སྦྱངས་རྩོམ།

སྦྱངས་རྩོམ།ཕྱི་ལོག་པ །

ངའི་ཕུགས་བསམ།

བྱིའུ་ཕྲུག་གི་ཕུགས་བསམ་ནི་རང་ཉིད་ལ་དབང་བའི་ནམ་མཁའ་ཞིག་ནས་རང་དབང་གིས་གཤོག་རྩལ་བསྒྱུར་འདོད་པ་དེ་རེད། རུས་སྦལ་གྱི་ཕུགས་བསམ་ནི་རི་བོང་ལྟར་མགྱོགས་མྱུར་ངང་བརྒྱུག་འདོད་པ་དེ་རེད། དེ་ཡང་ངའི་ཕུགས་བསམ་ནི་སློབ་སྦྱོང་ལ་བཟང་བའི་སློབ་མ་ཕུལ་བྱུང་ཅན་ཞིག་བྱེད་འདོད་པ་དེ་ཡིན།
ང་ལ་འདི་འདྲའི་བསམ་ཚུལ་ཞིག་སྐྱེས་པ་ནས་བཟུང་སྟེ་སློབ་སྦྱོང་བྱེད་པའི་སེམས་ཤུགས་བསྐྱེད་ཅིང་སློབ་གྲོགས་དང་དགེ་རྒན་གྱི་ལྟ་ཚུལ་ལ་འགྱུར་ལྡོག་བྱུང་སོང་། སྔོན་ཆད་ང་རང་སློབ་སྦྱོང་ལ་ཞན་པས་དོན་དག་ཅི་ཞིག་བསྒྲུབས་ཀྱང་གཞན་གྱི་ངོ་མདོག་ལ་ལྟ་དགོས་པར་མ་ཟད། སློབ་གྲོགས་གི་མཐོང་ཆུང་དང་དགེ་རྒན་གྱི་སློབ་གསོ་གང་མང་མྱངས་དགོས། དེ་མིན་སློབ་སྦྱོང་ལ་བཟང་བའི་སློབ་མར་སྨོན་པ་ཡང་འཆོར་དགོས།
ཐེངས་ཤིག་ལ། ངེད་འཛིན་གྲྭས་སློབ་རའི་སྤོ་ལོ་འགྲན་སྡུར་ལ་རྒྱལ་ཁ་བླངས་ཤིང་དགའ་སྤྲོའི་ཡོ་ལང་རབ་ཏུ་རྒྱས་ཏེ་སློབ་གྲོགས་ཚོ་ཚོམ་བུ་དང་ཚོམ་བུ་བྱས་ཏེ་ཁ་བརྡ་དང་གླེང་མོལ་ཡས་འཕྲོས་མས་འཕྲོས་བྱེད་སྐབས། ངས་རང་གི་ལྟ་ཚུལ་འགའ་བཤད་ཀྱང་། ངའི་སྐད་ཆར་ཉན་བཞིན་པའི་སློབ་གྲོགས་མི་འདུག་པར་མ་ཟད། ང་ལ་ཁ་ཡ་བྱེད་པའི་སློབ་གྲོགས་གཅིག་ཀྱང་མ་བྱུང་། དོན་དག་འདི་འདྲ་ཐེངས་གཅིག་གཉིས་ཙམ་མ་རེད། དེ་ནས་བཟུང་ངས་སློབ་སྦྱོང་བྱེད་པའི་འདུན་པ་སྔར་ལས་ཆེ་རུ་བསྐྱེད་དེ་དགེ་རྒན་གྱིས་སློབ་ཁྲིད་བྱེད་པའི་སྐབས་སུ། ངས་ནན་ཏན་གྱིས་ཟིན་བྲིས་འདེབས་པ་དང་སློབ་གསེང་སྐབས་སུ་དཔེ་ཆ་གཞན་པར་ལྟ་བ། ཉིན་ཐོག་ཟླ་དང་ཟླ་ཐོག་ལོ་བརྩེགས་ཏེ་རྒྱུན་འཁྱོངས་བྱས་པ་བརྒྱུད་ངས་རང་ཉིད་ཡར་ཐོན་ཡོང་བཞིན་པ་ཚོར། སྔོན་ཆད་རྒྱུགས་ལེན་ཐེངས་རེར་སྐྲག་སྣང་ཆེན་པོ་སྐྱེས་ཀྱང་ད་ལྟ་དེ་ལས་ལྡོག་སྟེ་ང་ལ་ཡིད་ཆེས་ཅུང་ཙམ་ཡོད། མཇུག་རྒྱུགས་ཐེངས་ཤིག་གི་རྒྱུགས་སྐར་ཡིད་ཚིམ་པོ་བྱུང་སོང་ལ། དགེ་རྒན་གྱིས་ཀྱང་ང་ལ་བསྟོད་པ་བྱས་པས་ངས་རང་གི་ཕུགས་བསམ་ཆུང་ཆུང་དེ་མངོན་འགྱུར་ཡོང་བར་ཁ་ཐག་ཇེ་ཉེ་རུ་གྱུར་སོང་སྙམ།
ད་ལྟ་ངས་སྦྱངས་འབྲས་བཟང་བའི་སློབ་མའི་ཚོར་སྣང་ལ་རོལ་མྱོང་བྱེད་ཐུབ་པར་མ་ཟད། དགེ་རྒན་རྣམས་ཀྱི་གཅེས་ནོར་དང་ཕ་མའི་སེམས་ཀྱི་གཅེས་ཕྲུག་ཏུ་འགྱུར་བཞིན་པའི་སྣང་བ་ཞིག་དབང་མེད་ཏུ་སྟེར་ལ། འཕྲལ་གྱི་སློབ་སྦྱོང་ལ་ཞན་པའི་སྡུག་བསྔལ་ནི་ཕུགས་སུ་ཚེ་གང་གི་སྡུག་བསྔལ་དུ་འགྱུར་ཉེན་ཆེ་བ་དང་། འཕྲལ་གྱི་སློབ་སྦྱོང་ལ་འབུངས་པའི་དཀའ་སྡུག་ནི་ཕུགས་ཀྱི་བདེ་སྐྱིད་ལ་མ་རྩ་བཏང་བའི་ངེས་ཤེས་ཤིག་ཀྱང་འདྲོངས།
ངས་མུ་མཐུད་དུ་སློབ་སྦྱོང་ལ་འབད་བརྩོན་བྱས་ནས་སློབ་མ་བཟང་པོ་ཞིག་བྱེད་ངེས་ཡིན་ལ། ཕུགས་བསམ་འདིའི་ཆེད་དུ་ཧུར་ཐག་ཆེན་པོ་བྱེད་པའི་དམ་བཅའ་སྙིང་ལ་རྡོ་བརྐོས་རི་མོ་བཞིན་ཕབ་ཡོད།
སྤེལ་དུས། : 2022-03-18
ཨ་མ།

དཀར་ཤ་དམར་མདངས་རྒྱས་ཤིང་ཟླ་བའི་མདངས་ལ་འཁུ་བའི་ངོ་གདོང་ནི་གསར་དུ་བཞད་པའི་མེ་ཏོག་པད་མ་ཞིག་དང་མཚུངས་ལ། ཕྲ་ཞིང་རིང་བའི་སྨིན་མའི་འོག་གི་ཁྲ་ཆུང་མིག་གཉིས་ནི་གར་དུ་རྩེན་པའི་སྦྲང་མ་གཉིས་དང་འདྲ་བར་ཀེམ་ཀེམ་དུ་གཡོ། དེ་མིན་ཕྲ་སྦོམ་རན་ཞིང་གཟེངས་མཐོ་བའི་སྣ་དང་དེའི་འོག་གི་འཛུམ་ལ་ཁད་གྱི་མཆུ་སྒྲོས་ནི་མེ་ཏོག་གི་གང་བུ་ཞིག་དང་ཨ་ན་མ་ན་རེད། ནག་ཐིང་ཐིང་གི་སྐྲ་ལོ་འོད་ཀྲིག་ཀྲིག་བྱེད་ལ། ཕར་འགྲོ་ཚུར་འོང་བྱེད་དུས་རྒྱ་ལྕང་གི་ལོ་འདབ་ཕར་གཡོ་ཚུར་གཡོ་བྱེད་པ་དང་གཉིས་སུ་མ་མཆིས་བར་ལུས་སྐྱེས་གཟུགས་སྨྱུག་མའི་མདའ་ལྟར་དྲང་བ་ནི་ཁོ་མོའི་རང་ལོ་ཉི་ཤུའི་ལང་ཚོ་མ་ཡིན་ནམ།
རེད་ཡ། ངའི་ཚེ་སྲོག་དམར་པོ་མི་ཡུལ་དུ་སླེབས་པའི་སྐད་ཅིག་མ་དེར། “ཨ”ཞེས་ཨག་སྐད་མཚམས་ནས་མཚམས་སུ་མཆེད་དེ། ངེད་གཉིས་ཀྱི་མཇལ་འཕྲད་རྟགས་དང་རྟེན་འབྲེལ་གྱིས་བསྒྲིགས་ཤིང་། “ལོ་ལོ་མ་ངུ་གཉིད་ལ་སྡོད། །ནམ་མཁའི་སྐར་མ་འཛིན་ན་སྟེར། །ས་ཡི་མེ་ཏོག་འབལ་ལ་སྟེར། །”བའི་ཨ་མའི་གཉིད་གླུ་སྙན་མོ་དབྱངས་ལ་འགུག་པ་དང་། ཡང“ཨ་ཁུ་རྒྱལ་བོ་ཚང་གི་ཁང་ཐོག་ན་གྲོ་འབྲུ་ནས་འབྲུ་ཐ་ར་ར། །”སོགས། བྱིས་དུས་ཀྱི་རྩེད་ར་ཆུང་ཆུང་ནས་མགོ་བརྩམས་ཏེ། ཕོ་རོག་ཤ་མདོག་འདྲ་བའི་གུག་གུ་དང། ཉ་མོ་ལྕགས་ཀྱུ་ལྟ་བུའི་ཞབས་ཀྱུ། སྤང་ལ་མདའ་མོ་འཛེར་འདྲའི་འགྲེང་བུ། ཐང་དཀར་གཤོག་པ་བརྐྱངས་འདྲའི་ན་རོ་ལ་འཇུས་པའི་གདུལ་བྱ་ནས་བཟུང་། ང་རང་ཁྱེད་ཀྱི་སྒྱུ་རྩལ་རིག་པའི་དོ་ར་ནས་ཁོ་ལག་རྒྱས་ཤིང་ལུས་དང་གྲིབ་མ་བཞིན་མཉམ་འགྲོ་མཉམ་འདུག་གིས་འཚར་ལོངས་བྱུང་བ་ཡིན།
བརྩེ་དུང་གི་མེ་ཏོག་བཞད་ཅིང་སྙིང་གཏམ་གྱི་འདོད་པ་གཞས་སུ་འགུགས་པའི་ན་གཞོན་སོ་དཀར་གྱི་དུས་དང་། མ་ཎི་ཡིག་དྲུག་གི་དབྱངས་རྟ་ངག་ལ་ཟློ་བའི་མི་ཚེ་རིང་མོའི་ཁྲོད་དུ། ཨ་མ་ལགས། ཁྱེད་ནི་ངའི་རྩེད་རོགས་དང་སྐྱོ་རོགས། ཐ་ན་ཚེ་འདིའི་སྐྱབས་ཀྱི་དྭངས་མ་ཡིན་པས། ང་ཚོའི་ཤ་ཁྲག་གི་འབྲེལ་བ་གཅིག་ལ་འདྲེས་ཤིང་། ང་ཚོའི་འདུན་པ་ནམ་ཡང་དམིགས་འབེན་ཕྱོགས་གཅིག་ཏུ་འཁོར་ཡོད།
ཨ་མའི་བྱམས་བརྩེ་ནི་མུ་མཐའ་མེད་པའི་རྒྱ་མཚོ་དང་དྭངས་ཤིང་གཙང་བའི་རྫ་ཆུ། ལྷུང་ལྷུང་འབབ་པའི་གཙང་བོ་ཞིག་ཡིན་ལ། མཚན་གྱི་འོད་ཆེམ་ཆེམ་དུ་འཕྲོ་བའི་རྒྱུ་སྐར་རྒྱལ་བོ་དང་ཉིན་གྱི་སྔོ་སངས་གཡུ་མདོག་འཛིན་ཤིང་བཻཌཱུརྱ་མེ་ལོང་ལེན་བརྒྱར་ཕྱིས་པ་ཇི་བཞིན་དྲི་མས་མ་གོས་པར་དྭངས་ཤིང་གཡའ་དག་པའི་དགུང་ཨ་སྔོན་མཐོན་པོའི་འོད་སྟོང་འགྱེད་པའི་རྟ་བདུན་དབང་བོ་ཡིན། ཉིན་མཚན་དབྱེར་མེད་དུ་རང་སེམས་འཁྱགས་རོམ་ཞུ་བའི་བསྐལ་བའི་མེ་དཔུང་ཞིག་དང་གཉིས་སུ་མ་མཆིས།
སྤྱིར་རྒྱུགས་ལེན་པའི་སྐབས་སུ་ང་ཚོ་ཚང་མ་སྐྲག་ནས་སྙིང་གི་འཕར་རྩ་ལུ་གུ་ལྡིང་ལྡིང་བྱེད། ད་ཐེངས་ཡང་དེ་དང་འདྲ་སྟེ། སྐྲག་སྐྲག་འདར་འདར་གྱི་ངང་རྒྱུགས་ལ་ཞུགས། ཕྱི་ཉིན་རྩིས་རིག་དགེ་རྒན་གྱི་སློབ་ཐུན་ལ། དགེ་རྒན་ཁོང་ཁྲོ་མེ་ལྟར་འབར་ནས་གོམ་སྟབས་ཆེན་པོས་ངང་སློབ་ཁང་དུ་ཡོང་ནས་སློབ་གྲོགས་རེ་རེའི་རྒྱུགས་སྐར་སྒྲོག་འདོན་བྱས། ཏག་ཏག་ཡིད་སྐྱོ་བ་ཞིག་ལ་ངས་རྒྱུགས་འཕྲོད་མི་འདུག
སློབ་གྲྭ་གྲོལ་བའི་ཉིན་མོར་ངས་རྒྱུགས་ཤོག་ཁྱེར་ནས་ཡུལ་དུ་ལོག ཨ་མས་ང་མཐོང་ནས་རྒྱུགས་འཕྲོད་ཡོད་མེད་དྲིས་བྱུང་། སྐབས་དེར་ངའི་སེམས་ལ་ཨ་མའི་ནངས་སྔ་ལངས་དང་དགོང་འཕྱི་ཉལ། སེན་མགོ་ཁྲག་དང་སེན་གཏིང་རྣག་བྱས་ནས་ཕྱུགས་འཚོ་བ་དང་ཁྱིམ་ལས་སྣ་ཚོགས་སྒྲུབ་བཞིན་ཡོད་ལ། ཆུ་ལྟར་བཞུར་བཞིན་པའི་ལོ་ཟླས་མོའི་དཀར་ཤ་དམར་མདངས་རྒྱས་ཤིང་ཟླ་བའི་མདངས་ལ་འཁུ་བའི་ངོ་གདོང་གི་ངོས་སུ་གཉེར་མ་འགའ་བརྐོས་འདུག་ལ། ལག་པ་ནི་སྐམ་ཞིང་ཆག་ལ་ཁད་ཀྱི་སྡོང་བའི་ཡན་ལག་དང་གཉིས་སུ་མ་མཆིས། དེ་མིན་མགོ་ལ་སྤྲ་བའི་མེ་ཏོག་བཞད་འདུག དེ་ནི་མོས་བུ་མོ་ང་ལ་སེམས་ཁྲལ་བྱས་པ་ལས་ཡོང་བ་མིན་ནམ། ངས་འདི་དག་མཐོང་མ་ཐག་སྙིང་ཆུང་དམར་པོའི་སྟེང་དུ་དུག་མདའ་ཁྲི་སྟོང་མང་པོ་འཛེར་བ་དང་གཉིས་སུ་མ་མཆིས། ཧ་ཅང་བཟོད་ཐབས་བྲལ་ལ་མིག་ཆུ་རང་དབང་མེད་པར་ཕྲེང་ཐག་ཆད་པ་བཞིན་ལྷུང་། ངའི་བསམ་པར་ངས་ད་དུང་རྒྱུགས་སྐར་འདི་འདྲ་ཞིག་བླངས་ན་འགྲིག་གམ་སྙམ་ནས། གདུང་མདོག་ཚ་ལམ་ལམ་དུ་གྱུར་ནས་མགོ་བོ་འགྱོག་པའི་སྐལ་བ་མེད་པར་བསམས།
བསམ་ཡུལ་ལས་འདས་པ་ཞིག་ལ་ཨ་མས་ང་ལ་སེམས་གསོ་བྱས་བྱུང་། ཨ་མའི་གཅེས་ཕྲུག་སེམས་སྐྱོ་མི་དགོས། མུ་མཐུད་དུ་འབད་བརྩོན་བྱེད་དགོས། ཁ་དཔེ་ལ། མི་ཡི་ཡན་ན་མི་དང་སྒང་གི་ཡན་ན་སྒང་ཡོད་ཟེར་བ་མིན་ནམ། ཕ་བོང་ཅི་འདྲ་ཞིག་གིས་ཁྱོད་རང་མནན་ཡང་། རང་ནུས་ཡོད་དགུའི་ཡར་འགྱོག་དགོས་ལ། ད་དུང་དཀའ་བ་ཕྲག་ཏུ་ཁུར། ངལ་བ་ཁྱད་དུ་བསད། བདེ་བ་རྒྱང་དུ་བསྲིངས་ནས་འབད་པ་རྒྱུན་འཁྱོངས་བྱས་ཏེ་རང་ལམ་རང་གིས་འཚོལ་དགོས་ཞེས་བཤད་པ་ན། ང་རང་ནི་གྲང་རེག་གིས་གཙེས་པའི་བྱིའུ་ཆུང་ལ་དྲོད་ལམ་གྱི་ཉི་འོད་རེག་པ་དང་ཀུན་ནས་མཚུངས་ཨང་།
ཨ་མ་ལགས། ཁྱེད་ནི་བྱམས་བརྩེ་ཡི་ཕུང་བོ་ཞིག་སྟེ། ཉི་འོད་དང་གངས་རི། རྩྭ་ཐང་། ནམ་མཁའ་སོགས་ཀྱིས་མཚོན་དུ་མེད་ལ། བཀའ་དྲིན་ནི་རི་རབ་དང་རྒྱ་མཚོས་ཀྱང་གཞལ་དུ་མེད་པས། མི་ཚེ་ཕྲེང་བརྒྱུད་ཀྱི་བརྩེ་བའི་ས་བོན་ཞིག་གོ །
སྤེལ་དུས། : 2022-03-18
ཞི་ལ།

ངེད་ཚང་ལ་ལྡོམ་པོའི་རིགས་མ་ཡིན་པའི་རང་ཁྱིམ་དུ་བཙས་པའི་ཞི་ལ་ཞིག་ཡོད། ཞི་ལ་དེ་ནི་ང་ལ་མཚོན་ན་ཆེས་སྙིང་རྗེ་བོ་ཞིག་ཡིན་ལ། རང་གི་རྩེད་ཡ་འདུག་རོགས་ཤིག་ཀྱང་ཡིན། ཞི་ལ་དེའི་སྤུ་མདོག་ནི་དཀར་པོ་ཡིན་པ་དང་དཀར་པོ་དེའི་ཐོག་ཏུ་ཁ་དོག་ནག་པོ་ཅུང་ཙམ་འདྲེས་ཡོད། དེ་ནི་དར་དཀར་གྱི་གདན་དཀར་ཐོག་ཏུ་སྣག་ཚ་ཅུང་ཙམ་ཕོད་ཡོད་པ་དང་མཚུངས། ཞི་ལའི་མིག་གཉིས་ནི་གོར་གོར་ཡིན་ལ་ཅུང་ཆེ། དེ་ནི་རྒུན་འབྲུམ་ཞིག་དང་ཨ་ན་མ་ན་རེད། རྐང་བ་དང་ལག་པ་གཉིས་ནི་རུང་རྒྱུ་ཐུང་རྒྱུ་མེད་རུང་། ཞི་ལའི་རྐང་རྗེས་ནི་ཧ་ཅང་ཡག་པོ་འདོད་པའི་་མེ་ཏོག་ཆུང་ཆུང་ཞིག་དང་འདྲ། ད་དུང་ཞི་ལའི་ལུས་པོ་ནི་ཡང་ཟོར་ལྡན་པ་དང་མྱུར་མོ་ཞིག་ཀྱང་ཡིན་ལ། གཤིས་ཀ་ནི་གཡུང་ཞིང་སྲུན་པ་ཞིག་ཡོད།
ངེད་ཚང་གི་ཞི་ལ་ནི་རྩེད་དགའ་ཅན་ཞིག་ཡིན། ཆེས་རྩེད་པར་དགའ་བའི་རྩེད་ཆས་ནི་སྒྲོ་སྤུ་དང་གྲུ་གུ་གཉིས་གང་རུང་ཡིན། ད་དུང་ཙི་གུ་འཛིན་པར་ཡང་ཧ་ཅང་དགའ་ཞིང་མཁས་པ་ཞིག་ཡིན། ཞི་ལས་ཙི་གུའི་གྲགས་འགུལ་ཙམ་ཐོས་མ་ཐག་ཏུ། མྱུར་མ་མྱུར་ཏུ་ཙིག་ཁུང་ཁར་རྒྱུག་པའི་རྣམ་པ་དེ་ནི་སྟག་ཆུང་ནགས་ཚལ་དུ་མཆོངས་ནས་ཡོང་བ་དང་ཀུན་ནས་མཚུངས། དེ་ནས་ཙིག་ཁུང་སྒོ་ཁ་རུ་ཕྱིར་འབུད་པར་སྒུག་ནས་འདུག སྐར་ཆ་རེ་དང་སྐར་མ་རེ། སྐར་མ༡༠རེ་དང་སྐར་མ༣༠རེ། དེ་ནས་དུས་ཚོད་གཅིག་ཙམ་ལ་སྒུག་དགོས་ཀྱང་སུན་སྣང་ཅུང་ཙམ་མི་སྐྱེས་པར་མ་ཟད། ད་དུང་བློ་རིག་བསྒྲིམས་ནས་ནན་ཏན་གྱིས་སྒུག་རྒྱུར་དགའ། གལ་ཏེ་ཁྱེད་རང་ཞི་ལ་དང་མཉམ་དུ་འཕྲད་ནས་མཉམ་དུ་རྩེད་རྗེས། ཁྱེད་ལ་གཏན་དུ་ཁ་འབྲལ་མི་འདོད་པའི་སྣང་བ་ཞིག་སྟེར་ངེས་ཡིན། ཡིན་ན་ཡང་། ང་ནི་ངེད་ཚང་གི་སྙིང་རྗེ་ཞིང་སྤྱང་གྲུང་ལྡན་པའི་ཞི་ལ་དེ་ལ་ཤིན་ཏུ་དགའ་ཞེན་ཆེའོ། །
སྤེལ་དུས། : 2022-03-18
ལོ་སར།

ལོ་སར་སླེབས་ལ་ཉེ་བས། ཚེས་ཉེར་དགུ་ཉིན་ནས་བཟུང་ང་ཚོའི་སྡེ་བ་ཆུང་ཆུང་འདིའི་ཕྱི་ནང་ཀུན་ཏུ་བྲེལ་འཚུབ་ཀྱི་རྣམ་པ་ཞིག་ངང་གིས་ཤར་བྱུང་། ཁྱིམ་ཚང་རེ་རེ་ཡིས་སྡེར་ཁ་གང་ཡག་གང་མང་བསྒྲིག་པ་སོགས་ཀྱི་ལས་ལ་བྲེལ་བཞིན་འདུག
ངེད་ཚང་གིས་ཀྱང་ལོ་སར་ལ་གྲ་སྒྲིག་ཡིད་ཚིམས་པ་ཞིག་བྱས་ཡོད་པས་དངོས་རྫས་སྣ་ཚོགས་བླངས་ཏེ་སྡེར་ཁ་བསྒྲིགས་རྗེས། ཨ་ཕ་དང་ངེད་གཉིས་ལོ་སྐྲ་བཞར་དུ་ཨ་ཁུ་ཚེ་རིང་ཚང་ལ་འགྲོ་དགོས་བྱུང་སོང་། ཁོ་ཚང་གིས་ཀྱང་ཀ་ར་སིལ་ཏོག་གི་སྡེར་ཁ་གྱ་ནོམ་པ་ཞིག་བསྒྲིགས་ནས་ལས་ཀ་ཡོངས་སུ་ཚགས་སུ་ཚུད་འདུག ཨ་ཁུ་ཚེ་རིང་གིས་ངེད་གཉིས་ཀྱི་སྐྲ་བཞར་རྗེས། ལོ་མགོ་ཡག་པོ་རེད། ལོ་སར་ལ་བཀྲ་ཤིས་བདེ་ལེགས་ཤོག་ཅེས་ཁ་གཡང་འཐེན་པ་དང་། ཨ་ཕ་དང་ངེད་གཉིས་ཀྱིས་ཀྱང་ཨ་ཁུ་ལ་བཀའ་དྲིན་ཆེ་ཞུས་ནས་མྱུར་ཏུ་ཁྱིམ་ལ་ལོག་ནས་སྒང་བསང་ཕུད་དུ་འགྲོ་བར་གྲ་སྒྲིག་བྱས་པ་ཡིན།
དགུ་ཐུག་འཐུང་བར་གྲ་སྒྲིག་ཡོངས་སུ་འགྲུབ་པ་དང་། ཨ་ཕས་ང་ལ་ཚོད་མ་དང་ཐུག་པ་མང་པོ་ཞིག་ཟ་དགོས་ཟེར། རྒྱུ་མཚན་ནི་དོ་དགོང་གཉིད་ན་གཤིན་རྗེ་ཆོས་རྒྱལ་རྒྱ་མ་མཇལ་དུ་ཡོང་ངེས་ཡིན་པས། ལོ་གཅིག་གི་རྒྱ་མའི་ཚད་ཐིག་མ་ལོང་ན་གཤིན་རྗེ་ཆོས་རྒྱལ་གྱིས་ཁྲིད་ནས་འགྲོ་ངེས་ཡིན་ཟེར། སྐད་ཆ་དེ་ལ་ང་ཡིད་མི་ཆེས་ན་ཡང་། གང་ལྟར་མང་པོ་ཞིག་ཟོས་ནས་མང་པོ་ཞིག་འཐུང་རྗེས། མྱུར་ཏུ་སྔ་མོ་ནས་གཉིད་དུ་ཡུར། ཆུ་ཚོད་བཅུ་གཉིས་ལ་ཐོན་ཚེ་སྡེ་བའི་སྐྱེས་པ་རྣམས་བསང་ཕུད་དུ་འགྲོ་དགོས་པས་འགོར་དྲག་ན་གཉིད་ཁོམ་མེད་པ་ཐུགས་ལ་གསལ་བོར་འདུག
དེ་ནས་ཆུ་ཚོད་བཅུ་གཉིས་ཀྱི་སྟེང་དུ། ད་གཟོད་ཤོག་སྦག་གད་ནས་སྐད་སྒྲ་དང་མེ་འོད་སོགས་སྡེ་འདིའི་མཚན་མོའི་བར་སྣང་དུ་གང་སོང་། ཨ་ཕ་དང་ངེད་གཉིས་ཀྱང་སྒང་བསང་ལ་ཆས་ནས་ལོ་གཅིག་གི་ནང་དུ་ཁྱིམ་མི་རྣམས་ལ་ནད་མེད་ཚེ་རིང་དང་ཕྱུགས་ལ་གོད་ཁ་མེད་པའི་སྨོན་ལམ་བཏབ། ཕྱིར་ཐོན་རྗེས་ང་སྡེ་བའི་ནང་གི་རྒན་པ་རྣམས་ལ་ལོ་སར་ལ་སོང་བ་དང་། ཨ་ཕ་ཐག་རིང་གི་གཉེན་ཉེ་རྣམས་ལ་ལོ་སར་ལ་སོང་། ཨ་མ་དང་ནུ་མོ་གཉིས་ཁྱིམ་དུ་བསྡད་ནས་མགྲོན་པོ་རྣམས་ལ་སྣེ་ལེན་གང་ལེགས་བྱས་ནས་ཁོམ་མེད་དུ་བསྡད་ཡོད།
ལོ་སར་ཚེས་གཅིག་གི་ཉིན་དཀར་ཨ་ཁུ་དང་ཨ་ནེ་རྣམས་ཁྱིམ་གཅིག་ཏུ་འཛོམས་ནས་རེས་མོས་ཀྱིས་ལོ་སར་ལ་རོལ། ཕུ་ནུ་མིང་སྲིང་གླུ་ལེན་མཁན་རྣམས་ཀྱིས་སྐད་གསེང་མཐོན་པོའི་གླུ་བླངས་ཤིང་། བྲོ་འཁྲབ་མཁན་རྣམས་ཀྱིས་ཞབས་བྲོ་འགའ་རེ་འཁྲབ། ད་དུང་བཞད་གར་བཤད་མཁན་ཡང་ཡོད་པས་ཚང་མ་རྩེད་མོ་སྣ་མང་ཅན་དུ་གྱུར། ལོ་སར་ནི་ལོ་གཅིག་གི་ནང་དུ་ཆེས་སྐྱིད་པའི་ཉིན་གཅིག་ཡིན་པས། ཚང་མས་ལོ་རྙིང་བའི་ནང་གི་དགའ་སྐྱོ་ཆགས་སྡང་ཚང་མ་བརྒྱབ་ཏུ་དོར་ནས་ལོ་སར་བའི་ནང་དུ་ཅི་བསམ་ལྷུན་འགྲུབ་དང་ནད་མེད་ཚེ་རིང་ཡོང་བའི་ཆེད་དུ། རང་གི་ལྷ་ཀླུ་གཉན་གསུམ་ལ་མཆོད་བསྟོད་དང་བཀུར་བསྟི་བྱེད་བཞིན་དུ་ཟས་རིགས་སྣ་མང་དང་གྱོན་ཆས་གང་ཡག་གིས་རྒྱན་སྤྲས་ནས་མཉམ་འཛོམས་ཀྱི་འཚོ་བ་སྐྱིད་པོ་ཞིག་རོལ་བཞིན་ཡོད་པ་དེ་རེད།
སྤེལ་དུས། : 2022-03-18
ནེ་ཙོ།

ནེ་ཙོ་འབོད་པའི་བྱ་རིགས་ངོ་མཚར་ཅན་འདི་ལ་སྤུ་མདོག་དང་ཚུགས་ཀ་སོགས་རྣམ་པ་སྣ་ཚོགས་ཡོད་ལ། སྐད་ངག་འཇམ་ཞིང་གདངས་སྙན་མོ་སྒྲོག་པ་ཞིག་རེད། འོན་ཀྱང་། ངས་ནེ་ཙོ་ཐེངས་གཅིག་ལས་མཐོང་མ་མྱོང་། ངས་མཐོང་བའི་ནེ་ཙོ་དེ་ནི་ལུས་སྒྲོའི་སྤུ་མདོག་ཧ་ཅང་མཛེས་ཤིང་ལྟ་ན་སྡུག་པ་ཞིག་ཡིན་ཏེ། མགོ་ཡི་སྤུ་ནི་ཐལ་མདོག་ཡིན་པ་དང་རྒྱབ་ཀྱི་སྒྲོ་སྤུ་ནི་སྟོད་ཐུང་ལྗང་སྐྱ་གྱོན་པ་དང་འདྲ། བྲང་སྤུ་ནི་དཀར་པོ་དུང་ལྟར་དཀར་ཞིག་དང་མཚུངས། བརྗེད་མི་ཐུབ་པ་ནི་ནེ་ཙོའི་ཁྲ་ཆུང་མིག་གཉིས་གྲུང་ཤ་དོད་པ་དང་མཆུ་ཏོ་དམར་པོ་དེའི་དཀྱིལ་དུ་ཐིག་ནག་པོ་ཞིག་ཡོད་པ་དེ་རེད།
ནེ་ཙོ་ནི་མིའི་སྐད་ལ་ལད་མོ་བྱ་རྒྱུར་ཧ་ཅང་དགའ་བས། ཁོས་རྟག་ཏུ་ཁོའི་བདག་པོ་ལ་བཤད་ལོབས་སུ་གྱུར་ནས་སྟར་ཀ་སྟེར་རོགས་གནང་། སྟར་ཀ་སྟེར་རོགས་གནང་ཞེས་སྐད་རྒྱག་པ་དང་། སྐབས་རེར་ཁོས་ཞོགས་པ་བདེ་ལེགས་ཀྱང་བཤད་ཐུབ། སྐབས་རེར་ཁོས་དགོང་མོ་བདེ་ལེགས་ཟེར་བ་ལས་ཞོགས་པ་དང་དགོང་མོ་གང་ཡིན་དབྱེ་ཐུབ་ཀྱིན་མེད། ཁོའི་སྐད་ཀྱང་སྐབས་རེ་སྦོམ་པོ་ཡོད་པ་དང་སྐབས་རེར་ཕྲ་མོ་ཡིན་ལ། སྐབས་རེར་སྐད་ཤུགས་མཐོ་ལ་སྐབས་རེར་སྐད་ཤུགས་ཧ་ཅང་དམའ། ནེ་ཙོ་ལ་ཆ་རྒྱུས་མེད་པའི་མིས་མཐོང་ན་ངོ་མཚར་བའི་བཟོ་ལྟ་སྟོན་ཐུབ་པ་རེད། ནེ་ཙོའི་རྒུམ་བུ་ནི་སྟར་ཀ་དང་འབྲས་སྐམ་པོ་ཡིན། ཡིན་ནའང་། ནེ་ཙོ་དེ་སྟར་ཀ་བཟའ་རྒྱུར་ཤིན་ཏུ་དགའ་བས་ཁོས་རྟག་ཏུ་སྟར་ཀ་སྟེར་རོགས་གནོང་། སྟར་ཀ་སྟེར་རོགས་གནོང་ཞེས་འབོད་སྐད་སྒྲོག་པར་བྱེད།
ནེ་ཙོ་དེ་མཐོང་བས། ང་ནེ་ཙོ་འབོད་པའི་འདབ་ཆགས་བྱ་འདི་ལ་ལྷག་ཏུ་དགའ་བར་གྱུར། ནེ་ཙོ་ནི་ཅུང་དཀོན་པའི་འདབ་ལྡན་ཞིག་ཡིན་པས། ང་ཚོ་གདོང་ལེན་རུ་མི་ཚོས་རི་སྐྱེས་སྲོག་ཆགས་ནེ་ཙོ་ལ་སྲུང་སྐྱོབ་ཡག་པོ་བྱས་ནས་འགྲིག་འདོད། རྒྱུ་མཚན་ནི་བྱ་ནེ་ཙོ་ཡང་མིའི་རིགས་ཀྱི་གྲོགས་པོ་ཡིན་པས། སྤྲོ་བ་བསྐྱེད་མཁན་དང་ཡིད་སེམས་གསོ་མཁན་ཞིག་ཡིན་སྙམ།
སྤེལ་དུས། : 2022-03-18

དྲིན་ཆེན་ཨ་མ།

ང་ཚོ་འཇིག་རྟེན་འདིར་ཡོང་བ་ན། རང་ལ་ཤ་ཚ་བ་མི་གཅིག་མ་གཏོགས་མེད། དེ་ནི་རང་གི་དྲིན་ཆེན་ཨ་མ་ཡིན། ང་ཚོ་ཆུང་དུས་ནས་དྲིན་ཆེན་ཨ་མའི་བྱམས་བརྩེ་དང་གཉོར་སྐྱོང་ལ་བརྟེན་ནས་ནར་སོན་པ་ཡིན།
ང་ཚོས་ད་ལྟ་རང་གི་དྲིན་ཆེན་ཨ་མ་ལ་དྲིན་ལན་འཇལ་མི་ཐུབ་རུང་། ང་ཚོ་ཆུང་དུས་ནས་སློབ་སྦྱོང་ལ་ཧུར་བརྩོན་དང་འབད་པ་བྱས་ནས་ནར་སོན་པ་ཡིན་ན། ད་གཟོད་རང་གི་དྲིན་ཆེན་ཨ་མ་ལ་དྲིན་ལན་འཇལ་ཐུབ།
ང་ཚོས་ཆུང་དུས་ནས་ཨ་མ་ལ་དྲིན་ལན་མང་པོ་ཞིག་འཇལ་མི་ཐུབ་རུང་། ཨ་མ་ལ་ལས་ཀ་ཡང་མོ་ཙམ་རེ་ང་ཚོས་ངེས་པར་སྒྲུབ་ཐུབ་པ་སོགས་ལས་རོགས་བྱས་ན་ཆོག ད་རུང་ཨ་མའི་ལྭ་བ་དང་རྐང་བ་སོགས་བཀྲུ་བའང་ང་ཚོས་སྒྲུབ་ཐུབ་ན་འགྲིག་པ་རེད།
ངའི་ཕུགས་བསམ་ཡིན་ན་ཆུང་དུས་སུ་སློབ་སྦྱོང་ལ་འབད་པ་ལྷུར་ལེན་བྱས་ནས་ནར་སོན་ན་བྱ་བ་ཞིག་ལས་ཐུབ་རྒྱུ་དེ་ཡིན་པས། ངས་སྒོར་མོ་མང་པོ་གསོག་ནས་ཨ་མ་ལ་དྲིན་ལན་འཇལ་རྒྱུ་ཁོ་ཐག་བཅད་པ་འདི་ནི་ངའི་དམ་བཅའ་བརྟན་པོ་ཞིག་ཡིན།
ང་ནར་སོན་ན་རང་གི་དྲིན་ཆེན་ཨ་མ་ལ་བདེ་སྐྱིད་ཀྱི་འཚོ་བ་རོལ་དུ་འཇུག་རྒྱུ་ཡིན།དྲིན་ཆེན་ཨ་མ་ལོ་ན་རྒན་པའི་དུས་སུ། ངས་དྲིན་ཆེན་ཨ་མ་གཉོར་སྐྱོང་གང་ལེགས་གང་བཟང་བྱས་ནས་འཚོ་བ་སྐྱིད་པོ་རོལ་དུ་འཇུག་རྒྱུ་ཡིན།
ང་ཚོས་འཇིག་རྟེན་འདི་རུ། རང་ལ་ཆེས་ཤ་ཚ་ཞིང་སྙིང་ཉེ་བའི་མི་ནི་རང་གི་དྲིན་ཆེན་ཨ་མ་ཡིན་པས། ཁྱེད་ཀྱིས་སློབ་སྦྱོང་གི་འབྲས་བུ་ལེགས་པོ་ཞིག་ལ་བརྩོན་ལེན་བྱས་ཏེ་མཁས་པར་གྱུར་ནའང་རང་གི་དྲིན་ཆེན་ཕ་མའི་བཀའ་དྲིན་ནམ་ཡང་བརྗེད་མི་རུང་ངོ་། །
སྤེལ་དུས། : 2022-03-18
ངེད་ཚང་གི་འབྲི་མོ་རྒྱ་སེར་མ།

ངེད་ཚང་ནི་རྩྭ་ཐང་སྟེང་ཕྱུགས་ཟོག་འཚོ་སྐྱོང་ལ་བརྟེན་ནས་འཚོ་བ་རོལ་གྱིན་ཡོད་པའི་འབྲོག་ཁྱིམ་ཕལ་བ་ཞིག་ཡིན། ངེད་ཚང་གིས་རང་བྱུང་ཁམས་ཀྱི་སྣོད་བཅུད་ལ་བརྟེན་ནས་ནོར་གནག་གཙོ་བྱས་ཏེ་འཚོ་བ་རོལ་གིན་ཡོད་པས་ངེད་ཚང་ལ་ནོར་གནག་ཤིན་ཏུ་མང་།
ངེད་ཚང་གི་ནོར་ཁྱུ་ནང་ན་འབྲི་མོ་རྒྱ་སེར་མ་ཞིག་ཡོད། འབྲི་མོ་རྒྱ་སེར་མ་ནི་འབྲི་མོ་རྒྱ་ལྡང་མའི་རྒྱུད་པ་ཡིན། འབྲི་མོ་རྒྱ་སེར་མའི་རྭ་ཅོ་གཉིས་ཡོད་པ་སྦོམ་ཞིང་རིང་ལ། སུག་བཞི་དེ་ལས་ཀྱང་སྦོམ་ཞིང་ཐུང་། འབྲི་མོ་རྒྱ་སེར་མ་ནི་འབྲི་མོ་གཞན་དང་མི་འདྲ་སྟེ། ལུས་སྟེང་དུ་རྩིད་པ་རིང་པོ་སྐྱེས་ཡོད་པ་ཕར་བལྟས་ཚོད་ཀྱིས་མི་ལ་སྐྲག་སྣང་ཆེན་པོ་ཞིག་སྟེར་འོང་།
ཉིན་ཞིག་ལ། ང་རང་ཁྱིམ་མི་དང་མཉམ་དུ་སྦྲ་ནག་ནང་དུ་འོ་ཇ་འཐུང་བའི་སྐབས་སུ། གློ་བུར་དུ་འབྲི་མོ་རྒྱ་ལྡང་ངུར་བྱུང་། ང་རང་སྦྲ་ནག་ཏུ་ཕྱིར་ལོག་ནས་བལྟས་པ་ན། སྤྱང་ཀི་ཞིག་གིས་ངེད་ཚང་གི་འབྲི་མོ་སྔོ་ལྡང་མ་བུ་གཉིས་ཀ་བདའ་གིན་འདུག ངས་གནས་ཚུལ་དེ་མྱུར་ཏུ་ཨ་ཕར་བཤད་པ་ན། ཨ་ཕས་ལག་ཏུ་འུར་ཆ་བཟུང་ནས་བྱ་འཕུར་བ་ལྟར་འབྲི་མོ་སྔོ་ལྡང་མའི་ཕྱོགས་སུ་བརྒྱུགས།
གློ་བུར་དུ། སྤྱང་ཀིས་འབྲི་མོ་སྔོ་ལྡང་མའི་བེའུ་བཟུང་བྱུང་། སྐབས་དེར་ངས་བེའུ་དེ་སྐྱོབ་བསམ་མོད། ཡིན་ན་ཡང་ང་རང་ལོ་ན་ཤིན་ཏུ་ཆུང་བས་སྤྱང་ཀིའི་འགྲན་ཡ་མི་དོ་སྙམ་ནས་ཁ་རོག་གེར་བསྡད། སྐབས་ཏག་ཏག་ལ་ངེད་ཚང་གི་འབྲི་མོ་རྒྱ་སེར་མ་བརྒྱུགས་འོང་ནས་སྤྱང་ཀི་ལ་ཐེངས་གཉིས་བརྡུངས་བྱུང་། ཐེངས་གསུམ་པ་བརྡུང་སྐབས་འབྲི་མོ་རྒྱ་སེར་མས་རང་གི་རྭ་ཅོས་སྤྱང་ཀི་ཡར་བཀྱགས་ཏེ་ཤུགས་ཆེན་པོས་ས་ལ་གཡུགས་པ་ན་སྤྱང་ཀི་དེ་མ་ཐག་སྐྲག་ནས་བྲོས་སོང་། ངས་བེའུ་ཆུང་ངུ་དེ་བསྐྱབས་པ་མཐོང་ནས་དགའ་སྤྲོ་དཔག་མེད་སྐྱེས་ཏེ་མྱུར་ཏུ་བེའུ་ཆུང་གི་ཕྱོགས་སུ་བརྒྱུགས་པ་ཡིན། དེ་ནས་བཟུང་སྟེ། ང་ངེད་ཚང་གི་འབྲི་མོ་རྒྱ་སེར་མ་ལ་དགའ་ཞེན་ཆེ་ཞིང་བརྩེ་འདང་ཇེ་ཟབ་ཏུ་གྱུར་རོ། །
སྤེལ་དུས། : 2022-03-18
ང་ཚོའི་སློབ་གཙོ།

བདག་གི་དྲན་འཛིན་གྱི་ཡོལ་རས་ངོས་སུ་ནམ་ཡང་བརྗེད་མེད་དུ་འཆར་འོང་བ་ནི། ང་ཚོར་ལྷག་བསམ་རྣམ་དག་གིས་ཞལ་ཏ་དང་སློབ་གསོ་གང་མང་གནངས་མྱོང་བའི་སློབ་གྲྭའི་བུད་མེད་འགོ་ཁྲིད་ཅིག་ཡིན། ཁོ་མོ་ནི་ང་ཚོའི་ས་གནས་འདིའི་སློབ་གཙོ་བཟང་བོ་སྐལ་བཟང་སྒྲོལ་མ་ཡིན། ཁོ་མོ་ད་ལོ་དགུང་ལོ་བཞི་བཅུ་ལྷག་ལ་སོན་ཡོད་ཅིང་། གཟུགས་ཆེ་ཞིང་ངོ་མདངས་སྨུག་པོའི་འབྲོག་མོ་རྣལ་མ་ཞིག་ཡིན་པས། ངེས་པ་དོན་གྱི་སློབ་གསོའི་ལས་དོན་ལ་བློ་དཀར་སེམས་དཀར་བྱེད་པའི་ཕུལ་བྱུང་སློབ་གཙོ་ཞིག་རེད།
དུས་རྒྱུན་དུ། ཁོ་མོས་སློབ་མ་རྣམས་ལ། སློབ་གྲོགས་ཚོ། ཁྱེད་ཚོ་ནི་ང་ཚོ་མི་རིགས་ཀྱི་མ་འོངས་པའི་རེ་བ་ཡིན། ང་ཚོ་མི་རིགས་འདིའི་རྗེས་ལུས་ཀྱི་རྣམ་པ་བསྒྱུར་དགོས་ན། ཁྱོད་ཚོར་བརྟེན་དགོས་པས། ཁྱོད་ཚོས་ཆུང་དུས་ནས་བཟུང་སྟེ་དཀའ་སྤྱད་འབད་བརྩོན་གྱི་སྒོ་ནས་ཚན་རིག་ཤེས་བྱ་སློབ་སྦྱོང་བྱེད་དགོས་ཞེས་སྐུལ་འདེད་གང་མང་བཏང་མྱོང་བ་དང་། དངོས་གནས་བཤད་ན་ཁོ་མོ་ལ་གཏམ་ཁ་ལྕེ་བདེ་ཞིང་བློ་རིག་པ་གསལ་བས་བྱ་བ་ཅི་ཞིག་སྒྲུབ་རུང་སེམས་ཧ་ཅང་ཞིབ་ཚགས་ནན་མོ་ཞིག་ཡོད། རྒྱུ་མཚན་ནི་སློབ་གྲྭའི་ཕྱི་ནང་གི་བྱ་བ་ཆེ་མ་ཆུང་གསུམ་གང་ཡིན་རུང་དགེ་སློབ་བར་དང་ཁྱིམ་བདག་བར་ལ་མཛའ་གཤེས་ཀྱི་གསེར་ཐག་དམ་དུ་སྦྲེལ་ཐུབ། ལྷག་པར་དུ་ང་ཚོ་སློབ་མའི་འཚོ་བ་དང་སློབ་སྦྱོང་། བདེ་འཇགས་སོགས་ཀྱི་བྱ་བར་གནད་དོན་ཅི་ཞིག་ཡོད་པ་དང་གང་ཞིག་བྱུང་ཚེ། བཤད་ཕོད་པ་དང་སྒྲུབ་ཕོད་པའི་སྙིང་སྟོབས་ཁྱད་པར་བ་ཞིག་འདུག་པ་དེ་ནི་སློབ་གཙོ་ཁོ་མོའི་ཁྱད་ཆོས་ཤིག་ཡིན་པ་ཧ་ཅང་གསལ།
བརྗེད་པར་དཀའ་བ་ཞིག་ནི། སློབ་གྲྭའི་རིམས་ནད་སྔོན་འགོག་དང་འཕྲོད་བསྟེན་རྒྱུན་འཁྱོངས་ཞེས་པའི་བྱེད་སྒོ་ཆེན་པོ་ཞིག་སྤེལ་བ་ཡིན། ཉིན་དེར་ང་ཚོས་རང་གི་མགོ་སྐྲ་དང་རྐང་ལག་བཀྲུས་ནས་གཙང་སྦྲ་ཡིད་ཚིམས་བྱས། ཡིན་ན་ཡང་། བུ་མོ་ཁ་ཤས་ཤིག་ལོ་ན་ཧ་ཅང་ཆུང་བའི་སྟབས་ཀྱིས་རང་གི་སྐྲ་བཀྲུ་མི་ཐུབ་ལ་སླས་ཀྱང་མི་ཤེས་པར་ཨ་ནེ་ཞབས་ཞུ་མ་ལ་སྒུག་དགོས་བྱུང་། སྐབས་དེར་སློབ་གཙོ་ཁོ་མོའང་ངལ་རྩོལ་གྱི་བྱེད་སྒོ་འདི་ལ་ཞུགས་ཏེ་བྱམས་ལྡན་ཨ་མ་ཞིག་དང་འདྲ་བར་ན་ཆུང་བུ་མོ་དེ་ཚོའི་མགོ་བཀྲུས་ནས་སྐྲ་ཤད་ཀྱིན་འདུག ངས་ཞིབ་ཏུ་བལྟས་པ་ན་སློབ་གཙོ་སྐལ་བཟང་སྒྲོལ་མའི་གདོང་ཡོངས་ལ་འཛུམ་གྱིས་ཁེངས་ནས་འདུག་པ་མཐོང་མ་ཐག ཁོ་མོ་ཅི་འདྲའི་དགའ་ཞིང་སྤྲོ་སེམས་རབ་ཏུ་འཁོལ་བ་སུས་ཀྱང་རྟོགས་མི་ཐུབ་པ་ཞིག་རེད། ཁོ་མོས་ང་ཚོའི་འཛིན་གྲྭའི་ན་ཆུང་བུ་མོ་རེ་རེའི་སྐྲ་ཤད་པ་ན། ངོ་མ་ན་ཆུང་བུ་མོ་དེ་ཚོ་ལྡུམ་རའི་མེ་ཏོག་ལྟ་བུར་མཛེས་ཤིང་ཡིད་དུ་འོང་བ་རེད། སྐབས་དེར་ངའི་སེམས་ནས་ང་ཚོའི་སློབ་གཙོ་བཟང་བོ་ནི་ཅི་འདྲའི་མཛེས་ཤིང་ཅི་འདྲའི་རང་གཤིས་ཁྱད་དུ་འཕགས་པའི་བུད་མེད་མཛངས་མ་ཞིག་རེད་ཨང་།
སློབ་གཙོ་ལགས། བཀའ་དྲིན་ཆེ་ཞུ། ཁྱེད་ཀྱིས་སྐར་ཆ་འགར་ལུས་སེམས་ལྷོད་དུ་བབས་ནས་སྐུ་ངལ་ཞིག་གསོ་རོགས། ཁྱེད་ནི་ནམ་ཡང་ངའི་ཡིད་སེམས་གཉིས་ཀྱི་གཏིང་ན་གནས་བའི་སློབ་གཙོ་ཕུལ་དུ་བྱུང་བ་དེ་ཡིན། ཁྱེད་ཀྱིས་ང་ཚོའི་ཆེད་དུ་དཀའ་སྡུག་གི་ཁུར་བོ་ལྕི་མོ་ཕྲག་སྟེང་དུ་བཞེས་ནས་སློབ་གྲྭའི་བྱ་བ་ཡོད་ཚད་ལ་ཐུགས་ཁུར་གནང་བཞིན་པ་ནི་བུ་མོ་ངས་ནམ་ཡང་བརྗེད་དཀའ་འོ། །
སྤེལ་དུས། : 2022-03-18
སྣོད་བཅུད་སྲོག་གི་རྩ་བ་ཆུ་བོ་ཡིན།

བྱ་རྨ་བྱའི་སྒྲོ་གུར་ཕུབ་འདྲའི་གཡུ་ཐང་སྔོན་མོའི་ལྗོངས་སུ་གཡུ་འབྲུག་སྔོན་མོས་འཁྱུག་རྩལ་ངོམ་འདྲའི་གཙང་ཆབ་སྔོན་མོ་འདི་ནི་སྣོད་བཅུད་སྲོག་གི་རྩ་བ་ཡིན་ལ། བུ་མོ་ངའི་ངུ་ངག་གི་དབྱངས་རྟ་ཐོག་མ་དེ་ཁྱེད་ཀྱི་ཁུགས་སོ་དང་བོ་ནས་བསྒྲགས་པར་མ་ཟད། བསིལ་ལྡན་གངས་རིའི་ལྗོངས་སུ་མགྲོན་དུ་ཕེབས་པ་ནས་ཐོག་མའི་འཐུང་ཆུའང་ཡིན། གཙང་ཆབ་སྔོན་མོ་འདིའི་ཆུ་མགོ་གངས་རི་ལ་ཟུག་ཅིང་ཆུ་རྔ་རྒྱ་མཚོར་འདྲེས་པར་བྱས་ཡོད།
ཡན་ལག་བརྒྱད་ལྡན་གྱི་ཆུ་བོ་འདི་ནི་ཁ་ལ་ཞིམ་ཞིང་ལྟོ་བར་བདེ་བའི་སངས་རྒྱས་སྨན་བླའི་སྨན་ཆུ་ཡིན་ཞིང་། ཕྱི་ལུས་ཀྱི་ནག་ནོག་གི་དྲི་མ་དག་གཙང་བྱེད་ལ་ནང་སེམས་ཀྱི་སྡིག་སྒྲིབ་དང་ནད་རིགས་སོགས་ཀྱང་གཙང་སེལ་བྱེད་ཐུབ། དཔྱིད་ཀྱི་དཔལ་མོ་དལ་གྱིས་སླེབས་དུས་གཙང་ཆབ་ཁྱེད་རང་ཆབ་རོམ་གྱི་གུར་ཁྱིམ་ནས་གཉིད་ལས་སད་དེ། མྱུར་བ་མྱུར་དུ་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་ཡོངས་ཀྱི་འཚོ་བའི་བདེ་སྡུག་གི་ཆེད་དུ་ས་གཞིའི་ཁྱོན་ཡོངས་སུ་ཚེ་སྲོག་གི་སྐྱེས་སྟོབས་རྒྱས་སུ་བཅུག དབྱར་ཁའི་དུས་སུ་ཁྱོད་ཀྱིས་སྐྱེ་འགྲོ་ཀུན་གྱིས་བཟོད་དཀའ་བའི་རྟ་བདུན་དབང་བོའི་ཚྭ་གདུགས་བཅོམ་ནས་བསིལ་སྦྱིན་མཁན་ཡིན་ལ། ཡོད་ཚད་ཀྱི་ཡོད་ཚད་ལ་སྐྱེས་སྟོབས་ཀྱི་ཁོ་ལག་རབ་ཏུ་རྫོགས་པར་བྱེད་པར་མ་ཟད། སྤང་འགྲམ་གྱི་མེ་ཏོག་འཐུ་བཞིན་གླུ་གར་ལ་རོལ་མྱོང་ཐེངས་གཅིག་བྱེད་བཞིན་བཞུད་དོ། །སྟོན་ཁར་སླེབས་པ་ན་ཁྱོད་ཀྱིས་དུས་ཚིགས་ཀྱི་གོམ་པའི་འགྲོས་དང་བསྟུན་ནས་ས་གཞིའི་ལྗང་མདོག་གི་ལྭ་བ་ཕུད་དེ་གསེར་མདོག་གི་འཕྱོར་ལྭ་མནབས་པར་མ་ཟད། གསེར་མདོག་གི་སྡོང་ལོ་འཁྱེར་བཞིན་སྒེག་ཉམས་ལྡན་པའི་བྲོ་གར་ལ་རོལ་མྱོང་བྱེད་པ་དང་ཆབས་ཅིག་ཏུ་ངལ་གསོ་བར་གྲ་སྒྲིག་བྱེད་བཞིན་འདུག དགུན་གྱི་རྒྱ་སྟག་བཙན་པོས་མཆེ་བ་གཙིགས་ནས་སླེབས་དུས། ཁྱེད་རང་ཡང་བསྐྱར་ཆབ་རོམ་གྱི་གུར་ཁྱིམ་ནས་གཉིད་དུ་ལྷུང་སོང་། གཙང་ཆབ་སྔོན་མོ་ནི་འུ་ཅག་འགྲོ་བ་མིའི་རིགས་ཀྱི་ཚེ་སྲོག་གི་འབྱུང་ཁུངས་ཡིན་ལ་འཇིག་རྟེན་གྱི་སྐྱེ་དངོས་ཡོད་དོ་ཅོག་གི་ལུས་པོའི་ཟུངས་ཁྲག་ནང་བཞིན་ཆུ་ལ་མ་བརྟེན་པར་འཚོ་གནས་བྱེད་མི་ནུས། ཆུ་དང་བྲལ་ན་བདག་ཅག་ཐམས་ཅད་འཚོ་སྡོད་བྱེད་སའི་མ་ཡུམ་སྟེ་ལྗང་མདོག་གི་གོ་ལ་འདི་ཡང་མཛེས་སྡུག་དབེན་པའི་མྱ་ངམ་ཐང་ཆེན་ཞིག་ཏུ་འགྱུར་བར་གདོན་མི་ཟ། དེའི་སྟབས་ཀྱིས་ང་ཚོས་འཇིག་རྟེན་གྱི་སྐྱེ་དངོས་ཡོད་དོ་ཅོག་གི་མ་ཡུམ་འདིར་སྲུང་སྐྱོབ་བྱེད་དགོས།
ད་སྐབས། ག་ས་གང་དུ་གད་སྙིགས་དང་། རྫས་དུག་ཅན་གྱི་དངོས་པོ་སོགས་ཆུ་ནང་དུ་འཕངས་ནས་ཆུ་བོ་ལ་གནོད་པ་ཚབས་ཆེན་ཐེབས་ནས་མྱ་ངམ་ཐང་ཆེན་དུ་འགྱུར་བའི་ཉེན་ཁ་ཐེབས་བཞིན་ཡོད་པས་ང་ཚོས་གང་ནུས་ཀྱིས་དེར་སྲུང་སྐྱོབ་བྱེད་དགོས་པ་རེད། ཆུ་བོ་ནི་བསིལ་ལྡན་ཁ་བ་རི་བོའི་ལྗོངས་སུ་མཛེས་པར་བྱེད་པའི་མེ་ཏོག་དང་རྩི་ཤིང་གི་མཆོད་པ་འབུལ་མཁན་གྱི་ཡོན་བདག་ཐོག་མ་དེ་ཡིན་ལ། ང་ཚོའི་མེས་པོ་གོང་མ་ནས་བཟུང་ད་ལྟའི་རྗེས་རབས་པ་རྣམས་བདེ་བར་སྐྱོང་བའི་བྱང་སེམས་ཅན་དེ་ཡིན་པ་དང་ང་ཚོའི་ཤ་དང་རུས་གསེང་ལ་འཐིམས་པའི་ཚེ་སྲོག་གི་རྒྱུད་སྐུད་དང་ཟུངས་ཁྲག་གི་གཞི་མ་རུ་གྱུར་ཡོད། སྤང་ལྗོངས་སྔོན་མོའི་ཁུགས་སོ་རུ་དབྱར་སྐྱེས་རྔ་སྒྲའི་འཁྱུག་རྩལ་ལས་བྱུང་བའི་ཤག་སྒྲ་རེ་རེ་ནི་ང་ཚོའི་མེས་པོ་རྣམས་ཀྱི་བྱམས་བརྩེ་ཡི་འབོད་སྒྲ་ཡིན། བདག་གི་སྙིང་ལས་གཅེས་ཤིང་རུས་ལ་འཐིམས་པའི་མ་ཡུམ་གྱི་ནུ་ཆུ་ལགས། ཁྱོད་ཀྱིས་སྒེར་སེམས་ཀྱི་དུག་ཅན་དོར་ཏེ་སྤྱི་སེམས་ཀྱི་ཉི་ཟླ་དེ་གཙུག་ཏུ་བཟུང་སྟེ་ལེ་བདའ་དང་འཁང་ར་མེད་པར་ཁུ་སིམ་མེར་བདག་ལས་གཞན་གཅེས་ཀྱི་སྙིང་སྟོབས་དེར་ང་ཤིན་ཏུ་དགའ་ཞིང་དུངས་ལ་སློབ་སྦྱོང་བྱེད་དགོས་པའི་རླབས་ཆེན་གྱི་མིག་དཔེ་རུ་གྲུབ་ཡོད།
ཆུ་བོ་ལགས། ཁྱེད་ཀྱི་བླ་ན་མེད་པའི་ཉིང་བཅུད་ལས་ཕ་མེས་ཀྱི་དཔའ་སྟོབས་དང་ཡང་མེས་ཀྱི་མཛངས་གཤིས་ལྷད་མེད་འཁྲུངས་ཤིང་། ཁྱེད་ཀྱི་རོ་བཅུད་ལས་འབྲོང་གཡག་གི་རྭ་རྩེ་རུ་འབར་བའི་རྣོ་དབལ་ཡལ་མ་མྱོང་ལ་གཡང་དཀར་ལུག་གི་བལ་འཇམ་གྱི་མཚར་སྡུག་ཤོར་མ་མྱོང་། ཨེ་མ། ང་ནམ་ཡང་ཚེ་སྲོག་གི་དྭངས་མ་རུ་གྱུར་པའི་ཆུ་བོ་ལ་དགའ་ཞིང་དུངས།
སྤེལ་དུས། : 2022-03-18
ཆུ་ནི་འགྲོ་བ་ཀུན་གྱི་ཚེ་སྲོག་ཡིན།

ཆུ་ནི་ང་ཚོས་རྒྱུན་པར་མཐོང་གྱིན་ཡོད་པ་དང་། དེ་ནི་ང་ཚོ་དང་འགྲོ་བ་རིགས་དྲུག་གི་ཚེ་སྲོག་རེད། དེ་བས། ཆུ་ཐིགས་པ་གཅིག་ཀྱང་ང་ཚོས་ཆུད་ཟོས་སུ་གཏོང་མི་རུང་བར་གྲོན་ཆུང་བྱེད་དགོས་པ་ནི་ང་ཚོའི་འགན་ཁུར་ཡིན།
གལ་ཏེ། སའི་གོ་ལའི་སྟེང་གི་ཡོད་ཚད་འཛད་ཚེ། ང་ཚོས་ལྷུང་ལྷུང་དུ་བཞུར་བཞིན་པའི་ཆུ་ཕྲན་ཆུང་ཆུང་། ད་དུང་སྔོ་ལམ་ལམ་བྱེད་པའི་རྒྱ་མཚོའི་ནང་དུ་ཅི་དགར་འཁྱུག་རྩལ་ངོམ་པའི་ཉ་མོ་ཆུང་ཆུང་ཕར་རྐྱལ་ཚུར་རྐྱལ་བྱེད་པ་ཡང་མཐོང་མི་ཐུབ། དེར་མ་ཟད། ད་དུང་མུ་མཐའ་མེད་པའི་སྔོ་ལྗང་ལྗང་གི་རྩྭ་ཐང་དུ་སོས་དལ་བག་ཕེབས་ངང་གནས་པའི་རྟ་ནོར་ལུག་གསུམ་སོགས་ཀྱང་མཐོང་མི་ཐུབ། ཆུ་མེད་ཚེ། སྐྱེ་འགྲོ་ཀུན་ལ་སྲོག་མེད་པ་དང་འདྲ་ལ། ནགས་ཚལ་སྟུག་པོ་དང་དགའ་བའི་འཛུམ་མདངས་ཤར་བའི་མེ་ཏོག་སྣ་བརྒྱ་ཡང་སྐམ་པར་འགྱུར་ངེས་ཡིན། རི་དྭགས་དང་གཅན་གཟན། ཐ་ན་ང་ཚོ་འགྲོ་བ་མིའི་རིགས་ཀྱང་ཤི་བར་འགྱུར་རོ། །དེའི་རྐྱེན་གྱིས། ང་ཚོས་ཆུ་ཐིགས་རེ་རེ་ལ་སྲུང་སྐྱོབ་ལེགས་པོ་བྱེད་དགོས། དེ་ནི་ང་ཚོའི་བདེ་སྐྱིད་ཀྱི་འཚོ་བའི་འབྱུང་ཁུངས་མ་ཡིན་ནམ། དོན་དག་འདི་ནི་ངའི་ཕ་ཡུལ་དུ་བྱུང་བ་ཞིག་ཡིན། ཉིན་ཞིག་ལ། ནམ་ཟླ་ཧ་ཅང་བཟང་། ཨ་སྔོན་དགུང་གི་ཁྲི་གདུགས་ཉི་མའི་འོད་ཟེར་ས་གཞིར་འཕྲོས་ནས་ཚ་ལམ་ལམ་བྱེད། ངས་ངེད་ཚང་གི་ལུག་བརྒྱ་ཙམ་ཡོད་པ་དེ་དེད་ནས་ཆུ་འགྲམ་ཞིག་ཏུ་སླེབས། དེའི་མཐའ་འཁོར་དུ་རྩྭ་དང་རྩི་ཤིང་། མེ་ཏོག་སོགས་སྣ་ཚོགས་བཞད་ཡོད། མེ་ཏོག་དེ་དག་མཐོང་མ་ཐག་ཏུ་ངའི་ཡིད་སེམས་རང་དབང་མེད་པར་དགའ་སྦྲོ་སྐྱེས་བྱུང་། འོན་ཀྱང་། རྫིང་བུ་དེའི་ནང་གི་ཆུ་ནི་ཕལ་ཆེར་སྐམ་ནས་ཚར་ལ་ཉེ་ཡོད། ཆུ་ནང་དུ་ཉ་མོ་ཆུང་ཆུང་ཕར་རྐྱལ་ཚུར་རྐྱལ་བྱས་ནས་བྲེལ་འཚུབ་ཀྱི་ངང་རྐྱལ་བ་དང་། ད་དུང་ཉ་མོ་འགའ་ཡང་ཤི་ཡོད། རྫིང་བུ་དེའི་ནང་གི་ཆུ་ཧ་ཅང་རྙོག་པ་ཡིན་ལ་ནང་དུ་གད་སྙིགས་མང་པོ་ཡོད། ཐ་ན་ལུག་ཁྱུ་རྣམས་ཀྱིས་ཀྱང་ཆུ་རྙོག་པ་དེ་མི་འཐུང་བ་རེད། དུས་དེར་ངས་ད་གཟོད་ཆུ་མེད་ན། འཇིག་རྟེན་སྟེང་གི་འགྲོ་བ་མིའི་རིགས་དང་སྲོག་ཆགས་གང་ཡིན་ཡང་གསོན་མི་ཐུབ་པ་གཞི་ནས་རྟོགས་བྱུང་། ཆུ་ནི་ང་ཚོར་མཚོན་ན་ཇི་འདྲའི་རིན་ཐང་ཆེ་བ་ཞིག་རེད་ཨང་། ང་ཚོས་ཆུ་ལ་གྲོན་ཆུང་ལེགས་པོ་བྱེད་པ་ལས་ཆུད་ཟོས་སུ་གཏོང་ག་ལ་རུང་།
ང་ཚོས་ཆུ་ཐིགས་གཅིག་ཡིན་ཡང་གྲོན་ཆུང་དང་སྲུང་སྐྱོབ་བྱེད་པའི་འདུ་ཤེས་བཟང་བོ་བསྐྱེད་དགོས། ང་ཚོས་ཆུ་ཁོ་ན་སྲུང་སྐྱོབ་བྱེད་དགོས་པ་ལས་ད་དུང་རང་བྱུང་གི་ཁོར་ཡུག་ལའང་སྲུང་སྐྱོབ་ལེགས་པོ་བྱེད་དགོས། ང་ཚོས་རང་གི་ཁེ་ཕན་ཁོ་ན་བསམས་ཏེ་ས་གང་སར་ས་བརྐོ་རྡོ་སློག་བྱེད་པ་དང་། ལྗོན་ཤིང་གཡུ་ལོ་ཚིང་ཚིང་དུ་སྐྱེས་པའི་ནགས་ཚལ་སྟུག་པོ་རང་དགར་གཅོད་པ། དལ་འགྲོ་མ་སྟེ་ལྷུང་ལྷུང་དུ་བཞུར་བའི་ཆུ་ཕྲན་གྱི་ནང་དུ་གད་སྙིགས་སྣ་ཚོགས་འཕངས་ནས་འབག་བཙོག་ཏུ་གྱུར་ཚེ། ང་ཚོའི་གཞིས་ཁྱིམ་དྲོན་མོ་སའི་གོ་ལ་འདི་འཇིག་ཉེན་ཧ་ཅང་ཆེན་པོ་འདུག
དེ་བས། ང་ཚོས་ཆུ་གྲོན་ཆུང་བྱེད་པ་དང་རང་གི་མཐའ་འཁོར་གྱི་རང་བྱུང་ཁོར་ཡུག་ལ་སྲུང་སྐྱོབ་ལེགས་པོ་བྱེད་དགོས། ང་ཚོས་འཇིག་རྟེན་སྟེང་གི་ཆེས་མཐའ་མཇུག་གི་ཆུ་ཐིགས་དེ་རང་ཉིད་ཀྱི་མིག་ཆུ་རུ་འགྱུར་དུ་འཇུག་མི་རུང་། ང་ཚོས་ད་དུང་ཡིད་དུ་འོང་བའི་སྐྱེ་དགུ་ཐམས་ཅད་ཀྱི་ཁྱིམ་གཞི་སའི་གོ་ལ་དང་ཆུ་ལ་གཏོར་བརླག་བྱེད་མི་རུང་པར་སྲུང་སྐྱོབ་བྱེད་དགོས། ཆུ་ནི་ང་ཚོའི་ཚེ་སྲོག་ཡིན་པས་དེ་ལ་སྲུང་སྐྱོབ་དང་གྲོན་ཆུང་བྱེད་དགོས།
སྤེལ་དུས། : 2022-03-18

ཆུ་ནི་སྐྱེ་འགྲོ་ཀུན་གྱི་སྲོག་ཡིན།

རིག་གནས་ལག་རྩལ་གྱི་བང་ཁ་སྐྱེན་ལ། སྒེར་སེམས་ཀྱི་འདོད་པ་མེ་ལྟར་འབར་བའི་དེང་གི་དུས་འདིར། སྔོན་ཐོན་གྱི་བསམ་བློའི་འདུ་ཤེས་ཞན་ལ། འདས་མ་ད་གསུམ་གྱི་དོན་དངོས་ལ་དཔྱོད་པར་མི་མཁས་པའི་སྐྱེ་བོ་མང་བོ་ཞིག་གིས་རང་ཅག་ཚོའི་ཁྲ་ཆུང་མིག་གི་སྤྱོད་ཡུལ་དུ་གྱུར་ཅིང་། རོ་འཛིན་ལྕེ་ཡི་མྱོང་བྱར་གྱུར་བའི་ཚེ་སྲོག་གི་འབྱུང་རྩ་སྟེ་ཆུ་ལ་བརྫད་སྐྱོན་གང་མང་བཏང་ནས་འབྱུང་འགྱུར་གྱི་འཚོ་བ་འདི་སྐྱ་ཐང་ཐང་གི་བྱེ་མའི་ནང་དུ་རྫོངས་པའི་སྟ་གོན་བྱེད་གྲབས་མཆིས་པས། རིག་པའི་བདུད་རྩི་ཕྲན་ཙམ་རྒྱུད་དུ་མངའ་བའི་གཞོན་ནུ་ང་ཚོས་རང་ཉིད་ནས་མགོ་བརྩམས་ཏེ་གཞན་ཕན་གྱི་ལྷག་བསམ་དཀར་བོ་ཞིག་ཤ་དང་རུས་པའི་གསེང་དུ་ཉར་ནས་ཆུ་ལ་སྲུང་སྐྱོབ་གང་ལེགས་བྱ་རྒྱུ་ནི་བྱོལ་མེད་ཀྱི་འོས་འགན་ཉག་གཅིག་ཅི་ལ་མིན།
སྤང་ཁུག་ནས་བརྡོལ་བའི་ཆུ་མིག བྲག་ངོས་ནས་འབབ་པའི་རྦབ་ཆུ། སྔོ་ལྟེམ་མེར་འཁྱིལ་བའི་མཚོ་ཆུ་བཅས་ནི་ཆུ་འབྱུང་སའི་གཞི་མ་ཡིན། འདི་དག་ཡོད་ཚད་ཀྱིས་སེར་སྣ་དང་ཕངས་སེམས་སྤུ་ཙམ་མེད་པར་སྤྱི་ཕན་གྱི་བསམ་པ་བཟང་བོ་ཞིག་ཡིད་ལ་ཉར་ནས་སྣོད་བཅུད་ཀྱི་འཇིག་རྟེན་འདིའི་ནང་དུ་འཚོ་ཞིང་གནས་པའི་སྐྱེ་དངོས་ཡོད་དགུ་ལ་གསོན་ཤུགས་ཀྱིས་ཁེངས་པའི་བླ་མེད་ཀྱི་ཚེ་སྲོག་ཅིག་བསྩལ་ལ། དེར་མུ་མཐུད་དུ་རྒྱུན་བསྲིངས་བྱས་ནས་སྐྱེ་སྟོབས་ཀྱི་དཔལ་འབར་དུ་བཅུག དེ་བས། ཆུ་ནི་རང་བྱུང་ཁམས་ཆེན་མོ་འདིའི་ལུས་སུ་བར་མེད་རྟག་ཏུ་རྒྱུ་བའི་ཟུངས་ཁྲག་དེ་དང་གཉིས་སུ་མ་མཆིས་ལ། སྐྱེ་འགྲོ་ཀུན་གྱི་ཚེ་སྲོག་གི་འཕར་ལྡིང་རྒྱུན་སྲིང་བྱེད་པར་མེད་དུ་མི་རུང་བའི་རིན་ཆེན་ནོར་བུ་ལྟ་བུ་ཡིན། གལ་ཏེ་ཆུ་མེད་ན། སྔོ་ལྗང་ནེའུ་གསིང་གི་རྩི་ཏོག་སུ་ཡིས་སྐྱོང་། སྡུག་གུར་བཀྲ་བའི་མེ་ཏོག་སྣ་མང་གི་མཛེས་སྡུག་སུ་ཡིས་གནང་། གར་དུ་རྩེན་པའི་རི་དྭགས་རྣམས་ཀྱི་རྩེད་གྲོགས་སུ་ཞིག་བྱེད་སྲིད། མིའི་རིགས་ཀྱི་ཚེ་སྲོག་ཅི་ལྟར་རྒྱུན་འཁྱོངས་བྱེད་དགོས། ངེད་ཅག་གིས་འདི་དང་འདི་ལྟ་བུའི་དོན་དངོས་ཀྱི་གནས་ཚུལ་བགྲང་འདས་ཤིག་ལ་མནོ་བསམ་ཡང་ཡང་བཏང་ནས་ཆུ་ཡི་གཞལ་མེད་ཀྱི་རིན་ཐང་རྟོགས་དགོས་ལ། ཡོད་དགུ་རྩལ་སྤྲུགས་ཀྱིས་ཆུ་ལ་སྲུང་སྐྱོབ་གང་ལེགས་བྱེད་པའི་བསམ་བློའི་འདུ་ཤེས་བརྟན་པོ་ཞིག་ཆགས་སུ་འཇུག་རྒྱུ་ནི་ཧ་ཅང་གལ་ཆེའོ།།
ཆུ་ལ་སྲུང་སྐྱོབ་བྱེད་པ་ནི་རང་ཉིད་ཀྱི་ཚེ་སྲོག་ལ་སྲུང་སྐྱོབ་བྱེད་པ་དང་འཚོ་བ་ལ་མཐུན་རྐྱེན་བསྐྲུན་པ་ཡིན་ཏེ། དྭངས་ཤིང་བསིལ་ལ་མངར་ཞིང་ཞིམ་པའི་ཆུ་ལ་ལྷད་ཡོད་ཀྱི་རྫས་འདྲེས་སུ་མ་བཅུག་ན། དེས་ཁྱེད་ཀྱི་ལུས་ཕུང་ལ་ཕངས་མེད་ཀྱི་ཕན་བདེ་བསྐྲུན་རྒྱུ་ལས། གནོད་པ་ཅི་ཡང་བཟོ་མི་སྲིད་པ་ནི་སྨོས་མ་དགོས་པ་ཞིག་ཡིན་ཏེ། ཆུ་ཡོད་པས་ཞིང་ནང་གི་འབྲུ་དྲུག་སྙེ་མའི་མགོ་བོ་འབྲས་བུའི་ཁུར་ཀྱིས་དུད་ཅིང་སོ་ནམ་པ་དག་གི་གདོང་ནས་དགའ་བའི་འཛུམ་མདངས་ངོམ་པ་ཡིན། ཆུ་ཡོད་པས་ཕྱུགས་རིགས་དཀར་ནག་ཐམས་ཅད་ལ་ཤ་ཤེད་རྒྱས་ཤིང་འཕེལ་ཁ་དར་བ་ཡིན། ཆུ་ཡོད་པས་ང་ཚོ་མིའི་རིགས་འཇིག་རྟེན་མི་ཡུལ་འདིར་ད་ལྟའི་བར་དུ་འཚོ་གནས་བྱེད་པའི་སྐལ་བཟང་འདི་བྱུང་བ་ཡིན། དེ་བས། ང་རང་ཚོས་རྒྱབ་ཕྱོགས་ལག་པས་སྐྱོར་བཞིན་མིག་དབང་རྒྱང་དུ་བསྲིངས་ནས་ཆུའི་བླ་མེད་ཀྱི་བྱས་རྗེས་དེ་རྟོགས་པར་བྱེད་དགོས་ལ། བྱས་པ་ཤེས་ཤིང་དྲིན་དུ་གཟོ་བའི་མི་བུ་ཞིག་བྱས་ནས་དབྱིག་འཛིན་མའི་པང་དུ་ངལ་བ་དང་ཕངས་སེམས་སྤུ་ཙམ་ཡང་མེད་པར་གཞན་དོན་གྱི་སླད་དུ་བརྩོན་བཞིན་པའི་ཆུ་འདི་ལ་རང་ནུས་ཅི་ལྕོགས་ཀྱིས་སྲུང་སྐྱོབ་བྱེད་དགོས།
སྤྱི་ཚོགས་དཔལ་འབྱོར་གྱི་འཕེལ་རྒྱས་དང་བསྟུན་ནས་ཚན་རིག་ལག་རྩལ་གྱི་ཆུ་ཚད་ནི་བྱ་འཕུར་བ་ལྟར་མགྱོགས་ལ། སྐྱེ་བོ་མང་བོ་ཞིག་གི་ཧམ་སྒེར་གཉིས་འཛོམས་ཀྱི་བསམ་པ་དེ་མེ་སྟག་མཆེད་པ་ཇི་བཞིན་གང་ས་གང་དུ་རྒྱུ་བཞིན་འདུག་པས། རང་སེམས་འཛེམ་མེད་ཀྱིས་ཆུ་བོ་སྣ་མང་ལ་གནོད་སྐྱོན་འདྲ་མིན་མང་བོ་བཟོས་པ་དང་། འབྱུང་འགྱུར་གྱི་འཚོ་བར་སྐོམ་གདུང་གི་དཀའ་ངལ་འབྱུང་བར་སྔོན་འགྲོའི་རྨང་གཞི་གཏོང་བཞིན་འདུག སྤྱིར་བཤད་ན། མིའི་རིགས་ཀྱིས་ཆུ་ལ་གནོད་སྐྱོན་བཏང་བའི་མཇུག་འབྲས་ཡོད་ཚད་ཕྱིར་རང་ཉིད་ཀྱི་སྟེང་དུ་ཡོང་བ་ལས་གཞན་གང་གི་སྟེང་དུ་ཡང་མི་འགྲོ་བ་སྟེ། ཆུ་མེད་ན་ལྗོན་ཤིང་གཡུ་ལོ་ཚང་ཚིང་དུ་རྒྱས་པའི་ནགས་ཚལ་འདི་ཡོད་མི་སྲིད་ལ། རྩྭ་ཆུའི་བཅུད་ལ་ལོངས་སྤྱོད་བྱེད་པའི་རི་སྐྱེས་སྲོག་ཆགས་སྣ་མང་འདི་ཡང་གོ་ལ་ཟླུམ་པོ་འདིར་གནས་ག་ལ་སྲིད། དེ་བས། ཡོད་ཚད་ཀྱི་འབྱུང་རྩ་ནི་ཆུ་ཡིན་ལ།ང་ཚོས་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་གྱི་དོན་དུ་ཡོད་ཚད་ཀྱི་ཡོད་ཚད་ལ་གཏོར་བརླག་ཐེབས་སུ་མ་བཅུག་པར་ཚེ་སྲོག་གི་འབྱུང་རྩ་འདིར་ཧུར་ཐག་འབད་ཐག་དང་རང་ནུས་ཅི་ལྕོགས་ཀྱིས་སྲུང་སྐྱོབ་གང་ལེགས་བྱས་ནས་རྗེས་རབས་པ་རྣམས་ལ་བདེ་སྐྱིད་ཀྱི་ཉི་མ་སེར་པོ་ཞིག་མཐོང་དུ་འཇུག་དགོས་ལ། ནད་མེད་བདེ་ཐང་གི་ལུས་ཕུང་ཞིག་ཡོད་དུ་འཇུག་དགོས།
ཚེ་སྲོག་གི་འཕར་ལྡིང་རྒྱུན་སྲུང་བྱེད་སྤྱད་ཀྱི་ཆུ་ནི་སྣོད་བཅུད་ཀྱི་འཇིག་རྟེན་འདིར་མཚོན་ན་རིན་ཐང་གཞལ་དུ་མེད་པའི་ནོར་བུ་ཞིག་ཡིན་པས། ང་ཚོ་སྐྱེ་བོ་སུ་དང་གང་གིས་ཀྱང་ནོར་བུ་རང་ལ་ཡོད་དུས་དེའི་རིན་ཐང་རྟོགས་པར་བྱས་ནས་གཅེས་སྤྲས་དང་སྲུང་སྐྱོབ་གང་ལེགས་བྱེད་དགོས་ལ། འདས་མ་ད་གསུམ་གྱི་འཚོ་བའམ་མི་རབས་ཕྱི་མ་རྣམས་ཀྱི་བདེ་ཐང་དང་། གོ་ལ་ཟླུམ་པོ་འདི་རྟག་བརྟན་དུ་གནས་པར་བྱེད་ཆེད་ཆུ་ལ་སྲུང་སྐྱོབ་བྱེད་པའི་བསམ་བློའི་འདུ་ཤེས་ལེགས་པོ་ཞིག་དགོས་པར་མ་ཟད། དེ་སྔར་བས་ཀྱང་ཇེ་རྒྱས་ཇེ་ལེགས་སུ་བཏང་ནས་ལུས་ཁམས་གསོ་བྱེད་ཀྱི་བདུད་རྩི་འདིར་གཅེས་སྤྲས་དང་སྲུང་སྐྱོབ་གང་ལེགས་བྱ་རྒྱུ་ནི་ང་ཚོ་མི་རེ་རེ་ཡི་བྱོལ་མེད་ཀྱི་འོས་འགན་ཞིག་ཡིན་ནོ།།
སྤེལ་དུས། : 2022-03-18
སྣོད་བཅུད་སྲོག་གི་རྩ་བ་ཆུ་བོ་ཡིན།

“སའི་གོ་ལའི་ཐོག་གི་ཆེས་མཐའ་མཇུག་གི་ཆུ་ཐིགས་གཅིག་དེ་ང་ཚོ་མིའི་རིགས་ཀྱི་མིག་ཆུ་ཡིན་དུ་མ་འཇོག”ཅེས་པའི་སྐད་ཆ་འདི་ནི་ད་སྐབས་ཤིན་ཏུ་དར་ཁྱབ་ཆེ་བའི་སྐད་ཆ་ཚིག་གཅིག་ཡིན་ཏེ། ངའི་དྲན་འཛིན་གྱི་ཡོལ་བའི་ངོས་སུ་ནམ་ཡང་ཐོ་རེངས་ཀྱི་སྐར་ཆེན་དང་བཅོ་ལྔ་ཡི་ཟླ་བ་ཇི་བཞིན་གསལ་བའི་སྐད་ཆ་ཚིག་གཅིག་ཀྱང་ཡིན་ནོ།།
ཐེངས་རེར་གྱང་ངོས་ཀྱི་ཆུ་གྲོན་ཆུང་གི་བརྡ་ཁྱབ་འོག་ཏུ་རང་འབབ་ཆུའི་བཞུར་སྒྲ་ཤག་ཤག་ཤག་གྲགས་བཞིན་པ་ཐོས་དུས། ང་ཚོའི་རྣ་བར་དེ་ནི་ང་ཚོ་དང་རིགས་མཐུན་ཞིང་ཆ་མཉམ་པའི་སྐྱེ་འགྲོ་དུང་ཕྱུར་མང་པོའི་ཟུངས་ཁྲག་ས་ལ་འཕོ་བཞིན་པའི་སྒྲ་དང་འདྲ་བར་རྣ་ལ་གཟན་ཞིང་བཟོད་ཐབས་བྲལ་བ་ཞིག་ག་ནས་མ་ཡིན། ཆུ་མེད་ཚེ་གཟི་དཔལ་རབ་ཏུ་འབར་ཞིང་མཚར་སྡུག་སྟོང་གིས་རྫོགས་པའི་ཕྱི་སྣོད་ཀྱི་འཇིག་རྟེན་དང་། ལོངས་སྤྱོད་ཀུན་ནས་རྫོགས་ཤིང་སྐྱེས་སྟོབས་དཔལ་གྱིས་ཕྱུག་པའི་ནང་བཅུད་ཀྱི་སེམས་ཅན་ཡོད་ཚད་གནས་མི་སྲིད་པ་མི་ཤེས་པ་སུ་ཞིག་ཡོད། ཡིན་ཡང་དེ་ལ་གཅེས་སྤྲས་དང་གྲོན་ཆུང་བྱེད་རྒྱུའི་ཡ་རབས་ཀྱི་འདུ་ཤེས་དེ་མི་ག་ཚོད་ལ་སྐྱེས་མྱོང་། ཆུ་ཡིས་ང་ཚོ་འགྲོ་བ་མིའི་རིགས་སེར་སྣ་དང་གཡོ་སྒྱུའི་ལྷད་མ་འདྲེས་པར་རྣམ་དག་གི་ལྷག་བསམ་གྱིས་བསྐྱངས་མོད། འོན་ཀྱང་མིའི་རིགས་ཀྱིས་དེ་འཕྲོ་བརླག་དང་དེ་ལ་གཏོར་སྐྱོན་གཏོང་བཞིན་ཡོད་པ་འདི་ནི་ཕ་མས་དྲིན་གྱིས་བསྐྱངས་བའི་བུ་ཕྲུག་གིས་ཕ་མར་དྲིན་ལན་ལོག་འཇལ་བྱས་པ་དང་ཡོངས་སུ་མ་མཚུངས་སམ།
གལ་ཏེ་ཆུ་མེད་ན་ང་ཚོ་ལ་སྐྱེས་སྟོབས་ཀྱི་གཟི་བྱིན་རབ་ཏུ་འཕྲོ་བའི་ལང་ཚོ་ཡོད་མི་སྲིད་ལ། ཁྱད་པར་དུ་ཀྲུང་གོའི་ལོ་ངོ་ལྔ་སྟོང་གི་མཚར་སྡུག་འོད་སྟོང་འབར་བའི་ལོ་རྒྱུས་དང་། བྷོ་ཊ་སྟེ་བོད་ཁ་བ་ཅན་གྱི་རིག་གནས་འདི་དག་དེ་བས་ཀྱང་ཡོད་མི་སྲིད་པས་ན། ཆུ་ནི་ཚེ་སྲོག་གི་འབྱུང་ཁུངས་ལས་ལྷག་པར་དུ་རིག་གནས་དང་ལོ་རྒྱུས་ཀྱི་འབྱུང་ཁུངས་མིན་ཞེས་སུ་ཞིག་གིས་སྨྲ་ཐུབ།
མི་ཁ་ཤས་ཀྱིས་རང་ཉིད་ཀྱིས་ཆུ་ལ་གྲོན་ཆུང་བྱེད་དགོས་དོན་མེད་དེ། ཆུ་ལ་གྲོན་ཆུང་མ་བྱས་ནའང་རང་ཉིད་ཀྱིས་རྒྱུ་ནོར་དང་ལོངས་སྤྱོད་ལ་བརྟེན་ནས་ཆུ་ཉོས་པར་ཆོག་སྙམ་མོད། ཡིན་ཡང་དེ་ནི་བསམ་བློ་མ་བཏང་བ་ཤ་སྟག་ཡིན་ཏེ། ཆུ་ནི་ཚེ་སྲོག་གི་རྩ་བ་ཡིན་པས། ནམ་ཞིག་དེ་དཀོན་པའི་དུས་ལ་ཚེ་སྲོག་དོར་ནས་རྒྱུ་ནོར་ལ་བརྗེ་མཁན་ཞིག་ཡོད་མི་སྲིད་པ་ནི་བསམ་བློ་གཏོང་མི་དགོས་པའི་གནད་དོན་ཞིག་གོ །
ཁྱོད་ཀྱིས་སྤྱན་ཟུང་ཆེ་རུ་བགྲད་དེ་ཉེ་འཁོར་ལ་ཞིབ་ཀྱིས་གཟིགས་རོགས། གལ་ཏེ་ཆུ་མེད་ཚེ། ཁྲ་ཁྲ་རིག་རིག་གི་ཡུལ་འདི་ན་གནས་པའི་བྱ་དངོས་ག་ཚོད་ལ་ཚོན་མདངས་ལྡན། ཡང་སྐྱེ་དངོས་ག་འདྲ་ཞིག་གསོན་པོར་གནས། ཆུ་ཡིས་འཇིག་རྟེན་འདིར་སྔར་མེད་ཀྱི་གསོན་ཤུགས་བསྩལ་ཅིང་། ས་གཞི་ཆེན་པོ་འདིར་སྔོན་མེད་ཀྱི་ཚེ་སྲོག་སྦྱིན་འདུག་པ་ཁྱོད་ཀྱིས་མ་ཚོར་རམ།
སྣོད་བཅུད་སྲོག་གི་རྩ་བ་ཆུ་བོ་ཡིན། སྐྱེ་འགྲོ་ཀུན་གྱི་བརྟེན་སའང་ཆུ་བོ་ཡིན། ཆུ་ལ་གྲོན་ཆུང་བྱ་དགོས་ཏེ། དེ་བས་ཀྱང་གཅེས་སྤྲས་བྱ་དགོས། གྲོན་ཆུང་དང་གཅེས་སྤྲས་ཟེར་བ་ནི་ཁ་ཡི་རླངས་པ་ཙམ་གཏན་ནས་མ་ཡིན་ཏེ། འཚོ་བའི་ཁྲོད་ཀྱི་ཞིབ་ཕྲ་ལྡན་པའི་བྱ་སྤྱོད་ཕྲན་བུའི་ཁྲོད་དུ་གནས། ཉིན་རེ་རེའི་སྐར་ཆ་རེ་ལ་ཡང་རང་འབབ་ཆུའི་སྒོ་རྒྱག་རྒྱུ་མི་བརྗེད་པར། ཕྱིས་ནས་དོན་དེ་སྣང་མེད་འཇོག་པའི་གོམས་གཤིས་ཡལ་བར་དོར་ཏེ། མུ་ནས་མུ་རུ་དེ་ལྟར་དུ་རྒྱུན་འཁྱོངས་གང་ལེགས་བྱས་ན། ནམ་ཞིག་གི་ཚེ་ཁྱོད་ཀྱིས་ཤེས་དུས་སུ། སྔར་ནས་བཟུང་ཆུ་ཐིགས་སྟོང་ཕྲག་མང་པོ་གྲོན་ཆུང་བྱས་ཟིན་ཏེ། དེ་ནི་རླབས་ཆེ་བའི་གྲོན་ཆུང་ཞིག་རེད། ཆུ་ལ་བཀོལ་སྤྱོད་བྱེད་པ་ནི་ང་ཚོའི་འཚོ་བ་ཡིན་ན།ཆུ་ལ་གྲོན་ཆུང་བྱེད་པ་ནི་ང་ཚོའི་འོས་འགན་ཅིའི་ཕྱིར་མིན།
མིའི་རིགས་ཀྱི་མ་འོངས་པ་དེ་ཆུ་ལ་གྲོན་ཆུང་དང་སྲུང་སྐྱོབ་མ་བྱས་པའི་སྐྱོན་དང་ནོར་འཁྲུལ་ལས་འཇིག་པ་ནི་སུས་ཀྱང་མཐོང་འདོད་པ་ཞིག་མིན་ལ། མིའི་རིགས་ཀྱི་མིག་ཆུ་དེ་འཇིག་རྟེན་འདིའི་ཆེས་མཐའ་མཇུག་གི་ཆུ་ཐིགས་གཅིག་ཏུ་འགྱུར་བ་ནི་ང་ཚོས་དེ་བས་ཀྱང་མཐོང་འདོད་པ་ཞིག་མིན་པས་ན། ཐིགས་པ་གཅིག་གི་ཆུ་ལའང་གྲོན་ཆུང་དང་། རྡོག་པོ་གཅིག་གི་ཆུ་ལའང་གྲོན་ཆུང་བྱ་རྒྱུ་ནི་སྨྲ་མི་དགོས་པའི་གཏམ་ཡིན། ཡོད་ཚད་ཀྱི་ཡོད་ཚད་གྲོན་ཆུང་གི་འདུ་ཤེས་ལས་མཆེད་པར་རྟོགས་པ་ནི་ཀུན་ལ་མཁོ་ཞིང་ཀུན་ལ་ལྡན་དགོས་པའི་གོམས་གཤིས་དང་བྱ་སྤྱོད་ཅིག་ཏུ་འགྱུར་བ་ནི་ཆུ་ཐིགས་རྡོག་པོ་གཅིག་ལས་འཕྲོས་པའི་གཏམ་ཡིན་ན། མི་དམངས་དུང་ཕྱུར་བདུན་ཅུའི་སྙིང་ཁོང་ལས་བརྡོལ་བའི་གཏམ་ཡང་ཅིའི་ཕྱིར་མིན་ནོ།།
སྤེལ་དུས། : 2022-03-18
སྣོད་བཅུད་སྲོག་གི་རྩ་བ་ཆུ་བོ་ཡིན།

ཆུ་ནི་གང་ཟག་སྟེ་འགྲོ་བ་མི་ཞིག་ལ་མཚོན་ན་ཚེ་སྲོག་གི་འབྱུང་ཁུངས་ཡིན་ལ། གལ་ཏེ་ཆུ་མེད་ན་ང་ཚོ་ཁྲ་ཁྲ་རིག་རིག་གི་འཇིག་རྟེན་འདིའི་སྟེང་དུ་འཚོ་དཀའ། ཕ་ཡུལ་གྱི་རྩྭ་ཐང་། ཕ་ཡུལ་གྱི་ཆུ་བོ་ཞེས་པའི་སྙན་འཇེབས་ཀྱི་རོལ་དབྱངས་འདི་ཐོས་འཛིན་ལམ་དུ་འོང་ཐེངས་རེར་ཅོལ་ཆུང་བདག་གི་གངས་དཀར་སེམས་ལ་ཐོག་མར་འཆར་འོངས་པ་ནི་ངེད་གཡང་སྡེ་ཕྱུག་མོའི་སྡེ་མགོ་ན་གྱ་གྱུར་འབབ་པའི་གཙང་ཆབ་སྔོན་མོ་དེ་ཡིན།
དྭངས་གཙང་གི་བདུད་རྩི་འདི་ཡོད་པའི་སྟབས་ཀྱིས་ད་གཟོད་གོ་ལ་ཟླུམ་པོ་འདིའི་སྟེང་གི་སྐྱེ་དངོས་ཡོད་དོ་ཅོག་འཚར་ལོངས་བྱུང་བ་དང་། བསིལ་འཇམ་གྱི་གཙང་ཆབ་འདི་ཡོད་པའི་སྟབས་ཀྱིས་གཙང་བོའི་ཉེ་འགྲམ་གྱི་སྔོ་ཞིང་ལྗང་བའི་རྩྭ་ཐང་དང་གཡུ་ལོ་ཚང་ཚིང་དུ་རྒྱས་པའི་ནགས་ཚལ་སོགས་ལ་གསོན་ཤུགས་རྒྱས་ཤིང་། ཡན་ལག་བརྒྱད་ལྡན་གྱི་ཆུ་བོའི་ཁྱད་ཆོས་འཛོམས་པའི་ཆུ་བོ་འདི་ཡོད་པའི་སྟབས་ཀྱིས་འགྲོ་བ་མི་ཡོངས་སྡུག་བསྔལ་གྱི་རྒྱ་མཚོར་མ་ལྷུང་བར་བདེ་སྐྱིད་ཀྱི་ཡུལ་གྲུ་ཞིག་ཏུ་སྐྱེས། ད་ལྟ་དུས་རབས་ཀྱི་འགྱུར་ལྡོག་དང་ཚན་རིག་དར་རྒྱས་གོང་འཕེལ་དུ་འགྲོ་བཞིན་པ་དང་བསྟུན་ནས་ཆུ་འཕྲོ་བརླག་ཏུ་གཏོང་བ་དང་གྲོན་ཆུང་གི་འདུ་ཤེས་མེད་ལ་རང་དགར་ཆུ་ལོངས་སུ་སྤྱོད་པའི་གནས་ཚུལ་ཧ་ཅང་ཛ་དྲག་ཆེ་སྟབས་ང་ཚོས་ཆུ་ཐིགས་རེ་རེ་ནས་མགོ་བརྩམས་ཏེ་གྲོན་ཆུང་བྱས་ན་སྐོམ་གདུང་གིས་མནར་བའི་མི་མང་པོ་ཞིག་གི་ཚེ་སྲོག་སྐྱོབ་ཐུབ།གལ་ཏེ་ཆུ་མེད་ན་མི་མང་པོ་ཞིག་ཕྱི་མའི་ཡུལ་དུ་འགྲོ་སྲིད་ལ། ནགས་ཚལ་ཡོད་དགུ་སྐམ་སྟེ་བྱེ་ཐང་དུ་འགྱུར་སྲིད།
འོན་ཀྱང་། ད་སྐབས་ཀྱི་ཡུལ་མི་རྣམས་ཀྱིས་ཆུ་བོ་ལ་སྲུང་སྐྱོབ་བྱེད་ཀྱིན་མེད། ང་ཚོ་མིའི་བྱ་བྱེད་ཀྱིས་རང་བྱུང་ཁམས་ལ་གནོད་འཚེ་གང་མང་བྱས་ཏེ་སྐྱེ་ཁམས་ཁོར་ཡུག་ལ་ཉམས་ཉེས་ཚབས་ཆེན་བཟོ་བཞིན་ཡོད། སྔོན་གྱི་མེ་ལོང་ལྟར་དྭངས་ཤིང་བསིལ་བའི་ཆུ་བོ་ད་ལྟ་བཙོག་བསླད་དུ་གྱུར་དང་འགྱུར་བཞིན་མཆིས། དེའི་ཕྱིར། སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པ་ནི་དེང་རབས་ཀྱི་མི་རེ་རེ་ཡི་བྱོལ་མེད་ཀྱི་འོས་འགན་དུ་གྱུར་ཡོད།
ངའི་དྲན་འཛིན་དུ་ཆེས་དགའ་བ་ནི་ཆུང་དུས་སུ་རྨོ་མོའི་སྒྲུང་གཏམ་ལ་ཉན་པ་དེ་ཡིན། རྨོ་མོ་ལགས་སྒྲུང་གཏམ་བཤད་པར་དགའ་བ་དང་། ཁྱད་པར་དུ་ཕ་ཡུལ་གྱི་གཙང་ཆབ་སྔོན་མོ་དང་འབྲེལ་བའི་སྒྲུང་གཏམ་བཤད་སྐབས་བརྩེ་དུང་དང་ལྡན་ཞིང་། ངས་རྒྱུན་དུ་མོ་ཡི་མིག་ཟུང་ལས་བཞུར་བའི་དྭངས་གཙང་གི་མཆི་མ་རེ་རེ་ལས་དྭངས་གཙང་གི་ཆུ་བོའི་མཛེས་སྡུག་གི་ཡུལ་ལྗོངས་མཐོང་ཐུབ། ཕ་ཡུལ་གྱི་དྭངས་གཙང་གི་ཆུ་བོ་དེ་ནི་དཀར་ཞིང་རིང་བའི་ཁ་བཏགས་ཤིག་དང་འདྲ་བར་བཞུར་རྒྱུན་མི་ཆད་ལ། རྒྱང་རིང་གི་མགྲོན་པོར་བསུ་མ་བྱེད་པ་དང་གཉིས་སུ་མ་མཆིས། གཙང་ཆབ་སྔོན་མོ་འདིས་དེའི་འགྲམ་གྱི་ས་ཞིང་དང་སྐྱེ་དངོས་གསོ་སྐྱོང་གི་ཐད་ལ་རམ་འདེགས་བྱེད་ལ། ངེད་སྡེ་བའི་བུ་རབས་ཚ་རྒྱུད་རྣམས་དྲིན་གྱིས་བསྐྱངས་པ་ཡིན།
ལོ་རེ་རེར་ཆུ་ལོག་གི་གནོད་འཚེ་ཚབས་ཆེན་འབྱུང་བཞིན་པའི་རྒྱུ་རྐྱེན་ནི་མི་རྣམས་ཀྱིས་མི་གཙང་བའི་སྙིགས་རོ་ཡོད་དོ་ཅོག་ཆུ་ལ་བསྐུར་ཏེ་ཁོ་ར་ཁོར་ཡུག་བཙོག་བསླད་དུ་བཟོས་པ་དང་གང་སར་ས་བརྐོ་རྡོ་བསློག་བྱས་པ། ནགས་ཚལ་སྟུག་པོའི་ཁྲོད་ཀྱི་ལྗོན་པ་ཐམས་ཅད་བཅད་དེ་བྱེ་ཐང་དུ་བསྒྱུར་བ། ཞིང་འགྲམ་གྱི་ལོ་ཏོག་རྣམས་བསྐྱུར་ཏེ་གྲོང་ཁྱེར་དང་ཁང་བརྩེགས་དཔང་མཐོན་པོ་བསྐྲུན་པ་སོགས་ཀྱི་རྒྱུ་རྐྱེན་ལ་རག་ལས་སོ།།
དུས་ད་ནས་བཟུང་སྟེ་ང་ཚོས་རང་ནུས་ཅི་ལྕོགས་ཀྱིས་ཕ་ཡུལ་གྱི་ཆུ་བོ་ལ་སྲུང་སྐྱོབ་བྱས་ཏེ་གད་སྙིགས་གང་སར་མི་འཕེན་པ་དང་། ས་བརྐོ་རྡོ་བསློག་མི་བྱེད་པ།ལག་ཟུང་འགུལ་ནས་སྡོང་འཛུགས་ནགས་སྐྲུན་བྱེད་དགོས་པ་དང་། ང་ཚོའི་ཚེ་སྲོག་གི་འབྱུང་ཁུངས་ཏེ་ཆུ་བོ་ལ་གཅེས་སྤྲས་དང་སྲུང་སྐྱོབ་ལེགས་པོ་བྱེད་རྒྱུ་ནི་ཧ་ཅང་གལ་ཆེའོ།།
སྤེལ་དུས། : 2022-03-18
ཆུ་ནི་ང་ཚོའི་ལུས་ཀྱི་ཟུངས་ཁྲག་ཡིན།

ཆུ་ནི་སེམས་ལྡན་གང་ཟག་ཐམས་ཅད་ཀྱི་ལུས་ཀྱི་སྙིང་པོ་ཡིན་ལ། སྣོད་བཅུད་སྲོག་གི་རྩ་བ་ཡང་ཡིན། ཆུ་ནི་སྲོག་ལྡན་སེམས་ཅན་ཀུན་གྱི་ལུས་ན་བཞུར་བཞིན་པའི་ཟུངས་ཁྲག་ཡིན་ལ། སྲོག་མེད་སྐྱེ་དངོས་ཐམས་ཅད་རྒྱས་པའི་གཞི་རྩ་ཡང་ཡིན། ང་ཚོས་ཆུ་ལ་སྲུང་སྐྱོབ་བྱེད་དགོས་ལ། ཆུ་ལ་སྲུང་སྐྱོབ་བྱས་ན་ཀུན་ལ་ཕན།
ད་ལྟ་ང་ཚོའི་རྒྱལ་ཁབ་ན་ཡང་ཆུ་མེད་པའི་གནས་རེ་འགའ་ཡོད་ལ། འཛམ་གླིང་སྟེང་དུ་ཆུ་མེད་པའི་གནས་ཡུལ་ནི་མཚན་མོའི་ནམ་མཁའི་རྒྱུ་སྐར་ལྟར་བགྲང་ལས་འདས་པ་ཞིག་ཡོད་པས་རྩིས་མི་ཚར། གནས་དེ་དག་ན་སེམས་ཅན་སྲོག་ཆགས་མང་པོ་ཇི་ལྟར་འཚོ། སྔོ་ལྗང་སྐྱེ་དངོས་སྣ་ཚོགས་ཇི་ལྟར་རྒྱས། དེ་བས། ཆུ་ནི་ང་ཚོའི་ལུས་ཀྱི་ཟུངས་ཁྲག་དང་འདྲ་བར་མེད་དུ་མི་རུང་། གལ་ཏེ་ཆུ་མེད་ན་ང་ཚོ་མི་ཡིས་ཀྱང་འཚོ་བ་སྐྱིད་པོ་རོལ་མི་ཐུབ་ལ། གནས་མལ་སྐྱིད་པོར་སྡོད་མི་ཚུགས་པར་མ་ཟད། ནམ་ཞིག་གི་ཚེ་ལྟོགས་སྐོམ་གཉིས་མནར་གྱི་ངང་ནས་འཆི་འགྲོ་བ་ཁོ་ཐག་ཡིན། ཁ་དཔེ་ལ། ཆུ་མ་ཡོང་གོང་གི་རགས། །དགྲ་མ་ཡོང་གོང་གི་དོགས། །ཞེས་པ་ལྟར།ང་ཚོས་ད་ནས་བཟུང་སྟེ། ཆུ་ལ་སྲུང་སྐྱོབ་བྱེད་དགོས་པ་ལས། དེའི་དགེ་མཚན་མ་གཏོགས་པར་མུ་མཐུད་དུ་ཆུ་རྩ་ཆེན་རང་སྲོག་འདྲ་བ་འདི་ཆུད་ཟོས་སུ་གཏན་ནས་གཏོང་མི་རུང་།ཆུ་ལ་སྲུང་སྐྱོབ་བྱས་ན་ང་ཚོས་རང་ཉིད་ལ་སྲུང་སྐྱོབ་བྱེད་པ་དང་འདྲ། དེ་ནི་ང་ཚོས་ངེས་པར་དུ་ཕྲག་ཏུ་འཁུར་དགོས་བའི་འགན་ཁུར་གཙོ་བོ་ཞིག་ཡིན་ལ། སྐྱེ་འགྲོ་ཐམས་ཅད་ཀྱི་བདེ་སྐྱིད་ཀྱི་འབྱུང་ཁུངས་ཀྱང་ཅི་ལ་མིན། དེ་བས། ང་ཚོས་ངེས་པར་དུ་ཆུ་ལ་སྲུང་སྐྱོབ་བྱེད་དགོས།
རེད་ཡ། གང་ས་གང་དུ་འཛུམ་གྱིས་བརྡོལ་པའི་ཆུ་མིག ཤག་ཤག་བཞུར་པའི་ཆུ་ཕྲན། ལྷུང་ལྷུང་འབབ་པའི་གཙང་པོ། ལང་ལོང་འཕྱུར་བའི་རྦ་རླབས་དག་ནི་ཧ་ཅང་རྒྱུན་ལྡན་ཞིག་ཡིན་ཡང་། དོན་དངོས་སུ་དེ་དག་ནི་འོ་མ་ལས་ཀྱང་བཅུད་བཟང་ལ། ནོར་བུ་ལས་ཀྱང་རིན་ཐང་ཆེ། ཆུ་ནི་སྲོག་གི་རྩ་བ་དང་ལུས་ཀྱི་སྙིང་བོ་ཡིན་ཟེར་བ་དོན་དང་ལྡན། ང་ཚོས་ངེས་པར་དུ་ཆུ་གྲོན་ཆུང་བྱེད་དགོས།
ཡིན་ན་ཡང་། ད་ལྟ་ད་དུང་སྤྱི་ཚོགས་སྟེང་གི་ཤེས་རྟོགས་དང་གོ་རྟོགས་དམན་པའི་མི་ལ་ལས། ཆུ་ལ་སྲུང་སྐྱོབ་མི་བྱེད་པ་དང་། ཁོར་ཡུག་ལ་དོ་སྣང་མི་བྱེད་པར། རང་བྱུང་ཁམས་ལ་གནོད་པའི་ལས་ངན་པ་མང་པོ་སྒྲུབ་ནས་དངོས་པོ་ཡོད་ཚད་ཆུ་ཟོས་སུ་བཏང་སྟེ། མཛེས་སྡུག་སུམ་རྩེན་དང་འདྲ་བའི་རང་བྱུང་ཡུལ་གྲུ་འདི་ཁྱི་འགྲོ་འགྲོ་དང་ཕག་ཉལ་ཉལ་བྱེད་སའི་ཡུལ་མི་སྡུག་པ་རུ་གཏོང་བཞིན་ཡོད་པས། ང་ཚོས་མི་འདི་ལྟ་བུ་ལ་གཏན་ནས་སློབ་སྦྱོང་བྱེད་མི་རུང་བ་མ་ཟད། ད་དུང་ཁོ་ཚོ་ལ་གནས་ལུགས་མང་དུ་བཤད་ནས། མི་ལེགས་པའི་སྤྱོད་ལམ་བཅོས་བསྒྱུར་བྱེད་དུ་འཇུག་དགོས། ཆུ་ལ་དེ་བས་ཀྱང་སྲུང་སྐྱོབ་བྱེད་དུ་འཇུག་དགོས།
ཆུ་ནི་སྲོག་ལྡན་སྐྱེ་དངོས་ཐམས་ཅད་ཀྱི་དབུགས་ཀྱི་གཞི་མ་ཡིན་ལ། སྐྱེ་འགྲོ་སེམས་ཅན་ཀུན་གྱི་བདེ་སྐྱིད་ཀྱི་སྒོ་མོ་འབྱེད་པའི་ལྡེ་མིག་ཡིན། ཆུ་ལ་སྲུང་སྐྱོབ་བྱས་ན་ང་ཚོས་རང་ཉིད་ལ་སྲུང་སྐྱོབ་བྱེད་པ་དང་མཚུངས། ཆུ་ནི་ང་ཚོའི་ལུས་ཀྱི་ཟུངས་ཁྲག་ཡིན་པས། ཆུ་མེད་ཚེ། ང་ཚོ་ཡང་འཚོ་ཐབས་མི་འདུག་ལ། འཛམ་གླིང་སྟེང་གི་སྲོག་ལྡན་ཐམས་ཅད་ཀྱང་འཆི་བར་འགྲོ་བས། ཆུ་ནི་ང་ཚོ་ལ་མཚོན་ན་སྲོག་གི་སྙིང་བོ་དང་དབུགས་ཀྱི་རྒྱུ་བ་ཡིན་པས་ཧ་ཅང་གལ་ཆེན་པོ་ཡིན། ཐ་ན་སའི་གོ་ལའི་སྟེང་གི་རྩྭ་རྩི་ཤིང་། ལོ་ཏོག་ལྗོན་པ། མེ་ཏོག་འདབ་མ་ལྟ་བུ་ལ་མཚོན་ནའང་ཆུ་ནི་མེད་མི་རུང་ལ་ཧ་ཅང་གཙོ་བོ་ཡིན་པའི་སྟབས་ཀྱིས། ང་ཚོས། ཆུང་ཕྱོགས་ནས་རང་ཉིད་དང་ཁྱིམ་མི། གྲོགས་པོའི་ཆེད་དུ་དང་། ཆེ་ཕྱོགས་ནས། རྒྱལ་ཁབ་དང་འཛམ་གླིང་། སེམས་ཅན་སྐྱེ་བོ་ཚང་མ་དང་། སའི་གོ་ལ་ཧྲིལ་བོའི་ཆེད་དུ་ཆུ་ལ་སྲུང་སྐྱོབ་བྱེད་དགོས།
ཆུ་ནི་སྐྱེ་བོ་ཀུན་གྱི་གསོལ་ཇ་ཡིན།།
ཆུ་ནི་སྐྱེ་དངོས་ཀུན་གྱི་བསིལ་ཆབ་ཡིན།།
ཆུ་ནི་སྣོད་བཅུད་འཕེལ་བའི་རྩ་བ་ཡིན།།
ཆུ་ནི་ང་ཚོའི་ལུས་ཀྱི་ཟུངས་ཁྲག་ཡིན།།
ང་ཚོ་ཚང་མས་ཆུ་ལ་སྲུང་སྐྱོབ་བྱེད།།
སྤེལ་དུས། : 2022-03-18
ཆུ་བོར་སྲུང་སྐྱོབ་བྱེད་པ།

ང་ཚོ་ཚང་མ་ནི་འབྲོག་ཁྱིམ་དཀྱིས་མ་ཞིག་ཏུ་ཚེ་སྲོག་གི་འདབ་མ་གྲོལ་ཅིང་། སྦྲ་གུར་གྱི་འཇིག་རྟེན་ཞིག་ཏུ་ལང་ཚོ་ཡི་གཉོམ་ལག་རྒྱས་པའི་འབྲོག་ཕྲུག་དག་ཡིན་པས། སྒོར་བུད་ན་གཅན་གཟན་གྱི་མཆེ་བ་མཁའ་ལ་གཟེངས་འདྲའི་རི་ཚོགས་མང་པོའི་གསེབ་ན་ཆུ་ཕྲན་ལྷུང་ལྷུང་དུ་འབབ་པ་འདྲེན་བྱེད་ཀྱི་གསོས་སུ་འགྱུར་བ་མང་པོ་ཡོད་པས། ཆུ་བོ་ལ་སྲུང་སྐྱོབ་བྱེད་དགོས་པའི་གལ་ཆེན་རང་བཞིན་ཤེས་ཀྱིན་མེད།
འཕངས་པའི་མདའ་དང་། མངགས་པའི་མི་ནི་ཁོ་བོ་མ་ཡིན་མོད། འོན་ཀྱང་དྲ་ཚིགས་སྣ་ཚོགས་སུ་ཆུ་བོ་དཀོན་པའི་ཉེན་བརྡ་གཏོང་གོན་ཡོད་པ་འདི་ཁ་ཚ་དགོས་གཏུགས་ཀྱི་གནད་དོན་ཞིག་ཏུ་མིག་མཐོང་ལག་ཟིན་དུ་གྱུར་ཡོད་པས། ཁོ་བོས་འདི་ནས་ཆུ་མ་ཡོང་གོང་གི་རགས། དགྲ་མ་ཡོང་གོང་གི་དོགས་ཟེར་བ་ལྟར། ང་མི་ཆུང་ཆུང་ཞིག་ལ་གཏམ་ཆེ་ཆེ་ཞིག་མི་འོས་མོད། ཆུ་བོ་ནི་སྣོད་བཅུད་སྲོག་གི་རྩ་བ་ཡིན་པས།ཁྱོད་ཚོས་དར་ལུང་རྣ་བ་དུས་ཡུན་ཐུང་ཐུང་ཞིག་ལ་ང་ལ་གཡོར་དང་། ངས་ཁྱེད་ཚོར་ཆུ་བོ་ལ་སྲུང་སྐྱོབ་བྱེད་དགོས་པའི་རྒྱུ་མཚན་ཐུང་ངུ་ཞིག་བཤད།
དཔྱིད་ཀྱི་དཔལ་མོ་ཁ་ཁུ་སིམ་མེར་ཁ་བ་རི་བོའི་ལྗོངས་ལ་སླེབས་བྱུང་། ཁོ་མོའི་འཇམ་མཉེན་ཕྱག་སོར་གྱིས་དབྱིག་འཛིན་སྒེག་མོའི་མགོ་ལ་བྱིལ་བྱིལ་བྱས་ནས་དབྱིག་འཛིན་སྒེག་མོའི་ཕང་བར་ཉལ་བའི་སྐྱེ་དངོས་མཐའ་དག་ཀྱང་རིམ་བཞིན་གཉིད་ལས་སད་བྱུང་། དགུན་རྒྱ་སྟག་ཁྲ་བོའི་གདུག་རྩུབ་དང་ཨུ་ཚུགས་འོག་ཡུན་རིང་ཚུད་པའི་ཆུ་ཕྲན་དག་ཀྱང་དེ་ཡི་འཆིང་རྒྱ་ལས་ཐོར་སོང་། རང་གི་འོས་འགན་དང་ཕུགས་བསམ་བརྗེད་མེད་པར་རབ་དཀར་དངུལ་གྱི་དྲ་བ་དྲ་ཕྱེད་དང་མཚུངས་པའི་ཆུ་ཕྲན་དག་པ་ཏྲའི་རིས་ཀྱི་ཞིང་སའི་ནང་དུ་སོང་ནས་ཞིང་བ་ལ་ཞིང་ལ་ལོ་ལེགས་བྱུང་བར་རོགས་རམ་བྱས་ཤིང་ཁ་གཡང་བསྒྲགས་ནས་ཞིང་བའི་གདོང་ལ་འཛུམ་མདངས་མེ་ཏོག་བཏོད་པ་དང་། སྡོམ་རྒྱ་བཞིན་བསྣོལ་བའི་ཆུ་ཕྲན་དག་གིས་ཁ་བའི་ལྗོངས་འདི་སུམ་རྩེན་ཡུལ་ཡང་འགྲན་ཟླར་མི་ཡོང་བའི་ལྟ་ན་སྡུག་པའི་ལྗོངས་ཤིག་ཏུ་སྒྱུར།
ཁོ་བོས་གོང་དུ་བཤད་པ་བཞིན། ཆུ་དཀོན་པའི་གནས་ཚུལ་ཛ་དྲག་ཏུ་འགྲོ་བཞིན་ཡོད། མི་སུམ་ཅུར་བསམ་པ་སུམ་ཅུ། འབྲོང་དྲུག་ཅུར་རྭ་ཁ་དྲུག་ཅུ་ཟེར་བ་ནང་བཞིན། མི་ཁ་ཤས་ཀྱིས་སའི་གོ་ལའི་སྟེང་གི་བརྒྱ་ཆའི་དོན་གཅིག་ཆུ་ཡིན་པས་དེ་ནི་འཛད་མཐའ་མེད་པ་ཞིག་རེད་ཟེར་བ་བཞིན། དེས་ན་ང་ཚོས་འདི་ཡི་སྐོར་མདོ་ཙམ་གླེང་། སའི་གོ་ལའི་སྟེང་གི་བརྒྱ་ཆའི་དོན་གཅིག་ནི་ཆུ་ཡིན་པ་བདེན་མོད། འོན་ཀྱང་དེ་ནི་མཚོ་ཆུ་ཡིན་པ་ལས་བཏུང་ཆུ་དེ་འདྲ་མང་པོ་མེད། དཔེར་ན་ཧྥེ་གླིང་དུ་མི་མང་པོ་ཞིག་ལ་ཆུ་བཏུང་རྒྱུ་མེད་པས་ཚ་གདུང་གི་སྡུག་བསྔལ་བཟོད་དཀའ་བ་མྱངས་རྗེས་མཇུག་མཐར་གཤིན་རྗེར་མཇལ་དུ་འགྲོ་བཞིན་པ་ཡང་མང་པོ་ཡོད། ང་ཚོ་སྐྱེ་བ་སྔོན་མའི་ཚོགས་དང་བསོད་ནམས་ཀྱི་དབང་གིས་ཆུ་ཡི་ཞིང་ཁམས་སུ་སྐྱེས་ཡོད་པས། ང་ཚོས་ཁོ་ཚོ་ཡི་སྡུག་བསྔལ་མི་ཤེས་ལ་ཆུ་ནི་རིན་པོ་ཆེ་རྩ་ཆེན་ཞིག་ཡིན་པ་ཡང་ཚོར་ཀྱིན་མེད།
ཆུ་མེད་ས་གཞི་རྒྱ་ཆེ་ཡང་། །མྱ་ངམ་ཐང་ཞེས་ཀུན་གྱིས་འདོར་ཟེར་བ་བཞིན་ཁྱོད་ཚོས་ཀྱང་ཆུ་ཡི་གལ་ཆེན་རང་བཞིན་ལ་བསམ་བློ་ཞིག་ཐོངས་དང་། ཆུ་མེད་ན་སྐྱེ་འགྲོ་ཡོངས་སྡུག་བསྔལ་གྱི་གཡང་དུ་ལྷུང་འགྲོ། མཚམས་འདིར་སླེབས་དུས་ཁྱོད་ཚོས་ད་དུང་ཆུ་ནི་ཕལ་བ་ཞིག་ཡིན་ཞེས་ན་རག་ཨུ་ཚུགས་ཀྱི་བརྟུལ་ཞུགས་མི་འཛིན་པར་མཁྱེན།
བུ་མོ་གནས་ལ་མ་འགྲོ་ཞེས་འགོག་བའི་ཕ་མ་ཡོད་ཀྱང་བཀག་པའི་བུ་མོ་གང་ན་ཡོད་ཟེར་བ་ལྟར། དགེ་རྒན་གྱིས་ནམ་རྒྱུན་ང་ཚོར་ཆུ་གྲོན་ཆུང་བྱེད་དགོས་ཞེས་ཁ་ཏ་སློབ་གསོ་གནང་དང་གནང་མུས་ཡིན་མོད། འོན་ཀྱང་ང་ཚོས་གཡག་རྭ་སྒྱེ་ནང་དུ་བཅུག་པ་ལྟར་མཐུན་སྒྲིལ་གྱི་ཨ་ལོང་གཅིག་ཏུ་སྦྲེལ་ནས་ཆུ་བོར་སྲུང་སྐྱོབ་བྱེད་ཀྱིན་མེད་པས། གལ་བོ་ཆེ་ལ་ནན་ཏན་གྱི་ཚུལ་གྱིས་འདི་ནས་ཆུ་བོ་ལ་སྲུང་སྐྱོབ་བྱེད་དགོས་པའི་གལ་ཆེན་རང་བཞིན་འདི་དག་བརྗོད་པ་ཡིན།
དེ་བས་བརྒྱ་བཤད་ཚིག་གི་རྩ་བ་དང་། སྟོང་བསྲུབས་འོ་མའི་མར་ལོ་ནི། ང་ཚོས་ད་ནས་བཟུང་ཆུ་བོ་ནི་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་ཡོངས་ཀྱི་ཚེ་སྲོག་ཡིན་པའི་གལ་ཆེན་རང་བཞིན་ཡིད་ལ་དམ་པོར་བཟུང་ནས་ཆུ་བོར་སྲུང་སྐྱོབ་དང་གྲོན་ཆུང་བྱེད་པའི་གོམས་གཤིས་ཆགས་སུ་འཇུག་དགོས་པ་འདི་ཡིན་པས། ཕར་བཤད་གཏམ་གྱི་བརྡ་དག་པ། ཚུར་བཤད་ཚིག་གི་དོན་གོ་བ་ཁྱོད་ཚོས་ཀྱང་རྡོ་བརྐོས་རི་མོ་བཞིན་དུ་ཡིད་ལ་བཅངས་རོགས། གནའ་མི་བོད་ཀྱི་གཏམ་དཔེ་ལ། ཁ་བཤད་ཆུ་ཡི་ཝུ་བ། ལག་ལེན་གསེར་གྱི་ཐིགས་པ་ཞེས་པ་ཇི་བཞིན་ཁོ་བོའི་གཏམ་འདི་བཞིན་བསྒྲུབ་པར་གལ་ཆེའོ།།
སྤེལ་དུས། : 2022-03-18