲ”ཟེར་ནས་ངོ་གདོང་དང་གར་སྨད།
མགོན་པོ་སྐྱབས་ཀྱིས་ཅི་མི་སྙམ་པར“ཀོ་ལྷམ་ཡིན་པས་དང་ཐོག་རྐང་བ་བཙིར་སྲིད་ཀྱང་གོན་ཡུན་རིང་ན་རང་བཞིན་གྱིས་བདེ་བོ་ཡོང་ངེས”ཟེར།
འབྲུག་མོ་ཡར་ལངས་ཏེ་ཕར་འགྲོ་ཚུར་འོང་འགའ་བྱས་རྗེས་ཕྱིར་ཡོང་ནས“ངའི་རྐང་བར་ན་ཟུག་ལངས་བྱུང”ཟེར།
མགོན་པོ་སྐྱབས་ཀྱིས“ཁྱོད་ལ་ན་ཟུག་ལངས་ན་ང་ལ་ཡང་ན་ཟུག་ལང་གིན་འདུག”ཅེས་བཤད།
འབྲུག་མོ་ཧ་དགོད་བྱེད་བཞིན་དུ“ཁྱོད་ལ་གང་ནས་ན་ཟུག་ལང་གིན་འདུག”ཅེས་དྲིས་བྱུང་།
“སྙིང་གར་ན་ཟུག་ལང་གིན་འདུག” མགོན་པོ་སྐྱབས་ཀྱིས་རང་གི་བྲང་ལ་ལག་པས་རེག་རེག་འགའ་བྱས།
“འོ་ན་ང་ཡོང་ནས་ཕུར་མཉེད་ཅིག་བྱ།” འབྲུག་མོ་ཕུག་རོན་ཚང་དུ་འཛུལ་བ་དང་འདྲ་བར་མགོན་པོ་སྐྱབས་ཀྱི་པང་དུ་ལྷུང་།
རྨི་ལམ་དེ་ལས་སད་པ་ན། མགོན་པོ་སྐྱབས་ཀྱིས་ཉལ་ཐུལ་ཧྲིལ་བོ་རྡོག་པོར་དྲིལ་ནས་པང་དུ་བསྡམས་འདུག་ལ།ངོ་གདོང་ཧྲིལ་བོ་ད་དུང་ངར་ལམ་ལམ་བྱེད་ཀྱིན་གདའ། ……
ཟླ་གཅིག་གི་དུས་ཚོད་ནི་སེ་གོལ་གཏོགས་ལྟར་ཕར་འདས་སོང་།མགོན་པོ་སྐྱབས་ཀྱིས་ལྷམ་བཟོའི་དུས་ཚོད་དེ་འཆར་གཞི་ལས་སྔ་འགྲུབ་བྱས་བྱུང་བས། ཀོ་ལྷམ་གཉིས་སྔར་ནས་སྒམ་ནང་དུ་བསྡུས་ཏེ་དོ་དམ་ལེགས་པོ་བྱས་ཡོད་ལ།འབྲུག་མོ་ཞིན་ཅང་ནས་ལོག་ཚེ་དུས་དང་རྣམ་པ་གང་ཡིན་ཀྱང་འབུལ་རྐྱང་ཡིན།
ཁྱིམ་དུ་སུ་ཡང་མེད་པའི་སྐབས་ཤིག་ལ། མགོན་པོ་སྐྱབས་ཀྱིས་ཀོ་ལྷམ་ཉར་ཚགས་བྱས་ཡོད་པའི་སྒམ་ཁ་སེམས་ཆུང་གིས་ཕྱེ།ཀོ་ལྷམ་དེ་གཉིས་ནི་སྒམ་ཞབས་སུ་རིན་པོ་ཆེ་ལྟར་ཀྲོང་ངེར་བསླངས་འདུག་ལ། ཉི་འོད་འོག་ཏུ་བལྟས་ན།དངོས་གནས་དེ་ཕོ་ཆུང་ཆུང་གཉིས་དང་འདྲ་བར་ལུས་ནས་འོད་མདངས་འཁྱུག་པ་དང་། བུས་པ་མཚེ་མ་གཉིས་དང་འདྲ་བར་སྙིང་དུ་སྡུག་པ་ཞིག་རེད།ཁོས་ཀོ་ལྷམ་ལག་ཏུ་བླངས་རྗེས་ཡུད་ཙམ་ལ་གཡས་ལྟ་གཡོན་ལྟ་ཡིད་ཚིམ་པ་ཞིག་བྱས་རྗེས་ཅི་མི་སྙམ་པར་ག་ལེ་ག་ལེར་བྲང་ལ་གླན་བྱུང་ལ།སེམས་སུ་འབྲུག་མོ་རང་གི་པང་དུ་འཐམས་པའི་སྣང་བ་ཞིག་སྐྱེས་འོངས།
བར་པ་དུས་ཆད་ལྟར་མགོན་པོ་སྐྱབས་ཚང་ལ་སླེབས་བྱུང་།འོན་ཀྱང་ཁོའི་ངོ་མདངས་ནི་དེ་སྔོན་དང་གཏན་ནས་མི་འདྲ་བར་སྐྱ་ཐལ་ལེར་གྱུར་འདུག་པ་དང་།གོ་ཁའི་ཡར་སྒྱེད་དུ་ཙོག་མ་ཐག་དབུགས་རིང་ཞིག་འཐེན་ནས“འགྲིག་མ་སོང་། འགྲིག་མ་སོང་། འབྲུག་མོ་ལ་རླངས་འཁོར་གྱི་དོན་རྐྱེན་བྱུང་སྟེ་ཟི་ལིང་གི་སྨན་ཁང་དུ་བསྐྱལ་སོང”ཟེར།
བར་པ་ཀུ་རེ་རྩེ་རྒྱུར་གཏན་ནས་མི་དགའ་བས། མགོན་པོ་སྐྱབས་ཀྱིས་བར་པའི་གཏམ་དེར་ཡིད་ཆེས་མི་བྱེད་པ་ག་ལ་སྲིད།ཁོས་གཏམ་དེ་ཐོས་པས་རེ་ཞིག་ཚིག་གཅིག་ཀྱང་ངག་ལས་མ་འཁྲོལ་བར་ཅི་བྱ་གཏོལ་མེད་དུ་གྱུར་ཏེ་ཡུལ་ཡུལ་བོར་ལུས་སོང་ལ།ཁང་བའི་ནང་དུ་ནུ་བོས་ཁྱིམ་ལས་བྱེད་པའི་ཆོམ་སྒྲ་དང་ཁྲོག་སྒྲ་འགའ་ལས་ཅི་ཡང་ཐོས་རྒྱུ་མི་འདུག
“སྲོག་ལ་སྐྱོན་མེད་པའི་སྨོན་ལམ།” ཡུད་ཙམ་ནས་མགོན་པོ་སྐྱབས་ཁ་གྲགས་བྱུང་།
“ཁ་སང་སོ་མ་སྨན་ཁང་དུ་ཁྱེར་བ་རེད། སྲོག་ལ་སྐྱོན་མེད་རབས་བཤད།”བར་པའི་སྐད་མགོ་ཡང་ཇེ་དམར་ལྷུང་འདུག
“ངས་དུས་རྒྱུན་དུ་ཁ་ཏོན་དང་མཇལ་སྐོར། མཆོད་འབུལ་སོགས་བྱེད་སྐབས་སྨོན་ལམ་དྲག་པོ་མ་བཏབ་པའི་དུས་ཤིག་མེད།ཡིན་ན་ཡང་། ངའི་ལན་ཆགས་འདི།” མགོན་པོ་སྐྱབས་ཀྱི་མིག་ཀོང་དུ་མཆི་མ་ཉིལ་ཉིལ་དུ་འཁོར་བྱུང་།
“གལ་ཏེ་སྟབས་འགྲིག་ན་འུ་གཉིས་ཟི་ལིང་དུ་བལྟ་རུ་སོང་ན་འགྲིག”
མགོན་པོ་སྐྱབས་ཀྱིས་མགོ་བོ་ནང་དུ་ལྡེམ་ལྡེམ་འགའ་བྱེད་པ་ལས་ཚིག་གཅིག་ཀྱང་མི་བྱེད།
རེ་ཞིག་ནས་ཁོ་གཉིས་ལ་ཁ་བརྡ་ཅི་ཡང་མེད་པར་གྱུར།འདང་བརྒྱབ་ན་བཤད་དགོས་པ་ཐམས་ཅད་བཤད་ཟིན་པས་ཁ་བརྡ་གཞན་ཅི་ཞིག་བྱེད་ཨང་།
ལྷས་རའི་ནང་གི་བཏགས་ཁྱི་གློ་བུར་དུ་ཟུག་བྱུང་ལ།ཁྱིའི་ཟུག་སྐད་ལ་བརྟགས་ན་འགྲུལ་བ་ཆ་མེད་ཅིག་ཡོང་བཞིན་པ་ཤེས་ཐུབ། མགོན་པོ་སྐྱབས་ཀྱི་ནུ་བོས་ཁྱི་ལ་སྡིགས་སྐད་དྲག་པོ་འདོན་བཞིན་ཕྱི་རུ་རྒྱུགས་པ་དང་ཅང་མ་འགོར་བར་མགྲོན་པོ་ནང་དུ་བསུས་ནས་ཡོང་།
མགྲོན་པོ་དེ་ནི་སྡེ་དཔོན་རེད། ཁོའི་གདོང་ལ་ནམ་རྒྱུན་མཐོང་ཐུབ་པའི་འཛུམ་མདངས་བཅོས་མ་ཞིག་ཕྱུང་སྟེ་ནང་སྒོ་ནས་བུད་མ་ཐག་ཐང་ལ་ཙོག་པའི་བཟོ་ལྟ་ཡང་མེད་པར“མགོན་པོ་སྐྱབས།སང་ཉིན་ནས་བཟུང་ཀླུ་མང་དགོན་པ་སླར་གསོ་བྱེད་རྒྱུ་ཡིན་པས་སྡེ་བའི་གསར་བུ་འགའ་ནགས་ལ་ཀ་རིང་གཅད་དུ་འགྲོ་རྒྱུ།ཁྱོད་ཀྱིས་ཀྱང་གྲ་སྒྲི་བྱེད་དགོས་རྒྱུ་རེད”ཅེས་བཤད་རྗེས་ཁ་ཕྱིར་འཁོར་ཏེ་བུད་སོང་།
སྡེ་དཔོན་ཕྱིར་ལོག་རྗེས། མགོན་པོ་སྐྱབས་ཀྱིས་ཀོ་ལྷམ་ཆ་གཅིག་དེ་རས་གཙང་མ་ཞིག་གི་ཁུད་དུ་གཅུད་དེ་བར་པ་ལ་གཏད་ཅིང་སྐད་ལ་ངུ་ངག་འདྲེས་པའི་སྒོ་ནས“བར་པ་ལགས།ཁྱི་རྒན་ཀན་ཞེ་གནག་པ་ལ། ཡང་ང་མོ་ལ་བལྟ་རུ་འགྲོ་ཐུབ་རྒྱུ་མ་རེད། ཁྱོད་ཀྱིས་ངའི་ཚབ་བྱས་ཏེ་མོའི་རྐང་མགོར་ལྷམ་འདི་བསྐྱོན་རོགས།ལྷམ་འདི་མོ་ལ་ཚད་དང་རན་པ་ཁོ་ཐག་ཡིན། ང་ནམ་ཞིག་ཕྱིར་ལོག་ན་མོ་དང་འཕྲད་ཐུབ་ངེས་ཡིན”ཟེར་ནས་ལག་པ་འདའ་ར་ར་བྱེད།
བར་པས་ཀྱང་ལག་པ་ཕར་བསྲིངས་ཏེ་ཀོ་ལྷམ་གཟབ་གཟབ་ཀྱིས་ཚུར་བླངས་པ་དང་།ཡིད་ལ་མངར་སྐྱུར་ཁ་ཚ་གང་ཡིན་མི་ཤེས་པའི་ཚོར་བ་ཁྱད་པར་བ་ཞིག་གིས་ཁེངས་སོང་།
ལོ་གཅིག་འགོར་རྗེས། མགོན་པོ་སྐྱབས་ཀྱིས་དགོན་པ་བསྐྱར་བཞེང་གི་ལས་ཀ་མཇུག་རྫོགས་ཏེ་ཡུལ་དུ་ལོག་པ་དང་།སླར་ཡང་བར་པ་ཁྱིམ་དུ་བོས་ཏེ་འབྲུག་མོའི་གནས་ཚུལ་ལ་རྒྱུས་ལོན་བྱས།
བར་པས་རས་ཁུད་དུ་གཅུད་པའི་ཀོ་ལྷམ་ཕྱིར་མགོན་པོ་སྐྱབས་ལ་གཏད་དེ“མོ་ད་དུང་སྨན་ཁང་ན་ཡོད།ད་ཐེངས་མོ་ལ་ཆག་སྒོ་ཆེན་པོ་ཞིག་བྱུང་སོང་། མོའི་རྐང་བ་གཡས་པ་བཅད་ཟིན་པས་ཁྱོད་ལ་ཀོ་ལྷམ་ཕྱིར་བསློགས་སོང”ཟེར།
……
མགོན་པོ་སྐྱབས་ཀྱིས་མདང་དགོང་ཡང་གཡས་རྐང་འཐེང་བའི་ཕུག་རོན་དེ་རྨི་ལམ་དུ་རྨིས་བྱུང་ལ།བྱ་མགོ་མ་གྲགས་པའི་དུས་ནས་ཉལ་ས་མི་བདེ་བའི་སྣང་བ་ཞིག་བྱུང་སྟེ་གཉིད་ལས་སད་བྱུང་། སྒྲོན་མེ་མ་སྦར་གོང་གི་ཁང་བའི་ནང་གི་མུན་པ་རབ་རིབ་ཏུ་སྣང་ན་ཡང་ཁོའི་མིག་ལམ་དུ་ད་དུང་ཕུག་རོན་གསོན་པོ་ཞིག་སྔོ་ཁྲ་ལེར་ཕར་འཕུར་ཚུར་འཕུར་བྱེད་པའི་འཕྲུལ་སྣང་སྟེར་ཅིང་།ཅང་མ་འགོར་བར། སྐྱ་རེངས་ཁད་ཀྱིས་ཤར་འོངས་པ་དང་ཁང་བའི་ནང་རིམ་གྱིས་ཇེ་གསལ་དུ་གྱུར། སྐབས་དེར།མགོན་པོ་སྐྱབས་ཀྱིས་སྒེའུ་ཁུང་ནས་ཕུག་རོན་ཁྱུ་ཞིག་བར་སྣང་དུ་དྲང་ཐད་ཀྱིས་རྒྱང་རིང་དུ་འཕུར་འགྲོ་བ་མཐོང་ལ།རེ་ཞིག་ནས་སླར་ཡང་ཁོའི་མཐོང་ལམ་དུ་གསེག་འཕུར་གྱིས་རུབ་ནས་ཐོན་ཡོང་བ་ནི་དེ་ལས་ལྷག་པས་གསལ་བོར་མཐོང་ཐུབ་པ་རེད།
མགོན་པོ་སྐྱབས་ཀྱིས་མཆོད་རྟེན་ལ་སྐོར་བ་འགའ་བརྒྱབ་རྗེས་ཕྱིར་ཁྱིམ་དུ་ལོགཁོ་རང་སྒོ་ནང་དུ་འཛུལ་མ་ཐག་མིག་ཞགས་དང་པོས་ཁང་བའི་མདའ་ཡབ་ཀྱི་འོག་ཏུ་ཤོག་སྒམ་གྲུ་བཞི་ཞིག་བསླངས་འདུག་པ་དང་།ཤོག་སྒམ་གྱི་ཕྱོགས་ངོས་ཤིག་ཏུ་ཁུང་བ་ཆུང་ཆུང་ཞིག་བརྟོལ་ཡོད་ཅིང་། ཕུག་རོན་གཉིས་ཁུང་བུ་དེ་ལས་ལན་རེར་སྒོར་འབུད་པ་དང་མཚམས་རེར་ནང་དུ་འཛུལ་ནས་མགྲིན་སྒྲ་སྣ་ཚོགས་སྒྲོག་བཞིན་པ་མཐོང་།ཁོ་རང་ཉེ་སར་བཅར་ནས་བལྟས་ཚེ། ཨ་ཙི། ཕུག་རོན་གཅིག་ནི་གཡས་རྐང་རྨས་པའི་ཕུག་རོན་འཐེང་པོ་ཞིག་རེད།
མགོན་པོ་སྐྱབས་ཀྱིས་ཕུག་ཚང་དེ་བཟོ་མཁན་ནི་རང་གི་ནུ་བོ་ཡིན་པ་ཤེས་ཏེ་དབང་མེད་དུ་ཁོང་དགོད་ཅིག་ཤོར་བ་དང་སེམས་ལ་ཇི་འདྲའི་གཅིག་སེམས་གཅིག་ཆགས་པའི་ཕུག་རོན་ཁྱོ་ཤུག་ཟུང་གཅིག་ཨང་སྙམ།
དྲོས་ཇ་འཐུང་སྐབས། ཕུག་རོན་གཉིས་ལྷས་རའི་ནང་དུ་བབས་ཏེ་རྒུམ་བུ་འཐུ་མགོ་བརྩམས་བྱུང་ལ།དེ་གཉིས་མི་ལ་གཏན་ནས་མི་འདྲོགས་པའི་ཚུལ་ལ་བརྟགས་ན་མཆོད་རྟེན་གྱི་མཇལ་པ་ཚོས་བསྐྱངས་པའི་ཕུག་རོན་གཉིས་ཡིན་པ་གདོན་མི་ཟ།
མགོན་པོ་སྐྱབས་ཀྱིས་ཕུག་རོན་འཐེང་བོ་དེ་ལག་ཏུ་བླངས་ནས་བལྟས་ཚེ།རྨ་ཁ་ཡང་རྙིང་འདུག་པས་ན་ཟུག་གི་ཚོར་བ་ཅི་ཡང་མི་འདུག་པ་འདྲ་མོད། འོན་ཀྱང་མིག་གིས་རིག་རིག་ཏུ་ལྟ་བ་ལས་ལུས་པོ་བསྒོངས་ཏེ་འགུལ་ཙམ་ཡང་མི་བྱེད་པར་བལྟས་ན་ད་དུང་མིའི་བྱམས་བརྩེ་དང་སྙིང་རྗེ་ཞིག་ལ་རེ་སྒུག་བྱེད་པ་དང་ཡོངས་སུ་མཚུངས།
མགོན་པོ་སྐྱབས་ཀྱིས་མིག་ལ་མཆི་མ་འཁོར་བཞིན“སྙིང་རྗེ་བའི་ལྷ་བྱ་སྔོན་མོ།ཁྱོད་རང་སྐྱིད་ས་བདེ་ས་ཞིག་ཏུ་འཕུར་ཅིག”ཟེར་བཞིན་སྤར་ཁ་གློད་པ་ན། ཕུག་རོན་དེ“ཕུ་ཐག་ཐག”ཅེས་རྒྱང་རིང་དུ་འཕུར་ནས་སྐོར་བ་གཅིག་ཙམ་བརྒྱབ་རྗེས་སླར་ལོག་ནས་ཁང་བའི་མདའ་ཡབ་ཀྱི་སྟེང་དུ་བབས་སོང་།
（2018ལོའི་སྦྲང་ཆར་དེབ1བའི་སྟེང་སྤེལ།）
རྩོམ་སྒྲིག་པ། རྡོ་རྗེ་བསམ་འགྲུབ།
