རླུང་ཁའི་མེ་ཏོག་སེར་ཆེན།

དྲོད་འཇམ་གྱི་དཔྱིད་རླུང་དལ་བ་དལ་བུར་ལྡང་བྱུང་། ཆུ་དཀར་རྫོང་གི་ནུབ་ཕྱོགས་ཀྱི་གསེར་གཞུང་རྩྭ་ཐང་དུ་མེ་ཏོག་སེར་ཆེན་ནི་ཉི་འོད་ཀྱི་ཟེར་མ་ས་ལ་བཀྲམ་པ་ལྟར་འཚེར་བའི་གཞུང་འབྱམས་སུ། ན་གཞོན་སྙན་ངག་པ་གངས་བུས《ཕུགས་བསམ་ལགས། ང་ཡི་རླུང་གི་གཤོག་པ》ཞེས་པའི་སྙན་ངག་དེ་གྱེར་བའི་བཟི་སྣང་ཁྲོད་མདུན་དུ་བསྐྱོད། ཁོང་གི་ལོ་གསུམ་ལ་བུད་པའི་བུ་ཆུང་བསམ་འགྲུབ་ཀྱང་བོད་ལྭ་ཆ་ཚད་རན་པ་ཞིག་གྱོན་ཏེ་གོམ་པ་ཡ་ཡོར་ངང་རྗེས་སུ་འབྲངས། མཚམས་ལན་རེར་ཁ་ལྕེ་དིག་པའི་སྒོ་ནས་ཀ་མད་སུམ་ཅུ་དབྱངས་ལ་འགུགས་པའི་བར་གླགས་སུ། ནམ་མཁའ་ཐང་ལ་ལྷུང་འདྲའི་གསེར་གཞུང་རྩྭ་ཐང་གི་ཤར་ནས་ཁྲི་གདུགས་ཐ་ལ་ལ། ལྷོ་ནས་ལྷོ་སྤྲིན་ཁོར་མ་ཁོར། ནུབ་ནས་གྲིབ་སོ་ཡོ་རེ་ལངས། བྱང་ནས་སྐྱི་སེར་ཤིག་ཤིག་ལྡང་བའི་བྱིལ་བྱིལ་ལས་མེ་ཏོག་སེར་ཆེན་གྱི་ཚོམ་བུ་འཛུམ་ཞིང་ལྷུག་ལྷུག་དགོད། ན་གཞོན་སྙན་ངག་པ་གངས་བུའི་སྐྲ་ཡི་འཇིལ་ལི་ལྡེམ་ལྡེམ་གཡོ་ཞིང་བསིགས། སྤང་གཤོངས་སུ་བུ་ཆུང་བསམ་འགྲུབ་ཀྱི་གོམ་འགྲོས་འཁྱར་ཞིང་འཁྱོར་བར་བྱེད། སྐབས་དེར་གློ་རྡེག་ལ་རང་བྱུང་གི་ལྟ་ན་སྡུག་པའི་མཚོ་ངོགས་ཀྱི་གཟུགས་སུ་ཆགས་པའི་མཛེས་ཉམས་དེ་བཅོལ་མཁན་ནི་ཕུང་སྲི་གང་ཡང་མ་ཡིན་པར། “ཚི་ལིང”ཞེས་གྲགས་པའི་གངས་བུའི་སྐད་འཕྲིན་གྱི་འབོད་བརྡ་དེ་ཡིན་ལ། ལྷགས་རླུང་ལྟར་ཐོན་པའི་གཟུགས་མེད་ཀྱི་འབོད་བརྡ་དེས་གངས་བུའི་སེམས་ནི་ཟ་ངེ་ཟིང་ངེར་བཏང་སྟེ། ཆུང་མས་ཉེ་སྔོན་ཁོ་ལ“ཁྱིམ་ཚང་གི‘ཁྱིམ’ཞེས་པའི་མིང་འདིའི་གྲུབ་ཚུལ་ལ་དཔེ་བཞག་ན། མིང་གཞི‘ཁ’ཡིག་ནི་ཁྱོད་དང་ཡ་བཏགས་ནི་ང་ཡིན་པ་དང་། བརྩེ་འདང་ནི་དབྱངས་ཡིག་གི་ཐོག་མ་སྟེ་གི་གུ་ལྟ་བུ་ཡིན་ལ། རྗེས་འཇུག‘མ’ཡིག་ནི་བུ་ཆུང་བསམ་འགྲུབ་ཡིན་པས‘ཁྱིམ’འདི་གྲུབ་པ་རེད། དེའི་ཕྱིར་ང་ཚོས་འཚོ་བ་གཙིགས་སུ་འཛིན་དགོས་པ་མཚོན”ཞེས་བཤད་པར། གངས་བུས་ལན་དུ“དེ་ལྟར་ཡིན་ཡང་རུང་། འུ་ཚང་ནི་གཙོ་བོ་མིང་གཞི‘བ’ཡིག་ལ་དབྱངས་ཡིག་ན་རོ་དང་རྗེས་འཇུག་ད་ཡིག་སྦྱར་བའི་ཐ་སྙད་གཡེར་པོ་ཆེ་དེའི་ཕྲ་ཕུང་དུ་གྱུར་པ་རེད། ང་ཚོས་ཆུང་ས་འདི་ནས་ཆེ་ས་ཞིག་ལ་བསྙེག་དགོས། ཁ་ཕོ་བ་ཙམ་བསམས་ན་མི་ལུས་ཐོབ་པའི་སྙིང་པོ་ཅི”ཞེས་བཤད་མྱོང་བའི་སྐད་ཆ་དེ་རྣ་ལམ་དུ་སི་ལི་ལི་གྲགས་པའི་ཚོར་སྣང་དྲག་ཏུ་བསྐྱེད་ཅིང་། དེ་ཡང་ཐེངས་སྔོན་མ་ལྟར་ཁ་པར་གྱི་འཆར་ཤེལ་ངོས་སུ་ཚན་གཙོས་བསྐུར་ཡོང་བའི་ཡི་གེ་བཙན་པོ་དག་ལ་མིག་བཤེར་ཙམ་བྱས་རྗེས། བྲེལ་རྟབ་ཀྱིས་བུ་ཆུང་འཕྲུལ་རྟའི་འཕོངས་ལ་བསྐྱོན་ནས་ལས་ཁུངས་ཕྱོགས་སུ་བུད་སོང……

རླུང་ཁའི་མེ་ཏོག་སེར་ཆེན་ནི་དབྱར་གཞུང་གི་ཉི་འོད་ལམ་ལམ་ཁྲོད་མཚོ་རླབས་བཞིན་དུ་འཕྱུར།

ལོ་ཟླའི་འགྲུད་བཞུད་ལ་བཟློག་ཏུ་མེད་པ་ལྟར་གངས་བུའི་འགྱུར་མེད་ཀྱི་ཕུགས་བསམ་སྒོར་མོའི་གྲ་མ་ཆག་ལ། གང་ཞིག་སྒྲུབ་འདོད་ཀྱི་བརྩོན་སེམས་དེ་ཡང་ཟུར་མ་ཉམས་པར་ཡོད་དེ། ཞེ་རྩ་ཀ་རྡོ་བཞིན་དུ་བརྟན་ཞིང་གཟུགས་གཞི་ཀ་བ་བཞིན་དུ་དྲང་བ། སྨུག་མདངས་བཀྲ་བའི་གདོང་ལ་ཉི་ཟེར་ཕོག་འདྲ། མིག་ཁྲ་ཆུང་བུང་བ་འདྲ་བ། བུང་བ་མཚོ་ལ་འཁོར་འདྲ། སྐྲ་ལྕང་ལོ་དར་སྐུད་ཤད་པ་འདྲ་བ། དར་སྐུད་ལ་ཤེལ་ཞུན་བྱུགས་འདྲའི་གསར་བུ་ལུས་སྟོབས་འཚར་ལོངས་ཅན་ཞིག་དགའ་མདངས་ཡ་ལེ། འཛུམ་མདངས་དམུལ་ལེ། ཁོག་འཛུམ་ཤིག་གེར་ཕུགས་བསམ་རྡོག་རྡོག་ཅིག་རུམ་ལ་བསྡུས་ནས་ལས་ཁུངས་ཕྱོགས་སུ་བསྐྱོད་མཁན་དེ་ནི་གངས་བུ་ཡིན་ལ། ཁོ་རང་ལས་དབང་གི་བསྐོས་ཐང་ལྟར་མི་རིགས་སྐད་ཡིག་ལས་དོན་གྱི་ལས་རྐང་དུ་རྒྱུགས་འཕྲོད་དེ་ལས་ཚོགས་སུ་ཞུགས་པའི་ལོ་གསུམ་པ་ཡིན།

གངས་བུ་རྐང་ཐང་དུ་སྟར་ཆགས་སུ་བསྒྲིགས་པའི་ཁྲོམ་ལམ་ཞིག་བརྒྱུད་དེ་མདུན་དུ་ཕྱིན། སྲང་ལམ་དེའི་གཡས་གཡོན་དུ་མི་རིགས་ཚོང་ཁང་དུ་མ་ཡོད་པ་དག་གི་སྒོ་བྱང་སྟེང་དུ་བོད་རྒྱ་དང་སོག་རྒྱ་ཡིག་རིགས་གཉིས་ཀྱི་ལམ་ནས་མི་རིགས་ཚོང་ཁང་དང་དར་རྒྱས་ཚོང་ཁང་། གཡང་འཛོམས་ཟ་ཁང་། བདེ་སྐྱིད་མགྲོན་ཁང་སོགས་བྲིས་ཡོད་པ་ནི་ཉེ་སྔོན་འགྲོ་སའི་སྲང་ལམ་དེའི་སྒོ་བྱང་སྟེང་གི་བོད་ཡིག་དང་སོག་ཡིག་དག་ནི་ནོར་ཁྱུའི་ཁྲོད་ཀྱི་ལུ་གུ་དང་གཡུལ་འཐབ་རྗེས་ཀྱི་རྨས་མ་ལྟ་བུ་དག་དང་བསྡུར་ན་མིག་ལ་མཛེས་ཤིང་བློ་ངོར་འབབ་པ་ཞིག་རེད་སྙམ་བཞིན་ལས་ཁུངས་ཀྱི་སྒོ་ཆེན་ནང་དུ་འཛུལ།

གངས་བུ་ནང་དུ་ཐོན་པ་ན། མགོ་གཙོ་ལི་གོ་ཀྲུང་ལགས་ཀྱིས་ལོབས་སྲོལ་ལྟར་སོག་སྐད་ཀྱི་ལམ་ནས“ཆའེ་སོ་སོ་སོ”ཞེས་བཤད་ཞོར་གངས་བུའི་གདོང་ལ་ལྟ་བཞིན་འཛུམ་ཞིག་ཤོར་བ་དང་མཉམ་དུ“ཡ། དེ་གར་ཙོག”ཅེས་བོད་སྐད་དུ་བསྒྱུར་ཚུལ་ལ་གཞིགས་ན་ཁོང་ནི་གྲངས་ཉུང་མི་རིགས་ས་ཁུལ་དུ་བྱ་བ་གཉེར་ནས་མཐར་ཕྱིན་པའི་མི་ཞིག་ཡིན་པ་འདྲ་སྙམ་བཞིན་ཁོང་ཚང་གི་ཕྱོགས་སུ་འཛུམ་དམུལ་ཞིག་བསྟན།

“ཁྱོད་ཀྱིས་ཆེད་ལས་ཅི་ཞིག་སྦྱངས་པ་ཡིན”

“བོད་རྒྱ་ཡིག་སྒྱུར། ཡིན་ཡང་མཐར་ཕྱིན་འཛིན་ཡིག་སྟེང་དུ་ཡིག་སྒྱུར་གྱི་ཁ་ཕྱོགས་ཞེས་བྲིས་འདུག”

“དེར་སྐྱོན་མེད། འོ་ན། བསླབ་གནས་ཅི་ཞིག་ཡིན”

“ཤེས་རམས་པའི་བསླབ་གནས་ཡིན”

“འོ་ན། ཏང་ནང་དུ་ཞུགས་ཡོད་དམ”

“སློབ་ཆེན་ལོ་རིམ་དང་པོའི་སྐབས་སུ་ཞུགས་སོང”ཞེས་བཤད་པའི་མཚམས་ལ་མགོ་གཙོའི་གཡས་ལག་གི་མཛུབ་མོ་རྣམས་ཀྱིས་གུས་ཕྱག་འབུལ་བ་ལྟར་མང་པོ་ཞིག་གསལ་བཤད་བྱ་མི་དགོས་པའི་ལག་བརྡ་བཏང་བ་མཐོང་འཕྲལ། མཇུག་གི་བཤད་འདོད་ཀྱི་སྐད་ཆ་དག་ཕྱིར་ཁོག་ཏུ་མིད།

མགོ་གཙོ་ལི་གོ་ཀྲུང་ལགས་ནི་དགའ་ཁྲས་ཁྲས་ངང “འོ་རེད། དེ་ན་འགྲིག་འདུག གང་ལྟར། ཁྱོད་ནི་ཞིབ་འཇུག་སློབ་མ་ཞིག་ཡིན་པར་མ་ཟད་རང་ས་གནས་ཀྱི་མི་བུ་ཞིག་ཡིན་པའི་ཆ་ནས། ཆུ་དཀར་རྫོང་དང་བྱེ་བྲག་ཏུ་རང་གི་ཕ་ཡུལ་གསར་པ་འཛུགས་སྐྲུན་བྱེད་པ་དང་། ཁྱད་པར་དུ་སྤྱི་ཚོགས་ལ་ལག་རྗེས་ཤིག་འཇོག་ཐུབ་དགོས། དཔེར་ན། མཐོ་རི་རབ་རྩེ་ལ་སྐྱ་ལམ་གདོད་ཐུབ་པའི་བརྩོན་པ་དགོས། དམའ་རྒྱ་མཚོའི་དཀྱིལ་ལ་རྐང་ཟམ་གདོད་ཐུབ་པའི་ཤེས་རབ་དགོས། སྟོད་གངས་དཀར་རྩེ་ལ་ཞབས་རྗེས་འགོད་ཐུབ་པའི་བློ་སྤོབས་དགོས། དཔེ་མ་དར་ས་ལ་མདའ་དར་འཛུགས་ཐུབ་པའི་གསར་གཏོད་ཀྱི་རིག་པ་དགོས། ལྷག་པར་དུ་མི་དམངས་ལ་ཞབས་འདེགས་ཞུ་བའི་ཁྲོད་དུ་དཀར་ནག་གི་དབྱེ་བ་འབྱེད་ཤེས་དགོས། ཐག་ནག་གི་མདུད་པ་འགྲོལ་མྱུར་དགོས”ཞེས་རྒྱ་སྐད་ཀྱི་ལམ་ནས་དེ་ལྟར་ཟེར་དུས། མདུན་དུ་ཙོག་ནས་འདུག་པའི་གངས་བུ་ནི་མིག་ཅེར་ཞིང་ཁ་གདངས་ནས་སེམས་སུ་གེ་སར་རྒྱལ་པོས་གླིང་དཀར་སྟོད་ཀྱི་དཔོན་དམག་ཡོངས་ལ་བཀོད་ཁྱབ་ལྷུ་ཐིངས་པ་མཛད་པ་ལྟ་བུའི་ཁམས་གསུམ་ཟིལ་གནོན་གྱི་དོན་གཏམ་ཞིག་རེད་འདོད་དེ། ཀྱེ་མ་ཀྱི་ཧུད། སྤྱི་ཚོགས་ཀྱི་གཤིན་ས་འདི་ལ་མཁོ་བའི་དྲོད་འཇམ་དབྱར་གྱི་ཉི་མ་ལྟ་བུ་ནི་ཁྱོད་མིན་ན་སུ་ཡིན་སྙམ་པའི་བསམ་གཞིག་ཁྲོད་དུ་ལག་ཟུང་ཁ་སྦྱར་ཏེ་པུས་མོའི་སྟེང་བཞག་ཅིང་ལུས་སྟོད་མཐོ་རུ་དགྱེ་བའི་ཉམས་ཀྱིས་ཁོང་གི་གསུང་ལ་ཉན་ནས་བསྡད།

མགོ་གཙོ་ལི་གོ་ཀྲུང་ལགས་ཀྱིས་ཐ་མག་ཅིག་རྔུབ་བཞིན་གང་ཞིག་ལ་མནོ་བསམ་གཏོང་གིན་འདུག བར་མཚམས་དེར་གངས་བུས་ཁ་གྲག་མ་ཕོད་པས་ཁོང་གི་གཞུང་ལས་ཁང་གི་གྲ་ཁ་དང་གྲུ་ཁ་གང་རུང་ལ་མིག་མདའ་ཞིག་འཕེན་སྐབས། གཡོན་གྱང་ངོས་ཀྱི“དངོས་ཐོག་བདེན་འཚོལ”ཞེས་པའི་ཡིག་འབྲུ་ཆེན་པོ་བཞི་བྲིས་ཡོད་པའི་འདྲ་པར་དེ་ལྷང་ངེར་མིག་ལམ་བརྒྱུད་དེ་སེམས་ལ་རྡོག་རྡོག་ཅིག་གི་ཚུལ་དུ་ལྷུང་སོང་། མི་སེམས་རླུང་གི་འགྱུ་བག་དང་བསྟུན་པའི་སྤྱི་ཚོགས་འདིར། དངོས་ཐོག་བདེན་འཚོལ་བྱེད་པའི་དཔོན་པོ་ནི་དེ་བས་ཀྱང་དཀོན་པ་མིན་ནམ། དངོས་ཐོག་བདེན་འཚོལ་ཞེས་པའི་ཡིག་འབྲུ་བཞི་ནི་གངས་བུའི་སྲོག་གི་ཕུང་པོར་ཞུགས་པའི་མི་ཚད་ལུས་སུ་ཟ་འབུ་ན་ར་ར་མདུན་དུ་ནུར་བ་ལྟར་འགུལ་བྱུང་།

“ཡ། གངས་བུ། ངས་ཁྱོད་ལ་ལས་བཅོལ་བྱས་པ་དེའི་ལག་བསྟར་འཆར་གཞི་ཚན་གཙོ་འཇའ་བྷེའི་ལག་ཏུ་བླངས་ནས་ཕྲ་ཞིང་ཞིབ་པར་ལག་ལེན་བྱོས”ཞེས་མགོ་གཙོས་དཔེ་རེ་རེ་དྲངས་ནས་འབོད་དོན་གྱི་དམིགས་ཡུལ་གངས་བུའི་སེམས་ལ་བུམ་པ་གང་བྱོའི་ཚུལ་དུ་བླུགས་རྗེས། བསྐྱར་དུ་ཆུ་ཁོལ་ཧུབ་འཐུང་དང་ཐ་མག་རྔུབ་འཐེན་བྱས། གངས་བུས་རི་རབ་ལྟ་བུའི་བློ་བཀོད་དང་བྱེ་བྲག་གི་བྱེད་ཐབས་རེ་རེ་བཤད་འདོད་དེ “ངས་་་་་་་ངས་་་”ཞེས་ཚིག་མགོ་གླེང་མ་ཐག་མིག་ལམ་དུ་མགོ་གཙོས་གུས་ཕྱག་འབུལ་བ་ལྟ་བུའི་མང་པོ་བཤད་མི་དགོས་པར་བཏང་བའི་ལག་བརྡ་མངོན་བྱུང་། གངས་བུས་མགོ་གཙོའི་བཅོལ་གདམས་ནི་བྲོ་ཁ་ཞིག་གི་ཚུལ་དུ་ཡིད་ལ་ཉར་ཞིང་། དངོས་ཐོག་བདེན་འཚོལ་ཞེས་པའི་ཡིག་འབྲུ་བཞི་ནི་རླུང་ཁའི་མེ་ཏོག་སེར་ཆེན་སེམས་སུ་གཡོ་བ་ལྟར་ཁོང་འཛུམ་ཤིག་ཤིག་ངང་ཚན་གཙོའི་གཞུང་ལས་ཁང་དུ་བུད་སོང་།……

སྟོན་མགོ་ཚུགས་རྗེས་རྫ་མགོའི་སྨུག་པ་ཡལ་ཞིང་སྤང་དུ་སེར་ཐིག་ལྷུང་།

ཆུང་མ་ཟླ་སྒྲོན་གྱིས“སྙིང་སྡུག་ལགས། དེ་རིང་ནི་ཅི་ཞིག་གི་ཉིན་མོ་རེད”ཅེས་བསྐུར་བའི་བརྡ་འཕྲིན་དེ་འབྱོར་དུས་གངས་བུ་ད་དུང་གསར་དུ་བསྐོས་པའི་ཚན་གཙོའི་གཞུང་ལས་ཁང་དུ་སླེབ་མེད། གངས་བུས་མིག་བཤེར་ཙམ་བྱས་པ་ལས“དེ་རིང་ནི་ངས་གཞན་ལག་ནས་མེ་ཏོག་སེར་ཆེན་རྐང་གཅིག་བཙན་འཕྲོག་བྱས་པའི་ཉིན་མོ་རེད་ཅེས་ལན་འདེབས་བསམས་མོད། འོན་ཀྱང་བྱ་བའི་བྲེལ་ཟིང་གི་དབང་གིས་ལན་ཅི་ཡང་མ་བཏབ། “ཚི་ལིང”ཞེས་པའི་ཁ་པར་གྱི་བརྡ་འཕྲིན་འབྱོར་བརྡ་ཡང་བསྐྱར་གྲགས་བྱུང་། གངས་བུས་གོམ་པ་སྔུན་ལ་སྤོ་མཚམས་བཞག་སྟེ་སྐད་འཕྲིན་གྱི་ཁ་ཕྱེ་བ་ན། ཆུང་མས“ངེད་གཉིས་གཉེན་བསྒྲིགས་ནས་ཏག་ཏག་ལོ་འཁོར་བདུན་ལོན་པའི་ཉིན་མོ་རེད། ཨ་རོག རླུང་ཁའི་མེ་ཏོག་སེར་ཆེན་ལ། སྟོན་གྱི་སེར་ཐིག་ལྷུང་ཤས་ཆེ། ཧེ་ཧེ། བུ་རྟགས་ཤིག་མི་འཇོག་གམ། གསར་ཡག”ཅེས་གསལ་ཁ་བཏོད་ནས་བཤད་འདུག རེད་ལགས། ལོ་ངོ་བདུན་གྱི་ཡར་སྔོན་གྱི་དེ་རིང་གི་ཉིན་མོར་ངེད་གཉིས་ཀྱིས་རང་རང་ལ་དབང་བའི་བརྩེ་དུང་དྭངས་མ་དེ་རྒྱབ་ཏུ་བསྐྱུར་ནས་འཚོ་བ་ཟེར་བའི་སྣེ་རུ་སེམས་ཀྱི་མདུད་པ་རེ་རེ་གྲོལ་ནས་འོངས། རིམ་བཞིན་ངས་ནི་བྱིས་དུས་ཀྱི་རྩེད་ར་ནས་བསྙལ་བའི་ཆུང་གྲོགས་ཀྱི་ཞེ་འདང་བརྗེད་དུ་བཅུག་ལ། ཁྱོད་ཀྱིས་ཀྱང་ཆུང་འདྲིས་བྱམས་པ་འཇའ་བྷེ་མ་གཏོགས་མི་ཤོང་བའི་བརྩེ་དུང་གི་བུམ་པ་ང་གཅིག་པུར་དབང་བར་བྱས་ཤིང་། དེ་བཞིན་དུ་སྔས་ཐོག་གཅིག་ཏུ་མགོ་བོ་བཞག་པ་ནས་བཟུང་། ཕན་ཚུན་ལ་ཁོག་གི་གློ་སྙིང་དམར་རྗེན་མ་སྟོན་བཞིན་འཚོ་བའི་ས་འཛིན་དུ་བརྩེ་དུང་གི་མེ་ཏོག་བཞད་ཅིང་འབྲས་བུ་སྨིན། ལྷག་པར་དུ་རེ་སྨོན་འབུམ་གྱིས་གྲུབ་པའི་བུ་ཆུང་ནི་ངེད་གཉིས་ཀྱི་སེམས་པ་སྦྲེལ་བའི་ཨ་ལོང་ཡིན། སྙིང་སྡུག་ལགས། ངས་བུ་རྟགས་ཤིག་ཅི་ལ་འཇོག་མི་འདོད་དེ། ཡིན་ཡང་། ཐོག་མར་ངའི་ཕུགས་བསམ་གྱི་མེ་ཁ་ཅུང་ཙམ་གསོ་བར་གུ་ཡངས་ཅུང་ཙམ་གནང་ན་ཆོག་གམ། དུས་ཚོད་ཕྱི་འགྱངས་ཅུང་བྱས་པ་ཙམ་གྱིས་འུ་གཉིས་བར་དུ་ཧེ་བག་ཡོད་པ་མི་མཚོན། གང་ལྟར་ང་ནི་ཁ་བཤད་དོན་ལ་གནས་པའི་མི་ཞིག་ཡིན་པ་ཤེས་དགོས་ལགས། གངས་བུས་སེམས་ལ་དེ་ལྟར་སྔོག་བཞིན་ཚན་གཙོའི་གཞུང་ལས་ཁང་དུ་ཇི་ལྟར་ཐོན་པའང་མ་ཤེས།

ཚན་གཙོ་འཇའ་བྷེ་ཡིས་གཞིས་བུད་མེད་ཐོག་ལ་གྲི་མགོ་ཕུད། གཡོག་མར་འདུག་སྟེང་ལ་ཁྲིམས་ཁ་བཙན་ཟེར་བའི་ཉམས་སྣང་དང་བཅས“དེང་སང་ནངས་ཀ་མི་ལ་ལས་མགོ་གཙོར་དམུ་གབ་ནག་པོའི་དབང་བསྐུར་ནས་ངོ་མ་ངར་བ་རེད། ངར་བ་རེད”ཟེར་བཞིན་གཞུང་ལས་ཁང་ནང་དུ་ཡར་འགྲོ་མར་འགྲོ་བྱེད་བཞིན། “ཧུན། དཀའ་བའི་ལས་ཤིག་མ་ལས་ན། སླ་བའི་ཟས་ཤིག་རག་མི་ཐུབ་ཡ”་ཟེར་ཚུལ་ལ་བལྟས་ན་སུ་ཞིག་གིས་ཁོ་ལ་ཁོང་ཁྲོ་བསླངས་འདུག་པ་འདྲ། ཅུང་མ་འགོར་བར་ནང་དུ་སླེབས་པའི་གངས་བུ་ལ་སྡང་བའི་མིག་མདའ་འཕེན་ཞོར“གང་ལྟར། སྐྱ་རེངས་ནམ་མཁའི་སྒོ་འབྱེད་ལ། སྤར་མོས་ཁེབས་པ་ལར་ནས་མེད”ཟེར་བ་ནི་བསམ་གཟས་ནས་གངས་བུའི་རྣ་ལམ་དུ་བརྫངས་པ་ཡིན་པར་འདུག གངས་བུའི་སེམས་ལ་གལ་སྲིད་ཁྱོད་ཀྱིས་ངའི་མགོ་ཐོག་ནས་མེ་འབུད་པར་བྱེད་ན། ངས་ཀྱང་དགྲ་ལ་ལན་དང་གཉེན་ལ་ཆང་། ནད་པ་ལ་སྨན་ཟེར་བ་ལྟ་བུའི་ཚུལ་འཆོས་ཤིག་བསྟན་ན་ལོས་ཆོག་སྙམ་པའི་ངོ་མདངས་ཤིག་མངོན་པར་བྱས་ནས་བསྡད།

“ཡ་བཟང་གི ཐོག་མར་ངས་ཁྱེད་ལ་ལས་ཀ་ཞིག་བཅོལ”ཟེར། གངས་བུས་ཚན་གཙོའི་བརྟུལ་ཞུགས་གང་ཞིག་བཟུང་བར་དོ་སྣང་མེད་པའི་ཚུལ་དུ་ཡ་ཡ་ཡོ་ཡོ་ཟེར་བཞིན་བཙན་ཚུགས་ཀྱིས་འཛུམ་ཙམ་མི་སྟོན་ཐབས་མེད་དུ་གྱུར། ཚན་གཙོས་དབུལ་པོས་གསེར་རྙེད་དེ་ཞིབ་ལྟ་བྱེད་པའི་ཚུལ་གྱིས་གངས་བུའི་ལུས་ཡོངས་ལ་མྱུལ་ཞིབ་བྱེད་བཞིན“སྤྱི་གཙུག་རིལ་རིལ་རེད། རྩ་ལམ་དྲང་མོ་རེད། ཀླད་པ་ཁོག་སྟོང་མ་རེད། ཕར་བལྟས་ན་དཀར་ཡོལ་བཅག་ན་བཙེམ་ཚུལ་ཡོད་པ་དང་། སྒོ་ང་བཅག་ན་སྦྱོར་ཚུལ་མེད་པའི་ངོས་ཟིན་ཞིག་ལོས་ཡོད་སྙམ། ཧ་ཧ་ཧ། ཀུ་རེ་རྩེད་པ་ཡིན། ང་ནི་མི་ཉམ་ཆུང་སྟེང་ལ་མཉམ་སྡང་། གད་དམའ་བོའི་སྟེང་ལ་ཆུ་འབབ་པའི་མི་ཞིག་གཏན་ནས་མིན། ཡིན་ཡང་མི་ཁེངས་རློམ་ཅན་འགྲོ་མ་ཤེས་གོང་ལ་རྒྱུག་པར་མོས་པ་ཚོར་ཁ་ལོ་བཏུལ་བའི་ཐབས་ཤེས་ང་ལ་ཡོད”ཟེར་ཞོར་སྐེ་ཀྲོང་ཀྲོང་ངང་ཁོ་ལ་རྒྱབ་བསྟད་ནས་འདུག་པའི་གངས་བུའི་ངོ་གདོང་ཕྱོགས་སུ་སྐེ་དཀྱོགས་ཏེ་ཡང་བསྐྱར“ཧ་་་་ཧ་་་་་་ཧ”ཞེས་འུག་པ་བགད་འདྲའི་ཧབ་ཆ་ཞིག་བརྒྱབ། ཧབ་ཆ་དེ་ནི་གངས་བུའི་རྣ་ལམ་དུ་འབྲུག་སྟོང་དུས་གཅིག་ཏུ་གྲགས་པའི་འཕྲུལ་སྣང་ཁྲོད་དུ་ཕུགས་བསམ་ཞེས་པའི་རུམ་ཁོང་གི་ནོར་བུ་དེ་ཉིད་ཐང་ལ་ལྷུང་སྟེ་གས་ཁ་ཤོར་བའི་ཞེད་སྣང་སྐྱེ་ཞོར་གྲང་འདར་ལྟ་བུ་ཞིག་ཀྱང་རྒྱག་དགོས་བྱུང་། ཡིན་ཡང་སེམས་པ་ཅུང་ཙམ་སོར་ཆུད་དེ་ཞིབ་འདང་རེ་བརྒྱབ་ན། ཚན་གཙོ་ནི་ངའི་ཐོག་ཏུ་ཞེ་སྡང་མེ་ལྟར་ཝལ་ཝལ་འབར་དོན་སྲང་གང་མེད། ངས་ཁོ་ཚང་གི་རྟ་མ་དེད། མི་མ་བསད། རྒྱུ་མ་འཕྲོག ལྷག་དོན་ཐེངས་རེ་རེར་མགོ་གཙོའི་གཞུང་ལས་ཁང་དུ་སོང་བ་ཡང་ཐབས་དང་གཡོ་ལ་བརྟེན་ནས་སོང་བ་མིན་པར་གཞུང་དོན་གྱི་ཆེད་དུ་ཡིན། སོང་ཡང་ཁྱེད་ལ་གནོད་པའི་ལས་ཤིག་སྲོ་མང་ཙམ་ཡང་གླེང་མེད་ལ་གླེང་བའི་དགོས་པའང་ཅི་ལ་འདུག་སྙམ་བཞིན་པའི་དུས་དེར། ཚན་གཙོས་ཧ་ཅང་གཟབ་ནན་གྱི་སྒོ་ནས“གངས་བུ་ལགས། ཡུལ་གྲོགས་ང་མི་ཤེས་སམ། ང་འཇའ་བྷེ་ཡིན་ཡ”ཟེར་ནས་གངས་བུའི་ཕྲག་པར་ལག་པས་རྡེག་རྡེག་འདྲ་བྱས། གངས་བུའི་ཁ་མིག་བྲིས་མ་ལྟར་ཡ་མཚར་བར་སྡོད་སྐབས་འཇའ་བྷེ་ཡིས་ཐལ་ལྕག་བརྒྱབ་སྟེ་གད་མོ་ཤོར།

འཇའ་བྷེ་ལ་དགོད་ཁ་ཤོར་བར་ཡང་ཁག་མེད་དེ། གངས་བུས་གསར་དུ་བསྐོས་པའི་ཚན་གཙོ་ནི་ཁོ་ཡིན་པ་ལར་ནས་མ་ཤེས། ཉིན་འདི་འགར་ཁོང་གི་གཞུང་ལས་ཁང་དུ་སོང་མྱོང་ཡང་གོང་འོག་གི་འབྲེལ་བ་དེའི་རྐྱེན་པས་ཞིབ་ལྟ་ཞིག་མ་བྱས་ལ། ཞིབ་མོ་ཞིག་བལྟ་འདོད་ཀྱང་ཡེ་ནས་མ་བྱུང་། ངེད་གཉིས་ལོ་ཉི་ཤུའི་ཡར་སྔོན་དུ་ལོ་གཅིག་ཙམ་ལ་མཉམ་སྡོད་བྱས་མྱོང་བའི་སྐབས་དེར་རྐྱེན་ཅི་ཡིན་མ་ཤེས་མོད། འོན་ཀྱང་ཁོང་གི་ཨ་ཕས་ཁོ་རང་ཆུ་དཀར་རྫོང་ཆ་ཚང་སློབ་ཆུང་དུ་མངགས་སོང་། དུས་དེ་ནས་བཟུང་ད་རག་བར་དུ་ཕལ་ཆེར་ལོ་ངོ་ཉེར་གཉིས་ཙམ་ལ་ངོ་ཐུག་མ་མྱོང་བས་ཅི་ཁག་སྟེ། ངེད་གཉིས་ན་ལུང་ཡུལ་ཚོའི་མི་རིགས་བཅའ་སྡོད་སློབ་ཆུང་གི་ལོ་རིམ་གཉིས་པའི་སྐབས་ཀྱི་བྱིས་པ་སྣབས་ལུག་གཉིས་ཡིན་དུས་ཁོང་གི་མ་ནེའི་མགོ་རུ་སྨེ་བ་ནག་པོ་ཞིག་ཡོད། སྐབས་དེར་ཁོ་ནི་ལོ་ན་ཆུང་ཡང་ལབ་རྐྱལ་ཞིག་ཡིན་པའི་མི་ཚད་སྣོག་རྐྱལ་ཞིག་ཀྱང་ཡིན་ལ། དོམ་རྐྱལ་ཞིག་ནི་དེ་བས་ཀྱང་ཡིན་ཕྱིན་སྨེ་ནག་དགྲ་ཁ་ཞེས་པའི་མཚང་མིང་ཞིག་བཏགས་ཡོད་པའང་དོན་གཏམ་ཡིན་ཏེ། ཉིན་ཞིག་ལ་ཁོང་གིས་རང་ལས་ཆུང་བའི་བྱིས་པ་ཞིག་གི་ལག་ནས་སྒོར་ཟུར་གཉིས་ཐབས་དང་གཡོ་ལ་བརྟེན་ནས་བསླུ་ལེན་བྱས་ཤིང་། སློབ་གྲྭའི་སྒོ་ཁའི་ཚོང་ཁང་ཞིག་ཏུ་ཉི་འབྲུ་ཉོས་པ་དང་བརྡར་ཤ་གཅོད་པའི་སློབ་གྲོགས་གཞན་ལ་ཁོང་གི་ཡིན་པར་ལབ་པ་དང་སྣོག་བརྒྱབ་སྟེ་ཨུ་ཚུགས་ཚད་པས། བྱིས་པ་དེའི་ལོ་རིམ་བཞི་པའི་ཕུ་བོ་ནི་སློབ་ཁྲིད་གྲོལ་རྗེས་རང་གི་ནུ་བོར་བརྙས་བཅོས་བྱས་པའི་གཏམ་དེ་ཐོས་ཏེ་དགྲ་ཤ་ལེན་དུ་སྐས་རིང་བ་ལས་བབས། ཐུང་བ་ལས་མཆོངས་ཡོང་སྟེ། འཇའ་བྷེ་ལ་དགྲ་དཔུང་ཆམ་ལ་འབེབས་པར་བྱེད་པའི་རྫིག་ཉམས་ཙམ་བསྟན་པས་ལས་བྱ་འབྲི་བཞིན་པའི་ཁོ་ནི་རྐུབ་སྟེགས་སྟེང་ལྷུང་ལ་ཁད་དང་ལོག་ལ་ཁད་བྱེད་བཞིན་པ་ངས་དངོས་སུ་མཐོང་མྱོང་། ཡིན་ཡང་། ཁོས་ནམ་རྒྱུན་གངས་བུ་གངས་ཁོའམ་ཡང་ན་ང་ལས་ལོ་ཚོད་ཆུང་ཡང་ཕུ་བོ་ཞེས་འབོད་པར་བྱེད་པས་མལ་ཁང་དུའང་ངེད་གཉིས་མལ་ཁྲི་ཐོག་འོག་བྱས་ནས་བསྡད་པ་ཡིན། འདང་རྩིས་དེ་ཙམ་ཡོད་པས་ང་ཡང་རང་ཡན་དུ་སྡོད་མ་ཚུགས་པར་ཁོ་ལ་རྡུང་རྡེག་བྱ་རྩིས་ཡོད་པའི་བྱིས་པ་དེ་བཀག་སྟེ་བར་འདུམ་བྱས་པ་ཡིན། བྱིས་པ་དེས་སྨེ་ནག་དགྲ་ཁ་སྒུག་ནས་སྡོད་ཟེར་བཞིན་འཇའ་བྷེའི་ཐོད་དཀྱིལ་དུ་མཛུབ་མོས་སྐོར་འཛུགས་ཤིག་བྱས་ཏེ་ཁོང་ཁྲོའི་མེ་ལྕེ་འབར་བཞིན་སྒོར་བུད་སོང་། སྐབས་དེར་ངའི་མིག་ལམ་ནས་འཇའ་བྷེ་ནི་ཆག་གྲུམ་རྡིབ་གསུམ་ཤོར་བའི་ཁང་རྙིང་ཞིག་དང་ཤི་འགུམ་རྨས་གསུམ་ཐེབས་པའི་རྨས་མ་ཞིག་དང་གཉིས་སུ་མ་མཆིས། ད་དུང་ཁོང་གི་ལུས་འདར་བ་སྡོང་པོ་སྐྱོད་སྐྱོད་དང་མགོ་འདར་བ་ལྕང་ལོ་བསིགས་བསིགས། ཁ་འདར་བ་སོ་སྒྲ་ཐག་ཐག་བྱེད་བཞིན་པའི་ཉམ་ཆུང་གི་རྣམ་པ་དེ་ད་དུང་ཡང་ཁ་སང་བྱུང་བའི་དོན་དག་ཅིག་དང་འདྲ་བར་ཡིད་ལ་གསལ་ལེར་འཆར་འོངས། སྐབས་དེ་དག་ཏུ་ང་ནི་ཕལ་ཆེར་ཁོང་གི་སྐྱབས་མགོན་ཞིག་ཏུ་བརྩིས་ན་ཁ་ཤོབ་ཆེ་བར་མི་འགྲོ་སྙམ། རྒྱུ་མཚན་ཡང་བྱིས་པ་འཁྲུག་རྐྱལ་འགའ་དང་དོམ་པ་སྐོར་ཞིག་གི་ལག་ནས་བཙན་འཕྲོག་བྱས་པའང་ཐེངས་གང་མང་ཡིན། ལྷག་པར་དུ་ཁོང་གིས་བྱིས་པ་མ་རབས་ཐབས་རྡུགས་ཤིག་ལ་སྒོར་ཟུར་གཅིག་བསྐྱིས་པའི་སྐྱིན་ཚབ་ཀྱི་བུ་ལོན་ནི་སློབ་སྐབས་གཅིག་ལ་སྒོར་ལྔ་རུ་བུད་པ་དེ་ཡང་ངས་ཁོ་ལ་རོགས་བྱས་ཏེ་དོམ་ས་བརྒྱབ་པ་ཡིན། ཨ་ལ་ལ། མི་ལ་ནི་འགྱུར་ལྡོག་ཅི་ཙམ་ཆེ་ཨང་། ཉེ་སྔོན་འཇའ་བྷེ་ནི་མི་རིགས་སྐད་ཡིག་གི་ལས་དོན་སྤེལ་བའི་ལས་ཁུངས་འདིའི་ཡིག་སྒྱུར་ཚན་ཁག་གི་ཚན་གཙོར་བསྐོས་སོང་བར་མ་ཟད། ཁོ་ནི་ཚན་གཙོའི་ཆེད་བཀོལ་རྐུབ་སྟེགས་སྟེང་འགྱིང་སྡོད་བྱས་ཡོད་པའི་སྐབས་སུ་ནི་བལྟས་ཚོད་ལ་ཞལ་རས་སྒོར་ལ་སྣ་དཔངས་མཐོ་ཞིང་མིག་ཟུང་ཆེ་བ་སྨིན་མ་སྟུག་པོའི་འོག་ཏུ་མཚར་བ། ཤ་མདངས་སྨུག་ལ་ལུས་སྟོབས་རྒྱས་པ། ནུབ་ལྭ་སྐྱ་སྐྱ་ཚད་དང་རན་པ་ཞིག་གྱོན་ཞིང་མགུལ་ཆིངས་དམར་པོ་ཐུར་དུ་དཔྱངས་ཤིང་ཀོ་ལྷམ་ཐོག་ཏུ་སྣུམ་འོད་འཁྱུག་པ་ཞིག་ཡིན་པའི་ཁར། རྒྱ་སྐད་བྱང་ཆུབ་པ་ཞིག་བཤད་པས་དཔོན་ཉམས་ཀྱི་གཟི་བརྗིད་ཅིག་གིས་ཁེངས་འདུག ཁྱད་པར་དུ་འདང་མི་དཔོག་པ་ཞིག་ལ། ཁོང་གི་མ་ནེའི་མགོ་རུ་སྨེ་བ་ནག་པོ་ཞིག་ཡོད་པ་དེ་ནི་ངའི་ཆུང་དུས་ཀྱི་འཕྲུལ་བའི་བློ་ལས་བྱུང་བའི་སེམས་བྱུང་ཙམ་ཡིན་ནམ། དཔེ་མི་སྲིད། གཏན་ནས་མིན། ཆུང་དུས་ཁོ་རང་ཕམ་འདུག་དུས་ངས་ཁོང་གི་མིག་ཆུ་འབྱིད་སྐབས་སྨེ་བ་ནག་པོ་དེར་ལག་པས་རེག་མྱོང་། འཇའ་བྷེ་ཡི་སྨེ་བ་ནག་པོ་དེའི་སྟེང་དུ་ད་རུང་སྤུ་ཉག་རྐང་གཅིག་ཀྱང་སྐྱེས་ཡོད། ང་ལ་འཁྲུལ་སྣང་བྱུང་བ་གཏན་ནས་མིན་འདོད་དེ་བསྡད།

འཇའ་བྷེའི་སེམས་ལ་གངས་བུ་ནི་ཆུང་དུས་གྲོགས་ལ་འདང་ཡོད་པ་དང་ཁ་བཤད་དོན་ལ་གནས་པའི་མི་ཞིག་ཡིན། ངས་སྒོར་ཟུར་ལྔ་ཡི་དོམ་མ་བྱིན་པས་ལྷ་སྲས་ཟེར་བའི་ཁྱི་སྐྱག་དེས་ཁྱི་ཉལ་མའི་མགོར་རྡོ་བརྒྱབ། མི་གཉོམ་ཆུང་མགོར་གྱོད་བཞག་ཟེར་བའི་དཔེ་ལྟར། ང་རང་ཤ་རྙོག་རུས་རྙོག་ཏུ་གཏོང་གྲབས་ཡོད་དུས་གངས་བུ་གདོང་ལ་བུད་ནས་རྡུང་རེས་བརྒྱབ་སྟེ་ཁོང་གི་ནག་ཅིང་འོད་འཁྱུག་པའི་སྐྲ་ཡི་འཇིལ་ལི་ཞིག་ཀྱང་བལ་སོང་ལ། ངའང་ཆག་སྒོ་དེ་ལས་སྐྱོབ་ཐབས་བྱས། སྐབས་ཐོག་དེར་དཔུང་རོགས་བྱས་པའི་བཀའ་དྲིན་ངས་ད་ལྟ་ད་རུང་མ་བརྗེད་སེམས་ན་ཡོད། གང་ལྟར་གངས་བུ་ནི་བུ་ལ་དཔའ་རྩལ་སྦྱིན་མཁན་ཞིག་དང་རྟ་ལ་བང་ཁ་སྩོལ་མཁན་ཞིག་ཡིན། མདོར་ན་ཁོ་ནི་མཚོན་ལ་རྣོ་ངར་སྐྱེད་མཁན་དང་དགྲ་མགོ་རྡོག་པས་གནོན་མཁན་དེ་མ་ཡིན་ནམ། ཁོང་གི་ད་ལྟའི་གནས་བབ་ལ་བལྟས་ན། ངའི་ཆུང་འདྲིས་བྱམས་པ་ཟླ་སྒྲོན་ཁོང་གི་འཚོ་བའི་རྒྱབ་ཤེད་དུ་གྱུར་འདུག་ལ། བུ་ཆུང་ཡང་སྙིང་རྗེ་པོ་ཞིག་བཙས་འདུག ད་དུང་ཁོང་གིས་ཤེས་རམས་པའི་བསླབ་གནས་བླངས་འདུག་པར་མ་ཟད། འདོད་དོན་ལྷུན་གྱིས་གྲུབ་འདུག དེ་ལས་ཀྱང་ཡིད་སྨོན་ཤོར་བ་ནི་གངས་བུ་ལས་ཁུངས་འདིར་ཡོང་བའི་རིང་ལ། མགོ་གཙོས་ཐུགས་འདང་ཆེ་ཆེ་འདྲ་གནང་གིན་འདུག ད་དུང་ཁོ་རང་རྩོམ་རིག་གསར་རྩོམ་གྱི་ལས་ལ་ཞུགས་ཏེ་གྲུབ་འབྲས་མི་དམན་པ་ཞིག་ཐོབ་འདུག་པའི་རྣ་ཐོས་དེ་ནི་བདེན་ཤས་ཆེ། ངེད་གཉིས་ན་ལུང་ཡུལ་ཚོའི་སློབ་ཆུང་དུ་སློབ་གྲོགས་ཡིན་དུས། ཁོ་རང་རིག་པ་རྣོ་ལ་བརྩོན་འགྲུས་ཆེ། ལྷག་པར་དུ་བོད་ཡིག་གི་སྦྱངས་འབྲས་ཤིན་ཏུ་བཟང་། ད་ལྟའི་ལས་ཁུངས་ཀྱི་མགོ་གཙོ་ལི་གོ་ཀྲུང་ལགས་ཀྱིས་གངས་བུ་མཆོག་ཏུ་འཛིན་པར་གཞིགས་ན། ཁོང་གི་ཆུང་མ་ཟླ་སྒྲོན་ངེད་གཉིས་ལྐོག་ཐུག་རྒྱག་དུས་གངས་བུར་འབྲེལ་འདྲིས་བྱེད་པའི་མི་ཀུན་གྱིས་མ་འོངས་པའི་རྫོང་དཔོན་ཞེས་བསྟོད་པ་འཐེན་བཞིན་ཡོད་ཟེར་བའང་དོན་གཏམ་ཡིན་ཁོ་ཐག་རེད། གང་ལྟར་གངས་བུའི་ཆ་བྱད་ཀུན་ལ་བརྟགས་ན། གོམ་གསུམ་སྤོས་ན་བཀྲ་ཤིས་པ། ཚིག་གསུམ་བཤད་ན་དོན་འགྲུབ་པ་ཞིག་ཡིན་པའི་ཟིལ་ཤུགས་ཤིག་འདུག གངས་བུ་ནི་བཀྲ་ཤིས་ཤིང་དོན་འགྲུབ་པ་ཞིག་ཡིན་ཡང་། ང་ལ་མཚོན་ན་ཡ་མེད་ཀྱི་འགྲན་རྩོད་པ་ཞིག་མིན་ནམ། ལྷག་པར་དུ་ངའི་གོ་ས་ཡར་འཕར་གྱི་གེགས་དང་ཁ་ལས་སྙན་གྲགས་ཀྱི་གནོད་བྱེད་ཅིག་མ་ཡིན་ནམ་སྙམ་པས་སེམས་ཕམ་སྟེ་ཐ་མག་རྔུབ་འཐེན་བྱེད་པ་ལས་བཤད་རྒྱུ་ཅི་ཡང་མ་རྙེད།

གངས་བུས“ཁྱོད་འཇའ་བྷེ་ཡིན་པ་ངས་ལར་ནས་མ་ཤེས། ལོ་དུ་མར་ངེད་གཉིས་ངོ་མ་འཕྲད་པས་ངོས་ཟིན་མ་སོང་། ཁྱོད་ཀྱི་་་་་་ཁྱོད་ཀྱི་་་་་མ་ནེ་མགོ་རུ་སྨེ་བ་ཞིག་ཡོད་པ་མིན་ནམ”ཟེར་ནས་འཇའ་བྷེའི་གདོང་ལ་བལྟས་ནས་ཧད་འདུག་དུས་སྐམ་པོ་རྡབ་ལོག་བྱས་ན་ཆག་འགྲོ། རློན་པ་གཅུས་ལོག་བྱས་ན་ཆད་འགྲོ་ཞེས་པ་ཇི་བཞིན་ངའི་དྲི་བ་དེ་ནི་མི་ངན་ཁ་ནས་གཏམ་ངན། བ་གླང་རྐུབ་ནས་རྙང་བ་ཟེར་བ་ལྟར་མིན་ནམ། ལྷག་པར་དུ་ཁོང་གི་སྨེ་བ་ང་དང་འབྲེལ་བ་སྤུ་ཉག་ཙམ་མེད་པ་མིན་ནམ་སྙམ་ནས་འགྱོད་པ་ཅུང་ཙམ་སྐྱེས།

གངས་བུའི་དྲི་བ་དེས་འཇའ་བྷེ་ནི་རྟ་ངར་ཆེན་ཀག་གིས་ལངས་པ་ལྟར་ལུས་སྟོད་རྐུབ་སྟེགས་ཀྱི་རྒྱབ་ཏུ་དགྱེ་དགྱེ་བྱེད་ཞོར“འོ་ལེ། ལོ་ངོ་མང་པོ་འགོར་སོང་། འགྱུར་ལྡོག་ལོས་ཡོད”ཟེར་བ་ལས་སྨེ་བ་ཡི་ཕྱོགས་ནས་བཤད་འདོད་མེད་མོད། འོན་ཀྱང་གངས་བུས་དྲི་བ་འཕངས་ཟིན་པས། “སྨེ་བ་ནག་པོ་དེ་ནི་ཚན་རིག་ལག་རྩལ་གྱི་སོ་ཁ་ནས་མ་ཐར་ཐལ། ཧ་ཧ་ཧ”ཞེས་ཧབ་ཆ་ཞིག་བརྒྱབ་སྟེ། དྲང་མོར་བཤད་ན།“གྲོགས་པོ་ཞིག་གི་ཁ་ནས་རྒྱུས་ལོན་བྱུང་བ་མ་གཏོགས། ངས་ཀྱང་ཁྱོད་ངོས་ཟིན་རྒྱུ་དཀའ་མོ་རེད”ཟེར།

གངས་བུའི་སེམས་ལ། ཀྱེ་མ་ཧོ། འཇིག་རྟེན་ནི་ཅིི་འདྲའི་ཆུང་བ་ལ། ཨ་ཆུ་ཆུ། ངའི་ཆུང་མ་ནི་ཁོང་གི་ཆུང་འདྲིས་བྱམས་པ་མ་ཡིན་ནམ་འདོད་བཞིན་པའི་སྐབས་ལ། གངས་བུའི་ཁ་པར་གྱི་འབོད་བརྡ་སི་ལི་ལི་གྲགས་བྱུང་། གངས་བུས་འོ་ལེ་དང་ཡ་ཡ་ཡོ་ཡོ་ཟེར་ནས་ལན་སྟེར་ཞོར་ཁ་པར་གྱི་བརྡ་འཕྲིན་ལ་མིག་མྱུལ་བྱས། ཆུང་མ་ཟླ་སྒྲོན་གྱིས“སྙིང་སྡུག་ལགས། ཁྱོད་ནི་མི་ཚེ་གང་པོར་ཕུགས་བསམ་ཆེད་དུ་འདུར། ང་ནི་འཚོ་བའི་བསླུ་བྲིད་འོག་ཏུ་མགོ་བོ་འཐོམས། མི་འགྱངས་པར་ཁྱོད་ཀྱང་ལས་འཁྱུར་ངལ་གསོ་བྱ་རྒྱུ་མིན་ནམ། གཡང་འཛོམས་ཕོ་བྲང་བོད་ཟས་ཁང་དུ་ཤོག་དང་། བཟའ་མི་གསུམ་པོས་ལྷོད་ལྷོད་ཅིག་བྱས་ན་མི་ཆོག་གམ”ཞེས་བསྐུར་འདུག གངས་བུའི་སེམས་ལ་འཇའ་བྷེ་ངེད་གཉིས་ཀྱི་ལས་འཕྲོའི་མདུད་པ་གྲོལ་རན་སོང་། ད་ནི་ཁོང་གིས་སུ་ཞིག་གི་ཁ་ལོ་སྣ་ལོ་བཏུལ་འདོད་ན་བཏུལ་དུ་ཆུགས་སྙམ་སྟེ“ལས་ཚོགས་གྲོལ་རན་སོང་། ང་ཡུལ་ན་དོན་དག་ཅིག་ཡོད་ཟེར་ནས་འཇའ་བྷེ་ལ་བདེ་མོ་བཞག་སྟེ་སྒོ་ཕྱི་རུ་བུད་སོང་། ……

ཁ་བ་དཀར་བོང་བོང་འདུག གྲང་རླུང་འུར་འུར་ལྡང་། གསེར་གཞུང་རྩྭ་ཐང་གི་ཁ་བའི་ཁྲོད་དུ་འཆམ་འཆམ་བྱེད་བཞིན་པའི་བསམ་འགྲུབ་ཀྱི་སེམས་སུ་ད་རག་བར་དུ་རང་གི་མ་ནེ་མགོ་ཡི་སྨེ་བ་དེ་ལ་དོགས་པ་ཟ་མ་མྱོང་ནའང་། ད་ནི་རྣ་ཐོས་ཀྱི་དཀྲོག་གཏམ་དེ་ལ་བདེན་ཁ་སྟེར་དགོས་རུང་དགའ་བའི་སྣང་བ་སྤུ་ཉག་ཙམ་ཡང་མི་འདུག གང་ལྟར་ང་ནི་གསོན་ན་གངས་བུའི་བུ་ཡིན་ལ། ཤི་ཡང་གངས་བུའི་བུ་ཡིན་ཞེས་ངར་ཞིག་ལངས་ཏེ། ཨ་ཧ་བོ། ངའི་ལུས་སྟེང་དུ་ཕ་གངས་བུའི་དྲི་མ་ཙམ་ཡང་མི་འདུག་སྟེ། ལོ་ངོ་བཅུ་ཕྲག་རིང་ལ་སྙན་གྲགས་སྐམ་པོ་དང་གོ་ཐོབ་ཀྱི་ཆེད་དུ་རི་སྤྱང་བཞིན་འདུར་རྒྱུག་བྱས། ཝ་ལྟར་བློ་གྲིན་མོར་བསྡད་པ་དང་ཁྱི་བཞིན་ཁ་རྫི་ངོ་རྫི་བྱས་ནས་སྤྱོད་ལམ་མྱུར་མོ་རླུང་ལ་འགྲན། རིག་པ་རྣོ་མོའི་མདུང་ཁ་གཉོམ་ཆུང་ཉམས་མེད་དག་ལ་གཏད། ཁ་ཚིག་དྭངས་མོ་མི་ཆེན་དང་རྒྱུ་ཆེན་གྱི་སྙན་ལམ་དུ་བསྒྲོན་པའི་གཞན་དབང་ཅན་གྱི་ཤིང་ལས་བཅོས་པའི་སེང་གེ་དེ་ནི་ང་རང་ཡིན་ནམ་སྙམ་ནས། ཕངས་སེམས་ཆེན་པོའི་ཞབས་སུ་མི་གཤིས་ངན་པ་བསྒྱུར་རྒྱུ་མེད། གོར་མོ་རྡོ་ལ་སྦང་རྒྱུ་མེད་ཟེར་བ་སྐྱག་རྫུན་ཡིན་པར་ངས་ཅིས་ཀྱང་བདེན་དཔང་ཞིག་བྱ་དགོས་འདུག ད་ནས་བཟུང་ངས་བོར་བརླག་ཏུ་གྱུར་པའི་རང་ཉིད་ངོ་མ་དེ་འཚོལ་རྒྱུ་ཡིན། ཨ་ཕའི་ཕུགས་བསམ་ལྟ་བུའི་གཡེར་ཆེ་བའི་འདུན་མ་ཆེན་མོ་དེའི་མདུན་དུ་ངས་ཀྱང་ཨ་ཕ་བཞིན་དུ་བུ་རྟགས་ཤིག་སྟོན་དགོས་འདུག གངས་བུའི་བུ་ཡིན་པའི་ཕྱིར་ན། དགུང་ཨ་སྔོན་མཐོ་རུང་འཕུར་ཐུབ་དགོས། ས་དོག་མོ་ཡིན་རུང་འཛུལ་ཐུབ་དགོས། གང་ལྟར་ཀྱང་མི་ཚེ་རྒས་ཁར་ངའི་ཁོག་པ་གཤགས་རུང་དུང་དཀར་ལེན་རྒྱུ་ཡོད་པ། ཁྲག་རྩ་བཅད་རུང་འོ་མ་འཕྱུར་ནས་ཡོང་བ་ཞིག་ཡིན་དགོས་སྙམ་པའི་འཆར་སྒོ་ལས་བསམ་འགྲུབ་ཀྱི་སེམས་པ་ནི་ཉི་མ་བརྒྱ་ཤར་ལག་པས་མི་ཁེབས། སྐྱེས་མཆོག་ཕུགས་བསམ་གནམ་གྱིས་མི་ཁེབས་ཟེར་བའི་ཚོར་སྣང་དུ་ཁ་བའི་ངོགས་སུ་རྐང་རྗེས་རེ་རེ་བཏོད་ནས་མདུན་དུ་བསྐྱོད་དོ། །