བོད་ཀྱི་གཏམ་དཔེ་གདམས་བཀོད།

བོད་མི་རེའི་ཁ་ན་གླུ་རེ།། གླུ་མི་ཤེས་ཟེར་བ་བོད་མིན།། མི་ལ་མི་ཁ་མེད་ན་ཤི་བོ་ཡིན།། ཤིང་ལ་དུ་བ་མེད་ན་རུལ་བོ་ཡིན།། འགྲོ་ཤེས་ན་རྨ་བྱ་མི་ཡིས་མི་ཟིན།། བཤད་ཤེས་ན་ཨ་མཚར་ཁ་ཡིས་མི་ཐུབ།། བྱ་བ་གཅིག་ལ་བྱེད་ཐབས་བརྒྱ།། འགྲོ་ས་གཅིག་ལ་འགྲོ་ལམ་སྟོང་།། སྐྱིད་ཆེ་བའི་ཉི་མ་དགོད་རྒྱུ་མི་ཡོང་། སྡུག་ཆེ་བའི་ཉི་མ་ངུ་རྒྱུ་མི་ཡོང་།། སྐད་ཆ་ཉུང་རུང་མགོ་རྔ་ཚང་།། ལུང་བ་ཆུང་རུང་རྩྭ་ཆུ་འཛོམས།། གཅིག་ར་གཉིས་ཀྱི་མང་ཉུང་ཡོད།། གང་ར་དོ་ཡིད་ཡང་ལྗིད་ཡོད།། མི་ཡིས་རྒྱུ་མཐོང་ན་གནོད་པ་མི་མཐོང་།། ཉ་ཡིས་གཟན་མཐོང་ན་རྙི་རྒྱ་མི་མཐོང་།། བརྩོན་འགྲུས་ཅན་ལ་ཤེས་བྱས་ཕྱུག། ལེ་ལོ་ཅན་ལ་གཉིད་ཀྱིས་ཕྱུག། འཇིག་རྟེན་བུ་ལོར་ཕ་ཞིག་དགོས།། ཕ་མེད་ན་རང་ལ་ཤེས་ཞིག་དགོས།། སྐ་རགས་ལྷམ་འགྱོགས་སྡོམ་ནི་བྱོས།། རང་གི་རོགས་ལ་དོ་ནི་བྱོས།། སྔོན་ནས་དྲན་ན་བློ་ཡིན།། རྗེས་ནས་དྲན་ན་འགྱོད་ཡིན།། ཁ་ཁུ་བྱུག་བཞིན་དུ་སྙན། ཁོག་གཞུ་མོ་བཞིན་དུ་འཁྱོག། འདོད་པ་ཅན་ལ་རྒྱུ་མ་བསྟེན།། ངན་སེམས་ཅན་ལ་བློ་མ་གཏོད།། རིང་ཐུང་ཚད་ན་ཤེས།། བདེན་རྫུན་བཤད་ན་ཤེས།། ལས་རྒྱུའི་བྱ་བ་སྒུག་མི་ཉན།། ཆོད་པའི་བསམ་བློ་འགྱུར་མི་ཉན།། ཕྱི་ནས་འགྲོ་རོགས་བཟང་ན་ལུས་བདེ།། ནང་ནས་འདུག་རོགས་བཟང་ན་སེམས་བདེ།། མི་གང་ཡིན་གྱི་ཁ་མ་རྒྱུག། རྟ་གང་ཡིན་གྱི་ཕོང་མ་ཞོན།། གཅིག་བཤད་སེམས་ལ་བླངས་ན།། བརྒྱ་བཤད་མདུད་པ་གྲོལ་ཐུབ།། གོས་གོང་བ་མེད་ན་བཟོ་འཕྲོ་རེད།། གྲི་ཡུ་བ་མེད་ན་རྡུང་འཕྲོ་རེད།། ཚིག་རྔ་མ་མེད་ན་བཤད་འཕྲོ་རེད།། དགའ་ས་བོ་བཤད་ཀི་འདུག་དགོས།། ན་ས་བོ་རེག་གི་འདུག་དགོས།། སྙིང་ལ་རུས་པ་ཡོད་ན།། ལྕགས་ལ་འབྲས་བུ་སྨིན།། དཀར་ནག་གི་དབྱེ་བ་འབྱེད་དགོས།། ནག་ཐིག་གི་མདུད་པ་འགྲོལ་དགོས།། དོན་ཆེན་གཞུག་ནས་མ་བསྐྱུར།། ཚིག་ཆེན་སྔོན་ལ་མ་བཤད།། དགུན་རྒྱ་སྟག་འདྲ་བོ་མཆོང་ནས་ཡོང་།། དབྱར་ཕ་མ་འདྲ་བོ་འཇབ་ནས་ཡོང་།། ཉི་མ་ཤར་ན་ས་གཞི་གསལ།། དཔེ་ཆ་བཏོན་ན་ཤེས་རྒྱ་ཆེ།། དབང་ཤེས་ཀྱིས་མི་ཡི་ཁ་འགུགས།། གནས་ལུགས་ཀྱིས་མི་ཡི་སེམས་འགུགས།། ཁྱོད་ར་འུ་གཉིས་འགྲན་རྒྱུ་མེད།། ཁྱི་ར་སེང་གེ་བཤིབ་རྒྱུ་མེད།། སྣ་གཅིག་མཁས་དགོས་པ་མ་ཟད་སྣ་མང་རྟོགས་དགོས།། རི་མགོ་མཐོ་དགོས་པ་མ་ཟད་རི་རྒྱུད་ཆེ་དགོས།། ངང་ཕྲུག་ལ་རྐྱལ་རྩལ་རྫོགས།། རྒོད་ཕྲུག་ལ་གཤོག་རྩལ་རྒྱས།། ཁ་བགད་རུང་ཁོག་ན་སྡུག་ཡོད།། མིག་ཁྲ་རིལ་མཐའ་ན་ཆུ་ཡོད།། སྐྱེས་པའི་མི་ལ་གྲགས་པའི་གཏམ་དགོས།། ཆེ་བའི་མི་ལ་མཐོ་བའི་རྟགས་དགོས།། རང་ལ་རེ་ན་ཚེ་གཅིག། མི་ལ་རེ་ན་ཉིན་གཅིག། རྒྱ་ཤོག་དཀར་པོའི་ངོས་འཇམ་ངོས་ལ།། ཡི་གེ་ནག་ཆུང་གྲལ་ལ་བཞུགས།། སྔ་ཚིག་མི་རྟག་རི་བོང་ཡ་ཁ།། ཕྱི་ཚིག་མི་རྟག་དྲེད་མོང་ཕྱི་རྟིང་།། སྐད་ཆ་བཤད་སྲོལ་རྣམ་པ་སྣ་ཚོགས་ཡོད།། གོ་བ་ལེན་སྲོལ་རྣམ་པ་སྣ་ཚོགས་འཆར།། དཀར་ནག་ཐེངས་རེར་བརྒྱུད་ན་ཉིན་རེ།། སྔོ་སེར་ཐེངས་རེར་བརྒྱུད་ན་ལོ་རེ།། བཟང་སློབ་ན་ལོ་གསུམ།། ངན་སློབ་ན་ཉིན་གསུམ།། གྲོགས་པོས་གྲོགས་པོས་བསླུ་བ་དེ།། དགོད་བཞིན་དགོད་བཞིན་བསླུ་བ་ཡིན།། ཁྲམ་པས་ཁྲམ་པས་བསླུ་བ་དེ།། ངུ་བཞིན་ངུ་བཞིན་བསླུ་བ་ཡིན།། མི་རག་སྟག་གི་ཁ་རེག། ་འབྱར་འབྲོང་གི་རྭ་འབྱར།། ཀུན་མཁྱེན་བླ་མ་བརྒྱ་ཡོད་ཀྱང་།། ལ་དད་ས་གཅིག་གིས་ཆོག། ལོ་ཉི་ཟླའི་ཉི་མ་སྟོང་ཟད།། ཝ་དམར་པོའི་གྲལ་ཁ་རླུང་ཟད།། ཆུང་དུས་ཁ་ནས་ཟས་བཅད།། ཆེ་དུས་རྒྱབ་ནས་གོས་འཕྲོག། ཁ་རླངས་པ་ཅན་གྱིས་བོས་མ་མྱོང་།། ལག་དྲི་མ་ཅན་གྱིས་རེག་མ་མྱོང་།། མི་གོ་བ་ཅན་ལ་བཤད་བདེ།། ཤིང་ཡལ་ག་ཅན་ལ་འགོ་བདེ།། ཆུ་གཙང་བོ་འཐུང་ནས་ཕོ་བ་མ་རྒྱག་རུང་སྐོམ་སེལ།། ཆོས་དམ་པ་ཉན་ནས་ནང་དོན་མ་གོ་རུང་ཕྱི་མར་ཕན།། གོང་མའི་ཡན་ན་གོང་མ།། བླ་མའི་ཡན་ན་བླ་མ།། ཆུ་གཏིང་ན་བཞུར་དལ།། མི་མཁས་ན་ཚིག་དལ།། རལ་གྲི་བརྡར་ན་ཇེ་རྣོ།། ཀླད་པ་བཀོལ་ན་ཇེ་གསལ།། ཆུ་ལ་རི་མོ་བྲིས་ན་གཟུགས་མེད།། འཇའ་ལ་ཞགས་པས་འཕངས་ན་ཐོབ་མེད། ། ཁ་གཅིག་རུང་ཁོག་པ་མི་གཅིག། སྔས་གཅིག་རུང་རྨི་ལམ་མི་གཅིག། བརྩོན་འགྲུས་མེད་པའི་རིག་པ་དེ།། ཡུ་བ་མེད་པའི་སྤུ་གྲི་འདྲ།། ཆུ་ཕག་ལོ་ལ་རྟ་ཞིག་ཉོས།། རྟ་གསེར་སྒ་མ་བསྟད་ལོ་གསུམ་འགོར།། སྟག་ལ་འགྲོགས་ན་ནགས་ལ་མཆོང་ནི་ཞིག། རྒོད་པོར་འགྲོགས་ན་དགུང་ལ་འཕུར་ནི་ཞིག། སེམས་མཐུན་རུང་རྒྱུ་མ་བསྲེས།། ཚིག་མཐུན་རུང་ལུས་མ་བསྲེས།། ཉེ་རིང་མེད་པའི་གཏམ་ཤོད།། ཡོ་གཟུར་མེད་པའི་ཐིག་བརྒྱབ།། འཇིག་རྟེན་གཏམ་ལ་ཚར་རྒྱུ་མེད།། ཚར་གི་ཉིན་མོར་འཇིག་ནི་ཡིན།། དོན་ཆུང་སྒྲུབ་ན་སེམས་ཞིབ་དགོས།། དོན་ཆེན་སྒྲུབ་ན་སེམས་ཆུང་དགོས།། ངའི་རང་སེམས་ཇ་དང་འོ་མ།། ཁ་ཁོག་ཟྭ་དང་ལྡེ་མིག་ཡིན། ཁོག་ལ་བཟུང་ན་སྐྲངས་པ་རེད།། ཁ་ལ་ཕུད་ན་རླངས་པ་རེད།། ལས་ལ་མི་བརྩོན་ཆང་ལ་ཆགས།། སང་གི་བྱ་བ་གནངས་ལ་བཅོལ།། ས་གཞི་རྒྱ་ཆེ་བ་འབྲུ་དྲུག་གི་གཏེར།། ཤེས་བྱ་རྒྱ་ཆེ་བ་ཡོན་ཏན་གྱི་མཛོད།། ཉོན་མོངས་དུག་གསུམ་གྱི་ཕྱག་རྒྱ།། འདོད་ཆགས་བྱའི་གཤོག་པ།། གཏུ་མིག་ཕག་གི་མགོ་བོ།། ཞེ་སྡང་སྦྲུལ་གྱི་རྔ་མ།། མི་བརྒྱ་མགོ་ལ་ལྕགས་གཡུགས་ནི་ཞིག་དང་།། རྟ་མགོ་ལ་སྲབ་སྐོན་ནི་ཞིག་ཡིན་དགོས།། འགྲངས་ན་ལྟོགས་དུས་སྡུག་མ་བརྗེད།། དྲོས་ན་གྲང་དུས་སྡུག་མ་བརྗེད།། སྙན་ངག་མཁན་ལ་ཅི་ཡང་རྒྱན།། མཁས་པས་བཤད་ན་ཅི་ཡང་བདེན།། མིག་ནད་འབྱུང་རྩ་ལག་ཡིན།། ཕོ་ནད་འབྱུང་རྩ་ཁ་ཡིན།། ཧ་མ་གོ་ཧ་གོ་རིལ་རིལ་འདི།། དོན་ཉག་ལ་བཀག་ན་རང་ལ་འཁོར།། བཙན་པོ་བཙན་རུང་ས་སྟེང་།། རི་རབ་མཐོ་རུང་གནང་འོག། དོན་ཆུང་སྒྲུབ་ན་སེམས་ཞིབ་དགོས།། དོན་ཆེན་སྒྲུབ་ན་སེམས་ཆུང་དགོས།། ཚུར་བཤད་གཏམ་གྱི་དོན་གོ་བ།། ཕར་བཤད་གཏམ་གྱི་སྒྲ་དག་པ།། ཁྱི་དབྱར་ལ་སྐྲག། བྱི་དགུན་ལ་སྐྲག། རྟ་ར་རའི་སྤུ་མདོག་ལོག་རུང་།། གསེར་སེར་བོའི་ཁ་མདོག་མི་ལོག། ཆེ་སར་དམིགས་ནས།། ཆུང་ས་སྒྲུབ་དགོས།། མི་ཆུང་ཆུང་བྱ་ཡང་དོན་ཤེས།། རྟ་ཆུང་ཆུང་འགྲོ་ཡང་འདུག་ཤེས།། རྒྱུ་མང་ན་ལུས་མི་ཁོམ།། ཧམ་ཆེ་ན་སེམས་མི་སྐྱིད།། ཁྱིམ་གཅིག་ན་བུ་སྤུན་མང་དེ།། དགྲ་ནག་པོ་འདུལ་བའི་ཐོ་བ་ཡིན།། ཁྱིམ་གཅིག་ན་དབང་ཆེན་མང་བ་དེ།། ཁྱིམ་བཟའ་ཚང་འཐོར་བའི་སྔ་ལྟས་ཡིན།། ཟས་རིག་དུས་རོགས་བརྗེད།། རོགས་རིག་དུས་ཁྲལ་བརྗེད།། མི་ཡིས་རྒྱུ་མཐོང་ན་གནོད་པ་མི་མཐོང་།། ཉ་ཡིས་གཟན་མཐོང་ན་རྙི་རྒྱ་མི་མཐོང་།། ཁྱི་ངན་བཀག་ན་མི་ཁོག། མི་ངན་བཟུང་ན་མི་ཐུབ།། ཡོད་ན་མེད་ན་མི་ཚེ་ད་ཐེངས།། ཤི་ན་གསོན་ན་སྙིང་གྲོགས་དམ་པ།། ལྟོ་ཁྱི་མོར་བླུད་ན་སྒོ་སྲུང་རེད།། སྐྱབས་བླ་མར་བཅོལ་ན་ཕྱི་མ་རེད།། གོ་བ་མེད་པའི་གླིང་རྒན་ལ།། རྒྱལ་པོའི་བཀའ་ལས་དབྱུག་པ་བཙལ།། རྙིང་བ་མེད་ན་གསར་བ་མེད།། ཕ་མ་མེད་ན་བུ་རྒྱུད་མེད།། གོས་སྒམ་ན་ཡོད་དུས་ལུས་དྲོད།། ཟས་སྣོད་ན་ཡོད་དུས་སེམས་སྐྱིད།། ཁ་རའི་ནང་ནས་རྟ་བརྐུས།། ཁ་ཚིག་བར་ནས་བློ་བརྐུས།། བོད་ཀྱི་ཡོན་ཏན་བློ་ཐོག་ན་ཡོད།། རྒྱའི་ཡོན་ཏན་ཡིག་ཐོག་ན་ཡོད།། གནམ་ལ་བརྟེན་ནས་ཁ་མི་སོས།། གཞན་ལ་བརྟེན་ནས་རྒྱབ་མི་ཁེབས།། གྲོག་མ་འགྲོ་འདུག་མང་ན།། རྐང་ལག་ཐང་ཆུར་འབྱར།། སྦལ་བ་ལྡིང་ཚད་མཐོ་ན།། བྲང་ཁ་རྡོ་ལ་རྒྱག། ལོ་བཅོ་བརྒྱད་བུ་མོའི་མྱོས་བུམ་འབུར་དུས།། ཁྱིམ་ཕ་མས་སྒོ་དྲུང་བཀག་ན་དོན་མེད།། དོན་ཆུང་སྒྲུབ་ན་སེམས་ཞིབ་དགོས།། དོན་ཆེན་སྒྲུབ་ན་སེམས་ཆུང་དགོས།། དོན་ཆུང་རུང་མ་བསྒྲུབ་ན་མི་འགྲུབ།། བློ་གསལ་རུང་མ་བསླབ་ན་མི་ཤེས།། མི་ཤེས་ཤེས་ཁུལ་བྱས་ན་མཚང་ཡིན།། ཤེས་བྱ་ཁོག་ལ་བཅུག་ན་སྐྱོན་ཡིན།། ཚེ་ཟད་ནད་པ་སྨན་པས་མི་ཐུབ།། རི་བོ་ཉིལ་ན་ཐག་པས་མི་སྡོམ།། ཁྱིམ་མཚེས་བཟང་བོ་རྟ་ཡིས་མི་ཁུག། བཟའ་ཚང་བཟང་བོ་གསེར་གྱིས་མི་ཁུག། གཏམ་བཟང་ངན་གཉིས་ཀ་ཉན་དགོས།། གོས་ཡག་བཙོག་གཉིས་ཀ་གོན་དགོས།། ཁ་བཤད་དོན་ལ་འབབ་དགོས།། ཁབ་ཤུལ་སྐུད་པས་བསུམ་དགོས།། ཁ་འཆམ་ན་སྡེ་བ་བཙན་པོ་ཡིན།། འགྲིག་མཐུན་ན་བཟའ་ཚང་སྐྱིད་པོ་ཡིན།། ཨ་རིག་གླེན་རུང་མི་རིགས་ཡིན།། བྱེའུ་ཆུང་རུང་བྱ་རིགས་ཡིན།། དད་པའི་ཨ་ལོང་མེད་ན།། འདྲེན་པའི་ལྕགས་ཀྱུས་མི་ཁུགས།། ཐམས་ཅད་དགའ་ན་དགེ་བ་ཡིན།། ཕ་མ་དགའ་ན་དྲིན་ལན་ཡིན།། སེམས་ན་སྡུག་ཡོད་ན་དྭངས་ཐབས་བྱོས།། ངོ་ན་རྡུལ་ཡོད་ན་བཀྲུ་ཐབས་བྱོས།། ཁྱིམ་ལ་དགོས་པའི་རིན་ཆེན་བཟའ་དཔོན།། མི་ལ་དགོས་པའི་རིན་ཆེན་ཡོན་ཏན།། གཏམ་ཨ་ཁུས་བཤད་ན་ཉེ་རིང་མེད།། ཟས་ཕ་མས་བགོས་ན་ཆེ་ཆུང་མེད།། བཤད་ན་དམ་ཆོས་མི་གོ། བསྟན་ན་རྒྱུ་འབྲས་མི་བརྩི།། འཁོན་སྡུམ་པའི་གཟུ་བ།། གཉེན་འཛིན་པའི་བར་བ།། བསང་ཕུད་རྒྱུ་མང་ན།། འདྲེ་ཡི་སེམས་ལ་གནོད།། མཚན་རྨི་ལམ་འཁྲུག་ན་བཤད་ས།། རྐང་ཚེར་མ་ཟུག་ན་སྟོན་ས།། རྒྱ་མཚོ་གམ་ནས་བཞག་སྟེ།། ཀོ་གྱོང་མཆི་མས་སྦངས།། མི་བཟང་འགྲོགས་ན་སྤྱོད་བཟང་།། སྤྱང་ཀིར་འགྲོགས་ན་ཤ་ཟ།། ལྷུན་པོ་ཟེར་ཀྱང་རི་རེད།། རྒྱ་མཚོ་ཟེར་ཀྱང་ཆུ་རེད།། ཁ་ལས་དགེ་ན་བཟང་མི་དགོས།། སྣང་བ་མཐུན་ན་ཡག་མི་དགོས།། ཁ་རོག་ལ་སྡོད་དང་ཁ་མཆུ་མེད།། མགོ་ལག་པས་སྐྱོར་དང་རྒྱག་ནི་མེད།། བློ་བསམ་པ་གཅིག་ལ་མཉམ་འཛིན།། མཚོན་ཡུ་བ་གཅིག་ལ་མཉམ་འཇུ།། མང་དྲག་ན་རྒྱལ་པོའི་གསུང་ཡིན་རུང་ངན།། བསྟོད་དྲག་ན་མ་གཞི་བཟང་ཡིན་རུང་ངན།། ཤིང་དྲང་ན་བཀོལ་ས་མང་།། མི་དྲང་ན་མཐུན་གྲོགས་མང་།། རྣོ་མེད་རལ་གྲི་དབྱུག་པ་འདྲ།། གོམ་མེད་འདོ་བ་གླང་རྒན་འདྲ།། གཉོམ་སྲོལ་བཤད་ནས་དགྲ་ངོ་མི་ལོན།། མེད་མུག་བཏོན་ནས་འགྲུལ་ངོ་མི་ལོན།། དམ་པའི་ཆོས་ཀྱི་མགོ་དཀའ།། འཇིག་རྟེན་འཁོར་བའི་མཐའ་དཀའ།། ཁ་ལག་པ་གཉིས་ཀྱིས་ལས་དང་ན།། གཉའ་རྐེད་པ་གཉིས་ཀྱིས་འཁུར་དགོས།། རྟའི་ཡག་ཚད་ལོ་གཅིག་ལོ་གཉིས་རེད།། མོའི་ཡག་དུས་མོ་ལོ་བཅོ་བརྒྱད་ཡིན།། མཁས་པ་སྔ་མ་བཟང་།། བསྟན་བཅོས་ཕྱི་མ་བཟང་།། རྟ་ཤ་ཤེད་རྒྱས་དུས་འདྲོགས་རྒྱུ་མང་།། མི་ནོམ་པ་མང་དུས་དྲན་རྒྱུ་མང་།། ནད་བྱུང་རྒྱུ་སླ་ཡང་དྲག་རྒྱུ་དཀའ།། དོན་བཤད་རྒྱུ་སླ་ཡང་བསྒྲུབ་རྒྱུ་དཀའ།། གཅིག་ལ་མ་འགྲིག་ན་མིའི་སྐྱོན།། ཀུན་ལ་མ་འགྲིག་ན་རང་གི་སྐྱོན།། སྟོན་ཐོན་དུས་ཁུ་བྱུག་ཡིན་རུང་སྐད་འགག། སད་བརྒྱབས་ན་མེ་ཏོག་ཡིན་རུང་འདབ་གྲོལ།། ཁ་མང་པོས་བཤད་ན་གོང་ཆེ།། ལག་མང་པོས་ལས་ན་ཤུགས་ཆེ།། གྱོད་རང་སྟེང་འགྲིག་ན་རྩོད་མེད།། གཉེན་རང་མཐུན་བྱུང་ན་འགྱོད་མེད།། རང་བཟང་རབས་རོགས་པས་བཤད་དགོས།། ཁྱི་བཟང་རབས་རྐུན་མས་བཤད་དགོས།། གོམ་པ་མ་སྤོས་གླིང་བཞི་སྐོར་མི་ཐུབ།། ཆུ་ཐིགས་མ་བསགས་རྒྱ་མཚོ་ཆགས་མི་སྲིད།། ཡ་རབས་མ་རབས་སྤྱོད་པས་ཤེས།། ས་ཆ་གང་ཡིན་སྐད་ཀྱིས་ཤེས།། རྟ་ཤ་ཤེད་འཛོམས་དུས་འཚོང་དགོས།། མི་མིང་གྲགས་ཆེ་དུས་འཛེམ་དགོས།། ཁ་དང་བཟའ་སྒྲིག་སྔ་མི་རུང་།། ལག་དང་ལས་ཀ་འཚུབ་མི་རུང་།། གྲི་ཆུང་ཡོད་རུང་མ་བརྡར་ན་མི་ཆོད།། རིག་པ་རྣོ་ཡང་མ་སློབ་ན་མི་མཁས།།