༄༅། །ཉེ་བར་མཁོ་བའི་བསླབ་བྱ། གུང་ཐང་བསྟན་པའི་སྒྲོན་མེ།

སྐྱབས་གནས་བསླུ་མེད་མཆོག་གསུམ། །

སྙིང་ནས་གསོལ་བ་འདེབས་སོ། །

བྱང་ཆུབ་སྙིང་པོའི་བར་དུ། །

རྗེས་བཟུང་བྱིན་གྱིས་རློབས་ཤིག །

འདི་ཕྱིའི་ལེགས་ཚོགས་རྩ་བ། །

དུས་གསུམ་རྒྱལ་བའི་ཞལ་སྐྱིན། །

མཚན་ལྡན་བཤེས་གཉེན་དམ་པ། །

བསམ་སྦྱོར་དག་པས་སྟེན་ཅིག །

རྙེད་དཀའ་དོན་ཆེའི་དལ་འབྱོར། །

ལན་གཅིག་ཙམ་ཞིག་ཐོབ་པ། །

སྔོན་ཆད་སྟོང་པར་ཟད་པས། །

ཚེ་ལྷག་དོན་ལྡན་གྱིས་ཤིག །

སང་བྱ་གནངས་བྱའི་ངང་ལ། །

འཆི་བདག་དགྲ་བོས་འཁྱེར་བས། །

བྱ་བ་ཀུན་ལས་ཐོག་མར། །

ལྷ་ཆོས་གཙོ་བོར་མཛོད་ཅིག །

མཆོག་གསུམ་བསོད་ནམས་ཞིང་ལ། །

མཇལ་བ་ད་ལན་ཙམ་ཡིན། །

རློམ་སེམས་གཡོ་སྒྱུས་མ་བསླད། །

ཕྱག་མཆོད་ཚོགས་བསགས་རེམས་ཤིག །

བློ་རྩལ་སྟོབས་འབྱོར་འཛོམས་ཀྱང་། །

སྐྱིད་སྡུག་ལེགས་ཉེས་འཁྱེར་སོ། །

དབང་མེད་ལས་ཀྱིས་འཁྱེར་བས། །

དེ་ཉིད་དཔང་པོར་ཞོག་ཅིག །

སྲིད་འབྱོར་ཇི་ཙམ་བསྒྲུབས་ཀྱང་། །

རྡུལ་ཙམ་འཁྱེར་དབང་མེད་ལ། །

རྣམ་སྨིན་ཕྱི་བཞིན་འབྲང་བས། །

དོན་མེད་སྡིག་པ་མ་གསོག །

ཟབ་ཟབ་གདམས་པ་མང་ཡང་། །

ཡོན་ཏན་ཀུན་གྱི་གཞི་རྟེན། །

མི་བསྲུང་རང་དབང་མེད་པ། །

ཁས་བླངས་ཚུལ་ཁྲིམས་ཡིན་པས། །

དྲན་ཤེས་བག་ཡོད་སྒོ་ནས། །

ཉམས་ལེན་སྙིང་པོར་བྱས་ན། །

ལུང་རྟོགས་ཡོན་ཏན་ཐམས་ཅད། །

ཡར་ངོའི་ཟླ་བཞིན་འཕེལ་ལོ། །

འོན་ཀྱང་རྨོངས་པའི་མུན་སེལ། །

ཐོས་པའི་སྒྲོན་མེ་མེད་ན། །

བླང་དོར་བྱ་ཐབས་བྲལ་བས། །

སློབ་གཉེར་ནན་ཏན་གྱིས་ཤིག །

ཁ་བཤད་རླུང་ལ་བསྐུར་ན། །

ཆུ་ནང་རྡོ་བ་བཞིན་དུ། །

རང་རྒྱུད་སྐམ་པོར་ལྡུས་པས། །

གང་ཤེས་རྒྱུད་ལ་སྦྱོར་ཅིག །

མདོར་ན་སྒོ་གསུམ་སྤྱོད་པ། །

ཅི་བྱས་ཆོས་དང་སྦྱར་ཏེ། །

འཆི་བ་ཐོག་ཏུ་བབས་ཀྱང་། །

འགྱོད་པ་མེད་པ་གྱིས་ཤིག །

ཉེ་བར་མཁོ་བའི་བསླབ་བྱ། །

ཉུང་འདུས་སྨྲས་པ་འདི་ཡང་། །

སྙན་གོང་ཨུཏྤལ་མ་བྱེད། །

སྙིང་གི་དཔལ་བེའུར་ཆོངས་ཤིག །

དེ་སྐད་བསྙད་པའི་དགེ་ཚོགས། །

བློ་གསལ་དོན་གཉེར་ཅན་རྣམས། །

ཚུལ་གནས་ཐོས་བསམ་སྒོམ་ལ། །

འཇུག་པའི་རྒྱུ་རུ་གྱུར་ཅིག །

ཅེས་པ་འདི་ནི་དད་བརྩོན་ལྡན་པ་དཀོན་མཆོག་ཐབས་མཁས་དང་བློ་བཟང་དཀོན་མཆོག་གཉིས་ཀྱིས་བསྐུལ་ངོར༧བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།། །།