སྦྱངས་རྩོམ།

སྦྱངས་རྩོམ།ཕྱི་ལོག་པ །

དཔེ་ཀློག

མི་མང་པོ་ཞིག་གིས་སེམས་སུ་རང་ཉིད་ཀྱིས་དཔེ་ཆ་བལྟ་བ་ནི་གཞན་གྱི་མདུན་ནས་སྒྲོབ་ཉམས་དང་འཇོན་མདོག་སྟོན་ཆོག་པའི་ཁྱད་ཆོས་ཤིག་ཏུ་བཟུང་ཡོད་ལ། མི་མང་པོ་ཞིག་གི་སེམས་སུ་དཔེ་ཆར་ལྟ་བ་ནི་དཔེ་མི་སྲིད་པའི་ལས་ཀ་ཡ་མཚན་ཞིག་ཏུ་སྙམ་བཞིན་ཡོད།
གལ་ཏེ། དཔེ་ཆ་ནི་རིག་པའི་ནུས་པ་གསོ་བྱེད་ཀྱི་སྨན་མཆོག་ཅིག་ཡིན་ན། སློབ་མས་དཔེ་ཆ་བལྟ་བ་ནི་སྨན་པས་ནད་པ་ལ་སྨན་བཅོས་བྱེད་བཞིན་པའི་ངང་ཚུལ་ཙམ་ཞིག་ཡིན། དཔེ་ཆ་ནི་རང་ཉིད་ཀྱི་མི་ཚེའི་བརྒྱུད་རིམ་གྱི་དཀའ་ངལ་སེལ་བྱེད་ཀྱི་ལག་ཆ་ཞིག་ཡིན་ན། དཔེ་ཆ་ལྟ་ཀློག་བྱེད་པ་ནི་གཡུལ་དུ་ཞུགས་པའི་དམག་མིས་གྲ་སྒྲིག་བྱེད་པ་ཙམ་ལས་ཅི་ལ་མིན། དེ་ནི་རང་ཉིད་ཀྱི་མི་ཚེ་རྒྱལ་ཕམ་ལ་བསམ་གཞིག་བྱེད་མིན་གྱི་གནད་དོན་ཞིག་ལས་གང་ཡང་མིན། མི་མཁས་པ་མང་པོ་ཞིག་གིས་ཀྱང་དཔེ་ཆ་ལ་ལྟ་བཞིན་ཡོད། ད་དུང་སློབ་མ་ཚོའི་ནང་དུ་ཡང་དཔེ་ཆ་ལྟ་བར་དགའ་བའི་སློབ་མ་བགྲང་གིས་མི་ལངས་པ་ཡོད་ལ། ཁོང་ཚོ་ནི་རྒྱུན་དུ་དཔེ་ཆ་བལྟས་ནས་སློབ་སྦྱོང་བཟང་པོ་བྱེད་བཞིན་པའི་གསུམ་བཟང་སློབ་མ་ཡིན། ང་ཚོས་ཁོང་ཚོར་སློབ་སྦྱོང་བྱེད་དགོས། འོན་ཀྱང་སློབ་མ་ལ་ལ་ནི་དཔེ་ཆ་བལྟ་བར་མི་དགའ་བར་མ་ཟད། ད་དུང་སློབ་མ་བཟང་བོ་རྣམས་ལ་དགྲ་རུ་ལྟ་བར་བྱེད་པ་རེད། སློབ་མ་ཁ་ཤས་ཀྱིས་ཀྱང་དཔེ་ཆ་ནི་གཉིད་སྨན་གྱི་གྲུབ་ཆ་གཙོ་བོ་ཡིན་ལ། དཔེ་ཆ་བལྟས་ན་གཉིད་ཁུག་པ་ཡིན་ཞེས་བཤད་བཞིན་ཡོད། ཡང་ལ་ལས་དཔེ་ཆ་མང་པོར་བལྟས་ན་རང་ཉིད་ཀྱི་ཁྱད་ཡོན་ཞིག་ཏུ་འཛིན་ཞིང་སྒྲོག་པར་མ་ཟད། བོད་པ་ཚོའི་མིག་ནང་ནའང་དཔེ་ཆ་བལྟ་བ་དེ་ནི་སྤྱིར་བཏང་གི་དོན་དག་ཅིག་མ་ཡིན་པའི་ཚུལ་བཟུང་ཡོད་ལ། དཔེར་ན། གལ་ཏེ་ས་ཆ་གཞན་ཞིག་ཏུ་སླེབས་ན། སྔོན་དུ་ས་ཆ་དེར་དཔེ་ཚོང་ཁང་འཚོལ་ཞིང་། དཔེ་ཚོང་ཁང་དུ་དཔེ་ཆ་གསར་བ་ཞིག་རྙེད་ཚེ། མྱུར་དུ་ལམ་འགྲམ་གྱི་འདུག་སྟེགས་དང་། ཇ་ཁང་གང་རུང་ཞིག་ཏུ་བསྡད་དེ། མྱུར་དུ་ལྟ་ཀློག་བྱེད་པའི་ལྟོགས་རྔམ་གྱི་རང་གཤིས་ཤིག་ཆགས་ཡོད། དེ་བས་ང་ཚོས་མི་དེ་ལྟ་བུ་ལ་སློབ་སྦྱོང་བྱེད་དགོས།
དཔེ་ཀློག་ནི་ཕ་མེས་ཡང་མེས་ཚོས་ང་ཚོ་ལ་ཤུལ་དུ་བཞག་པའི་ཁྱིམ་རྒྱུད་ཀྱི་ནོར་བུ་དེ་ཡིན་ན། དཔེ་ཆ་ལྟ་ཀློག་བྱེད་པ་ནི་རང་ཁྱིམ་གྱི་རྒྱུ་ནོར་སྲུང་སྐྱོབ་བྱེད་པ་ཙམ་ཞིག་ལས་ཅི་ཡང་མིན་པས། དཔེ་ཆ་ལྟ་བ་ནི་མི་ཚེ་བགྲོད་ལམ་ཁྲོད་ཆེས་གལ་ཆེན་གྱི་དོན་དག་ཅིག་ཡིན། དཔེ་ཀློག་གིས་མིའི་སེམས་རྒྱ་དང་མཐོང་རྒྱ་བསྐྱེད་ཐུབ་ལ།
དཔེ་ཀློག་གིས་རང་རྒྱུད་ལ་ཡོན་ཏན་གྱིས་ཕྱུག་པར་འགྱུར་སྲིད་ཅིང་། དཔེ་ཀློག་གིས་མིའི་ལས་དབང་ལའང་ཁ་ལོ་བསྒྱུར་ནུས་པས། ང་ཚོས་མི་ཚེ་གང་བོར་དཔེ་ཀློག་བྱེད། འབྱུང་འགྱུར་མི་རེ་རེ་ནི་ཤེས་རིག་གིས་ཕྱུག་པའི་རིག་པའི་དཔའ་པོ་འབའ་ཞིག་ཏུ་འགྱུར་བར་བརྩོན་ལེན་བྱེད་དོ། །
སྤེལ་དུས། : 2022-04-01
ཕུགས་བསམ།

འཇིག་རྟེན་གྱི་ཁ་དཔེ་ལ། “མི་སུམ་ཅུར་བསམ་པ་སུམ་ཅུ། །མཛོ་སུམ་ཅུར་རྭ་ཁ་དྲུག་ཅུ། །”ཟེར་བའི་དཔེ་ལྟར། འཇིག་རྟེན་གྱི་སྐྱེ་བོ་གང་འདྲ་ཞིག་ཡིན་ནའང་ཚང་མར་ཕུགས་བསམ་རེ་ཡོད་ངེས་རེད། ལ་ལ་ནི་ནད་བཅོས་སྲོག་སྐྱོབ་མཁན་གྱི་སྨན་པ་བྱེད་འདོད་པ་དང་། ལ་ལ་ནི་པིར་གྱི་སྒྱུ་རྩལ་ལ་མཁས་པའི་རི་མོ་མཁན་ཞིག་བྱེད་འདོད་པ། ལ་ལ་ནི་ལུས་ཀྱི་ཉམས་འགྱུར་ལ་མཁས་པའི་གཞས་མ་ཞིག་བྱེད་པར་འདོད་པ་བཅས་མི་རེ་རེར་ཕུགས་བསམ་མི་འདྲ་བ་ཡོད་པ་ནི་མངོན་སུམ་ཡིན། དེ་བས་བདག་གི་ཕུགས་བསམ་ནི་དགེ་རྒན་དམ་པ་ཞིག་བྱེད་འདོད་པ་དེ་ཡིན།
བདག་ལ་དེ་འདྲའི་ཕུགས་བསམ་ཞིག་ཡོད་དོན་ནི། སེམས་གཏིང་ནས་ཆེས་གཟི་བརྗིད་ལྡན་པ་དང་གཞན་ལ་ཕན་ཐོགས་ཆེ་བའི་དགེ་རྒན་གྱི་བྱ་བཞག་དེ་རླབས་ཆེན་ཞིག་ཡིན་པ་ཤེས་པས་ཡིན། གལ་ཏེ་དགེ་རྒན་མེད་ན། ཡངས་ཤིང་རྒྱ་ཆེ་བའི་འཇིག་རྟེན་འདིའི་མི་ཚང་མར་ཤེས་བྱ་གཅིག་ཀྱང་ཐོབ་མི་སྲིད་ལ། ལེགས་ཉེས་བླང་དོར་གྱི་གནས་ལུགས་ཀྱང་རྟོགས་མི་ནུས་པ་ནི་མིག་མཐོང་ལག་ཟིན་དུ་སྣང་། དགེ་རྒན་དམ་པ་ནི་སློབ་མ་ཚོའི་ཕ་མ་གཉིས་པ་ཡིན་ཞེས་པ་ལྟར། དགེ་རྒན་གྱིས་སློབ་མ་ནི་རང་གི་བུ་ཕྲུག་ཏུ་བརྩིས་ཏེ། བྱམས་སེམས་དང་བརྩེ་དུང་གིས་ཁེངས་ཡོད་ལ། དགེ་རྒན་ལགས་ཀྱིས་སློབ་མ་བགྲང་གིས་མི་ལངས་པ་ཞིག་ལ་ཕན་པ་སྒྲུབ་བཞིན་ཡོད། ཁོང་རྣམས་པས་ལོ་ཆུང་གི་སློབ་མ་རྣམས་ལ་མ་འོངས་པར་སྤྱི་ཚོགས་ལ་ཕན་པའི་མི་ཞིག་ཡོང་ཆེད། ཡོད་ཚད་བློས་གཏོང་དང་ལེགས་སྐྱེས་སུ་འབུལ་བཞིན་ཡོད་ལ། ནངས་སྔ་མོའི་ཟིལ་བ་ལྷམ་དང་དགུང་མཚན་མོའི་སྐར་མ་ཞྭ་ལྟར་དུ་སློབ་མ་འབའ་ཞིག་གི་ཆེད་དུ་ལས་དོན་སྒྲུབ་བཞིན་ཡོད། ཁོང་དགེ་རྒན་དམ་པས་དྲིན་ཕ་མ་རྒྱབ་ཏུ་བསྐྱུར་ཞིང་ཆུང་བྱིས་པའང་ཕར་ལ་གཡུག་ནས་ང་ཚོ་སློབ་མ་ཆོའི་ཆེད་དུ་རྒྱུགས་བཞིན་ཡོད། གཞན་ཕན་གྱི་ལྷག་བསམ་དཀར་པོས་བྱ་བ་རླབས་ཆེན་དེ་འདྲ་ཞིག་བསྒྲུབ་ཀྱང་རྟག་ཏུ་རང་ཉིད་དམའ་སར་འཛིན་གྱིན་ཡོད། ངའི་སེམས་ལ་དགེ་རྒན་གྱི་ལས་གནས་ཕྲག་ཏུ་འཛིན་མཁན་དག་ནི། མི་རིགས་ལ་བྱས་རྗེས་འཇོག་མཁན་ཤ་སྟག་ཡིན་པ་རྟོགས་པས། ང་རང་ཡང་དེ་ལྟ་བུའི་དགེ་རྒན་དམ་པ་ཞིག་བྱེད་པའི་ཆོད་སེམས་བརྟན་པོ་ལྡན་པ་ཡིན།
དགེ་རྒན་གྱི་ལས་གནས་མཆོག་ལ་སྙེག་ཐུབ་ཚེ་ངེས་པར་དུ་སློབ་མའི་ཆེད་དུ་དཀའ་སྡུག་གང་ལ་འཕྲད་ཀྱང་མགོ་མི་སྒུར་ཞིང་དཔའ་མི་ཞུམ་པར་སློབ་མ་ནི་རང་གི་བུ་ཕྲུག་ལྟར་སློབ་མའིི་བདེ་སྡུག་དང་སེམས་ཁམས་ལ་ལྟ་རྟོག་ནན་མོ་བྱས་ཏེ་སློབ་མ་ཡོངས་ལ་ཕྱོགས་རིས་མེད་པའི་ངང་ནས་གཅེས་སྐྱོང་གནང་རྒྱུ་དེ་ཡིན། སློབ་མ་རྣམས་ལ་སློབ་སྦྱོང་གི་སྤྲོ་བ་རྒྱས་སུ་བཅུག་སྟེ་བསླབས་འབྲས་ཀྱང་སྨིན་ཐག་ཆོད་པ་ཞིག་ལ་གཞོལ་ངེས།
དགེ་རྒན་གྱི་ལས་གནས་ནི་ཆེས་གཟི་བརྗིད་ལྡན་པ་ཞིག་ཡིན་པས་ལས་གནས་འདིར་རེག་ཐུབ་རྒྱུ་ལས་སླ་མོ་ཞིག་མིན་པས་ངས་གཉིད་ཆག་ཟས་བརྗེད་དང་ཉིན་མཚན་དབྱེར་མེད་དུ་སློབ་སྦྱོང་བྱས་ཏེ་དགེ་རྒན་དམ་པ་དག་གི་གསུང་གི་བདུད་རྩིའི་ཐིགས་པ་རེ་རེ་བསགས་ནས་འབྱུང་འགྱུར་རང་རྒྱུད་ལ་ཡོན་ཏན་གྱིས་ཕྱུག་པར་བྱས་ཤིང་།མཐར་རིག་པའི་དཔའ་པོ་ཞིག་ཏུ་འགྱུར་བར་སྟ་གོན་ལེགས་པོ་བྱས་རྗེས་དགེ་རྒན་གྱི་ལས་གནས་ལ་སྲོག་བསྡོས་ཀྱིས་འཇུག་ངེས་ཡིན། བདག་གི་བསམ་པར་གལ་ཏེ་མི་ཞིག་ལ་གྲུབ་འབྲས་ཤིག་ཐོབ་དགོས་ན། ལམ་དུ་ཕམ་ཁ་ཅི་བྱུང་ཡང་ཁྱད་བསད་བྱེད་དགོས་པ་མ་ཟད། རང་ཉིད་ལས་རིགས་གང་ལ་དགའ་ན་འཕྲད་སྲིད་པའི་དཀའ་ངལ་དག་ལས་རྣམ་པར་རྒྱལ་ཐུབ་པའི་སྙིང་སྟོབས་ཤིག་ལྡན་དགོས་པའང་རྟོགས་བྱུང་། ས་པཎ་མཆོག་གིས་ཀྱང་“མི་ལ་བརྩོན་འགྲུས་ལྡན་གྱུར་ན། །མི་འགྲུབ་བྱ་བ་ཅི་ཡང་མེད། །”ཅེས་པ་ལྟར་ངས་དགེ་རྒན་གྱི་ལས་གནས་ལ་རེག་པའི་གོ་སྐབས་དམ་འཛིན་བྱས་ཏེ་ཅིས་ཀྱང་ལེགས་འགྲུབ་འབྱུང་བར་བརྩོན་པའི་རྒྱུན་མི་ལྷོད་པའི་དམ་བཅའ་སྙིང་ལ་རྡོ་བརྐོས་རི་མོ་ལྟར་གསུབ་ཐབས་མེད།
དེ་བས་ཕུགས་བསམ་ནི་བསྒུགས་ནས་མངོན་འགྱུར་ཡོང་བ་ཞིག་གཏན་ནས་མ་ཡིན་པས་ངས་དུས་ད་ལྟ་ནས་འགོ་བརྩམས་ཏེ། ང་རང་དགེ་རྒན་བྱེད་འདོད་ཀྱི་ཕུགས་བསམ་དེ་མངོན་གྱུར་ཡོང་ཆེད་ལམ་དུ་ཕམ་ཉེས་ཅི་བྱུང་ཡང་དཔའ་མི་ཞུམ་པར་ཤེས་བྱའི་ནམ་མཁའ་ཡངས་པོར་བརྩོན་འགྲུས་ཀྱི་གཤོག་རྩལ་ལ་བརྟེན་ནས་ཕུགས་བསམ་དེ་མངོན་འགྱུར་ཡོང་བར་བརྩོན་པའི་གོམ་པ་མི་ལྷོད་དོ། །
སྤེལ་དུས། : 2022-04-01
ལང་ཚོའི་གཟི་དཔལ།

ཅི་ཞིག་འབྲི་འདོད་ཀྱི་འདུན་པས་ཀུན་ནས་བསླངས་ཏེ་ལྕགས་སྨྱུག་ཕྲ་མོ་ལག་ཏུ་འཛིན་དུས། བདག་གིས་སྔར་བཞིན་ཡུན་ཐུང་གི་མི་ཚེ་འདིར་བསམ་གཞིག་ཐེངས་ཤིག་མི་བྱེད་ཀ་མེད་བྱུང་། གཞོན་དུས་ནི་དབྱར་ཁར་སྤང་དུ་བཞད་པའི་མཛེས་སྡུག་གི་མེ་ཏོག་དེ་ཡིན་ལ། སྦྲང་ཆར་ཟམ་ཟིམ་རྗེས་ཀྱི་ཡིད་དུ་འོང་བའི་འཇའ་ཚོན་དེའང་ཅི་ལ་མིན།
ང་ཚོའི་ན་ཚོད་འདིར་བཤེས་གཉེན་བཟང་བོར་སྒོ་གསུམ་གྱིས་དད་གུས་དང་སློབ་གྲོགས་ཕན་ཚུན་བར་ལ་མཐུན་སྒྲིལ་བྱེད་དགོས་ཤིང་། ཕ་མའི་རྔུལ་ཁྲག་ལས་ཐོན་པའི་རྒྱུ་ནོར་གྲོན་ཆུང་དང་རིན་ཐང་རྟོགས་པར་བྱེད་དགོས།
ང་ཚོའི་ལང་ཚོ་འདིར་མདུན་སྐྱོད་ཀྱི་ལམ་དུ་དོན་སྙིང་ལྡན་པའི་གོམ་པ་སྤོ་བ་ནི་རྒྱ་མཚོར་འཇུག་པའི་གྲུ་གཟིངས་དང་འདྲའོ། །ང་ཚོའི་ལང་ཚོ་འདིར་ཕ་མའི་དྲིན་ལན་ཡང་རྒྱང་དུ་གཡུགས་ཏེ་ཕ་མའི་ལག་ནས་ཤོག་སྒོར་འགའ་རེ་སློང་ཅི་ཐུབ་བམ་བརྐུ་ཅི་ཐབས་བྱེད་པ་དང་། ཆང་ཁང་། ཇ་ཁང་། དྲ་ཁང་སོགས་ཀྱི་ནང་དུ་སོང་ནས་དྲ་རྒྱའི་རྩེད་མོའི་རིགས་ལ་སེམས་གཡེང་བའི་ལས་སོགས་རྩ་བ་ནས་དོར་དགོས་པ་ནི་མིག་མཐོང་ལག་ཟིན་གྱི་དོན་དག་ཅིག་ཡིན་པ་སྨོས་མ་དགོས་ལ། ང་ཚོའི་ལང་ཚོ་འདིར་ཤེས་རིག་གི་ས་བོན་དེ་རང་སྟེང་དུ་ལེན་ཅི་ཐུབ་བྱས་ཏེ། མི་ཚེ་དོན་སྙིང་ལྡན་པར་གཞོལ་ཅི་ཐུབ་བྱེད་དགོས།
ང་ཚོའི་གསེར་ལས་ལྷག་པའི་ལང་ཚོ་འདིར་རིག་གནས་ཀུན་ལ་སྦྱང་བ་བྱས་ཏེ་མཁས་མཛངས་ལྡན་པའི་མི་ཞིག་ཏུ་འགྱུར་རྗེས་སྤྱི་ཚོགས་སུ་བྱས་རྗེས་གྱ་ནོམ་པ་ཞིག་འཇོག་པར་རེམ་དགོས། ང་ཚོའི་ལང་ཚོ་འདིར་སྤྱི་ཚོགས་ལ་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་བྱུང་དུ་བཅུག་སྟེ་འཕེལ་རྒྱས་ཀྱི་རྩེ་མོར་སྙེག་པའི་གོམ་ཁ་ལྷོད་མི་རུང་། ང་ཚོའི་ལང་ཚོ་འདིར་ཤི་གསོན་ཆགས་འཇིག་གི་ལས་གང་ལ་འཕྲད་ཀྱང་སྙིང་སྟོབས་མི་ཉམས་ཤིང་དཔའ་མི་ཞུམ་པར་དཀའ་ངལ་དེར་གདོང་གཏད་དེ་དཀའ་ངལ་ལས་རྣམ་པར་རྒྱལ་བའི་ཐབས་ཤེས་ཟུང་ལ་བརྟེན་ནས་འོད་སྟོང་འབར་བའི་ལམ་ཆེན་སྟེང་དུ་ཅིས་ཀྱང་གོམ་ཁ་བསྒྱུར་ནས་མི་བུ་རེ་རེ་ཡི་འབྱུང་འགྱུར་གྱི་ཕུགས་བསམ་དེ་མངོན་འགྱུར་འབྱུང་བར་རེམ་དགོས།
ང་ཚོའི་ལང་ཚོ་འདི་ནི་མི་རིགས་ཀྱི་ཆེས་རིན་ཐང་ཆེ་བའི་གསེར་ཟངས་ཀྱི་དུས་ཚོད་དང་ཀུན་ནས་མཚུངས་པས། དུས་ཚོད་ཀྱིས་མི་ལ་མི་སྒུག་པར་མདུན་ནས་མདུན་དུ་བཞུར་འགྲོ་བ་དེ་ནི་མཛེས་སྡུག་གི་ལང་ཚོས་ཀྱང་ང་ཚོར་མི་སྒུག་པར་མདུན་བསྐྱོད་བྱེད་པ་དང་ཀུན་ནས་མཚུངས་པས། ང་ཚོས་ལང་ཚོ་འདི་གང་འདོད་ལྟར་ཆུད་ཟོས་དང་འཕྲོ་བརླག་བྱེད་མི་རུང་། ང་ཚོའི་ལང་ཚོ་འདིར་ཉིན་མཚན་དབྱེར་མེད་དུ་རིག་གནས་སྦྱང་བར་སྲོག་བསྡོས་ཀྱིས་གཞོལ་ཏེ་འབྱུང་འགྱུར་སྤྱི་ཚོགས་སུ་རང་གཞན་ཀུན་ཕན་གྱི་ཤེས་ལྡན་མི་སྣ་འཇོན་ཐང་ཅན་དུ་འགྱུར་བར་སྟ་གོན་ལེགས་པོ་བྱེད་པ་ནི་ང་ཚོའི་ལང་ཚོ་འདིར་སྒྲུབ་འོས་པའི་དོན་གལ་ཆེན་ཡིན་པ་སྨོས་མ་དགོས་སོ། །
དེ་བས་སྔོན་བྱོན་མཁས་པ་ཚོས་ཀྱང་“སློབ་པའི་སྡུག་བསྔལ་སྐད་ཅིག་ཙམ། །མ་བསླབ་སྡུག་བསྔལ་མི་ཚེ་གཅིག །”ཅེས་པ་ལྟར་ང་ཚོའི་ལང་ཚོ་འདིར་སློབ་སྦྱོང་བྱེད་པའི་སྐད་ཅིག་གི་སྡུག་བསྔལ་ལ་མི་སྐྲག་ཅིང་དཔའ་མི་ཞུམ་ལ་དེ་ལས་ལྡོག་སྟེ་སློབ་སྦྱོང་ལ་སྤྲོ་སེམས་ཀྱི་སྒོ་ནས་འཇུག་པར་བྱས་ཏེ་འབྲས་ལེགས་སྨིན་པར་འབད་དགོས་ཏེ། མི་ཚེ་དོན་ལྡན་འབྱུང་བར་རིག་པའི་གནས་ལ་འབད་དགོས་པ་ནི་མིག་མཐོང་ལག་ཟིན་གྱི་དོན་ཡིན་ལ། ང་ཚོའི་ལང་ཚོ་འདིར་རིག་གནས་ལེགས་པོ་ཞིག་སྦྱང་ན་མཁས་མཛངས་ལྡན་པའི་མི་སྣ་གྲགས་ཅན་དུ་འགྱུར་སྲིད་ལ་འབྱུང་འགྱུར་མི་རེ་རེ་ཡི་ཕུགས་བསམ་མངོན་འགྱུར་བྱ་ཐུབ་རྒྱུ་ནི་གདོན་མི་ཟའོ། །
སྤེལ་དུས། : 2022-04-01
དགེ་རྒན་སྐུ་དྲིན་ཅན།

དུས་ཚོད་ནི་སུན་སྣང་ཆེ་སྐབས་དལ་དྲགས་པར་སྣང་ནའང་། ལོ་དང་ཟླ་བའི་ཧྲག་བར་ནས་མི་ལོ་བཅུའི་དུས་ཡུན་ནི་འཇའ་ཚོན་བཞིན་ཡལ་ཚར། མི་ལོ་བཅུའི་ཡར་སྔོན་དུ་ང་རང་དམའ་འབྲིང་འགྲིམ་བཞིན་པའི་སློབ་མ་ཞིག་ཡིན། དེ་དུས་སློབ་གྲྭའི་འཚོ་བ་ནི་སུན་སྣང་ལྡན་པ་དང་རང་དབང་ལས་མ་འགོང་པ་ཞིག་ཡིན་ཡང་། ད་ཆར་བསམ་ན་སྐབས་དེ་ནི་ཆེས་སྐྱིད་སྣང་ཆེ་བ་དང་སྡུག་སྣང་ཉུང་བའི་དུས་ཚོད་ཅིག་ཡིན་པར་སེམས།
དམའ་འབྲིང་གི་ལོ་ངོ་གསུམ་གྱི་དུས་ཚོད་ནི་ང་ལ་མཚོན་ན་སློབ་ལ་སྦྱངས་བརྩོན་ཆེས་ཆེར་བྱས་པའི་དུས་སྐབས་ཡིན། དེ་དུས་ང་ནི་དགེ་རྒན་ཁོང་གི་སྐུལ་འདེད་དང་སློབ་གསོའི་ངོགས་ནས་ནར་སོན་སྐད། བསམ་བློ་དང་སློབ་སྦྱོང་། ཀུན་སྤྱོད་དང་མི་གཤིས་སོགས་ལ་འགྱུར་བ་ཆེན་པོ་ཞིག་བྱུང་།
དགེ་རྒན་ཁོང་ནི་ང་ཚོའི་འཛིན་གྲྭའི་སྐད་ཡིག་དགེ་རྒན་ཡིན། ངའི་བག་ཆགས་ཀྱི་ཆེས་ཟབ་ས་ན་འབོར་ཐབས་མེད་པ་ནི་ཁོ་རང་ཐོག་དང་པོར་མཐོང་དུས་རེད། སྐབས་དེར་ང་དམའ་འབྲིང་དུ་ཞུགས་མ་ཐག་ཡིན། ཐེངས་སྔོན་མའི་འབྲིང་རྒྱུགས་ཁྲོད་ཁུལ་ཡོངས་ཀྱི་རྒྱུགས་འབྲས་འབུར་དུ་ཐོན་པའི་དགེ་རྒན་དག་ལ་བྱ་དགའ་གནངས་བའི་ཚོགས་འདུ་ཞིག་གི་སྟེང་སློབ་གཙོས་དགེ་རྒན་ཁོང་གི་མཚན་ནས་བོས་ཏེ། “ཁུལ་ཡོངས་ཀྱི་སྐད་ཡིག་གི་ཨང་དང་པོ་རེད”ཅེས་པར་མི་ཚོགས་ཀྱི་ཐལ་མོའི་རྡེབ་སྒྲའི་ཁྲོད་ཤེལ་མིག་ནག་པོ་བརྒྱབ་པའི་ཕོ་སྐྱེས་ཤིག་གར་སྟེགས་སྟེང་དུ་སོང་ནས་བྱ་དགའ་ལེན་པའི་རྣམ་པ་རེད། མ་ཟད་འཛིན་གྲྭར་སློབ་ཁྲིད་རེའུ་མིག་ཅིག་ཐོན་པ་དང་དེའི་སྟེང་དུ་ཁོང་ནི་ང་ཚོའི་སྐད་ཡིག་དགེ་རྒན་ཡིན་པ་མཐོང་མ་ཐག སློབ་གྲོགས་དག་གིས་སྐད་ཡིག་དགེ་རྒན་དེ་བཙན་པོ་ཞེ་དྲག་འདུག་ཅེས་འུད་སྒྲོགས་མང་དུ་བྱེད། ཆེས་ཐོག་མའི་སྐད་ཡིག་སློབ་ཐུན་དེར་ཁོག་གིས་ང་ཚོ་ལ་སློབ་ཁྲིད་མ་བྱས་པར་ཁོ་རང་ཉིད་ངོ་སྤྲོད་དང་ལོ་དུ་མའི་སློབ་ཁྲིད་ཀྱི་ཉམས་མྱོང་། སློབ་ཁྲིད་སྐབས་ཀྱི་སྒྲིག་ལམ་སོགས་དང་། དེ་མིན་ཁོང་ནི”ཁྲོས་ན་རྟ་མགྲིན་དམར་པོ་དང་། མ་ཁྲོས་ཐུགས་རྗེ་ཆེན་པོ་ཡིན”ཞེས་གཏམ་དཔེ་ཞིག་བཞག་པ་དེ་ཡང་ཡིད་ངོགས་སུ་ད་རུང་མ་བསུབས་མ་ནོགས་པར་གནས།
ཁོང་གིས་བཤད་ན་ཁོ་རང་བྱ་བའི་ལས་རྐང་དུ་ཞུགས་ནས་ལོ་བརྒྱད་ལྷག་འདས་ཟིན། ལོ་བདུན་གྱི་ཡུན་དུ་དམའ་གསུམ་རྐྱང་རྐྱང་བསྐྱངས་བ་ཡིན། ཡིན་ཡང་ད་ཐེངས་སློབ་གྲྭས་དམའ་གཅིག་རིམ་པའི་དགེ་རྒན་དུ་ལས་བགོས་བྱས་པས། ད་ནས་བཟུང་ཁྱོད་ཚོའི་སློབ་སྦྱོང་གི་དུས་ཚོད་དམ་དུ་འཛིན་འཆར་ཡིན་ཟེར། ཁོང་གིས་སློབ་ཁྲིད་ལ་འཆར་གཞི་འཐུས་ཚང་ཞིག་བཟོས་བར་མ་ཟད། སློབ་ཁྲིད་སྐབས་སུ་ཁོ་རང་གི་འཚོ་བའི་ཉམས་མྱོང་རྟག་ཏུ་གླེང་བར་བྱེད། དུས་རྒྱུན་དུ་ཁྱོད་ཅག་སློབ་ཁྲིད་སྐབས་སྤྲོ་བ་འཕེལ་དུ་འཇུག་རྒྱུ་ནི་གལ་འགངས་རབ་ཏུ་ཆེ། ཁྲིད་སྟེགས་གར་སྟེགས་དང་། དགེ་རྒན་འཁྲབ་སྟོན་པ། སློབ་མ་དག་ལྟ་མཁན་ལྟ་བུ་ཡོང་དགོས་ཟེར། ངོ་མ་དེ་ལྟ་ཡིན་ཏེ། ཁོང་ལ་གསལ་དག་སྙན་གསུམ་གྱི་སྨྲ་ལྕེ་ཡོད་ཁར་ལག་པས་ཕྱག་རྒྱ་དེས་ངེད་ཅག་སློབ་མ་ཚོའི་སེམས་ལ་སྤྲོ་བ་ཆེན་པོ་ཞིག་ངང་གིས་འཚངས་པར་བྱེད། དེ་བས་སྐད་ཡིག་སློབ་ཁྲིད་ལ་རེ་ཞིང་སྒུག་དགོས་པ་ཞིག་དང་། སྐད་ཡིག་སློབ་ཁྲིད་ཀྱི་དུས་ཚོད་རྟ་རྒོད་ལ་གཤོག་པ་ཐོགས་པ་ལྟར་ཤིན་ཏུ་མགྱོགས་སྣང་སྐྱེ་བར་མ་ཟད་ཁོང་གི་སློབ་ཁྲིད་དག་ནི་རྒྱ་གར་གྱི་གློག་བརྙན་ལས་ཀྱང་ཡིད་དབང་རབ་ཏུ་འཕྲོག་སྣང་སྐྱེ།
དག་ཡིག་དང་སུམ་ཅུ་པ། སྙན་ངག་དང་བསྡུས་གྲྭ་སོགས་དམའ་འབྲིང་གི་ཤེས་བྱ་རྣམས་བུམ་པ་གང་བྱོའི་ཚུལ་གྱིས་ང་ཚོའི་ཤ་གསེང་རུས་གསེང་ལ་བཞག་པར་མ་ཟད། མཐོ་འབྲིང་གི་ཤེས་བྱ་སྟེ་རྟགས་འཇུག་གི་དུས་གསུམ་སོགས་ཀྱང་ང་ཚོར་ཁ་གསལ་སྨྲ་དག་གིས་ཁྲིད་པར་བྱེད། དེ་མིན་ང་ཚོས་ཟིན་བྲིས་འདེབས་སྐབས་ཁོང་གིས་བཏོན་ཏེ་ང་ཚོས་འབྲི་བ་ལས་ཁོང་གིས་སྒོ་སམ་སྟེང་དུ་མི་འབྲི། དེའི་རྗེས་སུ་མི་རེ་རེའི་ཟིན་བྲིས་བཏབ་པར་ཞིབ་ཏུ་བལྟས་ནས་ཡིག་ནོར་བཅའ། དེ་ལྟར་བྱས་ན་སློབ་མ་ཚོའི་ཡི་གེའི་དག་ཆར་ཕན་པ་ཆེན་པོ་ཡོང་ཟེར།
དེ་མིན་སློབ་ཁྲིད་དང་འབྲེལ་ཏེ་ཁོང་གིས་ང་ཚོ་ལ་བོད་ཀྱི་ལོ་རྒྱུས་དང་། མེས་པོའི་བཀའ་དྲིན། བོད་ཀྱི་དམངས་སྲོལ། འཇིག་རྟེན་མི་ཆོས། དེང་གི་སྲིད་ཇུས། སྐབས་སྐབས་ཀྱི་གསར་འགྱུར་སོགས་ནམ་ནམ་ཞར་ཞར་དུ་འཆད། དེ་ལས་ང་ལ་བག་ཆགས་ཆེས་ཟབ་པ་ནི་སྐབས་ཤིག་ཏུ་ཁོང་གིས་ང་ཚོ་ལ་རྒྱལ་ཕྱིའི་གསར་འགྱུར་ཅིག་བཤད་པ་དེ་རེད། “མ་ལེ་ཞི་ཡ་རྒྱབ་ཁབ་ཀྱི་གནམ་གྲུ་ཞིག་སར་ལྷུང་ནས་མི་མང་པོ་བསད་འདུག་པས། ད་སྐབས་ཚང་མས་གནམ་གྲུ་དེ་བཙལ་བཞིན་པའི་སྒང་རེད”ཟེར། ང་ཚོས་དུས་གཅིག་ཏུ”དགེ་རྒན། དེ་ནས་གནམ་གྲུ་དེ་རྙེད་ཡོད་དམ”ཞེས་པར། “ད་དུང་རྙེད་མ་བྱུང་། གལ་སྲིད་རྙེད་པའི་གསར་འགྱུར་ཐོས་ཚེ་ཁྱོད་ཚོར་བཤད་ངེས་ཡིན”ཟེར།
ཕྱི་ཉིན་སྐད་ཡིག་སློབ་ཁྲིད་སྐབས་དགེ་རྒན་ཁོང་སློབ་ཁང་དུ་འཛུལ་མ་ཐག་ང་ཚོས་མགྲིན་གཅིག་ཏུ”དགེ་རྒན། མ་ལེ་ཞི་ཡའི་གནམ་གྲུ་རྙེད་བྱུང་ངམ”ཞེས་པར། ཁོང་གིས”རྙེད་མ་བྱུང་། རྙེད་མ་བྱུང”ཞེས་ཐེངས་གཉིས་ལ་འཕྲོ་རིམ་འཕྲོར་བཤད། ཉིན་དེ་དག་ཏུ་ངེད་འཛིན་གྲྭའི་སློབ་གྲོགས་དག་གི་གླེང་གཞིའི་ཁྲོད་དུ་མ་ལེ་ཞི་ཡའི་གནམ་གྲུ་གང་དུ་ལྷུང་སོང་བ་ཡིན་ནམ། ཕྱིའི་རྒྱ་མཚོའི་ནང་དུ་ལྷུང་སོང་ངམ། ཞེས་སློབ་ཁང་གི་གྱང་ལྡེབས་སུ་བཀལ་བའི་འཛམ་གླིང་ས་བཀྲའི་སྟེང་དུ་མཛུབ་མོས་འདེད། ངས་ནི་སྐབས་དེར”མ་ལེ་ཞི་ཡ”ཞེས་པའི་རྒྱབ་ཁབ་ཐོག་མར་ཐོས་པ་ཡིན་ལ། སློབ་གྲོགས་གཞན་པ་དག་ཀྱང་ཕལ་ཆེར་དེ་ལས་མ་འདས་པ་འདྲ། རྗེས་ཀྱི་འཚོ་བའི་ནང་ནས”མ་ལེ་ཞི་ཡ”ཞེས་པ་ཐོས་མ་ཐག་སྐབས་དེའི་རྣམ་པ་དྲན་པ་དང་། ས་བཀྲའི་ངོས་ཀྱི་མ་ལེ་ཞི་ཡ་རྒྱལ་ཁབ་ཀྱི་ཆགས་དབྱིབས་དེ་ཡང་མིག་ལམ་དུ་ཡང་ཡང་འཆར།
དེ་ལྟར་དམའ་གཅིག་དང་དམའ་གཉིས་རིམ་པའི་ལོ་ཟླ་དག་ཅི་བྱུང་འདི་བྱུང་མ་ཤེས་པར་འདས་སོང་དུ་གྱུར་བ་དང་། དམའ་གསུམ་དུ་སླེབས་མ་ཐག་ཁོང་གིས་ལོ་གཅིག་གི་ཡུན་དུ་ནམ་གུང་གི་ཆུ་ཚོད་ལྔའི་སྔོན་ལ་སླེབས་ནས་བློ་སྐྱོར་དང་རང་སྦྱོང་བྱེད་དགོས་པ་མ་ཟད། ཁོང་གིས་ཀྱང་མཇུག་མཐའི་ལོ་གཅིག་གི་དུས་ཡུན་ནང་དུས་ལྟར་ཆག་པ་མེད་པར་སླེབས་ཐུབ་པར་དམ་བཅའ་བྲག་འདྲ་བ་བཞག རྗེས་སུ་སློབ་གྲོགས་འགའ་རེ་དུས་ལྟར་མ་སླེབས་པའི་གནས་ཚུལ་ཡོད་ནའང་། ཁོང་ནི་ཉིན་གྲངས་སུམ་བརྒྱ་དྲུག་ཅུའི་ནང་གི་ཉིན་གཅིག་ལའང་མ་འགྱངས་མ་འཕྱི་པར་ང་ཚོའི་སློབ་སྦྱོང་ལ་མཐུན་རྐྱེན་མང་དུ་བསྒྲུབ་མྱོང་།
མི་ལོ་གསུམ་རྒྱབ་ཏུ་བསྐྱུར་ནས་སྐད་ཡིག་གི་ཆེས་མཇུག་མཐའི་སློབ་ཐུན་དེར་ཁོང་གིས་ང་ཚོ་མི་རེ་རེའི་སྟེང་གི་དགེ་སྐྱོན་སོགས་བཤད་ཅིང་། བཟང་བ་རྒྱུན་སྐྱོང་རྒྱུ་དང་ངན་པ་བཅའ་དགོས་ཚུལ་ནན་གྱིས་བཤད། སྐབས་རེར་ཁོང་གིས་ང་ཚོ་བློས་གཏོང་མི་ཐུབ་པའི་རྣམ་འགྱུར་གྱིས་སློབ་གྲོགས་རེ་རེའི་གདོང་ལ་ཞིབ་ཏུ་བལྟས་ཤིང་། ལན་རེར་སྒོ་སམ་ངོས་སུ་ཅེར་ནས་སྨྲ་མེད་ངང་འདུག སློབ་གྲོགས་དག་གིས་ཀྱང་མགོ་བོ་དུད་ནས་མིག་ཆུ་འབྱིད་ཅིང་། ཁུ་སིམ་སིམ་གྱི་སློབ་ཁང་དེར་ཆུ་ཚོད་འཁོར་ལོའི་སྐར་ཆའི་ཐག་སྒྲ་དང་དབུགས་ཀྱི་འབྱིན་རྔུབ་ཕྲན་བུ་ཞིག་ལས་གྲགས་འགུལ་ཅི་ཡང་མི་གདའ། དེ་ཙ་ན་དགེ་རྒན་ཁོང་གིས་ཅི་ཞིག་བཤད་འདོད་ཀྱི་འདུན་པ་སྐྱེས་ཀྱང་མགྲིན་པ་བརྣངས་བྱུང་བས། དུས་གཅིག་ཏུ་མིག་ཆུའི་ཐིགས་པ་ཞིག་འཁུར་མགོ་ནས་ག་ལེར་ས་རུ་ལྷུང་བར་བསྟུན། སློབ་གྲོགས་དག་གིས་ཀྱང་སེམས་ཀྱི་སྐྱོ་བ་མ་ནོན་པར་ངུ་ངག་འབྱིན། སྐབས་དེར་ཕྱི་རོལ་ནས་རླུང་བུ་ཐོལ་གྱིས་ལྡང་ཡོང་ནས་དགེ་རྒན་མདུན་གྱི་དཔེ་དེབ་ཀྱི་ཤོག་ལྷེ་རེ་རེ་ཕར་ཚུར་ལ་བསྐྱོད་པ་དང་། རྣ་བར་གཟན་པའི་སློབ་ཁྲིད་ཀྱི་གྲོལ་བརྡ་དེས་ང་ཚོའི་ཆེས་མཇུག་མཐའི་སློབ་ཁྲིད་དེ་ལ་བཞི་ཤད་བྲིས་པ་དང་ལྷན། དགེ་རྒན་ལགས་བསམ་དབང་དྲན་དབང་མེད་པར་ཕྱི་རུ་བུད་སོང་། ང་ཚོས་མགྲིན་གཅིག་ཏུ”དགེ་རྒན”ཞེས་བོས་པར་དགེ་རྒན་གྱིས་གོམ་མཚམས་རེ་ཞིག་བཞག་ནའང་། དེ་མ་ཐག་ཕྱིར་བལྟས་ཙམ་ཡང་མེད་པར་ང་ཚོ་དང་རིང་དུ་བཞུད།
ལོ་གསུམ་རིང་གི་སྐྱིད་སྡུག་མཉམ་མྱོང་ཁྲོད་དུ་ངེད་ཅག་གི་སེམས་སུ་དགེ་རྒན་ཁོང་ནི་དྲོད་དང་འོད་ཀྱི་ཕུང་པོ་ཉག་ཅིག་སྟེ། ཁོང་ལ་བཅངས་བའི་བརྩེ་སེམས་ནི་ལྷད་དང་བྲལ་བ་ཞིག་ཡིན་ལ། མ་ཟད་ཁོང་གི་རྣམ་དག་དང་ལྷག་བསམ་གྱི་སེམས་པས་ང་ཚོ་ལ་ཡལ་མེད་ཀྱི་རེ་བ་ཆེན་པོ་ཞིག་བཞག་ཡོད་པ་གདོན་མི་ཟ།
ད་ནི་མི་ལོ་བཅུའི་ལོ་ཟླ་མཐའ་དག་འདས་སོང་དུ་གྱུར་ནའང་། དགེ་རྒན་ཁོང་གི་ཐུགས་རྗེ་དང་སྐུ་དྲིན་ངའི་ཤ་རུས་རྐང་གསུམ་དུ་ཐིམ་སོང་བ་ལྟར་བརྗེད་པའི་དུས་ནི་ཕྲན་ཙམ་མི་གདའ། ཁོང་གི་སྐུ་དྲིན་མི་ལོ་བཅུའི་ཆར་རླུང་ཙག་གསུམ་གྱིས་གཞོམ་མ་ནུས་པར་ད་དུང་ལ་ལུང་ཀུན་ཏུ་ཁྱབ་པའི་ང་དང་ངའི་སློབ་གྲོགས་ཚོའི་སེམས་ན་ཉི་མའི་འོད་ལྟར་གསལ། དེ་བས་ཁོང་ནི་ངེད་ཅག་ལ་སྐུ་དྲིན་རབ་ཏུ་ཆེ། བཀའ་དྲིན་ཤིན་ཏུ་མཐོའོ། །

སྤེལ་དུས། : 2022-03-25
སྐྱུག་བྲོ་བའི་ང་།

ཞོགས་པའི་ཉི་གཞོན་མལ་ཁྲིའི་སྟེང་དུ་འཕྲོ་དུས།།
སྐྱུག་བྲོའི་ང་རང་གཉིད་ཀྱི་ལམ་དུ་འཁྱམས་སོང་།།
དྲིན་ཆེན་ཕ་མའི་ཤ་ཚའི་གསེར་གྱི་འབོད་སྒྲ༎
གསལ་ལ་མི་གསལ་ཐོས་འཛིན་ལམ་ལ་གྲགས་ཡོང་།།

ཉིན་གུང་ཁྲི་གདུགས་བཤུལ་གྱི་འཇིངས་སུ་རྒྱུག་དུས།།
སྐྱུག་བྲོའི་ང་རང་གཉིད་ཀྱི་ཞིང་ལ་ཤོར་སོང་༎
བྱིའུ་ཆུང་ཅ་ཅོའི་འཛེར་སྒྲ་དེ་དག་ཐོས་པས།།
ཤི་མ་གསོན་གྱིས་དལ་མོར་མལ་ལས་ལངས་བྱུང་།།

ཕྱི་དྲོར་ཉི་མ་ནུབ་རིའི་ཡུལ་དུ་ལོག་དུས།།
སྐྱུག་བྲོའི་ང་རང་བརྙན་འཕྲིན་ཁོ་ནར་ཧད་སོང་།།
ཁྲ་ཆུང་མིག་ལས་མི་བཟོད་ཆུ་ཐིགས་ཐིགས་ཀྱང་༎
ཤེས་མེད་ཚོར་མེད་དེ་ཡི་ནང་དུ་འཛུལ་ལོ༎

མཚན་མོར་ནམ་ཟླ་འཁྱག་འཁྱག་སིབ་སིབ་བྱེད་དུས།།
སྐྱུག་བྲོའི་ང་རང་གནས་དེར་འདར་འདར་སིག་སིག།
སེམས་སུ་སང་ཉིན་སློབ་གྲྭ་ཚོགས་རྒྱུ་དྲན་རྗེས།།
བྱ་རྒོད་འཕུར་འཕུར་རྒྱུག་ནས་ལས་བྱ་བྲིས་སོང་།།

ཕྱི་ཉིན་ཉི་རྩེ་འཛིན་མའི་གཞི་ལ་འཕྲོ་དུས།།
ཁྲེལ་མེད་ང་རང་གློ་བུར་གཉིད་ལངས་བརྒྱབ་བྱུང་༎
འདས་ཟིན་སྐར་མ་རེ་རེ་འཚོལ་བར་རྒྱུགས་ཀྱང་༎
ཕྱིར་ཡོང་མེད་པས་ཅི་བྱ་གཏོད་མེད་གྱུར་སོང་༎

དེ་ཡང་ཉིན་གུང་ཆུ་ཚོད་བཅུ་གཉིས་སོང་རྗེས༎
སྐྱུག་བྲོའི་ང་རང་ད་གཟོད་སློབ་གྲྭར་འབྱོར་སོང་༎
སྙིང་ཡང་དེ་དང་རིམ་བཞིན་སྟོད་ལ་འཚང་བཞིན༎
བྲེལ་བྲེལ་འཚུབ་འཚུབ་སློབ་ཁང་ཕྱོགས་སུ་རྒྱུག་སོང་། །

སྐྲག་སྐྲག་འདར་འདར་སློབ་ཁང་སྒོ་རུ་སླེབས་ཚེ༎
སྐྱུག་བྲོའི་ང་ལ་ཚོར་བ་ངན་པ་བྱུང་སོང་།།
ལེ་ལོའི་དབང་གིས་ལས་བྱ་ཡོངས་འགྲུབ་མིན་པས༎
འཇིགས་པ་ཆེན་པོ་མགོ་རུ་ཡོང་ངེས་བསམས་བྱུང་༎

སྤོབས་པ་བསྐྱེད་དེ་སྒོ་གླེགས་ངང་གིས་ཕྱེས་ཚེ༎
སློབ་གྲོགས་ཚོ་ཡིས་ལས་བྱ་ཡར་ལ་སྤྲད་དེ༎
རྒན་གྱིས་ཞིབ་བཤེར་ནན་གྱིས་བྱེད་པ་མཐོང་བྱུང་༎
སྐབས་དེའི་ང་རང་འགྲོ་སའི་འགྲོ་ཁུང་མི་འདུག།

སྐྲག་སྐྲག་འཚུབ་འཚུབ་རང་གི་གནས་ལ་བཅར་ནས༎
ཚུལ་དང་མཐུན་པའི་རྫིག་ཉམས་རྫུན་མ་བསྟན་ཏེ༎
བྲེལ་དང་དུལ་བའི་རང་ཚུགས་དོ་མཉམ་ངང་ནས༎
ལས་བྱ་འགྲུབ་ཡོད་བཞིན་དུ་རྒན་ལ་སྤྲད་སོང་༎

རྒན་གྱིས་བལྟས་རྗེས་རང་གི་གམ་ལ་སླེབས་ཏེ༎
ལས་བྱའི་གནས་ཚུལ་ཇི་བཞིན་གསལ་བཤད་གནང་རྗེས༎
ཆད་པ་ལྕི་མོ་རང་གི་སྡུག་གྱོང་ཡིན་ཞེས༎
མི་བཟོད་རྡུང་རྡེག་ལན་ཆགས་སྡུག་བསྔལ་མྱངས་སོང་༎
སྤེལ་དུས། : 2022-03-21

བཀའ་དྲིན་གཞལ་དུ་མེད་པའི་ཨ་མ།

སྐྱེ་བོ་སུ་དང་སུ་ཞིག་ཡིན་རུང་འཇིག་རྟེན་འདིའི་སྟེང་དུ་ཡོང་ཚེ་བཀའ་དྲིན་གཞལ་དུ་མེད་པའི་ཨ་མ་ཞིག་ཡོད། ང་ལའང་རང་ཉིད་ཆེས་འདང་ཆེ་བའི་ཨ་མ་ཞིག་ཡོད།
ངའི་ཨ་མའི་གཟུགས་རིང་རྒྱུ་མེད་ལ་ཐུང་རྒྱུའང་མེད། མཁུར་ཚོས་དམར་བ་དང་།སྣའི་གཟེངས་མཐོ་བ། སྐྲ་ཡི་ལན་བུ་གནག་པ། ལུས་ཀྱི་སྐྱེས་གཟུགས་ཕྲ་བ། ངང་རྒྱུད་འཇམ་ཞིང་སྤྱོད་ལམ་བཟང་བ། ཁྲེལ་དང་ངོ་ཚ་ལྡན་པའི་འབྲོག་མོ་དཀྱུས་མ་ཞིག་ཡིན། མོ་ལ་གསེར་ལས་ལྷག་པའི་ཡོན་ཏན་མེད་ལ། མཛོད་ལ་ཁེངས་པའི་རྒྱུ་ནོར་ཡང་མེད། འོན་ཀྱང་མོས་ང་ཚོའི་ཆེད་དུ་ཡོད་ཚད་བློས་གཏོང་ཐུབ་པ་ཡིན།
ནམ་མཁའ་གཡའ་དག་ཅིང་ས་གཞིའི་རྡུལ་དག་ལ། ཨ་སྔོན་དབྱིངས་སུ་སྤྲིན་བྱིའུ་མགོ་ཙམ་ཡང་མེད་པའི་དབྱར་ཁའི་ཉིན་ཞིག་གི་ཞོགས་པར་ངས་ཨ་མ་ལ་ནོར་འཚོ་རུ་འགྲོ་བའི་རེ་བ་ཞུས། མོས་ང་ལ་ཁྱོད་ཀྱིས་ཆར་གདུགས་འཁྱེར་ནས་སོང་ན་བཟང་ཟེར་ཡང། ངས་ཕྱིར་ཨ་མར་དེ་རིང་གི་ནམ་ཟླ་ནི་ཅི་འདྲའི་བཟང་བ་ལ། ངས་ཆར་གདུགས་མི་འཁྱེར་ཞེས་བཤད་པ་ཡིན། དེ་ནས་ང་མེ་ཏོག་སྣ་བརྒྱ་ཁྲ་ལམ་མེར་བཞད་པའི་རྩྭ་ཐང་སྟེང་དུ་སོང་བ་ན། ནམ་མཁའ་ནི་སྔོ་ཞིང་དྭངས་ལ་ཉི་འོད་ནི་དྲོ་ཞིང་འཇམ། ཕྱུགས་ཟོག་རྣམས་ཀྱང་ཕྱོགས་བཞིར་བཀྲམས་ནས་རྩྭ་ཆུའི་དཔལ་ལ་རོལ་ནས་བསྡད་ཡོད། དེ་ནས་ཅུང་ཙམ་འགོར་རྗེས། འབྲུག་སྒྲ་ལྡི་རི་རི་གྲགས་པ་དང་གློག་དམར་འཁྱུག་པ་ཡིན། ང་སྐྲག་ནས་སྐད་ཆ་གཅིག་ཀྱང་བཤད་མ་ཐུབ། སྐབས་དེར་དྲག་ཆར་བབས་ནས་ངའི་ལུས་ཡོངས་སྦངས་པར་བྱས། ང་རང་འདར་སིག་སིག་ཆར་ནང་དུ་བསྡད་ཡོད་པའི་སྐབས་དེར་རྒྱང་རིང་ན་མི་ཞིག་ངའི་ཕྱོགས་སུ་ཡོང་བ་དང་མཚུངས། ངས་མིག་ཕུར་ཕུར་ཙམ་བྱས་རྗེས་ཡང་བསྐྱར་བལྟས་པ་ན། དེ་ནི་ངའི་དྲིན་ཆེན་མ་ལོ་ཡིན་པ་འདྲ། ང་ངུ་ཞོར་དུ་མོའི་ཕྱོགས་སུ་རྒྱུགས་པ་ན་མོས་ང་རང་པང་ནས་ཁྱིམ་གྱི་ཕྱོགས་སུ་རྒྱུགས་སོང་། སྐབས་དེར་ང་ལ་ཆམ་པ་ཕོག་ནས་ཚའང་རྒྱས་འདུག མ་ཡུམ་བློ་མ་བདེ་བར་སེམས་ཁྲལ་བྱེད་ཅིང་སྐྲག་ནས་སོའང་འདར་བཞིན་ཡོད། དེ་ནས་ཨ་མས་ང་ལ་སྨན་བླུད་ནས་ཚ་བ་དྲག་ཏུ་བཅུག་པ་ཡིན།
ང་རང་སད་ནས་ཐོག་དང་པོར་མཐོང་བ་ནི་ངའི་དྲིན་ཆེན་མ་ལོ་ཡིན། མོ་ཞག་གང་བོར་མ་གཉིད་པར་ང་རང་སྲུང་ནས་བསྡད་པ་རེད། རེད་ཡ་འདི་ནི་ངའི་བཀའ་དྲིན་གཞལ་དུ་མེད་པའི་ཨ་མ་ཡིན། མོས་ང་ཚོར་ལྟོགས་ན་ཟས་དང་སྐོམ་ན་ཆུ་སྟེར་བ་དང་། ད་དུང་ང་ཚོར་ཚ་དུས་བསིལ་དང་གྲང་དུས་དྲོད་ཁོལ་གནང་བཞིན་ཡོད། མོས་ང་ལ་དཀར་གསུམ་མངར་གསུམ་བྱིན་ནས་ལུས་པོ་གསོས་ལ་སྣ་མང་གོས་འཇམ་བསྐོན་ནས་དྲོད་ཁོལ་སྦྱིན། ངའི་ཨ་མས་ང་རང་མུན་ནག་གི་འཇིག་རྟེན་ཞིག་ནས་དཀར་གསལ་གྱི་གོ་ལ་ཞིག་གི་སྟེང་དུ་ཁྲིད་ནས་འོངས།
ཨ་མ་ལགས། ཁྱོད་ཀྱིས་ང་རང་ཟླ་དགུ་ཞག་བཅུར་ཁོག་ཏུ་ཁུར་བ་བཀའ་དྲིན་ཆེ། ངས་ད་ནས་བཟུང་ཁྱོད་ལ་སྲི་ཞུ་དགའ་ཞིག་བསྒྲུབ་རྒྱུ་ཡིན། ནམ་ཞིག་ཁྱོད་ཚོ་རྒས་སོང་དུས། དུང་བུས་ན་རྣ་ཡིས་མི་གོ་དུས། རི་འགུལ་ན་མིག་གིས་མི་རིག་དུས། ཟས་མངར་མོ་ལྕེ་ཡིས་མི་ཚོར་དུས། ཁོ་ཚོས་ཆུང་དུས་ང་ཚོར་གཉོར་སྐྱོང་བྱས་པ་ཇི་བཞིན་ང་ཚོས་ཕ་མ་རྣམས་ལ་དེ་ལྟར་གཉོར་སྐྱོང་བྱེད་དགོས། ང་ཚོས་ཕ་མར་སྲི་ཞུ་བསྒྲུབ་རྒྱུ་ནི་ཀྲུང་ཧྭ་མི་རིགས་ཀྱི་སྲོལ་རྒྱུན་སྤྱོད་བཟང་ཡིན་ནོ། །
ཀྱེ། ཨ་མ་ལགས། ང་ཐོག་དང་པོར་དཀའ་ཁག་ལ་འཕྲད་པའི་དུས་སུ། ཁྱོད་ཀྱི་བྱམས་བརྩེ་དང་འཇམ་བག་གི་ཞལ་རས་ཀྱིས་ང་ལ་སྡུག་རུས་བསྐྱེད་དུ་འཇུག་ཐུབ། མ་ཡུམ་གྱི་བརྩེ་བ་ནི་མིའི་རིགས་ཀྱི་ཆེས་བླ་ན་མེད་པའི་གཟུགས་མེད་ཀྱི་སྟོབས་ཤུགས་དེ་ཡིན་ལ། ངའི་སེམས་ཀྱི་དྭངས་གཙང་གི་གངས་ཆབ་སྔོན་མོ་དང་། ཕྱོགས་རིས་མེད་པར་འཇིག་རྟེན་དྲིན་གྱིས་སྐྱོང་བའི་དྲོད་འཇམ་གྱི་ཉི་མ་དང་། ཉམས་པ་མེད་པའི་མཛེས་སྡུག་གི་མེ་ཏོག་དེ་ཡིན་ནོ། །
འདི་ནི་ངའི་བཀའ་དྲིན་གཞལ་དུ་མེད་པ་དང་། ང་ལ་སྤོབས་པ་བསྐྱེད་དུ་འཇུག་ཐུབ་པའི་དྲིན་ཆེན་མ་ལོ་ཡིན། ཨ་མ་ལགས། མཚམས་འདི་ནས་ངས་ཁྱོད་ལ་གླུ་ཞིག་ལེན་འདོད། སྔ་ལངས་འཕྱི་ཉལ་ཁྱིམ་གྱི་དོན་དུ་ཕུལ། །ལག་ཟས་གཙང་མས་བཟའ་ཚང་འཛུམ་གྱིས་གསོ། །ནུ་ཞོ་ཞིམ་པོས་གཅེས་ཕྲུག་བྱམས་ཀྱིས་བསྐྱངས། །གཡང་ཁྱིམ་དྲོན་མོར་སྐྱིད་ཀྱི་ཉི་མ་ཤར། །
རེད་ཡ། ཨ་མ་ཡོད་པས་ང་ལ་དེ་རིང་དང་དེ་རིང་ལྟ་བུའི་བདེ་ཞིང་སྐྱིད་པའི་ཉི་མ་ཡོད་ལ། མ་འོངས་པའི་ལམ་ཁ་ཡག་པོ་དང་རྨི་ལམ་ཡག་པོ་ཞིག་ཀྱང་ཡོད་དེ། མ་ཡུམ་ནི་བདག་གི་ལམ་སྟོན་གྱི་སྒྲོན་མེ་འདྲེན་པར་བྱེད་པའི་གསེར་གྱི་སྐོང་བུ་དེ་ཡིན། ང་རང་དཀའ་སྡུག་གི་མེ་འོབས་སུ་ལྷུང་ནས་ཅི་བྱ་གཏོལ་མེད་དུ་གྱུར་སྐབས། རོགས་རམ་གྱི་ཕྱག་ཟུང་བསྲིངས་ནས་སྐྱོར་མཁན་དེ་ཡང་ག་ལ་མིན། འཇིག་རྟེན་འདི་ན་ཨ་མ་བཟང་ཟེར་བའི་དཔེ་དེ་བཞིན་ང་རང་ནམ་ཡང་རང་གི་ཨ་མ་ལ་དགའ།
སྤེལ་དུས། : 2022-03-21
ངའི་བློས་ཐུབ་ཀྱི་གྲོགས་པོ།

མི་ཞིག་གི་རྒྱུད་ལ་རིག་གནས་ཡོན་ཏན་ཅུང་ཙམ་འབྱོར་བ་དེ་ནི། ཕ་མ་དང་དགེ་རྒན་གྱི་སྐུ་དྲིན་ཡིན་ཞིང་། ལྷག་པར་དུ་དཔེ་ཆ་བཀླགས་པའི་ཕན་ཡོན་ཡང་ཡིན།
རྒྱའི་རྩོམ་མཁན་གྲགས་ཅན་ཀོར་ཅིས་གསུངས་པ་ལྟར་ན། དཔེ་ཀློག་ཁྲོད་ཀྱི་དཀའ་ངལ་ནི་གནས་སྐབས་ཙམ་ཡིན་ལ། ཤེས་ཡོན་མེད་པའི་སྡུག་བསྔལ་ནི་ཚེ་གང་གི་སྡུག་བསྔལ་ཡིན། དཔེ་ཆ་ཀློག་པ་ནི་མིའི་རིགས་ཡར་རྒྱས་སུ་འགྲོ་བའི་ཐེམ་སྐས་ཡིན། ཞེས་གསུངས་ཡོད། ལོ་ན་ཆུང་དུས་སུ་སྨན་ཆུང་ང་ནི་རྨོ་མོའི་བྱམས་སྐྱོང་འོག་ཏུ་གཉོམ་ལག་རྒྱས་པ་ཞིག་ཡིན་ཞིང་རྒྱུན་དུ་མ་གཉིད་གོང་ལ་རྨོ་མོས་སྒྲུང་གཏམ་གཅིག་རེ་བཤད་དེ་ཚར་ལ་ཁད་ཡོད་དུས་ང་ལ་སྒྲུང་གཏམ་འདིའི་མཇུག་ཁྱོད་སོང་ནས་ཤེས་སུ་བཅུག་ན་ཤིན་ཏུ་བཟང་ཞེས་ཟེར་བས། ང་རང་དེ་ལ་བལྟ་འདོད་ཀྱི་འདུན་པ་ནི་རྟ་ཕོ་གཤོག་ཐོགས་དང་འདྲ་བས་ཧུར་ཐག་གིས་དཔེ་ཆར་བལྟས་པ་ཡིན། དེ་ནས་བཟུང་དཔེ་ཆ་ནི་ངའི་བློས་ཐུབ་ཀྱི་གྲོགས་པོར་གྱུར་བ་ཡིན་པས། རང་གི་ནུས་ཚོད་ཀྱིས་བརྩོན་འགྲུས་ཀྱི་རྟ་ཕོར་ལྕག་གིས་བཞུས་ཏེ། ཤེས་བྱའི་ཐང་ཆེན་དུ་ལ་རིང་བོ་གྲུ་གུ་སྒྲིལ་སྒྲིལ་དང་། ཁིས་ཉག་ཁ་སྒྲོག་གུ་བརྟོལ་བརྟོལ་བྱས་ནས་ཤེས་རིག་གི་ཡང་སྙིང་བཙལ་བ་ཡིན། དཔེ་ཆ་ཀློག་པ་ལས་སྤྲོ་སྣང་སྟེར་ལ། མ་རིག་པའི་མུན་པ་སེལ་བ་དང་འདྲ། རྩོམ་དཔེ་ཡི་ནང་གི་མི་སྣ་གཙོ་བོ་དང་མཉམ་དུ་ཁ་བརྡ་བྱས་པ་དང་གཉིས་སུ་མེད།
བོད་ཀྱི་མཁས་པ་གྲགས་ཅན་མི་ལ་རས་པ་དང་རྗེ་ཙོང་ཁ་བ་སོགས་ཀྱིས་ཀྱང་དཔེ་ཆ་གྲོགས་སུ་བཟུང་སྟེ་དཀའ་སྤྱད་འབད་བརྩོན་གྱིས་རིག་པའི་གནས་ལྔ་ལ་སྦྱོང་བ་དཔྱིས་ཕྱིན་པ་བྱས་པས་ད་གཟོད་མཚན་སྙན་གྲགས་འཛམ་གླིང་ཡོངས་ལ་ཁྱབ། ཀུན་གཟིགས་པཎ་ཆེན་ཐམས་ཅད་མཁྱེན་པས་དཔེ་ཆར་བལྟ་བ་ནི་རླབས་ཆེན་གྱི་བསམ་བློ་བ་རྣམས་ལ་ཁ་བརྡ་བྱེད་པ་དང་མཚུངས་ལ། དཔེ་ཆ་དོར་བ་ནི་ཤེས་ཡོན་དོར་བ་ཁོ་ནའོ། །ཞེས་གསུངས་ཡོད་པས། དཔེ་དེབ་ནི་ང་ལ་མཚོན་ན་ནམ་རྒྱུན་རེ་སྙེག་བྱེད་ཀྱིན་པའི་ལྷད་མེད་དག་གཙང་གི་གྲོགས་པོ་དེ་ཡིན། དཔེ་དེབ་ཀྱིས་ང་ལ་བློ་རིག་བསྩལ་ཞིང་། ངས་མི་ཤེས་པའི་དྲི་གཞི་མང་པོ་ཞིག་ལ་ལན་འདེབས་ངེས། དཔེ་དེབ་ཀྱིས་བྱིན་པའི་ཤེས་ཡོན་དང་བློ་རིག བཤེས་གཉེན་དམ་པས་གནང་བའི་བསླབ་བྱ་དང་། ཀ་ཁ་ག་ངའི་དབྱངས་རྟ་སོགས་ཇི་སྐད་དུ།
ནོར་རིན་ཆེན་ལྟ་བུའི་ཤེས་ཡོན་དེ།།
རྒྱུ་ལོངས་སྤྱོད་གཞན་དང་གཏན་མི་འདྲ།།
མི་ཆོམ་པོས་འཇབ་ནས་རྐུ་མི་ཐུབ།།
མི་བཙན་པོའི་དབང་གིས་འཕྲོག་མི་ཐུབ།།
མཐོ་ལ་མགོར་འགྲོ་དུས་འཁུར་མི་དགོས།།
དམའ་ཤུར་ལ་འབབ་དུས་འདྲུད་མི་དགོས།།
རང་གང་ཐོན་ས་ལ་རྗེས་སུ་འབྲངས།།
ཅེས་གསུང་པ་བཞིན་ས་ཕྱོགས་གང་དུ་འདུས་སྡོད་བྱས་རུང་། རིག་གནས་ཤེས་བྱ་ནི་རྐུན་མ་དང་ཇག་པ་ཡིས་འཕྲོག་མི་ཐུབ་སྟེ། རང་ཉིད་གཅིག་པར་དབང་བ་ཡིན།
དཔེ་དེབ་ལགས། ཁྱེད་ལ་གཞན་ཕན་གྱི་སེམས་གཤིས་མངའ་ཞིང་། ཁྱེད་ལ་སྔར་མེད་ཀྱི་མིག་རྒྱང་ལྡན། ཁྱེད་ཀྱིས་ང་ཚོར་ཤེས་རིག་གི་སྦྲང་ཆར་བསྩལ་ལ། ང་ཚོ་ཤེས་བྱ་ཡི་བང་མཛོད་དུ་ཁྲིད། ཁྱེད་ནི་མི་བུ་ཞིག་གི་མུན་སེལ་སྒྲོན་མེ་ཡིན་ལ། མི་རབས་ཤིག་གི་ལོ་རྒྱུས་གསལ་ལེར་འཆར་བའི་སྤྱན་མིག་དེ་ཡང་ཡིན།
དཔེ་དེབ་ལགས། ཁྱེད་ནི་གསེར་འོད་ལམ་ལམ་དུ་འཕྲོ་བའི་ཁྲི་གདུགས་ཉི་མ་ཡིན། ཁྱེད་ཀྱིས་གནང་བ་ནི་རིན་ཐང་བྲལ་བའི་ལེགས་སྐྱེས་ཏེ་ཤེས་རིག་གི་ས་བོན་དེ་ཡིན། ང་ནི་མུན་ནག་གི་གྲོང་ན་རྒྱུ་བ་ཇི་བཞིན་གོ་ལ་ཟླུམ་པོའི་ཆགས་དབྱིབས་ཙམ་ཡང་མི་ཤེས་པའི་བླུན་རྨོངས་ཚོའི་གྲལ་གྱི་གཅིག་ཡིན་པ་ཐེ་ཚོམ་མེད། དཔེ་ཆ་ཀློག་པ་ནི་ཧ་ཅང་ངོ་མཚར་བའི་བྱ་རིམ་ཞིག་སྟེ། གཞན་གྱི་བློ་གྲོས་དང་ཤེས་ཡོན་དེ་རང་གི་དབང་བོར་བརྟེན་ནས་བསྡུ་ལེན་བྱེད་ཅིང་། དེ་ནས་ཚོར་བའི་སྒོ་མོ་བརྒྱུད་ཅིང་། བསམ་ཡན་གྱི་གཤོག་པ་བརྐྱངས་ཏེ་སེམས་ཀྱི་གཏིང་རིམ་ལ་འཛུལ་ནས་རང་སེམས་ཀྱི་མཚོ་མོ་སྐྱོམ་པར་བྱེད།
སློབ་ཆུང་གི་སྐབས་སུ་རང་ཉིད་དཔེ་ཆ་ལ་དགའ་བ་དང་ཞེན་པ་དེ་འདྲ་མེད་པས་དཔེ་ཆ་མང་པོ་ཞིག་ལ་མ་བལྟས་པ་ཡིན། འོན་ཀྱང་དམའ་འབྲིང་གི་ཐེམ་སྐས་ལ་ཞུགས་པ་ནས་བཟུང་དཔེ་ཆ་ནམ་ཡིན་ཡང་རང་གི་གྲོགས་སུ་བསྟེན་དགོས་པ་ཚོར་བས་ད་གཟོད་དཔེ་ཆ་ལ་གཅེས་སྤྲས་ལེགས་པོ་བྱས་པས་མི་ཆོག་པར་ནན་ནན་ཏིག་ཏིག་གིས་དཔེ་ཆར་བལྟ་རྒྱུ་ཧ་ཅང་གལ་ཆེ་བ་ཤེས། དམའ་འབྲིང་དུ་ཞུགས་ཏེ་ད་གཟོད་དཔེ་ཆའི་རིན་ཐང་དང་དཔེ་ཆར་བལྟས་པའི་ཕན་ཡོན་ཤེས། «མི་རོ་རྩེ་སྒྲུང» «དཔལ་དོན་གྲུབ་རྒྱལ་གྱི་བརྩམས་སྒྲུང་ཕྱོགས་བསྒྲིགས» «ལང་ཚོའི་འགྱུར་ཁུགས» «བོད་ཀྱི་གཅེས་ཕྲུག» «སྤྲིན་གྱི་རྫི་བོ» «གུང་གསེང་གི་དཔེ་ཀློག» «ཕུགས་བསམ་གྱི་གཤོག་པ» «བོད་ཀྱི་ལོ་རྒྱུས་གླེང་བའི་གཏམ» «ཚེ་རིང་དོན་འགྲུབ་ཀྱི་སྒྲུང་ཐུང་ཕྱོགས་བསྒྲིགས»སོགས་ནི་ང་རང་ཆེས་བལྟ་རྒྱུར་དགའ་བའི་དཔེ་དེབ་དག་ཡིན་ཞིང་། དཔེ་ཆ་ཡིས་ང་ཚོའི་མཐོང་རྒྱ་དང་ལྟ་རྒྱའི་ནུས་པ་མཐོར་འདེགས་སུ་གཏོང་ཐུབ་ལ། སྒྲུང་གཏམ་གྱི་ནང་གི་མི་སྣ་གཙོ་བོ་དང་མཉམ་དུ་ཁ་བརྡ་བྱས་ཆོག་སྟབས། དཔེ་ཆ་ནི་ང་ལ་མཚོན་ན་བློས་ཐུབ་ཀྱི་གྲོགས་པོ་གལ་ཆེན་ཞིག་ཡིན།
དཔེ་དེབ་ལགས། ཁྱེད་ཡོད་པས་ཉིན་མཚན་ནམ་ཡིན་རུང་ཞེན་པ་དང་དུངས་བས་ཁེངས་ཡོད། ཁྱེད་ཡོད་པས་ངའི་འཚོ་བ་ལ་སྒེག་ཉམས་ཡོད། ཁྱེད་ཡོད་པས་ངའི་འཚོ་བ་ལ་ཚོན་མདངས་ཡོད། ཁྱེད་ཡོད་པས་ངའི་མ་འོངས་པ་ལ་ཕུགས་བསམ་ཡོད། ཁྱེད་ཡོད་པས་ངའི་མདུན་ལམ་ལ་འོད་ཟེར་འཕྲོས།
དཔེ་དེབ་ལགས། ཁྱེད་ནི་ངའི་ལུས་ཧྲིལ་བོར་ཁྱབ་པའི་ཟུངས་ཁྲག་དྲོན་མོ་དེ་ཡིན་ལ་ངའི་བློས་ཐུབ་ཀྱི་གྲོགས་པོའང་ཡིན། ཁྱེད་ནི་ང་ལ་མཚོན་ན་ཆེས་བརྗེད་ཐབས་བྲལ་བ་དང་དོར་ཐབས་བྲལ་བའི་ལས་དབང་གི་ཚེ་སྲོག་གསོན་པོ་དེ་ཡིན།
སྤེལ་དུས། : 2022-03-21
བརྗེད་དཀའ་བའི་འདས་དོན།

ངུ་ངག་གི་དབྱངས་རྟ་སྙན་མོའི་འགྲོས་དང་བསྟུན་ཏེ། འཇིག་རྟེན་མི་ཡུལ་འདིར། བགྲོད་དཀའ་བའི་མངར་སྐྱུར་ཁ་གསུམ་གྱི་འཚོ་བའི་བརྒྱུད་རིམ་མང་པོ་ཞིག་ཀྱང་གསལ་ལེར་མངོན་བྱུང་། རེད་ཡ། འདི་དག་ལས་དགའ་སྐྱོ་འདྲེས་མའི་བྱིས་དུས་ཀྱི་འཚོ་བའི་བརྒྱུད་རིམ་དེ་ངའི་སེམས་ཀྱི་གཏིང་རིམ་དུ་དུས་རྟག་ཏུ་བརྗེད་ཐབས་མེད་ལ་རྡོ་ལ་རི་མོ་བརྐོས་འདྲའི་བག་ཆགས་ཟབ་མོ་ཞིག་བཞག
སྔོན་ཆད། བདག་ནི་ཕྱུགས་རྫི་བུ་མོ་ཆུང་ཆུང་ཞིག་ཡིན་ལ། ནམ་རྒྱུན་འུར་ཆ་ཐུང་ཐུང་དེ་མགོ་ནས་བསྐོར་ཞིང་གཞས་ཆུང་ངག་ནས་གྱེར་བཞིན་ཤ་ཤེད་རབ་ཏུ་རྒྱས་པའི་ཕྱུགས་རྗེས་སུ་བསྐྱོད་པ་ཡིན། ཡིན་ནའང་། བདག་ལོ་ན་བརྒྱད་ལ་སོན་པའི་ལོ་དེའི་འབྲུ་དྲུག་སྙེ་མའི་མགོ་ལྕོག་ལྡེམ་ལྡེམ་གཡོ་བའི་སྟོན་དུས་ཤིག་ལ། བདག་གིས་དྲིན་ཆེན་ཕ་མའི་རེ་བ་དང་སྨོན་འདུན་རུམ་ནས་སློབ་ཆུང་གི་སྒོ་ཐེམ་ལ་གོམ་པ་དང་པོ་སྤོས་པ་དེ་ཡིན། དུས་དེ་ནས་བཟུང་སྟེ། བདག་ནི་མ་རབས་པྲ་ཆལ་གྱི་བྱིས་པ་སྣབས་ལུག་ཅིག་ནས་བརྩོན་འགྲུས་ཀྱི་རྟ་མཆོག་ལ་རྟ་ལྕག་གིས་བསྐུལ་ཏེ་མུ་མཐའ་མེད་པའི་ཤེས་བྱའི་ཐང་ཆེན་དུ་བསྐྱོད་པའི་ཕུཊ་འདུན་དང་ཡིད་ཆེས། བརྩོན་འགྲུས་བཅས་ཀྱིས་ཁེངས་པའི་སློབ་མ་ཞིག་ཏུ་གྱུར་མོད། ཡིན་ཡང་། དེ་དུས་ནམ་རྒྱུན་དགེ་རྒན་བཟང་པོའི་བསླབ་བྱ་སེམས་སུ་མ་བཟུང་བར་རྣམ་གཡེང་གི་དབང་དུ་སོང་ནས་བསྡད་མཐར། ཕམ་ཁ་ལས་རྒྱལ་ཁ་མེད་པས།སློབ་གྲྭར་ཡོང་མི་འདོད་པའི་སློབ་བུ་མ་རབས་པྲ་ཆལ་ཞིག་ཏུ་གྱུར།
བརྗེད་མེད་པ་ནི་སྐབས་དེར་གདོང་ལ་བྱམས་བརྩེ་དང་འཛུམ་མདངས་ཀྱིས་འཁྱིལ་བའི་རྒན་ཡུམ་མཚོ་རྒྱལ་ལགས་ཀྱིས་ནམ་རྒྱུན་ནངས་སྔ་ལངས་དང་དགུང་འཕྱི་ཉལ་བྱས་ནས་བདག་ལ་ཟུར་ཁྲིད་བྱས་པ་དང་། སློབ་གསོ་བཏང་ནས་སློབ་བུ་ཡ་རབས་ཚུལ་ལྡན་བཟང་པོ་ཞིག་ཏུ་འགྱུར་རྒྱུ་དང་། སློབ་སྦྱོང་ལ་ནན་ཏན་བྱ་དགོས་པ་སོགས་ཀྱི་ཁ་ཏ་སློབ་གསོ་བཏང་བར་མ་ཟད།ད་དུང་། བདག་གི་རྨོངས་མུན་ལྟ་བུའི་ཡིད་ཀྱི་ཞིང་ས་རུ་ཤེས་བྱའི་མེ་སྟག་ཆེམ་ཆེམ་འཕྲོ་བ་ལྟར་བྱུང་བས། བདག་སློབ་ལ་སྤྲོ་ཞིང་བརྩོན་སེམས་ཆེ་བའི་སློབ་བུ་ཞིག་ཏུ་གྱུར། དེའི་རྐྱེན་གྱིས་རྒྱུགས་ལེན་ཐེངས་ཤིག་ལ།བདག་གིས་ཨང་དང་པོ་བླངས་པ་ན། རྒན་ལགས་ཐུགས་རབ་ཏུ་དགྱེས་ནས་བདག་ལ་བཟང་བསྟོད་གང་མང་བྱས་སོང་། དེའི་རྗེས་སུ་སློབ་བུ་ངས་དགེ་རྒན་ལགས་ལ་བཀའ་དྲིན་ཞུས་པ་ན། རྒན་ལགས་ཀྱི་གདོང་ལ་བཅོས་མིན་གྱི་འཛུམ་མདངས་ཤིག་ཤར་བྱུང་། དེ་ནི་དགེ་རྒན་གྱིས་མི་ལོ་འདི་དག་གི་རིང་ལ་སློབ་བུ་ངའི་ཆེད་དུ་བཏོན་པའི་ཟུངས་ཁྲག་དྲོན་མོ་དེ་ཆུད་ཟོས་སུ་བཏང་མེད་པ་ཤེས་ཡོད། དེ་བས། མ་རབས་པྲ་ཆལ་གྱི་སློབ་བུ་ངས་དགེ་རྒན་གྱི་བཀའ་དྲིན་ནམ་ཡང་བརྗེད་མི་སྲིད་དོ། །
རེད་ཡ། བདག་ལོ་བཅོ་ལྔ་ལ་སོན་རག་བར་དུ་དགའ་འོས་པའི་དོན་དག་དང་སྐྱོ་འོས་པའི་དོན་དག དགོད་བྲོ་བའི་དོན་དག་སོགས་བགྲང་ལས་འདས་པ་ཞིག་བྱུང་ཡོད་རུང་། ད་ལྟའི་བར་དུ་བརྗེད་དཀའ་ཞིང་རྡོ་ལ་རི་མོ་བརྐོས་པ་བཞིན་བདག་གི་དྲན་པའི་མེ་ལོང་ངོས་སུ་བག་ཆགས་ཆེས་ཟབ་མོ་བཞག་ཡོད་པ་ནི་རྒན་ཡུམ་མཚོ་རྒྱལ་ལགས་ཀྱིས་ང་རང་བྱམས་བརྩེ་དང་ཐུགས་ཁུར་ངང་བསྐྱངས་ནས་ཤེས་བྱའི་ནུ་ཞོ་བླུད་པ་དེ་ཡིན་ནོ། །

སྤེལ་དུས། : 2022-03-18
ངའི་ཨ་མ།

ཨ་མ་ནི་ང་ཚོ་ལ་མི་ལུས་རིན་ཆེན་གནང་མཁན་ཡིན། ཨ་མ་ཡོད་པ་ནི་སྐྱེ་བོ་ཚང་མས་བསོད་ནམས་ཤིག་ཏུ་བརྩི་བ་རེད། འཇིག་རྟེན་གྱི་སྐྱེ་བོ་ཚང་མར་ཨ་མ་རེ་ཡོད། ང་ལའང་ཨ་མ་བྱམས་བརྩེ་ལྡན་པ་ཞིག་ཡོད། མོའི་མིང་ལ་སྙིང་མོ་ཅོག་འབོད། མོ་ད་ལོ་ལོ་སོ་གཅིག་ཡིན། མོའི་ངོ་གདོང་ནི་ཅུང་ཙམ་ནག་ལ་དེ་འདྲ་ནག་རྒྱུའང་མེད། མོའི་ནག་ཅིང་སྟུག་པོའི་སྨིན་མ་གཉིས་ཀྱི་འོག་ན་ཐོ་རེངས་སྐར་ཆེན་ཅན་གྱི་མིག་ཟུང་གཉིས་ཡོད། མོའི་སྐྲ་ནག་པ་ནི་ཀྲེ་ནག་ཅིག་དང་མཚུངས། གཟུགས་ལུས་ཚིགས་དྲུག་སྨྱུག་མ་དང་འདྲ་བ་ཡོད་པས། ཁོ་མོ་ནི་ངེད་ཚང་ལ་བཀའ་དྲིན་ཤིན་ཏུ་ཆེ་བའི་ཁྱིམ་འཛིན་མ་ཞིག་ཡིན།
ཉིན་ཞིག་ལ། ཨ་མ་ངེད་སློབ་གྲྭར་ང་དང་ཨ་ཅེ། ནུ་མོ་གསུམ་ལ་སྐོར་རྒྱག་ཏུ་ཐོན་འདུག ངས་ཨ་མར་ང་ལ་འབྲི་དེབ་གཅིག་མ་གཏོཊ་ཅི་ཡང་མི་དགོས་པར་བཤད། ཨ་མས་འབྲི་དེབ་ཉོས་ནས་ཕྱིར་ཡོང་དུས། ང་ཚོའི་སློབ་མ་ཞིག་གིས་ཁྱིམ་བདག་ལ་ཞ་སྨྱུག་བཞི་དང་ལྕགས་སྨྱུག་ཅིག་ཉོ་རོགས་ཟེར་བས། ཁྱིམ་བདག་དེས་བྱིས་པར་ང་ལ་སྒོར་མོ་མང་པོ་མེད་པས་རྗེས་སུ་ཉོ་ཞེས་བཤད་སོང་། ཨ་མས་སྐད་ཆ་དེ་ཐོས་མ་ཐག ཨ་མས་སློབ་གྲོགས་དེ་ལ་གྲོགས་པོ་ཆུང་ཆུང་ལགས། ཁྱོད་ཀྱི་སེམས་མ་ཕམ་དང་ཅི་དགོས་ངས་ཁྱོད་ལ་ཉོ་ངེས་ཡིན་ཟེར་ཞོར་དུ་ཚོང་ཁང་དུ་རྒྱུགས་ནས་ཉོས་ཡོང་སྟེ་བྱིན། སློབ་གྲོགས་དེས་བཀའ་དྲིན་ཞུས་ནས་ཨ་མར་ངེད་ཚང་ལ་རྒྱུ་ནོར་དེ་འདྲ་མེད་པས་ཁྱོད་ལ་སྤྱིན་ཚབ་སྤྲོད་མི་ཐུབ་ལ། ངའི་ཨ་ཕས་ང་རྒྱུན་དུ་སློབ་གྲྭར་འགྲོ་སྐབས་སྒོར་མོ་ཅི་ཡང་མི་སྟེར་ལ་ཐ་ན་སློབ་སྦྱོང་གི་ཡོ་བྱད་ཡང་ཉོ་མི་ཐུབ་པ་ཡིན་ཞེས་བཤད་པ་ཐོས་པ་ན། ཨ་མ་ཡང་བསྐྱར་ཚོང་ཁང་དུ་བརྒྱུགས་ནས་ཁོ་ལ་སློབ་སྦྱོང་གི་ཡོ་བྱད་མང་པོ་ཉོས་ཏེ་སྟེར་སྐབས་སློབ་གྲོགས་དེས་ཅི་ཞིག་བཤད་དགོས་པའང་མི་ཤེས་པར་རང་དབང་མེད་པར་ཁ་ནས་ཨ་ནེ་ལགས། ང་ལ་འདི་འདྲ་མང་པོ་ཞིག་མི་དགོས་ཞེས་བཤད་པ་ན། ཨ་མས་དེ་མ་ཐག་ཏུ་ཁྱོད་ཀྱིས་འཛེམ་དོགས་མ་བྱེད་ཟེར་བཞིན་ལག་ཏུ་བཞག དེ་ནས་སློབ་གྲོགས་དེའི་སེམས་དགའ་བས་མྱོས་ཏེ་ཨ་མར་ཡང་ཡང་བཀའ་དྲིན་ཞུས་ཤིང་། ཨ་མས་ཀྱང་གདོང་ལ་འཛུམ་མདངས་ཀྱིས་ཕྱུག་ནས་ལག་པ་གཡུག་ཞོར་དུ་སློབ་གྲྭ་དང་ཁ་བྲལ་སོང་། ན་ནིང་དགུན་ཚུགས་པ་ན། ནམ་ཟླ་ཧ་ཅང་འཁྱགས་པས། ཨ་མས་ནུ་བོ་དང་ངེད་གཉིས་ཀྱིས་སློབ་གྲྭ་རུ་གྲང་སྡུག་མྱོང་བར་དོགས་ནས། དགུན་ལྷམ་དང་དགུན་ལྭ་བཟོས། མཚམས་རེར་ང་རང་གཉིད་ཐུན་གཅིག་ལོག་ནས་སད་དུས། ཨ་མས་ད་དུང་སྒྲོན་མེ་འོག་ཏུ་ལྭ་བ་འཚེམ་བཞིན་ཡོད། ཡིན་ན་ཡང་། མོའི་གདོང་ལ་ཐང་ཆད་པའི་སྣང་བ་སྤུ་ཙམ་མེད། ཉི་མ་འགའ་འགོར་བ་ན་མོས་དགུན་ལྷམ་ཆ་གཉིས་དང་དགུན་ལྭ་ཆ་ཚང་གཉིས་བཟོས་ཚར་ཡོད། ཕྱི་ཉིན་ནུ་བོ་དང་ངེད་གཉིས་ཀྱིས་དགུན་ལྷམ་དང་དགུན་ལྭ་གསར་བ་གྱོན་ནས་སློབ་གྲྭར་སོང་བ་ན། ག་ས་གང་དུ་སོང་ཡང་གྲངརེག་གི་ཚོར་བ་ཅུང་ཙམ་ཡང་མེད། འདི་ལྟར་ཉི་མ་རེ་རེ་བཞིན་ཕར་ལ་འདས་སོང་།
ཨ་མ་ལགས། ཁྱེད་ངའི་སེམས་ཁུང་གི་ཆེས་མཛེས་པའི་ཨ་མ་དེ་ཡིན། ཆེས་བྱམས་བརྩེ་ལྡན་པའི་ཨ་མ་དེ་ཡིན། ཨ་མ་ལགས། ཁྱེད་ཀྱི་དྲིན་ལན་བུ་མོ་ངས་འཇལ་དཀའ་རུང་། ངས་མུ་མཐུད་དུ་སློབ་སྦྱོང་ལ་འབད་པ་ལྷོད་མེད་བྱས་ཏེ། རང་གི་ཕུགས་འདུན་དྲོན་མོ་མངོན་འགྱུར་བྱས་ནས་ཁྱེད་ལ་ལྷག་བསམ་རྣམ་དག་གིས་དྲིན་ལན་འཇལ་རྒྱུ་ནི་བུ་མོ་ངའི་མཐའ་མཇུག་གི་རེ་བ་ཉག་གཅིག་དེ་ཡིན།
སྤེལ་དུས། : 2022-03-18
ངེད་ཚང་གི་བེའུ།

ངེད་ཚང་ལ་འབྲི་མོ་ཞིག་ཡོད་དེའི་ལུས་ཀྱི་སྤུ་མདོག་ནི་དམར་སེར་ཞིག་ཏུ་འདུག་ལ། མགོ་རུ་རྭ་ཅོ་ཐུང་ཐུང་གཉིས་སྐྱེས་ཡོད་པ་དང་ལུས་ཀྱི་གྲུབ་ཆ་ནི་གཡག་རྒོད་ཅིག་དང་ཀུན་ནས་མཚུངས། འབྲི་མོ་དེར་འོ་མ་བཞོ་རྒྱུ་མང་བས་ཨ་མ་རྒྱུན་དུ་འབྲི་མོ་དེར་གཅེས་འདང་ཆེ། དེ་བས་ང་རང་ཉིད་ཀྱང་འབྲི་མོ་དེའི་འོ་མ་འཐུང་རྒྱུར་ཧ་ཅང་དགའ་བར་གྱུར།
ཉིན་ཞིག་གི་ཕྱི་དྲོར། ང་རང་སློབ་གྲྭ་གྲོལ་ནས་ཡུལ་དུ་སླེབས་པ་ན། ངེད་ཚང་གི་འབྲི་མོ་དེ་ལ་བེའུ་ཞིག་བཙས་འདུག དུས་དེར་ངས་རང་ཉིད་ཀྱི་ཕྲག་སྟེང་གི་དཔེ་ཁུག་ཆུང་ཆུང་དེ་སར་བཞག་སྟེ། སྒོ་ཟོག་ལྷས་སུ་འཇུག་ཏུ་འགྲོ་དུས་བེའུ་དེ་བཙས་མ་ཐག་ཡིན་པས་འབྲི་མོའི་ནུ་མ་སྣུན་བཞིན་ཡོད། དེའི་ལས་ཀྱི་ཚུགས་ཀ་ལ་བལྟས་ན་ཧ་ཅང་སྤྱང་གྲུང་ལྡན་པ་ཞིག་རེད། དེ་ནས་རིམ་བཞིན་དུ་དུས་ཡུན་མང་པོ་ཞིག་སོང་བའི་ཕྱིར། བེའུ་དེ་སྔ་མོ་ནས་ཆེ་རུ་གྱུར་ནས་རྩྭ་ཟ་ཐུབ་པར་གྱུར། ཡིན་ན་ཡང་། ཁོས་རྩྭ་ཐང་གི་སྔོ་རྩྭ་དང་གསར་སྐྱེས་ཀྱི་རྩི་རིང་བཟའ་བ་ལས་གཞན་གང་ཡང་མི་ཟ་བར་མ་ཟད། རྒྱུན་དུ་འབྲི་མོའི་འོ་མ་འཐུང་གིན་འདུག ངེད་ཚང་གི་བེའུ་དེ་ཉིན་རེ་ནས་ཉིན་རེར་ནར་སོན་པས། རྩྭ་སྐྱ་དང་རྩྭ་རྡོས། ཡང་ན་གཟན་ཆས་གཞན་པའི་རིགས་གང་ཡིན་རུང་ཟ་བར་གོམས་པར་གྱུར། ད་དུང་འབྲི་མོ་དང་མཉམ་གཅིག་ཏུ་རྫ་མཐོ་ས་དང་བྲག་འདབས་གང་རུང་དུ་སོང་ནའང་བེའུ་གཞན་དང་ལྷན་གཅིག་ཏུ་རྩྭ་ཟ་བ་དང་རྭ་རྩེད་བྱེད་ཅིང་། ན་ཁུག་དང་སྤང་རིའི་འགྲམ་ནས་ཉལ་བར་ཧ་ཅང་དགའ་བས། དེ་ནི་ཁོའི་གོམས་གཤིས་ཤིག་ཏུ་གྱུར་ཡོད་པ་རེད།
དུས་ཚིགས་ཀྱི་འགྱུར་བ་ལ་བརྟེན་ནས་ཁོའི་གཟུགས་རིས་དང་སྤུ་མདོག་བཅས་ལ་འགྱུར་བ་བྱུང་ཡོད། དགུན་ཁར་ལུས་ཀྱི་སྤུ་མདོག་ཁམ་ནག་ཡིན་པ་དང་གཟུགས་གཞི་ལ་དགུན་ཁའི་གྲང་རླུང་འགོག་བྱེད་ཀྱི་སྤུ་མཐུག་པོ་རེ་སྐྱེས་ནས་མར་བསྣར་འདུག དེ་ནི་གྲང་ངར་འགོག་བྱེད་ཀྱི་ལྭ་བ་ཞིག་དང་མཚུངས། དབྱར་ཁར་སླེབས་ཚེ། སྔོ་ལྗང་གི་རྩྭ་རྩི་ཤིང་རྣམས་ཁམ་གང་རེ་བྱས་ནས་ཟོས་པ་ན་ཤ་ཤེད་རྒྱས་པ་དང་བསྟུན་ནས་ལུས་ཀྱི་སྤུ་མཐུག་པོ་རེ་འགའ་ས་ལ་ལྷུང་འགྲོ་བས། ཤུལ་ན་སྤུ་སྲབ་མོ་ནག་ཆེམ་མེར་ལུས་ཡོད། ད་ནི་ཇི་འདྲའི་རྩུབ་པོ་ཞིག་ཏུ་གྱུར་ཡོད་པ་ལ། རྒྱུན་པར་ནོར་ཁྱུ་དང་ལུག་ཁྱུ་རུ་སོང་ནས་རང་ལས་ཆུང་བའི་བེའུ་དང་ཡང་ན་ལུ་གུ་ཆུང་ཆུང་རྣམས་གང་སར་བདའ་རྒྱུར་དགའ་བར་གྱུར། ངས་ཉིན་རྒྱུན་དུ་རི་མགོ་དང་རྫ་རི་སོགས་ཀྱི་འགྲམ་ནས་ནོར་ལུག་འཚོ་གྱིན་ཡོད་པས། རྒྱུན་པར་འབྲི་མོའི་བེའུ་ཡིས་ཅི་ཞིག་བྱེད་པར་སེམས་ཁུར་བྱེད་པ་དེ་ལ་ཨ་མས་ཀྱང་ངའི་ཚུལ་དེ་ཤེས་ནས་ཐག་མི་རིང་བའི་ས་རུ་བལྟས་ནས་བསྡད་མྱོང་། དེ་བས་ང་ངེད་ཚང་གི་བེའུ་དང་འབྲི་མོ། ར་ལུག སྒོ་ཁྱི་སོགས་ལ་ཧ་ཅང་དགའ་བར་གྱུར་ལ། ད་དུང་སྔར་ལས་ལྷག་པར་ནོར་ལུག་འཚོ་སྐྱོང་ལེགས་པོ་ཞིག་བྱེད་པའི་གོམས་གཤིས་ཤིག་ཆགས་ཡོད་པས། སེམས་སུ། ཞིམ་མངར་འོ་ཇ་འཐུང་དུས། །དྲིན་ཆེན་འབྲི་མོ་མ་བརྗེད། །ཅེས་པའི་གླུ་ཚིག་དེའི་ཕྱིར་དུ། ང་ཚོས་སྲོག་ཆགས་དུད་འགྲོ་གང་ཞིག་ཡིན་ནའང་དེའི་ཚེ་སྲོག་ལའང་གཅེས་སྐྱོང་དང་བྱམས་སྐྱོང་བྱེད་དགོས། སྲོག་ཆགས་ཅི་འདྲ་ཞིག་ཡིན་རུང་ང་ཚོ་མིའི་རིགས་ཀྱི་འཚོ་བ་ལ་ཧ་ཅང་མཁོ་ཞིང་མེད་ན་མི་ཆོག་པས། ང་ཚོ་མིའི་རིགས་ཀྱི་གྲོགས་པོ་ཡིན་པ་ནམ་ཡང་བརྗེད་མི་རུང་ངོ་། །
སྤེལ་དུས། : 2022-03-18

བདག་གི་ཕ་ཡུལ།

ངའི་ཕ་ཡུལ་ནི་ལྷ་སྡེ་གཡང་སྡེ་ཕྱུག་མོ་ཡིན། ཆུང་དུས་ནས་བཟུང་སྟེ། ཕ་ས་ཕ་ཡུལ་གྱི་ཁོར་ཡུག་ཡོངས་ནི་ཧ་ཅང་ངོ་མཚར་ཞིང་མཛེས་སྡུག་ཡིད་དུ་འོང་བ་ཞིག་ཡོད།
མུ་མཐའ་མི་མངོན་པའི་ཕ་ཡུལ་རྩྭ་ཐང་གི་དུས་བཞིའི་འགྱུར་ལྡོག་ཁྲོད་དུ་ང་ལ་སྨྲ་མི་ཤེས་པའི་ཚོར་སྣང་སྣ་ཚོགས་བྱུང་དུ་བཅུག་ཡོད་པ་སྟེ།
དཔྱིད་ཀ་སླེབས་ཚེ། རི་བོའི་སྟེང་གི་ཁ་བ་རིམ་གྱིས་ཞུས་ནས་མེ་ཏོག་སྣ་ཚོགས་ཁྲ་ལམ་མེར་བཞད་འདུག་ལ། ད་དུང་རྟ་ནོར་ལུག་གསུམ་གྱིས་རྩྭ་ཆུ་ལོངས་སུ་སྤྱོད་བཞིན་པ་དང་མི་མང་པོ་རྩྭ་ཐང་དུ་གང་དགའ་གང་སྐྱིད་ཀྱི་ངང་ནས་གླུ་ལེན་གར་རྩེད་བྱེད་པར་དགའ་བ་རེད།
དབྱར་ཁ་སླེབས་ན། རྩྭ་ཆུ་གཉིས་ཀ་འཛོམས་པའི་རི་ལུང་རྒྱུད་ནས་ང་ཚོ་ཚང་མ་དབྱར་ས་རུ་བུད་འགྲོ། དེ་དུས་ང་ཚོའི་དབྱར་ས་ན་རྩེ་མོ་དགུང་ལ་སྙེག་པའི་རི་བོ་དང་དྭངས་མོ་གཡུ་ལྟར་གསལ་བའི་མཚོ་མོ། འདབ་ཆགས་བྱ་བྱེའུ་དང་ཨ་བྲ། ཕྱི་བ་སོགས་ཧ་ཅང་མང་པོ་ཡོད་ལ། ཆར་བབས་ཚེ་ཤ་མོའང་ག་ས་གང་དུ་མང་པོ་སྐྱེས་འདུག
སྟོན་ཁ་སླེབས་པ་ན། ཕ་ས་དྲོན་མོ་ནི་དངོས་གནས་གསེར་མདོག་གི་ཞིང་ཁམས་ཤིག་དང་མཚུངས་ལ། ད་དུང་རི་འདབས་ཀྱི་ས་ཞིང་ཚང་མའང་སེར་ལམ་མེར་བྱེད། དེ་དུས་སྡེ་མི་རྣམས་ཀྱང་རྩྭ་འབྲེག་ཞིང་འབྲེག་གི་ལས་ཀར་བྲེལ་བཞིན་ཡོད་ལ། ནམ་མཁའ་རུ་ཁྲུང་ཁྲུང་དཀར་མོ་ཁྱུ་དང་ཁྱུ་བྱས་ནས་ལྷོ་ཕྱོགས་སུ་དགུན་སྐྱེལ་བར་འགྲོ་བའང་རིག་ཐུབ།
དགུན་ཁའང་དལ་གྱིས་སླེབས་པ་ན། ནམ་ཟླ་ཡུན་གྱིས་ཇེ་འཁྱག་ཏུ་འགྲོ་བ་དང་གྲང་རླུང་འུར་འུར་ལྡིང་བའི་ཕ་ས་ནི་རྒྱང་རིང་ན་ཁེར་རྐྱང་དུ་ལུས་པ་དང་མཚུངས་ཤིང་། ག་ས་གང་དུ་ཁ་བའི་གཡོགས་ནས་སྟོད་གོས་དཀར་པོ་གྱོན་པ་དང་འདྲ་བར་དཀར་ཆེམ་ཆེམ་བྱེད། ཁྱིམ་མཚེས་ཀྱི་བྱིས་པ་མང་པོ་ཞིག་ཁ་བའི་ནང་བརྒལ་ནས་རྩེད་མོ་སྣ་ཚོགས་ལ་རོལ་བཞིན་ཡོད་པ་ཡིད་ལ་དྲན་འོང་།
རེད་ཡ། བདག་གི་ཕ་ཡུལ་ནི་ས་མཐོའི་གྲུ་ཟུར་ཞིག་ན་ལུས་པའི་སྦྲ་ནག་ཆེན་པོ་ཞིག་དང་འདྲ་རུང་། ངའི་སེམས་ཁོང་དུ་ཕ་ཡུལ་ལས་སྐྱིད་ཀྱང་མཛེས་སྡུག་ལྡན་པ་ཞིག་མེད་དོ་སྙམ།
སྤེལ་དུས། : 2022-03-18
ང་རང་དྲིན་གྱིས་བསྐྱངས་པའི་ཨ་མ།

སྤྱིར་འཇིག་རྟེན་མི་ཡི་འགྲོ་ལུགས་ལྟར། འཇིག་རྟེན་ཟེར་བ་འདི་ན་བདུད་འདྲེ་ཟེར་བ་ཞིག་སྔར་ཡོད་མ་མྱོང་ལ། ཕྱིན་ཆད་ཀྱང་ཡོད་མི་སྲིད་པས་དེ་ནི་ཁུངས་མེད་འཆལ་གཏམ་ཞིག་ཡིན་པ་དེ་བདག་གིས་ལོས་ཤེས། འོན་ཀྱང་འཇིག་རྟེན་ཟེར་བ་འདི་ན་རླབས་ཆེན་གྱི་ཨ་མ་ཟེར་བ་ཞིག་སྔར་ཡོད་མྱོང་བར་མ་ཟད། ཕྱིན་ཆད་ཀྱང་ཡོད་སྲིད་པ་ནི་དྲི་བ་བརྒྱ་ཕྲག་གི་རྗེས་སུ་བྱུང་བའི་བདེན་དྲང་གི་གཏམ་ཞིག་ཡིན་པ་ང་ཚོས་གསལ་བོར་རྟོགས་ཡོད། རེད་ཡ། ད་དུང་ཨ་མ་ཟེར་བའི་མི་དེའི་བྱམས་བརྩེ་ཡི་གཟི་འོད་འཛམ་གླིང་གི་གཙུག་ན་འཚེར་བས་བྱིས་པ་ཚོའི་སེམས་ཁོང་དུ་འཕྲོས་ཡོད་པ་ཁོ་ཐག་ཡིན།
མི་ལོ་བཅུ་བཞི་ཡི་ཡར་སྔོན་ང་ནི་མུག་ནག་དང་སྡུག་བསྔལ་གྱིས་མནར་བའི་རྣམ་ཤེས་འཁྱམས་པོ་ཞིག་ཡིན་པ་དང་། སྐྲག་སྣང་དང་འཇིགས་སྣང་གིས་ཁེངས་པའི་སྟེས་དབང་གི་དུས་དེ་ལ་ཁྱེད་དང་འུ་གཉིས་ཀྱི་བར་ལ་བརྩེ་དུང་གི་ས་བོན་འཁྲུངས་ཤིང་། བྱམས་བརྩེ་ཡི་མྱུ་གུ་འབུས་མགོ་བརྩམས་ནས་ཟླ་དགུ་དང་ཞག་བཅུ་ཡི་རིང་ལ། ང་རང་ཆེས་དྲོ་ཞིང་སྐྱིད་པའི་ཁང་མིག་གྲུ་བཞི་ལྟ་བུའི་ཨ་མའི་མངལ་དུ་སྦྲུམ་ནས་བསྡད། དེའི་རྗེས་ང་རང་མདོ་སྨད་ཨ་མདོའི་ཕྱོགས་ཀྱི་ཕ་ཡུལ་ཁྲི་སྡེ་ཕྱུག་མོར་མགྲོན་དུ་ཕེབས་པ་ཡིན། ཉིན་དེའི་ཉི་འོད་ནི་དེ་རིང་བཞིན་དྲོ་ཞིང་འཇམ་ལ། ཉིན་དེའི་ནམ་ཟླ་ནི་དེ་རིང་བཞིན་གསལ་ཞིང་གཡའ་དྭངས་པ་ཞིག་ཡིན་པ་དེ་ཁྱིམ་མི་གང་བོའི་གངས་དཀར་སེམས་ན་གསལ་ལྷང་ངེར་གནས་ཡོད་པ་བརྗོད་མི་དགོས་ལ། ཉིན་དེའི་ཨ་མའི་ཚོགས་བསགས་ཀྱི་ཉི་མ་ལས་འཁྲུངས་པའི་བྱམས་བརྩེ་ཡི་གཟི་འོད་དེ་དཔག་བསམ་ཤིང་དང་འདྲ་བར་མཐོ་བར་སྐྱེས་ཤིང་ཡལ་འདབ་ཀྱི་ཁོ་ལག་རབ་ཏུ་རྫོགས་པ་མིན་ན་ངའི་བགོ་སྐལ་ལ་བབས་པའི་མི་ལུས་རིན་ཆེན་འདི་ཅི་ལྟར་གནང་།
“ཨ་མ་མ་གཏོགས་མི་བྱམས་སེམས་ཅན་མི་ཤེས། ཐབ་ཀ་མ་གཏོགས་ས་དྲོད་ཁོལ་ཅན་མི་ཤེས།”ཟེར་བ་ནང་བཞིན། བུ་མོ་ང་ནི་ངུ་བ་མ་གཏོགས་ཅི་ཡང་བྱེད་མི་ཤེས་པའི་ཕྲུ་གུ་ཆུང་ཆུང་ཞིག་ནས་བཟུང་ཁྱེད་ཀྱིས་སྐུ་ལུས་དཀའ་ཚེགས་ལ་མ་འཛེམ་པར་བུ་མོ་ང་རང་དྲིན་གྱིས་བསྐྱངས་པ་ཡིན་ལ། མཐོ་གང་ནས་འདོམ་གང་དང་། ཤ་རྒྱ་མ་གང་ནས་རྒྱ་མ་བརྒྱ་རུ་བཏང་བ་ཡིན། ང་གོག་ནས་འགྲོ་དུས་མདུན་ཕྱོགས་སུ་ལངས་པའི་མི་ནི་ཁྱེད་རང་ཡིན་ལ། གོམ་པས་ལམ་མ་ནོན་པར་ཐང་ལ་འགྱེལ་དུས་འཚབ་འཚུབ་སྒོས་ཡར་སློང་མཁན་དང་ང་རང་ལ་སྤོབས་པ་དང་ཡིད་ཆེས་སྟེར་མཁན་ཡང་ཁྱེད་རང་ཡིན། ཁྱེད་མེད་ན་ང་ནི་ཉམས་ཆུང་གི་ཚེ་སྲོག་སྡར་མ་ཞིག་ཀྱང་ཡིན།
མ་ཡུམ་སློབ་གྲྭ་ལ་འགྲིམ་དུས་སུ། གལ་སྲིད་ཕམ་ཁ་བྱུང་ཚེ་རྒྱབ་ཕྱོགས་སུ་ལངས་ནས་ཡིད་ཆེས་དང་། སྤོབས་པ་གནང་བ་དང་རེ་འདུན་གྱི་ཕྱོགས་སུ་བསྐྱོད་པར་རེ་བ་དང་སྟོབས་ཤུགས་གནང་མཁན་ནི་ནམ་ཡང་ཁྱེད་གཅིག་པུ་ལས་མེད། ཁྱེད་ཀྱི་སེན་མགོ་ཁྲག་དང་སེན་རྟིང་རྣག་བྱས་ནས་ང་ལ་སློབ་དངུལ་གསོག་མཁན་ཡང་ཁྱེད་ཡིན་ལ། ཁྱིམ་ཚང་གི་འགན་འཁུར་ཕྲག་དུ་ལྷུང་རུང་ངེད་མིང་སྲིང་དག་བྱམས་ཀྱིས་བསྐྱངས་ལ་འཛུམ་གྱིས་གཉོར་མཁན་ཡང་ཁྱེད་ཡིན། ངེད་ཅག་ལ་མཚོན་ན་མི་ཚེ་གཅིག་དང་ཉིན་མཚན་གཅིག ཐ་ན་ཆུ་ཚོད་གཅིག་རེ་དང་སྐར་མ་རེ། ཡང་ན་སྐར་ཆ་གཅིག་ལའང་ཁྱེད་མེད་མི་རུང་བས། ཨ་མ་ལགས། ཁྱེད་ནི་ངའི་མུན་པའི་འཇིག་རྟེན་ན་སྨག་རུམ་འཇོམས་པའི་ཤར་ཕྱོགས་སུ་འཕགས་པའི་རྟ་བདུན་དབང་བོ་ཡིན་ལ། ངའི་འཇིག་རྟེན་གྱི་རྐུན་ཇག་འཇོམས་པའི་དཔའ་རྒོད་ཤ་སྟག་དེ་ཡིན།
ཨ་མ་ལགས། ངེད་མིང་སྲིང་དག་ནི་ནར་སོན་པ་བསྟུན་ནས་བསམ་བློའི་གོ་རྟོགས་ལྡན་ལ། ཤེས་རིག་གི་ལམ་ཆེན་དུ་སྟོབས་ཀྱིས་མཆོངས་པའི་སྟག་ཕྲུག་ལྟ་བུར་གྱུར་ཡོད། དེ་བཞིན་མེད་མིང་སྲིང་དག་ནི་མ་ཡུམ་སློབ་གྲྭའི་སྒོ་འགྲམ་དུ་ལངས་པ་ནས་བཟུང་། ཤེས་རིག་གི་ཐང་ཆེན་དུ་བགྲོད་པའི་དཔའ་བོ་ཡིན་པ་རྟོགས་ཤིང་།ཨ་མ་ཁྱེད་ཀྱི་དྲིན་ལན་འཇལ་རྒྱུའི་རང་ཚུགས་བརྟན་པོ་དེ་སྙིང་གི་ཁོང་དང་རུས་པའི་རྐང་ལ་ཟུག་ཡོད་པ་ནི་རྡོ་བརྐོས་ཀྱི་རི་མོ་བཞིན་གསལ་ལྷང་ངེར་གནས་པས་ཁྱེད་ཀྱིས་སེམས་ཁྲལ་གནང་མི་དགོས། ངེད་མིང་སྲིང་དག་གིས་ཁྱེད་ཀྱིས་གནང་བའི་སྐད་ཆ་དག་སེམས་ལ་ཉར་ནས་མདུན་བསྐྱོད་ཀྱི་གོམ་པ་སྡོད་མ་མྱོང་ལ། མཐུན་སྒྲིལ་གྱི་དཔུང་རྡང་ལྷོད་མ་མྱོང་། ང་ཚོས་སློབ་སྦྱོང་ལ་འབད་པ་བྱས་ནས་ཁྱེད་ལ་དྲིན་ལན་འཇལ་བ་ཁོ་ཐག་ཡིན།
ཨ་མ་ལགས། ཁྱེད་ཀྱིས་ངེད་མིང་སྲིང་དག་ལ་གནང་བའི་བརྩེ་བ་ནི་གངས་དཀར་ཅོད་པན་བཏགས་པའི་ལྷུན་པོ་ལས་དཔངས་མཐོ་ཞིང་། དུང་བ་ཉ་སྲམ་འཁོར་བའི་རྒྱ་མཚོ་ལས་ཀྱང་གཏིང་ཟབ་པས། བུ་མོ་ང་ལ་མཚོན་ན་ཨ་མ་ཁྱེད་ནི་གཡུ་དང་བྱུ་རུ་ལས་དཀོན་པའི་རིན་ཆེན་བེེཌྼྱ་གཅིག་པུ་ཡིན་ལ། འཛམ་གླིང་ཡང་རྩེ་ན་ཤར་བའི་གསེར་གྱི་སྐར་ཆེན་དེ་ཡིན།
སྤེལ་དུས། : 2022-03-18
བཀའ་དྲིན་གཞལ་དུ་མེད་པའི་ཨ་མ།

སྟོང་བའི་དབྱིངས་ན་རྒྱུ་སྐར་ཁྲ་ལམ་ལམ།།
ཆུ་ཤེལ་དཀྱིལ་འཁོར་འདྲ་བ་སུ་ཞིག་མཆིས།།
འཇིག་རྟེན་ཁམས་ན་མི་ཚོགས་ཁྲི་མ་འབུམ།།
ཡུམ་ཆེན་མ་ལས་ལྷག་པ་སུ་ཞིག་མཆིས།།
སྔོན་བསགས་ལས་ཀྱི་དབང་གིས་བུ་མོ་ང་ལ་དལ་བ་བརྒྱད་དང་འབྱོར་བ་བཅུ་ཚང་བའི་མི་ལུས་རིན་ཆེན་སྦྱིན་བྱུང་ལ། བུ་མོ་ང་རང་ཡུམ་ཆེན་ཁྱེད་དང་འཕྲད་ཅིང་། ཁྱེད་ཀྱི་བྱམས་བརྩེ་ཡི་ཐུ་འོག་ཏུ་འཚར་ལོངས་བྱུང་བ་ཡིན།
ཨ་མ་ནི་འགྲོ་བ་མིའི་རིགས་ཀྱི་སྐྱེད་ཡུམ་ཡིན་ཞིང་། ཨ་མ་ཡོད་པས་དེ་རིང་གི་ང་ཚོ་ཡོད་ལ། ཨ་མ་ཡོད་པས་འགྲོ་བ་མི་བྱུང་བ་ཡིན། འཇིག་རྟེན་གོ་ལ་ཟླུམ་པོ་འདིའི་སྟེང་གི་འོད་སྟོང་འབར་བའི་གཟི་བརྗིད་ཐམས་ཅད་དང་ཡིད་ཆེས་ཀྱིས་ཁེངས་པའི་སྤོབས་པ་ཡོད་ཚད་ཀྱང་དྲིན་ཆེན་མ་ལས་བྱུང་བ་ཡིན། བདག་གི་ཨ་མ་ནི་སྤྱིར་བཏང་གི་བུད་མེད་ཅིག་ཡིན་མོད། འོན་ཀྱང་བུ་མོ་ང་ལ་མཚོན་ཏེ་བཤད་ན་འཇིག་རྟེན་འདིར་ཆེས་མེད་དུ་མི་རུང་བའི་རླབས་ཆེན་གྱི་ཨ་མ་ཞིག་ཡིན། མོ་ནི་ཐོབ་དང་གོ་ས་ཅན་གྱི་དཔོན་མོ་མིན་ལ། ཤེས་ཡོན་གྱི་ལམ་སྣ་དྲངས་པའི་ཡོན་ཏན་པ་ནི་དེ་བས་ཀྱང་མིན། འོན་ཀྱང་ང་ལ་མཚོན་ན་བཀའ་དྲིན་གཞལ་དུ་མེད་པ་ཞིག་ཡིན།
ཐོག་མར་ང་རང་ཟླ་དགུ་ཞག་བཅུར་མངལ་དུ་སྦྲུམ་པ་ནས་བཟུང་། ངའི་གཉོམ་ཆུང་གི་ཚེ་སྲོག་དེ་ལ་གནོད་པར་དོགས་ནས་མོས་དུས་རྒྱུན་གྱི་འཚོ་བའི་ཁྲོད་འགྲོ་འདུག་སྤྱོད་གསུམ་ལ་ཤིན་ཏུ་གཟབ་ནས་བདེ་བར་སྐྱེས་པ་ཡིན། ད་ལྟ་མོ་ནི་དགུང་ལོ་ཞེ་བདུན་ལ་སོན་ཞིང་། ཆུ་སྐྱེས་དང་འདྲ་བའི་ཞལ་རས་ལ་རྒས་གཉེར་གྱི་རི་མོ་བབས་ཤིང་། གནག་ཅིང་སྣུམ་པའི་སྐྲ་ལོ་ལ་རབ་དཀར་གྱི་མེ་ཏོག་གིས་བརྒྱན་ཏེ་བདག་གི་དྲིན་ཆེན་ཨ་མའི་དར་ལ་བབས་པའི་ལང་ཚོ་ཡལ་དུ་བཅུག་མོད། འོན་ཀྱང་ངའི་མིག་ལམ་དུ་ཨ་མ་ནི་ནམ་ཡང་ལྟ་བའི་ཆོག་མི་ཤེས་པ་ཞིག་ཡིན།
ཐེངས་སྔོན་མའི་དགུན་གནང་གི་གནང་བ་སྟེར་བའི་ཉིན་མོ་དེ་ལ། གདོང་ལ་འཛུམ་གྱི་མེ་ཏོག་བཞད་པའི་བློ་གསལ་སློབ་མ་ཐམས་ཅད་རང་ཡུལ་དུ་ལོགས་གྲབས་བྱེད་བཞིན་ཡོད། ང་རང་ཡང་དེ་མཚུངས་སུ་དངོས་པོ་སོགས་བསྡུ་གསོག་བརྒྱབ་སྟེ་སློབ་གྲྭའི་སྒོ་ཆེན་ཁར་སོང་། གྲལ་བསྒྲིགས་སྐབས་ང་རང་སྔོན་དུ་ཡོད་མོད། འོན་ཀྱང་སློབ་མ་རྣམས་རེ་རེ་བཞིན་སྤྲོ་སེམས་འཁོལ་བའི་ངང་ནས་རང་གི་ཁྱིམ་བདག་དང་བརྩེ་བའི་ཨ་ལོང་སྦྲེལ་ཏེ་ཡུལ་ལ་ཆས། མཇུག་མཐར་ང་གཅིག་པུ་ཁུ་སིམ་མེར་སློབ་རའི་ཁོར་ཡུག་ཁྲོད་ཁེར་རྐྱང་དུ་ལུས། མི་ཚང་མ་གཅིག་རྗེས་གཉིས་མཐུད་ཀྱིས་སོང་ཚར་དུས་ང་རང་སུན་སྣང་དང་ཡིད་སྐྱོ་བའི་བསམ་པ་ཅིག་ཅར་དུ་སྐྱེས། བདག་གིས་དྲན་ཞིང་དུངས་པའི་དྲིན་ཆེན་ཨ་མ་སླེབས་པར་དུས་ཚོད་ཕྱེད་ཀ་ཙམ་ལ་སྒུག་ཀྱང་མ་ཡོང་བས། སྒོ་ཁའི་གྲུ་ཟུར་ཞིག་ཏུ་ཙོག་པུར་བསྡད་དེ་དམར་མདངས་རྒྱས་པའི་མཁུར་ཚོས་མགོ་ནས་དྭངས་གསལ་མཆི་མའི་རྡོག་པོ་ནི་ཕྲེང་ཐག་ཆད་པ་བཞིན་ལྷུང་ནས་འདང་རྒྱག་གི་ནང་དུ་ལྷུང་སྟེ། འཇིག་རྟེན་འདིར་ང་ལ་ཆེས་ཤ་ཚ་བ་ནི་ཨ་མ་ཡིན་ཡང་དེ་རིང་ད་དུང་ང་རང་ལེན་པར་མི་ཡོང་བ་ཅི་ཡིན་པར་བསམ་བློ་གཏོང་དུས། གློ་བུར་དུ་ཨ་མས་ངའི་མིང་ནས་བོས་བྱུང་བས། ང་རང་འཕྲལ་དུ་ཡར་ལངས་ཏེ་ང་རང་འབོད་པའི་ཕྱོགས་སུ་བལྟས་པ་ན་ཨ་མའི་ལུས་ལ་ས་རྡུལ་གྱིས་ཁེངས་ཤིང་། ཞལ་རས་ལ་ཧ་ཅང་ཐང་ཆད་པའི་ཉམས་འགྱུར་དང་བཅས་ཏེ་ང་ལ་ཚུར་ཤོག་ཅེས་པའི་ལག་བརྡ་སྟོན་གིན་ཡོད། ང་རང་བྱ་འཕུར་བ་ལྟར་རྒྱུག་ཐེངས་གཅིག་གིས་ཨ་མའི་སྐེ་ལ་འཁྱུད་པ་ན། མོ་ནི་དབུགས་ཧལ་ཧལ་བྱེད་བཞིན་ངའི་ལག་པར་དམ་པོར་འཇུས་ཏེ་གླ་གཏོང་རླངས་འཁོར་ཞིག་ལ་བསྡད་དེ་ཁྲོམ་རའི་ཟ་ཁང་ཞིག་གི་ནང་དུ་སོང་། རླངས་འཁོར་ལ་སྡོད་སྐབས་ངེད་གཉིས་ཀྱི་བར་ལ་ཁ་བརྡ་ཅི་ཡང་མེད། ཟ་ཁང་ནང་ལ་ཐོན་ཏེ་ངལ་ཅུང་ཙམ་གསོས་པས། མོས་ད་གཟོད་ང་ལ་ཐུགས་རྒྱལ་མ་བཞེང་། ལམ་བར་དུ་རླངས་འཁོར་མང་པོ་འཚང་ཁ་ཤིག་ཤིག་གི་ངང་ནས་ཡོང་བཞིན་ཡོད་པས། ང་རང་རླངས་འཁོར་དུ་བསྡད་དེ་ཡོང་ན་རྗེས་སུ་ལུས་འགྲོ་བས། རླངས་འཁོར་ལས་བབས་ཏེ་རྐང་ཐང་དུ་ཡོང་བ་ཡིན། དངོས་ནས་དགོངས་པ་མ་ཚོམ། བུ་མོ་ཁྱོད་རང་སེམས་ཁུར་ལ་བསྟད་སོང་། རྗེས་ཕྱོགས་ང་རང་མགྱོགས་པོར་ཡོང་ངེས་ཡིན། ཞེས་ཟེར་བས་ང་རང་གི་མགྲིན་པ་བརྣངས་བཞིན་སྐྱོན་མེད་ཅེས་ཟེར་བཞིན་ངུ་ངག་དང་སྐྱོ་བས་མནར་བཞིན་ཨ་མའི་པང་ལ་སྔས་ཏེ་བསྡད། མཚམས་དེར་ཟ་ཁང་གི་ཞབས་ཞུ་བས་ཟ་མ་དཀར་ཡོལ་གང་ཁྱེར་ཡོང་སྟེ་ཅོག་ཙེ་སྟེང་ལ་བཞག ངའི་སེམས་ལ་ཨ་མ་ཧ་ཅང་ལྟོགས་ཡོད་པ་ཁོ་ཐག་ཡིན་པས་མོ་ལ་འཐུང་དུ་འཇུག་དགོས་སྙམ་སྟེ་ཨ་མ་ཁྱེད་ཀྱིས་བཞེས་དང་ང་རང་མི་ལྟོགས་ཞེས་བཤད་པ་ན། མོས་མགོ་བོ་གཡུག་ཞོར་དུ་ང་ལ་ངས་ནངས་ཇ་རྒྱགས་པོ་ཞིག་འཐུང་ཡོད་ཅེས་དཀར་ཡོལ་ངའི་མདུན་དུ་བཞག ངས་མོ་ལ་བཙན་གྱིས་འཐུང་དུ་བཅུག་མོད། འོན་ཀྱང་མི་འཐུང་ཟེར་བས་ང་རང་འུ་ཐུག་ཐབས་ཟད་ཀྱི་ངང་ནས་མི་འཐུང་ག་མེད་བྱུང་། མོས་ཟ་ཁང་གི་སྦྱིན་བདག་ལ་སྒོར་མོ་སྟེར་སྐབས་ལག་ན་སྒོར་ལྔ་བཅུ་མ་གཏོགས་མེད་ན་ཡང་། སྒོར་བཅུ་གཅིག་བླངས་ཏེ་སྦྱིན་བདག་ལ་བྱིན་པ་དང་ལྷག་མ་རྣམས་ང་ལ་བྱིན་ཏེ་ཁྱོད་རང་ལ་མཁོ་བའི་སློབ་སྦྱོང་གི་ཡོ་ཆས་དང་སིལ་ཏོག་འགའ་ཉོ་རུ་སོང་ཟེར། ཆུ་ཚོད་གསུམ་དང་སྐར་མ་ལྔ་བཅུའི་སྟེང་དུ་སྤྱི་སྤྱོད་རླངས་འཁོར་ས་ཚིགས་སུ་ཤོག་ཟེར་བས། ངས་ཀྱང་ཡ་ལན་སྟེར་ཞོར་ཚོང་ཁང་དུ་སོང་སྟེ་རང་ལ་མཁོ་བའི་དངོས་པོ་ཉོས་ཏེ་སོང་བ་ན་མོས་གནས་དེར་ང་ལ་སྒུག་འདུག ངེད་གཉིས་རླངས་འཁོར་ལ་བསྡད་དེ་བདེ་བླག་ངང་ཡུལ་ལ་ཐོན་སོང་། ཉིན་དེའི་དོན་དག་དེ་ལས་ངས་འཇིག་རྟེན་འདིར་བཀའ་དྲིན་གཞལ་དུ་མེད་པ་ནི་དྲིན་ཆེན་མ་ལོ་ཡིན་པ་ཚོར་བྱུང་ལ། བྱམས་དང་སྙིང་རྗེ་ཅན་དེ་ཡང་ཨ་མ་ཡིན་པ་ཤེས།
ཨ་མ་ལགས། བུ་མོ་ངས་ཆུང་དུས་སུ་ཁྱེད་ལ་མི་དགའ་བའི་རྣམ་འགྱུར་བསྟན་པ་དང་། ཁོང་ཁྲོ་ཡི་མེ་ལྕེ་འབར་དུ་བཅུག་མོད། འོན་ཀྱང་ད་ནས་བཟུང་སྟེ་བུ་མོ་ངས་ཁྱེད་ཀྱི་རི་རབ་ལས་མཐོ་བའི་བཀའ་དྲིན་གཞལ་ཁོ་ཐག་ཡིན། མཐར་ཨ་མ་ཁྱེད་ཀྱི་ལུས་ལ་ན་ཚ་མེད་པ་དང་། ཁ་ལས་རླུང་རྟ་དར་བ། བསམ་དོན་ཡིད་བཞིན་དུ་འགྲུབ་པར་སྨོན།
སྤེལ་དུས། : 2022-03-18
བླ་མེད་ཀྱི་བརྩེ་སེམས།

མི་ཚེ་ནི་དཀའ་སྡུག་དང་ཀྱག་ཀྱོག་གི་ལམ་ཕྲན་རིང་པོ་ཞིག་ཡིན། ང་ཚོ་ལམ་ཕྲན་འདི་རུ་ཞུགས་པ་ན། “གནམ་ནས་བག་ལེབ་ལྷུང་བ”ཞེས་པའི་དཔེ་ཞིག་མེད་པ་རྟོགས་སོང་། ཡིན་ཡང་དུས་དེ་ནས་བཟུང་ཁྱོད་ཀྱིས་རང་གི་ཉེ་འཁོར་དུ་ནམ་ཡང་ཁྱོད་ལ་ཉེ་ཞིང་། ཁྱོད་ལ་དགའ་བའི་མི་གཉིས་ཡོད་པ་ཤེས་སམ། མི་དེ་གཉིས་ནི་ཚེ་གང་བོར་རང་ཉིད་སྡུག་ཀྱང་ཕངས་སེམས་ཅི་ཡང་མེད་པར་བརྩེ་བ་ཡོད་ཚད་ཁྱོད་ལ་གནང་མཁན། རེ་བ་ཡོད་ཚད་ཁྱོད་ལ་བཅོལ་མཁན། བདེ་སྐྱིད་ཡོད་ཚད་ཁྱོད་ལ་བསྐྲུན་ནས་དབུ་སྐྲ་རིམ་བཞིན་དཀར་པོར་འགྱུར་བཞིན་པའི་ང་ཡི་དྲིན་ཆེན་ཕ་མ་རེད།
བདག་ནི་ཆུང་དུས་སུ་རྒྱང་རིང་དུ་འཕུར་འདོད་ཀྱང་འཕུར་མི་ཐུབ་པར་ཕྱིར་སར་ལྷུང་འགྲོ་བའི་བྱེའུ་ཆུང་ཞིག་ཡིན་ལ། བྱེའུ་ཆུང་གཞན་དང་འདྲ་བར་འཕུར་ཐུབ་པའི་དུས་སུ་སླེབས་ནའང་། ནམ་རྒྱུན་སྒེའུ་ཁུང་ལས་ཕྱི་རོལ་གྱི་འཇིག་རྟེན་ལ་བལྟས་ནས་བྱེའུ་གཞན་ལ་ཡིད་སྨོན་བྱེད་པ་ལས། བྱེའུ་གཞན་དང་མཉམ་དུ་ནམ་མཁར་འཕུར་ནས་ནམ་འཕངས་བསྟོད་པའི་ལས་དབང་མེད་པ་དང་འདྲ་བར། ལུས་སྟོབས་ཞན་པས་ནམ་རྒྱུན་ཚ་རྒྱུ་ན་རྒྱུ་ཅུང་མང་བ་དང་། མ་རབས་ཡིན་པས་དོན་ངན་བཟོ་རྒྱུའང་ཅུང་མང་། ཡིན་ཡང་། ངའི་འགྲམ་དུ་དྲིན་ཆེན་ཕ་མ་གཉིས་ཀ་ཡོད་པས། ཁོང་གཉིས་ཀྱི་ཁ་ཏ་དང་སློབ་གསོས་མ་རབས་ཐ་ཤལ་གྱི་ང་རང་ཅུང་ཚད་ལྡན་ཅན་དུ་གྱུར་ཏུ་བཅུག་པར་མ་ཟད། ལྷག་པར་དུ་ཁོང་གཉིས་ཀྱི་བརྩེ་སེམས་དྲོད་མའི་སྲུང་སྐྱོབ་འོག་ཏུ། ཚ་རྒྱུ་ན་རྒྱུ་མང་བའི་ང་རང་ད་གཟོད་མུ་མཐུད་དུ་འཇིག་རྟེན་འདི་རུ་འཚོ་ཐུབ་སོང་།
བདག་ལོ་བདུན་ལ་སོན་པའི་ལོ་དེའི་དགུན་ཁར། བདག་གིས་སེམས་ཆུང་མ་བྱས་པར་དུག་རྩྭ་ཞིག་ཟོས་པས། ཕོ་བ་ན་ནས་རྒྱུན་ལྡན་ལྟར་འགུལ་སྐྱོད་བྱེད་དཀའ་བའི་གནས་སུ་ལྷུང་། སྐབས་དེར་ཕ་མ་གཉིས་ཀྱིས་རྒན་པའི་ཁ་ཏ་ལྟར་ང་ལ་དེ་ལ་ཕན་ཐོགས་སྲིད་པའི་སྨན་མང་པོ་འཐུང་དུ་བཅུག འོན་ཀྱང་ཉིན་དེའི་མཚན་མོར། ང་རང་སང་དྲགས་སུ་སོང་མེད་པ་མ་ཟད། ད་དུང་དུས་ཚོད་མང་པོ་དལ་འགོར་བྱས་ཟིན་པས། ལུས་ཟུངས་ཉམས་ནས་སར་འབྱར་བ་ལྟར་གྱུར་བ་དང་། མིག་གཉིས་ཀྱང་འབྱེད་པའི་གསོན་ཤུགས་མེད་པར་གྱུར། སྐབས་དེར་ཕ་མ་གཉིས་ཀྱི་སེམས་ཧ་ཅང་འཚུབ་ནས་མྱུར་བ་མྱུར་དུ་ང་རང་སྨན་ཁང་དུ་ཁྱེར་ནས་རྒྱུག ལམ་བར་དུ་ངའི་སེམས་སུ་རང་ཉིད་ཀྱི་མི་ཚེ་འདི་ལྟར་ཡོངས་སུ་རྫོགས་སྲིད་སྙམ། ཕ་མ་གཉིས་ཀྱིས་ང་རང་ཁྱེར་ནས་གྲོང་རྡལ་གྱི་སྨན་ཁང་དུ་སླེབས་པ་ན། ངའི་རྣ་ཡིས་ཐོས་ཐུབ་པ་ནི་སྨན་པ་གཅིག་རེ་གཅིག་རེ་ཡིས“ང་ལ་ཐབས་མི་འདུག”ཅེས་བཤད་པའི་སྐད་ཆ་ཚིག་འདི་དང་། མིག་གིས་མཐོང་ཐུབ་པ་ནི་ཕ་མ་གཉིས་ཀྱིས་ང་རང་དམ་པོར་པང་དུ་བཟུང་སྟེ་བྲེལ་འཚུབ་འཚུབ་ཀྱིས་སྨན་ཁང་གཅིག་རེ་གཅིག་རེ་བཞིན་རྒྱུག་པ་དེ་ལས་ཅི་ཡང་མེད། སྐབས་དེར་ང་རང་སྔར་ལས་ཀྱང་རེ་ཐག་ཆད། ཚོར་བ་ལ་མུ་མཐུད་དུ་འཇིག་རྟེན་འདི་རུ་གསོན་པའི་ཆེས་མཐའ་མཇུག་གི་རེ་བ་ཉག་གཅིག་དེའང་མེད་པར་གྱུར་པ་དང་མཚུངས། ཡིན་ཡང་ཏག་ཏག་སྐབས་དེར། ངས་སྨན་པ་ཞིག་གིས“ང་ལ་ཐབས་མི་འདུག ངེས་པར་དུ་རྫོང་གི་སྨན་ཁང་ལ་འགྲོ་དགོས”ཞེས་པའིསྐད་ཆ་ཞིག་ངའི་ཕ་མ་གཉིས་ལ་བཤད་ཀྱིན་པ་ཐོས། དེ་མ་ཐག་ཏུ་ཕ་མ་གཉིས་ཀྱིས་ང་རང་བཟུང་སྟེ་རྫོང་ཐོག་གི་སྨན་ཁང་དུ་ལམ་ལ་ཆས་སོང་། དེ་ནས་ཅུང་འགོར་རྗེས་ང་རང་སད་པ་ན། རང་ཉིད་ཨ་མས་པང་དུ་བཟུང་སྟེ་སྨན་ཁང་གི་ནང་དུ་རྒྱུག་བཞིན་པ་ཤེས། དེ་ནས་ང་རང་ཡང་བསྐྱར་སད་པ་ན། ངས་རང་ཉིད་རྫོང་གི་སྨན་ཁང་གི་མལ་ཁྲིའི་སྟེང་དུ་སྨན་ཁབ་རྒྱབ་འདུག་པ་དང་། མལ་འགྲམ་དུ་རང་ཉིད་ལ་ཆེས་སྙིང་ཉེ་ཞིང་བཀའ་དྲིན་གཞལ་དུ་མེད་པའི་ཕ་མ་གཉིས་ཀ་ཡོད་པ་ཤེས་པ་མ་ཟད། ད་དུང་རང་ཉིད་ལ་ཕ་མ་གཉིས་ཀྱིས་ཡང་བསྐྱར་ཚེ་སྲོག་ཅིག་བསྐྲུན་ཟིན་པ་ཀུན་ལས་ཀྱང་གསལ་བོར་ཤེས།
ཕྱི་ཉིན་ཞོགས་པར། ང་རང་སང་དྲགས་སུ་སོང་ནས་འགུལ་སྐྱོད་ཀྱང་བྱེད་ཐུབ་པར་གྱུར།
དུས་དེ་ནས་བཟུང་། ངས་ཕ་མ་ཞིག་གིས་རང་གི་ཤ་ལས་ཆད་པའི་བྱིས་པ་ལ་བཅིངས་པའི་བླ་ན་མེད་པའི་བརྩེ་སེམས་དེ་ནི་ཅི་འདྲའི་སྟོབས་དང་ལྡན་པ་ཞིག་ཡིན་པ་གསལ་བོར་ཚོར་བྱུང་།
སྤེལ་དུས། : 2022-03-18
དྲིན་གཟོ།

མི་གཞི་ནི་གསེར་དང་འཇིན་རྟེན་ནི་རྒྱ་མ་ཞིག་ཡིན་པའི་དབང་དུ་བཏང་ན། མི་ལ་ལ་ལྗིད་ཤུགས་ཀྱིས་མར་འདྲུད་སྲིད་ལ། མི་ལ་ལ་ནི་ནམ་མཁའི་མཐོངས་སུ་འདེགས་སྲིད་པས། མི་ཞིག་གི་མི་གཞི་ཡིས་༼ཕ་མ་གཅིག་གི་བུ་ཕྲུག དགེ་རྒན་གཅིག་གི་སློབ་ཕྲུག༽བར་ལའང་དེ་འདྲའི་ཁྱད་པར་རམ་བར་ཁྱད་ཆེན་པོ་འབྱུང་དུ་འཇུག་སྲིད། དེ་བས། ང་ཚོ་མི་སུ་དང་སུ་ཞིག་ཡིན་རུང་དེ་ལ་ཆེས་གདོད་མར་གསེར་ལས་ལྷག་པའི་མི་གཞི་ཞིག་མཆིས་པའི་རྨང་གཞིའི་སྟེང་ད་གཟོད་ཆེ་བ་ལ་གུས་བཀུར་དང་ཆུང་བ་ལ་བྱམས་སྐྱོང་། དྲིན་ཆེན་ལ་དྲིན་གཟོ་བཅས་བྱས་ན་དེ་ནི་གངས་རི་ལྟར་དཀར་ལ་ནག་ནོག་གི་དྲི་མ་ཅི་ཡང་མ་གོས་པའི་རྣམ་དག་གི་དྲིན་གཟོ་ཞིག་ཡིན་པར་འདོད་ལ། རང་གི་ནང་སེམས་ནས་ལྷག་བསམ་རྣམ་དག བློ་སེམས་རྩེ་གཅིག་གིས་ཕ་མ་དང་དགེ་རྒན་སོགས་ལ་དྲིན་གཟོ་བ་ནི་འཇིན་རྟེན་གྱི་དྲིན་ཆེན་མི་ལ་མཁོ་བའི་རྣམ་དག་གི་དྲིན་གཟོ་དེ་ཡིན་པར་ངེས།
གཙང་མཁས་གཞན་ལ་ཕན་པར་འདོད་ལ། རྒྱུད་དུ་དུས་ནམ་ཡང་གཞན་གྱི་དོན་དུ་ཡོད་ཚད་བློས་གཏོང་བར་ཕོད་པའི་དགེ་བའི་བཤེས་གཉེན་དམ་པ་ནི་ང་ཚོ་སློབ་བུ་ཞིག་ལ་མཚོན་ན་ལམ་སྟོན་གྱི་སྒྲོན་མེ་དང་། ལྷགས་པ་འུར་འུར་ལྡིང་བའི་དགུན་གཞུང་གི་མེ་ཕུང་། ཚ་གདུག་ཆེ་བའི་དབྱར་གཞུང་གི་རླུང་བསེར་བུ་དེ་ག་ལ་མིན། ཁྱེད་ཀྱིས་སློབ་བུ་ང་ཚོ་རིག་གནས་ཤེས་བྱ་ཡི་ཐང་ཆེན་དུ་ཁྲིད་དུས། དཔའ་ངར་ཞུམ་མེད་ཀྱི་སྤོབས་པ་དང་། གངས་ལྟར་དཀར་བའི་ལྷག་བསམ་ཞིག་ཡ་ཆུང་གི་སྙིང་ཁོག་ཏུ་ཉར་ཏེ་དུས་ནམ་ཡང་ང་ཚོ་ལ་ཕྱིར་ནུར་རམ་ལྡོག་ལམ་དུ་འགྲོ་བའི་བྱ་སྤྱོད་ནམཐའ་དག་སེལ་དུ་བཅུག་ལ། གྲུ་གཟིངས་ལ་ཁ་ལོ་བསྒྱུར་ནས་མཐའ་ཡས་རྒྱ་མཚོའི་ནང་དུ་བསྐྱོད་པ་ཇི་བཞིན་སློབ་བུ་ང་ཚོ་ཤེས་བྱ་ཡི་ཐང་ཆེན་དུ་ཁྲིད་པ་དང་། ཐང་ཆེན་པོ་ཤོག་སྐྱ་ལྟེབ་ལྟེབ། ལ་རིང་བོ་གྲུ་གུ་སྒྲིལ་སྒྲིལ། ཁིས་ཉག་ག་སྒྲོག་གུ་རྟོལ་རྟོལ་བཅས་བྱས་ཏེ་ནངས་སྐྱ་རེངས་དང་མཉམ་ལས། དགོང་སྐར་ཚོགས་དང་མཉམ་ཉལ་བཅས་བྱས་ཏེ་སློབ་ཕྲུག་དག་གི་ཆེད་དུ་ཁོམ་ལོང་དང་བྲལ་བའི་དགེ་བའི་བཤེས་གཉེན་དམ་པ་ཁྱེད་ནི་འཇིག་རྟེན་མི་ཡུལ་གྱི་ཆེས་རླབས་ཆེན་གྱི་མི་བུ་ཞིག་ཡིན་ལ། ཁྱེད་ཀྱི་དྲིན་ལན་ནི་ཀུན་གྱིས་བསྟོད་པའི་གནས་དང་བསྔགས་པའི་ཡུལ་ཡིན་པ་ནི་ཤེས་བྱ་དང་རིག་གནས་ཀྱི་སྟོབས་ཞན་པའི་སློབ་བུ་ང་ལྟ་བུ་ཞིག་གིས་སྨོས་མ་དགོས་པ་ཞིག་ཡིན།
༼བླ་མ་མེད་པའི་གོང་རོལ་ན། སངས་རྒྱས་བྱ་བའི་མིང་ཡང་མེད། བསྐལ་བ་སྟོང་གི་སངས་རྒྱས་ཀྱང་། བླ་མར་བསྟེན་ནས་བྱུང་བ་ཡིན།༽ཞེས་བརྗོད་པ་ཇི་བཞིན་དགེ་བའི་བཤེས་གཉེན་དམ་པ་ནི་སངས་རྒྱས་ལས་ལྷག་པ་སྟེ། ཁོང་གི་གཞན་དོན་གཉེར་བའི་བསམ་པ་ནི་ཐེག་པ་ཆེན་པོ་ལས་འགོངས་ཤིང་། བྱམས་དང་སྙིང་རྗེ་ནི་བྱང་ཆུབ་སེམས་དཔའ་ལས་ཀྱང་འགོངས་ཡོད་པ་སྟེ། སློབ་ཕྲུག་པྲ་ཆལ་རྣམས་ཀྱི་སྤྱོད་ངན་མང་པོ་ཞིག་ཁོང་གིས་གཅར་རྡུང་ཅི་ཡང་མ་བྱས་པར་བྱམས་དང་བརྩེ་བ་ལྡན་པའི་ངང་ནས་སློབ་གསོ་པདྨ་དཀར་པོ་རང་བྱོན་གྱིས་རང་ཤུགས་ཀྱིས་འཛོམས་པར་བྱེད་པ་དང་། སློབ་བུ་རྣམས་རང་ཉིད་ཀྱི་བུ་ཕྲུག་གི་ཚད་དུ་བཞག་ནས་དཔྲལ་བའི་མིག་དང་ཁོག་གི་སྙིང་བཞིན་གཅེས་སྐྱོང་བྱེད་ལ། དུས་རྒྱུན་གྱི་ལྔ་རིག་གི་སྐྱེད་ཚལ་འདིའི་སློབ་སྦྱོང་གི་འཚོ་བའི་ཁྲོད་དུ་ང་ཚོ་ལ་ཕ་མ་དང་དགེ་རྒན་གཉིས་ཀྱི་བྱེད་ནུས་ཐོན་པ་སྟེ། ང་ཚོ་མུན་ནག་གི་འཇིག་རྟེན་དུ་མགོ་འཁོར་ནས་དཀར་གསལ་ཟླ་བའི་འོད་སྣང་ངམ་ཁྲི་གདུགས་ཉི་མས་འོད་སྣང་ཞིག་འདོད་སྤྲོད་བྱེད་པར་རེ་སྒུག་བྱེད་དུས། དགེ་བའི་བཤེས་གཉེན་ཁོང་རང་མགྱོགས་མྱུར་རླུང་གི་རྒྱུ་རྩལ་དང་བསྟུན་ནས་ང་ཚོའི་གམ་དུ་ཕེབས་ཏེ་མུན་ནག་གིས་ཁེངས་པའི་གནས་དེ་དཀར་གསལ་འོད་སྣང་གིས་ཁེངས་པའི་གནས་མཆོག་ཅིག་ཏུ་བསྒྱུར་སྲིད་པ་དང་། ་ང་ཚོ་དོན་དག་ག་གེ་མོ་ཞིག་གི་དབང་གིས་ཡིད་སྐྱོ་ནས་སྡུག་བསྔལ་གྱི་རྒྱ་མཚོར་ལྷུང་དུས། ཁོང་ནི་སློབ་ཕྲུག་ང་ཚོའི་ཕ་མ་དང་འདྲ་བར་ང་ཚོ་ལ་སེམས་གསོ་བྱེད་སྲིད་ལ། གཏམ་ཀུ་རེ་སྣ་ཚོགས་བཤད་ནས་ང་ཚོའི་སེམས་ཀྱི་དགའ་བའི་དྭངས་མ་འདྲེན་པར་བྱེད། དེ་བས། དགེ་བའི་བཤེས་གཉེན་དམ་པ་ནི་ང་ཚོ་སློབ་བུ་རྣམས་ཀྱིས་དྲིན་གཟོ་རུ་འོས་པའི་རླབས་ཆེན་གྱི་མི་བུ་དེ་ཡིན།
དགེ་བའི་བཤེས་གཉེན་དམ་པ་ལགས། ཁྱེད་ནི་གཞན་ཕན་གྱི་ལྷག་བསམ་མངའ་ཞིང་། མི་རིགས་སློབ་གསོའི་བྱ་བཞག་ལ་བློ་སེམས་རྩེ་གཅིག ལྷག་བསམ་རྣམ་དག་གིས་འབད་པ་བྱེད་པའི་དུས་རབས་ཉེར་གཅིག་གི་མི་བུ་རླབས་ཆེན་ཞིག་ཡིན་པས། ཕྱིས་སུ་སློབ་བུ་ང་ཚོ་ཡང་ཁྱེད་དང་ཁྱེད་ལྟ་བུའི་གཞན་ཕན་ལྷག་སེམས་མངའ་བའི་མི་བུ་ཞིག་བྱས་ཏེ་མི་རནས་རྗེས་མ་དག་ལ་ལྷག་བསམ་རྣམ་དག་གིས་ཞབས་ཞུ་བསྒྲུབ་མཁན་པ་བྱེད་པའི་འདུན་པ་ངང་ངམ་ཤུགས་ལ་སྐྱེས་བྱུང་།
སྤེལ་དུས། : 2022-03-18